Oqaluuserisassani immikkoortoq 21-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik
aqutsisoq: Inatsisartut Siulittaasuat Anders Andreassen.
Konrad Steenhold, Kultureqarnermut, Ilinniartitaanermut Ilageeqarnermullu Naalakkersuisoq:
Isumaginninnermi perorsaassussanik ilinniartitsineq pillugu Inatsisartut inatsissaattut siunnersuut Naalakkersuisut sinnerlugit matumuuna saqqummiutissavara. Kultureqarnermut, Ilinniartitaanermut Ilageeqarnermullu Pisortaqarfiup 1997-mi suleqatigiisitaliaata missingersuusiaa tunngavigalugu siunnersuut suliarineqarsimavoq.
Suleqatigiisitaliami tassani Perorsaanermut Ilinniarfik; KANUKOKA,, Perorsaasut Ilinniarsimasut Peqatigiiffiat, Inunnik Isumaginnittut Peqatigiiffiat, Sulisoqarnermut Pisortaqarfik, Isumaginninnermut, Suliffeqarnermut Pisortallu Suliassaqafiutaannut Pisortaqarrfik kiisalu Kultureqarnermut, Ilinniartitaanermut Ilageqarnermullu Pisortaqarfik ilaasortaatitaqarput.
Suleqatigiisitaliamiut suliassiissummi piumasarineqarpoq kommunit, Namminersorullutik Oqartussat suliffiillu namminersortut isumaginninnermi perorsaasutut ilinniarsimasunik pisariaqartitsinerat suleqatigiissitaliap aallavigissagaa. Aammattaaq ilinniartitaanerup siunertaa, ilinniartussatut tiguneqartussamut piumasaqaatit, ilinniartitaanerup imaa annertussusialu, misilitsinnerit, ilinniartitaanerup aqunneqarnera kiisalu annertunerusumik ilinniagaqarnerit ilinniaqqinnerillu siunnersuutip imarisimavai.
Siunnersuummi ilinniartitaanikkut ingerlatsineq pillugu Naalakkersuisut nassuiaasiaat 1995-imeersoq aallaavigineqarpoq, tassanimi ilinniartitaanerit (nunarput ataatsimut isigalugu) pitsaassutsimikkut qafasissutsimikkullu nunatsinni Skandinaviamilu inuutissarsiorsinnaanermut ilinniarsinnaanermullu piginnaaniliiffiunissaat inassutigineqarmat. Aammattaaq Inatsisartut peqqussutaata massakkut atuuttup allanngortiterneqarnerani ilinniartut piginnaassutsimikkut tunngavigisaasa nukittorsarneqarnissaat, ilinniartitsinerit ataqatigiinneqarnerisa qularnaarneqarnissaat aamma ilinniartitsinerup pitsaanerulersinneqarnissaata qularnaarneqarnissaa aallaavigineqarput.
Meeqqat atuarfianni ilinniartitsisussanik ilinniartitsineq aamma isumaginninnermi suliaqartussanik ilinniartitsinerit pillugit Inatsisartut peqqussutaat massakkut atuutoq 1989-meersuuvoq.
Kultureqarnermut, Ilinniartitaanermut Ilisimatusarnermullu Naalakkersuisup suleqatigiissitaliaata 1992-mi naasuiaasiaa tunngavigalugu isumaginninnermi perorsaasunngornianik ilinniartitsinerup Ilinniarfissuup ataani ataatsimut aqutsinermut avissaartinneqarnissaa Naalakkersuisut siunnersuutigisimavaat. Suleqatigiissitaliap kaammattuutigisaasa kingunerisaannik isumaginninnermi perorsaasunngorniat ilinniartitaanerata avissaartinneqarnissaa Ilulissanullu nuunneqarnissaa 1993-mi aalajangerneqarpoq. Ilinniartitsinerup ilinniaqqinnissamullu periarfissat nukittorsarneqarnissaat kiisalu STI-mi isumaginninnermut peqqissaanermilu ikiortinik ilinniartitsinerup isumaginninnermi perorsaasunngornianik ilinniartitsinermut ilaatinneqalernissaa siunertaralugu tamanna pivoq.
Ilulissani ilinniartitaanermi isumaginninnermut perorsaasunngorniat siulliit 1995-mi augustimi aallartipput, tassanilu ilinniartut 17-it ukioq manna junimi naammasinissaat naatsorsutigineqarluni - ukiuni qaangiuttuni naammassisartunut sanilliullugit 40%-it missaannik amerleriarlutik. Aammattaaq 1996-imi aasakkut Avannaani meeqqerisutut ilinniarsimasut immikkut ilinniartitaanerat misileraanertut aallartinneqarpoq. Tassami ukioq manna aprilimi ilinniartut arfinillit naammassinissaat naatsorsuutigineqarpoq. Tassa perorsaasut katillugit 23-it ilinniarnerminnik 1998-imi naammassinnissinnaassapput.
1997-imi oktober-imi suleqatigiissitalianik pilersitsisoqarpoq ilinniarfimmi nutaami tassani misilittakkat katersorneqarsimasut aallaavigalugit ilinniartitaanerup inaarutaasumik allanngortinneqarneranik suliaqartussamik.
Isumaginninnermi perorsaasunngornianik ilinniartitsineq massakkut atuuttoq imarisamigut nunani Skandinaviamiittuni ilinniartitsinernut naligisaminut naappertuulluinnartuunngilaq. Aammattaaq ilinniagaqartut ilinniarnerminnik aallartitsinerminni ilisimasatigut pisinnaasaat pitsaanngippallaartartut paasinarsisimavoq, taamatumalu kingunerisarsimallugu ilinniarnerup naanerani pisinnaasanik ilimagineqarsinnaasutut pissarsisarsimannginnerat.
Siunnerusukkut matumuuna ilinniartitaaneq taanna ataatsimiut isigalugu annertuumillu pitsanngoriartinneqarsimavoq, immikkullu ilinniagaqarnissamut periarfissaqalersitsisoqarsimalluni. Isumaginninnermi perorsaasut ukiumikkut assigiinngitsosrpassuarnit attorneqartarput. Atuisunut nalinginnaasunuinnaq atatillugu suliassanik ingerlatsisartussanngillat, aammali atuisunut timimikkut eqqarsartaatsimikkulluunniit kinguarsimasunut atatillugu suliassanik ingerlatsisartussaallutik. Ataatsimut isigalugu isumaginninnikkut paaqqinniffiit annertuumik piorsaavigineqarsimapput, tamatumalu saniatigut ineriartorneq suliassaqarfiup taassuma iluani immikkut ilinniagaqartalernermut sammiveqaleriartorsimalluni. Atuisut siusinnerusumut sanilliullugu allaanerusumik annertunerusumillu ilinniartitaanerup imarisaanut piumasaqaateqalernerat aamma allaanerusumik annertunerusumillu ilinniartitaanerup imarisaanut piumasaqaateqalernerat aamma isumaginninnermi perorsaanikkut suliassaqarfinni sulisorineqartut tamarmik ilinniaqqinnissamut annertunerusumik ilinniagaqarnissamut periarfissaqalersinneqarnissaannik piumasaaqaatitaqarpoq.
Inatsisartut peqqussutaata massakkut atuuttup arlilitsigut allannguuteqartinneqarnissaa siunnersuutigineqarpoq, taakkunanilu pingaarnerpaat maani taaneqassallutik.
Isumaginninnermi perorsaasunngornianik ilinniartitsineq immikkut malittarisassaliuunneqassasoq Naalakkersuisut siunnersuutigaat, soorlu ilinniartitsisunngornianik ilinniartitsineq isumaginninnermilu siunnersortinngornianik ilinniartitsineq 1996-mi taamatut pineqarsimasut.
Isumaginninnermi perorsaasunngornianik ilinniartitaanermut siunnersuisoqatigiinnik pilersitsisoqarnissaa Naalakkersuisut siunnersuutigaat.
Ilinniartitaanermut siunnersuisoqatigiit taakku ilinniagaqartunik soraarsitsinerit, semesterimut tullermut ingerlaqqitsitsinerit, semesterimi nikerianngitsoornissamut periarfissaq ilinniarnermillu nangitseqqinnissaq pillugit aalajangiinermut naammagittaalliuuteqarfiussapput.
Aammattaaq ilinniartitaanermut siunnersuisoqatigiit taakku ilinniagaqartunik soraarsitsinerit, semesterimut tullermut ingerlaqqitsitsinerit, semesterimi nikerianngitsoornissamut periarfissaq ilinniarnermillu nangitseqqinnissaq pillugit aalajangiinernut naammagittaalliuuteqartarfiussapput.
Ilinniartitaaneq ukiup affaanik sivitsorneqassasoq Naalakkersuisut siunnersuutigaat, ilinninartitaaneq ukiunik pingasunik affarmillu sivisussuseqalersillugu.
Peqqussummut atuuttumut sanilliullugu ilinniartussatut tiguneqarnissamut piumasaqaatit sakkortusineqarnerat siunnersuutip aamma imaraa. Tamatuma kingorna ilinniartussatut tiguneqarnissami piumasaqaataalerpoq qinnuteqartoq 20.nik ukioqalereersimassasoq, ilinniarnertunngorniatut taassumaluunniit assiganik ilinniagaqarfimmi angusaqarluni naammassisimassasoq, kiisalu ukiumi ataatsimi sulinermigut misilittagaqartuussasoq. Aammattaaq qinnuteqaateqartut ilinniartussatut tiguneqarnissaminnut taamatut qinnuteqartut ilinniartussatut tiguneqarnissaminnut misilitsinnerminni angusippata, ilinniagarisimasaalu atuagarsornikkut isumaginninnermi perorsaasutut suliassaanut attuumassuteqarsimappata.
Ilinniartitaanerup sivitsorneqarnera ilinniartussatullu tiguneqarnissamut piumasaqaatit sakkortusineqarnerisa ilinniakkaminnik pitsaanerusumik naammassinnittartut amerlanerulernerannik kinguneqarnissaat naatsorsuutigineqarpoq.
Aammattaaq siunnersuut Perorsaanermut Ilinniarfiup ilinniarnermik aaqqissuussinerup suliarinissaanut pisussaaffeqalerneranik, Naalakkersuisullu Perorsaanermut Ilinniarfimmik oqaaseqaateqartitsitsereerlutik ilinniarnerup aaqqissuunneqarnerata imarisaanut malittarisassanik aalajangersaasinnaanerminnut piginnaatinneqarnerannik imaqarpoq.
Ilinniartitaanerup imarisaa allanngortinneqassanngilaq, sulinermik misiliineq ataasiinaagaluartoq marloriarneqartalersillugu, siulleq paaqqinnifimmi nalinginnaasumi aappaalu paaqqinniffimmi immikkut ittumi ingerlanneqartalersillugit, kiisalu immikkut ilinniagaq ataaseq aamma atuartitsissutit pinngitsoorani peqataaffigineqartussat pingasut: Apinngortitami asimilu inuuneq@, Apinnguaatit timersornerlu@ aamma Aattaveqatigiinneq, aaqqissuussaaneq, siulersuinerlu@ ilanngunneqassallutik.
Atuartitsissutit taaneqartut siulliit marluk ilinniagaqartut sulinerminni nunatsinni pinngortitamik atuinissamut periarfissaannik kiisalu pinnguarnikkut timersornikkullu ingerlatanik siunertaqartunik inuup timaanik nukittorsaasunik aallartisarnissamut periarfissaannik nukittorsaassussaapput. Attaveqatigiinneq, aaqqissuussaaneq siulersuinerlu ilinniartitaanermut ilanngutissalugit pisariaqarpoq, tassami isumaginninnermi perorsaasorpassuit ilinniareerlutik sulilernerminni paaqqinnittarfimmi pisortap suliassaanik suliaqalerajuttarmata.
Isumaginninnermi perorsaasut annertunerusumik ilinniartitaasarnissaannut ilinniarteqqinneqartarnissaannullu pisussaaffik Perorsaanermut Ilinniarfimmut nuunneqassasoq aamma siunnersuutigineqarpoq. Isumaginninnermi perorsaasut suliaqarfiini tamani sulisut pikkorissartinneqartarnerinik pilersitsisoqarnissaa massakkumiilli Kalaallit Nunaanni tamarmi sakkortuumik kissaatigineqarpoq.
Inatsisartut peqqussutaata matuma ukiumi ilinniagarfiusumi 1999/2000-imi atortuulersinneqarnissaa siunnersuutigineqarpoq.
Ilinniartitaanerup ukiup affaanik sivitsorneqarnissaanik siunnersuutip akuerineqarnerata ilinniagaqarnersiutinut aningaasartuuteqarnerulerneq kingunerissavaa. Taamaattorli aningaasartuutit taakku 2001 aallarnerfigalugu aatsaat malunniuteqalissapput, 2002-miilli tamakkiisumik malunniuteqalissallutik. Taamanikkuusamut ilinniagaqarnersiutit 884.000 kr.-nik amerlanerunissaat missiliorneqarpoq.
Ilinniartitaanerup ingerlanerani suliatigut piumasaqaatit sakkortusineqarnerisigut ilinniartitsisut pisinnaasaannut piumasaqaatit aamma sakkortusineqartussaapput. Tamatumani massakkut ilinniartitsisuusut pikkorinnerulersinneqarnernissaannik siullermik piumasaqaateqarfiuvoq, tamatumalu saniatigut annertunerusumik ilinniartitsinissamik ilinniaqqitsitsinissamillu ingerlaavartumik pisariaqartitsisoqalersussaalluni. Tassani aamma ilaapput ilinniartitsisut pisinnaasaqarnerunissaannik piumasaqarnerup kingunerisaanik ilinniartitsisut akissarsiaasa qaffaateqartinneqarnissaat. Aningaarsartuutit taakku 330.000 kr.-inut missingerneqarsimapput. Taakkununnga aamma ilanngutissapput aningaasartuutinut allanut aningaasartuutaanerusussanut 500.000 kr. -nik missingiussineq, matumani siullermik misiliinermi ilitsersortit angalasarnerinut, atuartitsinermi atortussanut naliliisartunut aningasartuutit, sulinermik misiliinerni ilinniartitsisut pikkorissartinneqartarnerannut allanullu aningaasartuutaanerusussat ilanngullugit eqqarsaatigalugit. Taamaattoq aningaasartuutit ataatsimut amerleriaataat tamakkiisumik aatsaat 2002-miit malunniutissapput.
Siunnersuut oqaaseqaatinik ilaqartinneqarpoq, siunnersuutillu aningaasatigut erseqqinnerusumik kingunerisassai innersuussutigalugit siunnersuut Inatsisartuni akuersaartumik oqaluuserineqarnissaanut matumuuna tunniunneqarpoq.
Ruth Heilmann, Siumut oqaaseqartua:
Qujanaq. Naalakkersuisut isumaginninnermi
perorsaasunik ilinniartitsineq pillugu peqqussutissatut siunnersuutaat Siumumi
misissuataareerlugu imatut oqaaseqaateqarfigissavarput.
Nunatsinni isumaginninnikkut sullissinerup
ullumikkut annertoorujussuunera takuneqarsinnaavoq, aningaasat
isumaginninnikkut atukkat allanut ilinniartitaanermulluunniit
aningaassaliissutinut naleqqiullugit malunnaatilimmik annertunerujussuummata.
Tamanna ilorraap tungaanut sangutissagutsigu annertuumik suliniuteqartariaqarpugut.
Inuit isumagineqarnissaminnut pisariaqartitsisut sullinneqassapput allallu
nammineersinnaassuseqartut nammineerlutik napatinniarnissaat
aqqutissiuttariaqarparput aamma suliffissanik annertusaajuarnikkut.
Suli amerlavallaaqqaat
suliffissaaleqinertik ilinniarfissaaleqinertillu pillugit ikiorsiissutinik
isumalluuteqaannalersimasut. Ullumikkut erseqqissartuarneqartariaqarpoq
inuiaqatigiinni aningaasalersuisut amerlanerulersimannginnerat,
illuatungaatigullu inuit isumagineqartussat amerliartuinnarmata. Meeqqerivinni
meeqqat,ulloq unnuarlu angerlarsimaffinniittut, utoqqaat innarluutillillu
allallu immikkut ittumik isumagisariaqartut amerlaqisut pitsaasumik isumagineqarnissaminnut
pisariaqartitsipput.
Pinaveersaartitsinermi pitsaaliuinermilu
siunnersuisunik susassaqartitsisunillu amigaateqarnerput
pisariaqartitsinerpullu aamma eqqarsaatigineqartariaqartut ilagaat. Nunanit
allanit tikisitassanik isumalluuteqarnerput piunnaarlugu tassuunakkulluunniit
nammineq ajornartorsiutivut aaqqinniartariaqarpavut, soorlu aamma Siumumiit
ilinniartitsisussaaleqinerput pillugu taamatut oqaaseqarfigisimagipput.
Isumaginninnikkut sullissisut
ilinniarsimasut pisariaqartitaanerat suaarutigineqartuartuuvoq aamma
akissaatitigut atugassarititaasut naammaginagit allanut sullivinnut
ingerlasarnerat takornartaanngilluinnarluni. Taamaattumik Siumumiit
isumaqarpugut maannakkut ilinniartitaanerisa aaqqissuuteqqinnerat ilutigalugu
aamma akissaataasigut atugarissaasigullu pitsanngorsaateqarnissaq ilanngulllugu
isumaginiartariaqaartoq.
Isumaginnikkut Ataatsimiitsitaliarsuup
isumaliuutissiissutaanik kaammattuunut pingaartitanut ilaalluinnarpoq,
piaartumik sulisussanik ilinniarsimasunik naammattunik peqalernissaq eqqarsaatigalugu
iliuuseqartoqartariaqartoq. Tassani kommunit oqaloqatigisarnerini aamma
saaffiginnissuteqartarnerini perorsaasunik amigaateqarnerujussuaq pillugu
piaartumik iliuuseqartoqaqqusisoqarnera Siumumiit qaanngiinnagassaanngitsutut
isumaqarfigigatsigu aamma tassuunakkut ilinniartunik amerlasaajuarnissaq
anguniarlugu iliuusseqartoqarnissaanik matumuunakkut ilungersuullugu
anguniartariaqartutut isumaqarfigaarput.
Uani inatsisissatut saqqummiunneqartumik
isumaginninnermi perorsaasunik ilinniartitsinerup, Ilulissani ingerlanneqartup,
pitsaanerulersinneqarnissaa siunertarineqarpoq. Tassa ilaatigut ukiup affaanik
ilinniartitaanerup sivitsorneqarnissaa inatsisiliunneqartussaalluni. Tamannalu
aningaasat ilinniarnersiutit atugassat annertusinissaanik kinguneqartussaalluni.
Ilinniartut namminneq ilinniartitaanermik pitsaanerusumik ingerlanneqalernissaa
piumasaqaatigisaraat nalunngilarput, ilaatigut annertunerusumik
atuagarsortinneqarnissaminnik, taamaattumik inatsisissatut saqqummiuneqartumik
anguniagaasut ersarissarneqarnissaat Siumumiit isumaqarfigaarput. Tassani aamma
suleqatigiissitaliap siammasissumik ilaasortaaffigineqartup nalilersuinera
tunngaviusunut ilaatinneqarmat iluaralugu, taamanikkut 1995-imi naalakkersuisut
nassuiaassaanik makkuusut sulinermut aallaavigineqarmata. Iliniartut
tunngavigisaat nukittorsarneqassasut ilinniartitaanerallu
ataqatigiissarneqassasut, ilinniartussat allamiut oqaasiinik atuisinnaangitsut
kalaallit qallunaallu oqaasiinik atuisinnaasutulli ilinniartussatut
tiguneqarnissaat qulakkeerneqassasoq. Ilinniagaqartut Kalaallit Nunaanni
nunanilu Skandinaviamiittuni sulisinnaanissaminnut ilinniaqqissinnaanermullu
qulakkerinneqassasut, minnerunngitsumilli ilinniartitaanerup pitsaassusia
pitsaanerulersinneqassasoq.
Siunertat taakku aallaavigalugit
inatsissap allanguutissaanik siunnersuutaasut suiliarineqarsimanerat
Siumut-miit iluarisimaaratsigu aamma oqaatigissavarput. Siumut-mit
pingaarteqalugu ilanngullugu angajoqqaanik ilaqutariinnillu ataatsimoortumik
siunnersuinerup annertuumik pisariaqartitaasup ilinniartunit
sammineqrnerunissaa, tamaginni pingaartillugu ilinniartitsissutaasariaqarnera
kaammattuutigerusullutigu.
Ullumikkut meerannguit angajoqqaaminnit
qimaguttitaaginnartarnerat pisussissamisuunngitsutut Siumut-miit isumaqarfigaarput.
Tassunga tunngatillugu isumaginninnermi iluarsaaqinnermi kaammattuutigineqartut
pingaarutillit ilagimmassuk. Allaat immikkut iliuseqarluni ilaqutariinnut
siunnersuisunik tamaginni ilinniartitsisoqarnissaanik, taamalu kommunini tamani
ilaqutariinik siunnersuisunik atorfilititsisoqarnissaa, tassa Afamilievejleder-inik@, erseqqissumik oqaatigalugu piumasaqaataalluni.
Angajoqqaammi tassaapput meeqqaminnut misigissuseqarnerpaallutillu
asanninnerpaat, pitsaasumillu perorsarneqarnissaannut namminneerlutik
akissussaanerpaat, minnerunngitsumillu misigissutsit aqunnissaannut
meeqqaminnut oqaassisussat.
Taamaattumik perorsaanermik
ilinniagaqartut angerlarsimaffiit siunnersorneqarnissaminnut pisariaqartitsisut
ornillugit ilitsersuisarnissaat pisariaqarnerpaatut allaat Siumut-miit
isumaqarfigineqarpoq. Meeraq qitiutillugu angajoqqaanullu toqqammaviullutillu
ikorfartueqataanissaat suliassaanni pingaarnerpaatittariaqarmat.
Ilinniartussanik noqqaasarnermi
sakkukippallaartumik sinaakkutaqarlunilu piumasaaqaateqarnissaq
pinaveersimatikkusupparput. Kikkulluunniit qitornaqartut meeqqerinermik
misilittagaqalereersut perorsaanermillu taamatut soqutigisaqalerlutillu
ilinniagaqarusuttut aamma tiguneqartarnissaminnut periarfissaqarnissaat
sapinngisamik ammatinniartuartariaqarmat. Ullummikkut ilinniartunik
amigaateqarluinnarnitsinni pisariaqarluinnartuuvoq immikkut ittumik
iliuuseqarluni aamma nunagisaq qimanngikkaluarlugu ilinniarsinnaanissaata
periarfissarsiunneqarnissaat, taammalu fag-inut isernissaminnut sanngiiffigisaqarpata
tapersersorlugillu sungiusartarneqartarnissaata periarfissarsiuttarnissaat.
Tassani aamma STI aamma atuarfillu suli annertunerusumik atorluarsinnaasutut
isumaqarfigalugit Siumut-imiit kaammattuutigissavavut.
Isumaginninnermi perorsaasutut
ilinniartitaaneq pillugu saqqummiunneqartut Siumut-imiit tapersersorpavut,
tusarniaanerit attuumassuteqarfiit tamakkiisumik tusarniaaffigineqarsimammata
kiisalu ullumikkut inuiaqatigiinni ilinniartitaanikkut perorsaanikkullu aqqutissat
pisariaqartitaasullu eqqarsaatigineqarllutillu ilanngunneqarneri, soorlu aamma
pinngortitaq, asimilu inuuneq, pinnguaatit timersornerlu ilanngunneqarluni
ilaallutik. Taamatut oqaaseqarluta Siumut-miit Naalakkersuisut
saqqummiussaqarnerat qujassutigaarput. Kultureqarnermi Ataatsimiitsitaliami
isummersorfigineqarnissaa piumasaralugu. Suleqataasut suleqataaqittussallu
sulilluarnissaanik kissaallugit. Naggataatigullu kommunini perorsaanermik
imaannaangitsumik suliaqartut tamaasa meeqqatsinnik ilitsersuillutillu
isumaginnilluartartut, meeqqerivinni atuarfinnilu taavalu utoqqaat illuini
ulloq unnuarlu angerlasimaffiusunik sulisut kiisalu innarluuteqartunik
sullissisut tapertaasullu sulinerannik suleqataannerannik qutsavigerusuppavut.
Taammalu ilinniarnerminnik ingerlataqartut soraarummeertussallu,
atorfissaqarteqisagut, tamaasa angusaqarluarnissaanik kissaakkumavavut.
Knud Sĝrensen, Atassutip oqaaseqartua:
Peqqussutissaq qulaani pineqartoq misissuataareerlugu, Atassut-miit oqaatigissavarput, Kultureqarnermut Ilageeqarnermullu Pisortaqarfiup suleqatigiissitaliaata missingersuussia tunngavigalugu, siunnersuutip matumap suliarineqarsimanera tutsuiginartutut isigigatsigu. Tassani pissutigaarput, suleqatigiissitaliami saqqummiussissut naapertorlugu, suleqatigiissitap ilaasortamigut katiterneqarsimanera immikoortunit assigiinngitsunit, tassa suliamut toqqavillugu aammalu ilisimasamikkut tutsuiginartunit ilaasortalersugaanerata peqqussutip pisariaqavissut qulaajarsimanissaat naatsorsuutigisariaqarmat.
Atassut-miit erseqqissumik oqaatigissavarput peqqussutissatut siunnersuut ilaatigut, qulaani taajukkagut pissutigalugit tamakkiisumik tapersersoratsigu. Naatsorsuutigaarpummi peqqussut Inatsiartuniit akuersissutigineqarpat, siunissaq aamma ungasinnerusoq eqqarsaatigalugu perorsaasunngornianik ilinniartitsineq toqqammavigissaarluni aammalu ilinniartunut ilinniartitsisunullu atugassarisitaasitigut naammaginartumik ingerlanneqarsinnaalissasoq. Maannamummi atugassarititaasut pissusiviusunut naleqqutinngitsutut aamma oqaatigineqarsimammata tassani.
Atassut-miit ilinniartitaanermut tunngatillugu siunertarput tassaavoq, nunatsinni kikkulluunniit ilinniarsimasut ima pitsaatigisumik ilinniartinneqarsimassasut, ajukkunnaateqaratik nunani allani ilinniagartik atorlugu, nunani allani atorfinnik ilinniakkaminnut tunngasunik tigusisinnaasariaqarlutik.
Saqqummiussissut naapertorlugu isumaginninnermi perorsaasunngornianik ilinniartitsineq maanna atuuttoq, imarisamigut nunani avannarlerni ilinniartitsinermut naligisaminut naapertuutinngilaq kiisalu ilinniarnermi allartitsinermi ilisimasat itikkattuusut paasineqarsimalluni. Tamanna Atassut-ip ilinniartitaanikkut anguniagaannut naleqqutinngilaq. Taamaattumik Atassut-imiit oqaatigissavarput peqqussummik allanngortitsiniarnermi allannguutissatut siunnersuutigineqartut saqqummiussiissummilu taagorneqartut isumatigilluinnaratsigit. Anguniagaq siunertatut naammassineqassappat maannakkornit sakkortunerusumik piumasaqaateqartariaqarpoq, tamannalu ilinniartunngorniartut aamma pisussaaffittut paasisariaqarpaat.
Saqqummiussinermi piumasaqaataasut erseqqilluinnartut pissutissaqanngilagut maani uteqqissallugit. Ilinniartitaanerulli sivitsorneqarnissaanik tiguneqarnissamillu piumasaqaatit sakkortusineqarnissaanik kissaatigineqartut Atassut-ip ilinniartitaanermik iliartullu pitsaasumik angusaqarnissaanik naalakkersuinikkut anguniagaanut naleqqulluarput.
Peqqussutip atuutilernissaa ukiumi ilinniarfiusumi 1999/2000 atulernissaa akerleriffissaqartinngilarput. Aningaasartuutitsigut kinguneriumaagassai akerlilissagaanni soorunami assigissavaa peqqussutissamut naaggaarneq, taammaattumik aningaasartuutissanut allilerinissat akerleriffissaqartinngilagut. Tamatumani aamma ilanngullugu ilinniartitsisut pisinnaasaanut piumasaqaatit sakkortusinerisa aningaasartuuteqarfiunerunissaannut atugassat ilanngullugit aamma isumaqataaffigaavut.
Johan Lund Olsen, Inuit Ataqatigiit oqaaseqartuat:
Isumaginninnermut perorsaasussanik ilinniartitsineq pillugu immikkut peqqussuteqarnissarput Inuit Ataqatigiit pissusissamisoorsorivarput, ilisimaneqartutuummi perorsaasunngorniarneq Nuummi ingerlanneqarunnaareerluni maanna ukiualunnguit matuma siornatigut Ilulissani ingerlanneqalereersimavoq, taammaalilllunilu maani Ilinniarfissuarmut atajunnaarluni immikkuulersinneqarsimalluni. Tamanna ilaatigut Inuit Ataqatigiit 1993-imi Namminersornerullutik Oqartussat suliffeqarfiutaasa sineriatsinnut aamma siammartitsertariaqarnerannik Inatsisartunillu tamarmiusunit tunngavisumik aamma isummerfigineqartumik aallaaveqarpoq, oqartariaqarpugullu tamanna iluatsilluarsimammat, tassami naalakkersuisup saqqummiussineratigut nuussineq immikkuulersitsinerlu unnersiutissaasimavorooq, aatsaammi aasaru taamak amerlatigisunik aammalu taama piumassuseqarpasitsigisunik perorsaasunngorimaartussanik naammassisoqartussaavorooq.
Peqqussutissatulli siunnersuut manna nuussisariaqarnermik aallaaveqaannarani aamma 1995-mi Inatsisartut ukiakkut ilinniartitaanerit ataatsimut isigalugit, nutaanik ullutsinullu naapertuuttumik siunnerfeqalertariaqalernerannik oqariartuuteqarsimanerannik aallaaveqarpoq. Tassami ilaatigut taamani akuersivugut aamma ilinniartitaanerit ataasiakkaat pitsaassutsimikkut iluarsartuussiffiginiarneqassasut, ilinniartitaanerit nunani allani, pingaartumik Skandinaviami ingerlanneqartut aamma nallersinnaangoqqullugit.
Inuit Ataqatigiit peqqussutissatut siunnersuut manna sukumiisumik misissuiffigereerlugu taamaatumik oqartariaqarpugut, siunnerfigisarput tamanna tutsuiginartumik maanna naammassiniarneqartussatut isikkoqarsorinarmat, perorsaasunngorniarlunimi ilinniartitaaneq siunissami annertuumik, pitsaassuseq eqqarsaatigaluguttaaq, maanna qaffassaavigineqartussanngorpoq. Tamannami inunnik isumaginninnerup iluani pissutsit ullumikkut atukkavut qiviaraani, minnerunngitsumillu sullinneqarumaartussat eqqarsaatigigaanni pisariaqavippoq, soorlumi isumaginninnikkut iluarsartuusseqqinnissamik ataatsimiitsitaliarsuussimasup siornali aamma tamanna ersersereersimagaa.
Siornaannguakkunni isumaginninnikkut ilinniartitaaneq alla, tassalu isumaginninnermi siunnersortinngorniartarneq pitsanngorsaavigalugu immikkut peqqussusiuuparput, ilinniartitaanermi tassani aamma pitsaassusissaq nunatsinni naappertuuttorisarput qulequtsiullugu. Taamaattumik annerusumik peqqussutissatut siunnersuut manna takisuuliutiginagu Inuit Ataqatigiit maannangaaq oqaatigeriiginnassavarput siunnersuut ataatsimut isigalugu, suliarilluagaasutut aamma isigalugu, akuerseqataaffigisinnaassagatsigu ajorinaguli Kultureqarnermut Atuartitaanermullu Ataatsimiitsitaliamut aamma innersuunneqarallassappat.
Bjarne Kreutzmann, Akulliit Partiiat:
Ilinniartitaanermut tunngasut
Inatsisartuni ullumikkut maani sammineqarput. Taamatullu aamma isumaginninnermi
perorsaassussanik pisariaqartitsineq, illuata tungaatigullu isumaginninnermi
perorsaasunik pissarsisinnaaneq annertuumik nikingassuteqarput. Maluginiarpara
ilinniartun-ngornissamut piumasaqaatit sakkortunerulersimasut, tassa
paasineqarsimammat isuginninnermi perorsaasutut ilinniarnerminni naammassisut
pikkorissutsikkut naammaannarpallaartut. Taamatullu isumainninnermi
perorsaassutut ilinniarneq ukiup affaanik sivitsorneqarsimavoq fagit
amerlanerusut ilinniartitsissutigineqarsinnaaqqullugit aamma sulinermi misiliineq
marloriarluni pisarsinnaaqqullugu.
Qujanarpoq ilinniartitaanerup nalaani
kukkunerit amigaatillu paasineqarsimasut tunngavigalugit ilinniartitaanerup
pitsanngorsaavigineqarnissaa sulissutigineqalermat. Soorunami ilinniartussatut tiguneqareersimasut
tiguneqannginnerminni ilisimasatigut pikkorissusissaanik piumasaqaatit
allanngortinneqarsinnaangillat, taamaakkaluartoq tupiginngitsuulaanngilara
ilinniarnerup ukiup affaanik sivitsorneqarnera maanna ilinniartuusunut aamma
atuuttussanngortinneqarsimanngimmat. Soorunami paasisinnaavara sulinermik
pikkorissarneq imaaliallaannarlugu marloriarlugu
pisussanngortinneqarsinnaangimmat, kisianni paasisinnaanngilara fagit nutat
pingasut, tassa Apinngortitamik
asimilu inuuneq@ aamma Apinnguaatit timersornerlu@ aamma Aattaveqatigiinneq, aaqqissuussaaneq siulersuinerlu@, maanna ilinniartuusunut aamma
ilinniarnerminnik ukioq manna aallartitsisussanut
neqeroorutigineqarsimanngimmata. Amigaammik paasisaqaraanni qanorlu
ikiorserneqarnissaa paasigaanni, taava aaqqiisoqartariaqarpoq, sapinngisamik
piaarnerpaamik pitsaanerpaamillu.
Taavami isumaginninnermi perorsaasutut
ilinniareersimasut taakku ilinniaqqitsinneqartariaqarput, kisianni taamatut
oqarnerup saniatigut allamik tigussaanerusumik amigaateqartoqarsoraara,
taamaanngippat ernummatigaara pisarnertunaasiit ilinniartitaaneq
tunulliunneqalissasoq. Ilinniartutut tiguneqarnissamik piumasaqaatinut
tunngatillugu apeqqutigerusuppara STI-mi isumaginninnermi peqqissaanermilu
ikiortitut ilinniarnermiit isumaginninnermi perorsaasutut
ilinniarnermut¨nuunnissamut periarfissat qanoq innersut. Ajornanngila
imaalliinnarluni nuussinnaanissaq ? Ajornarpalli taava pikkorissutsikkut
piumasaqaatit qanoq ililluni pissarsiarineqarsinnaassappaq ? Isumaginninnermi
perorsaasunngorniatut ilinniartitaanerup immikkorluinnaq inissillugu immikkut
malittarisassiunneqarnissaa, ilinniartitaanermut siunnersuisoqatigiinnit
il.il pilersitsilluni
isumassarsialattut isumaqarfigaara. Taamak oqaaseqarlunga inassutigissavara
suliaq aappassaanneerneqannginnermini ataatsimiitsitaliamut
ingerlateqqinneqassasoq.
Anthon
Frederiksen, Kattusseqatigiit:
Kattusseqatigiinniit
pingaartilluinnakkatta ilagaat inunnik isumaginninnikkut sullissiviit pitsaasumik
sullinneqarlutillu ingerlanissaat. Taamaattumik nuannerpoq paasillugu
isumaginninnermik perorsaasunngorniartunik ilinniartitsinerup
Ilinnniarfissuarmiit avissaartinneqarluni Ilulissanut nuunneqarnerata
kingunerisaanik, perorsaasunngorniat naammassisartut 40%-it missaani
amerleriarsimanerat. Inunnik isumaginninnermik perorsaasut perorsaasussani
ilinniartitsinerup sukaterneqarnerasigut, ilinniartitseriaatsip
nukittorsarneqarnissaa isumaqatigaara. Pingaartumillu allannguinissami
aallaavigineqarmat kommunit Namminerseornerullutik Oqartussat kiisalu suliffeqarfiit
namminersortut isumaginninnermi perorsaasutut ilinniagaqarsimasunik pisariaqartitsinerannut
naleqqussagaalluarsimammat.
Isumaginninnermi perorsaasussanik
ilinniartitsinerup ukiup affaanik sivitsorneqarnissaanik siunnersuut aammalu
taamatut ilinniagaqarniartunut piumasaqaat sukaterneqarnissaa Kattusseqatigiinniit
isumaqatigaakka, taamaaliornikkummi ilinniartut piginnaassutsimikkut
nukittorsarneqarnissaat ilinniartitaanerullu pitsaassutsimigut nunanut allanut
naapertuunnerulernissaa anguneqassammat.
Nalunngilarput inunnik isumaginninnermi
perorsaanermik arlalissuarnik pisortat suliffeqarfiutaannik amigaateqartugut,
pingaartumik kommunit meeqqeriviini. Taamaattumik ilinniartitaanerup
pitsaasumik aaqqissuunneqarlunilu naleqqussartuarnissaa
pinngitsoorneqarsinnaangilaq. Pisariaqarporlu peqqussutip maannakkut atuuttup
allanngortinneratigut iluarsaaqqinnissaq. Soorunami ilinniartaanermi
piumasaqaatit annertusiartortillugit aamma ilinniartut atugarisaat
puiuinnartariaqanngillat. Taamaattumik ilinniartut tamarmik atugarisaasa
pitsanngorsarnissaat, soorlu inigisat iluarsaanneqarnissaannut
ilinniarnersiutit qaffanneqarnissaannut tunngasut ilanngullugit
nalilersorneqartariaqartut Kattusseqatigiinniit ilanngullugu Kultureqarnermut
Ilinniartitaanermullu Ataatsimiitsitaliamut kaammattuutigissavarput.
Taamatut oqaasseqarlunga suliap
aappassaaneerneqannginnermini Inatsisartut Kultureqarnermut
Ilinniartitaanermullu Ataatsimiitsitaliaanut suliarineqarnissaa inassutigaara.
Konrad Steenholdt, Kultureqarnermut, Ilinniartitaanermut
Ilageeqarnermullu Naalakkersuisoq:
Qujavunga. Taamak oqaaseqartut
isumaqatigiitsigalutik paasinnilluarlutillu inassuteqarnerat qujassutigalugu.
Aamma qujanarpoq, tassa Nuummi katersuutissimagaluarpavut kisianni
avissaartitsinerup kinguneranik inatsisit naleqqussartariaqarnerat
tunngavigalugu taamatut aaqqissuussineq akuersaaneqarmat. Aammalu
maluginiarpara oqaaseqartunit tamanit assortuussutaasinnaasunik uani
saqqummiussisoqanngitsoq kisiannili inassutigineqarluni ataatsimiitsitaliamut
ingerlateqqinneqassasoq tassanilu oqaaseqaatigisat tunngavigalugit
aappassaaneernissaanut piareersarneqassalluni.
Tassa junip qiteqqutilernerani Ilulissani inunnik
isumaginninnermik perorsaasunik ilinniartitsinermut tunngatillugu tassani
atuartut 23-it naammassissapput. Qilanaarnarsereerpullu Ilulissani taamatut
immikkoortortaqalernermi siullermeertumik taamak amerlatigisut
soraarummeerlutik angusinissaat naatsorsuutigineqarmat.
Ataasiakkaarlugit imannak akiorarnagit
isumaqatigiinnerat qujassutigalugu apeqqutit ataasiakkaat
akissuteqarfigilaassavakka. Tassa ilaatigut taatsiarneqarpoq atuarnissamut
tiguneqartarnermut piumasaqaataasut suunersut. GU-minngaanneerlutik
atuarnermik tassannga aallartinniartut, taakkua misilitsinneq
pisariaqartinngilaat kisianni taakku saniatigut taamannak soraarummeeruteqarsimanngitsut
pinngitsooratit misilitsittussaapput, tassa taanna uani ilaareerpoq.
Tassa soorunami piumasaqaataasut
annertupput una tunngaviummat, inatsisartut aalajangersa-reerpaat taamatut
ilinniarsimasut aamma nunarput qimakkaluarluguluunniit Skandinaviami arlaanni
sulisinnaanerat isummannaarneqassasoq. Soorunami taama piumasaqarutta allatut
ajornaqaaq aamma atuarfiup allartilernerani taakku piumasaqaataasut
tunngavigalugit ilinniartussanik tigooqqaaneq isumannaartariaaqarparput ukiuni
taakkunani atuareernerminni piumsaqaataasut aamma naammassisimaniassammatigit.
Maannakkorpiaq aamma oqaatigerusuppara tassani ilinniarsimasut
ingerlariaqqiffigisinnaasaannik massakkut pilersaarusiorpugut. Tassa
social-imut taavalu aamma peqqinnissaqarfiup tungaatigut, qanoq taasarpaat,
ikortituut - hjĉlper, atuaqqillutik nangeqqissinnaanissaat maannakkut
pilersaarusiorlugu ingerlakkatsigu. Kisianni taassuma saniatigut soorunami
GU-minngaaneersut saniatigut eqqarsaatigeriarlugit, taava kikkulluunniit
tassunga pileritsassinnaasut misilitsinnginnerminni feriarfissaqarsinnaanerat
tassa immikkut annertussusilimmik soraarummeersimanermik atuarfimminngaaniit,
taassuma allisarneratigut imaluunniit GU aqqutigalugu atuaqqinnermikkut
angusaqarsinnaanerat soorunami ammaanniarneqartariaqarpoq tassuunakkullu
soorunami aamma ilinniartussanut ilitsersuinermik ilaarusuppugut taakkua
periarfissaasut erseqqinnerusumik tamanit ilisimaneqarniassammata. Soorlu
oqareersunga paasivara oqaaseqartut tamarmik taamatut aaqqiisimaneq taperseraat
uanilu inatsisissakkut allannguutissatuut siunnersuutigisavut ilaatigut
suliarilluakkatut allaat nalilerneqarlutik.
Tassa neriuutigilluinnarpara siunissami
taamatut ilinniagaqartut angusisartut amerliartornerat
ingerlaqqiinnassasoq.Soorunami aamma ilinniagaqartut tassani aamma atugaat
kommunip pineqartoq suleqatigilluinnarlugu pilersaarusiorpagut, ilaatigut aamma
massakkut piumasaqaatitta ilagisaat tassa Anthon Frederiksen-imut taanna
oqaatigilaassavara, ilaatigut pilersaarusioratsigu najugaqarnerannut tunngasut
suli pitsaanerulersinneqarnissaat. Tassanilu aamma siunnersuuteqarluta Ilulissani
aningaasanik immikkoortitsisoqartussaasasoq. Kisianni soorunami kommuni aamma
pineqartoq uani pisussaaffeqarpoq ilinniartuutimi pitsaasunik
atugaqarnissaanut. Taannalu neriuppunga aamma kommunimit paasilluarneqarluni
aaqqiiniarnitsinni suleqataarusussutsimik takutitsivigineqarumaartugut, naak
ullumikkut aaamma taamaareeraluartoq.
Oqaaseqartunut tamanut qujavunga.
Nuannaarutigaara aamma taama isumaqatigiitsigalutik suliassaq una
aappassaaneerneqarnissaanut Ataatsimiititaliami suliarinissaa siunniummassuk.
Lars Sĝrensen, Ataatsimiinnermik aqutsisoq:
Taamaalilluni immikkoortoq 21,
isumaginninnermi perorsaasussanik ilinniartitsinissaq pillugu Inatsisartut
peqqussutissaatut siunnersuut siullermeerneqarnera naammassivoq,
Ilinniartitaanermullu Ataatsimiititaliami ingerlateqqinneqarnissaa
isumaqatigiissutigineqarluni.
Oqaluuserisaq naammassivoq.