Oqaluuserisassani immikkoortoq 24-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Meeqqat
atuarfianni ilinniartitsisoqarneq pillugu nassuiaat.
(Kultureqarnermut, Ilinniartitaanermut Ilageeqarnermullu Naalakkersuisoq)
Ataatsimiinnermik aqutsisoq, Inatsisartut Siulittaasuat Anders Andreassen, Siumut:
Ataatsimiinneq ammarpoq. Siulliullugu Jakob Sivertsen Upernaakkut ataatsimiinnermi tikilluaqqussavara, Viggo Mikaelsen-ilu ataatsimeeqataasimaneranut qutsavigalugu.
Ataatsimiinneq aallartivitsinnagu inatsisartunut ilaasortat qinnuigissavakka nipaallutik minutsimik ataatsimik nikuissimagallassasut. Kujataani inuit tallimat ajuusaarnaqisumik majip aap-paanni immakkut ajunaarsimasut eqqaaniarlugit.
Siulittaasoqarfiup immikkoortup 24-p, ataatsimiinnermi maani siulliunneqarnissaa siunnersuutigissavaa, sinnerilu tulleriinneri najoqqutaralugit ingerlanneqassasut siunnersuutigalugu. Tassu-nga akerliusoqannginnguatsiarmat, taava ullumikkut oqaluuserisassat imaalerput immikkoortoq 24, meeqqat atuarfianni ilinniartitsisoqarneq pillugu nassuiaat, immikkoortoq 25, aalisarneq pillugu Inatsisartut inatsisissaata allanngortinneqarneranik inatsisartut inatsisissaannut siunnersuut, siullermeerneqarnera. Tassanilu aamma siunnersuuteqartuuvoq Hans Enoksen. Kiisalu immikkoortoq 21, isumaginninnermi perorsaasussanik ilinniartitsineq pillugu inatsisartut peqqussutissaannut siunnersuut, aamma siullermeerneqarnera. Kiisalu immikkoortoq 23, nunarsuarmi inuiaqatigiinnut tamanut timersornikkut peqataasalernissaq pillugu nassuiaat. Siulliullugulu aallaqqaatigissavarput meeqqat atuarfianni ilinniartitsisoqarneq pillugu nassuiaat. Taannalu saqqummiunneqassaaq Kultureqarnermut, Ilinniartitaanermut Ilageeqarnermullu Naalakkersuisumit.
Konrad Steenholdt, Kultureqarnermut, Ilinniartitaanermut, Ilageeqarnermullu Naalakkersuisoq:
Qujanaq. Naalakkersuisut sinnerlugit matumuuna meeqqat atuarfianni ilinniartitsisoqarnermut tunngasut pillugit nalunaarusiaq saqqummiutissavara. Nalunaarusiaq saqqummiunneqarpoq meeqqat atuarfianni ukiumi atuarfiusumi tulliuttumi ilinniartitsisoqarnikkut pissutsit pillugit inatsisartut ilisimatikkumallugit.
Soorlu nalunaarusiap immikkoortuani siullermi takuneqarsinnaasoq Danmarkimi ilinniartitsisut peqatigiiffiata DLF-ip nunatsinni atorfineqqusiunnaarnera Kalaallit Nunaannilu ilinniartitsisut Peqatigiiffiata GLF-p ilaasortaasa qaangiuttoorsinnaallutik akuersisimanerminnik tunuartitsinerisa ukiumi atuarfiusumi 1998-mi annertuumik ilinniartitsisussaaleqineq nassatarissavaat.
Tamatumap meeqqat atuarfiani kinguneriumaagai annertussaqaat sumiiffimmiit sumiiffimmut assigiinngitsunik sakkortussuseqarlutik. Nalunaarusiap immikkoortuisa aappaanni Naalakkersuisut nassuiaateqarfigaat Naalakkersuisut GLF-ip DLF-illu akornanni akaareqatigiinnginnerup tunuliaqutarisai ingerlasimaneralu.
Tassani takuneqarsinnaavoq GLF isumaqatigiinniarsinnaatitaalluni qitiusumik Kattuffimmit, tassalu Nunatsinni atorfillit Kattuffissuannit NAK-mit ilaasortaajunnaarsitaasoq 1997-mi decemberip 17-anni.
Ilaasortaajunnaarsitaanerup kingunerisaanik GLF-ip Naalakkersuisut qinnuigivai qitiusumik kattuffittut namminersortutut isumaqatigiinniarsinaatitaasutut akuerineqaqqullutik. Tamatuma ilalernissaat Naalakkersuisut periarfissaqarfigisimanngilaat. Atorfilinnut isumaqatigiissut pingaarneq atuuttoq naapertorlugu tamannalu GLF-mut nalunaarutigineqarpoq.
GLF-ip ilaasortaajunnaarsitaanerata kinguninngua decemberip 19-anni DLF-ip piumasaraa ilinniartitsisut Danmarkimeersut isumaqatigiissuteqarnikkut atorfinitsinneqartalissasut. Ilinniartitsisut siunissami isumaqatigiissuteqarnikkut atorfinitsinneqartarnissaannik periarfissat pillugit apeqqutit suli aalajangerneqarsimannginnerat inatsisartunilu suli oqallisigineqarsimannginnerat innersuullugit pisortallu isumaqatigiinniartartuisa 1991-mi atorunnaarsinneqarneraniilli Naalakkersuisut politikkeriumasimammassuk politikkeralugulumi taamaallaat Kattuffinnik maani najugaqartunik nutaanik isumaqatigiissuteqartoqartarnissaq.
Naalakkersuisut DLF nalunaarfigaat Naalakkersuisut piumasaqaat taamaattoq ilalersinnaanngikkaat. Tamatumap kinguninngua DLF-ip ilimasaarutigaa ilinniartitsisut Danmarkimeersut atorfinitsitaasarnerat unitsikkumallugu. DLF-llu ilaasortaminut inassutigaa qaangiuttoortarumallutik akuersissuteqarsimanertik tunuartikkumallugit taamaalilluni ilinniartitsisut Kattuffiisa taakkua marluk iliuuserisaat imminnut attuumalluinnartutuut isumaqarfiginarput.
Soorlu nalunaarusiap nanginnerani takuneqarsinnaasoq, qulaani pineqartut malitsigisaannik iluatungeriit akornanni arlalinnik ataatsimiitoqartarsimavoq tamakkualu kingunerisimavaat NAK-p nalunaarutigimmagu ilinniartitsisut tjenestemanditut atorfillit pillugit siunissami isumaqatigiinniarsinaatitaaneq qitiusumik kattuffimmit ilinniartitsisut peqatigiiffiinit GLF-imit aamma IK-mi tassa Ilinniartitsisut Kattuffianit, tamanit ilaasortaaffigineqartumit isumagineqartassappat akuersaarlugu.
Iluatungeriit marluullutik taakkua tamanna pillugu oqaloqatigiilerumallutik nalunaarsimapput. Taamaammallu Naalakkersuisut Kattuffimmut nutaamut isumaqatigiinniarsinnaatitaanerup tunniunneqarnissaa periarfissiuukkumallugu isumaqatigiissut pingaarneq atorunnaarsippaat.
Isumaqatigiissummi siumoorluni nalunnarfissamik aalajangiunneqarsimasoq naapertorlugu. Aammattaaq Naalakkersuisut DLF-illu isumaqatigiinnginneq oqaloqatigiinneq aqqutigalugu qaangerniarsimagaluarpaat, maannamulli kinguneqanngitsumik. Taamaattoq Naalakkersuisut suli ilimagaat DLF Naalakkersuisullu imminnut ima paaseqatigiitsigilersinnaasut atorfineqqusiunnaarneq taamaatinneqarsinnaalluni. Taamaalilluni Naalakkersuisut DLF-imut saaffiginnissutaat kingulllerpaaq tunuliaqutaralugu DLF-imit isumalluarnartunik nalunaartoqarsimavoq.
Kisianni ukiumut atuarfiusumut tullermut naleqqiullugu piffissaq imaalereerpoq. Naalakkersuisut Kommunillu tungaanniit immikkut iliuuseqarnissaq pisariaqalersimalluni. Ilinniartitsisussaaleqinerup kinguneriumagai pakkersimaarniarlugit qanorluunniit pisoqarsimagaluarpat ilinniartitsisussaaleqiuassaagut. Kisiannili GLF DLF-ilu paaseqatigineqassappata tamatumap kinguneriumaagai annikillisarneqassapput. Taamaammat aamma Naalakkersuisut nalunaarusiaminni ilisimatitsissutigivaat Naalakkersuisut Kommunillu allatut ajornartumik qanoq iliuuseqartariaqartut. Atuartitsineq pitsaanerpaaq pissutsit maanna atuutsillugit qularnaarniarneqassappat.
Paasinarluarpoq iliuuseriniakkat tamakkua ilinniartitsisuniit angajoqqaaniillu qisuariarfigineqarsimammata. Naak tupigineqarsinnaagaluartoq oqaaseqaatit amerlanersaat naammagittaannersaallu kommuniniit ilinniartitsisussaaleqinermit eqqornikinneqarnerusussaniit saqqummiunneqarmata. Kisianni qisuariaataasut allanngortinngilaat Naalakkersuisut ajornartoornermi pisussaaffeqarmata sapinngisamik pitsaanerpaamik atuartitsineq isumannaatsuutinniassallugu. Taamatut ilungersuutini tunngavigisaasoq tassaavoq nukissat maanna pigineqartut pitsaanerpaamik atorneqarnissaasa qularnaarnissaat. Taakkununnga ilaallutik meeqqat atuarfianni ingerlassaasartut allat atuartitsinermut nuunneqarnissaat. Annermik atuarfimmi tunngaviusumi atuarfimmilu atuaqqiffimmi atuartitsissutinut misilitsiffiusussanut. Ilinniartitsisussaaleqinerup kinguneriumaagai pakkersimaarniarlugit Naalakkersuisut suliniutit aallarnisagaat aallarnisarneqarsimapput nunatsinni kommunit kattuffiat KANUKOKA paaseqatigalugu isumasiorsinnarlugulu.
Taamaalilluni Naalakkersuisut Kommunillu aallarnisagaat tassaapput, ajornartorsiornermi pilersaarusiornerup ersiutai sinaakkutigisat pigineqartut naapertorlugit aaqqissuusaasut, taakkununnga ilaallutit inatsisit maanna atuuttut. Tassunga atatillugu eqqaaneqassaaq Naalakkersuisut Kommunini ataasiakkaani ineriartorneq malinnaaffigilluarmassuk taamaaliornikkut qularnaarumallugu minnerpaamik inatsisitigut pisussaaffiit piviusunngortinneqarnissaat.
Ilinniartitsisut peqatigiiffiisa iliuuserisaasa taamak annertutigisumik nalunaarusiamilu allaaserineqartutuut kinguneqarnerisa ersersilluarpaa Kalaallit Nunaat meeqqat atuarfianni ilinniartitsisussaqarniarnerup tungaatigut kiffaanngissuseqanngitsoq. Tamannalu Kalaallit Nunaata akuersaaginnarsinaanngilaa. Tamanna sakkortuseriarneqarpoq Kalaallit Nunaat sulisoqarneq pillugu eqqartuussivimmi eqqartuussut naapertorlugu DLF-ip iliuuseriumaagaasa inatsisinik unioqqutitsisuunnginnerisa misilitsinnissaannut piffissap qaninnerusup iluani periarfissaarummat.
Taamaammat pissutsit tamakku kingunerisaannik Naalakkersuisut tuaviortumik eqqarsaatersortariaqarsimapput, qanoq iliorluni Kalaallit Nunaat siunissami ilinniartitsisunik imminut pilersornerulersinnaanersoq. Qanorli iliorluni tamatumunnga ilutigitillugu meeqqat atuarfianni atuartitsinerup pitsaassusaata annertusarnissaa qularnaarneqarsinaanersoq.
Taamaammat Naalakkersuisut suligasuartussamik ataatsimiititaliorput pineqartut pillugit siunnersuusioqqullugit suliassinneqartunik. Ataatsimiititaliami ilaasortaapput KIIP-imi meeqqat atuarfiannut immikkoortortaqarfimmit ilaasortaatitaq, Ilinniarfissuup rektoria, inerisaavik pilersuiffimmit ilaasortaatitaq taakkualu saniatigut suliffeqarfik siunnersuinermik ingerlataqartoq maanngaaneersoq.
Ataatsimiititaliaq ulapissimaqaaq tamaviaarsimallunilu. Piffissaliunneqartullu iluani nalunaarusiaq suliarisimallugu Ataatsimiititaliap eqqarsaatersuutaanik inassuteqaataanillu imaqartoq. Taanna inatsisartunut ilisimatitsissutitut agguaanneqarpoq. Saqqummiinermi allagaqaammut matumunnga ilangullugu. Soorlu nalunaarusiami takuneqarsinnaasoq nunarsuami pitsaanerpaamik meeqqanut atuarfeqarumaneq anguniarumallugu ataatsimiititaliap aallaavigisimavaa. Tamanna qiviaannarlugu pissutsillu maanna atukkavut eqqaallugit angujuminnaakujuttutut isumaqarfigineqarsinnaavoq.
Taamaakkaluartoq Naalakkersuisut isumaqarput anguniagaq taanna tassaasoq tamatta meeqqat atuarfiat pillugu kissaatigisatsinnik oqariartuuteqartoq. Iluaqutaasorlu anguniagassap taamaattup ataatsimiititaliamit taamak erseqqitsigisumik oqaatigineqarnera.
Kisianni nunarsuami pitsaanerpaamik meeqqanut atuarfeqarumalluni anguniagaqarneq aatsaat piviusorpalaartumik piviusunngortinniarneqarsinnaavoq kikkut tamarmik suugaluartutigulluunniit meeqqat atuarfianni peqataasut peqataalluarlutik piviusunngortitsiniaqataappata. Imaappoq tamanna tamatta akisussaaffigaarput.
Naalakkersuisut isumaqarput nalunaarusiami soqutiginaateqartut aamma soqutigisaqaqatigiit akornanni erseqqinnerusumik naliliiffigineqarnissaat oqallisigineqarnissaallu naleqquttuusoq. Naak nalunaarusiap tamakkiisumik aaqqiiissuteqarnissaq inassuteqaatigigaluarlugu aammattaaq tigussaasumik siunnersuutigaa maannakkorpiaq ilinniartitsisussaaleqineq ukiumi atuarfiusuni tulliuttumi qanoq iliorluni qaangerniarneqarsinnaanersoq.
Tassami ilinniartitaaneq immikkut aaqqissuussaq atuagarsornerup sungiusarlunilu sulinerup paarlakaannerannik tunngaveqartoq iluaqutsiullugu ilinniartitsisunngorniat atuartitsisutut atorneqarsinnaanerat siunnersuutigineqarmat. Taassumap saniatigut siunnersuutaavoq siamasissumik ilinniartitsisunngorniartarnerup annertusineratigut maanna timelĉreriusut annertuneruartuinnartumik piukkunnarsarneqarnissaat nammineerluni ilinniarneq angusarisat malillugit allagartartaarsinnaanermik tunngaveqartoq naapertorlugu, taamaalillutillu naggataatigut ilinniartitsisutut ilinniarsimasutut pisinnaatitaaffeqalissallutik.
Timelĉrerit taamaalillitik siamasissumik ilinniartitsisunngorniartartut allat ilinniagaasa asserluinnaat tulleriiaarlugit naammassisinnaalissavaat.
Naalakkersuisut siunnersuut assut pissanganartutut isigaat kissaatiginartissalluguli inatsisartut tamanna pillugu isummaminnik saqqummiinissaat. Siunnersuutip piviusunngortinneqarsinnaanissaa aatsaat pisinnaammat ilinniartitisisutut ilinniarsimasut, ilinniartitsisunngorniat atuarfiit pisortaat atuarfiit siulersuisui kommunillu suleqatigiinnerisigut.
Aammattaaq siunertamut naleqquttuussaaq taakkua siunnersuummut oqaaseqatigiunnagaasa ajornanngippat tusarniaqqaarnissaat. Taamaammat Naalakkersuisut siunnersuutigisinnaavaat ilinniartitsisoqarnermut tunngasut pillugit nalunaarusiap inatsisartuni oqallisigineqarnerata unitsinneqarallarnissaa inatsisartut kultureqarnermut ilinniartitaanermullu ataatsimiitsitaliaata siunnersuut pineqartoq pillugu Naalakkersuisunit aallartitanik aamma peqataasunit tamatumunnga attuumassuteqartunik pingaartumillu ilinniartitsisut kattuffii ilanngullugit oqaloqateqarsinnaanissat periarfissikkumallugu.
Tamatuma kingorna ataatsimiitsitaliap oqallisissap uterfigeqqinneranni oqaloqatiginnissimanerit eqikkarnerini ataatsimiititaliat tamakku pillugit isumaannik inatsisartut saqqummiiffigisinnaassavai. Tamannalu Naalakkersuisut suleqqinneranni tunaartarineqarsinnaassalluni.
Ataatsimiititaliap nalunaarusiaa tiguneqaqqammermat inatsisartunut saqqummuinnera sioqqullugu siunnersuutip aningaasaqarnikkut kinguneriumaagai annertunerusumik naatsorsoqqissaarneqarsinnaasimanngillat. Taamatuttaaq siunnersuummik piviusunngortinniarneqassappat apeqqutit inatsiseqarnermut tunngajunnartut nalunaarusiallu tigussaanerusumik nassatarisinnaasaanut tunngasut erseqqinnerusumik naliliiffiginissaat periarfissaqarsimanngilaq. Naalakkersuisut naliliinerit tamakkua aallarnisarpaat inatsisartullu kultureqarnermi ilinniartitaanermillu ataatsimiititaliaannut saqqummiunnissaat periarfissaqarfigiumagaluarlugu. Ataatsimiititaliap taamaalillunilu inatsisartut siunnersuummut naliliinissaminnut pitsaanerusumik tunngavissaqarnissaat aqqutissiuukkumallugu.
Naalakkersuisut piffissaq qaninnerusoq eqqarsaatigalugu ilinniartitsisussaaleqineq ikiorsiiviginiarlugu siunnersuutip saniatigut ataatsimiititaliap meeqqat atuarfiat pillugu piaarnerpaamik ataatsimeersuartitsinissamik siunnersuutaat taperserumavaat. Ilinniartitsisut sulinerminni atugarisaasa paasiniarnissaat pillugu ilisimatusarluni suliniummik aallarnisaasoqarnissanik siunnersuut Naalakkersuisut tamakkorpiaat pillugit suliniutigisaannut aallarnisarneqareersunut naapertuulluinnarpoq.
Taamaammallu tamanna soorunami Naalakkersuisut tamakkiisumik taperserumavaat. Tassami suliniut suliamut maanna aallartereersumut ilanngunneqarsinnaammat.
Nalunaarusiaq pillugu Naalakkersuisut naggasiullugu oqaatigiumavaat Naalakkersuisut oqallisissap taassuma oqallisigineqarneranut atatillugu inatsisartut nalunaarusiaq ataatsimut isigalugu oqaaseqaatigiumasaat tusarusussagaluarmatigit.
Taamatut oqaaseqarlunga matumuuna nalunaarusiaq inatsisartunut oqallisigisassanngortippara.
Ruth Heilmann, Siumup oqaaseqartua:
Siumup ullumikkut siunissamilu
ilinniartitsisussaqarniarneq ilungersunangaartutut isumaqarfigalugu
annertuumik oqallisigaa. Maannakkullu Naalakkersuisut meeqqat atuarfianni
ilinniartitsisoqarnermik nalunaarusiaq neriorsuutigineqartutut
saqqummiunneqartoq pissanngatigisimaqigatsigu aamma soqutigeqalugu
misissuataarsimavarput. Siumumi inatsisartut gruppeanni ilinniartitsisussaaleqineq
aammalu isumaqatiginninniarnikkut pissutsinik killiffiusut naammaginngeqisavut
pillugit ilungersuuteqarluta oqallisigereerlugit Naalakkersuisut siulittaasuat
aqqutigalugu Naalakkersuisut piaartumik iliuuuseqaqqusillutalu
aaqqiissutaasinnaasunillu ilassaannik tikkuartuilluta allagaqaateqarsimavugut
aprilip 23-ani apuunneqartunik.
Siumumiit allagaqaataasut Naalakkersuisunit tusagassiortunillu
ilassilluarneqartoq malunniuttoq nuannaarutigaarput. Taavalu aamma
ilungersuunnerullugu iliuuseqarniarnermi toqqammavilersoqataarusussuseqarnerput
tassuunakkut ersersitarput pissusissamisoortutut isumaqarfigalutigu. Tassami
Siumumi tassaavugut allat iliuuseqarnissaat utaqqiinnarnagit sutigut tamatigut
ajornartorsiutinik iluarseeqataarusussuseqartut aammalu
piviusunngortitsinissamik annertuumik piumassuseqartut.
Maannakkut ilinniartitsisussanik atuarfeqarfinni
amigaateqarnerput pillugu peqqussutit maleruaqqusallu malitsinniarneranni
ukiut atuartitsiviusup tulliuttup ajornartorsiornissarujussuanik
nassataqartussaq ilungersunartutut Siumumiit isumaqarfigaarput.
ajornartorsiutit annertussusaat kommunemiit kommunemut assigiinngiiaartussaapput.
Maannakkummi kommunet nammineerlutik periarfissaqarnertik
piumassuseqarnertillu aallaavigalugu aaqqiiniutinik ujartuiniarsarilereermata
tassuunakkut atuarfinni siulersuisut kaammattueqataanerat eqqumaniarnerallu
tunngavissarujussuusutut Siumumiit isumaqarfigigatsigit taamaattumik kommunet
KANUKOKA peqatigalugu piareersaasiornerat qanoq ittup malinnaaffiginiarnissaa
pingaartillugu Siumumiit kaammattuutigissavarput.
Ukiup tulliuttup siunissamilu
ilinniartitsisoqarniarnikkut sapinngisamik aaqqiiniutaasussanik saqqummiussami
siunnersuutigineqartut Siumumiit arlalippassuartigut isumaqataaffigaavut.Siunnersuutip
piviusunngortinniarneqarnerani saqqummiunneqartut Kultureqarnermut Ilinniartitaanermullu
ataatsimiititaliamut piaarnerpaamik sammineqarnissaat pingaartipparput. Aammalu
KANUKOKA-mit atuarfinnit pisortaasunit susassaqartunit Kattuffinnit
ilinnartitsisunit eqqugaasussanit isumasiorlugillu tusarniaaffigisariaqartut
taavalu inatsisartuni ataatsimiinneq manna naammassitinnagu uterfigalugit
aalajangiiffigisassanngorlugillu.
Isumasiuinissamik ataatsimeersuarnissat junip
aallartilaarnerani siunnersuutigineqarput. Tamattali nalunngilarput ulluni
taakkunani siunnersuutigineqartuni atuarfinni tamaginni ulapaarnersuaqartartoq.
Soraarummeernerit, ukiullu tullianut pilersaarusiornerit aamma
ingerlanneqartarlutik.
Taamaattumik saqqummiussap
ingerlariaqqinniissaanik piffissaliunneqartut ilumut saqqummiunneqartutuut
piviusunngortinneqarsinnaanerat ilanngullugit aggersarneqartunit piaartumik nalilersorneqartariaqartutuut
isumaqarfigaavut. Pineqartumut soqutigisaqartut peqataatinneqarnissaat
eqqarsaatigalugu.
Taamatut oqaaseqareerluta saqqummiunneqartunut
Siumumiit imatut oqaaseqassaagut. Meeqqat atuarfianni pitsaassutsip
annertusarneqarnissaa pillugu nalunaarusiaq Naalakkersuisut suleqatigiissitaliorasuarlutik
suliaritissimasaat Siumut inatsisartuni gruppeta ilassilluarpaat. Nalunaarusiaavoq
pisariaqartoq sapiissuseqartumillu suliaq nalunaarusiami nassuiarneqarpoq
piffissaq qaninnerusoq aamma ungasinnerusoq eqqarsaatigalugit qanoq iliorluta
ingerlariaqqeriarsinnaanersugut.
Nalunaarusiami ukiorpassuit ingerlanerini
nunatsinni nunanilu allani perorsaanikkut ilisimalikkat
misilittagarileriikkallu eqikkarneqarput. Ullumimullu uagut meerartarta
atuarfiannik aaqqissuussisimanerisarput tunngaviusumik pisariaqartumillu
aaqqiiffiginiarneqarluni. Siusinnerusukkut iluarsaaqqinnernik
taaneqartarsimasut taamaallaat ajornartorsiutit ataasiakkaat sammisarsimavaat.
Assersuutigalugu ilinniartitsisussaaleqineq aaqqiiviginiarlugu
iliuuserineqartartut, oqaatsitigut atuartitsinermik pitsanngorsaaniutit
atuartitsissutinut ataasiakkaanut timeliisarnerit, imaluunniit
atuartitsissutissanik atortussanik pilersitsiniarnerit.
Nalunaarusiami immikkoortut tamaasa maanna
eqqartussanngilakka Siumumiillit pingaarnerusutut isumaqarfigisavut
oqaaseqarfissallugit. Tassani erseqqissassallugu ilinniartitsisunngorniarrtarneq
eqqarsaatigalugu maanna aatsaat taamak ataqatigiitsigisumik ajornartorsiutillu
tamaasa ataatsimut isigalugit qanoq iliorluta ajornartorsiutit meeqqat
atuarfianni aningaasaliisarnitta nassatariaqarisariaqaraluagaata
angusinnaasarsimannginneranut pissutaasut qaangerneqarsinnaanerannut
tikkuussisumik.
Inuiaqatigiit tamatta peqataatilluta
ajornartorsiutinik nammaqatigiilluta tatigeqatigiillutalu
aaqqiiniaqatigiinnissatsinnut ingerlaqatigiinnissamut massakkut
periarfissinneqarpugut. Allatut ajornartumik ileqquusut malillugit meeqqat
atuarfiata aaqqissugaasarnera allanngortinniarlugu iliuuseqarniartariaqarpugut
aamma upperilluinnartariaqarparput sulissutiginiagarput iluatsissinaasoq.
Tamatta nalunngilarput namminersornerunitta piviusorpalaartumik
ingerlannisaanut sulilu namminersulernerup tungaanut ingerlaqqeriarnissatsinnut
siullerpaaq tassaasoq qanoq annertutigisumik meeqqat atuarfianni
atuartitsinerup ineriartortinneqarnissaata pingaarnerpaanngortinneqarnissaa.
Tamanna Siumumiit sallersaatikkipput naqissuserusupparput.
Naammagiinnarneqarsinnaajunnaarpoq ukiut tamaasa
45 mio. koruunit missaat atorlugit ilinniartitsisunik nutaanik ilarparujussui
ukiualunnguit qaangiuttullu utertartunik Danmarkimit tikisitsiuassagutta.
Tamatumani pilerinarneruvoq nalunaarusiami siunnersuutigineqartutut ukiumut 45
mio. koruunit missaat pineqartut atorneqarpata ilinniartitsisunngorniartarnerup
aamma meeqqat atuarfiini sulinermi atugarisaasut pilerinarsarnissaannut,
ilinniartunut mmannalu ilinniartitsisorisatsinnut.
Siumumiit meeqqat atuarfianni atuartitsinerup
pitsanngorsarneqarnissaa nuna tamakkerlugu suliassatut aanertuutut
pisariaqartutullu isigaarput. Ilinniartitsisussanik ilinniartitsinerup ilinniartitsisutut
amerlinerisa, ilinniartitseqqittarnerillu kisimiillutik meeqqat atuarfiannik
ajornartorsiutit kisimiillutik qaangertinnavianngilaat. Angajoqqaat, atuarfiit
siulersuisui, sumiiffinnilu ataasiakkaani suleqatigiissitat atuarfiup
ilinniartitsisuinit pisortaanillu pisussaaffigalugu suleqateqarnissamut
peqataatittariaqarput.
Ilinniartitsisut kattuffiisa, ilinniartitsisullu
tamarmiullutik akaareqatigiilluinnartumillu peqataanissaat
pinngitsoorneqarsinnaanngilaq. Taamaattumik siumumiit piumasaraarput taakku
piaarnerpaamik tusarniaavigalugillu isummersortinnissaat. Suliassap
pingaaruteqarluinnartuunera pissutissaqartumik isumalluartippaatigut.
Aammattaaq soqutigisaqaqatigiit suliamullu atatillugu peqatigiiffiit
siunnersuummut isummersueqataassasut aammalu meerartatta inuiaqatigiit allanngoriartupiloortut
siunissami sulisorisassaminnik piumasaqaatigisaat naleqqiullugit piukkunnarsarneqarnissaat
akisussaaqataaffigimmassuk.
Nalunaarusiami ilinniartitsisussanik
ilinniartitsisarnerup annertuumik allanngornissaa siunnersuutigineqarpoq.
Siumumiilli isumaqarpugut imaluunniit piumasaraarput ullumikkut ilinniarfissuarmi
ilinniartut ilinnialersussallu ilinniakkaminnik aallussinissaminnut
aallussinissaminnut periarfissaqartinneqartuarnissaat
pilerinarsarneqartuarlunilu ingerlatiinnarneqassasoq maani ilinniarfissuarmi.
Saniatigulli nukissaqarfigineqartariaqarsoraarput
immikkut iliuuseqarluni ilinniartitsisunngorniartarnerup maannakkut
ingerlanneqartup saniatigut ilinniarfissuarmiit aqunneqartumik ingerlanneqarsinnaanissaa.
Erseqqissarluarlaralu immikkut iliuuseqarluni
ilinniartitsisussaaleqinerup aaqqiivigineqarnissaanik ilinniartitsinermi makku
piumasaqaataasariaqarnerat. Ilinniartut atuartitsissutit misilitsissutaasartut
soraarummeerutaasartullu taakkorpiaat misilitsiffigalugillu
soraarummeerutigiuassammatigit. Ilinniartut ilinniagassaat sammisassaallu
nikisinneqassanngimmata. Ilinniartut singiusarlutik sulinerminni
ilinniartitsisutut naammassisimasunik ilinniarfissuarmilu ilinniartitsisunit
maannamutut ilinniartinneqarlutik, ilitsersorneqarlutik siunnersorneqarlutillu
pissammata.
Ilinniartitsisutut allagartartaarnissamut
piumasaqaataajuassammat soorunami ilinniarfissuarmi isumagineqartumik maanna
ilinniartitsisunngorniarnermi ukiuni sisamanik sivisussuseqartumi ilinniagassat
imarisaasa asserluinnaat ilinniarsimanissaat.
Siumumiit isumaqarpugut timelĉrererpassuagut
atorfissaqartitagut arlalippassuartigullu naammaginanngitsumik
naapertuilluarnerunngitsumillu isornartorsiorneqartartut piukkunnarsarnissaminnut
ilinniartitsisutullu soraarummeernissaminnut ullumikkornit pitsaanerusumik
eqaannerusumillu periarfissinneqarnissaat.
Atuagarsornerup, sungiusarlunilu sulinerup
paarlakaannerisigut ilinniartitsisunngorniat tamarmik taakkununnga ilaallutik
timelĉrerit ilinniartitaasarnerat isumaqatigaarput tamatumunngalu atatillugu
nunagisaq qimannagu ilinniartitsisunngorniartarnerup annertusarneqarnissaa
Siumumiit saqqortunerpaamik kaammattuutigissavarput.
Meerartatta saperatik, pikkoriffeqarlutik,
paasineqarlutik ataqqineqarlutillu misiginissartik aamma angajoqqaaminnit
peroriartorifigisaminnillu tanngassimaarutiginninneq pisinnaatitaaffigisariaqarpaat.
Qamuuna annernartaqaaq meerartagut amerlasuut sapertutut pikkoriffimminillu
takutitsinissaminnut qunusutut misigisartut paasigaangatsigu.
Anguniartariaqagarput tassaavoq atuarfiup imminnut
ataqatigiillutik paaseqatigiillutillu, nuannaartunik meerartallit,
nuannaartunik ilinniartitsisullit nuannaartunillu angajoqqaallit pilersinneqarnissaa.
Immitsinnullu qamuuna ilutsigut aperigutta nalunngilarput tamanna
angussagutsigu qanoq iliortariaqalernerluta.
Pilersaarummi qitiulluinnarpoq ilinniartitsisut
nunatsinni nunaqavissut nukissaqarlutillu piumassuseqarlutillu
peqataatinnisssaat. Taakkua arlalippassuartigut pisariaqartunik
piginnaaneqarput. Meeqqat inuttut inoqatigiissutsikkut atuartitsissutitigullu pisinnaasariaqagaasa
pitsaanerpaamik inerikkiartortinnissaasa qularnaarnissaannut sinaakkutigisassat
pisariaqartut pilersinnissaannut.
Maannakkorniit annertuneroqisumik
suliniutigisariaqarparput atuarfiup tassaalernissaa suliffik uagut nammineq
annertunerpaamik ilinniartitsisoqarnikkut nukissarisatta maani nunaqavissut
suliaminnut atatillugu inuttullu unamminartumik sulinermilu atugarisaat
imaattumik naapitsivigisaat meerartatta atuartinnissaat
ilitsersornissaallu
akisussaaqatigiinnikkut kajungernartunngorluni.
Uagut nammineq ilinniartitsisorisatta maani
najugaqavissut suliamik sungiussisimalluartutut atuartitaanermi
ilinniartitaanermilu ilitsersuisuunissaat salliutittuartariaqarparput.
Pisariaqartitatsinnillu nunatsinni pissarsisarsinnasoqanngikkaangat avataanit
tikisitsisarnissaq ammatittuartariaqarpoq. aammattaaq soorlu ilisimatuunik
inunnik immikkut ilisimasalinnik teknikerinillu.
Nalunaarusiap ataqatigiissumik ataatsimoortumik
aaqqiissuteqarnissaq tunngavilersorpaa ilaatigullu atuartitsisut tamarmik
ilinniartitsisutut soraarummeernissaat kingunerissallugu. Siumup
ataatsimoortumik aaqqiissuteqarnissaq nalunaarusiap siunnersuutigisaa
annertuutigut akuersaarpaa. Piumasaraarpulli Kultureqarnermut
Ilinniartitaanermut ataatsimiititaliamit suliarineqarlunilu sukumiisumik
isummerfigineqaqqinnissaa. Siulianit siumumiit siunnersuutigisavut
ilanngullugit nalilersuilluartoqarnissaa kissaatigalugu aammalu
ataatsimiititaliap sulilluarnissaa kissaatigalugu aammalu ataatsimiititaliap
sulilluarnissa neriulluarfigalugu oqallisigeqqinnissaalu maani inimi
qilanaaralugu peqataaffigissavarput.
Majip aallaqqaataani atuartut nammineerlutik
inatsisartunut Naalakkersuisunullu oqariartuutaat ilaatigut imatut ilaqarput issuaalaarpunga: "atuartut eqqarsaatigisigit
piaartumik iliuuseqaritsi uagut siunissaraatsigut". Oqariartuutit
ilumoorluinnartuupput pissusiviusunik ilungersunartunik aallaaveqarlutik.
Taamaattumik aaqqiissuteqarniarnitsinni oqariartuutit taakku eqqaamaneqartariaqarput,
suliniarnitsinnilu toqqammavigalugit.
Taamatut oqariartuuteqareerluta Siumup
Naalakkersuisut qinnuigai maanna suliassami pingaaruteqaqisumi
attuumassuteqartut tamaasa piaarnerpaamik KANUKOKA-lu peqataatinnialeqqullugit.
Isumaqqatigiissutiginiaqqullugulu nalunaarusiami anguniagassatut
siunnersuutigineqartut piaartumik isummersorfigeqqullugit.
Maannakkorpiaq ajornartorsiutinik qaangiiniarnermi
Siumut-mi peqataarusuppugut, aalajangiinissat pisariaqartut kinguarssaannaraluarutsigit
pisarnertut ajornartorsiutigut qaangernaviannginnatsigit,
annertusaannarsinnaallugilli.
Jonathan Motzfelt-p inuusunnerulluni
oqaaserisimasaasa ilai maanna issualaarusuppakka - atuarfeqarnermut
pisortaqarfimmi silatusoorsuit titarnerit ukua atuarunikkit niaqqutik qeerasaartut
ileqimisaartortissavaat, oqarlutillu, umangaa piviusunngortinneqarsinnaanngilaq
naammattunik kalaallinik ilinniartitsisussaqanngilagut, aamma
ilinniutissaqanngilagut.
Tassunga akissutissaq aana, ilumoorpoq
piviusunngortinneqarsinnaanngilaq maannakkorpiaq. Kisianni inatsisissatut siunnersuummut tamarmut
atuuppoq. Aalangersakkat tassaniittut akuerineqaannartullu
piviusunngortinneqarsinnaanngimmata, siunnersuut tamarmi anguniakkanik
ersersitsisuuvoq anguniarusutamik anguniagassaliortoqarpoq.
Siuliani pineqartut
tunulisaqutaralugit Siumiut-miit makkua inassutigaagut, nalunaarusiami
pingaarnerusutigut siunnersuutit tunngaviusumillu periusissat ukiut tallimat
siulliit ingerlaneranni piviusunngortinneqassasut. Naalakkersuisut
pisinnaatinneqassasut tamatumunnga atatillugu pisariaqartunik
isumaqatigiinniarnissamut aamma aningaasatigut nassatarisassaat eqqarsaatigalugit.
Inatsisartut ukiut tamaasa
suliniutip tamarmiusup ataatsumut naatsorsuutaanik nalunaarusiarineranillu
pisassasoq nalilersuisoqaqqillunilu.
Taamatut oqaaseqarluta immikkoortup
matuma oqaluuserineqarnerata unitsikkarlarneqarnissaa isumaqatigaarput,
Kultureqarnermut Ilinniartsitaanermillu Ataatsimiitsitaliami suliareqqinneqarniassammat.
Otto Steenholdt, Atassutip oqaaseqartua:
Siullermik oqaatigilaarlara Inatsisartunut agguaanneqartoq siulleq naqqissorneqaataa kingusinnerusukkut aatsaat takkummat, teknik-kikkut ajornartorsiuteqaratta allaffeqarfitsinni.
Taavalu uanga aallaqqaammut Atassut sinnerlugu oqaatigissavarput nassuiaammi 1997 sioqqullugu pisimasut maqaasigatsigit. Taamaattumik aallaqqaasiullugu ukiuni taakkunani pisimasut Atassut-minngaanniit eqqartulaarniarpagut.
Eqqaamavarput 1995-imi Naalakkersuisut ilininniartitsisut akiliunneqarlutik sulinngiffeqartarnerat Feriefrirejse-mik taaneqartartoq peerumalleraluarsimagaat, ilinniartitsisunilli naaggaarneqarsimallutik.
Tamatumap kinguneraa inatsisikkut aalajangersarneqarmat ilinniartitsisut akissiarsiaat ukiuni marlunni allanngortinneqassanngitsut. Taamaattorli allat tjenestemand-it taaneqanngitsut 2 %-mik annerusumilluunniit qaffaaffigineqaraluartut.
1997-mi Naalakkersuisut NAK-lu isumaqatigiissuteqarput tamatumunngali atasumik ilininniartitsisut Grĝnlands lĉrerforening-mi ilaasortaasut pineqarnertik akueriumanngilaat isumaqaramik gruppe-nut allanut naleqqiullutik minnaariffigineqarsimallutik.
Taamak iliornerat NAK-mit, tamannalu ilinniartitsisut kattuffiannit ajorineqarpoq, allaat Grĝnlands Lĉrerforening-mi Qallunaat ilaasortat kisimik pisuusutut tikkuarneqartut taamanimiilli tusarpagut.
Tamatumalu kingorna puigorneq suli annerulerpoq, oqaatigineqarmat taasinermi tassani Grĝnlands Lĉrerforening-mi IK-milu ilaasortat naaggaarsimasut, tamakkua tusatsiakkatut maani ilanngunneqarput.
1997-imi ukiaagaa Grĝnlands Lĉrerforening-imi ilaasortat isumaqatiginninniaqqikkumagaluarput, Naalakkersuisunilli naaggaarneqarlutik. Tassa naatsumik oqaatigalugu, Naalakkersuisut saaffiginnitsimik akissarsiaanik qaffaajumanngillat. Tamanna tunngavigisimagunarlugu ilinniartsitsisut NAK-p neqeroorutaa tusaannarlugu naaggaarput, taavalu ilinniartitsisut NAK-miit peersitaapput.
Taamaasiniariartoq Naalakkersuisut NAK-mut aammagooq ilinniartitsisut akissarsiaat pillugit isumaqatigiissuteqaratannguarput. 1997-mi juullilersoq Danmark-imi ilinniartitsisut kattuffiata Naalakkersuisut ilinniartitsisut pillugit isumaqatigiissummik Tjenestemand-itut atorfinitsitaasarnerup peerneqarnissaanik ilalimmik isumaqatigiinniarfigiumagaluarpaat, Naalakkersuisunillu naaggaarneqarlutik.
Naaggaarneqarnertik akillugu Danmark-imi ilinniartitsisut kattuffiata ilinniartitsisut Danmark-kimeersut nanatsinnut kartinneqartannginnissaanik siorasaarivoq. Tassa Naalakkersuisut oqaluqatiginnikkumallertikkaluarlugit.
Ullunili makkunani qaammatit sisamat taama Danmarks Lĉrerforening-ip saaffiginninnerugaluaniit qaangiutereersimapput.
Kingullermik isumaqatigiinniarnermi ilinniartitsisut 3,75 %-imik neqeroorfigineqaraluarput, paasinarluartumilli erseqqissumik oqaatigaat %-ip neqeroorutaasup qaavanut 1995-mi akissaatimi qaffassutissaraluat pinngitsuugartik ilineqassasoq.
Danmark-imi ilinniartitsisut kattuffiata ilaasortaminik nunatsinnut kaqqusiunnaarnera paasinarluarpoq. Tassa ilaasortani ikiorumavaai, allaat nunatsinnut karaluartillutilluunniit naammaginartumik akissarsiaqartinneqarnissaat qulakkeerumallugu.
Tamatumunngalu aamma tunngatillugu ilinniartitsisut nutaat nunatsinnut kartussat isumaqatigiissummik tunngavilimmik atorfinitsitaasarnissaat qulakkeerumallugu. Tassami taamatut akissaasersugaaneq aningaasanik amerlanerusunik piffiusarmat, kiisalu aamma tamatuma kingunerissammagu pension-isiassat, tassa qallunaatut opsat pension-imik taaneqartartut, qaqugukkulluunniit, tassa maanaannaq angerlariataassagaluarunik, pissarsiarisinnaallugu.
Pissutsit maani imaapput, Tjenestemand-itut atorfinissimagaanni aatsaat minnerpaamik ukiut pingasut qaangiuppata taanna opsat pension-imik taaneqartartoq pineqarsinnaalluni, angerlamullu nassarseqarsinnaalersarluni.
Ukiulli pingasut inorlugit maani nunatsinniissimaguni aningaasarsiassaagaluaq taanna tiguneqarsinnaanngilaq, Landskasse-mullu nakkartinneqaannartarluni. Uanga ilinniartitsisutut taamaaliorfigineqartuuguma Landskasse tillittutuut unnerluutigissagaluarpara.
Aamma neriorsuineq aallaavigalugu aningaarsarsiaat ilaneqartarput, tassa ilinniartitsisut ataasiakkaat neriorsuisinneqartarput time-ip qaangiuttoornernik taaneqartartut amerlanerpaamik pingasut tigusassagaat. Taamatut neriorsuigaangamik qaangiuttuunngikkaluarunilluunniit ukiumut 4000,00 kr.-it pissarsiarisinnaalersarpaat, neriorsuineq tamanna ukiunut marlunnut atuutsinneqartarpoq.
Atuarfeqarneq ilinniartut ilinniartitsisullu pillugit ajornartorsiut namminersornerulernerulli eqqunneraniit takkutereersimavoq. Landsting-i ajornartorsiut pillugu oqallittarsimaqaaq. Ilaasortallu maani inimi sivisujaamik issiasimasut eqqaamassavaat. Qanga atuartitaanermut naalakkersuisuusartut ersarissumik paatsuugassaanngitsumillu Inatsisartut neriorsortuartarsimammatigit ilinniartitsisunik amigaateqarluinnarneq 1984-imi anigorneqareersimassasoq.
Ullumi ukiut 14-it qaangiussimapput neriorsuut eqquutinneqarsimanngilaq.
Ullumikkut atuartitaaneq pillugu Naalakkersuisup pissutsit eqqortut qulaajarlugit nangaanani saqqummiussisinnaasimammat Atassut-minngaanniit nersualaanngitsoorsinnaanngilarput.
Inuiaqatigiit meerartamik ilinniartitaanikkut siunissaat taamak taartigisutut ukioq manna saqqummiunneqartoq annilaarutigimmassuk Atassut-minngaanniit paasilluarsinnaavarput.
Imalu oqaasertalerumallugu, pissutsit piviusut qangarsuarli ullumikkutut ersaritsigisumik saqqummiunneqarsimasariaqarsimagaluartut.
Aaqqiissutissatut siunnersuut allatut ajornartumik mamaagigaluaraanniluunniit akuerisariaqarpa?. Marts-si qaammataagaa Inatsisartunut agguaanneqarpoq meeqqaat atuarfianni ilinniartitsisoqarneq pillugu nassuiaat. Tassani ersarivissumik ukiamut atuarfiup aallartinnerani ajornartorsiutaalerumaartussat allaatigineqarput.
Oqaaserpassuit atorlugit assortuussiinnaavugut, ataaserli isumaqatigiissutiginnaasarput tassa, isumaqatigiinniassalluta qanoq ililluta ilinnartitsisut amigalersut klasse-passuarnut ilinniartitsisussaaleqisunut agguataassallugit.
Allatut ajornaqaaq tulleriiaarineq annernartoq allatut ajornartumik attuallattariaqassavarput, tassami allatut ajornarmat.
Nassuiaatip imarisaani kapital 5-imi a, b-lu Inatsisartunut ínnersuuttariaqassavagut, tassaasut, qanoq iliuusissat KIIP-mit aallarnerneqarsinnaasut, kiisalu iliuusissat Kommuunit suleqatigalugit aamma aallarnerneqarsinnaasut.
Atassut-miit sapiiseraluarnerluta makku uparualaartigit. Neriulluta Ataatsimiititaliap ilaasortaasa isummerniarnerminni qiviatsiartarumaaraat.
Siunissami 11 aamma 12 klasse-ni atuartuulerumaartut hovedfage-mik taaneqartartuni aatsaat atuartinneqarsinnaassasut illoqarfinni najugaqarunik, tamakkuninnga atuartitsisinnaasunik ilinniartitsisulinni.
Najukkanili taamaattunik ilinniartitsisoqanngitsuni ukiut atuarfiusut marluk, ilami immaqa amerlanerusut, ullumikkut atuartitsinerup ilusaanik avissaartinneqassapput, naammattumik atuartinneqaratik, naggataatungaatigullu soraarummeersinneqaratik.
Danmark-imi Efterskole-nik isumalluuteqaraluassaagummi, kisianni qularnanngitsoq aajuna ukiaru atuarfiit tamakku atuartussaminnik naammatsitsereersimassapput. Isummap ajunngitsup qularnaataa tassaniippoq. Siullermik kalaaliaqqat qallunaat nunaanni efterskole-ni atuartut naggataarutaasumik soraarummeertut kalaallisut naggataarutaasumik soraarummeersinneqarsinnaanngillat.
Tamannarpiarli aamma pissutigalugu inatsisit maani piumasaat aamma naapertorlugu nunatsinni ilinniartitaaneq iserfigisinnaanngilaat kalaallisut pisinnaasutut soraarummeerummik allagartaqannginnamik. Aappaattut, kalaaliaqqat danmark-imi ilinniarfinnut pissutsit maanna atuuttut pitsaasullu naapertorlugit ilinniartunngorsinnaagaluit ilinnioartuunersiutinik qaammammut pisarlutik ilinniartunngorsinnaajunnaassapput, inatsisitsinnimi aalajangersagaammat ilinniartut ilinniartuunersiutinik pisartussat tassaassasut ukiut kingulliit ataqatigiit tallimat nunatsinni najugaqarsimasut.
Manna tikillugu atuarfeqarnermi ajornartorsiutalersussanut aaqqiissutissatut siunnersuutit tamatut Atassut-miit oqaaseqarfigaagut, neriuutigalugu oqaatsigut ataatsimiititaliami sukumiisumik paasiniarneqarumaartut.
Taavalu nunatsinni ilinniartitsisussaleqiuarneq aaqqiissuteqarfiginiarlugu Ilinniartitaaneq pillugu Naalakkersuisup saqqummiussaa Atassut-miit iluarisimaagarput tikipparput.
Nunarput namminersornerulermalli suliassat tulleriaarlugit tigusarsimavagut, nammineerluta oqartussaaffigalugillu akisusaaffigiumallugit. Aamma nunatsinni ilinnartitsisoqarneq taamatorluinnaq siunissami pisassasoq Atassut-miit isumaqarfigaarput.
Atassut-ip siunertaani ersarissumik allassimasoq anguniarneqartuartorlu tassa, nunatsinni ilinniartitaaneq aammalu ilinniartitaaneq. Taama inuusuttatsinnik sapinngisaq tamaat ilinniartitserusunnerput taakkualu siunissami pinngitsuugassaanngitsumik iliniiartitsisorisartagassaat ullumikkutut peqatigiiffinnit kikkunnilluunniit avataaneersunit aqunneqartuartariaqanngillat.
Ullumikkorpiaq annernertoq qiteraat, ilinniartitsisut ilinniarsimasut 300-it nunatsinni amigaatigineqarnerat. Atuartitaanermut Naalakkersuisup siunissaq eqqarsaatigalugu qanoq linniartitsisussanik pissarsiulernissamik imaqartoq ukiamut aallartissappat ilinniartitsisut 180-it sineriammi sulilersussat pissarsiarisinnaalissavagut.
Sinneruttulli 120-it time lĉrere-nik ilaatigut Naalakkersuisut ilinniartitsisut atorluarnerujumallugit siunnersuutaat tunaartaralugu inuttalersinnaassallugit.
Atassut-miit piffissaq manna atorusupparput ilinniartitsisut time lĉrere-nik taaneqartartut oqallinnermi narruginninnermik ilaatigut nipilimmik uparuarneqartartut, qamannga pisumik qutsavigiumallugit, ilama tamakku atorneqanngippata ajornartorsiut suli ullummikkornit ajornerungaassagaluarmat.
Atuartitaanermut Naalakkersuisup siunissami ilinniartitsisunik naammattunik peqalernissaq anguniarlugu saqqummiussaa Atassut-miit tapersersorluinnarparput. Siunnersuut assigiinngitsunik isummersorfigineqarsinnaavoq, Atassut-miit uparuagassagut nikassaanerunatik ilorfaap tungaanut tikkuussiniarnerusutut paasineqaqquagut.
Ilumoorluinnarpoq massakkutut ilinniatitsisoqarniarnerup tungaatigut ingerlaannassagaluarutta siunissami ilinniartitsisunik amigaateqartuassaagut. Silatusaarneruvoq paasinarluarlunilu, avammut annaasagut akornatsinnit taarteqartissavagut.
Atuarfiup inuiaqatigiinnut ammarnerani, taama qulequtalimmi, upararuarumasarput tassa ilinniartitsisut pisinnaasamikkut nutaanngorsartuartut pisariaqaqimmata eqqarsaatigineqartuartariaqartoq atuartitsissutit nutaat takkuttuarneri pissutigalugit ilinniartitsisut kursus-sertittuarneqarnissaat.
Immikkut atuartitsinermut, tassa specialundervisning, ilinniartitsisut 175-it atugaanerat apeqquserneqarpoq. Pinngortitsisitta tamatta silaqassutsitsigut assigiissilluta pinngortissimanngilaatigut, taama atuartitseriaaseq piissagaanni, tassa meeqqat immikkut atuartittariallit immikkut atuartinnagit klasse-miitiinnassagaanni marlunnik klasse-mi ataatsimi atuartitsisoqartarneq, imaluunniit atuartitsisoqarnissaq, pinngitsoorneqarsinnaanngilaq.
Pingaartumik klasse-it arlaat 24-inik ilinniartoqarsimappat.
Siamasissumik ilinniartitsisunngorniarneq, tassani qulequttami, angusarisassat malillugit allagartartaarsinnaanermik tunngaveqartoq silatusaarnertut Atassut-miit nalilerparput.
Time lĉrere-nik taagukkat soqutiginnikkunik ilinniaqqinnermikkut ilinniartitsisutut qullariar-torsinnaanerat pineqartunut angajoqqaanullu isumalluarnartuuvoq.
Ilinniarfissuaq misiligaaffittut taama qulequtaqarpoq, eqqarsaatip taassuma ilinniarfissuarmi ilinniarsimasut qamuuna attussannguatsiarpaai. Unali eqqarsaatigisariaqarppoq, atuarfitoqarput uniinnarani pissutsinut nutaanut malinnaalluni aamma ilaatittariaqalersoq.
Taamaakkaluartorli Atassut-miit ilinniartut ataatsimut katersorlugit atuartinneqartarnerata pingaaruteqassusia ilisimaarigatsigu, ilinniartut ataatsimoortarsinnaanerat periarfisseqquarput.
Tamatumuunakkut ilinniartut aamma imminnut ikioqatigiillutik, ikinngutigiilllutik sulinissaminnut immersoqatigiittarnissaat pisariaqarmat.
Atuartitsineq ilinniarnerlu paasissutissiinermi atassuteqaqatigiinnermilu teknologi-mik tunngavilik tikereersimavarput. 1997-mimiuna Upernaviup eqqaanni Aappilattumi qarasaasiamik atortoqalerneq KNI-ikut takkummat, tassa nunallit silarsuaat kusanartumik avammut ammarsimasoq.
Ilinniartulli tamarmik qarasaasiaararsuarnik nassarnissaat, imaluunniit Computereqalersinnaanerat suli avani siunitsinniikkallarpoq. Ineriartornerli akillu, tamakkununnga akit, milliartornerat sukkaqimmata piareersalereertariaqarpoq, tassami ilinniartuinnaat kisimik pinnatik ilinniartitsisussaalli aamma tamakkua atorluarneqarnissaat sioqqullugu annikinngitsumik kursus-ertinneqartariaqarmata.
Ilinniartitsisut Canada-miit tikeraartigisat, isumaavoq nuannersoq, oqaatsinik silarsuarmi tamarmi paasineqartartunik kalaaliaqqap paasinnissinnaalernissaanut kusanartumik aqqutissiuisoq.
Ukiup atuarfiusup september-ip aallaqqaataaniit juni-ip aallaqqaataanut ingerlasalernissaa piviusunngortinniarneqarnerani inassutiginassaaq. Peqatigiiffiit, soorlu ilinniartitsisut aamma peqatigiiffii, piaartumik pisariaqartumillu siusinaartumik tusarniaavigissallugit.
Tamatumunngattaaq tunngatillugu Atassut-miit kattuffiit inussiarnersumik saaffigiumavagut, ullumikkut killiffik tamatsinnik annernartumik eqquisoq, piaartumik anigorniaqqullugu.
Kommune-ni tamani perorsaanikkut suliamut atasutigut suleqatigiit, taamak qulequtsigaq, atuarlugu isumassarsiaavoq Atassut-miit assut tapersersornartoq.
Taavali aamma atuartitsinermi atortussiorneq, tassani ilaagujoq. Qaa, taanna piaarnerpaamik aallartinneqarniarlli. Ilami allaat Kalaallisut ilinniartitsinermi tamakku amigaatigineqaqimmata.
Qallunaatut ilinniartitsinermi isertuunnagu oqaatigisariaqarpoq, Grĝnlands Ministerieqarfikorsuup Qallunaatut ilinniartitsinermi atugassatut 1996-ikkunnili saqqummiussaa, ulluni makkunani atugaasoq, taamanili allamik taarserumallugu neriorsuut atorneqartuarpot, tassa ulloq manna tikillugu ilinniartitsisunit utaqqineqarmat.
Qulequttat allat oqaaseqarfigiortussallugit ussernartorsiornaraluartoq, naggataagulli Atassut-miit innersuussutigissassarput uaniippoq, ilinniartitsisunngorniarup nutaassap kajungernarunartullu, aallartinnginnerani ilinniartut akissarsiassaat qaammammut 12.000,00 kr.-nit taaneqartut, tassa taakku kr.-niusut, qanoq ilinniartunut, taakkualu Boligsikring-imut attuumassuteqarnerannut sunniuteqaratarsinnaanersoq sukumerlugu misissoqqullugu.
Kingumut naggataagut Atassut-miit oqaatigissavarput, Ilinniartitaanermut Naalakkersuisup siunissami linniartitsisussaaleqinnginnissaq pillugu soqutiginartumik saqqummiussaa, ima nalileratsigu, piviusunngussaguni kiisami ajornartorsiummik qaangiisitsisussatut ilimanaateqartoq.
Ilinniartitsisut aningaasarsiaat Atassut-miit nalilersukannersimavagut aningaasarsianullu allanut naleqqiuttarlugit. Qaangiuttooqqusisarnerit allallu tunngavigalugit isumaqarnarpoq, Grundlĝn-imik taaneqartartoq, ilinniartitsisut akissarsiaannut aallaavigineqartoq, appasippallaartoq, tamanna pissutaaqataavoq ilinniartitsisut atorfinnut allanut akissarsinarnerusunut nutsernerujussuannut.
Naggataagut piffissaliussat qimerlooreerlugit Atassut-miit inassutigissavarput, sapinngisaq tamakkerlugu isumaqatigiissumik siunissami atuarfiup, atuartullumi, pilersaarusiorfigineqarnerat kigaalaarunnagu ingerlateqqullugu. Suliassap naammaginartumik ingerlanissaani ukiumoortumik aningaasaliuttagassat pingaaruteqarluinnarnerat Naalakkersuisut eqqaamasariaqarpaat, pilersaarut aamma aningaasatigut amikkisaarunnagu ingerlattariaqarmat.
Naggataagut Inatsisartut Atassut-miit inattorniarpagut, Naalakkersuisut atuarfeqarneq pillugu aaqqiiniutaat tamakkerlugit akuersaaqqullugit. Saqqummiussinermi allagaqaat Atassut-miit tusaatissatut tiguarput, tassani inassuteqaatit pilersaarutillu saqqummiunneqartut Atassut-miit isumaqatigalugit akuersaarpagut. Aamma qujanarpoq suliniarnerni Kalaallit Nunaanni Kommunit Kattuffiat paaseqatigineqarsimammat, isumasiorneqarsimallunilu.
Suligasuarluni Ataatsimiititaliaq ulapissimaqisoq, aamma aallaqqaammulli Atassut-miit qutsavigalugu oqarfigisassaraluarput, maani naggataarutaasumik oqarfigaarput, qujanaq sulilluarsimanersuassinnut.
Josef Motzfeldt, Inuit Ataqatigiit oqaaseqartuat:
Atuartitaanermut Naalakkersuisup ippassaq ilisimatitsissutaa najoqqutaralugu maj-ip aallaqqaataani kisitsisitigut paasisimaneqartut takutippaat ukioq aturfiusoq tulleq, qaammatit pingasut qaangiuppata, aallartipat ilinniartitsisut 300-it sinneqartut amigaatigineqassasut.
Taamaasilluni oqaatigineqarsinnaalerpoq meeqqat aturfianni ilinniartitsisoqarnikkut pissutsit nunaqarfippassuarni illoqarfiillu isorliunerusut amerlanersaanni ukiuni arlalinngortuni atuuttut, aasap kingorna aamma illoqarfissuarni atuuttussanngussasut.
Tamanna ilaatigut "meeqqat atuarfianni ilinniartitsisoqarneq pillugu nassuiaammi" atuarneqarsinnaavoq. Tassani Naalakkersuisut ilaatigut ima nalunaaruteqarput: "Ukiuni kingullerni arlaqangaatsiartuni pissutsit taamaassimapput".
Pissutsit ilungersuanartut nunaqarfinni isorliunerusunilu nunaqartut ukiuni kingullerni arlaqartuni aaqqiissuteqarfigeqqullugit noqqaassutigsarsimasaat illoqarfissuarni atugaasussanngormata aasiilli uitsattunnguaqalerpoq.
Pissutsit ukiuni kingullerni arlaqangaatsiartuni taamaassimanerannut Naalakkersuisut pissuteaanerarpaat ilinniartitsisutut ilinniarsimasut naammannginnerat, ilinniartitsisutut ilinniarsimasut amerlasuut suliffinni allani atorfeqarnerat aammalu Danmark-mit ilinniartitsisunik naammattunik pissarsinissap ajornarsimanera.
Naalakkersuisut pissutsit taamaalersimanerannut pissutaatinneragaat taakku pingasuusut qiviatisaannarlugit ersarilluinnarpoq ajornartorsiummi qitiusutut aaqqinniagassaq tassaasoq, ilinniartitsisutut sulinermi atugassarititaasut, akissarsiaat ilanngullugit, suliffinnut allarpassuarnut pilerinassutsimikkut unammisinnaajunnaarluinnarsimasut.
Taamaattumik atugassarititaasutigut pissutsit taamaakkallartillugit allanik ilinniagaqarsimasunik soorlu sanasunik, igasunik, mersortartunik, timersornermi sungiusaasunik, meeqqat atuartitaaneranni ikiorserneqarsinnaasorinerup isumalluarfiginissaa mianersuuttariaqarpoq.
Soorlumi aamma ilinniartitsisunngorniartarnerup allanngortinneratigut, aqaguinnarlugu 180-inik ilinniartitsisunngorniarluni ilinnialerumasunik ilimasunneq sinnattuaqinerinnartut oqaatigineqartariaqarsorigipput.
Taamaasilluni Naalakkersuisut nalunaarusiaat sunniuteqartumik kinguneqartinneqassappat, taamalu amerlanerusut ilinnniartitsisutut ilinniarumalissappata, ilinniartitsisutut ilinniarnermik naammassinnissimasut tamakkerlutik, imaluunniit amerlanersaat, ilinniartitsisutut suliumassappata kiisalu pisariaqartitsigallarnermi nunatta avataanit naammattunik nunatsinni ilinniartitsisunngorumasoqassappat, taava ilinniartitsisut atugarisaat aaqqiivigineqartariaqarpoq.
Tamatumunngali pissutsit ilungersunarluinnartut takussutisssiinerat, suna tamaat nippallugu qilammut torlulaarneq, naammaginagu Naalakkersuisunut ilaasortap saqqummiinermini oqaatigileriallaraa ilinniartitsisut sulinerminni atugarisaasa paasiniarnissaat pillugu ilisimatusarluni suliniummik Naalakkersuisut aallarnisaalersimasut.
Suna ilisimatusaatigalugu? Siunissarmi ungasinnerusoq eqqarsaarigalugu taama sukumiisumik paasiniaanissaq, ilisimatusarnerusariaqanngitsoq, ajunngilaq. Pissutsilli ajorsivinnginnerini ingerlanneqareersimannginnami uggornaqaaq.
Ilisimatusarluni paasiniaanissamik pilersaarutip tikkuagassai utaqqeqqaanngikkaluarlugit, ullumikkorpiaq ajornartorsiornerujussuaq ukiuni kingullerni pingasuni ataatsimiititsinerparujussuit meeqqat atuartitaaneranni atugassarititaasunut tunngasutut tutsiuttartut, Atuartitaanermut Pisortaqarfiup nammineq ingerlatarisimanngikkaangamigit tamatigut akuuffigiuarsimasai soorluuna naammattunik takussutissaqartitsissagaluartut.
KANUKOKA-p ataatsimiinneri, Borgmesterit ataatsimiinneri, atuarfiit pisortaasa ataatsimiinneri, atuarfiit siulersuisortaavisa ataatsimiitseqattaarneqarneri, Kommunini Kulturimut Atuartitaanermullu Ataatsimiititaliat siulittaasuisa ataatsimiittarsimaneri.
Tamakkunani saqqummiunneqartartut naammattorsuarnik ajornartorsiutaasut suunerinik takussutissaqartitsinnginnamik? Ilinniartitsisummi kattuffiinik isumaqatiginninniartaraluarnerni kattuffiit taakku ilaasortamik atugarisaannik saqqummiussortagaat naammattunik takussutissiinnginnamik?.
Paasissutissat ataatsimiinnerpassuarni siuliani taakkarsukkatsinni pissarsiarineqartarsimasutut ilimagisatta, Naalakkersuisunit ilisimaneqarnissaat naatsorsuutigisariaqarmat, taakkua nalilersorneqarlutik naapisinniarnissaat, Naalakkersuisut, ilinniartitsisut kattuffiinik KANUKOKA-millu peqateqarlutik, isumannaapallatariaqaraat salliutillugu suliarineqartariaqartutut Inuit Ataqatigiit kaammattuutigaat.
Nunatsinni Atorfit Kattuffiata isumaqatigiinniaraluarnerit 1995-imili angusaqarfiginngitsoortarpai. Taamaattumik kattuffiit ullumikkut NAK-usumut tunuliaqutaasut ilaasortarpassui akissarsianik isumaqatigiissuteqarfiit aappassaat nikerianngitsoorfigisussanngoramikku ilaasortaminnik taasisitsinermikkut, GLF akuersiumanngittuarsinnartoq, kattuffimmut atajunnaarsittariaqarsimavaat.
Imaappoq GLF-ip ilaasortaasa soqutigisaat immikkut isumagineerupput. Taannali nammineq isumaqatiginninniarsinnaasutut akuerineqassappat takorloorneqarsinnaavoq IK-p ullumikkumut isumaqatigiissutigisimasaanit allaanerusumik siunissami angusaqarsinnaassasoq. Taamalu pisoqarpat meeqqat atuarfianni ilinniartitsisutut, sulisut, kattuffimmut sorlermut ilaasortaanertik najoqqutaralugu, assigiinngitsunik akissarsiaqaleriaannaapput. Najoqqutariniagarlu suliat assigiit akissarsiat assigiit, qimanneqassaaq.
Tamanna orniginanngimmat, kattuffeqarneq naalakkersuinikkut akuliuffigissallugu mianerisariaqarluinnartoq ilisimagaluarlugu, ilinniartitsisut kattuffii taakku marluusut inussiarnersumik taarmaattorli ilungersorluta kattunniaqqullugit Inuit Ataqatigiinniit kaammattorusuppavut.
Tamanna anguneqarsinnaappat, Naalakkersuisullu NAK-mut tunngaviusumik isumaqatigiissumminnik atorunnaarsitsinissaamik kalerreereersimanerat aammalu tjenestemanditut atorfinitsitsisarnerup inunnik ataasiakkaanik isumaqatigiissuteqarluni atorfinitsitsisarnermit taarserneqarsinnaanera Naalakkersuinikkut siunniunneqareernera innersuussutigalugit, ilimagineqarsinnaassaaq ilinniartitsisut kattuffiisa ataatsimuulersut nutaamik isumaqatgiissuteqarfiginiarneqalersinnaanerat, ukioq 2000 utaqqinngikkaluarlugu.
Tassa tulliani isumaqatigiinniarnissami.
Siusinnerusukkummi oqaseernitsitut, meeqqat aturfiini ilinniartitsisut atugarisaasa iluarsiissuteqarfigineqartariaqarnerat, pissutsit ullumikkutut ilersimanerat aallaavigalugu, siunissami sivisuumik atuussinnaasumik aatsaat aaqqiineqarsinnaavoq.
Sulialli matuma ilungersunerseruttornerani Naalakkersuisut kattuffinnut tamanut attaveqarniarsimanerisa torinngippallaamik eqqoriaaqattaaginnarlunilusooq ingerlasimanera uperuartariaqarparput.
Siullermik Danmark-imi ilinniartitsisut kattuffissuannik, DLF-imik, Sulisoqarnermi Eqqartuussivimmut Naalakkersuisut tunniussigaluarnerat. Tupinnaqaaq nunap Naalakkersuisui, inatsiseqarnermut allaffilerlutik Sulisoqarnermullu Pisortaqarfeqarniarlutik, taamaaliorsinnaasimammata, qaammatit arlaqartut ingerlareersut kalerrinneqaannassallutik Eqqartuussivimmut pineqartumut inatsit nunatsinnut atuutinngitsoq. Pikkorliornerit taamak angitigisut nunatta ingerlatitaaneranut, aamma Naalakkersuisooqatigiit torersumik ingerlatsinermik pingaartitsinerartartut tatiginassusiannut, apeqquseerujussuartut akuerineqarsinnaanngilluinnarput.
Danmark-mimi ilinnartitsisut kattuffissuata allallumi Danmark-imi kattuffiit nunatsinni pisortanik isumaqatiginninniartarnerat ukiuni qulinngulersuni nunatsinni kattuffinnit tamakkiisumik isumagineqalerpoq.
Taamaattumik Naalakkersuisut Danmark-imi ilinniartitsisut kattuffissuannut nikerartunik isummersorlutik tutsiuttarsimanerat pikkorliorneruvoq alla, siuliani uparuakkatsitut aamma akuerineqarsinnaanngitsoq.
GLF-p isumaqatiginninniarsinnaalernissaanik oqaluutigalutik aammalu GLF-p IK-llu kattussinnaanerminnik oqaloqatigiinnialeruttorneranni sapaatip akunnerata siuliani Naalakkersuisut tutsiupput, DLF-imik isumaqatigiinniartalersinnaanermik nipilimmik.
Tamatumalu kinguneranik NAK-p aprilip 30-anni ullulerneqarsimasunik qisuariaateqarnera, Naalakkersuisut iliuusaata suli inuiaqatgiinnut ajornerungaartumik kinguneqarsinnaaneranik oqariartuuteqartoq, ilumoorpoq.
Naalakkersuisut GLF-imik oqaloqateqarsinnaanertik aammalu oqaloqateqartariaqarnertik atortariaqarpaat. GLF-llu Danmarks Lĉrerforeningimut immikkoortortatut Naalakkersuisut oqqarsuutaat pisariaqartitsinini naapertorlugu apuussinnaasariaqarpai, soorlu inunnik ataasiakkaanik isumaqatigiissuteqarluni atorfinitsitsisarlersinnaanermik Inatsisarrtut suliniuteqarnerannut tunngasut eqqarsaatigalugit.
Kattuffimmi maani angerlarsimaffeqartut ilaasortamik qanoq atugaqarnissaat inuiaqatigiit maani atugassarisaat najoqqutaralugit isummannaarsinnaasariaqarpaat. Tamannali meeqqat aturtitaanerannut pitsaasumik kinguneqassappat, siusinnerusukkut oqareernitsitut, ilinniartitsisut atugarisaannik pitsannguuteqartitsinikkut aatsaat anguneqarsinnaasutut isikkoqarpoq.
Taama aaqqiissuteqarsinnaanerminnut Naalakkersuisut tunuarsimaarnerminnut patsigiginiagaat, kattuffiit allat tamakkerlutik takkussulernissaannik annilaangateqarneq, ilumoortortaqarsinnaagaluarluni qunugalugu uniffigiinnarneqartariaqanngitsoq Inuit Ataqatigiit isumaqarpugut. Aammami kingullermik isumaqatigiinniarnerit atorlugit peqqinnissaqarfimmi sulisut immikkut taamatut aaqqiivigineqareernerat ullumikkumut soqutigisaqaqatigiinnit allanit atornerlunniarneqarsimanngitsoq paasinarpoq.
Taamatullu pisoqarsinnaanera ingalassimaniarneqarsinnaavoq pingaarnersiuuvenerup qaqugukkulluunniit piffissami killiffiusumi sumut saamiveqarneranik Naalakkersuinikkut oqariartuuteqarnikkut.
Soorlu meeqqanik perorsaasut ilinniartitsisullu atugaasa pitsanngorsartariaqarluinnarnerannik Inatsisartut periarfissaq manna atortariaqaraat uagut isumaqartugut.
Taamatut pitsanngoriaateqartitsinissamik Naalakkersuinikkut isumaqatigiittoqaraluarpalluunniit, tamakku aqaguinnarlugit piviusunngortinneqarsinnaanngimmata, Inatsisartuni taamatut isumaqatigiissutaasinnaasoq Naalakkersuisut ilinniartitsisut kattuffiinut neriorsuutigisinnaavaat isumaqatigiinniarnissani tullerni anguniarneqarluni piviusunngortitassatut.
Imaappoq, aningaasat tamatumunnga atugassagut nassaarisariaqarpagut, tamatumunngalu Inuit Ataqatigiit peqataarusuppugut.
Akissarsialli sulinermilu atugassarisat immikkoortinneqarsinnaanngimmata, pingaaruteqarpoq ilisimassallugu ilinniartitsisutut ilinniarnerminnik naammassinnissimagaluartut, qanoq amerlatigisut allamik atorfeqarnersut, aamma sooq taamaaliortariaqarsimanersut ilisimassallugu.
Atuarfiit ingerlanneqarnerini oqartussaanerup agguataarneqarnera naliliiffigineqartariaqarpoq, qitiusumik oqartussat suut, kommuneni atuartitaanermut ataatsimiititat suut, atuarfiit siulersuisuisa suut, ilinniartitsisoqatigiit siulersuisuisa suut, isumagisassaraat, aamma sooq, inuiaqatigiinnit naleqquttutut kissaatigineqarmata? Imaluunniit Danmark-imi taamatut ingerlatsisoqareernera pissutaanerua?
Atuarfinni pisortat ullutsinnut piumasarisaasunut piginnaasamikkut naleqqussarneqarsimappat? Atuarfiit pisortaasa allaffissornermi pisortaatinneqarnerat pingaartinneqarneruallaalersimava? Atuarfiup atuartitsinikkut angusaqarsinnaaneranut akisussaanera tunulliullugu?
Suliffiummi suulluunniit sulisuminut sullissaminullu kajungernassusianut aqunneqarnera ulluinnarnilu pikkorissumik ingerlanneqarnera annertuumik sunniuteqarpoq.
Ilumut pissutsinut allanngorartuartunut atuarfiit pisortaat malinnaasinnaatillugit ingerlatsisoqarpa? Apeqqutit tamakku ataatsimiititaliami nalilersorneqassasut Inuit Ataqatigiit kaammattuutigaat.
Atuarfiit pisortaqarnerisa, nalilersorneqartariaqarneratulli, nunatsinni meeqqat atuarfiata, inuiaat atuuffigisami pingaartitamissut ilisarnaatigerusutaannik toqqammaveqartariaqarnera pingaartigaaq.
Meeqqat atuartitaanerat, atuartuunerup nalaani piffissarujussuarmik meeqqanut naleqarmat, inersimasunngorluni inuunermut pingaaruteqartumik piareersarfittut isigineqartariaqarpoq.
Inuuneq nunarsuarmioqataasutut akisussaanermik imaqartoq, nunagisami inuiaqatigiittut pingaartitanik toqqammaveqartariaqarpoq, pingaaruteqarpoq meeqqat atuarfiat ingerlanneqarnermigut imarisamigullu allamiunik issuaanerunani qularnartoqanngitsumik namminiussuseqarnissaa.Allamiunik soorlu atuartitsinermi tunngaviusutigut issuaaniarnerup, tamatigut issuarniakkamit appasinnerusumik inerititaqarfiusussaanera naatsersuutigisariaqarpoq.
Qularnaatsumik nammineq inuiattut pigisanik toqqammaveqarani sulineq tamatigut qularnermik nassataqartuartarpoq, taamaattumik Namminersornerullutik Oqartussani allaffissornikkut ingerlatsinerup naliliiffigineqarluni nunami maani namminerisamik ingerlatseriaaseqartariaqarnermut allanngortinneqartariaqarneratulli, meeqqat atuarfiani ingerlatsineq, atuarfiullu imarisamigut nunami maani pissutsinik aallaaveqartariaqarnera Naalakkersuisut suliniutigisariaqarpaat, tamanna ullumikkorpiaq pissutsinut ilungersunartunut aaqqiissutaasinnaanngikkaluarluni, siunissamut sillimmartaarnerussaaq, tamakkulu kinguneriniartussaassavaat meeqqat atuarfiat, atuartut sullivimmissut kajungerisaat, ilinniartitsisutullu suliffigissallugu pilerinartoq, siulianilu tikkuartukkagut iluarsiivigineqanngippata meeqqat atuarfiat sullivinnnut allanut unammillersinnaalernavianngilaq.
Naalakkersuisut isummersorfigeqqusaannik oqaluuserisamut uunga nassuiaammik saqqummiussipput, naak nassuiaatitut taaneqartoq Naalakkersuisut iliuuserilersaakkaminnut nalunaarusiaattut Inuit Ataqatigiinnit taarusunnerugaluaripput.
Nuna tamakkerlugu ilinniartitsisunik 300-nit sinnilinnik amigaateqarnerup kingunerisussaavaa meeqqat atuarfianni qanoq annertutigisumik qanorlu pitsaassusilimmik angusaqarnissamik piumasaqarnerup anguneqarsinnaajunnaarnera.
Ilinniartitsisut atorfeqareersut atorluarniarlugit Naalakkersuisut siunnersuutaat ima oqaaseqarfigissavarput:
Inuit Ataqatigiinnit akuersaarsinnaanngilarput nunaqarfigisaq qimannagu pikkorissartitsinerit unitsivinneqarnissaannik siunnersuut, ungasissumimmi pikorissartitsinerit peerneqassappata ilinniartitsisut pikkorissarfigisinnaasaat tamarluinnarmik peerneqassapput, taamaammat Inuit Ataqatigiinniit kaammattuutigissavarput najugaq qimannagu pikkorissarnerit ingerlatiinnarneqassasut.
Meeqqat atuarfik qimallugu allamik sammisaqartinneqartarnerisa unitsinneqartariaqarnerannik Naalakkersuisut siunnersuutaat Inuit Ataqatigiinniit akerleraarput, taassumami kingunerisussaavaa, meeqqat ukioq atuarfiusoq naallugu illup iluaniitsinneqarnerat, meeqqat atuarfik qimallugu pissutsinik misissuisinnaajuartariaqarput, misissukkatillu atuarfimminnut oqqullugit misissorlugit nalilersortuarsinnaasariaqarpaat.
Siunnersuutip taassuma aamma iluaniippoq paasisassarsiorluni illoqarfinnut allanut angalasarneq, soorlu nunaqarfinni atuartut illoqarfinnut paasisassarsiortarneri, aammalu sinerissap sinneranit Nuummi ilinniarfiit, suliffeqarfiit allallu takusarneqartarneri meeqqat atuarfimmit anigunik sumut ingerlaqqinniarnerannut tunngaviliilluartartut, taamatut angalasarnerit, meeqqat ukiuni arlaqartuni oorinik katersiffigisarpaat, qilanaarnerisalu atuarfimmut soqutiginninnerat angusaqarusunnerallu annertusartarlugu.
Ilinniartitsisut nunarput tamakkerlugu oqimaaqatigiinnerpaaamik ukiumut tullermut agguataarnissaat Naalakkersuisut ilungersuutigisariaqarpaat, Naalakkersuisummi suliami matumani ataatsimilluunniit naammaginartumik suli iluatsitaqarsimanngikkaluarlutik, ilinniartitsisut agguataarneqarnissaanni pinngitsooratik naammaginartumik naammassisaqartariaqarput, illoqarfinnimi ataasiakkaani atorfiit affaat sinnerlugit allaat ukioq tulleq inuttassaqartinneqassanngillat, suliassami tassani Naalakkersuisut ilissi ilumut uppernarsartariaqarparsi, ilumut Naalakkersuisutut ingerlaqqinnissassinnut piukkunnassuseqarnerlusi.
Naalakkersuisut iliuusissatut nassuiaamminni oqaatiginngilaat ilinniartitsisut naammattusaarniarlugit iliuuseriniakkatik qanoq sivisutigisumik atuutsissangatinnerlugit, imaluunniit atuutsinniarnerlugit.
Inuit Ataqatigiinniit sakkortuuumik kaammattuutigissavarput iliuuserineqarniartut taamaallaat ukioq atuarfiusoq 1998-99-imi atuutsinneqassasut.
Pingaaruteqarpoq ullumikkut avammut suaarutigeriissallugu ukioq atuarfiusussaq 1999-2000 aallartippat pissutsit nalinginnaasut atuutilersimassasut, iliuuseriniarneqartummi ukiut arlallit atuutsinneqassagaluarpata, Inuit Ataqatigiinniit qularutiginngilluinnarparput nunatsinni ilinniartitsisoorusunneq ukiuni amerlasuuni annertuumik innarlerneqassasoq.
Massakkut oqaaseqarfigissavarput naliunaarusiat aappaat, arfininngorneq maj-ip aappaani, ullut marluk matuma siornagut nalunaarusiaq kingulleq inatsisartunut ilaasortanut agguaanneqarpoq, naluunaarusiaq inunnit sisamanit sapaatip akunnera piffissaralugu suliarineqarsimasoq piviusunngortiteriffiussagunilu aningaasarpassuarnik naleqartussaq, suliassat oqartussaaffiillu agguataarneqarnerinut aalajangersakkanik kalluaasussaq, ilinniartitsisut sinneruttut suliassaanik allanngortiteriffiusussaq, imaasiallaannaq tamakkiisumik isummerfigiuminaappoq, tunngaviusumilli Inuit Ataqatigiit isumaqarput ullumikkorpiaq meeqqat atuarfianni ajornartorsiuteqarnerup aaqqiiviginiarnera marloqiusatut ingerlanneqartariaqartoq. Siullermik, qaammatit pingasut qaangiuppata pissusiulersussat sunniutigiligassaasa annikinnerpaatinniarnissaat siunnerfigalugu, aapaatullu siunissaq ungasinnerusoq eqqarsaatigalugu.
Nalunaarusiami matumani eqqartorneqartumi suut tamaasa kattullugit eqqartorneqarsimapput, atuarfiit siulersorneqalernerat aallaartillunngitsorluunniit kimeerutsivinniarneqarpoq, ilinniartitsisunngorniartarneq imaasiallaannnaq qaqugorsuarmut atuuttussatut takorluukkamik allanngortilluinnarniarneqarpoq, taarsiullugulu naatsorsuutigineqarpoq qaammatit pingasut qaangiuppata ukioq atuarfiusoq tulleq aallartippat ilinniartitsisunngorniarlutik nalunaarsimasussatut 400-it inornagit amerlassuseqartut suleqatigiissitaliaasimasup ilimagigaa. Nalunaarusiap quppernerisa 15-ianni ima allassimammat, issuarpara: ASiunissami ilinniartitsisunngorniat ilinniarnertik sinerissami atuarfinni ingerlattalissavaat, atuagarsornerup sulinerullu paarlakaannerisigut perorsaanikkut suliamullu tunngasutigut annertuunik arlalinnik iluanaaruteqassaagut, ilutigalugulu ukiumit atuarfiusumit aallartittussamiilli atuarfiit naammattunik ilinniartitsisussaqartissinnaalissallugit@, issuagara naavoq.
Ilisimaneqarmat ilinniartitsisut 300-nit sinneqartut amigaataassasut, aammalu ilinniartitsisunngorniartut suliutigalutik ilinniarnertik ingerlattussaagaat takorloorneqarmat, taakku tamakkiisumik atuartitsisarnissaat naatsorsuutigineqarsinnaanngilaq, soorlumi aamma ilinniartitsisooreersut ilinniartitsissunngorniartunut ilitsersuisuunermut nalunaaquttap akunneri ikitsuunngitsut atortariaqartassagaat, apeqquserneqartariaqarpoq ilumut ilinniartitsisunngorniarlutik aallartikkumasut 400-nit ikinnerunngitsut ilimagisssallugu piviusorsiortuunersoq, ilumut taamaattoqassappat Quinnes-ip rekord-iliisunut nalunaarsorneqarfianut nunarput ilanngutissasoq qularutigineqassanngilaq.
Meeqqat atuartitaanerisa, ilinniartitsisunngorniarnerup ilinniartitsisullu sulinerminni atugaasa tamakkiisumik nalilersuiffiginissaanni Island-imi pissutsinik paasiniaasinnaaneq atuartitaanermut ataatsimiititaliami ilanngullugu nalilerneqassasoq inassutigaarput.
Nalunaarusiamili isumassarsiatut saqqummiunneqartut soqutiginaateqanngitsuunngimmata aningaasatigut nassatarisassai ilanngullugit misissorneqassasut isumaqarpugut, taamaasilluta Naalakkersuisut oqaluuserisap matuma kingusinnerusukkkut uterfigeqqinneqarnissaanik siunnersuutaat akuersaarparput.
Pappialamut aqerluusaq atorlugu allatarput imaluunniit titartagarput kukkuppat iluarinngikkutsiguluunniit nungutersinnaavarput, piiarsinnaavarput, meerartattali atuarfimmiinnerat ataatsimut isigalugu uteqqinneqarsinnaanngilaq, meeqqatut peroriartornerminni malussarisseruttornerminni atuartitaanikkut ilikkagassaat kukkusooraanni uteqqinneqarsinnaanngisaannartussaapput, taamaattumik pissutsit meerartatta atugarisaannut tunngasut uisakkajaarluni inuiaqatigiit oqartussaasui qulaatiinnarlugit aaqqinneqartariaqanngitsut Inuit Ataqatigiit aalajangiusimavaat.
Bjarne Kreutzmann, Akulliit Partiiat:
Meeqqat atuarfianni ilinniartitsisoqarneq pillugu
nassuiaat soqutigalugu misissorsimavara uannullu nikalluallannarpoq paasillugu
ukiumut atuarfiusumut 1998-99-imut ilinniartitsisutut atorfiit 1007-inik
amerlissuteqarsimasut paasillugu, tassa ullumikkut ilinniartitsisutut atorfiit
810-ummata, taava ilinniartitsisut 197-it amigaatigineqartussaassapput.
Tamatumunnga pitsaanngequtinut aamma
ilapittuutaavoq Danmark-imi nunanilu avannarlerni kattuffiit allat
ilinniartitsisut kattuffiata pissuseqatai ilinniartitsisunik
atorfinitsitsinissamik mattussinermut tapersersuillutik mattussinissamik
aallartitsisimanerat.
Isumaqarpunga qanorluunniit
utoqqatsissuteqartoqaraluarpat, akuersaarneqarsinnaanngilluinnartoq ullumikkut
pissutsit naapertorlugit meeqqat atuarfianni peqqussummi meeqqat atuarfianni
ilinniartitaanerup annertussutissaanik pitsaassusissaanillu pinngitsoorani
neqeroorutaasussap minnerpaaffissaanik piumasaqaataasulluunniit
eqqortissallugit ajornavissammat, akuersaarneqarsinnaanngilluinnarpoq,
pissutigalugu ilinniartitaanermut tunngasut assigiinngitsut oqallisiginerani
eqqaajuartarsimagatsigu inuusuttortatta nunani allani inuusuttut naligalugit
unammillersinnaanissaat, taamaattumillu taakkua ilinniartitaanerata nalinganik
ilinniartitaasinnaanissaat.
Ernumassutigaara tamatuma assigiinngitsunut
tuniluunnissaa, pitsaasuinnaannngitsumik kinguneqartussamik, nassuiaammi
kingunipilussatut taaneqartut ilaatigut ukuupput: Meeqqat atuarfiata
tusaamaneqarnerata annertuumik ajorseriarnissaa aammalu
naatsorsuutigisariaqartoq Danmark-imiit atorfinissinnaagaluartut, atuartunik
qitornallit, nunatsinni atorfinikkumajunnaassasut, tassa meeqqamik
isumannaatsumik atuartitaanissaasa periarfissaqannginnerat pissutigalugu.
Taakkuinnaanngillat kingunipilussai, pingartumik
kingulleq eqqarsaatigalugu inuiaqatigiinnut pingaarutilitsigut
arlalippassuartigut tamanna aammattaaq malunniuttussaassaaq.
Oqaatigineqaraluarpoq ilinniartitsisunik
pissarsiniarluni suliniuteqarneq, ilaatigut savalimmiuniit suli
ingerlanneqassasoq, misilittakkalli naapertorlugit naluneqanngilaq soqutiginnittunik
nassaaruminaalluinnaqisoq.
Akuersaarneqarsinnaanngilluinnarpoq, imminullu
tunniutiinnarnertut isigisariaqarluni, allaat eqqartorneqarmat atuartunut
pinngitsoorani atuartinneqartussaasunut fag-it pinngitsoorani atuartitsissutaasussat
qulakkeerneqartariaqarmata, tassa kalaallit oqaasii, danskit oqaasii regning/matematik,
tuluit oqaasii aamma fysik/kemi.
Akuersaarneqarsinnaanngilluinnarpoq tamatuma
kingunerinngitsoornavianngimmagu ileqqorissaarneq aamma imminut naalakkersinnaaneq
eqqarsaatigalugit meeqqat pilliutigineqarnissaat.
Pinngitsoorluinnagassaq tassaavoq
pinaveersartitsinikkut sipaaruteqarnissaq, tassami kommunelluunniit ilaat
akissaqanngillat sunngiffimmi sammisassaqartitsinissamut annertuunerusumik aningaasaliissuteqarnissamut.
Tuppallersaatimininnguaq tassaavoq nassuiaatip
kalaallisuuani qupperneq 11-mi taaneqartoq, tassa KIIP-ip kommunenut
nalunaaruteqarnermini akissuteqarfigeqquniaraa, kommunet qanoq iliorlutik
pingaarnersiuillutik tulleriiaarilersaarnersut, tamatumalu kingorna
sumiiffinnut ataasiakkaanut nunalu tamakkerlugu pissutsinut tunngatillugu KIIP
ataatsimoortumik nalilersuiumaartoq, tamatumalu ilutigisaanik
nalilersorneqassasoq kommunet pingaarnersiuillutik tulleriiaarinerat
iluarsiissuteqarfigisariaqassanersoq.
Ilinniartitsisut tiiminik ikililerinissamut
tunngatillugu suliniutissat assigiinngitsut nassuiaammi taagorneqartut allatut
ajornartumik suliniutaagallartussatut isigalugit tusaatissatut tiguakka.
Aammattaaq immikkoortoq 2 tikilaartariaqarpara,
tassa Naalakkersuisut, Grĝnlands Lĉrerforening-ip kiisalu Danmarks
Lĉrerforening-ip akornanni aaqqiagiinnginnerup tunngavii ingerlasimaneralu,
tassani isummerfigissanngilara kina imaluunniit kikkut ilinniartitsisunik
atorfinitsitsinissamut Danmarks Lĉrerforening-ip mattussineranut pisuunersut,
taamaakkaluartoq pinngitsoorsinnaanngilanga eqqarsatersuuteqalaarnissamut,
Danmark-ip naalagaaffiata ilagaatigut, kissaatigalutiguli siornatigumut
naleqqiullugu erseqqissumik nammineernerulernissarput, taamaakkaluartoq
arlalitsigut danskit naalagaaffiat suli pinngitsoorsinnaanngilarput,
pissutigalugu suli imminut pilersorsinnaannginnatta, tamakku ilaatigut
taassaapput aningaasaqarnermut tunngasut, aamma assigiinngitsunik
ilinniarluarsimasunik sulisussaqarniarnermut tunngasut.
Siusinnerusukkut Naalakkersuisuusimasut,
ullumikkullu Naalakkersuisut erseqqissumik avammut oqaatiginera
tapersersimavaat una: Kalaallit kattuffii isumaqatigiinniuteqarfigissavagut,
taakku tassaammata Kalaallit Nunaanni pissutsinik ilisimasallit.
Qallunaat nunaanni kattuffik
isumaqatigiinniuteqarfiginiarneqarmat, naak nunatsinni marlunnik
kattuffeqaraluartoq, tamanna upernaap ingerlanerani assigiinngitsutigut
malunniutinngitsoornavianngilaq, nunatsinni kattuffiit akisussaaffimminnik
paasinnillutik akissaatitigut tunuarsimaarsimanerigaluat peeruttussaagunarpoq,
piumaffigineqalissaagut akissaatit 25-50 procent-imik qaffanneqassasut,
taakkulu akuersaarumanngikkutsigit nunatsinni kattuffiit imminnut atorunnaarsiinnassapput,
taavalu Danmark-imi kattuffiit nunatsinni atorfinitsitsinissap mattusimanera
atuutitiinnassavaat, piumasaqaatiminnut nakkaannarnissatta tungaanut.
Pissutsit toqqissisimananngeqaat, kisianni
iluaqutaanngilaq august-ip aallaqqaataannaanut eqqarsassalluni,
aalajangersimasariaqarpugut, siunissarlu ungasinnerusoq eqqarsaatigalugu.
Ussernartorsiornaraluarpoq allarpassuit aamma
oqaaseqarfigissallugit, taamaattorli naammagiinnartariaqarallarlugu
saqqummiussissutip ilaani siunnersuutaasoq taanna assut soqutiginarmat,
siunnersuutigineqarami ilinniartitaaneq immikkut aaqqissuussaq atuagarsornerup
sungiusarlunilu sulinerup paarlakaannerannik tunngaveqartoq, iluaqutsiullugu
ilinniartitsisunngorniat atuartitsisutut atorneqarsinnaanissaat, imaanngitsoq
aaqqiissutissaq pitsaanerpaajummat, kisianni tapersersornarpoq, maannakkorpiaq
pitsaaneruusumik aaqqiissutissaqannginnguatsiaratta.
Naalakkersuisut siunnersuutigaat
ilinniartitsisoqarnermut tunngasut pillugit nalunaarusiap inatsisartunit
oqallisigineqarnerata unitsinneqarallarnissaa, pisortaqarfiit amerlanerusut
isumasiorneqarnissaat pissutigalugu, taamaaliornitsigut oqaluuserissallugit
avaanngunartut oqaluuserinissaat aamma nunatsinni atorfeqarnermi
akisussaanerup oqallisiginissaat kinguarteqqittariaqassavagunaasiit.
Siunnersuutit ukuusut tamakkiisumik taperserpakka,
tassa siullermik meeqqat atuarfiat pillugu ataatsimeersuartitsisoqarnissaa
kiisalu ilinniartitsisut sulinerminni atugarisaasa paasiniarnissaat pillugu
ilisimatusarluni sulinermik aallarnisaasoqarnissaanik siunnersuut.
Ataatsimiititaliarlu qutsavigalugu siunnersuutit
pillugit, taamaattumik aammalu saqqummiusseqqittarniaritsi,
kingusinaaraluarluni pingitsuuinnermit ajunnginneruvoq.
Taama oqaaseqarlunga nassuiaat akueraara,
tusaatissatullu tigullugu.
Anthon Frederiksen, Kattusseqatigiit:
Ukiuni makkunani, minnerunngitsumillu piffissami
kingullermi ilinniartitsisussaaleqinerujussuaq tusagassiuutitigut annertuumik
pissutissaqarluartumillu oqallisaavoq, maannalu meeqqat atuarfianni ilinniartitsisoqarneq
pillugu nassuiaat Naalakkersuisunit saqqummiunneqarluni.
Nassuiaat soqutigalugu Kattusseqatigiit
sinnerlugit misissorsimavara, imatullu oqaaseqarfigissallugu:
Meeqqat atuarfiat pillugu Inatsisartut peqqussummik
aalajangersagaqarput, peqqussummilu aalajangersakkat malinneqassappata
pisariaqarpoq meeqqat atuarfianni ajornartorsiutit qaangerniarlugit
sapinngisamik piaartumik suliniuteqarnissaq, soormimi peqqussummik peqassaagut
tassani piumasaqaataasut
eqquutsissinnanngikkutsigit?
Ilinniartitsisussaaleqinermut pissutaasut
qularnannngitsumik amerlanernik ilisimaneqarput, tassami patsisinut
pingaarnernut ilaavoq ilinniartitsisut aningaasarsiaqartitaaanerannut
tunngasut, taamaattumillu tupinnanngitsumik ilinniartitsisorpassuit
Ilinniarfissuarmi naammassereernikut ilaatigut allamik atorfinittarlutik.
Ilinniartitsisullu ilaannit paaasitinneqarnera
tunngavigalugu ajornartorsiutinut pissutaaqataalluinnartut ilagaat,
aningaasarsiatigut naalagaaffeqatigiinnerup iluani ima assigiinngitsigisumik
pineqarneq, nunatsinni ilinniartitsisoq naammasserlaaq tunngaviusumik
qaammammut aningaasarsiaqarpoq 12.830 krone-t missaani, tapit
qaangiuttoornerit assigisaallu ilanngunnagit, Danmark-imi ilinniartitsisoq
naammasserlaaq tunngaviusumik qaammammut aningaasarsiaqarpoq 17.300 krone-t
missaani, tassani aamma tapit, qaangiuttoornermusiat assigisaallu ilanngunnagit,
Danmark-imimi akileraarutit nalingiinnaasumik nunatsinnut naleqqiullugit
qaffasinnerugaluarpoq, kisianni nalunngilarput nunatsinni inuuniarneq
angalanerit il.il. Danmark-imut naleqqiullugit qanoq akisutiginerusartut.
Taamaattumik ilinniartitsisussaaleqineq
qaangerneqassappat nunarsuarmilu meeqqat atuarfiat pitsaanerpaaq nunatsinni
pilersinneqassappat, meerartattalu isumannaatsumik pitsaasumillu
ilinniartinneqarnissaat qulakkeerneqassappat, taava ilinniartitsisut
akissarsiaat iluarsisariaqarput, suliassaq taamaattoq, pissutsit taama
ajortigitillugit inuiaqatigiinni ajornartorsiut taama annertutigisoq, inuiaqatigiinni
ajunaarnersuartut ittumik pisoqassanngippat akissaqartittariaqarparput,
oqartarpugummi meeqqat siunissaraagut, meeqqat
salloqittaariinnarneqarsinnaanngillat, taamaattuminguna ataasingormat 27.
april Inatsisartut ilassutitut aningaasaliissutinut inatsisissaannut siullermut
siunnersuutit siullermeerneqarneranni oqaaseqaatinni oqaatigigiga
ilinniartitsisussaaleqineq nakorsassaaleqinerlu inuiaqatigiinni immikkut
illuinnartumik aamma aningaasarsiaqarnerup tungaatigut
aaqqiivigineqartariaqartut.
Ilinniartitsisussaaleqinermi sutigut tamatigut
qaangiiniarnermi aningaasarsiat soorngunami apeqqutinut ilaalluinnarput,
kisianni aamma nalunngilarput nunatsinni aamma nunaqarfippassuarni,
illoqarfinnilumi ajoqit akissaatimikkut annertuumik ajornartorsiuteqartut,
taakkualu upperisarsiornermi ilinniartitsisutut atorluarneqarsinnaanerat
qularnanngilaq ajornartorsiutit ilaannik oqiilisaataasinnaagaluarput,
taamaattumik Kattusseqatigiinniit tamatuma periarfissarsiuunneqarnissaa
kaammattuutigerusuppara.
Inuiaqatigiinni ajornartorsiutit annertuut,
inuiaallu ingerlariaqqinnissatsinnut annertuumik pingaarutillit peqatigiiffiit
kattuffiillu aaqqissinnaajunnaarsimasaat naalakkersuinikkut suliaqarniarsarisugut
akisussaaffigaagut aaqqittariaqarlugillu, peqatigiiffinnut kattuffinnullu
akisussaaffiit miloriutiinnarneqarsinnaanngillat, tassami
naalakkersuisutigoortumik aaqqiinianngikkutta meeqqat atuarfiat avataaniit suli
annerusumik isiginerlunneqalissaaq, aammalu sulisussanut avataaneersunut amigaatigeqisatsinnut,
suliiffeqarfinnut kalaallinik suli tamakkiisumik inuttalerneqarsinnaanngikkallartunut,
assersuutigalugu nakorsanik, kigutit nakorsaannik, peqqissaassunik juumuunillu
il.il. pissutsillu taamaaginnassappata sulisussanik pinngitsoorneqarsinnaanngitsunik
nunatsinnut tikisitsiniarneq suli ajornarnerulertussaavoq.
Kiami nunani allameersup kajumigissavaa meeqqani
atuarfimmut ajornartorsiorfiusumut, ilinniartitsisussaaleqisumut,
aserfallassimaqisumut ilinniartitsisunik amigaateqartumut il.il. atuariartortikkumassallugit?
Aammattaaq kattusseqatigiinniit
akuersaarsinnaanngilarput nunatsinni meerartatta atuartitaanerup tungaatigut,
ataatsimut isigalugu taama ajortigisumik atugassaqartitaanerat? Meerartagummi
pisuussuseqanngitsut tamaatumani pilliutigineqarsinnaanngillat, taakkumi
tassaapput siunissami nunatta ingerlaqqinnissaanut annertuumik isumalluutigut,
taamaattumik inuiaqatigiittut peqqissutut toqqissisimasutullu
ingerlaqqissagutta pisariaqarluinnarpoq meerartatta sapinngisamik isumannaatsumik
peroriartornerminni ilinniagaqarluarlutik ingerlaqqinnissaat. Ilinniagaqarluarpatalu
pisariaqarluinnarpoq atuarnerminni tunngaviusartut toqqissisimasumik
aallaaveqarnissaat.
Meeqqat atuarfianni ilinniartitsisoqarneq pillugu
nassuiaammi ilinniartitsisussaaleqinerujussuup kingunerisaanik patsiseqartumik
iliuuseriniakkat Kattusseqatigiinniit isumaqatiginngilluinnarpakka, tassami
taaamatut iliuuseqartoqassagaluarpat meeqqat atuarfiat annertuumik
ajorseriartussaavoq, aamma
ilinniartitaanerup ajorseriarnissaa qularutissaanngilluinnarpoq, meeqqat suli
toqqissisimannginnerulernissaat ilimagisariaqarluni, ilarpassuilu
ilanngullugit.
Aamma meeqqat tamatumani annertuumik
pilliutigineqaqqissalllutik. Ilinniartitsisut ukiumoortumik pikkorissartarnerisa
atorunnaarsinneqartalernissaanni ilinniartitseriaatsip ajornerulerneranik
kinguneqassaaq, meeqqat lejrskole-qartinneqartarneri, sapaatip akunnera
ataatsimik aalajangersimasunik sammisassaqartitsinerup, ulloq ataaseq
timmersorrttitssisarnerup il.il. tunulliunneqarnissaat
akuersaarneqarsinnaanngilluinnarput. Meeqqat timikkut tarnikkullu pitsaasumik
ineriartortinneqarnissaannut naapertuutinngilluinnarluni.
Suliniutiginiakkat assigiingitsut, soorlu
ilinnniartitsisut tiimiinik ikilileriniarnerit ilaatigut klassit
ukioqatigiinngikkaluit ataatsimut atuartinneqartarnissaannik, immikkut
atuartitsisarnerup annikillisarneqarnissaanik, allat oqaasiinik
ilinniartitsinerup aatsaat 4. klasse-mi aallartinneqartarnissaannik, 10.-12.klassini ilinniagassat nammineq
toqqarneqarsinnaasut tamaasa atorunnaarsinneqarnissaannik siunertallit,
allarpassuillu taagorneqartut Kattusseqatigiinniit akuersaarnartinngilluinnarpakka,
qularnanngilluinnarmammi suliniutigineqartussat tamarmik meeqqat
atuartitaanerisa ajorseriarnissaanik kinguneqartussaasut, taamaattumik
angajoqqaat, iliniartitsisut meeqqallu naammagittaalliorlutik qisuariaataat
Kattusseqatigiinniit paasilluarlugit, matumuuna taperserpakka, aammami
nalinginnaasuunngilaq maj-ip aallaqqaataasiornerani meeqqat ajornartorsiutiminnik
oqalugiarlutik takutitsinerat, taamaammat pissutsit ilungersunartut atulikkagut
aaqqinniarlugit, meeqqallu suli annnerusumik eqqorneqannginnissaat
qulakkeerniarlugu Kattusseqatigiinniit Inatsisartunut ataqqinartunut, nunatta
oqartussaasuinut akisussaasuinullu qullerpaanut ilungersortumik
inassuttiginiarpara, pissutsit immikkut illuinnartut pissutigalugit,
ilinniartitsisut, nakorsat peqqinnissaqarfimmilu sulisut eqqarsaatigalugit
sulisullu allat amigaatigineqaqisut akissarsiaasa aaqqiivigineqarnissaat
pimoorullugu sulissutigeqqullugit. Meeqqat nunatta siunissai tamatta
akissaqartittariaqarpagut.
Tamatumunnga atatillugu aamma inassuttigissavara
mittarfeqarfiit maannakkut suliarineqartut ilaasa kinguartinneqarnerisigut imaluunniit
ujaraaqqanik qallerneqarallarnerisigut aningaasat taakkununnga atugassaagaluit
ilaat akissarsiat siuliini eqqartorneqartut aaqqiissutissaannut
atorneqartariaqartut, meeqqagummi peqqinnissarpullu timmisartoqarfinniit
pingaarnerupput, pingaarnerujuassallutillu, tassami
ilinniartitsisussaaleqinerujussuaq politik-ikkut immikkut ittumik
iliuuseqarfigineqanngippat meerartatsinnut nunattalu siunissaanut
imaannaanngitsumik ajorluinnartumillu sunniuteqapilunnissaa
aarleqqutigisariaqarmat.
Aamma Kattusseqatigiinniit
aarleqqutigisariaqartutut oqaatigisariaqarsoraara ilinniartitsisussaaleqineq
pissutigalugu meeqqat atuarfianni iliniartitsineq ajorseriarujussuassasoq,
nassuiaammi suliniutissatut siunnersuutaasut akuersaarneqarpata, aamma
politik-ikkut immikkut ittumik iliuuseqartoqanngippat, kikkummi
pilliutigineqassappat? Aasiit meeqqat, atuarfeqarfimmi ajornartorsiutinut
pisuussuteqanngitsut, taamaattumik taakku pisuussuteqanngitut suli annerusumik
eqqorneqartussanngorteqinasigit.
Katttusseqatigiinnniillu ilanngullugu
kaammattuutigissavarput meeqqat inuusuttullu suliniaqatigiiffiat Sorlak,
meeqqat atuarfiini siulersuisut allallu meeqqat atuarfiini susassaqartut
qanimut suleqatigilluinnarlugit ajornartorsiutinik aniguiniarnermi suleqataatinneqassasut.
Naggataatigut Kattusseqatigiinniit
erseqqissarusuppara meeqqat atuarfianni igasut, sanasut allallu sanaartornermik
suliallit ilinniartitsisutut atornissaat aamma ilinniartitsisunngorniartarnerup
sivikillisinneqarsinnaaneranik eqqarsarneq isumaqatiginngilluinnarakkit.
Meeqqalli siunissami pitsaanerusumik iliniartitaallutik angusaqarnissaat
pingaarnerummat.
Taamatut naatsumik oqaaseqarlunga Inatsisartunut
inassutigissavara Inatsisartut 1998-imut ilassutitut aningaasaliissutinut
inatsisissaata aappassaaneerneqannginnerani ilinniartitsisut
peqqinnissaqarfimmilu sulisut akissarsiaanut tunngatillugu ilanngullugit
nalilersorneqarnissaat, eqqaamasariaqarpoq akisussaaffik annerpaaq
inatsisartuniimmat.
Oqaluuserisaq naammassivoq.