Oqaluuserisassani immikkoortoq 49 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik
aqutsisoq: Inatsisartut Siulittaasuat Anders Andreassen.
Niels Mátâq, Siumut:
Apeqqutigaara qimmeqarneq pillugu nuna tamakkerlugu maleruagassaqalernissaa periarfissaqarnersoq.
Illoqarfinni qimmeqarfiusuni pituttaatinneqalermatali nunaqarfinni aamma kommunep qimmeqarnermut ileqqoreqqusaliaat maleruarniarneqartarsimapput.
Ajornartorsiutaajuartartulli tassaanerusimapput akisussaasup pingaarnerpaap, tassa qimmillip nammineq saniatigut maleruagassat malitsinniarneranni kina, imaluunniit kikkut akisussaanersut. Nunaqarfinni qimmit pillugit saaffigineqartartuartut tassaapput nunaqarfinni aqutsisut imaluunniit kommunefogedit. Taakkulu aamma erseqqilluinnartumik nalornisarput qanoq oqaasissaqartiginerlutik. Taamaattumik kissaatiginarpoq nuna tamakkerlugu maleruagassaliortoqassappat, akisussaasup erseqqilluinnartumik allassimanissaa. Innuttaasut illoqarfimmiuugunik nunaqarfimmiuugunilluunniit saaffigisassartik nalorninatik saaffigisarniassammassuk.
Matumuunali oqaatigissavara kikkulluunniit atorfeqarunik, piniartuugunik, tikisitaagunik, tassa qallunaat, qimmeqarnissamik killiliivigineqartariaqanngitsoq. Kialluunniit qimmeqarfiisuniittup nalunngilaa qassinilluunniit qimmeqarsinnaalluni paarisinnaasaminik. Uagummi qimmeqarfimmiuusugut qangarsuarli kulturitoqarsuatsinnut atalluinnartutut isigisarput, qangarsuarli piniartoqarfissuartut piniartorsuillu tunngavigilluagaat inuussutissarsiornerminni qimmit, isumaqarpunga qaqugorsuarmut killilersorneqanngitsumik pigisariaqarigut.
Taamatut qimmeqarnermut maleruagassaqalernissaanik pilersitsisoqarsinnaaneranik apeqquteqaatiga ingerlappara.
Marianne Jensen, Avatangiisinut Pinngortitamullu Naalakkersuisoq:
Naalakkersuisut isumaqataapput maannakkut maleruagassat atuuttut allanngortinneqartariaqalersimasut. Allaffeqarfiup 1996-imi upernaakkulli qimmeqarneq qitsuuteqarnerlu pillugit Inatsisartut inatsisissaannut siunnersuut suliaraara. Siunnersuut nunatsinni aammalu Danmarkimi tusarniarneqartussanut nassiunneqarpoq, tassungalu ilanngullugu Kalaallit Nunaanni Naalagaaffiup sinniisuanut.
Siunnersuut ilaatigut aalajangersakkanik inatsisinik atortitsisut suliassaannut attuumassutilinnik imaqarmat, siunnersuut Naalagaaffiup Sinniisoqarfiata Justitsministeriamut nassiussimavaa. Justitsministeria akissummini nalunaarpoq missingiut imaqartoq Danmarkimi qimmit pillugit inatsimmi aammalu uumasut illersorneqarnissaat pillugu inatsimmi nassaarineqarsinnaasunik. Suliassat tamakku Justitsministeriamut atapput aammalu ministeria isumaqarluni Namminersornerullutik Oqartussat, Peqqinnissaqarfiup tiguneranut atatillugu suliassani tamakkunani maleruagassanik aalajangiinermut oqartussaassuseq tigusimanngikkaat. Tamanna tunngavigalugu Justitsministeriap isumaa malillugu qimmeqarneq qitsuuteqarnerlu pillugit Inatsisartut inatsisaannik imaluunniit peqqussutaannik atulersitsisoqarsinnaanngilaq.
Naalakkersuisut Justitsministeriap isumaa tusaatissatut tiguaat aammalu aalajangerlutik Justitsministeri qinnuigiumallugu suliassaqarfiup Namminersornerullutik Oqartussanut tunniunneqarnissaannut ikiuuteqqullugu. Naalakkersuisut pissusissamisoortutut isigaat ilaatigut Avatangiisinut Pinngortitamullu Pisortaqafiup suliassanut nersutit nappaataannut tunngasutigut oqartussaassuseqarfeqarnerata piorsarneranut peqatigitillugu, Namminersornerullutik Oqartussat tassaassasut taakkuninnga qimmeqarnermut qitsuuteqarnermullu tunngasunik suliaqarnermut atatillugu aalajangersaanermut ingerlatsinermullu oqartussaasut eqqortut. Suliassaqarfimmut Naalakersuisutut tamatuma kingorna suliaq malitseqartippara Justitsministeriamut allakkatigut 1998-imi marsimi saaffiginninnikkut. Kingornatigut Justitminister Frank Jensen Naalakkersuisut, Namminersornerullutik Oqartussanut suliassaqarfimmi maleruagassanik aalajangersaasinnaanermut oqartussaanermik tunniussinissamik kissaatigisaannut paasinninnermik suleqatikkuminarnermillu ersersitsisoq ataatsimeeqatigaara. Ilimagaara Folketingip tullianik katersuunnermini inatsisip allannguutissaa pisariaqartinneqartoq akuersissutigiumaaraa, taamaalilluni Namminersornerullutik Oqartussat siunissami qimmeqarneq uumasullu illersorneqarnissaat pineqartillugit maleruagassanik aalajangersaasartutut aalajangersakkanillu atortitsisuusutut oqartussaalissallutik.
Inatsisartut qimmeqarneq uumasullu illersorneqarnissaat pillugu inatsit akuersissutigeriarpassut kommunet ataasiakkaat qimmeqarneq pillugu ileqqoreqqusat nutaat atulersissavaat, kommuneni ataasiakkaani pissutsinut immikkut ittunut naleqqussakkat. Ileqqoreqqusat qimmeqarneq pillugu ileqqoreqqusat nalinginnaasut tunngavigalugit atulersitsinissaat ilimagineqarpoq, ileqqoreqqusat qimmeqarnermut qitsuuteqarnermut minnerpaatut piumasaasunik imaqarnissaat qularnaarumallugu.
Ilanngullugu oqaatigissavara tassani aamma uumasut illersorneqarsinnaanerat aamma ilanngullugu tassani eqqarsaatigineqarmat.
Ataatsimiinnermik aqutsisoq, Anders Andreassen:
Apeqquteqaat kingulleq naammassivoq, aammalu oqaluuserisassat tamakkerpavut.
Oqaluuserisaq naammassivoq.