Oqaluuserisassani immikkoortoq 48 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik
aqutsisoq: Inatsisartut Siulittaasuat Anders Andreassen.
Naimángitsoq Petersen, Atassut:
Nalunanngittsutut Avanersuarmi piniartut qimmii nappaalallutik toqorarput, naak akiuussutissanik kapoorneqarsimagaluarlutik. Tamatuma kingunerisaanik ulluinnarni piniarnermik inuuniarneq annertuumik eqqorneqarpoq.
Kialluunniimmi nalunngilaa Naalakkersuinermik suliaqartup inuussutissarsiornermik atortoqanngikkaanni inuussutissarsiorneq ingerlanneqarsinnaanngitsoq. Taamaattumittaaq atuuppoq piniartuni qimmeqanngikkaanni inuutissarsiorneq ingerlanneqarsinnaanngilaq, nalunngilarsimi Avanersuarmi qimmit kisimik ukiup annersaa periarfissaasut.
Nalunngilara Qaanap kommunea ikiorserneqarnissamik qinnuteqarsimasoq itigartinneqarsimallunili.
Suna tunngavigalugu Naalakkersuisut itigartitsippat, naak nalunngikkaluarlugu qimmit pinngitsoorneqarsinnaanngitsut? Pinngitsoorneqarsinnaanngillammi piniartut ulluinnarni inuuniarneranni ilaquttaminnillu pilersuineranni aammalu pisortanut akiligassanut piumasaqaataasunut ingerlatsiniarneranni.
Avannaarsuani qimmeq pinngitsoorneqarsinnaanngilaq inuuniarnermi pingaarnersaasoq.
Paaviaaraq Heilmann, Aalisarnermut, Piniarnermut, Inuutissarsiornermut Nunalerinermullu Naalakkersuisoq:
Inatsisartunut Naimángitsoq Petersen Avanersuarmi piniartunik sakkortuumik eqquisumik qimmit nappaalallutik toqorarnerat pillugu apeqquteqarpoq. Naimángitsoq Petersenip aammattaaq apeqquteqaammini taavaa Qaanaap kommuneani aningaasatigut ikiorneqarnissamik Naalakkersuisunut qinnuteqarsimasoq itigartinneqarsimallunili.
Pissutsilli imaapput Qaanaap kommunia Aningaasaqarnermut Ataatsimiititaliamut saaffiginnissimammat. Saaffiginnissummi tassani piniartut, aalisartunut qimmiutilinnullu allanut qimminik taartissanik ikiorneqarnissaq, assartuinermut atorneqartussanik aalisartunut snescooterinik pissarsinissaq kiisalu piniartunut aalisartunullu aningaasatigut taarsiissuteqarnissaq qinnutigineqarsimavoq. Aningaasaqarnermut Ataatsimiititaliaq Qaanaap kommunenut akisimavoq, saaffiginnissummut iliuuseqarnissamut pisinnaatitaannginnami, allakkiaq Aalisarnermut, Piniarnermut, Inuutissarsiornermut Nunalerinermullu Naalakkersuisoqarfimmut ingerlateqqinneqarsimasoq. Tamanna pivoq Naalakkersuisunut ilisimatitsinikkut, aammalu suliassaqarfimmut Naalakkersuisutut Naalakkersuisunut ilisimatitsivunga tamatuma kingorna suliassaq pisortaqarfinnit suliarineqassasoq. Taamaalilluni suliami Naalakkersuisunit itigartitsisoqanngilaq.
Naalisarlugu kingulleq. Naalakkersuisoqarfiup kommune nersutillu nappaataat pillugit oqartussaasut suleqatigalugit ajornartorsiutip annertussusaa paasineqarnissaa sulissutigivaa. Qularnaatsumik paasisaqartinnani ikiorsiisoqarsinnaaneranik erseqqissumik isummernissamik periarfissaqanngimmat.
Oqaluuserisaq naammassivoq.