Oqaluuserisassani immikkoortoq 65 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik
aqutsisoq: Hans Enoksen, Siulittaasoqarfimmi ilaasortaq, Siumut.
Daniel Skifte, Aningaasaqarnermut Ineqarnermullu Naalakkersuisoq:
Qujanaq. Ukiuni pingasuni 1999-imiit 2001-imut naalagaaffiup Namminersornerullutik Oqartussanut tapiissutigisartagassai pillugit Naalakkersuisut 12. maj 1998-imi danskit Naalakkersuisunut isumaqatigiissuteqarput. Isumaqatigiissutip imarisai tunngavigalugit danskit Naalakkersuisui Namminersornerullutik Oqartussanut tapiissutit pillugit inatsisissamut siunnersuusiorput.
Inatsisissatut siunnersuut matumuuna Inatsisartunut saqqummiunneqarpoq danskit Naalakkersuisuinut oqaaseqaateqarnissaq siunertaralugu. Oqaaseqaat taanna maani oqaluuserineqareeruni Folketingimut ingerlatinneqassaaq. Naalakkersuisut oqaatigisinnaavaat danskit Naalakkersuisuisa inatsisissatut siunnersuut sapinngisamik piaarnerpaamik Folketingimut saqqummiutissamaarmassuk, kisianni taama kingusitsigisumik saqqummiunneqarnera pissutigalugu, tassa Folketingimut qinersineq ilaatigut peqqutigalugu, ataatsimoortumik tapiissutit pillugit inatsisip akuerineqarnissaa ukiamut aatsaat pissasoq naatsorsuutigisariaqarpoq.
Ataatsimoortumik tapiissutit pillugit inatsisissaq nutaaq pillugu isumaqatigiinniarnerit ukiarmi septemberimi aallartinneqarput, oqaatigineqareersutullu marlunngornermi 12. maj 1998-imi naammassineqarlutik. Isumaqatigiinniarnerit sivisusimapput, tassanilu Aningaasarnermut Ministeriaqarfimmi atorfilittat kiisalu Namminersornerullutillu Oqartussani atorfilittat peqqissaartumik sulisimapput.
Danskit Naalakkersuisuinik isumaqatiginninniarnerit illuatungeriit paaseqatigiiffigilluarsimavaat, isumaqatigiinniarnerillu Danmarkimi nunatsinnilu aningaasaqarniarneq qissimigaarluarlugu ingerlanneqarsimallutik.
Isumaqatigiissutip
imaa pingaarneq tassaavoq ukiuni 1999-imi, 2000-imi 2001-imilu
ataatsi-moortumik tapiissutit 2.653,5 mio. kr.-inut aalajangersarneqarnerat,
1999-imi akit akissarsiallu killiffiat aallaavigalugu naatsorsorneqarsimasut.
Tamatuma kinguneraa ataatsimoortumik tapiissutit 1998-imut sanilliullutik
allannguuteqannginnerat, aatsitassanut ikummatissiassanullu tunngasutigut
ingerlatsinerup ukioq manna juulip aallaqqaataani Namminersornerullutik Oqartussanut
nuunneqarnerata kingunerisaannik ukiumut 9,2 mio. kr.-it ilanngunneqarnerat
eqqaassanngikkaanni. Tamatuma saniatigut ataatsimoortumik tapiissutit pisarneq
malillugu akit akissarsiallu qaffaatissaannut iluarsiivigineqarsimapput. 1998-imit 1999-imut 2,7%-inik iluarsiisoqarpoq.
Tamatuma saniatigut Naalakkersuisut
oqaatigisinnaavaat danskit Naalakkersuisui
isumaqa-tigiissuteqarfigineqarsimammata, soorlu taanna inatsisissatut
siunnersuutip ' 1, imm. 2-ani
takuneqarsinnaasoq, piffissami ataatsimoortumik tapiissuteqarfiusussami
tullermi sulisilluni ajoqusersinnaanermut sillimmasiisarnerup nuunneqarnissaa
pillugu illuatungeriit isumaqatigiissuteqarsinnaalersillugit. Tamatumunnga
piareersaatit naammasseriarpata suliniutit pisariaqartut Naalakkersuisut
ingerlanniarpaat, danskillu Naalakkersuisuinut isumaqatigiissutigineqassalluni
suliassaqarfiup taassuma tiguneqarneranut atatillugu ataatsimoortumik
tapiissutitigut aningaasanik qanoq amerlatigisunik
malitseqartitsisoqassanersoq.
Ataatsimoortumik tapiissutit
isumaqatigiinniutigineqarnerinut atatillugu Naalakkersuisut sinnerlugit
oqaatigissavara qulequttat pingaaruteqartut allat aamma
oqaluuserineqarsimammata, taakkulu pillugit danskit Naalakkersuisui sinnerlugit
Aningaasaqarnermut ministeri Mogens Lykketoft, taassuma Naalakkersuisullu
akornanni isumaqatigiinniartoqarsimalluni. Suut erseqqinnerusumik
isumaqatigiissutigineqarsimanersut isumaqatigiissummi 12. maj 1998-imeersumi
takuneqarsinnaapput.
Danskit Naalakkersuisuisa tipsertarnermit
lottortarnernillu iluanaarutit pillugit inatsisissatut siunnersuutaata
akuerineqarnissaa naatsorsuutigalugu illuatungeriit isumaqatigiipput tipsertarnermi
lottortarnermilu sinneqartoorutinit tamarmiusunit nunatsinnit
akiliutigineqartarnut naapertuuttut Namminersornerullutik Oqartussanut
ingerlaavartumik nuunneqartassasut. Tamatumunnga atatillugu ukiumut 12 mio.
kr.-it missaat nuunneqartassasut naatsorsuutigineqarpoq. Isumaqatigiissut
taanna ukioq manna 1. juli aallarnerfigalugu atuutilissaaq.
Danmarkip ilaasunut akitsuummut
eqqunneqarsimasumut taarsiissutitut ukiumut 2,8 mio. kr.-it 1998-imit
Namminersornerullutik Oqartussanut nuuttartussanngorpai.
Aningaasat siunissami Namminersornerullutik
Oqartussanut nuunneqartartussat erseqqinnerusumik agguataarneqartarnerat
sumullu atorneqarnissaat pillugu apeqqut Naalakkersuisut kingusinnerusukkut
uterfiginiarpaat.
Isumatigiissummi ilaagujortaaq illuatungeriit
oqaatigimmassuk tjenestemandit kalaallit soraarnerussutisiaannut
aningaasartuutit akilerneqartarnerat pillugu aaqqissuussilluni sulineq allartissimasoq.
Suliap taassuma september 1998 nallertinnagu naammassineqarsimanissaa
naatsorsuutigineqarpoq.
Aammattaaq oqaatigineqassaaq naalagaaffiup
Nunaoil A/S-mi akuunini isumaliutersuutigissagaa illuatungeriit
isumaqatigiissutigimmassuk, piginnittuneq suliassaqarfiullu sumut tunngassuteqarnera
eqqarsaatigalugu pisuussutit uumaatsut pillugit isumaqatigiissut
aallaavigalugu.
Tamakku saniatigut oqaatigineqassaaq
Aningaasaqarnermut Ministeriaqarfiup Naalakkersuisullu ataatsimoorlutik 12.
majimi tusagassiorfinnut nalunaarutaanni oqaatigineqarmat, issuaaneq: Kalaallit
Nunaanni pisortat illuutaasa iluarsarneqarnissaannut immikkut ittumik
pisariaqartitsineq pillugu apeqqut Namminersornerullutik Oqartussat
saqqummiussimagaat. Namminersornerullutik Oqartussat qinnuteqaateqarnerat
malillugu suliassaqarfimmi tassani teknikkikkut suliatigullu siunnersuineq
naalagaaffiup isumaginiarpaa, apeqqullu taanna pillugu oqaloqatigiinnerit
nangeqqinneqassasut illuatungeriit isumaqatigiissutigaat, issuaaneq naavoq.
Naggataatigut Naalakkersuisut matumuuna
kaammattutigissavaat isumaqatigiinniarnermi angusat iluarisimaarlugit Inatsisartut
oqaaseqaateqassasut, angusammi taakku pissutsit atuuttut eqqarsaatigalugit
pitsaanerpaanik anguneqarsinnaasutut isigineqartariaqarmata. Erseqqissaatigalugu
oqaatigineqassaaq ataatsimoortumik tapiissutit pillugit ukiunut pingasunut
isumaqatigiissutaasup taassuma nunatta aningaasaqarnikkut ingerlatsinera
ukiuni aggersuni pingasuni annertoorujussuarmik isumannaaliivigissammagu.
Ruth Heilmann, Siumup oqaaseqartua:
Qujanaq. Ukiuni pingasukkaartuni
naalagaaffiup Namminersornerullutik Oqartussanut tapiissutigisartagai pillugit
naalakkersuisut majip 12-ani isumaqatigiissuteqarput, tamannalu tunngavigalugu
inatsisissamut matumuuna siunnersuutit Inatsisartuni isummersorfigeqquvaat.
Siullermik Siumumiit oqaatigissavarput
taamatut isumaqatigiinniarnissamut tunngatillu siusinnerusukkullu
assigiinngitsutigut isumassanik eqqartuillutalu
isummersueqataanniartarsimagatta. Maannakkut nuannaarutigeqaarput
Naalakkersuisut danskillu naalakkersuisui imminnut qanillutik
paaseqatigiissuteqarlutillu isumaqatigiissuteqarsinnaassimammata. Tamanna
pingaaruteqaqaaq nalaaffeqatigiinnitsinni aammalu maani
namminersornerulersimasumut nunamut taamatut ajunngitsigisumik
paaseqatigiissutaasimammat aamma tapiissutit 2.653,5 mio. kr.-it allanillu
allaat ilassuteqartinneqarlutik.
Tamanna Siumumiit iluarisimaaqaarput,
tassami siusinnerusukkut ikiliartuaartitsinissamik eqqarsaataasimagaluartut
uani qimanneqarluinnarsimammata, allaat paaseqatigiilluarnikkut akerlianik
pisoqartussanngorluni. Tamanna angusaasoq kusanaqaaq, danskillu Naalakkersuisui
nersortariaqarput Namminersornerulernitsinni suli tassuunnakkut paasinnillutik
tapersersuinermik angisooq ersersimmassuk.
Tapiissutit makkuninnga
ilassuteqartinneqarnerat Siumumiit sakkortunerpaamik akuersaarpagut, tassa
nunatsinnut aatsitassanut ikummatissanullu aqutsiveqarfiup nuunneqarnerata
kingunerisaanik 9,2 mio. kr.-it akit, akissarsiallu qaffariaatissaannut 2,7
procentimik iluarsiineq, danskit Naalakkersuisuisa tipsernernit
lottortarnernillu iluanaarutit julip aallaqqaataa aallarnerfigalugu ukiumut 12
mio.-inik pissarsissutaalersussaq.
Danmarkip ilaasunut akitsuummut
eqqunneqarsimasumut ukiumut 2,8 mio. kr.-it ukioq mannamiit
Namminersornerusunut nuunneqartussat, taakkua angusarisaasut ilallugit aamma
sulisilluni ajoqqusersinnaannermut sillimmasiisarnerup nuunneqarnissaa pillugu
illua tungeriit isumaqatigiissuteqarsimapput, kingusinnerusukkut
uterfigineqartussamik. Tassungalu atatillugu suliassaqarfiup taassuma
tigunissaannut piareersaatit aallartereersut aningaasatigut ataatsimoortumik
tapiissutinut malitsigisassai isumaqatigiinniutigineqassallutik.
Taamaattumik Naalakkersuisut
inatsisissatut nutaatut saqqummiutaat Siumumiit tamakkiisumik
iluarisimaarlugillu isumaqataaffigaagut, aammalu ukiamut danskit Folketingianni
akuerineqarnissaat pisussaammat naalakkersuisunillu ingerlateqqinneqarnissaat
pingaartikkipput Siumittaaq oqaatigissavarput.
Qujavugut taamatut isumaqatiginninniarneq iluatsissimammat,
aammalu nunatsinnit Folketingimut ilaasortagut tassani
piareersaaqqataallutillu isummersueqataaneri nalunnginnatsigu qujaffigerusuppagut,
qularinngilarpullu aamma tassuunakkut
danskit Folketingianni tapersersuinertik ersersikkumaaraat.
Naggataagut Naalakkersuisut nunarpullu pilluaqqorusuppagut
sapiissuteqartumik naalagaaffeqartigiinnikkut danskit Naalakkersuisuinut
pitsaasumik periuseqartumik iliuuseqarnermikkut angusaqarluarmata, tamatsinnut
toqqissisimanartunik kinguneqartussamik, taamalu ukiorpassuarni
aserfallatsaaligassanik pilersaarusiugaangitsumillu sukumiinngitsumillu
ingerlatsisimanerup kingunerisaanik aningaasarpassuarnik naleqartumik nunatta
kisimi isumagisinnaanngilluinnagaannik oqariartuuteqarlutillu nassuitsumik
apuussaqarnermikkut paasineqarluarnerat ilassilluarneqarnerallu danskit
Naalakkersuisuinit.
Tamatsinnut neriunaateqalersitsinermik
kinguneqartumik Naalakkersuisut ilungersuuteqarlutillu
anguniagaqarusussuseqarnerminnik takutitsinerat Siumumiit nuannaarutigeqisarput
pillugu naalakkersuisut qutsavigingaarpagut, kissaatigissallugulu
naalakkersuisut siulittaasuata ataqqinartup ilaminut danskillu
naalakkersuisuinut qujassuterput ingerlateqqikkumaaraa.
Otto Steenholdt, Atassutip oqaaseqartua:
Oqaasissakka naalisarujussuassagukkit immaqa hallelujaamik oqaannaruma naammakkaluarpoq. Kisianni qujamasunneq angingaartoq puiunngilluinnarumallugu Atassummiit aallaqqaasiullugu allaat Naalakkersuisut qutsavigalugit pilluaqquniarpagut, suliaq pitsaasumik angusaqarfiusimasoq pillugu, qamannga pisumik qutsavigiumallugit.
Qularineqassanngilaq oqaaseqaat Atassummiit, imaluunniit Atassumeersoq, ukiaru Folketingimi oqaluuserisassaq naammagisimaarinninnermik qujamasunnermillu imaqassammat. Nuannaarutigilluinnarparput isumaqatigiinniarnermi illua tungeriit paaseqatigiillutik kusanartumik oqaloqatigiissinnaassimammata.
Isumaqatigiissutip imaa pingaarneq naammagisimaarluagarput tassaavoq ukiunut pingasunut aningaasat pisartakkatta kingumut qulakkiigaaneri, asulu 1999-imi akit akissarsiallu killiffiat aallaavigalugu naatsorsorneqarsimagillutik.
Soorunami aamma pisuussutitta uummaatsut tungaasigut ingerlatsiviup ilungersuullugu nunatsinnut nuutsinniaasaarsimasatta nuunneqarnermini aningaasartani nassarumaarai naatsorsuutigereersimavarput, tassalu taakkuupput 9,2 mio. kr.-it.
Inatsisissatut siunnersuutip ' 1, imm. 2-ani piffissami ataatsimoortumik tapiissuteqarfiusussami tullermi sulisillu ajoqqusersinnaannermut sillimmasiisarnerup nuunneqarnissaa isumaqatigiinniartut naapifigisimasaat aamma nersornartuuvoq, pissanngitigissavarpullu piareersaatit maanna suliarineqartut ineriarpata aningaasanik qanoq amerlatigisunik malitseqarumaarnersoq.
Uannulli aamma namminermut nuannaajallannartoq tassaavoq qulakkerneqarsimammat tipsertarnermi lottortarnermilu sinneqartoorutitut iluanaarutit nunatsinni akiliutigineqartartutut naapertuuttut maannga nuunneqartussanngormata, tassa inatsisissatut siunnersuut Folketingimi akuerineqassappat. Taama oqarpunga ukiuni arlaqalersuni Ilinniartitaanermut Ilageeqarnermullu Naalakkersuisuusoq ikiortigilluarlugu qasseeriaqalunga Folkertingimi saqqummiuteqattaartarsimagakku ilaanni oqaatsit sakkukitsuinnaanngitsut atorlugit. Aningaasat taakku ukiumut 12 mio. kr.-it, nunatsinni timersortartut atorfissaqarteqaat, asulu aamma ukioq manna 1. juli aallarnerfigalugu isumaqatigiissut siusinaartumik 6 mio.-inik aningaasartqarluni aallartimisaaleriissalluni, tassa qallunaat Naalakkersuisuisa aningaasat taakku inatsisit atuutsilernissaa utaqqeqqaanngikkaluarlugu aningaasat taaneqartut nassaariniartussaammatigit.
Aningaasat tipsernermit lottornermillu pisut timersortartunut qujarunnarnerarlugit oqaraluartilluta ilassutiginiarparput aamma aningaasat taakku meeqqanut inuusuttunullu sullissinermi atorneqarneruleqqullugit.
Atassummiit Kultooreqarnermut Ilinniartitaanermut Ilageeqarnermullu Naalakkersuisoq pilluaqquniarparput angusaq taanna imaannaanngitsoq nunattalu inuusortortaanut meerartaanullu pingaaruteqaqisoq sivisuumik ilungersuullugu suliniutigereerlugu kusanartumik naammassisaqarnera pissutigalugu.
Sulilu isumaqatigiissut allamik ilaqarujuoq, tassalu kalaallit tjenestemandit soraarnerussutisiaannut aningaasartuutit akilerneqartarnerat aaqqissuunneqarluni suliarineqalersimasoq, suliarlu ukioq manna naammassineqassagunarluni.
Naalagaaffiup Nunaoil A/S-imi piginneqataanera uparuarneqarsimammat qujarupparput, ilumummi piginneqataanerup pisussaaneq aamma nassatarisariaqarmagu. Sulili pissanngatitta ilaat aamma oqaaseqaammi taaneqarsimavoq, tassalu Kalaallit Nunatsinni pisortat illuutaasa, oqarta Danmarkimit tiguneqarsimasut aserfallassimaqisullu oqallisigineqarsimanerat. Nalunngilarput suliassaq tamanna eqqaaneqaraanngat oqaaseqarniartartut ilaanniit allaat qinnuuloornermik taaneqartartoq. Atassumiit uagut taama isumaqanngilagut. Ippassaq aningaasaqarniarnermut tunngasut oqallisigitillugit Grĝnlandsbankip illuutaata sunaaffa aaqqissuutariaqaqisup pisiarineqarsimanera tikikkatigu Atassutip tungaaniit ersarissumik oqaatigaarput tunisisup tigusisullu imminnut ataqqeqatigiillutik pissusilersirtartussaassut imaluunnit pissusilersortartussaaneri. Naalakkersuisut siulittaasuata tamakku pillugit oqaloqatiginnissuteqarumalluni pilersaarnera assuariffissaqartinngilarput. Atassummiit isumaqarpugut, Namminersornerullutik Oqartussat qinnuteqarnerat malillugu suliassaqarfimmi tassa teknikkikkut suliatigut siunnersuineq qallunaanik isumagineqarnissaa angusaasoq pitsaasoq, neriuutigaarpullu suleqatigiinneq tassannga aallarnersoq annerusumik ineriartortinneqarumaartoq.
Suli aamma naggataagut Naalakkersuisutt pilluaqqujumavagut angusaqarsimammata pitsaasumik nunatta siunissaani ukiut qaninnerit pingasut aningaasatigut annertoorujussumik isumannaallisaavigisimammassut.
Namminersornerullutik Oqartussanut tapiissutit pillugit inatsisissatut siunnersuut pillugu oqaaseqaat nuannaarluta Atassummiit taamatut oqaaseqarfigaarput.
Josef Motzfeldt, Inuit Ataqatigiit oqaaseqartuat:
Inuit Ataqatigiit danskit Naalakkersuisuisa nunatsinnut aningaasaliuttagaannut ukiunut tulliuttunut pingasunut atuuttussatut Naalakkersuisut isumaqatigiissutigisimasaat Inuit Ataqatigiit akuersaarpaat.
Aningaasaliunneqartartummi tapiissutaanatik aningaasiunneqartartut annertussusaat aalaja-ngariikkanik tunngaveqareerput, tunngavimmikkullu annertunertigut aatsaat allanngortinneqartarlutik oqartussaafinnik nutaanik naalagaaffimmit nunatsinnut nuussisoqarneratigut.
Apeqqutit marlussuit Naalakkersuisunut apeqqutigerusutagut tassaapput nalagaaffiup aatsitassanut uuliasiornermullu ingerlasseqatigiiffimmik piginneqataassutaanut tunngasut, tamatumani suna danskit ajornartorsiutigineraat paaserusunnermik suliap ingerlaqqinnginnerani.
Aappaatut, nunatsinni iluarsagassat, illuutit, nukissiutit aqqutaat, atortulersuutit aqqutaat allallu immikkukajaaq aqqingasattariaqartut eqqarsaatigalugit ukiunngulersoq taanna eqqartorneqarluni massakkut Naalakkersuisut danskit Naalakkersuisuisa neriorsuutigisimasaat nunatsinnut tunniussinnaasartik tassaasoq teknikkikkut suliatigullu siunnersuineq, taanna qanoq paasisariaqarnersoq Naalakkersuisunut nassuiaateqarfigeqqulaaraluarparput.
Makkua eqquinianernut kiisalu ilaasunut akitsuutit danskit, akitsuutit taakku kingulliit eqqarsaatigalugit danskit Naalakkersuisuisa atuuttussanngortissimasaannut tunngasoq aaqqinneqarsimammata pissusissamisoorpoq.
Naggasiullugu takkununnga atanngikkaluartoq tassaavoq, Narsarsuarmi sikunik alapernaarsuinermi kiffartuussineq Danmarkimi silasiorfiup Metereologisk Institutip ingerlataa, tusaqqajaratsigu unitsinneqalersaartoq sikunik alapernaarsuineq, tamanna ilumoornersoq, qaammataasatigullu taamaallaat isumagineqartussatut. Tusagarput eqqortuunersoq Naalakkersuisunut apeqqutigissavarput ilisimaneraat ilisimanngippassullu immaqa suliassaqarfiup taassuma nunatsinni oqartussaassunik tiguneqarsinnaannera suliniutissatut tulluartuusorinartuuvoq, tassami sumiissusersiortut Royal Arctic Lineminngaanniit massakkut attartorneqartarput, tassa nunatsinnin-ngaanneersuupput, timmisartortiseqatigiit nunatsinni angerlarsimaffeqarput, annertuumillu nunatsinni pigineqarlutik, tassani Danmarkimi silasiorfiup sunniutigisinnaasai suunersut ilisimaqqissaangitsigit.
Bjarne Kreutzmann, Akulliit Partiiat:
Paasivara 1999-imut, 2000-imut aamma
2001-imut ataatsimoortumik tapiissutit 1999-imi akit akissarsiallu
tunngavigalugit 2,653,5 mio. kr.-inut aalajangerneqarsimasut. Taakkunannga
tassa amernerusinnaanngimmata, qujanartumimmi siulianut naleqqiullugu
taamaaqqatigiinnarpaat, isumaqatiginninniartugut matumuuna qutsavigaakka
sulilluarsimanerat pillugu.
Aamma qujassutigaaara nunatsinni pisortat
inissiaataanni immikkut ittumik iluarsaassinissamik pisariaqartitsineq
oqaluuserineqaqqittussanngormat, isumaqatigiinniarnissallu ingerlalluarnissaannik
kissaallugit.
Anthon Frederiksen, Kattusseqatigiit:
Namminersornerullutik Oqartussat
1999-imiit ukioq 2001-imut danskit naalagaaffiata inatsisit tunngaviusut
ilaatigut tunngavigalugit nunatsinnut pisussaaffeqarneranut atatillugu
isumaqatigiissutaat 13. maj 1998-imeersoq innersuussutigalugu Kalaallit
Nunatsinni Namminersornerullutik Oqartussanut tapiissutit pillugit
inatsisissamut siunnersuut Kattusseqatigiit tunngaviatigut taperserpara.
Ukiuni pineqartuni danskit naalagaaffiata
nunatsinnut tapiissutigisartaagasa annertussisiisa allanngortinneqannginnerat
Kattusseqatigiinniit iluarisimaarparput, tassami Inatsisartut 1998-imi
ukiuunerani ataatsimiinnitsinni aatsitassat pillugit oqartussaaffiup
nunatsinnut nuunneqarnissaannut atatillugu 9 mio. kr.-it sinnilaarlugit tassunga
immikkut tapiissutigineqartussanut Inatsisartunut aamma taamanikkullu
akuersissutigineqareermata.
Pissusissamisoorpoq suliassat aamma
qangali ingerlareersut, soorlu tipsernermit lottornermullu tunngasut kiisami
aaqqiiffiginiarneqalermata.
Neriussuugullu danskit Aningaasaqarnermut
ministerianik isumaqatiginnissimaneq danskit Folketingiata aamma
akuersissutigijumaaraa.
Kiisalu kalaallit tjenestemandit
soraarnerussutisiassaannut tunngatillugu aammalu 1996-imi Inatsisartunut
ataatsimiinnitsinni apeqquteqaateqarsimanera aallaavigalugu aningaasat 70-80
mio. kr.-it missaaniinnerarneqartut septemberip 1998-i naatinnagu nunatsinnut
nuunneqarnissaat qulakkersimaneqarmat nuannaarutigisariaqarpoq.
Naggataatigut pisortat illuutaasa
iluarsaaneqarnissaannut suliassaqarfinni teknikkikkut suliatigullu
siunnersuinermik naalagaaffiup suleqataarusunnera naammagisimaartariaqarpoq.
Taamatut oqaaseqarlunga oqaaseqaat
akuersaarpara.
Daniel Skifte, Aningaasaqarnermut Ineqarnermullu
Naalakkersuisoq:
Qujanaq, siullermik partiit ataasiakkaat
oqaasii oqaaseqarfigitinnagit oqaatigissavara erseqqissarlugu tassa isumaqatigiinniarneq sivisooq
ingerlasimasoq, taavalu Naalakkersuisut siulittaasuat, Hr. Jonathan Motzfeldt,
taavalu uanga Aningaasaqarnermut Naalakkersuisutut qajaqatigiilluinnarluta
suliassaq ingerlassimagatsigu. Isumaqarpunga taanna oqallatsiaannarnerinnartut
oqaatiginagu, erseqqissumik oqaatigisariaqartoq. Jonathan Motzfeldtip
ilaasimanera pitsaaqqutaavoq, angusaq pitsaasumik aamma inerneqarpoq, aamma
nalunngilara Juntaap ilaginngikkuninga aamma angusaq tamaattoq
angusimagunarnavianngikkaluarit, tassa qajaqatigiinnerup ersernera taanna
isumaqarpunga qularnaatsoq.
Partiit oqaaseqaataat naatsunnguamik
oqaatigissavakka, tassa Siumut, Atassut, IA, Akulliit Partiaat
Kattusseqatigiillu tamarmik tamakkiisumik tapersiiput aamma nersorinnissutaat
qujassutigaarput.
Apeqqutit marlussuit ilaatigut
IA.minngaanniit qaffatsinneqartut, taakkua Naalakkersuisut siulittaasuata
akissavai, qujanaq.
Jonathan Motzfeldt, Naalakkersuisut Siulittaasuat:
Uangattaaq qujassutigaara taamatut
partiininngaannit maani ilassilluarneqarnera taama isumaqatigiinniarsimanerup
killiffiani. Isumaqatigiinniartarnerit ukiuni 19-it misaani malinnaafigisimallugit
malunnarpoq danskit Naalakkersuisuisa Namminersornerulersimanerput,
periarfissallu tassaniittut, akisussaaqqataaffgigaat malugisinnaallugu,
tamannalu nuannersuuvoq.
Taamaattumik aamma isumaqatigiinniarnernut
killiffigineqartartut ilaatigut eqqaasitsissutigisarpagut, siuliinni qanoq
iliornikkut tunngavissagut aneriarfissaallu tikkuartarlugit.
Inuit Ataqatigiit ataatsitassat allaffik
pillugu apeqqutigisaat, oqaatigissavara tassani danskit naalagaaffiata siusinnerusukkulli
Nuna Oil-ip aktiaasa nunatsinnit pisiarineqarsinnaanerat imaluunniit allatut
nalagaaffiup tassani piginneqataanera aaqqissinnaanera saqqummiussimavaat, taakkulu isumaqatigiinniarnermut ukununnga
atatillugit naammassineqarnissaat angusinnaannginnatsigu ataatsimiititaliaq
danskit Naalakkersuisuinit aammalu uagut Aatsitassat tungaaatigut
Direktoratitsinnit ingerlanneqartut, siunnersuut taanna misissorpaat, ilaatigut
DONG-ip piginneqatasiinnaanera tassani misissukkanut ilaavoq, maannamullu uagut tungitsinninngaanniit
erseqqissarsimavarput Nuna Oil-ip aaqqissuunneqarnermigut danskit uagullu
piginneqatigiinnerput 50 procentimik tamanit pigineqarmat.
Uagutsinnut soqutiginarpoq
paasilluassallugu, isertitat aamma
tassaniittut aatsitassat tungaatigut aaqqissuussineq
naligiilluinnartumik tamarmik, aningaasatigullu manna tikillugu aviffigeqatigiinnissamik
fordelingsnĝgleqarmat, aamma tassuunnakkut equngasumik aaqqiisoqannginnissa
pingaartikkipput.
Taamaattumik taanna apeqqut Inuit
Ataqatigiinneersoq uterfigineqartussaavoq, taanna suliassaq siunnersuut
ataatsimiititaliamut takkuteriarpat.
Teknikkikkut aammalu siunnersuinertigut
naalagaaffiup imminut pisussaaffilernera nunatsinni iluarsagassat pillugit, taanna saaffiginnissut soorunami danskit
aamma ilassilluarpaat namminneq Naalakkersuisut danskit pisussaatinnukuummata,
ilaatigut Naalakkersuisut Socialdemokratit siuliisa Schlüterip
Naalakkersuisuisa 6. februar 1989 cirkulĉremikkut imminnut danskit
pisussaafilersimammata Hjemmestyreminngaanniit saaffiginnissutit danskit
Naalakkersuisuinut ingerlasut Statsministereqarfiup allallu fagministereqarfiit
taava suleqatigiiffissamikkut nassaarniarfigisassagaat, taamatullu imminnut
pisussaaffilersimaneq tassaniittoq uagut aqqutigalugu taamatut ataatsimoortumik
suliassatigut nammaqatigiilluta periarfissaasorisagut oqallisiginiarpagut.
Aammalu imaalisoqaqqunagu ukiuni arlalinni
oqalliserusaassasugut, taanna uangut ilisimatitsissutigaarput, ukiup ataatsimi
ingerlanerani, tassa 1999-ip tungaanut, aningaasat iluarsaasinissatsinnut
tunngatillugit, maannamut naliliinnigut 4,9 mia.-it missaaniittut, taakkua
tungaatigut erseqqinnerusumik paaseqatigiiffiusumillu
nalilersueqatigiissasugut. Taanna aamma tassuunakkut paaseqatigiiffiuvoq.
Taavalu Narsarsuarmi sikunik
alapernaarsuumut tunngatillugu apeqqutigineqartoq uagut Naalakkersuisunit
saqqummiunneqarsimanngilaq taamatut unitsitsisinnaaneq, imaluunniit allatut
aaqqiisinnaaneq, kisianni suliassaq
taama ittoq aamma nunatsinninngaanniit pingaartinneqaqimmat,
angallannikkullu manna tikillugu isumannaallisaanermut pingaaruteqaqimmat,
Inuit Ataqatigiit matumani apeqqutaa annertunerusumik attorneqartunut
paasisassarsiorfiginissaanni aamma periarfissaqarniarumaarpugut.
Taama oqaaseqarlunga aamma suli
qujaqqippunga, taama inussiarnersumik isumaqatigiissut maannakkut Folketingimut
ingerlanneqarnerani Inatsisartunit tamanit, partiinit aamma Kattusseqatigiinnit
taperserneqarnera qujassutigalugu.
Konrad Steenholdt, Kultureqarnermut, Ilinniartitaanermut
Ilageeqarnermullu Naalakkersuisoq:
Uangattaaq aamma
isumaqatiginninniarsimasut pilluaqqussavakka. Tassaanna isumalluarnerujussuarmik
annertuumik pilersitsiumananga erseqqissaassutigilaarniariga maani inimi
oqallisigisarsimavagut tipsernermi lottornermilu pissarsiat amerlanersaat
atortarlutigit timersornermut.
Maannamut qanoq agguaanneqarnissaanut
tungasunik suli tigusaqarsimanngikkaluarluta, kisianni paasiniaanertigut
imatut paasivarput soorunami 12 mio.-ersuit taakkua tamaasa timersornermut
atorneqartussaanngimata, kisiannili agguataarneqartussaallutik timersornerup
saniatigut kultoorikkut suliniutinut, pinaveersartitsinernut assigiingitsunut
taavalu soorlu ilaatigut assersuutigalugu nappaasuup krĉftip
akiorniarneqarneranut, meqqaat inuusuttuaqqallu kattuffiinut assigiinngitsunut
taassumalu saniatigut sunngiffiup nalaani sammisassaqartitsiniarnernut tunngasut
aamma eqqaammaneqassallutik, taavalu soorunami aamma meeqqat soorunami aamma
mininneqartussaannatik.
Ilaatigununa uani imatut
paatsoortoqaqqunagu, manna tikillugu 4 mio.-it eqqaani pissarsiarisartakkagut
timersornermut agguaattarsimavagut, kisianni uani qaffannerani aamma
naatsorsuutigineqartariaqassaaq allat taakkunannga aningaasanik aamma
pissarsisarnissaat.
Hans Enoksen, Siulittaasoqarfimmi ilaasortaq, ataatsimiinnermik
aqutsisoq:
Taamaalilluni imikkoortoq 65-i
naammassivoq, tassalu Namminersornerullutik Oqartussanut tapiissutit
inatsisissaannut siunnersuumut Namminersornerullutik Oqartussat oqaaseqaataat.
Oqaluuserisaq naammassivoq.