Oqaluuserisassani immikkoortoq 07-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut sisamaat,
tallimanngorneq 7. marts 2003, nal. ?.
Hans Enoksen, Naalakkersuisut siulittaasuat, Siumut.
Qujanaq. Matumuuna Naalakkersuisut sinnerlugit nunatta nunap immikkoortuinut kommuneqarfinnullu aggorneqarnera pillugu Inatsisartut inatsisaata allanngortinneqarnissaanik siunnersuut saqqummiutissavara.
Siunnersuut saqqummiunneqarpoq Sisimiut Maniitsullu kommuniisa 2001-mi januarip ulluisa aallaqaataanni Kangerlussuup Sisimiut Kommuneanut atalerneranut atatillugu 2001-mi augustip ulluisa qulingiluaanni isumaqatigiissuteqarmata kommunet marluk taakku akornanni nutaamik killeqarfiliisoqarnissaanik Kangerlussuaq kommunemut ataasiinnarmut ataleqqullugu.
Taamatullu aamma najugaqarfiusumik imermik pilersuineq kommunep ataatsip killeqarfiata iluaniilernissaa qularnaarniarlugu.
Siunnersuutip matuma suliarineqarnerani Naalakkersuisut kommunenut pineqartunut tusarniaapput. Tusarniaanermi tassani paasinarsivoq siunnersuummi siullermi sumiiffinnut nalunaaqutsiussat eqqarsaatigalugit kukkuneqartoq paatsoortoqarsinnaasorlu. Taamaattumik siunnersuutip matuma inaarutaasumik ilusilersornerani sumiiffinnut nalunaaqutsiussat inatsisillu oqaasertai pisariaqartumik iluarsineqarput.
Siunnersuut saqqummiunneqartoq kommunet 2001-mi augustimi isumaqatigiissutaannut naapertuunnerusunngorlugu.
Inatsisissatut siunnersuummut nassuiaatit kiisalu nunap assinga ilanngunneqartoq innersuussutigalugit matumuuna inassutigissavara siunnersuut taama isikkoqarluni aappassaaneerneqarnissaminut ingerlateqqinneqassasoq.
Qujanaq.
Jonathan Motzfeldt, ataatsimiinnermik aqutsisoq, Inatsisartut siulittaasuat, Siumut.
Partiit
oqaaseqartui. Ole Dorph, Siumut. Tulliuppoq Agathe Fontain, Inuit Ataqatigiit.
Ole Dorph, Siumup oqaaseqartua.
Qujanaq. Inatsimmut
allannguutissatut saqqummiunneqartoq Maniitsup Sisimiullu kommuniisa
isumaqatigiissutaannut naapertuuttunngorlugu aaqqiissutaasoq Siumumiit
isumaqatigalugu taperserparput, inassutigissavarpullu taamatut isikkoqarluni
ingerlaqqinnissaa.
Qujanaq.
Jonathan Motzfeldt, ataatsimiinnermik aqutsisoq, Inatsisartut
siulittaasuat, Siumut.
Tulliulluni oqaaseqassaaq Agathe Fontain, Inuit Ataqatigiit. Taava tulliutissaaq Jensine Berthelsen, Atassut.
Agathe Fontain, Inuit Ataqatigiit oqaaseqartuat.
Inuit Ataqatigiit 2000-imi ukiakkut
Kangerlussuup kommunemut atalernissaa pillugu nassuiaat Inatsisartuni
eqqartorneqarmat Naalakkersuisunut kaammattuutigaat kommunet marluk akornanni
nutaamik killeqarfiliisoqarnissaanik isumaqatigiinniuteqarfigineqartariaqartut
Kangerlussuaq kommunemut ataatsimut atalerniassammat.
Taamanikkut Kangerlussuaq
kommuneqarfinnut aggornilersuinissami inatsisissatut siunnersuutigineqartoq
naapertorlugu Kangerlussuarmi imeqarfik, eqqaaveqarfik, neriniartarfik
takornariaqarnermullu tunngasut ilaat Maniitsup kommuneaniittussatut
siunnersuutigineqarput.
Kangerlussuup siunissami
ineriartornissaanut tamanna akornutaassammat Inuit Ataqatigiit
nuannaarutigaarput ajornartorsiut pillugu kommuneqarfiit marluusut akunnerminni
paaseqatigiilluarlutik Sisimiut Maniitsullu kommuniisa killeqarfissaat isumaqatigiissuteqarfigimmassuk.
Taamatut naatsumik oqaaseqarluta
Kalaallit Nunaata nunap immikkoortuinut kommuneqarfinnullu aggorneqarnera
pillugu Inatsisartut inatsisaata allanngortinneqarneranik Inatsisartut
inatsisissaattut siunnersuut Naalakkersuisut siulittaasuannit
saqqummiunneqartoq taama isikkoqarluni aappassaaneerneqarnissaanut Inuit
Ataqatigiit akuersaarpaat, Sisimiut kommuneat taamaalilluni anginerulerluni.
Jonathan Motzfeldt, ataatsimiinnermik aqutsisoq,
Inatsisartut siulittaasuat, Siumut.
Jensine Berthelsen, Atassut. Tulliuppoq Astrid Fleischer Rex, Demokratit.
Jensine Berthelsen, Atassutip oqaaseqartua.
Qujanaq. Kangerlussuup Sisimiut kommuneanut 2001-mi januarip aallaqqaataani atalerneranut atatillugu Sisimiut Maniitsullu akornanni killeqarfik iluarsiivigineqartariaqalersimasoq Kalaallit Nunaata nunap immikkoortuinut kommuneqarfinnullu aggorneqarnera pillugu Inatsisartut inatsisaata allanngortinneqarneratigut iluarsiiviginiarneqartussaammat, minnerunngitsumillu allanngortitsiniarneq pillugu Maniitsup Kommuneata Sisimiullu Kommuneata Atassummit paasisagut naapertorlugit assortuunnertaqanngitsumik isumaqataaffigisimammassuk siunnersuutip taama isikkoqarluni aappassaaneerneqarnissaminut ingerlateqqinneqarnissaa Atassummit taperserparput.
Jonathan Motzfeldt, ataatsimiinnermik aqutsisoq, Inatsisartut siulittaasuat, Siumut.
Astrid Flesicher Rex, Demokratit. Tulliuppoq Anthon Frederiksen, Kattusseqatigiit.
Astrid Fleischer Rex, Demokratit oqaaseqartuat.
Kalaallit Nunaata nunap immikkoortuinut kommuneqarfinnullu aggorneqarnera pillugu Inatsisartut inatsisaata allanngortinneqarneranik Inatsisartut inatsisaattut siunnersuut.
Sisimiut Maniitsullu killeqarfimminnik allanngortitserusunnerat Demokratiniit paasilluarlugu siunnersuut akueraarput, taamatullu isikkoqarluni aappassaaneerneqarnissaminut ingerlaqqinnissaa isumaqatigalugu.
Jonathan Motzfeldt, ataatsimiinnermik aqutsisoq, Inatsisartut siulittaasuat, Siumut.
Tulliuppoq Anthon Frederiksen, Kattusseqatigiit.
Anthon Frederiksen, Kattusseqatigiit.
Kalaallit Nunaata nunap immikkoortuinut kommuneqarfinnut aggorneqarnera pillugu Inatsisartut inatsisaata allanngortinneqarnissaanut siunnersuut Kattusseqatigiinniit imaattumik oqaaseqarfigissavara.
Siunnersuutip saqqummiunneqarneranut atatillugu paasissutissat tunniunneqartut toqqammavigalugit, minnerunngitsumillu Maniitsup Sisimiullu kommuniisa oqaatigineqartutuut isumaqatigiissimanerat tunngavigalugu allannguutissatut siunnersuut tamakkiisumik taperserpara.
Jonathan Motzfeldt, ataatsimiinnermik aqutsisoq, Inatsisartut siulittaasuat, Siumut.
Naalakkersuisut siulittaasuat.
Hans Enoksen, Naalakkersuisut Siulittaasuat, Siumut.
Qujanaq. Paasisinnaavara assortuunnertaqanngilluinnaqqissaartumik naammassineqartussanngortoq siullermeernerani. Taanna nuannaarutigaara, aamma kommunet marluk paaseqatigiinnerat tassuuna naqissuserneqartussanngormat.
Taamatut naatsunnguamik oqaaseqarlunga Naalakkersuisut saqqummiussaat ilassilluarneqarmat qujavunga.
Naggataatigut neriuppunga kommunet kattussuutilerpata taamatut isumaqatigiitsigaluta maani eqqartuisarumaartugut. Taanna asuli oqaasersiaannaavoq.
Qujanaq.
Jonathan Motzfeldt, ataatsimiinnermik aqutsisoq, Inatsisartut siulittaasuat, Siumut.
Kommunet kattussuukkumaarnerat uterfigineqarumaarpoq.
Taavalu immikkoortoq taamaalilluni siullermeerneqarneratut isikkoqarluni aappassaaneerneqarnissaanut ingerlanneqarumaarpoq.