Oqaluuserisassani immikkoortoq 08-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut sisamaat,
tallimanngorneq 7. marts 2003, nal. ?.
Hans Enoksen, Naalakkersuisut siulittaasuat, Siumut.
Inatsisartut 2001-mi ukiakkut ataatsimiinnerminni 2002-milu upernaakkut ataatsimiinnerminni oqaluuseraat nunatta Karsiata naatsorsuutaasa kukkunersiorneqartarnerannut Inatsisartut ataatsimiititaliaata suut suliarisassanerai.
Inatsisartut Inatsiseqarnermut Ataatsimiititaliaata isumaliutissiissutaa tunngavigalugu Inatsisartut aalajangerput Naalakkersuisut qinnuigineqassasut Inatsisartut Naalakkersuisullu pillugit Inatsisartut inatsisaata allanngortinneqarneranik siunnersuummik saqqummiusseqqullugit. Tamatumuunakkut nunatta Karsiata naatsorsuutaasa kukkunersiorneqartarnerannut Inatsisartut ataatsimiititaliaata ingerlatsinermik kukkunersiuisinnaanera ersarissumik tunngavissikkumallugu.
Tamanna tunngavigalugu Naalakkersuisut siunnersuut manna suliaraat, qulakkeerisussaq nunatta Karsiata naatsorsuutaasa kukkunersiorneqartarnerannut Inatsisartut ataatsimiititaliaata periarfissaqarnissaanik Naalakkersuisut suliffeqarfiillu taakkua ataaniittut suliassaqarfimminni allaffissornikkut aaqqissuussisarnerannik aamma kukkunersiuisarnissaminnut.
Tamatuma peqatigisaanik Naalakkersuisut pissutissaqarsimapput Inatsisartut isumaqatigiinniarsimanerisa ilanngussartallit tamanut saqqummiunneqartarnerat pillugu malittarisassat erseqqissassallugit.
Taamatut oqaaseqarlunga siunnersuut saqqummiuppara Inatsisartuni akuersertumik suliareqqullugu.
Qujanaq.
Jonathan Motzfeldt, ataatsimiinnermik aqutsisoq, Inatsisartut siulittaasuat, Siumut.
Partiit
oqaaseqartui tikippagut. Per
Rosing-Petersen, Siumut.
Per Rosing-Petersen, Siumup oqaaseqartua.
Qujanaq. Siunnersuut Inatsisartut
Naalakkersuisullu avissaartinneqarnerata kingorna demokratiimik
pingaartitsinermik takutitsilluartoq Siumumiit imaattumik
oqaaseqarfigissavarput.
Aallaqqaasiutigalugu
oqaatigineqassaaq suliarinninnissamik siunnersuut Inatsisartut 2002-mi
upernaakkut ataatsimiinneranni aammalu 2001-mi Inatsisartut ukiakkut
ataatsimiinneranni taamani Kukkunersiuinermut Ataatsimiititaliami
ilaasortaasimasunit siunnersuutigineqartup Inatsisartuni akuersaartumik
suliarineqarnerata toqqaannartumik malitsigimmagu. Tunngaviusutut siunnersuut
pingaarnernik pingasunik anguniagaqarpoq, tassaappullu:
1) Pisortat ingerlatsinerisa
kukkunersiuiffigineqartarnerisa aallartinneqarnissaanut
Kukkunersiunermut
Ataatsimiititaliaq ersarissumik piginnaatitsissuteqarfigineqassasoq, aamma
2) Ingerlatseqatigiiffiit
Namminersornerullutik Oqartussanit tamakkiisumik ilaannakuusumilluunniig
pigineqartunik Kukkunersiuinermut Ataatsimiititaliaq paasisaqarsinnaatitaassasoq,
kiisalu
3) Kukkunersiuinermut
Ataatsimiititaliaq aningaasanik aningaasanut inatsimmi
atugassiissutigineqartunik tamanik paasisaqarsinnaatitaassasoq.
Maannakkut oqaluuserinninnermi
Siumumiit oqaatigissavarput eqqumaffigilluinnaratsigu pisortat ingerlatsinerisa
kukkunersiuiffigineqartarnissaannut siunnersuut aalajangersimasoq naapertorlugu
Kukkunersiuinermut Ataatsimiititaliap paasisaqarsinnaatitaanissaa
ajunnginnersoq. Tamatuma peqatigisaanik siunnersuutaaqqaartoq tamakkerlugu eqqaamallaqqussaqaarput.
Taamatut oqariarluta Siumumiit
siunnersuut Naalakkersuisut ullumi saqqummiussaat nalinginnaasumik
kukkunersiuinerup saniatigut Naalakkersuisut taakkualu ataanni suliffeqarfiit
ingerlatsisarnerannut kukkunersiuisinnaanngortitsinissaq Inatsisartut
Kukkunersiuinermut Ataatsimiititaliaa piginnaatinneqalernissaa taperserparput.
Taamatut taperseeriarluta siunissami
suleriaqqinnissamut atatillugu ataatsimiititaliamut inussiarnersumik kaammattuutigerusupparput
ukua ataani ilanngussagut nalilersuisarnissamut ilanngutilaartaqqullugit:
Pisortat ingerlatsinerisa
kukkunersiuiffigineqartarnissaannik ullumi siunnersuummut tunngatillugu
naleqquttumik Siumumiit nalilersuinermi siunissami suleriaqqinnissami
ilanngunneqarsinnaasutut isigisagut makkuupput:
Allannguut siulleq immikkoortut
aappaat nutaaq:
Qularnaarlugu Siumumiit
paaserusupparput immikkoortoq siullermi innersuussutigineqartut
kissaatigineqartup ilaatinneqarnissaa, tassa sullissiviit assigiinngitsut,
aqutsisoqarfiit sulliviillu tamakkerlugit naatsorsuutaasa
pissarsiarineqarsinnaanissaat. Qallunaat Nunaanni naalagaaffiup
kukkunersiuisoqarneranut inatsimmi aamma qinikkanik naalagaaffiup
kukkunersiuisoqarneranut inatsimmi pissarsiaqarsinnaatitaaneq ?-inut arlalinnut
agguataarneqarsimavoq, taamaalilluni naalagaaffiup kukkunersiuisui qinikkatullu
naalagaaffiup kukkunersiuisui naalagaaffiup kukkunersiuisuanut
kukkunersiugaanngitsunik allalli kukkunersiugaannik pisortat ingerlatsinerannik
naatsorsuutitigut kukkunersiuisinnaallutik. Assersuutigalugu taamaappoq
sullivinnut tapiiffigineqartartunut aamma naalagaaffiup
aktsiaatileqatigiiffianut.
Siumumiit takusinnaasarput malillugu
tamanna matumani tamakkerlugu pissarsiarineqarsinaanngilaq, tassani
eqqarsaatigineqarpoq aningaasanik aningaasanut inatsisikkoortumik,
taamaalillunilu aamma tassa imaappoq, Namminersornerullutik Oqartussat
ingerlatseqatigiiffiini tapiissuteqartarnermut tunngasukkoortumik aamma
sullissinissamut isumaqatigiissutitigoortumik aningaasaliissutigineqartartunik
tamanik nakkutilliisinnaatitaaneq, tassa imaappoq, siunnersuutaaqqaartumi
immikkoortoq aappaat pingajuallu.
Taamaammat Siumumiit
kaammattuutigissavarput Naalakkersuisut qulakkeertissagaat aalajangersimasumik
siunnersuut siunissamut atuuttussanngorlugu qulakkeerneqassasoq, imaluunniit
immikkoortoq aappaattut nutaamut allannguutissatut siunnersuummik
aalajangersimasumik saqqummiussisoqassasoq, taamaalilluni ataatsimiititaliap
pisortat ingerlatsiviinut kukkunersiuiffigisinnaasai kisimik
pineqassanngimmata.
Tamatuma killilersimaarneqarnissaa
tamatumani atuutissasoq Naalakkersuisut siunniukkaat siunnersuutip
aalajangersagartaanut ataasiakkaanut oqaaseqaatini immikkoortoq siullermi
toqqaannarlugu allanneqarpoq. Tamanna pinngitsoortinniarlugu oqaaseqatigiit
siulliit ima ilaneqartariaqaraluartut Siumumiit isumaqarpugut: ?pisortat
ingerlatsiviini tamani Kukkunersiuinermut Ataatsimiititaliap
kukkunersiuivigissallugit piginnaatitaaffigisaanni kukkunersiuisarnissaq?.
Tamatuma saniatigut oqaaseqaatit tullii peerneqartariaqarput tassaasut
aningaasalersuinermut tunngatillugu kukkunersiuiffigineqarsinnaareersut
taamalilluni tassunga killiliivigineqarnissaannik inerniliineq.
Qulakkeerneqartariaqartutut
Siumumiit isumaqarfigisarput imaappoq: oqaaseqaatini ima
allassimasoqartariaqaraluarpoq, tassungaluunniit ilanngullugu Inatsisartuni
oqaatigineqartariaqarpoq oqaatsit ?pisortat ingerlatsiviinik kukkunersiuineq?
killiliisuusutut isumaqartinneqassanngitsoq. Neriuutigaarpullu Inatsisartut
Naalakkersuisunilu ilaasortat tamatut naliliinermut isumaqataassasut.
Pisortat ingerlatsiviinik
kukkunersiuisinnaatitaanerup annertusineqarnissaanik siunnersuummi
annikippallaatut issorinarpoq, takuuk siorna upernaakkut ataatsimiinnermi
Inatsisit atortinneqarnerannut Ataatsimiititaliap isumaliutissiissutaa,
tassanimi ilaatigut aammattaaq aningaasanut inatsimmi aningaasat
atugassiissutigineqartut tamakkerlugit paasisaqarfigineqarsinnaanerat
oqaluuserineqarmat, eqqarsaatigigaanni Kukkunersiuinermut Ataatsimiititaliaq
taamatut periarfissaqartuarsimasoq naliliissutigineqarmat.
Taamaammat Siumumiit
tikkuarumavarput Inatsisit atortinneqarnerannut Ataatsimiititaliap
isumaliutissiissutaata ilaa Namminersornerullutik Oqartussat
ingerlatseqatigiiffiinit paasisaqarsinnaatitaaneq paasisaqarsinnaatitaanerillu
allat eqqarsaatigalugit naatsorsuutigineqarnissaat suli amigaataasoq.
Taamaammat Siumumiit aperiniarpugut taakkununnga tunngasumik suliaq qanoq
ingerlanersoq.
Kiisalu aamma apeqqutaavoq pisortat
ingerlatsiviisa kukkunersiuiffigineqartarnerisa atugaalernissaa qanoq
akeqassanersoq. Tamanna soorunami Inatsisartut Kukkunersiuinermut
Ataatsimiititaliap Inatsisartullu Allattoqarfiata oqallisissiornerisigut
aalajangiiffigineqartussaasoq Siumumiit isumaqarfigaarput, taamaaliornikkut
Inatsisartut aningaasanut inatsimmi aningaasaliissuteqarfigineqarnerata
ilaatigut pisariaqartutut.
Taamaammat mianersuutassaavoq taakku
saniatigut pisortat ingerlatsiviisa kukkunersiuiffigineqarsinnaanerisa
aallartinneqarnissaannut Kukkunersiuinermut Ataatsimiititaliap periarfissaasa
killilerniarneqarnissaa, takuuk Inatsisartut Inatsisit atortinneqarnerannut
isumaliutissiissutaanni issuaavigineqartoq, tassani oqaatigineqarmat:
?Namminersornerullutik Oqartussat naleqqutinngitsumik aningaasartuuteqartinneqassanngitsut?,
isumatusaartumik atorneqassasoq aamma pisariillisaatitut sipaarutaasussatut
naatsorsuutigineqarsinnaasunut tulluartuussasut.
Kingulleq assersuutigalugu Siumut
isumaqarpoq immikkut piumasaqaatinngortinneqarnaveersaatariaqartoq maleruagassat
nutaat malillugit Kukkunersiuinermut Ataatsimiititaliap
aalajangerniartariaqalerpagu suut kukkunersiuiffigiumanerlugit.
Taamaammat siunnersuutip matuma
oqaluuserineqarneranut atatillugu apeqqut kia kukkunersiuisut avataaneersut akilissanerai
oqallisigalugu aallartinneqartariaqartoq missingersuusiaq Inatsisartut
missingersuutaannut nuunneqartariaqannginnersoq, taamaalillunilu
oqartussaaffeqarneq akisussaasuuneq aningaasaliussallu imminnut
ingiaqatigiissinneqarlutik, taamaaillunilu ataqatigiissumik eqaannerusumillu
kukkunersiutinermut pisortat ingerlatsinerannik kukkunersiuinermut
aningaasalersuinissamut missingersuusiortoqarluni, aammalu kukkunersiuisut
avataaneersut kukkunersiuiffigineqartussanut ilaajunnaarsissallugit, tassalu Naalakkersuisut.
Kukkunersiuisut
kukkunersiuiffigisassaannit, tassalu Naalakkersuisunit akilerneqarnissamit
attuumassuteqarpallaarunnaartariaqarput. Aamma ilumoorpoq Naalakkersuisut
imminnut kukkunersiuiffeqartut, iluminni kukkunersiuisut. Landskarsip naatsorsuutaasa
piareersaasiorneqarnerannut Naalakkersuisut siunnersuiffigineqarnissaannik
ilitsersorneqarnissaannillu pisariaqartitsilerpata, taava kukkunersiuisut
avataaneersut siunnersortitut atorneqarsinnaanerat assersuutissaavoq.
Ukua taakkartukkakka siunissami
suleriarnissamut isumaliutissiissutitut ilaasussatut
kaammattuutigineqaannarput.
Siumumiit taamatut oqaaseqarluta
siunnersuut taperserparput, neriuutigaarpullu inatsisit atortinneqarneranut
ataatsimiititaliap suliamik suliarinninnermini oqaaseqaatit uku ilanngullugit
nalilersuiumaartoq.
Taamatullu oqaaseqarluta
siunnersuutip aappassaaniinnginnerani ataatsimiititaliamit pisarneq malillugu
sukumiisumik suliarineqarumaartoq peqataaffigissavarput.
Qujanaq.
Jonathan Motzfeldt, ataatsimiinnermik aqutsisoq,
Inatsisartut siulittaasuat, Siumut.
Tulliulluni oqaaseqassaaq Henriette
Rasmussen, Inuit Ataqatigiit.
Henriette Rasmussen, Inuit Ataqatigiit oqaaseqartuat.
Inuit Ataqatigiit allannguutissatut
siunnersuummut maani saqqummiunneqartumut annertuumik oqaaseqarnissatsinnut
pissutissaqarsorinngilagut, siunnersuutigineqartummi taakkuupput qinigaaffiup
siuliani Inatsisartuni partiit allallu peqatigalugit aamma ujartortarsimasagut.
Siunnersuutigineqartut taamaattumik
tamakkerlugit tunuliaqusersussamaarpagut, ilaatigummi siunertarineqarpoq
Inatsisartut Kukkunersiuinermut Ataatsimiititaliaata ukioq mannamiit
ingerlatsinermik kukkunersiuisinnaanermut ersarissumik aamma
pisinnaatitaalersinneqarnissaat. Taamaalilluni Ataatsimiititaliap
nalinginnaasumik kukkunersiuinerup saniatigut Naalakkersuisut taakkualu ataanni
suliffeqarfiit suliamut tunngagssuteqartunik aaqqissuussisarnerannik
kukkunersiuisinnaanngorfigilissavai, tamannalu alloriarneruvoq
ukiorpassuanngortuni amigaataasimasoq pisariaqartorli.
Taamaattumik siunnersuutigineqartut
allat Inuit Ataqatigiit isoriffissaqartinngimmatigit siunnersuutigineqartumut
isumaqataanerput matumani nalunaarutigaarput, aappassaaneerneqalerpallu
naggataarutaasumillu suliarineqalerpat taaseqataaffigissamaarparput.
Jonathan Motzfeldt, ataatsimiinnermik aqutsisoq,
Inatsisartut siulittaasuat, Siumut.
Tulliuppoq Isak Davidsen, Atassut.
Isak Davidsen, Atassutip oqaaseqartua.
Naalakkersuisut sinnerlugit Naalakkersuisut siulittasuata saqqummiussineranut Atassummit imaattumik oqaaseqaateqassaagut.
Inatsisartut Kukkunersiunermut Ataatsimiitsitaliaata suliassai pillugit 2001-mi oqaluuserisassatut 59-situt oqaluuserineqarsimavoq, 2002-milu upernaakkut ataatsimiinnermi oqaluuserisassatut 34-tut aamma oqaluuserineqarsimalluni.
Naalakkersuisut peqqussutip allanngortinneqarnissaanik siunnersuuteqarnerminni §17-mi, immikkoortoq 1-ip kingornanut nutaatut ilanngussipput.
Immikkoortoq 2-nngorlugu Kukkunersiuinermi Ataatsimiititaliap suliaqareernermini Naalakkersuisunut suliarineqarsimasut ilisimatitsissutitut nassiuttassagaat, kiisalu peqqussummi immikkoortoq 2 peqqussutip atulernerani immikkoortoq 3-nngussasoq, §34-mi allanngortinneqartussatut ilanngunneqarsimavoq: ?Ataatsimiissutaat? imatut oqaasertalerneqassasoq: ?Ilanngussartallit?.
Atassummit nuannaarutigaarput nalunnginnatigu ataatsimiitsitaliap annertunerusumik pisinnaatitaaffeqalernissaa peqqussutissami anguniarneqartoq. Tapersersuinitsinnut aamma tunngavigaarput aktiaateqarluni ingerlatseqatigiiffissuit Namminersornerullutik Oqartussanit ilaatigut aningaasaliiffigineqartartut toqqaannartumik akuleruffigisinnaanngisagut paasiniaaffigisinnaalissagatsigit Ataatsimiititaliaq aqqutigalugu.
Atassummit isumaqarpugut piumasaqaat piqqissaartumik nalilersuiffigineqarsimasoq. Kukkunersiuinermut Ataatsimiitsitaliap pisinnaatitaaffii ersarissarneqarlutillu eqaallisarneqarsimapput.
Atassummit taamatut oqaaseqarluta siunnersuut taamatut isikkoqarluni aappassaaneerneqarnissaminut ingerlaqqissasoq taperserparput.
Jonathan Motzfeldt, ataatsimiinnermik aqutsisoq, Inatsisartut siulittaasuat, Siumut.
Tulliuppoq Per Berthelsen, Demokratit.
Per Berthelsen, Demokratit oqaaseqartuat.
Qujanaq. Inatsisartut Naalakkersuisullu pillugit Inatsisartut inatsisissaata allanngortinneqarneranik Inatsisartut inatsisissaattut siunnersuummut atatillugu Demokratinit naatsunnguamik oqaaseqassaagut imaattunik.
Demokratit tungaannit pingaartittuuarput pisortat ingerlataasa suulluunniit ammasumik paasiuminartumillu ingerlanneqartarnissaat. Demokratillu tungaannit aamma pingaartipparput Inatsisartut Naalakkersuisunik sulisitsisutut aammalu piginnittuusutullu ilaatigut suliakkiissutit suliarinnittussaatitaasumut naapertuuttumik naammaginartumillu suliarineqarnerannik qulakkeerinninniarluni nakkutiginnissinnaanissaata tutsuviginartumik periarfissaatinneqarnissaa.
Isumaqarpugut una allanngortitsinissamik siunnersuut aqqutigalugu atoruminartumik ujartorneqartut ammaassivigineqartut, taamaattumik Inatsisartut Naalakkersuisut pillugit Inatsisartut inatsisissaata allanngortinneqarneranik Inatsisartut inatsisissaattut siunnersuut una Demokratit tungaannit ilalerparput aammalu nalunaarutigissallugu matumuuna aappassaaneerneqarnerani pingajussaaneerneqarneranilu aamma tapersersuilluta taaseqataajumaaratta.
Jonathan Motzfeldt, ataatsimiinnermik aqutsisoq, Inatsisartut siulittaasuat, Siumut.
Tulliulluni oqaaseqassaaq Anthon Frederiksen, Kattusseqatigiit.
Anthon Frederiksen, Kattusseqatigiit.
Inatsisartut Naalakkersuisullu pillugit Inatsisartut inatsisaata allanngortinneqarnissaanik Naalakkersuisut siunnersuutaat Kattusseqatigiit sinnerlugit imaattumik oqaaseqarfigissavara.
Inatsisartut Naalakkersuisullu pillugit Inatsisartut inatsisaata allanngortinneqarnissaanut tunngatillugu Kattusseqatigiit sinnerlugit maluginiarpara Naalakkersuisut allannguutissatut siunnersuuteqarnermikkut nunatta Karsiata naatsorsuutaasa kukkunersiorneqartarnerannut tunngatillugu Inatsisartut Kukkunersiuinermut Ataatsimiititaliaata sulinermini ersarissumik tunngavilersukkamillu Naalakkersuisut allannguutissamik siunnersuusiorniarsimagaluartut, tassami Inatsisartut ukiakkulli 2000-mi ataatsimiinnerminni tamanna piumasarinikuummassuk.
Kisianni takusinnaasakka malillugit Inatsisartut Landskarsip kukkunersiorneqartarneranut ataatsimiititaliaata sulinermini inatsisitigut pitsaasumik tunngavissaqarnissaat sakkussaqarnissaallu pillugit Inatsisartut 2001-mi ukiakkut ataatsimiinnitsinni taamanikkut Kukkunersiuinermut Ataatsimiititaliap siunnersuutaat Inatsisartunit tamarmiusunit tapersersorneqartut Inatsisartullu upernaakkut 2002-mi ataatsimiinneranni naqissuserneqartut maanna paasiuminaatsippara sooq Naalakkersuisut Inatsisartut siusinnerusukkut aalajangiusimasaat malikkumasimannginneraat.
Kattusseqatigiit sinnerlugit ersarissumik paatsoorneqarsinnaanngitsumillu oqaatigissavara Naalakkersuisut Inatsisartut aalajangigaannik avaqqutsiniarnerat akuersaarneqarsinnaanngilluinnarmat, tassami Naalakkersuisut Inatsisartut aalajangigaat akuersissutaallu naapertorlugit sulisussaaniaraluarmata.
Pingaarnerit ilaattut minnerpaamik ilaatigut taamanikkut aamma Kattusseqatigiinniit partiinillu allaniit piumasarineqarpoq Inatsisartut Kukkunersiuinermut Ataatsimiititaliaata ingerlatsiviit Inatsisartut aningaasanut inatsisaatigut aningaasalersorneqartut aningaasaliiffigineqartullu Kukkunersiuinermut Ataatsimiititaliamit soorunami tamakkiisumik misissuiffigineqarsinnaasariaqartut. Tamannalumi Kukkunersiuinermut Ataatsimiititaliap nammineerluni aamma taamanikkut ersarissumik piumasaqaataanut ilaapput, oqareernittuut Inatsisartunit tamanit taperserneqartut.
Tassami Inatsisartut Kukkunersiuinermut Ataatsimiititaliaat ukiukkulli 2000-mi nalunaarusiornerminut atatillugu Inatsisartunut piumasaqaateqarpoq Ataatsimiititaliap oqartussaaffii annertusineqarlutillu ersarissarneqassasut. Tamannalumi kingorna Inatsisartut 2001-mi ukiakkut ataatsimiinnitsinni Ataatsimiititaliap tamarmiusup Inatsisartunut makkuninnga siunnersuuteqarpoq:
Siullertut: Pisortat ingerlatsinerannik kukkunersiuisinnaaneq, tassa pisortat ingerlatsiviat pineqartoq aningaasatigut mianerisariaqakkanik pisussaasutut mianerinnissinnaanersoq naliliisoqarsinnaanngorlugu.
Aappaattut: Namminersornerullutik Oqartussat aktiaateqarluni ingerlatseqatigiiffiutaat pillugit paasitinneqarsinnaatitaaneq, kiisalu
Pingajuattut: Aningaasanut inatsimmi aningaasaliissutigineqartumik paasisinneqartitaaneq.
Tamannalumi Inatsisartut Inatsisit atortinneqarnerannut Ataatsimiititaliap aamma taamanikkulli isumaliutissiissummini ilalerpaa, ilaatigut imaattunik nalunaaruteqarnermigut: ?Taamaattumik inatsisit atortinneqarnerannut Ataatsimiititaliaq isumaqarpoq Kukkunersiuinermut Ataatsimiititaliap siunnersuuteqarnerani anguniagaasut tamakkiisumik piviusunngortinneqassappata Inatsisartut paasissutissinneqartarsinnaanerannut killissarititaasut, taamatullu Namminersornerullutik Oqartussat aktiaatilittut soqutigisaannik Naalakkersuisut isumaginninnissaannut killissarititaasut patajaallisaaffigineqartariaqartut. Tamannalumi Inatsisartut Aningaasaqarnermut Ataatsimiititaliaanit kaammattuutigineqartunut naapertuuppoq.
Tamakkuupput Inatsisartut akuerisimasaat. Taamaattumik Kattusseqatigiinniit isumaga naapertorlugu Inatsisartut siusinnerusukkut ataatsimiinnerini, soorlu oqareernittuut, aalajangigaat Naalakkersuisunit ilaannakortorujussuarmik naammassiniarneqarnera akuersaaruminaatsippara, allaallu Naalakkersuisut taamatut iliuuseqarnerat pisussaaffimminnik sumiginnaasutut nalilertariaqartutut Kattusseqatigiit sinnerlugit oqaatigisinnaallugu. Tassami Naalakkersuisut oqareernittuut Inatsisartut aalajangigaat piumasaqaataallu malillugit naapertorlugillu sulisussaammata. Taamaattumik Kattusseqatigiit sinnerlugit sakkortuumik piumasaqaatiginiarpara suliap matuma aappassaaneerneqannginnerani Inatsisartut Inatsisit atortinneqarnerannut Ataatsimiititaliap sukumiisumik suliaqarnissaa ingerlanneqartariaqartoq, tassanilu Inatsisartut Kukkunersiuinermut Ataatsimiititaliarisimasaata aammalu Inatsisartut Inatsisit atortinneqarneranut Ataatsimiititaliaata isumaliutissiissutai misissorluarnissaat suliamut matumunnga tunngatillugu aalajangiiffigisassat tamaasa qulaarlugit qaqinneqarnissaat Kattusseqatigiit sinnerlugit inassuteqaatigaara.
Jonathan Motzfeldt, ataatsimiinnermik aqutsisoq, Inatsisartut siulittaasuat, Siumut.
Naalakkersuisut siulittaasuat.
Hans Enoksen, Naalakkersuisut Siulittaasuat, Siumut.
Qujanaq. Inatsisartut Naalakkersuisullu pillugit Inatsisartut inatsisaata allanngortinneqarnissaanik siunnersuut, tassalu nunatta karsiata naatsorsuutaasa kukkunersiorneqartarneranut taavalu ataatsimiititaliat, Inatsisartut ataatsimiititaliaata suut suliarisassanerai, tassa Kukkunersiuinermut Ataatsimiititaliaq, saqqummiunneqartoq malugaara partiinit amerlanerussuteqartunit tapersersorneqartoq. Kattusseqatigiit uku oqaatsit ilaatigut atugaat Naalakkersuisunik ilaatigut sumiginnarneqartutut nipilerlugu oqariartuuteqarnerat eqqaassanngikkaanni.
Aammalu partiit oqaaseqaataanni Siumuminngaanniit oqariartuutigineqartut annertuut, taakkua annerusumik oqaaseqarfigissanngilakka, tassa Inatsiseqarnermut Ataatsimiititaliap sulinermini aamma taakku ilanngullugit isumaliuutissatut suliarissagai naatsorsuutigigakku. Aamma Naalakkersuisut siunertaqanngimmata minnerpaamilluunniit Inatsisartuni ataatsimiititaliat, pingaartumillu Inatsisartunit maani saqqummiunneqartut killilersornissaannut, tassa ataatsimiititaliami saqqummiussuunneqartut makku sukumiisumik suliarineqarnissaat naatsorsuutigaarput. Soorunami ataatsimiititaliaminngaanniit Naalakkersuisunut ingerlaqqippata aamma uagut isummersornissarput maani saqqummiunneqarumaarpoq.
Siunertarineqanngilluinnaqqissaarpoq Kattusseqatigiit oqariartornerat malillugu minnerpaamilluunniit Naalakkersuisut akimmisaartitsissasut aammalu siunertarineqarsimanngisaannarpoq matuma siornatigulli isertuussiniarneq. Tassa tamanut ammasumik pisussaatitaavugut tamatta sukumiisumik tunniussaqarnissatsinnut, aamma massakkut pissutsit taakkorpiaat atuutsinneqarput. Uanilu oqariartuutigineqartut Inatsisartunut ilaasortat aamma namminneq periarfissaqarput paasiumasaqarunik Naalakkersuisoqarfinnut saaffiginnissallutik. Aamma tassani isertuussinertaqanngitsumik ilisimatinneqarnissaminnut periarfissaqareermata.
Tassalu massakkut Kukkunersiuinermut Ataatsimiititaliami suliat annertuut ingerlanneqartarput aammalu taassuma saniatigut Aningaasaqarnermut Ataatsimiititaliaq Naalakkersuisut sulineranni nakkutiginnittuuvoq Inatsisartut sinnerlugit. Aammalu tassani apeqquterpassuit allallu saqqummiussuunneqartartut aamma annertuumik piffissamik tigusisarput, Naalakkersuisoqarfiit ilaatigut sulinerannik annertuumik kinguarsaanermik kinguneqarsinnaasarlutik, kisiannili tassa pisussaaffigaarput paasiumaneqartut ersarissumik akissallugit.
Uanili suli sukumiinerusumik ingerlatsisoqalernissaanik siunnerfeqarneq aamma ajorinngilluinnaqqissaarparput, kisianni aamma mianersorfigisariaqarparput kukkuenrsiuinnavilluta sulineq maani ingerlanneqassanngimmat. Siunertarineqanngilaq pinerluttuliornissaq arlaatigulluunniit isertuussiniarnissaq.
Aningaasanut inatsimmi aningaasaliissutigineqartunik paasitinneqarsinnaatitaaneq Inatsisartunut ilaasortat namminneq aamma pisussaaffigaat paasiumasaqarunik Naalakkersuisoqarfinnut Inatsisartut Siulittaasoqarfiat aqqutigalugu imaluunniit namminneq toqqaannartumik saaffiginnissuteqarlutik periarfissaqareermata isumaqarpunga pissanganartunngortitsiniaanermik nipeqarnerat taakkua tunuarsimaarfigineqartariaqartut. Aamma isertuussassaqanngilagut aamma isertuussiniartoqanngilaq. Neriuutigaaralu uani Ataatsimiititaliami suleriaqqinnissami uani saqqummiussuunneqartut sukumiisumik suliarineqarumaartut. Naalakkersuisunut apuuppat soorunami aamma uagut nalilersuisussaavugut aammalu oqariartuuteqaqqittussaalluta.
Malugaara inatsit saqqummiunneqartoq annertuumik tapersersorneqartoq, uanilu Siumuminngaanniit aammalu Kattusseqatigiinninngaanniit oqariartuutigineqartut Ataatsimiititaliami nalilersorneqarnissaat innersuussutigaara.
Qujanaq.
Jonathan Motzfeldt, ataatsimiinnermik aqutsisoq, Inatsisartut siulittaasuat, Siumut.
Anthon Frederiksen.
Anthon Frederiksen, Kattusseqatigiit.
Uanga taamatut oqaaseqarninni tunngavigilluinnarpakka soorunami Kukkunersiuinermut Ataatsimiititaliap aammalu Inatsisartut massakkut atuuttut siuliini Kukkunersiuinermut Ataatsimiititaliaasartut annertuumik piumasaqaatigisarsimasaat Inatsisartunut. Minnerunngitsumik Disko pillugu suliaq ingerlanneqarmat, Puisi A/S pillugu suliaq ingerlanneqarmat, KNI-kkut suliarineqarmata Kukkunersiuinermut Ataatsimiititaliap tassani qanoq erloqinartigisumik inissisimanera uteqqinneqassanngimmat kissaatiginaqimmat. Taamaattumik suliap massakkut aaqqinniarneqarnerani tamakkiisumik aaqqiiniartoqarnissaa kissaatiginaqimmat taamatut oqariartuuteqarpunga.
Kisianni paasinarpoq, aamma Naalakkersuisut siulittaasuata akissuteqarnermini ilalernartikkaa soorunami aamma Siumuminngaanniit tupinnanngitsumik annertuumik saqqummiussuunneqartut paasinarluarput, taamaattumik taakkua tamarmik nalilersuiffigineqarnissaat nuannaarutigaara paasillugu.
Qujanaq.
Jonathan Motzfeldt, ataatsimiinnermik aqutsisoq, Inatsisartut siulittaasuat, Siumut.
Taamaalilluni oqaluuserisassaq taanna naammassivoq. Partiit ilaasa aammalu Kattusseqatigiit, ilaatigut Siumup misissoqqusai Ataatsimiititaliani misissorneqarnissaat innersuussutigineqarput.