Oqaluuserisassani immikkoortoq 21-2 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut arfersaneq tallimaat, tallimanngorneq 4. april 2003, nal.
14:18.
Finn Karlsen, Inuussutissarsiornermut Naalakkersuisoq,
Atassut.
Inatsiseqarnermut
Ataatsimiititaliap isumaqatigiilluni siunnersuutip Inatsisartuni akuersaartumik
oqaluuserineqarnissaanik inassuteqarnera nuannaarutigaara.
Naalakkersuisut
paasivaat ataatsimiititaliaq siunnersuutip siunertaanut isumaqataasoq, tassalu
ilaasortat ikilisinneqarnissaannut ilaasortallu agguataarneqarnerat
allanngortinneqassasoq. Siunnersuutip kingunerissavaa partiit
sinniisuutitaqarnerat taamaatinneqassasoq. Paarlattuanik soqutigisaqaqatigiit
assigisaallu meeqqanut inuusuttunullu tunngasunik suliallit
Siunnersuisoqatigiinni sinniisuutitaqalissasut.
Inatsisissatut
siunnersuummi nassuiaatit tusarniaanermi akissutit imarisaasa
nassuiarneqarsimannginnerat kiisalu siunnersuummut inatsisilioriaatsikkut
iluarsiisoqartariaqarsimaneranik ataatsimiititaliap ajuusaaruteqarnera
Naalakkersuisut tusaatissatut tiguaat. Iluarsiissutit taakkua maanna
allannguutissatut siunnersuummut agguaanneqartumut ilanngunneqarput,
siunnersuutilli imarisaa allanngortinneqanngilaq.
Naalakkersuisut
allannguutissatut siunnersuutissanik kaammattuutit maluginiarpaat, taakkuli
allannguutissatut siunnersuummut ilanngunneqarnissaat Naalakkersuisut
naapertuutinngitsutut isigaat. Taamaalilluni allannguutissatut siunnersuummi
matumani peiarfissaqareerpoq soqutigisaqaqatigiit KANUKOKA-llu illoqarfiit
nunaqarfiillu ataatsimut soqutigisaannik ingerlatsisinnaanissamut nunaqarfinni
aqutsisut sinniisuutitassaannik toqqaasinnaanikkut.
Allannguutissatut
siunnersuut aammattaaq inuiaqatigiinni arnat akornanni piginnaasaqarluartuni
pioreersunik atuinissap isigineqarnerunissaanut periarfissanik ammaassivoq.
Taamaalilluni arnat angutillu amerlaqatigiisillugit agguataarneqarnissaannik
pimoorussunissaq Naalakkersuisut ajornartorsiutitut isiginngilaat.
Matumuuna
Naalakkersuisut Naligiisitaanissamut Siunnersuisooqatigiit pillugit
Inatsisartut inatsisissaattut siunnersuummut maannakkutut isikkoqartillugu
akuersissutigineqarnissaa inassutigaat.
Jonathan
Motzfeldt,
ataatsimiinnermi aqutsisoq, Inatsisartut Siulittaasuat, Siumut.
Apeqqutigissavara Naalakkersuisut taamatut allannguutissamut siunnersuutaannut oqaasissaqartoqarnersoq. Ane Hansen, Inuit Ataqatigiit.
Ane Hansen, Inuit Ataqatigiit.
Inatsisissap siullermeerneqarnerani Inuit Ataqatigiinninngaanniit inassutiginikuuarput nunaqarfimmi aqutsisut aamma naligiissitaanermut apeqqutinut peqataalluarnissaat siunertaralugu inassutigalutigu nunaqarfimmi aqutsisut alaatsinaattutut inissinneqarsinnaanerat. Taavalu aamma eqqumaffigeqqusimavarput ilaasortalersuinerup katitigaanerani KNAPK meeqqat inuusuttuaqqallu peqatigiiffinnut attuumassuteqartunut ilanngunneqarsimanera taanna iluarsiiffigineqaqqullugu.
Uani Naalakkersuisut akissuteqaataanni takusinnaavarput ilalerneqarsimanngitsoq nunaqarfinni aqutsisut Naligiissitaanermut Ataatsimiititaliami alaatsinaattutut peqataasinnaanerat allatigut periarfissat tikkuarneqarlutik, tassa KANUKOKA, SIK aamma KNAPK aqqutigalugu taakku aamma toqqarneqarsinnaasutut taaneqarput, taannalu Inuit Ataqatigiinninngaanniit eqqumaffigeqquinnassavarput taakkua taaneqartuni pingasuni toqqaaniarnermi aamma nunaqarfinni aqutsisut periarfissaaneri eqqumaffigeqqullugit.
Taamatut oqaaseqarluta inatsisissap uuma taasissutigineqarnerani akuerseqataalluta taasissaagut.
Jonathan Motzfeldt, ataatsimiinnermi aqutsisoq, Inatsisartut Siulittaasuat, Siumut.
Allanik oqaaseqartoqarumanngimmat taava taasissaagut. Tassa Naalakkersuisut allannguutissanut siunnersuutaatt taasissutigissavagut, taakkulu agguaanneqareersimammata taava siunnersuummut isumaqataasut qinnuigaakka nikueqqullugit.
24-t.
Akerliusoqarpa?
Naamik.
Taasinngitsoortoqarpa?
Naamik. Taamaalilluni immikkoortoq 21 aappassaaneerneqarnerani allannguutissatut Naalakkersuisut siunnersuutaat ilanngullugu akuerineqarpoq ingerlaqqissinnaanngorluni.