Oqaluuserisassani immikkoortoq 22-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut sisamaat,
tallimanngorneq 7. marts 2003, nal. ?.
Finn Karlsen, Inuussutissarsiornermut
Naalakkersuisoq, Atassut.
Qujanaq. Matumuuna Naalakkersuisut
saqqummiuppaat saffiugassat erlinnartut atorlugit suliat il.il.
nakkutigineqarnerat pillugu inatsisip nutaajunerusup Kalaallit Nunaannut
atortuulersinneqarnissaannik Namminersornerullutik Oqartussat oqaaseqaatissaat
pillugu Inatsisartut aalajangiiffigisassaattut siunnersuut.
Inatsisikkut qulakkeerniarneqarpoq
nioqqutissat kuultitut, sølvesut, platinitut imaluunniit paladiumitut
tuniniarneqartut saffiugassanik pineqartunit akoqassusiata
minnerpaaffilerneqarnissaa. Taamatullu aamma inatsit saffiugassat pineqartut
minguissusia eqqarsaatigalugu naqissusiinermik aaqqissuussinermik ilaqarluni.
Tassalu inatsisikkut siunertarineqarpoq atuisut illersorneqarnissaat.
Inatsit matuma siulia kunngip
peqqussutaatigut 1975-imi nunatsinni atortuulersinneqarpoq. Kunngip
peqqussutaanut missingiut manna saqqummiunneqartoq aqqutigalugu inatsit maanna
Danmarkimi atuuttoq nunatsinnut atortussanngortinneqarpoq. Tamatumani
pineqarpoq inatsisip nunatsinni atuuttup ullutsinnut naleqqussarnera upernaaq ataatsimiinnermi
inuutissarsiornermik siuarsaaneq pillugu Naalakkersuisut nalunaarutaat
naapertorlugu, tassa upernaaq siorna upernaakkut.
Inatsisip nutaanerusup kunngip
peqqussutaatigut atortuulersinneqarnissaa aningaasatigut
allaffissornikkulluunniit kinguneqassanngilaq. Peqqussutissatut missingiut
Aatsitassanut Ikummatissanullu Pisortaqarfimmut, Aningaasaqarnermut
Pisortaqarfimmut, Akileraartarnermut Pisortaqarfimmut, Atuisut
siunnersuisoqatigiiffiata allattoqarfianut kiisalu niuernermi, sullissinermi,
angallassinermi paasissutissiisarnermilu teknologip iluani Sulisitsisut
Kattuffiannut, HST-mut, kingulleq niuertarfiutilinnut sinniisutut
tusarniaassutigineqarpoq. Akissuteqaatit oqaaseqarnissamut
tunngaveqalersitsinngillat.
Aalajangiiffigsassatut siunnersuut
2000-imi ukiakkut ataatsimiinnermit saqqummiuteqqitaavoq. Taamanikkut
siunnersuut siullermeerneqarnermini ilassilluarneqarpoq, Inatsisartunulli
qinersisoqarmat atorunnaarluni. Tamanna tunngavigalugu Naalakkersuisut
inassutigaat Inatsisartut tapersissagaat Naalakkersuisut naalagaaffiup
sinniisaa nalunaarfigissagaat saffiugassat erlinnartut il.il. atorlugit suliat
nakkutigineqarnerat pillugu inatsisip allannguutitallip taama isikkoqarluni
kunngip peqqussutaatigut nunatsinnut atortussanngortinneqarnissaa akornutissaqartinneqanngitsoq.
Taamatullu oqaaseqarlunga
Naalakkersuisut inassuteqaataat Inatsisartunut oqaluuserisassanngortippara.
Jonathan Motzfeldt, ataatsimiinnermik aqutsisoq,
Inatsisartut siulittaasuat, Siumut.
Partiit oqaaseqartui tikippagut. Ole Dorph, Siumut. Tulliuppoq Ane Hansen, Inuit Ataqatigiit.
Ole Dorph, Siumup oqaaseqartua.
Qujanaq. Saffiugassat erlinnartut il.il. atorlugit suliat nakkutigineqarnerat pillugu inatsisip Kalaallit Nunaanni atortuulersinneqarnissaanik Namminersornerullutik Oqartussat oqaaseqaataat pillugu aalajangiiffigisassatut siunnersuut Inuussutissarsiornermut Naalakkersuisumit saqqummiunneqartoq pisariaqartuummat aammalu susassaqartunut tamanut sukumiisumik tusarniaassutigineqareersimammat Siumumiit tamakkiisumik akuersaarparput, taamatullu iluseqarluni aappassaaneernneqarnissaminut ingerlaqqinnissaa inassutigalutigu.
Naggataatigullu Naalakkersuisunut kaammattuutigissavarput aatsatassatigut oqartussaaffiup tamarmiusup nunatsinnut nuunneqarsinnaanissaa allaffissornikkut inatsisiliornikkullu Qallunaat Nunaanni Naalakkersuisunut pimoorullugu isumaqatigiinniutigalugu aallarteqqullugu. Qujanaq.
Jonathan Motzfeldt, ataatsimiinnermik aqutsisoq, Inatsisartut siulittaasuat, Siumut.
Tulliuppoq
Ane Hansen, Inuit Ataqatigiit. Tulliutissaarlu
Jakob Sivertsen, Atassut.
Ane Hansen, Inuit Ataqatigiit oqaaseqartuat.
Qujanaq. Saffiugassat erlinnartut atorlugit suliat nakkutigineqarnissaat siunertaralugu inatsisip 1975-imeersup nutarterneqarnissaanik inatsisissatut siunnersuut Inuit Ataqatigiinninngaanniit aporfissaqarsorinngilarput.
Tassani pineqarput nioqqutissat, soorlu kuultit, sølvit, platinit palladiumillu suliareqqinneqarnerini taakkuninnga akuisa annertussusaat malillugu nalunaaqutserneqartarnissaat. Siunissaq eqqarsaatigalugu kuultisiornikkut allatigullu saffiugsassanik erlinnartunik nunatsinni suliareqqiinikkut nioqquteqalernissaq takorloorneqarsinnaavoq, tamatumanilu nunatta nunanut allanut malinnaasariaqalernera pisariaqartoq Inuit Atatqatigiinniit isumaqarfigaarput.
Maluginiarparputtaaq atortuulersitsinissamut missingiummut Aatsitassanut Ikummatissanullu Pisortaqarfik, Aningaassaqarnermut Pisortaqarfik, Akileraartarnermut Pisortaqarfik, Atuisartut Siunnersuisoqatigiiffiata allattoqarfia, niuernermi sullissinermi paasissutissiisarnermullu teknologip iluani sulisitsisut kattuffiat, kiisalu Niuertarfiutillit peqatigiiffiat tusarniarneqarsimasut, aakkualu inatsisissap iluani akornutissaqartitsinngitsut.
Taamaattumik taamatut oqaaseqarluta Inuit Attaqatigiinniit saffiugassat erlinnartut atorlugit suliat pillugit inatsisissap atortuulersinneqarnissaanut akuerseqataassaagut.
Jonathan Motzfeldt, ataatsimiinnermik aqutsisoq, Inatsisartut siulittaasuat, Siumut.
Tulliulluni oqaaseqassaaq Jakob Sivertsen, Atassut.
Jakob Sivertsen, Atassutip oqaaseqartua.
Qujanaq. Inatsisip nunatsinnut atortuulersinneqartussatut qallunaat Naalakkersuisuinit aalajangiiffigisassanngorlugu saqqummiunneqartup nunatsinnut atortussanngortinneqarnissaa siunertaralugu Atassummit pingaaruteqartorujussuartut nalilerparput.
Naluneqanngitsutut nunatsinni aatsitassanik assigiinngitsorpassuarnik soqutiginartunik nassaassaqarpoq, ajoraluartumillu ullumimut aningaasarsiutigalugit suli iluaqutigineqanngitsunik. Naluneqanngitsutullu nunatta Kujataani kuultisiornissaq aallartinneqartussangortoq eqqarsaatigigaanni saffiugassat tunineqartut akoqassusiisa minnerpaaffeqarnissaat, kiisalu saffiugassat minguissusiat uppernarsarlugu naqissuserneqartarnissaannik inatsisip ilaqartinneqarnera Atassummit tamakiisumik taperserparput.
Taamaalilluni aatsitassanik pisisussat atuisussallu inatsimmik illersorneqarnissaat qulakkeerneqartussaalluni.
Tassungalu tunngatillugu Atassummit Naalakkersuisugut kaammattorusuppagut Naalagaaffeqatigiinnerup aqqani suleqatigiinneq aallaavigalugu nunatsinni aatsitassarsiornermut misissueqqaarnernut assigisaannullu tunngasunut allaffeqarfiup tamarmiusup nunatsinnut nuunneqarsinnaanera anguniarlugu maannangaaq Naalakkersuisugut qallunaat Naalakkersuisuinut oqaloqatiginninnerit paasiniaanerillu aallartereeqqulugit, tamatumani aningaasanut tunngasortaat ilanngullugit.
Taamatut oqaaseqarluta aalajangiiffigisassatut siunnersuut Atassummit tamakkiisumik taperserparput. Qujanaq.
Jonathan Motzfeldt, ataatsimiinnermik aqutsisoq, Inatsisartut siulittaasuat, Siumut.
Tulliulluni oqaaseqassaaq Marie Fleischer, Demokratit.
Marie Fleischer, Demokratit oqaaseqartuat.
Saffiugassat erlinnartut pillugit inatsisip atulernissaa nutarterneqarnissaalu pillugit Inatsisartut aalajangiinissaannik siunnersuut.
Saffiugassat erlinnartut nakkutigineqarnissaat pillugu inatsisip Kalaallit Nunaannut atuutinneqalernissaannut Namminersornerullutik Oqartussat oqaaseqaatissaattut Naalakkersuisut siunnersuutigisaat Demokratiniit isumaqataaffigaarput.
Inatsisip nutarfasissup atuutsinneqalernissaa aningaasatigut allaffissornikkulluunniit kinguneqartussaanngimmat nuannaajallannartuuvoq. Suliaqarfinnut attuumassuteqartunut tusarniaasimaneq oqaasertaqarfigineqarsimanngimmat aammalu inatsisip siunertarimmagu atuisut illersorneqarnissaat Demokratiniit pissutissaqartinngilarput siunnersuutip Ataaatsimiititaliamut oqaluuserineqartinnissaa.
Jonathan Motzfeldt, ataatsimiinnermik aqutsisoq, Inatsisartut siulittaasuat, Siumut.
Tulliulluni oqaaseqassaaq Anthon Frederiksen, Kattusseqatigiit.
Anthon Frederiksen, Kattusseqatigiit.
Immikkoortup siuliini tulleriinni Kattusseqatigiinniit oqaaseqaatikka innersuussutigalugit saffiugassat erlinnartut atorlugit suliat il.il. nakkutigineqarnerat pillugu inatsisip Kalaallit Nunatsinnut atortuulersinneqarnissaanut Namminersornerullutik Oqartussat oqaaseqaatissaat pillugu aalajangiiffigisassatut siunnersuut susassaqartunut assigiinngitsunut tusarniaassutigineqarsimanera pissusissamisoorpoq. Kisianni aamma paaserusunnarpoq saffiugassanik matumani pineqartunik kuultinik, sølvinik il.il. pinnersaasiornermik ingerlataqartut tusarniaaffigineqarsimanersut aamma paaserusunnarpoq.
Taamatut oqaaseqarlunga aamma Inatsisartut nammineerlutik nunatsinni naleqquttunik inatsisiliorsinnaatitaalernissaannik kaammattuuteqaqqillunga Naalakkersuisut inatsisissamut Kalaallit Nunatsinnut atortuulersinneqarnissaa pillugu oqaaseqaatissaat taperserpara.
Jonathan Motzfeldt, ataatsimiinnermik aqutsisoq, Inatsisartut siulittaasuat, Siumut.
Inuussutissarsiornermut Naalakkersuisoq.
Finn Karlsen, Inuussutissarsiornermut Naalakkersuisoq, Atassut.
Qujanaq. Saffiugassat erlinnartut il.il. inatsisissaq inassutigineqartoq Naalakkersuisuninngaanniit partiit tamarmik Kattusseqatigiillu tamakkiisumik tapersermassuk qujassutigaara.
Uani taamaallaat apeqqutit naatsuaqqamik Kattusseqatigiit sinnerlugit Aantuup apeqqutaa sølvinik kuultinillu tuniniaasartut tusarniarneqarsimannginnersut. Taakku immikkut tassani soorunami ilaatinneqarput atuisut sinniisaat taavalu allattoqarfiat, aammalu pisiniarfiutillit kattuffiat, HST. Taakkua tusarniarneqarput tamarmik. Taamaattumik tassunga tunngatillugu taamatut akissaanga.
Aamma
partiit Atassutip Siumullu inassuteqaataat Danmarkimi Aatsitassat pillugit
allaffeqarfii nunatsinni Danmarkimilu marlunnik allaffeqarfeqaramik
assigiinngitsunik, taamaattumik taakkununnga tunngatillugu
kaammattuutigimmassuk allaffeqarfiup Danmarkimiittup Kalaallit Nunaannut
nuutinneqarnissaa soorunami taanna marloqiusamik sulineq kinguarsaataasoq
annertoorujussuaq, soorlu oqaatigineqarsinnaasoq Naalakkersuisuninngaanniit
misissussavarput Kalaallit Nunaannut nuutinneqarsinnaanera Aatsitassat
allaffeqarfiat immikkut Danmarkimi ataasiinnanngorlugu maani nunatsinni. Taanna misissussavarput.
Qujanaq.
Jonathan Motzfeldt, ataatsimiinnermik aqutsisoq,
Inatsisartut siulittaasuat, Siumut.
Taamaalilluni tamanit
isumaqatigineqarluni saffiugassat erlinnartut il.il. atorlugit suliat
nakkutigineqarnerat pillugu inatsisip atortuulersinneqarnissaa Inatsisartunit
akuersissutigineqartoq Naalakkersuisunit ingerlateqqinneqassaaq.