Oqaluuserisassani immikkoortoq 33-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut sisamaat,
tallimanngorneq 7. marts 2003, nal. ?.
Ataatsimiinnermik aqutsisoq: Jonathan Motzfeldt, Inatsisartut
Siulitaasuat, Siumut.
Mikael Petersen, Attaveqatigiinnermut,
Avatangiisinullu Ineqarnermullu Naalakkersuisoq, Siumut.
Qujanaq.
Naalakkersuisut sinnerlugit
matumuuna saqqummiuppara illuliortiternernut aningaasalersuineq pillugu, inatsisartut
peqqussutaata allanngortinneqarneranik inatsisartut peqqussutissaattut
siunnersuut.
Peqqussutissatut siunnersuut
saqqummiunneqarpoq pigisanik aalaakkaasunik qularnaveeqqusiilluni
taarsigassarsititsisarnermi allannguutit pisimasut tunuliaqutaralugit.
Maannamut pisisanik aalaakkaasunik qularnaveeqqusiilluni taarsigassarsiat
ukiuni 15-ini akilersuiffiusarsinnaasimapput.
Taama taarsigassarsinerit ukiuni
20-ini akilersuiffigineqarsinnaalersimapput.
Taamaattumik illuliortiternernut
aningaalersuineq pillugu, inatsisartut peqqussutaata tamanna naapertorlugu
allanngortinneqarnissaa pisariaqarpoq.
Taamaalilluni piffissaq pisortanit
taarsigassarsianut ernialersuiffiunanilu taarsersuiffiusussaanngitsoq ukiunit
15-iniit 20-nut sivitsorneqarpoq.
Pisortat taarsigassarsiarititaasa
piffissami erniarlersuiffiunanilu taarsersuiffiusussaanngitsumi
nalikillinnginnissaat, nalikillinnginnissaat qularnaarniarlugu ilanngullugu
siunnersuutigineqarpoq. Taakku sanaartornermi suliassanut aningaasartuutinut
naleqqersuut malillugu qaffariartinneqartassasut.
Peqqussutissatut siunnersuummut
nassuiaatit allatigut innersuussutigalugit illuliortiternernut
aningaasalersuineq pillugu inatsisartut peqqussutaata anngortinneqarneranik,
inatsisartut peqqussutissaattut siunnersuut, inatsisartunit akuersaartumik
oqaluuserisassanngortippara.
Siunnersuutip
aappassaaneerneqannginnermini Inatsisartut Attaveqarnermut Pilersuinermullu
aammalu Ineqarnermut Ataatsimiititaliaani oqaluuserineqarnissaa
siunnersuutigineqarpoq.
Jonathan Motzfeldt, ataatsimiinnermik aqutsisoq,
Inatsisartut Siulittaasuat, Siumut.
Partiit oqaaseqartuinut. Kiisat
Isaksen, Siumut.
Kiisat Isaksen, Siumup oqaaseqartua.
Qujanaq.
Nunatsinni illuliortiternernut
aningaasalersueriaaseq inatsisartut peqqussutaata allangortinneqarnissaanik
Ineqarnermut, Attaveqarnermut Pilersuinermullu Naalakkersuisup saqqummiussaa
Siumumiit misissorsimavarput nalilersorlugulu.
Imaattumik oqaaseqarfigissavarput.
Illuliortiternernut aningaasalersuineq
pillugu peqqussut ukioq 2002 upernaakkut kingullermi nutarterlugu
suliarineqarpoq. Taamaattoq peqqussutissatut saqqummiussaq Siumumiit
soqutiginarluartutut tiguarput.
Siumumiit tamakkiisumik
peqqussutissatut siunnersuut naalakkersuisunit saqqummiunneqartoq
taperserparput.
Isumaqaratta peqqussutissakkut
inunnut ataasiakkaanut namminerisamik initaarniartunut akilersuinissaminnut
ullumikkuniit pitsaanerungaartumik periarfissiuunneqarsimasut.
Tassami peqqussutissakkut
takuneqarsinnaavoq nalinginnaasumik aningaasanik atukkiisarfiit ukiuni 15-iniit
20-nut qaffassimagaat. Tamatumalu ilutigisaanik pisortat aningaasanik
atukkiinissaminnut ukioq nutaaq aallarnerfigalugu, taarsersugassanik
atukkiisarnerat ukiuni 15-inut qaffanniarneqartoq.
Tassani maluginiarparput pisortanut
anigaasanik attartornermi ukiut 20-t siulliit erniaqanngitsumik
taarsigassarsititsineq ingerlanneqarsinnaanngussasoq, ataatsimullu katillugu
namminerisamik initaarniartut ukiuni 30-mi akilersuisinnaanissaminnut
periarfissaqalissallutik.
Naggataatigut takusinnaavarput
peqqussutissatut siunnersuut Namminersornerullutik Oqartussat iluanni, aammalu
Inatsisileriffimmut kisiat tusarniaassutigineqarnissaa periarfissaqarsimasoq.
Naak kissaatiginarsinnaagaluartoq
Kommuneqarfiit Kattuffiannut tusarniaaneq aamma ingerlanneqarnissaa. Tassami
kommunit namminerisamik initaarniartunut taarsigassarsititsinissaminnut
pisussaaffeqartutut isigisariaqarmata aningaasalersueriaaseq 10/40/50
eqqarsaatigalugu.
Siumumiit taamatut oqaaseqarluta
illuliortiternernut aningaalersuineq pillugu inatsisartut peqqussutaata
allangortinneqarneranik, inatsisartut peqqussutissatut siunnersuut
siullermeernera oqaaseqarfigaarput.
Aappassaaneerinninnginnermilu
Ineqarnermut, Attaveqarnermut Pilersuinermullu ataatsimiititaliami
nalilersorneqarnissaa inatsisartunut inassutigissavarput.
Jonathan Motzfeldt, ataatsimiinnermik aqutsisoq,
Inatsisartut Siulittaasuat, Siumut.
Tulliulluni oqaaseqassaaq Johan Lund
Olsen, Inuit Ataqatigiit.
Johan Lund Olsen, Inuit Ataqatigiit oqaaseqartuat.
Siunnersuutit matumani
saqqummiunneqartut takuinnarlugit
namminerisamik illuutitaarniartunut iluaqutissartaqartussaapput.
Realkreditit taarsigassartitsisartut
ukiuni 15-ini sivisussuseqartunik taarsigassarsisitsisarnerat ukiuni 20-ni
akilersorneqartartussanit, siunnersuutigineqartutut maanna
taarserneqartussanngormata.
Tamanna soorunami illoqarfinni
realkreditit aqqutigalugit illutaarnissamut aningaasalersuiffigineqarsinnaasunit
isigalugu immini ajoquteqanngilaq, taperserneqarsinnaallunilu.
Apeqqutigerusunnartorli tassaavoq
sinerissap sinnerani illutaarniat allat qanoq taava?
Inuit Ataqatigiit aningaasanut
inatsisissatut siunnersuut siullermeerneqarnerani apeqqummut tassunga
assingusumik, oqaaserisavut tamaammat aamma innersuussutigalugit
kissaatigissavarput, Ineqarnermut ataatsimiititalimit tamanna aamma
nalilersuiffigineqarumaartoq.
Pingaartipparpummi nunatsinni
illutaarniartilluni assigiikannersumik taarsigassarsititsisoqarsinnaanissaa.
Taarsigassarsititsisarnerilli
ukiunut 20-nut tasineqarneri iluarunaraluaqisoq maluginiarparput ilanngullugu
aamma siunnersuutigineqarmat, pisortat taarsigassarsiarititaasa akit
nikerarnerinut naleqqersuut taava aamma malittalissagaat.
Taanna soorunami
isumaqitigineqarsinnaavoq. Tassungali tunngatillugu taarsigassarsiniartussanut
qanoq tamanna kinguneqarumaarnersoq erseqqissumik naatsorsorneqarsimannginnera
maqaasinarpoq.
Taamaattumik aappassaaneerisoqartinnagu
kissaatigissavarput tamanna ilanngullugu Ineqarnermut ataatsimiititaliamit
aamma nalilersuiggifilluarneqarumaartoq.
Taamatullu siunnersuut maanna
siullermeerneqarnerani naatsunnguamik taamak oqaaseqarfigiinnarallarparput.
Jonathan Motzfeldt, ataatsimiinnermik aqutsisoq,
Inatsisartut Siulittaasuat, Siumut.
Tulliulluni oqaaseqassaaq Isak
Davidsen, Atassut.
Isak Davidsen, Atassutip oqaaseqartua.
Saqqummiussaq pineqartoq illuliortiternermut aningaasalersueriaasissaq Atassummiik qimerloorluareerlugu imatut oqaaseqarfigissavarput.
Naalakkersuisut saqqummiussaanni inissianut nutaanut ukiut 35-t angullugit aningaasalersuinissatut piffissamik ammaassisoq oqaatigineqarpoq.
Atassummit tapersersuinitsinnut tunngavigaarput 1990-iminngaanniit 2002-mi illuliornerup 21 %-mik qaffariaateqarsimanera. Ukiuni siusinnerusuni ajoraluartumik illunik piginnittut artukkaminnik ilaatigut akilersuiniartarnerat takornartaanngilaq.
Amerlaqaallu tamatuma kingunerisaanik illuminnik qimatsiinnartartut.
Aammalu saqqummiussami pigisanik aalaakkaasunik qularnaveeqqusiussilluni taarsigassarsinermi periarfissiineq, Atassummit iluarisimaarlutigu oqaatigissavarput.
Ilami pitsanngoriaat qaammammut akiliutisanut 4.780 kr-niit 4.180 kr-nut allaat appariassalluni.
Peqqussutissamilu pitsannguutissanik arlaqartunik nutaanik ilaqarnera Atassummiik assut iluaralugu oqaatigeqqissavarput.
Ilami taarsigassarsiat nalikinnerulinnginnissaat allaat qularnaarneqartalissammat.
Tassuunakkut siunnersuutip takutippaa arlaqartutigut pitsanngoriaatinik nassataqarnissaa.
Taama oqaaseqarluta aappassaaneerneqannginnermini Attaveqarnermut, Pilersuinermut Ineqarnermullu ataatsimiititamut ingerlanissaa innersuussutigaarput.
Jonathan Motzfeldt, ataatsimiinnermik aqutsisoq, Inatsisartut Siulittaasuat, Siumut.
Tulliulluni oqaaseqassaaq Palle Christiansen, Demokraatit.
Palle Christiansen, Demokraatit oqaaseqartuat.
Uagut
Demokraatit tungaaninnaanniit siunnersuutigineqartoq akuersarsinnaavarput. Taamaalilluni attartorsinnanerit
amerlanerusinnaasassammata. Taamaalillunilu
aamma taamatut nalilersueriaaseq aamma pitsaalluinnartuusoq.
Taassalu ukiut 15-it missaaninngaanniit
20-ssaanut atuutissappat, tassami taamaassanngippammi maannakkut
periarfissaasoq asuli ajorseriaannassagaluarmat. Tamatumuuna kingunerisaanik
taanna aamma ataatsimiititaliami suliarineqassaaq.
Jonathan Motzfeldt, ataatsimiinnermik aqutsisoq, Inatsisartut
Siulittaasuat, Siumut.
Kattusseqatigiit.
Anthon Frederiksen, Kattusseqatigiit.
Illuliortiternermut aningaasalersuineq pillugu
inatsisartut peqqussutaata allanngortinneqarsinnaanissaanut siunnersuut,
Kattusseqatigiit sinnerlugit paasilluarlugu taperserlugulu imaattumik
oqaaseqarfigissavara.
Kattusseqatigiit sinnerlugit
nuannaarutigaara, inuit ilaqutariit ataasiakkaat suliffeqarfiillu
nammineerlutik illuliorniartut, matumuuna inissiatigut nalinginnaasumik
aaqqissuusseqqinnerup ilaattut, aammalu aningaasanik
taarsigassarsititsiniartarfinni allannguuteqartitsinerit kingunerisaannik,
taarsigassarsiat ukiuni 15-iniik 20-nut akilersorneqarsinnaanerat
sivitsorneqartussanngormat.
Taamaalilluni inuit ataasiakkaat
ilaqutariit suliffeqarfiillu taarsersugassanik akuersinissamut
akilersuinissamut pitsaanerusumik periarfissinneqassammata.
Taamatut naatsumik oqaaseqarlunga
siunnersuut taperserlugu, taamatut isikkoqarluni aappassaaneerneqarnissaminut
ingerlaqqinnissaa inassutigaara.
Jonathan Motzfeldt, ataatsimiinnermik aqutsisoq, Inatsisartut
Siulittaasuat, Siumut.
Ineqarnermut Naalakkersuisoq.
Mikael Petersen, Attaveqatigiinnermut, Avatangiisinullu
Ineqarnermullu Naalakkersuisoq, Siumut.
Partiininngaanniit Kattusseqatigiinniillu
oqaatigineqartunut tamanut qujassaanga.
Immaqa oqarsinnaavugut isumaqatiinneq
annertungaarmat allaat aappassaaneerlunilu pingasoriarneqarsinnaagaluartoq.
Kisianni erseqqissaatigilaaginnassavara
tassa taamatut aningaasalersuinissanut attartorluni inissialiortarnermi,
aningaasalersuinissamut periarfissat siammarneqarnerat aningaasalersuinissanut
ukiunut 35-nut atuuttussanngorlugu ilusiliinerup, aamma kingunerisussaammagu
soorunami attartortut akilersuinerata oqilisaaffigineqarnera.
Soorunami apeqqutaalluni qanoq
annertutigisumik akisutigisumillu sanaartorneq pisimanersoq.
Kisianni taamatut sivitsuinerup
sunniutissaa malunnaateqartussaavoq, qaammammut aamma akilersuutit
eqqarsaatigalugit.
Qujanaq.
Jonathan Motzfeldt, ataatsimiinnermik aqutsisoq, Inatsisartut
Siulittaasuat, Siumut.
Tamaalilluni oqaluuserisassaq taanna
naammassivoq. Udvalgimilu tassalu ataatsimiititaliami inatsisartut Ineqarnermut
ataatsimiititaliaani suliarineqassalluni.