Inuit Ataqatigiinniit taassumap pissusissamisoortuunera oqaatigivarput. Ajuusaarutigalugu oqaatigissavarput peqqussutissap siullermeerneqarnerani nalinginnaasumik nassuiaatip kallaallisuuini iluatinnaatilik pingaartumik attartortup pisinnaatitaaffiinut tunngasoq tassalu attartortut pineqartut piffissap sivisuup ingerlanerani attartornermik taamaatinnissaannut periarfissaat pillugit malittarisassiornissaq maannakkut aappassaaneerinninnermi peerneqarmat.

 

Inuit Ataqatigiinniit piumasarissavarput peqqussutissap pingajussaaneerneqarnissaanut taassumap aaqqinneqarnissaa. Tassami apeqqut taanna attartortunut piginneqatigiilluni pigisatulluunniit inissiaatileqatiinnik peqatigiiffiliornermi piginnittussanngortussanut pingaaruteqarluinnarmat. Assersuutigalugu piginneqatigiilluni peqatigiiffinnut ilaasimalluni arlaanilli peqquteqarluni piginneqatigiiffimmut ilaajunnaartariaqassagaanni qanoq pisinnaatitaaffeqartoqassava.

 

Taanna apeqqut siullermeerinninnermi aamma apeqqutigivarput soqutigisimagaluarlugulu Naalakkersuisut tassunga tunngatillugu qanoq takorluugaqarsimanersut. Ajoraluartumillu takusinnaavarput ataatsimiititaliami misissorneqarsimanngitsoq. Taamaalillunilu aamma Naalakkersuisumit isummerfigineqarani peqqussutissamut siunnersuummiit nalinginnaasumik nassuiaatiniit peerneqaannartoq.

 

Tamanna pissusissamisuunngitsutut isigaarput aaqqinneqartariaqartutullu pingaaruteqartutut isigalugu.

 

Kapitalafkastimut tunngatillugu Inatsisartut Naalakkersuisunit piumaffigineqarput procentimik aalajangiissasut. Taannaaluunniit ataatsimiititaliamiit isummerfigineqarsimanngilaq. Minnerunngitsumillu maluginiaqqussavarput, maluginiagassaavoq taassumap ineqarnermut ataatsimiititaliamit isummerfigineqarsimannginnera Naalakkersuisunit aappassaaneerinninnissamut tunngatillugu oqaaseqarfigineqanngimmat.

 

Inuit Ataqatigiinniit isumaqarpugut apeqqut taanna pingaaruteqaqimmat aningaasanullu inatsimmut attuumassuteqarmat misissorluartariaqartoq.

 

Misissuilluaqqissaarnissatsinnut tunngavigaarput isumaqaratta kapitalafkastimik allanngortitsinerup aningaasatigut aammalu attartortut akiliutigiumaaligassaannut attuumassuteqartoq. Taamaattumik innersuussutigisimagaluarparput Ineqarnermut Ataatsimiititaliaq, Aningaasaqarnermut Ataatsimiititaliaq peqatigalugu misissueqqissaartariaqartoq Inatsisartunut innersuussuteqarnissaq siunertaralugu.

Tamanna isumaliutissiissutikkut saqqummiunneqartukkut takuneqarsinnaavoq pisimanngitsoq. Taamaattumik Inuit Ataqatigiinniit piumasarissavarput suliap maannakkut unitsinneqarluni Ataatsimiititaliamut utertinneqassasoq suliakkiissutigineqartut suliarineqarsimannginnerat peqqutigalugu.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Olga Poulsen qutsavigaarput. Taava maannakkut akissuteqassaaq Ineqarnermut Attaveqarnermullu Naalakkersuisoq.

 

Jørgen Wæver-Johansen, Ineqarnermut Attaveqarnermullu Naalakkersuisoq, Siumut

Naalakkersuisut sinnerlugit matumuuna Inatsisartut Attaveqarnermut Pilersuinermut aamma Ineqarmut Ataatsimiititaliaat isumaliutissiissutaa qujassutigaara.

 

Naalakkersuisut iluarisimaarlugu maluginiarpaat ataatsimiititaliap isumaqatigiittup inissianik attartorneq pillugu Inatsisartut peqqussutaata allanngortinneqarnerani Inatsisartut peqqussutissaattut siunnersuut akuerisassanngorlugu inassutigigaa. Ataatsimiititaliap isumaliutissiissutaata oqaaseqalaarnissannut tunngavissaqartippaanga.

 

Ataatsimiititalip Peqqussutissatut siunnersuummut nalinginnaasumik nassuiaatini kalaallisuuata qallunaatuuatalu imminnut naapertuutinnginnerat maluginiarpaa. Tamanna soorunami ajuusaarnarluinnarpoq.

 

Kalaallisut nassuiaatini immikkoortoq siulleq ima oqaasertaqassaaq, issuaavunga: Attartortut Namminersornerullutik Oqartussat kommunilluunniit inissiaataanni attartortittakkani inigisaminnit tigusinissaq siunertaralugu piginneqatigiilluni pigisatulluunniit inissiaatileqatigiit peqatigiiffinnit pilersitsisut aallarnissarneranni ingerlatsinerannilu atugassarititanik pitsanngorsaaniarluni attartortitsisut attartortumut piginneqatigiilluni pisatulluunniit Inissiaatileqatigiit peqatigiiffianni peqataarusunngitsumut inissianik taamaaqataanut neqerooruteqarnissaannut periarfissat pillugit malittarisassanik nutaanik siunnersuut imaqarpoq.

 

Naalakkersuisut erseqqissaassavaat attartortoq inissiamik piginneqatigiilluni inissiatut imaluunniit pigisatut inissiatut tiguserusunngitsoq atugassarititaasut allanngornagit attartortutut pineqaannarnissaminut imaluunniit nammineq kissaatigalugu inissiap taamaaqataanut annikinnerpaamik angeqqataanut nuunnissaminut periarfissaqarmat.

 

Erseqqissarneqassaartaaq attartortoq attartornermi isumaqatigiissutiminik eqquutitsisimasoq inissiat attartortittakkat piginneqatigiilluni inissiamut imaluunniit pigisatut inissiamut allanngortinneqarnerannut atatillugu attartorunnaarsinneqarsinnaanngimmat.

 

Taamatut oqaaseqarlutik Naalakkersuisut matumuuna inassutigaat inissianik attartorneq pillugu Inatsisartut peqqussutaata allanngortinneqarnernik Inatsisartut Peqqussutissaattut siunnersuut massakkutut iluseqarluni pingajussaaneerneqassasoq. Qujanaq.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Apeqqutigissavara oqaaseqarumasoqarnersoq. Otto Steenholdt, attaviitsoq.

 

Otto Steenholdt, attaviitsoq.

Tassa ataasiarunnaarpugut suliassaq suliareruttulerlugu oqaatsitta tungaatigut kukkuneqarsimaneranik uparuaasoqartartoq. Tassalu aamma taanna naatsorsuutigaara siunissami naapinneqartuartuussasoq. Ajoraluartumik tassa atorfilittagut maani uagut amigaatitta inatsisissat ilusilersortarpaat. Taakuugajuppullu qallunaat inatsisilerituutut ilinniarsimasut. Taakku ilusilersugaat allatut ajornartumik uagut nutsertinniartarpagut.

 

Nutserisunnguagut ulapikkaluarlutik ilaatigut kukkoriataartarput tamannalu maani uparuartorneqartarpoq. Tassa uanga iluarniutiginngikkaluarlugu oqartariaqarpunga kisimiikkama ilaanni suliassaq suliareruttulerlugu paasisuussagaluarukku kalaallisuuinnaa isigalugu ajormat allatut ajornartumik aallaqqaataaniit aallartittariaqassallunga qallunaatuua isiginnaarlugu. Taanna assut annilaanngatigisarpara. Taamaattumillu kanngusuutiginagu oqassaanga inatsisissat uangqa qallunaatoortai atuarusunnerusarpakka tassani kukkunernik nassaartoqarneq ajornerummat. Taanna oqaatigiinnarpara siunissami taamaattuartussaagunarmat.

 

Unaana Inuit Ataqatigiit oqaaseqarnerminni saqqummiussaat aamma ippigilaariga. Ujartugai arlaqarmata ataatsimiititalianngooq suliarisimanngisai. Pissusissamisoorpoq ujartuissallunik kisianni paasinngisara aajuna. Ilaasortaqarsimagaluarnerput tassani ataatsimiititaliami ilaasortannguatalu ikinnerussuteqarluni aamma oqaaseqarsinnaaneq atorsimanngimmagu tupigiinnarpara. Taamaaliornaveersaartariaqarpoq maani saqqummiussigaanni oqarfigiinnarneqarumanani ilaasortassiunassiuna suliassani iluamik suliarinngiinnarsimagaa.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Otto Steenholdt qutsavigaarput. Tulliulluni oqaaseqarumavoq Mogens Kleist, Kattusseqatigiit.

 

Mogens Kleist, Kattusseqatigiit oqaaseqartuat.

Qujanaq. Soorunami suliassap peqqissaartumik naammassineqarnissaa tamatta kissaatigissavarput. Aappassaaneerneqarata suliarineqarnerani Ataatsimiititaliaminngaaniit uanga ilaasortatut oqassuunga, eqqumaffigisimanngikkutsigu taanna avaqqussimagutsigu soorunami aaqqinniaqqaartariaqarparput. Pingaaruteqarpoq.

 

Aamma peqqussutissamik Inuit Ataqatigiinniinngaaniit taakkartorneqartut aaqqiivigissallugit. Taamaattumik Inuit Ataqatigiit aatsaannguaq oqartoqaraluartoq ataatsimiititaliami ilaasortaqarsimannginneranik, sooq ikinnerussuteqarluni oqaaseqarsinnaannginnera uanga akisinnaanngilara.

 

Kisiannili pingaaruteqarpoq suliatsinnut tunngatillugu eqqumaffiginngitsoorsimasarput taanna aaqqiivigissallugu. Taamaattumik Inuit Ataqatigiit taanna oqariartuutigisaat suliassaq ataatsimiititaliamut uterteqqinneqarnissaa sukumiisumik suliarineqarnissaa pissutigalugu. Taanna uanga ilaasortatut Ineqarnermut ataatsimiititaliaminngaaniit, aamma imaattussavara tapersissavara. Pingaaruteqarpoq taamatut aaqqiiniassagutta aamma siammasissumik aaqqiisinnaanissamut. Qujanaq.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Mogens Kleist qutsavigaarput. Tulliulluni oqaaseqassaaq Tommy Marø, Siumut.

 

Tommy Marø, Siumup oqaaseqartua.

Qujanaq. Isumaqarpunga maani sulinitsinni aamma peqqissaartumik sulisarnerput uani ataatsimiititaliami taanna oqaatigisariaqarlugu. Aammalu isumaliutissiissummik suliaqaraangatta missingersuut tunniunneqaraangat ataatsimiititaliaminngaaniit taava partiinut utertarpugut taakkulu aamma nalilersoqqillugit. Tassanngaaniit taava ataatsimiititaliami akuersinerput nalunaarutigisarparput.

 

Tassanerpiaq aamma pivoq taanna aammalu tamatta atsiorsimasarput akueralugu. Tassami soorunami isumaliutissiissummi ippigisarput ataatsimiititaliami isumaliutissiissummi allaqqavoq. Taannalu aamma Naalakkersuisuisup ersarissarpaa.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Tommy Marø qutsavigaarput. Tulliulluni oqaaseqassaaq Godmand Rasmussen, Atassut.

 

Godmand Rasmussen, Atassutip oqaaseqartua.

Una Inuit Ataqatigiit oqaaserisaa taanna paasinarluarpoq oqaaseq atormagu ataatsimiititaliamilluunniit isummerfigineqarsimanngitsoq. Tupigusuppunga tamakkua ukua ileqqoreqqusat suliarineqarani tamarmiulluta ataatsimiititaliami assigiilluinnaqqeqqissaamik akuersissutigivagut taakkua.

 

Piffissaagallarmat uparuaasoqarsimannginnera tupigivara. Aamma innarlugisaqaraangatta gruppitsinnut eqqussisarpugut. Taanna atulissagutsigu akuerseqataaffigeriarlugit atsioriarlugit piffissaq kingullerpaaq taamatut allanngortiterisassagutta sulinerput assut ajorsisussaavoq.

 

Akuereereerlugit Inuit Ataqatigiit aamma aallartitaata taakkua namminerpiaq akuersissutigereerpaat. Taava piffissaagallarmat isornartoqartissimaguniuk sooq ataatsimiititaliami oqarsimanngila.

 

Akuerseqataareerluni taamannak ileqqulersorneq akuersaaruminaatsupilussuuvoq. Uagut taamaattumik Atassumminngaaniit una Naalakkersuisut siunnersuutaat akueralugu taaseqataaffigissavarput.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Godmand Rasmussen qutsavigaarput. Taava tulliulluni oqaaseqassaaq Olga Poulsen.

 

Olga Poulsen, Inuit Ataqatigiit oqaaseqartuat.

Tassa soorunalimi ajuusaarnarpoq arlaatigut qarsupittoqarsimammat. Aamma uagut ilaasortaatitarisatsinninngaaniit aamma ataatsimiititaliaq tamaat eqqarsaatigalugu. Inuit Ataqatigiinninngaaniit isumaqarpugut minnerpaarpaamik oqaaseqaatit partiininngaaniit oqaatigineqartut misissueqqusinermillu oqariartuuteqartut minnerpaamik Siulittaasup akisussaaffigisariaqarai taakkua misissuiffigineqarnissai.

 

Taamaattumik taanna arlaannaataluunniit pisuuneranik oqariartuuteqartoqarnianngilaq. Kisianni ataatsimut tamaat isigalugu Inuit Ataqatigiinninngaanniit massakkumut paasisagut isumaqarpunga pissusissamisoortoq pingajussaaniinnginnerani aammalu ajornartorsiutit taassumap aaqqinneqarsimanngitsup takunerani periarfissaqartillugu aaqqiiniarneqarnissaa.

 

Taanna takunngitsuusaassallugu pissusissamisuunngilaq. Minnerunngitsumik ataatsimiititaliap siulittaasuaninngaaniit uagut Inuit Ataqatigiinninngaanniit una suliaq utertinneqassanngippat ataatsimiititaliamut uunga siunnersuummut akuerseqataassanngilagut.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Olga Poulsen qutsavigaarput. Tulliulluni oqaaseqassaaq Godmand Rasmussen.

 

Godmand Rasmussen, Atassutip oqaaseqartua.

Naatsuararsuarmik nassuiaateqarfigilaassavara. Sumiluunniit ataatsimiititaliani suliat naammassereersut aamma partiininngaaniit atsioqataaffigineqareersut ileqquliutissagutsigit nuanniissaqaaq akuersillutik isornartoqartitsinatik pereerlutik atsioreernikkut aatsaat oqaluttarfimmi piffissaq kingulleq atorlugu atorunnaarsitsiniartassagutta.

 

Akuerseqataallutinukua namminneq aamma ippassaq ataatsimiippugut. Aamma isorisaqarsimagunik taannarpiaq sooq, uparualaarsimassagaluarpaat qangali malugisimagunikku. Taava oqallisigisimassagaluarparput.

 

Uagut isornartoqartissimannginnatsigu tassani amerlanerussuteqartut taanna akuersissutigivarput. Ileqqussaanngilaq. Piffissaatillugu uparuaaneq ajunngilaq. Taava ataatsimiititaliami taanna misissorneqarsinnaapput kukkussutaasinnaasut uparuarneqaraangata. Kisianni tallimaalluta taakku akuerereerpagut. Taava sussalluta aamma maannakkut allanngortitsinialissuugut.

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Godmand Rasmussen qutsavigaarput. Tulliullunilu oqaaseqassaaq Josef Motzfeldt, Inuit Ataqatigiit partiimi oqaaseqartup avataatigut.

 

Josef Motzfeldt, Inuit Ataqatigiit.

Tassa Inuit Ataqatigiinniinngaaniit ataatsimiititaliami pineqartumi ilaasortaatitarput ilumoorpoq 23. april atsiaqataasimammat. Ullorlu taanna aallarluni. Taamaammat uagut aamma kukkusimanerput matumuuna nassuerutigisinnaavarput ataatsimiititaliami ilaasortaatitatta suliaq taamak pipallatsigisumik imaluunniit pikassataatigisumik suliaasoq atsioqataaffigisimammagu. Taamaattuminguna kukkuneq paasigatsigu asuli suliaasimasoq paasigatsigu utertinneqartariaqartoq ataatsimiititaliamut kissaatigigipput.

 

Taamaattumik ataatsimiititaliap siulittaasua aperissavara ataatsimiititaliami suut toqqammavigalugit sulisitsisimanersoq. Qangalu ataatsimiinnerit oqaluuserisamut matumunnga tunngatillugit ataatsimiititaliami ataatsimiissutigineraat. Taanna Inatsisartut ataatsimiititaliaannut siulittaasuuvugut. Inatsisartunut nassuiaatigisariaqarit puimasarivarput. Qanga qasseriarlugu oqaluuseraasiuk.

 

Ippassaq ataatsimiissimagussi oqaasissagut suliarereerigut ataatsimiititaliap isumaliutissiissummi atsioreerlugu agguareeraa. Allanngortissinnaanngilarput oqaasissagut ullumikkut oqaatigisussaavagut.

 

Taannalu kapitalafgiftimut afkastimut tunngasoq Naalakkersuisut ujartuinerat nalinginnaasumik oqaaseqaatiminni apeqqutigaat Inatsisartut isummerfigissagaat taanna. Ukiarmi aningaasanut inatsisissamut atatillugu konto 72.10.16 62,3 millioninik aningaasartalerneqarpoq. Aammalu ukiunut missingersuusiorfinnut 3, 4, 5-mut aamma taamak annertutigisumik aningaasartalerneqarluni.

 

Naalakkersuisut taamak aperigamik aningaasanut inatsimmi allassimasut minnerpaamik aningaasaqarnermut Naalakkersuisup aningaasanut inatsimmut attuumassutitai ilanngullugit saqqummiutsissimasariaqaraluarpai.

 

Aningaasanut inatsisit inatsisaavoq. Taava taamanikkut aalajangerneqarpoq siullermik 2,75 %-usimagaluartoq 6500 kr-nit siulliit qaangeraangatigit kvadratmeterimut akiisa Inatsisartut aalajangerpaat 1,5 %-ussasoq kr-nit siullerpaaminngaaniit.

 

Taamaalillunilu Naalakkersuisut 24,7 millioninik aningaasartaliigaluarnerat imaluunniit 24,6 millioninik aningaasartaliigaluarnerat 37,7 millioninik qaffanneqarpoq 62,3 millioninngorlugit.

 

Nalinginnaasumik suleriaatitsinni aamma missingersuutit pillugit inatsimmi allassimavoq siunnersuutit aningaasartaqaraangata aningaasartatigut nassatassai ilanngullugit maani saqqummiunneqartassasut. Naalakkersuisut massakkut Naalakkersuisooqatigiit ataatsimiinnermi massakkut qasserialernerput inatsisit Inatsisartut inatsisaat sanioqqutiinnarlugit soqutiginagit Inatsisartunut saqqummiusseqattaarlutik.

 

Taamaattumik Inuit Ataqatigiinninngaanniit aalajangiusimavarput Inatsisartullu gruppiinut sinneruttunut isummerfigeqqussallugu aappassaaneerinninnerup unitsinneqarsinnaanera matumuuna pissasoq. Taavalu ataatsimiititaliamut utertinneqassasoq ataatsimiissutigineqarlunilu.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Josef Motzfeldt qutsavigaarput. Tulliulluni oqaaseqassaaq Olga Poulsen Inuit Ataqatigiit. Tulliullunilu oqaaseqassaaq, Naalakkersuisunut ilaasortaq.

 

Olga Poulsen, Inuit Ataqatigiit.

Aap, nalunngilara pingajussaaniilerlunga. Ataatsimiititaliap siulittaasua oqarpoq ataatsimiititaliami tallimaallutik atsiorsimallutik. Tallimaagamik, ataatsimiititaliap siulittaasuat ilisimavaa aamma tamatta Inatsisartunut ilaasortaasugut ilisimavarput ataatsimiititaliami ilaasortaavugut, aap, kisianni Inatsisartunut ilaasortanik tunuliaquteqarpugut. Taanna puigorsimassanngilarput. Neriuppunga ataatsimiititaliami ilaasortaasutut ataasiakkaani ilaasortaaffigisatsinni tunuliaqutagut puigussanngikkigut.

 

Uagut maluginiakkagut taakkua pingaaruteqartutut isigisagut tupinnalaarpoq pingaaruteqanngitsutut isigineqassappata. Minnerunngitsumik siullermeerneqarnerani Inuit Ataqatigiit oqariartuuteqarnerminni erseqqarilluinnaqqissaartumik aamma qarasaasiakkut nassaarisinnaasatsinni allaqqasunik ersarilluinnaqqissaartumik misissugassat uani siuliani taasagut misissoqqusimavagut.

 

Taamaattumik kialluunniit qarsupissimassagaluarpagit akisussaasoqarpoq tassani ataatsimiititaliami. Taamaattumik tupinnassaaq una suliaq naammassineqanngitsutut isikkulik akuersiffigineqassappat.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Olga Poulsen qutsavigaarput. Tulliulluni oqaaseqassaaq Ineqarnermut Naalakkersuisoq.

 

Jørgen Wæver-Johansen, Ineqarnermut Attaveqarnermullu Naalakkersuisoq, Siumut.

Tassa naatsorsuutigaara siullermeerneqarnera aallarteqqinneqassanngitsoq. Siullermeerneqareermat Inatsisartut pisarneq naapertorlugu aalajangerpugut ataatsimiititaliamut ingerlateqqinneqassasoq. Aappassaaneerneqarnissaanut ataatsimiititaliami suliarineqarpoq. Ataatsimiititaliaq isumaqatigiittoq isumaliutissiissuteqarpoq.

 

Taanna tunngavigalugu tupigusuutigineqarsinnaanngilaq soorunami isumaliutissiissut pisarneq naapertorlugu tunngavigalugu Naalakkersuisut isummermata. Ilumoorpoq uani saqqummiussarput marlunnik immikkoortortaqarpoq. Aappaa tassaavoq attartortumiit piginnittumut suliniummut atatillugu attartortutut inissisimasut piginneqataarusunngitsut taakkua piginnaatitaaffiisa illersorneqarnissaat.

 

Aappaattullu tassa kapital afkastimut tunngassuteqartoq. Tassani pisartoq tassaavoq ukioq kingulleq allanngortiterineq Inatsisartut akuereriigaat inatsimmut ilanngutsinneqarnissaa. Inatsisartut akuereriigaat Naalakkersuisooqatigiiusimasut saqqummiussaat taanna massakkut inatsimmut ilanngunneqarpoq siornatigut ilaasimanngimmat.

 

Uagut Naalakkersuisuni soorunami naatsorsuutigaarput ataatsimiititaliaq pisarneq naapertorlugu sukumiisumik nalilersuereerluni isumaqatigiilluni isumaliutissiissuteqarsimassasoq.

 

Taamaattumik Naalakkersuisut sinnerlugit inassuteqaaterput tassalu ataatsimiititaliap isumaqatigiittup saqqummiussai tunngavigalugit taamatut isikkoqarluni pingajussaaneerneqarnissaminut ingerlateqqinneqarnissaa inassutigissavara.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Naalakkersuisunut ilaasortamut qujavugut. Tulliullunilu oqaaseqassaaq Tommy Marø.

 

Tommy Marø.

Qujanaq. Naatsunnguamik ersarissumillu oqaatigilaavinnassavara Inuit Ataqatigiit qanorluunniit tupigusutsigigaluarunik uagut aamma illuaniit tupigusuutigeqigatsigu. Isumaliutissiissutip missingersuutitaata sananerani periarfissaqartarpugut partiini tamani isummersorfigissallugu isumaliutissiissutip taassuma imarisaa akuerisinnaanerlugu immaqaluunniit partiit oqaaseqaatiminni oqaaseqaataat tassani ilanngunneqarsimannginnersut naammagittaalliuutigissallugu.

 

Tassa aallartitat partiini udvalgini suliassaat. Taamaammat uanga isumaqarpunga taakkua utikajaaqqinneqassanngitsut aamma ataatsimiititaliaq ajunngitsumik sulisimammat. Taamaammat taassumap ataatsimiititaliami isumaliutissiissummi tamarmik atsiorneqartataaffigineqarsimammat partiinit tamanit Kattusseqatigiinniillu akuersissutigineqarnissaa innersuussutigissavara.

 

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Tommy Marø qutsavigaarput. Tulliulluni oqaaseqassaaq Godmand Rasmussen.

 

Godmand Rasmussen, Atassutip oqaaseqartua.

Toqqaannartumik aperineqarpunga Josef Motzfeldtiminngaaniit qanoq suliarisimaneripput una. Tupigivara taamak aperisinnaammat. Inatsisartut suleriaaseqarput erseqqilluinnartunik malittarisassanik. Ataatsimiititaliani suni tamani siulittaasut uani tamaammik suliarisimasaminnik nassuiaasaqaqattaartalissappata sivisusassaqaaq ataatsimiinneq.

 

Illit nammineq isorisaqarsimaguit aallartitarsi aperisimasariaqaraluarpat taava Inuit Ataqatigiit kukkussutaat allanut miloriunniarsarissanngilat. Piffissaagallarmalli uparuaasimassagaluarpoq. Kisianni akuerseqataavoq aallartitarsi. Taamaattumik uani sivitsorsaataavinnalerpoq piffissaagallarmat uparuaasoqarsimassagaluarpoq. Uagut isornartoqartinnginnatsigu atsiorparput.

 

Isornartoqartissimagutsigu atsiorsimanavianngikkaluarparput suliarlu ingerlateqqillugu.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Tulliulluni oqaaseqassaaq Anthon Frederiksen, Godmand Rasmussen qutsavigaarput.

 

Anthon Frederiksen, Kattusseqatigiit oqaaseqartuat.

Ataatsimiititaliani suniluunniit ilaasortaatitavut soorunami tatigisarpagut aamma minnerunngitsumik isumaliutissiissut tamanik isumaqatigiilluni atsiorneqarsimagaangat aamma tassuuna uppernarsisarparput tassa ajunngitsumik ataatsimiititaliami sulisoqarsimavoq.

 

Kisianni aamma aappaatigut uanga pakatsissutigilaarpara ataatsimiititaliami uagut ilaasortaatitatta maannakkut atsiorsimanini isumaqataalluni atsiorsimanini illuatungaanut saatillugu ataatsimiititaliap sulinerata aappassaanik uteqqinnissaa piumasarilermagu.

 

Ataatsimiititaliami ilaasortaatitagut uani isumaliutissiissut tamarmik atsioriigaat akerleralugu taasissugitigissagutsigu taava aperisariaqalissuugut Ineqarnermut Attaveqarnermullu Ataatsimiititaliaq tatiginanngitsumik sulisimassooq. Taanna tamatta paasisariaqarparput. Taamaattumik ippassaanikkunni ilaasortat ilaata oqarneratuut ataatsimiititaliami ilaasortatta ilai immaqa naveertariaqalissavagut.

 

Taamaammat isumaliutissiissut akuersissutigineqareersoq tatigisatsinnik ataatsimiititaliami ilaasortaasunit tamanit akuerissanngikkutsigu tupinnassaqaaq.

 

Taaamaammat ataatsimiititaliani ilaasortaatitagut allatut ajornartumik tigusariaqarpagut oqarfigalugillu iluamik ilisimatittarniartigut. Iluamik ataatsimiititaliani susoqarneranik paasittarniartigut.

 

Aamma uanga ataatsimiititaliani ilaasortaatitarput ilanngullugu taamatut uparuarpara. Uagut pituttorsimanngilluaasakkatta ataatsimiititaliami ilaasortarput illersorniaannarlugu imannak oqaluttarfik atussalugu.

 

Peqqissaartumik sulinissaq kissatigeqaarput. Taamaammat taanna uanga oqassuunga uanga nammineq inuttut ataatsimiititaliap isumaliutissiissutaa taperserlugu taaseqataassuunga.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Anthon Frederiksen qutsavigaarput. Tulliulluni oqaaseqassaaq Anders Andreassen.

 

Anders Andreassen, Siulittaasup tulliata aappaa, Siumut.

Aap Qujanaq. Inuit Ataqatigiit siulittaasuata Hr. Josef Motzfeldtip ataatsimiititaliaq uani suliami pineqartoq nalilerpaa asuli sulisimasoq. Taamatut oqarneq Inatsisartunut ilaasortaqatinut nikassaaneruvoq akuerineqarsinnaanngilluinnaqqissaartoq. Inatsisartut maani asuli sulinngillat. Namminnerlu paasinnittaarsertik malillugu aamma suliaqartarlutik. Taamaattumik neriuutigissavara siunissami aamma oqaatsit maani atorneqartartut ingammillu Inatsisartoqatinut nikassaanerit tamaasa unitseqqullugit.

 

Tamassi naligiippusi qassinilluunniit qinerneqarsimagaluarussi maani suliffimmi tamarluinnassi ataatsimut isigisariaqarpusi. Taamaattumillu oqaatsit taamaattut kingorna atorneqaqqinnginnissaat kissaatigissavara.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Anders Andreassen qutsavigaarput. Tulliullunilu oqaaseqassaaq Lars Sørensen.

 

Lars Sørensen, Inuit Ataqatigiit oqaaseqartuat.

Tassa suliassaq annertunerusumik paatsiveerussutaaqqunagu aammalu Naalakkersuisut suliap uumap siullermeerneqarnerani ilaatigut ataatsimiititaliami aammalu Inatsisartunut piumasarinikuuvaat piginnittup iluanaarutissaanut tunngasut tassa kapitalafkastimut tunngatillugu Inatsisartut tamanna isummerfigisariaqaraat.