Ullut ataatsimiiffiusut sisamaat, tallimanngorneq 12. april 2002, nal. 17:35

Oqaluuserisassani immikkoortoq 20

Piginneqatigiilluni inissiat pillugit Inatsisartut peqqussutaata allanngortinneqarneranik Inatsisartut peqqussutissaattut siunnersuut.

(Ineqarnermut, Attaveqarnermut Pilersuinermullu Naalakkersuisoq)

(Siullermeerneqarnera)

 

 

Ataatsimiinnermik aqutsisoq: Daniel Skifte, Inatsisartut Siulittaasuat, Atassut.

 

 

Jørgen Wæver-Johansen, Ineqarnermut, Attaveqarnermut Pilersuinermullu Naalakkersuisoq, Siumut.

Ullup sinnerata isumaqatigiiffiunerusumik ingerlanissaa neriuutigalugu Naalakkersuisut sinnerlugit matumuuna saqqumiuppara piginneqatigiilluni inissiat pillugit Inatsisartut peqqussutaata allanngortinneqarneranik Inatsisartut peqqussutissaattut siunnersuut.

 

Peqqussutissatut siunnersuut piginneqatigiilluni inissiaateqarnermik aaqqissuussinerup nutartigiffigineqarneranut ingerlareersumut ilaavoq. Pillunilu ilaatigut aaqqissuussinermi paasisimalikkat tunngavigalugit ilaatigullu ineqarnermut tunngasuni ingerlataqartut kissaateqarnerat malillugu kiisalu maleruagassiuviallaannginnissamik allaffissornerullu pisariillisaavigineqarnissaanik Naalakkersuisut kissaateqarnerat peqqussutissatut siunnersuummut patsisaaqataavoq.

 

Peqqussut atuuttoq malillugu entreprenøri piginneqatigiillutik inissiaatillit peqatigiiffianut tunisinissani siunertaralugu inissianik sananissaminik kissaateqartoq sanaartornerup aallartinneraniilli piginneqatigiillutik inissiaatillit peqatigiiffianik pilersinneqareersimasumik

tapersiivigineqarnissaminullu neriorsorneqareersimasumik isumaqatigiissuteqareersimassaaq.

Peqqussutissatut siunnersuutip nutaartaraa entreprenørip sanaartorneq aallartereersinnaammagu sanaartornerullu nalaani sanaartukkaminik piginneqatigiillutik inissiaatillit peqatigiiffianut pilersinneqareersimasumut tunisisinnaanera. Tamatumuuna isumaqatigiissuteqarnerup nalaani piginneqatigiillutik inissiaatillit peqatigiiffiata tapersiivigineqarnissamik neriorsuutigineqarfigineqareersimanissaa piumasaqaataajunnaarpoq.

 

Naalakkersuisut naliliipput peqqussutissatut siunnersuutip kingunerissagaa pilersaarutip aallartinneraniik naammassinissaata tungaanut piffissaq atorneqartussaq ukiut marluk tikillugit sivikillisinneqassasoq, sivikillisinneqarsinnaasoq tassa sanaartornermi suleriaaseq Inatsisartut aningaasanut inatsisaannut atuuttoq piffissaq eqqarsaatigalugu apeqqutaajunnaarmat.

 

Namminersornerullutik Oqartussat kommunellu piginneqatigiillutik inissiaatillit peqatigiiffiannut tapersiissutaasa tunniunneqarfissaasa piffissaa sanaartornerup naamassineqarnerata atuisinnaatitaanerullu piffissaa imminnut nalerortariaqanngimmata piffissap akunnequtaasut aningaasalersuiffigineqarnissaa pisariaqassaaq. Piffissap sanaartorfiup nalaani aningaasalersuineq assigalugu piffissap taassuma aningaasalersuiffigineqarnissaa entreprenørip pisussaaffigaa.

 

Piginneqatigiilluni inissianik entreprenørimik sananeqartunik piserusunneq peqqussutissakkut siunnersuutikkut angilerulertinneqassasoq Naalakkersuisut naatsorsuutigaat tassa inissiat taamaatut annertuumik ingerlatsinikkut iluaqutigalugit aammalu m2-mut akikinnerusumik sananeqarsinnaassasut naatsorsuutigineqarmat.

 

Peqqussumi matumani allannguutissatut siunnersuummi aamma naleqqussaaneq alla ilaavoq, tassani inissiat attartortittakkat pioreersut piginneqatigiilluni inissianut allanngortinneqartillugit attartortut piginneqatigiillutik inissiaatillit peqatigiiffiannut ilaasortanngornissaminnik kissaatigisaqanngitsut piginnaatitaaffiisa atatiinnarneqarnissaat peqqussutissatut siunnersuutikkut aamma qularnaarneqassaaq. Taamatut pisoqartillugu Naalakkersuisut kommuneluunniit piginneqataasunut ilanngutissapput piginneqatigiillutillu inissiaatillit peqatigiiffianni ilaasortanngussallutik tamatuma kingorna attartortoq Namminersornerullutik Oqartussani kommuneniluunniit attartortutut ingerlaannassaaq. Tamatumuuna attartortup pisinnaatitaaffimminik piginniinnarnissaa qularnaarneqassaaq.

 

Piginneqatigiillutik inissiaatillit peqatigiiffiata Naalakkersuisut kommuneluunniit ineqarnermut akiliutissanik piginneqatigiillutik inissiaatillit peqatigiiffiata ataatsimeersuarnerani aaliangerneqarsimasumik akileeqqussavai attartortorli Namminersornerullutik Oqartussat kommunellu inissiaataanni attartortittakkani ineqarnermut akiliutit naatsersorneqartarnerat pillugu maleruagassat atuuttut malillugit akileeqquneqartaannassasoq  aamma ilaavoq.

 

Peqqussutissatut siunnersuummut saqqummiunneqartumut nassuiaatit innersuussutigalugit piginneqatigiilluni inissiat pillugit Inatsisartut peqqussutaata allanngortinneqarneranik Inatsisartut peqqussutissaattut siunnersuut Inatsisartunit akuersortumik oqaluuserisassanngortippara. Siunnersuutigineqarpoq siunnersuut aappassaaneerneqannginnermini Inatsisartut Attaveqarnermut Pilersuinermullu aamma Ineqarnermut ataatsimiitsitaliaanut oqaluuserisassanngortinneqassasoq. Qujanaq.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Naalakkersuisunut ilaasortamut Jørgen Wæver-Johansenimut qujavugut.

 

Taava maannakkut partiit, Kattusseqatigiit kiisalu attaviitsut oqaaseqartuinut pivugut. Tulliulluni oqaaseqassaaq Tommy Marø, Siumut.

 

Tommy Marø, Siumup oqaaseqartua.

Qujanaq. Inatsisartut peqqussutaat nr. 1, 31. oktober 1991-imeersoq piginneqatigiilluni inissiaateqarnermut tunngasoq Inatsisartut peqqussutaatigut nr. 11-kkut 6. november 1997-imeersukkut aammalu nr. 17-ikkut  12. november 2001 kingullermik allanngortinneqartukkut Naalakkersuisut peqqussutip allanngortinneqarnissaanik siunnersuutaat Siumumiit imaattumik oqaaseqarfigissavarput:

 

Piginneqatigiilluni inissiat Inatsisartut peqqussutaata siuliani taaneqartumi aammalu Naalakkersuisut tunngavilersuutitut saqqummiussinerminni tassalu inissiaatileqatigiit illuliornermut aningaasaateqarfimmiit imaluunniit entreprenørimiit nutaamik inissiaateqalersut tapiiffigineqartarnerata allaffissornikkut aqunneqarnerata pisariillisarnera.

Siumumiit ersarissumik nalunaarutigissavarput Inatsisartut peqqussutaata pisariillisaanermik siunertaqarluni saqqummiunneqartoq tamakkiisumik taperseratsigu. Immikkullu imarisaa oqaaseqarfiginagu Inatsisartut Ineqarnermut Attaveqarnermut Pilersuinermullu ataatsimiitsitaliaanni aappassaaneerneqannginnermini suliareqqaarneqarnissaa innersuussutigissavarput. Qujanaq.

 

Daniel Skifte, ataatsimiinnermik aqutsisoq, Inatsisartut siulittaasuat, Atassut.

Tommy Marømut qujavugut. Maannakkut oqaaseqassaaq Godmand Rasmussen, Atassut.

 

Godmand Rasmussen, Atassutip oqaaseqartua.

Pineqartoq naluneqanngilaq nutarterinerup pioreersup malitsigisaatut iinnarmat, aaqqissuussinermilu paasisimasariikkanut ilassutitut ilaaginnarluni.

 

Taamaattumik Atassumiit misissorluareerlutigu annertunerusumik oqaaseqarfiginatigu oqaatigereersavarput pineqartup pitsanngoriaateqartinneqarluni saqqummiunneqarnera iluarisimaaratsigu.

 

Tassanimi ineqarnermut tunngasunik ingerlataqartut kissaateqarnerat malillugu allaffissornerullu pisariillisaaffigineqarnissaa kissaateqarnermullu ilaatinneqarsimanera Atassutip iluarisimaarlugu oqaatigissavaa. Peqqussutissamimi Atassummiit pitsaasumik tikkuagaasa ilagaat inissiaatillit peqatigiiffinnut tunniussinissaminnik isumaqatigiissutqartarnissaat, kiisalu piginneqatigiilluni inissianik entreprenørinit sanaanik piserusussutsip annertunerulersinneqarnissaa isumaammat pitsaasoq, pingaartumik siunniunneqarmat akit sanaartornermik appasinnerulersinnaanerinut tunngatillugu. Naluneqanngimmat sanaartukkat akisuallaarnerisa inimik atuisut qanoq tamaviaarnartigisumik atugaqartitaasarnerat.

 

Atassummiit taamatut oqaaseqarluta ataatsimiititaliamut aappassaaneerneqartinnagu oqaluuserineqarnissaa innersuussutigaarput.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Godmand Rasmussenimut qujavugut.

Maannakkut oqaaseqassaaq Olga Poulsen, Inuit Ataqatigiit.

Olga Poulsen, Inuit Ataqatigiit oqaaseqartuat.

Inuit Ataqatigiinniit pingaartittuarparput inissaaleqinerup qaangerniarneqarnissaanut tunngatillugu qaangiiniutinik pitsaasunik periarfissaqartitsiuarnissaq.

 

Maleruagassiuivallaannginnissaq allaffissornerullu pisariillisarneqarnissaannik siunertaqartumik allannguutissatut siunnersuuteqarneq Inuit Ataqatigiinniit ajunngitsortaqartutut isigaarput.

 

Inuit Ataqatigiinniilli kissaatigissavarput nunatsinni sanasut namminersortut mikinerusut aamma qanoq periarfissaqatitaalernissaat ataatsimiisititaliami qulaajarneqarumaartoq. Tassani eqqarsaatigalugu entreprenørit sanasullu namminersortut mikinerusut pisinnaatitaaffigiligassaasa assigiinngissutaat.

 

Inissianik sanaartornerup ukiut marluk tikillugit sivikillisarneqarlersinnaanissaanik siunnersuutip kinguneqartitsilersinnaanera Inuit Ataqatigiinninngaanniit neriulluarnartoqarsorivarput,

apeqqutigerusupparpulli anaartugassat pisortanit aningaasalersorneqartussat aningaasartassaat qulakkeeqaarnagit tunniunniunneqartalersinnaanissaat aningaasanut inatsimmut qanoq aaqqissuunneqarniarsut, aaqqissuunniarneqartassanersut.

 

Taamatut apeqquteqarnitsinnut tunngavigivarput piginneqatigiilltik inissiaatileqatigiiffinngortussat tapersiivigineqartarnissaminnik neriorsuuteqarfigineqaqqaartarnissaat allanngortinniarneqarniarmat. Piffissap sanaartorfiusup ingerlanerani entreprenørit akiliisinnaajunnaassagaluarpata qanoq isiortoqassanersoq qanorlu pisoqassanersoq aamma akissuteqarfigineqarnissaa kissaatigissavarput.

 

Taamatut oqaaseqarluta siunnersuutip inissialiortitsinerup sukkatsinneqarsinnaanissaannik siunertaqartussamik misissorluarneqarnissaa siunertaralugu Inatsisartut Ineqarnermut Ataatsimiititaliaanut ingerlateqqipparput.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Olga Poulsenimut qujavugut. Maannakkut oqaaseqassaaq Mogens Kleist, Kattusseqatigiit.

 

 

 

Mogens Kleist, Kattusseqatigiit oqaaseqartuat.

Qujanaq. Peqqussutissap allannguutissai Kattusseqatigiinniit oqaatigerusuppagut sukumiisumik misissorneqarnissaat, tassami suliffiutillit entreprenørit nammineerlutik illunik sanaartoriarlutik piginneqatigiinnit tunisinnaalissammatigit aamma suliffiutillit namminneq aningaasatigut akisussaaffeqarnerat tassuunatigut ersersinneqarmat. Taamaattorli peqqussutissap kingunipilorisinnaasai annilaanngatigaagut, tassalu suliffiutilik entreprenøri illuutilinnik tunisinermigut akinik qaffaassasinnaanissaa. Tamaalilluni ullumikkut akigitinneqartunit qaffasinnerusumik akiginiaasinnaanissaa eqqarsaatigalugu.

 

Taamatut piginneqatigiinnit entreprenørit illunik tunisippat, taava kiap akisussaaffigissavaa entreprenørip piumasaqaataasa nikingassusiat? Tassani aamma eqqarsaatigaagut iserternermi akit.

 

Ullumikkut nalunngilarput procentit aalajangersimasut atuutsinneqartut, siunissamilu procenti qanoq-ittoq aammalu qanoq annertutigisoq atorneqassava aammalu kia aalajangissavaa taamatut illuliat akiisa nalinginnaasumik qaffasinnerunerasigut?

 

Taamatut naatsumik oqaaseqarluta peqqussutissap aappassaaniinnginnerani ataatsimiititaliamut attuumassuteqartumut innersuussutigerusupparput sukumiisumik misissorneqarnissai anguniarlugu. Qujanaq.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Mogens Kleist qutsavigaarput.

Taavalu maannakkut oqaaseqassaaq Otto Steenholdt, attaviitsoq.

 

Otto Steenholdt, attaviitsoq.

Naatsuarannguamik oqaasissaqarpunga. Tassa uanga entreprenøriusuuguma, taavalu sanaassara qanoq akeqartoq nalunagu qulakkeereersimalluinnaqqissaarusussagaluarpara ilumut sannatassama pisiarissagaat. Taamaanngippammi namminersorluni ingerlariaaseq navianarsisinnaammat ilaatigut peqqissimillutik tunuartertoqartarnera pissutigalugu, kisianni uani siunnersuummi takuara qulakkeerneqalisaartutut qularnanngitsutullu sanasussamut isikkoqartoq. Taamaassappat ajorissanngilara, tassa tamakkua aningaasarpassuarnik nammineq atuillutik akilikkaminnik sanasarmata, taava pisissussaaruteriataassagaluarunik namminersortut aningaasaqarnermikkut sakkortuumik kingunipiloqarsinnaammat, kisianni isumaqarpunga taanna qulakkeerneqarsimasoq taamaasimassappallu siunnersuummut akerliuffissaqanngilanga.

 

Daniel Skifte, ataatsimiinnermik aqutsisoq, Inatsisartut Siulittaasuat, Atassut.

Otto Steenholdt qutsavigaarput.

Taavalu Ineqarnermut, Pilersuinermut Attavearnermullu Naalakkersuisoq, Jørgen Wæver-Johansen akissuteqassaaq.

 

Jørgen Wæver-Johansen, Ineqarnermut, Pilersuinermut Attaveqarnermullu Naalakkersuisoq, Siumut.

Qujanaq. Malugisinnaavara oqaaseqartut tamarmik siunnersuut iluarisimaaraat, kisiannili suliarineqaqqinnginnerani ataatsimiititaliami suliarineqaqqaarallarnissaa kissaatigigaat. Tamanna Naalakkersuisuniit isumaqatigaarput.

 

Apeqqutit arlaqanngitsut naatsunnguamik akissuteqarfigilaassavakka; siullermik Inuit Ataqatigiit oqaaseqartuata Olga Poulsenip apeqqutigivaa sanaartugassat pisortaniit aningaasalersorneqartussat aningaasartassaat qulakkeeqqaarnagit tunniunneqartalersinnaanissaat aningaasanik inatsisissamik qanoq aaqqissuunniarneqartassanersut.

 

Tassunga tunngatillugu tamatta nalunngilarput ukiaq aalajangernikuugatsigu qaffasinnerpaaffissaa qanoq annertutigisoq, tassa tapiiffigineqarsinnaasoq 105 m2-ri tikillugu, taavalu piginneqatigiilluni peqatigiiffiat pineqarpat, taava sanaartornermik akigitinneqarsinnaasut qaffasinnerpaasoq, tassaavoq m2-imut 15.000 kruuni.

 

Taamaattumik taakkua killiliisuupput, assigiinngitsorpassuarnik aamma soorunami tapiiffigineqarsinnaassutsip qanoq annertutigineranik. Taannalu Inatsisartut ukiumoortumik uterfigisarsinnaavaat piumagunik, taakkua m2-imut aningaasat qassit qaffasinnerpaaffissaa qanoq inissisimanersoq.