2024 2023 2022 Flere år...
17-08-2013
Josef Motzfeldt (Tuusi) kuultiusumik Nersornaaserneqarpoq
Inatsisartut Siulittaasuata Lars-Emil Johansenip nunatta kujataani Nunat Avannarliit Killiit Siunnersuisoqatigiiffiata ukiumoortumik ataatsimiinneranut atatillugu ullumi Igalikumi nalliuttorsiualaarnermi Josef Motzfeldt (Tuusi) kuultiusumik Nersornaaserpaa.
Inatsisartut Siulittaasoqarfiata Josef Motzfeldt kuultiusumik Nersornaaserpaat ukiorpassuarni nunatsinni inuiaqatigiit ineriartortinneqarneranni peqataasimanera kulturikkullu suliniarnermik siuarsaanera tunngavilersuutigalugit.
Siulittaasup Josef Motzfeldtimut oqaaseqarnermini ilaatigut erseqqissarpai:
"Ajornannginaarlugu piffissaq manna atorsinnaagaluarpara inuiaqatigiit kalaallit ineriartorneranni ukiorpassuarni naalakkersuinikkut peqataasimanerit Namminersulernerullu kingorna Inatsisartut Siulittaasuattut siullertut atuussimanerit innersuussutigalugit nersorniarlutit Nersornaasissallutit. Taakkumi kisimik ilaana naammakkaluarput imminni tunngavigissallugit taamatut nersorniassallutit. Kisianni aamma tamanna ajornannginaarineruallassaaq, nalunngilarami illit inuttut tassaannaanngitsutit inuk ukiorpassuarni naalakkersuinikkut suliaqarsimasoq.
Sumimi aallartissaanga, naalakkersuinermut tunngasut aallartiffigissanngikkukkit? Isumaqarpunga kulturitsinnut, minnerunngitsumillu eqqumiitsuliornermut atuakkiornermullu tunngatillugu suliniarsimanerit aallaavissaqqissuusoq. Isumaqarpunga inuppassuit isumaqatigissagaannga pineqartumi ukiorpassuarni suliniuteqarsimaninnut aamma qujassuteqaruma.
Oqaatsitta inuunitsinnut attuumassutilinni tamani oqaatsitut uumassusilittut atorneqarsinnaasutullu siuarsartuarnissaanik uummammioqarnerit aamma tamatumunnga atatillugu oqaatigineqartariaqarpoq.
Puigorneqassanngilartaaq nunatta eqqumiitsulianik saqqummersitsisarfiata pilersinniarneqarnerani tunniusimallutit peqataasimanerit. Saqqummersitsisarfik eqqumiitsulianik saqqumisitsiffiuginnarani uumassuseqartussatut eqqarsaatigineqartoq, eqqumiitsuliortut avatangiisiminnut akisullutik suliffigalugulu ingerlatsivigisinnaasaat. Isumaqarpunga tamatuma oqaluttuukkaatigut kinaanivinnik eqqarsartaatsinnillu.
Eqqumiitsuliornermik kulturikkullu suliniarnermik pingaartitsillutillu siuarsaaniarnerit imminni aamma tunngavissaalluarsinnaapput, ullumi illit peqatigalutit maaniinnitsinnut pissutaasumik, taamatut nersorniassallutit. Naallu aallarniininni oqaatigigaluariga naalakkersuinermut tunngasut sammivallaarniarnagit, avaqqunneqarsinnaanngilaq ukiut ingerlanerini nunatta naalakkersuinikkut ineriartorneranut suliniarnerit annertullunilu malunnaateqarsimammat. Minnerunngitsumik nunanut allanut tunngasuni, marluulluta pingaartilluinnakkatsinni."
Lars-Emil Johansen
Inatsisartut Siulittaasuat
Paasissutissat sukumiinerusut Inatsisartut Siulittaasuat Lars-Emil Johansen angallattagaq 55 19 15 attaveqarfigalugu pissarsiarineqarsinnaapput.
