2024 2023 2022 Flere år...
30-12-2015
Nuummi ulloq 30. december persuarsiorluni katerisimaarnermi Inatsisartut siulittaasuata Lars-Emil Johansenip Borgmester Asii Chemnitz Narupimut Nersornaat sølviusoq tunniuppaa
Borgmester Asii Chemnitz Narupip ukiuni arlaqalersuni kommunini nunalu tamakkerlugu nunatsinni naalakkersuinikkut ilungersuuteqarsimanerani Inatsisartut Siulittaasoqarfiata nersorinnissutitut Nersornaat sølviusoq tunniuppaa.
Inatsisartut siulittaasua Lars Emil Johansen Asii Chemnitz Narupimut oqalugiaateqarnermini ilaatigut imatut erseqqissaateqarpoq:
"Kommuneqarfik Sermersuumik pilersitsineq imaannaanngitsunik annertuunillu unammisassaqarfiusimavoq. Nunatta sermersua napillugu Nunatta kangiata kitaatalu naalakkersuinikkut ataatsimoorfinngortinneqarnissaat naalakkersuinikkut illit akisussaaffigisimavat. Nalunngilarput naalakkersuinikkut piffissaq nukiillu annertuut atorsimagitit oqaluttuarisaanitta, kulturitta oqaatsittalu assigiinngitsut naligiimmik pineqarnissaat assigiinngisitaarnerullu kommunimi innuttaasunik tamanik nunatsinnillu pisuunnguallatsitsinissaa qularnaarniarlugu.
Aalajaatsumik anguniakkanillu toraagalimmik piumassuseqarnerit saamasumik pissuseqarnippit tunuaniippullusooq. Naalakkersuinikkut anguniakkatit nunarpullu eqqarsaatigalugu takorluukkatit sorsuutigisarpatit. Aamma nalunngilatsigit qinikkatut kulturikkut pikialaartitsinissamik pingaartitsisuusutit - minnerunngitsumik taakku oqallinnermik pilersitsisinnaagangata eqqarsaatissanillu nutaanik tunisigaangata."
Inatsisartut Siulittaasoqarfia sinnerlugu
Lars-Emil Johansen
Inatsisartut Siulitaasuat
Paasisaqarnerorusunnermi Inatsisartut Siulittaasuat Lars-Emil Johansen attavigineqarsinnaavoq, oqarasuaat angallattagaq una sianerfigalugu +299 55 19 15.
