2024 2023 2022 Flere år...
01-12-2022
Inatsisartut Siulittaasuata Kim Kielsenip ulloq 1. december 2022 Svend Christensen kuultiusumik Regina Christensenilu kuultiusunik Nersornaaserpai
Inatsisartut Siulittaasuata Kim Kielsenip ulloq 1. december 2022 Hans Egedep Illuani nalliuttorsiorpalaartumik katerisimaarnermi Svend Christensenip aamma Regina Christensenip kuultiusunik Nersornaaserpai.
Regina Christensen kuultiusumik Nersornaaserneqasrpoq ukiorpassuarni aalisarnermik inuussutissarsiuteqarnermi ilaquttanilu annertuumik tunniusimallutillu atuussimanerannut nersorinnississutitut.
Inatsisartut Siulittaasuata Regina Christensenimut oqaaseqarnermini ilaatigut erseqqissarpai:
”Ilaqutariittut suliffeqarfiutissinni pingaarutilimmi ukiullu ingerlanerini inuppassuarnik suliffissaqartitsisimasumi malunnaatilimmik tunniusimallutillu sulisimanerit pillugu taamatut nersornaaserniarlutit siulittaasoqarfiup aalajangersimavaa.
Suliffeqarfimmik angisuumik kilisaataatileqatigiiffittut ittumik ingerlatsissagaanni ilaqutariittut maattuujusariaqarpoq piginnittutullu tunniusimasariaqarluni.”
Svend Christensen kuultiusumik Nersornaaserneqarpoq aalisarnermik inuussutissarsiuteqarnermi kilisaataatileqatigiiffimmik angisuumik ingerlataqarnikkut annertuumik suliniuteqarsimanera pissutigalugu.
Inatsisartut Siulittaasuata Svend Christensenimut oqaaseqarnermini ilaatigut erseqqissarpai:
”Taamaattumik siulittaasoqarfiup immikkorluinnaq ittumik aalajangersimavaa suliffeqarfimmik ilaqutariittut pigisamik ukiorpassuarni illit nuliavillu ingerlatsisimanerannut inuussutissarsiutinnilu ilaqutariippassuit sulinikkut isertitaqartarsimanerannik qularnaarinnissimanissinnut nersorniarniarlusi.
Taamaalilluni Inatsisartut Siulittaasoqarfiat aalajangersimavoq illit Svend kuultiusumik Nersornaaserniarlutit, aalisarnermik inuussutissarsiuteqarnermi nunatsinnut pingaarutilerujussuarmi nersortarialimmik annertuumik suliaqarsimanerit pissutigalugu.
Aalisarnermik inuussutissarsiuteqarneq nunatta karsiata isertitaqartarneranut tunngaviuvoq pingaarutilerujussuaq, atugarissaarnitta tamatta pingaartitatta qaffasissusianik tamatsinnut qularnaarinniffiusoq.
Aalisarneq aamma inuussutissarsiutaavoq ingerlaavartumik naleqqussartuarnissamut annertuumik piumasaqarfiusoq suliffeqarfinnillu patajaatsunik suliffissanik pitsaasunik qularnaarisinnaasunik piumasaqarfiusoq.”
Siulittaasoqarfik sinnerlugu
Kim Kielsen
Inatsisartut Siulittaasuat
