2024 2023 2022 Flere år...
10-07-2023
Inatsisartut Siulittaasuata tulliata siulliup Kristian Jeremiassenip ulloq 10. juli 2023 Isak Hansen Qeqertarsuarmi sølviusumik nersornaaserpaa.
Inatsisartut Siulittaasuata tulliata siulliup Kristian Jeremiassenip ulloq 10. juli 2023 Qeqertarsuarmi Hotel Disko Islandimi nalliuttorsiorpalaartumik katerisimaarnermi Isak Hansen sølviusumik nersornaaserpaa.
Isak Hansen sølviusumik Nersornaaserneqarpoq ukiorpassuarni sulinermigut najukkami naalakkersuinikkut ingerlatsinermi annertuumik tunniusimanini kiisalu sulisartut inuuniarnikkut atugaasa pitsanngorsarneqarnissaannut oqaaseqartartutut inissisimanini pissutigalugu.
Inatsisartut Siulittaasuata tulliata siulliup Isak Hansenimut oqaaseqarnermini ilaatigut erseqqissarpai:
”Inatsisartut Siulittaasoqarfiata sølviusumik Nersornaaserpaatsit, sivisuumik sulininni illoqarfigisanni Qeqertarsuarmi politikkikkut annertuumik suliaqarsimanerit aammalu sulisartut inuuniarnikkut atugaat pillugit oqaaseqartarnitit pissutigalugit.
Tamanna uppernarsarneqarpoq 2020-imi ukiuni 40-ni pisortani sulisimanerit pillugu dronningip saqqarmiuliuttagaanik tunineqaravit aammalu 2021-imi SIK´p immikkoortortaqarfiani ukiuni 40-ni ilaasortaasimanerit pissutigalugu Ôdâq Olsenip aningaasaaqateqarfianit SIK-mit kajumissaaserneqarputit. Ukiorpassuarni sulisimaninnut aammalu soraarninngoreeraluarlutit sivisungaatsiartumik sulisimaninnut tamanna uppernarsaataavoq.
17-iinnarnik ukioqarlutit raajarniutini inuttatut Qeqertarsuarmullu tunioraallutit sulinerit aallartippat. Ukiuni arlalinni taama inuussutissarsiuteqareerlutit 1970-ikkuni umiarsuaaqqat naalagassaattut ilinniarninni førstegrad angusimavat. Taama ilinniagaqarnerit imaani allanik pissanganartunik suliaqalersippaatit, arlaleriarlutit angallatit Danmarmikimiit nunatsinnukaanneqarnerini peqataasarsimagavit. Tamanna namminermi sapiitsuliorneruvoq.
Qeqertarsuup Kommunerisimasaani kommunalbestyrelsimut 1985-imi aamma ilaasortaasimavutit, 1989-imilu aprilimi kommunimut qinersinermi Inuit Ataqatigiit sinnerlugit borgmesterip tullersortaatut siullertut qinigaallutit. Namminersornerullutik Oqartussat eqqunneqarnerata kingorna kalaallit nunaata oqaluttuarisaanerani nutaaliaasumi ukiut arfinillit ingerlanerini 1983-imi 1989-imilu kommunalbestyrelsimut qinersisarnermi tamanna pisimavoq.
1980-miit soraarninngornissavit tungaanut Qeqertarsuarmi Nukissiorfimmi aamma sulivutit.
Illoqarfigisanni sivisuumik sullissisimaninnut, suliffigisarsimasannut illoqarfimmilu ataatsimoornissamut – politikkikkut suliaqarnikkut pitsaasumik sunniuteqaqataasimaninnut nersorniarneqarnerit uppernarsaataapput.”
Siulittaasoqarfik sinnerlugu
Kristian Jeremiassen
Inatsisartut siulittaasuata tullia siulleq
