Oqaluuserisassani immokkoortoq 57-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Marlunngorneq 4.november 1997 nal. 12.50
Ataatsimiinnermik aqutsisoq: Inatsisartut Siulittaasuata tulliisa aappaat Hans
Enoksen.
Kristine Raahauge, Ataatsimiititaliap siulittaasua, Siumut:
Inatsisartut Peqqinnissamut Ataatsimiititaliaata isumaliutissiissut
saqqummiutissavara:
Inatsisartut Peqqinnissamut Ataatsimiititaliaat ukiakkut ataatsimiinnermi
arlaleriarluni ataatsimiittarpoq. Ataatsimiititaliap oqaluuserisassani imm. 29
Peqqinnissaqarfiup sullissineri il.il. pillugit Inatsisartut peqqussutissaattut
siunnersuut kiisalu oqaluuserisassani imm. 15 Naatsorsueqqissaartarneq pillugu
Inatsisartut inatsisaata allanngortinneqarneranik Inatsisartut inatsisissaattut
siunnersuut oqaluuserai. Isumaliutissiissummi matumani immikkoortut taakku
marluk pineqanngillat.
Tamatuma saniatigut ataatsimiititaliap "Tupamik atuivallaarneq
annertuumik malunnartumillu killilerniarlugu Naalakkersuisut qanoq
iliuuseqalersaarnerat" pillugu Peter Ostermannip apeqquteqaataa kiisalu
qulequttat uku: nalunaarasuaatitigut nakorsiartitsineq, peqqinnissakkut
nakkutilliisoqarfiup siunissami inissisimanissaa aammalu nunap immikkoortuini
napparsimmaveqarfinnik eqiterisinnaaneq oqaluuserai.
Peter Ostermannip apeqquteqaataa "Tupamik atuivallaarneq annertuumik
malunnartumillu killilerniarlugu Naalakkersuisut qanoq
iliuuseqalersaarpat"
Peter Ostermannip apeqquteqaataata suliarinerani ataatsimiititaliaq
Peqqinnissamut Ilisimatusarnermullu Naalakkersuisumut paasissutissanik
piniarsimavoq, taakkunatigut takuneqarsinnaalluni peqqussutip
eqquutsinneqarnera peqqinnissamut oqartussaasunit nakkutigineqarsimanngitsoq.
Takuneqarsinnaavoq tupa avatangiisinillu tupatorfiunngitsunik isumannaarineq,
kiisalu tupamik nioqqutissanik nalunaaqutserneqartarnerat pillugit Inatsisartut
peqqussutissaanni ' 14 naapertorlugu nakkutilliinerup aaqqissuunneqarnissaa pillugu
malittarisassat ilusilersornissaat siunertaralugu Sullissivinnik
Nakkutilliisoqarfik PAARISA-lu aggersarneqalersaartut.
Malittarisassat taakku aalajangersarnissaannut atatillugu
ataatsimiititaliap isumaqatigiissup naalakkersuisunut inassutigaa
"immikkuullaritsitaarluni pujortartarfiit" peqqussummi ' 5,
imm. 3-mi taaneqartut Sullivinnik Nakkutilliisoqarfimmit akuerineqartassasut.
Tamatuma saniatigut ataatsimiititaliap isumaqatigiissup naalakkersuisunut
inassutigaa, inatsisip ' 7-ia allanngortinneqassasoq, tupatorneq pissutsini makkunani inerteqqutaalluinnalersillugu:
a) ini sulisut ataatsimit amerlanerusut sullivigippassuk
b) ini ilaannikkooriarluni sullitanik oqaloqatiginniffiusarpat
c) ataatsimiinnerni.
Nalunaarasuaatitigut nakorsiartitsineq.
Peqqinnissamut Ataatsimiititaliaq Dronning Ingridip
Napparsimmavissuaniippoq nalunaarasuaatit nakorsiartitsinermik paasiniaalluni,
aammalu Peqqinnissamut Ilisimatusarnermullu Naalakkersuisoq
isumasioqatigineqarsimalluni. Peqqinnissamut Ataatsimiititaliaq
Naalakkersuisunut ilaasortamit ilisimatinneqarpoq misileeqqaarnerup
ingerlaanneqarnissaannut aningaasanik immikkoortitsisoqarsimasoq; kisiannili
nalunaarasuaatitigut nakorsiartitsisarnerup annertusineqarsinnaanera
paasissutissiisarnermut teknologi, IT, eqqarsaatigalugu periusissamut
tamarmiusumut ilanngunneqassasoq.
Ataatsimiititaliap isumakuluutigaa teknikkikkut atortulersuutit
iluaqutigalugit paasissutissiisarnernut allanut taamatut ataqatigiissaarinerup
nunatsinni nalunaarasuaatitigut nakorsiartitsisarnerup atorlualernissaanut
periarfissanut kinguarsaataasinnaanera. Taamaattumik ataatsimiititaliap
isumaqatigiissup naalakkersuisunut inassutigissavaa najukkani
pisariaqartitsineq tunngavigalugu nalunaarasuaatitigut nakorsiartitsisarnermik
annertusaajartuaarnissamut aningaasanik pisariaqartunik
immikkoortitsisoqassasoq.
Peqqinnissakkut Nakkutilliisoqarfiup siunissami aaqqissuussaanikkut
inissisimanissaa.
Apeqquteqaat tunngavigalugu Peqqinnissamut Ataatsimiititaliaq
Peqqinnissamut Ilisimatusarnermullu Naalakkersuisumit allakkatigut
paasissutissinneqarpoq Peqqinnissakkut Nakkutilliisooqarfiup siunissami
aaqqissuussaanissaanut pilersaarutit pillugit. Peqqinnissamut
Ataatsimiititaliamut ilisimatitsissummi ilaatigut allassimavoq:
"Peqqinnissakkut Nakkutilliisoqarfiup aaqqissuussaanikkut
aningaasaliissuteqartarnikkullu Peqqinnissamut Ilisimatusarnermullu
Nakkutilliisoqarfiup ataani inissisimanera nalinginnaasumik
aalajangiiniartarnermi ajornartorsiutaasoq ingerlatsinermi akisussaanerup
nakkutilliisutullu oqartussaasut akornanni avissaartitsisimannginneq
pissutigalugu. Taamaattumik Peqqinnissakkut Nakkutilliisoqarfik
eqqarsaatigalugu pissutsinik allannguinissaq pinngitsoorani
kissaatigineqarpoq."
Peqqinnissamut Ataatsimiititaliaq tamatumunnga isumaqataavoq,
taamaattumillu Peqqinnissakkut Nakkutilliisoqarfiup siunissami
aaqqissuussaanikkut nutaamik ilusilersornissaanik ujartuilluni suliaqarneq
tapersersorlugu, taamaasilluni aalajangiisarnermi sulisussarsiortarnermilu
ajornartorsiutit aaqqiivigineqarniassammata.
Nunatsinni peqqinnissaqarfimmik nunap immikkoortuini eqiterineq.
Peqqinnissamut Ataatsimiititaliap Norgep Avannaanut Danmarkimullu
ataatsimiinnerup matuma kinguninngua angalanissaa Inatsisartut
Siulittaasoqarfiata akuersissutigaa. Norgep Avannaani Norgemi
peqqinnissaqarfiup nunap immikkoortuinut eqiterneqarsimanera ataatsimiititaliap
takusassavaa. Angalanissap siunertaraa sumiiffimmi nunatsinnut
assersuunneqarsinnaasumi - nunap sananeqaataatigut, silap pissusaatigut
innuttaasutigullu - nunap immikkoortuani peqqinnissaqarfimmik eqiterisimanerup
qanoq ingerlaneranik ataatsimiititaliap qanimut paasisaqarnissaa nunatsinni
nunap immikkoortuinut eqiterinissamik naalakkersuinikkut aalajangiinissaq
sioqqullugu. Tamatumani pilersaarutit pillugit ataatsimiititaliaq
Peqqinnissamut Ilisimatusarnermullu Naalakkersuisumit
ilisimatinneqartuartarsimavoq, taamatullu aamma nunap immikkoortuini
eqiterinissaq pillugu qanoq isumaqarnerminik Dronning Ingridip
Napparsimmavissuani nakorsaanernit ilisimatinneqarsimalluni. Peqqinnissamut
Ataatsimiititaliaq angalanermini Peqqinnissamut Ilisimatusarnermullu
Pisortaqarfimmi nakorsat suliaat pillugit siunnersortimik ilaqassaaq.
Peqqinnissamut Ataatsimiititaliap Danmarkimiinnermini pulaassavai
Rigshospitali, Napparsimmaviussuaq namminersortoq Hamlet, Vordingborgimi
Amtshospitali Kalaallillu Illuat.
Naggataatigut Peqqinnissamut Ataatsimiititaliaq Peqqinnissamut
Ilisimatusarnermullu Pisortaqarfimmut ataatsimiinnerup nalaani
isumasioqatigiinnermut pissarsivioqisumut qujassuteqarusuppoq,
ataatsimiititaliallu Peqqinnissamut Ilisimatusarnermullu
Naalakkersuisoqarfimmik pitsaasumik suleqateqarnermi ingerlatiinnarneqarnissaa
qilanaaraa.
Ataatsimiititaliami ilaasortaapput: Anders Nilsson (A), siulittaasoq,
Kristine Raahauge (S), siulittaasup tullia, Niels Mátâq (S), Knud Sĝrensen (A)
aamma Amalie Markussen (IA) Maliinannguaq Markussen Mĝlgċrd sinnerlugu
peqataasoq.
Marianne Jensen, Peqqinnissamut
Avatangiisinullu Naalakkersuisoq:
Peqqennissamut Ataatsimiititaliap isumaliutissiissutaanut aammalu
ataatsimiinnerup nalaani pitsaasumik pissarsiffiulluartumillu
suleqatigiinnermut qujallunga apeqqutit ataatsimiititaliap
isumaliutissiissutaani saqqummiunneqartut matumuuna oqaaseqarfigissavakka.
Inatsisartuni ilaasotaq Peter Ostermann tupamik atuiallaarneq
annertuumik malunnartumillu killilerniarlugu naalakkersuisut qanoq
iliuuseqarniarnersut apeqquteqaateqarput. Apeqquteqaammut tamatumunnga
akissutinni takauneqarsinnaavoq Peqqinnissamut Ilisimatusarnermullu
Pisortaqarfik peqqussutip maleruarneqarneranik nakkutilliisimanngitsoq.
Paarisali maanna Sullivinnik Nakkutilliisoqarfimmut saaffiginnissuteqarniartoq
tupa avatangiisinillu tupatofiunngitsunik isummaarineq kiisalu tupanik
nioqqutissat nalunaaqquterneqartarneri pillugit Inatsisartut peqqussutaanni nr.
5-mi 3.november 1994-meersumi ' 14 naapertorlugu nakkutilliinermut malittarisassat
ilusilersorneqarnissaat siunertaralugu. Oqaatigineqassaarli pingaartumik
Sullivinnik Nakkutilliisoqarfik tunngaviusut atuuttut naapertorlugit taama
nakkutilliinissamut peqquneqarsinnaanersoq qularutigineqalersimammat,
taamaattumillu apeqqut taanna misissorneqaqqaartariaqarluni.
Tupa pillugu peqqussutip sukaterneqarnissaa pillugu Inasisartut
Peqqinnissamut Ataatsimiititaliaa naalakkersuisunut arlalinnik
kaammattuuteqarpoq. Kaammattuutigineqarpoq pujortartarfiit
nalunaaqutserluarsimasut Sullivinnik Nakkutilliisoqarfimmit
akuerineqartassasut, aammalu kaammatuutigineqarluni Inatsisartut peqqussutaanni
' 7 sukaterneqassasoq. Kaammatuut siulleq eqqarsaatigalugu peqqussut
naapertorlugu Sullivinnik Nakkutilliisoqarfiup nakkutilliisutut
oqartussaanerani apeqqutipmisissuiffiigneqareernissaa utaqqineqarpoq.
Peqqussumi aalajangersakkaniksukaterinissap ataatsimiititaliap
kaammattuutai eqqarsaatigalugu naalakkersuisut isumaqarput peqqussut atuuttoq
killilersuinermik annertuumik imaqareeraluartoq ukiut pingasut kingulliit
takutissimagaat avatangiisinik tupatorfiunngitsunik isumannaarinnissamut
eqqarsartaaseq ima allanngortigisimasoq peqqussutip sukumiisumik
nalilersoqqinneqarnissaa pissusissamisuulersimalluni. Minnerunngitsumik
meeqqat pukortarfiunngitsunik avatangiiseqartussaatitaanerat pillugu
isumannrinnissaq siunertaralugu.
Nakkutilliinissaq pillugu apeqqutip erseqqissarneqarnissaa
naalakkersuisunit kissaatigineqarpoq tamatumalu kingorna peqqussutip
nutarterneqarnissaanut suliniutit aallartineqassallutik. Pqqinnissamut
Ataatsimiititaliap kaammatuutai siunnersuutip saqqummiunneqartussap piareersarneqarenranut
ilanngunneqassapput.
Nalunaarasuartaatititugt nakorsiartitsisarneq eqqarsaatigalugu
InatsisartutPeqqinnissamut Ataatsimiititaliaa naalakkersuisunut
kaammattuuteqarpoq najukkani pisariaqartitsineq tunngavigalugu
nalunaarasuaatitigut nakorsiartitsisarnerup annertusariartuaarneqarnissaanut
aningaasanik sulisunillu pisariaqarunik immikkoortitsisoqassasoq.
Nalunaarasuaatitigut nakorsiartitsisarnermik annertusaanermi iluaqutissat
periarfissallu nalaakersuisunit eqqumaffigineqarput, taamaattumillu
misiliinerup ingerlatiinnarnissaanut aningaasanik immikkoortitsisoqarsimalluni.
Nalunaarasuaatitigut nakorsiartitsisarnerup
tamakkiisunngortinneqarnissaa inuiaqatigiinnit aningaasaliissutinik annertuunik
pisariaqartitsivoq, taamaattumillu annertusiartuaartitsineq
ataqatigiissaakkamik qulliunerusunillu aqunneqartariaqarluni.Tammaattumik
naalakkersuisut isumaqarput pissusissamisoornerpaassasoq
paasissutissiisarnermut teknologi IT eqqarsaatigalugu ingerlatsinikkut
periusissap ataatsimut aaqqinneqarnissaa utaqqineqarpat, nalunaarasuaatitigut
nakorsiartitsisarnerup annertusarneqarnissaa tassunga ilanngullugu.
Naalakkersuisut nuannaarutigalugu paasivaat Inatsisartut Peqqinnissamut
Ataatsimiititaliaa Pqqinnissakkut Nakkutilliisoqarfiup siunissami
aaqqissuussaanissaanik nutaamik ilusiliiniarluni suliaqarnermut
tapersersuilluni oqaaseqarmat. Naalakkersuisut isumaqarput Pqqinnissakkut
Nkkutilliisoqarfik nunatsinni oqartussaaffigineqartuassasoq, taamaasillunilu
suliassaqarfik naalagaaffimmi oqartussanut utertinneqassanani.
Massakkut ilusiliiniartoqarpoq Peqqinnissakkut Nakkutilliisoqarfiup
danskit Sundhedstyrelseiannit inuttalerneqartarsinnaanera misissorneqarluni.
Aammattaaq Peqqinnissakkut Nakkutilliisoqarfiup aaqqissuussaanikkut aningaaliissuteqartarnikkullu
Peqqinnissamut Naalakkersuisoqarfiup ataani inissisimanerata
allanngortineqarnissaa sulissutigivarput. Naalakkeruisunut pingaaruteqarpoq
Peqqinnissakkut Nakkutilliisoqarfimmi ataavaartumik sulisoqarniarnerup isummannaarnissaa,
aammlu suliassaqarfiup pituttorsimanngissusiata erseqqissarneqarnissaa.
Inatsisartut Peqqinnissamut Ataatsimiititaliaa Norgip avannaanut
Danmarkimullu pasissassarsiorluni angalasussaavoq, ilaatigut Norgip avanaaani
peqqinnissaqarfiup nunap immikkoortuinut eqiterneqarsimaneranik misilittakkat
inernerillu misissuiffigissallugit. Peqqinnissamut Ataatsimiititaliarlu aamma
nunap immikkortuinut eqiterinissaq pillugu pitsaasumik oqaloqatigiittarnissarutqilanaaraara
ataatsimiititaliarlu angalalluarnissaanik kissaallugu.
Naggasiullugu Inatsisartut Peqqinnissamut Ataatsimiititaliaa pitsaasumik
pissarsiffiulluartumillu suleqatigiinnitsinnut qutsavigeqqissavara.
Niels Mátâq, Siumup oqaaseqartua:
Inatsisartut Peqqinnissamik Ataatsimiititaliaanit isumaliutissiissut
Siumumiit imatut oqaaseqarfiginiarparput.
Siullermik Peter Ostermannip apeqquteqaataanut tunngatillugu
Ataatsimiititaliap inassuteqaatai isumaqatigaavut,tassani tupa avatangiisini
tupatorfiinngitsuni isumannaarineq pillugu Inatsisartut peqqussutaanit ersarissaataammata.
Taamaatillunilu tupatorneq ajortunut tupatortartunullu
akornusersuutaanngitsumik aaqqiiniartoqarmat.
Nalunaarasuartaatitigut nakorsiartitsisarneq pillugu misileraanerit
ingerlanneqarnerat pillugu Ataatsimiititaliap Naalakkersuisunut inassuteqaataa
Siumumiit taperserparput. Tassami misileraanerit ingerlanerini atuisut
peqqinnissaqarfimmi sulisut oqariartuuteqarmata sullissaminnik
iluarisimaarneqartoq aammalu imminerminnut toqqissisimanartoq pinartoqartillugu
nakorsamik immikkut ilisimasalimmik attaveqapallattarsinnaasimaneq.
Peqqinnissakkut Naalaakersuisoqarfiup siunissami aaqqissuusaanikkut
inissisimanissaa pillugu Naalakkersuisut pilersaarutaat Ataatsimiititaliami
taperserneqartoq Siumumiit isumaqatigaarput. Tassami siunissami nalinginnaasumik
aaliangiiniartarnermi ajornartorsiutaasinnasut pinngitsoortassammata.
Nunatsinni peqqinnissaqarfimmi nunap immikkoortuini eqititerinissaq
pillugu suliniarnermut atatillugu nalilersuilluarnissaq pillugu
Ataatsimiititaliap ilaatigut paasisassarsiorluni Norgemut angalanissaa
pissusissamisoortoq Siumumiit isigaarput. Siumumit pingaartilluinnarparput peqqinnissaqarfimmi nunap immikkoortuini
eqititerineq aallartitsinnagu atuisut aammalu sullissisussat akornanni
oqallinneqarluartariaqartoq. Pissutsit ullutsinni atugarisavut aammalu
siunissami atugassavut aallaavigalugit. Taamaaliorluni siunissami
peqqinnissakkut sullissisitta patajaattumik tamanut iluarunartumik sulisunit
sulisitsisunillu kajuminnartumik ingerlanneqarnissaa tamatsinnut
naammaginartumik anguneqarsinnaaqqullugu.
Siumumiit taamatut oqaaseqarluta
isumaliutissiissut tusaatissatut tiguarput, Naalakkersuisunullu
inassutigineqartut akuersaarlugit. Naalakkersuisullu akissuteqarnerminni
suleqataarusunnerat nuannaarutigalugu.
Knud Sĝrensen,Atassutip
oqaaseqartua:
Ataassummit
oqaatigissavarput ukiuni makkunani Peqqinnissaqarfiuptunaartaqarluartumik
ingerlanissaanik atorfissaqartitsilluartuni Peqqinnissamut Ataatsimiititaliap
aalaniataarluarlini sulinera
iluarilluinnaratsigu. Pingaartumik Peqqinnissaqarfimmut tunngasut nunap
immikkortuinut eqiterniarnerannik siunertaqarluni sulinerup nalaani
Ataatsimiititaliap ataavartumik suleqataallunilu ilisimatinneqartarnissaa
piareersaanermilu ilaatinneqarnissaa saneqqunneqarsinnaanngitsutut isigaarput,
suliassarmi Inatsisartunit malittareqqissaarneqartariaqarpoq.
Atassummit Inatsisartunut
ilaasortap Peter Ostermannip oqaluuserisassanngortitsinerani Ataatsimiititaliap
Naalakkersuisunut inassuteqaatai tamakkiisumik taperserpavut. Aap, tupa peqqinnanngivippoq
toqunartoqarpoq aammalu ulorianarpoq. Atassutip iluani nalunaarasuaatitigut
nakorsiartitsisarneq annertuumik eqqartortarparput, siunissamilu
nakorsiartitsisarnemi pingaartumik nunaqarfinni avinngarusimasunilu
sakkussaalluartutut nalilertarlutigu. Atamiaasiit angerlarsimaffimmiit
nalunaarasuaat atorlugu nakorsiarsinnaaneq aamma qanilleriillarunnarsivoq.
Taamaattumik Atassummiit
Ataatsimiititaliap pineqartoq pillugu isummiussai inassuteqaataalu
taperserpavut. Atassummiit oqaatigissavarput Ataatsimiititaliap
Peqqinnissaqarfimmut tunngasumik allanik oqaluuserinnissimanera
siunertaqarluartumillu ajornartorsiutinik aaqqiiniarnermik tunngaveqartumik
isummersorsimanera tapersersorluinnaratsigit. Atassummiit pinngitsoorumanngilagut
Peqqinnissamut Naalakkersuisoq akissutaanut minnerunngitsumillu
ajornartorsiutit qaangerniarlugit inussiarnersumik pissuseqarluni
peqataajuarneranik qutsavigissallutigu.
Atassummiit isumaliutissiissut tusaatissatut tiguarput.
Amalie Markussen, Inuit Ataqatigiit oqaaseqartuat:
Peqqinnissaqarfimmut
Ataatsimiititaliap isumaliutissiissutaa Inuit Ataqatigiit-niit ima
oqaaseqarfigissavarput. Peter Ostermanni apeqquteqaateqarsimavoq
Naalakkersuisut qanoq ilillutik tupamik atuiavallaarnerujussuaq
killilersimaarniarneraat. Ataatsimiititaliap taassuminnga eqqartuinerminni
Sullivinnut nakkutillivik eqqartorsimavaa paasinartumillu apeqquserneqarluni
sullivinnut nakkutilliisup ilumut suliassarineraa. Nalunaaqutsersuisinnaanermut
tunngatillugu Inuit Ataqatigiit-niit isumaqarpugut Naalakkersuisut
ilisarnaasiortariaqartut tupatorfioqqusaanngitsuni ilisarnaatissanik
peqqussutip tamakkiisumik atuutsinniarneranut atatillugu, taamaalilluni
annikikkaluamik aallartiffiusinnaavoq naqissuserneqassammammi init
tupatorfigeqqusaanngitsut ataqqineqarnissaat.
Ungasissumut nakorsiarsinnaanermut nalunaarasuaatitigullu
atortulersuinikkut piorsaanermut atatillugu Ataatsimiititaliap
tupatorfigeqqusaanngitsut ataqqineqarnissaat soorunalumi peqqussatip
atuutsinniarneranut paasititsiniaanerit ingerlaavarnissaat pisaraqarput.
Ungasissumut nakorsiarsinnaanermut nalunaarasuaatitigullu atotulersuinikkut
piorsaanermut atatillugu Ataatsimiititaliap ianssuteqaataanut isumaqataavugut, unalu Inuit
Ataqatigiit-niit eqqumaffigineqartuartussaq oqaatigeqqissagatsigu. Tassa
nakorsiarnerinnarmut atorneqaratik aamma allanut atorneqartarnissaat
isumannaattariaqarmat, soorlu ingasissumiit pikkorissartitsinerit. Maannakumi
Qeqertarsuatsianiittoq eqqarsaatigiinnarlugu aamma ingasissumut
atuartitsinermut atorluarneqarsinnaammat, tamannalu Inuit Ataqatigiit
kaammattuutigaat.
Peqqinnissaqarnikkut nakkutillisoqarfiup sumut atanissaa aamma
Ataatsimiititaliap eqqartorsimavaa. Maannakkummi toqqissisimananngitsumik
inissisimanera ilumoormat. Inuit Ataqatigiit-niit isumaqarpugut nunatta
nammineq Peqqinnissakkut nakkutillisoqarneq isumagisariaqaraa, taamaammat Inuit
Ataqatigiit-niit siunersuutigissavarput Inatsisartut Allattoqarfiannut
inissinneqassasoq taamaalilluni ombudsmandip aaqqissuusaaneratut
inissinneqarsinnaalluni. Inuit Ataqatigiit-niit malinaaffigiuarparput
Peqqinnissaqarfiup maannakkut ingerlanera. Maannamummi
toqqissisimananngitsumik inissisimaleriartuinnarpugut, sulisunik
ilinniarsimasunik atorfinitsitsiniartarneq ajornartorsiutinngorsimammat.
Taamaammat pisariaqarluinnarpoq Peqqinissaqarfiup ineriartortittuarnissaa,
ingammik aaqqissuusaanikkut.
Maannamummi nassuerutigisariaqalerparput Peqqinissaqarfikkut taamatut
aaqqissuusineq ingerlatiinnassagutsigu siunissami suli soorlu nakorsanik
pissarsiniarneq ajornarsilluinnartussaammat. Inuit Ataqatigiit-niit
nuannaarutigaarput Peqqinnissaqarfimmut Ataatsimiititaliap nutaamik
aaqqissuussinissaminik ujartuerusulluni Norgip avannaanut angalaarniarmat.
Qanittukkulli aviisini atuarneqarsinnaavoq nakorsap allagaani Norgimi
illoqarfik 150.000 innutalimmut immikkut paasisimasalimmik nakorsamik
pissarsiniarnerat allaat ajornakusoortorujussuusoq, taamaattumillu
taartaagaallartunik atuineq annertoorujussuulluni. Inuit Ataqatigiit
neriuutigaarput Peqqinnissaqarfimmut Ataatsimiititaliap angalaarnermini
paasiumaaraat Norgimi suut kukkussutaasimasut.
Taamatut Inuit Ataqatigiit-niit oqaaseqarluta Peqqinnissaqarfimmi Ataatsimiititaliap
isumaliutissiissutaani innersuussutigineqartut tapersersorpavut,
angalalluarnissaanullu kissaallugit.
Bjarne Kreutzmann, Akulliit Partiiat:
Inatsisartut Peqqinnissamut Ataatsimiititaliaata isumaliutissiissutaa
soqutigalugu misissuataarsimavara. Tupamik atuivallaarneq annertuumik
malunnartumillu killilerniarlugu Naalakkersuisoq qanoq iliuuseqasaaamaarnersut
Peter Ostermannip apeqqutaanut tunngatillugu, Akulliit Partiianniit
Ataatsimiititaliap inassutaannut isumaqataavunga, tassa inatsisip '-ata
arfineq aappaa allanngortinneqassasoq. Taamaalilluni tupatorneq piffinni
sumiiffinni makkunani inerteqqutaalluinnalissalluni, tassa ini sulisut
ataatsimik amerlanerusut sullivigippassuk init ilaannikkooriarluni sullitanik
oqaloqatiginnittarfiuppat aammalu ataastimiinnerni.
Nalunaarasuaatitigut nakorsiartitsinermut atatillugu Ataatsimiititaliap
Naalakkersuisunut inassutigisaata Akulliit Partiiata tapersersorpaa. Tassa
inassutigisaa Akulliit Partiiata tapersersorpaa, tassa najukkani pisariaqartitsineq
tunngavigalugu nalunaarasuaatitigut nakorsiartitsisarnermi
annertusaajartuaarnissamut aningaasanik pisariaqartunik
immikkoortitsisoqassasoq.
Peqqinnissakkut nakkutilliisoqarfiup siunissami aaqqissuusaanikkut
inissisimanissaa pillugu Akulliit Partiiat isumaqarpoq Peqqinnissakkut
nakkutilliisoqarfik eqqarsaatigalugu pissutsinik allaannguinissaq pisaraqartoq,
taamaatumillu aaliangiisarnerni sulisussarsiortarnernilu ajornartorsiutit
aaqqivigineqarnissaat anguniarlugu Peqqinnissaakut nakkutilliisoqarfiup
siunissami aaqqissuussaanikkut nataamik ilusilersorneqarnissaanik ujartuilluni
suliamik Ataatsimiititaliap tapersersuinera aammattaaq taperserpara.
Nunatsinni Peqqinnissaqarfiup immikkoortortaqarfinnut agguataarnera pillugu
Akulliit Partiiat isumaqarpoq isumassarsiatsialaasoq Peqqinnissamut
Ataatsimiititaliaq Inatsisartut Siulittaasoqarfiannut akuerineqarsiamammat
Norgip avannaanut paasisasarsiorluni angalanissaminut, tassami Norgip avannaani
pissutsit nunatsinnut pissutsinut assingummata.
Isumaliutissiissut taama oqaaseqarfigalugu tusaatissatut tiguara,
akueralugulu.
Anthon Frederiksen, Kattusseqatigiit:
Inatsisartut Peqqinnissamut Ataatsimiititaliaata isumaliutissiissummini
Naalakkersuisunut inassuteqaatai aammalu Naalaakersuisup akissuteqarnermini
suliniutit assigiinngitsut pilersaarutai Kattusseqatigiinniit tamakkiisumik
akuersaarpakka. Soorunami tusarlugu ajuusaarnarpoq tupamik atuinermut
tunngatillugu peqqussutip Peqqinnissamut Ilisimatusarnemullu Pisortaqarfimmiit
malinnavigineqarsimannginnera. Tamatuma ersiutigeqqiinnarpaa Peqqinnissaqarfiup
iluani ukiuni kingullerni ajornartorsiutit annerstuut atuummata. Kisiannili
ajornartorsiutit matumani pineqartup qaangerneqarnissaa anguniarlugu suliniutit
aallarnisarneqarnerat naammagisimaaginnarallartariaqartutut
oqaatigisariaqarlutik.
Inatsisartunut ilaasortap Peter Ostermannip apeqquteqaataanut tunngatillugu
isumaqarpunga Naalakkersuisut pinaveersaartitsinermik suliaqarneq suli
annerusumik aalluttariaqaraat.
Atortorissaarutit atorlugit ungasissumiit nakorsiartitsisarnermut
tinngatillugu ilaatigut nunatsinni misilittagaalereersut isumalluarnartut
taamaattumik Peqqinnissamut Ataatsimiititaliap Norgip avannaanut
paasisassarsiorluni angalanissaat, tamannalu iluatsillugu Danmarkimi Rigshospitalimut,
Hamlet-mut Vordingborgimilu Amtshospitalimut kiisalu Kalaallit Illuannut
paasisassarsiornissaat ilalertariaqarpoq. Tassami aamma nunaqqatitta
Danmarkimi peqqissartut ilaatigut annertuumik inuuniarnikkut ineqarnikkut
assigiinngitsutigullu ajornartorsiuteqartarnerat Naalakkersuinikkut
suliaqartunik sukumiisumik paasineqarnissaat pisariaqarmat. Taamaattumik
Kattusseqatigiinniit kaammaatuutigissavara angalaqatigiit ajornanngippat,
ajornartariaqanngilarmi, kalaallit Danmarkimi peqqissartut atugarisaasa
tusarniaaffigineqarnissaat sapinngisamik sukumiisumik ingerlateqqullugu.
Taamatut oqaaseqarlunga isumaliutissiissut Naalakkersuisullu akissuteqaataa
akuersaarlugu tusaatissatut tiguakka.
Marianne Jensen, Peqqinnissamut Avatangiisinut Ilisimatusarnermullu
Naalakkersuisoq:
Tassa soorlu aamma malugineqarsinnaasoq Peqqinnissamut Ataatsimiititaliaq
annertuumik sulisimavoq aammalu
sukumiisumik sulisimalluni, taamaattumik aamma tupinnarpallaanngilaq uani taama
isumaqatigiitigisoqarmat aammalu Naalakkersuisut Ataatsimiititaliallu akornanni
aamma isumaqatigiinneq annertooq pilluni. Taamaattoq oqaaseqaqqilaarusuppunga.
Siullermik pujortartarnermut tunngatillugu eqqaasitsissutigissavara tassa nunatsinni
inersimasut 80%-ii misissuisimaneri kingulliit tunngavigalugit pujortartuummata, taamaattumillu nunanut
allanut aamma naleqqiullugu nunatsinni pujortarneq annertoorujorujussuulluni.
Tamatuma kingunerisaanik ukiuni makkunani ilaatigut kingunipiluit takkuttartut
malunnarsiartuaarput, ersarissiartuaarput, tassanilu ilaatigut aamma
eqqarsaatigalugu ajoraluartumik puakkut krĉfteqartarnerit
naliginnaaleriartortut ilaatigut erseqqarissiaruinnarluni. Taamaattumik
pisariaqarluinnarpoq pujortarpallaarneq annikillisarniarlugu
suliuteqarnerunissaq, tamakkualumi massakkut aallarnisaleruttorput, neriuppugut
tamatumani suliaqarnermi aamma Paarisa kisiat isumalluutiginagu kisianni aamma
suleqataasinnaasut allat, atuarfiit allallu tassani aamma suleqataalluarumaartut.
Oqarasuaat atorlugu nakorsiartitsisarsinnaaneq eqqarsaatigalugu ilumoorpoq
misilittakkat pitsasuupput, aammalu taamaammat aappaagumut
ingerlatinnarsinnaaqqullugit Aningaasanut Inatsimmi ippassaaninnguaq
akuersissutigisatsinni aamma tamatuma ingerlaanneqqinnissaa
aningaasaliiffigineqarpoq. Inatsisartunut tamanna aamma qujassutigissavara,
tassami ukioq manna ilanngullugu peqqinnissaqarfimmut annertunerusumik
aningaasartuutaasumik tamanna ingerlanneqanngilaq, tassa misiliutaasumik Tele
suleqatigalugu tamanna allanik aningaasalersornerulluni ingerlanneqarmat.
kisianni massakkut aappaaguminngaaniit Inatsisartut aningaasalersugaannik
aatsaat ingerlatsisoqalissooq, aammalu tamatuma annertusiartuaarnissaata
1998-ip ingerlanerani oqallisiginissaa qularnanngitsumik piumaarpoq.
Peqqinnissamik Nakkutilliisoqarfiup inissisimanissaa aammalu
sulisoqarnikkut siunissami eqqanaarinninnissaq, tassunga tunngatillugu suliutit
massakkut ingerlasut neriuppunga ukioq manna naatinnagu inissaminnut inissikkumaartut.
Nunap immikkoortuinut eqiterineq Peqqinnissaqarfiup aaqqissugaaneranut
tunngatillugu Siumuminngaaniit kaammattuutigimeqarpoq aammalumi
Ataatsimiititaliaminngaaniit kaammattuutigineqarpoq sulisut atuisullu
akornanni oqallilluartoqartariaqartoq tamakkiisumik aaqqisoqannginnerani.
Aammalu Inuit Ataqatigiit-ninngaaniit tikkuarneqarluni taamatut siunnerfeqarneq
siunissami pinngitsoorneqarsinnaassanngitsoq, tassami aamma nakorsanik
pissarsianiarneq taamaaliortoqanngippat ajornartorsiutaajartuinnartussaammat,
nakorsaanaanngitsunimmi aamma Peqqinnissaqarfimmi sulisoqarneq ataatsimut
isigalugu. Tamanna Naalakkersuisunut isumaqatigilluinnarparput, taamaattumillu
suliniutip tamatuma pitsaasumik sukumiisumillu ingerlannissaa
kissaatigeqaarput, kisiannili aamma soorunami kinguarsaataanngitsumik aamma
ingerlannissa pingaartorujussuulluni.
Taamaattumik ilisimatitsissutigissavara massakkut novemberip qeqqata
missaani Diskobugtimut angalaassagama tamannarpiaq pillugu illoqarfiit tamaasa
tikissallugit. Tassani aallaavigivara qanittukkut Peqqinnissaqarfimmi aqutsisut
maani ukiumoortumik ataatsimiisinneqarnerminni inassutigivaat taamatut
region-ikkaartumik eqititerineq nunarput tamakkerlugu ilusilinnginnerani
misiliutaasumik region-imik ataatimi aallartitsisoqaqqullugu, tassanilu
inassutigineqarpoq Disko-bugti taamatut aappaagu sapinngisamik piaartumik
misiliiffigineqassasoq. Tamanna aallavigalugu novemberip qeqqata missaani
Disko-bugtimi angalaassaanga, tassilu aamma uani ilaatigut oqaatigineqartut
sulisut oqaloqatigissavakka, kommunalbestyrelsit oqalaloqatigissavakka aammalu
tassa neriussaanga taamaalilluni sumiiffinni, ataasiakkaani najugaqarfinni
ataasiakkaani innuttaasut aamma oqallinnermut tassani peqataanissamut annertunerusumik aqqutsiiuunneqarumaartut.
Neriuppunga angalanerup kingorna erseqqarinnerulerumaartoq qanoq
ingerlariaqqissinnaassanersugut. Disko-bugtimut angalanissannut tassani aamma
ilaatigut peqqutaavoq naluneqanngitsutuut aammalu arlaleriarluni maani
oqallinnermi taaneqareersutuut soorlu Qeqertarsuarmi napparsimavik
nutarterneqartariaqarluinnalersimavoq aammalu Qasigiannguani minnerunngitsumik
pisariaqartitsisoqarpoq aammalu Aasianni napparsivik qanganisaq aamma taanna
qanoq iliuuseqarfigisaqarluinnalerluni. Taamaattumik aamma tamakku ilaatigut
pissutigalugit sapinngisamik piaartumik siunnerfeqartariaqarpugut qanoq
ingerlariaqqissanerluta sanaartugassat qanoq iluseqarnissaat aamma
isummerfivinginnerini.
Naggataatigut aamma oqaatigilaarusuppara pujortartarnermut tunngatillugu
Anthon Frederiksen -p oqaatigisaa peqqinnissaqarfimminngaanniit peqqussut
malinnavigineqarsimanngitsoq, taanna iluumuuvissunngilaq, soorunalimi
peqqussutip ingerlanneqarnera aamma qanoq malinneqarneramalinnavigineqarpoq
unaana ajornartorsiutaasoq nakkutilliinermut tunngasortaa taannalu massakkut
misissuiffigineqarpoq aammalu sapinngisamik piaartumik taassuma erseqqissumik
qanorlu ingerlanneqarsinnaaneranik aaqqiinissaq naalakkersuisuni
siunertaraarput.
Naggataarutigalugu Peqqinnissamut Ataatsimiititaliaq qutsavigeqqissavara
ajornartorsiutit ilaatigut ilungersunartut pillugit ammasumik isertuaatsumillu
oqallittarnigut pillugit aammalu namminneq akunnerminni sukumiisumik apeqqutit
peqqinnissaqarfimmut tunngasut soqutigalugit sukumiisumik suliarisarmagat.
Taamaalillunga oqaaseqartunut qujavunga aammalu immikkut soorunalimi aamma
Atassutip oqaluttua qutsaivigalugu immikkut uanga erseqqissumik
qutsavigimmanga.
Kristine Raahauge, Ataatsimiititaliap siulittaasua, Siumut:
Ataatsimiititaliap isumaliutissiissutaanut oqaaseqartunut tamanut qujavunga
IA-llu oqaaseqartuata peqqinnissaqarfimmi ajornartorsiutinut eqqaammagit
sulisussaqarniarneq taanna oqaaseqarfigilaarniarlugu. Tassa ilumoorpoq
peqqinnissaqarfimmi ajornartorsiuteqarpoq annertuullunilu, tassami
sullissisussatsinnik amigaateqaratta. Ataatsimiititaliamiillu taakku
malinnaaffigilluinnarparput, tassa nakorsat, juumuut, kigutilerisut,
kigutigissaasut, juumuussat allallu amigaatigineqartut qanoq amerlatigisut
ilisimmaarivagut, taavalu aamma nalunngilarput taakku sulisut namminneq
peqqinnissqarfimmilu naalakkersuisoqarfik suleqatigiillutik aamma annertuumik
sulisunik maani uningaannartitsinissamut taavalu aamma sulisunik
tikisitsisarnissamut tunngatillugusuliniuteqartut, allaat qanga maani sulisarsimasut
nunani allani najugaqalereersut ikiortuliullugit suliniuteqarput. Neriuppugut
pitsannguallassasoq, oqarsinnaavugullu peqqissaasut tungaatigut ajunngilaq,
tassa appariartunngilaq kisiannilu soorunami nikerartuartarami oqarneq
ajornartaqaaq. Massakkorpiaq kisitsisit isigigaanni pitsanngoriartutut
isikkoqaraluarlutik, kisianni qanoq neriulluartiginissarput naluarput..
Tassani aamma ilaatigut sulisut oqaloqatigisarneranni eqqaajuartarpaat
Norgimi Danmarkimilu aamma tamakkuninnga sulisunik amigaateqartillugu assut
Kalaalliit Nunarput unammillernissaminut aporfeqartoq, tassa
aningaasarsiatigut ammalu ulluinnarni atugarisamikkut ilaqqutamillu
suliffissaqarnissaannut tunngatillugit periarfissat killeqartarmata.
Taavalu Anthon Frederiksen -ip oqariartuutaanut ataatisimiititaliap
angalanissaannut kalaallit Danmarkimi
peqqissartut atugarisaanut tunngatillugu tusarniaanissaq, soorunami
aamma angalanissaap taanna
siunertarimmagu tamanna naammassiniarneqassaaq. Qujanaq.
Hans Enoksen, Ataatsimiinnermik aqutsisoq:
Taamaalilluni immikkoortoq 57, Peqqinnissamut Ataatsimiititaliap
isumaliutissiissutaa naammassivoq.
Oqaluuserisaq naammassivoq.