Pingasungornermi apeqquteqaatit |
|
||
Siullermeerneqarnera | Aappassaanneerneqarnera | Pingajussaaneerneqarnera |
Pingasunngorneq 29. oktober 1997 nal. 19.03.
Ataatsimiinnermik aqutsisoq: Inatsisartut Siulittaasuata tullia siulleq, Finn Karlsen.
Anthon Frederiksen, apeqquteqartoq:
Sinerissami KGH-p kingornalu KNI-p illutitoqai ilaatigut atorneeruttut, soorlu allaffiusimasut, pisiniarfiusimasut, quersuit allallu suli ilaatigut atorneqartut, sinerissami namminersorlutik ingerlataqalerusuttunut tunniunneqarsinnaaneri imaluunniit akikitsunnguamik akilersillugit pisiarineqarsinnaaneri qanoq periarfissaqartinneqarpat?
Assersuutigalugu ilaat takornariartitsinermi suliniuteqarnermut atorneqarsinnaapput. Ilaat qalulerinermut allarpassuarnullu. Kisiannili paasisakka malillugit inuit tamakkununnga soqutiginnikkaluartut annertuumik akimmisaartinneqartarsimapput. Taamaattumik illutoqqanut tunngatillugu aamma namminersortunik periarfissiiniarnermut tunngatillugu periarfissat qanoq ittuuneri apeqquteqaatigaakka.
Taava apeqquteqaatip aappa:
Tupaallaatigeqisannik Nuummi arfanniartartut Inatsisartunut ilaasortanut allakkatigut saaffiginnissuteqarput, tassa Nuummi Royal Greenland-ip immikkoortortaanut arfernik angisuunik nioqquteqartarnerup aaqqissuunneqarnera kusanaaqisup, aaqqissuteqqinneqartariaqarneranut tunngasunik allagaq Inatsisartunut ilaasortanut tamanut agguaanneqareersimammat annerusumik iserfiginagu Naalakkersuisunut imatut apeqquteqarniarpunga:
Suliffeqarfissuaq inuiaqatigiinnit pigineqartoq inunnik immikkoortitsilluni, inuillu akiligassaqarnerat kisiat tunngavigalugu, kalaaliminernik nioqqutissiornermi inuit aalajangersimasut kisimik tunisisinnanerat Naalakkersuisunit akuerineqarsinnaava?
Aamma taamatut periuseqarneq sumik tunngaveqarpa?
Daniel Skifte, Aningaasaqarnermut Ineqarnermullu Naalakkersuisoq:
Matumuuna Inatsisartunut ilaasortaq, Anthon Frederiksen, qutsavigissavara KNI-p illuutaasa tunineqarsinnaanerat, taamalu allatut atorneqarsinnaanerat pillugu apeqquteqarmat.
Oqaatigisinnaavara tamanna ajornarsiuteqarfiummat. KNI-mi ingerlatseqatigiiffiit siulersuisuisa imaluunniit ingerlatseqatigiiffinni pisortat, aktie-teqarluni ingerlatseqatigiiffiit pillugit inatsit naapertorlugu apeqqut isummerfigisussaavaat.
Naluneqanngitsutut KNI-p immikkoortortai tamarmik, soorlu KNI Pilersuisoq A/S, KNI Pisiffik A/S aamma KNI Umiarsuaatileqatigiiffik A/S, aktie-teqarluni ingerlatsiqatigiiffiupput. Illuutit aktie-tigut aningaassaliissutinut ilaapput, aktie-tigullu aningaasaatit atorneqarnissaat ingerlatseqatigiiffiit susassaqarfigaat, taakkua atorunnaarsinneqanngippata.
KNI Pilersuisoq A/S-ip sanaartornermik immikkoortortaqarfia inussiarnersumik uagutsinnut nalunaaruteqarpoq, ukiut kingulliit ingerlanerini illuutit 50-it tunineqarsimasut. Taakkunannga 20-t missaat Tele Greenland-ip allakkerisoqarfianinngaanniit tigusinermut atasumik. Illuutit 30-t allat, pingaartumik ingerlatseqatigiiffinnut aammattaaq Namminersornerullutik Oqartussanit pigineqartunut, kiisalu illuutit eriagisassat kommuninut tunniunneqartarsimapput.
Anthon Frederiksen, apeqquteqartoq:
Akissuteqaammut erseqqissumut qujavunga, tassa imatut paasisariaqarpoq, aktie-selskab-eqarnermi inatsit tunngavigalugu Naalakkersuinikkut taanna qanoq iliuuseqarfigineqarsinnaangilaq.
Paaviaaraq Heilmann, Aalisarnermut, Piniarnermut Nunalerinermullu Naalakkersuisoq:
Inatsisartunut ilaasortaq Anthon Frederiksen apeqquteqarpoq Naalakkersuisut akuerisinnaaneraat Royal Greenland-ip piniartunik aalajangersimasuinnarnik arferit anginerit neqaanik tunisisin-naatitsinera.
Apeqqut Nuummi arfanniartartut allakkanik saaffiginnissutaannut tunngaveqarpoq. Tassani aperineqarmat ilumut Royal Greenland-imut akiligassallit kisimik arferup neqaanik tunisisinnaatitaasut.
Pisortaqarfiup paasissutissat apeqqummut tassunga tunngasut Royal Greenland-imut paasiniarsimavai. Tassanngaanniit oqaatigineqarpoq Royal Greenland Seafood-imut tunisineq sunaluunniit Royal Greenland-imut akiitsoqarnermit aalajangerneqarneq ajortoq. Royal Greenland-ip ukiumut tikaagulliusaat neqaannik nioqqutissiat 50 tons-it missaat nunatsinni tunisarpai.
Nioqqutissat ineriartortinnerisigut kaaviiaartitat ukiuni kingullerni amerliartorusaaginnarsimapput. Maannakkut pisariaqartitsineq arferit killilimmik amerlassusillit matusinnaavaat. Taamaattumik tikaagulliusaat neqaannik killeqanngitsumik tunisisarnissaq ilimagineqarsinnaanngilaq.
Tunisisarneq
nioqqutissiornerlu pitsaanerulersinniarlugit, soorlu nioqqutissiat assigiiaat,
pitsaasut akikitsullu qularnaarumallugit arferit neqaannik tunisisarneq Nuummut
inissinneqarsimavoq. Tassani neqerpassuit ataatsikkut suliarineqarsinnaapput,
taamaattumik Nuummi tunisisarneq, pingaartumik piniartunut ataasiakkaanut,
arferit ilivitsuusunik tunisisarnissamik isumaqatigiissuteqarnermik
tunngaveqartinneqarpoq. Pitsaassuseq pitsaanerpaaq qularnaarniarlugu isumaqatigiissutit
taakku piniartunut siornatigut pitsaasunik tunisaqarsinnaasutut
takutitsisimasut isumaqatigiissutaapput. Arferit neqaanik tunisaqartartut
ilaat arlaqanngitsut akiitsoqarput, amerlasuullu akiitsoqaratik. 1996-imi tunisisartunit aqqaniliusunit
marluk Royal Greenland-imut taarsigassarsiaqarput. Taamaattumik
tunisassiassanik isumaqatigiissuteqarnermut tunngaviusoq tassaaginnarpoq
nioqqutissianik pitsaasunik tunisaqarsinnaaneq. Tamanna eqqarsaatigalugu
suliffeqarfik pisisartullu nioqqutissiat sapinngisamik pitsaanerpaanissaannik
soqutigisaqarpoq.
Akissutikkut tassuuna neriuppunga
apeqquteqaat erseqqissumik akillugu.
Anthon Frederiksen, apeqquteqartoq:
Akissuteqaat assorsuaq
soqutiginarpoq, aammalu ilaatigut akissuteqaammi isumaqatigiissuteqartarsimanermut
tunngasutigut paasinarpoq neqinik tunisisinnaagaluartut ilaat tassuunakkut
allaat mattunneqartarsimasut, taamaattumik suliassap arlaatigut
ingerlateqqinissaa oqaluuserineqarsinnaanera qanoq iliuuseqartoqarumaartoq.
Tassami isumaqatigiissinnaaneq
taanna imminermi ajoquteqanngilaq, kisianni isumaqarpunga aalisartut
piniartulluunniit arlaatigut mattunneqarsinnaaneri taamatut Royal
Greenland-imiit akuersaaruminaatsoq.
Finn Karlsen, ataatsimiinnermik aqutsisoq:
Taava maannakkut apeqquteqaatit pingajuat:
Inatsisartunut ilaasortaq Ruth Heilmann
eqqagassat suujunnaartinneqartarnerannut tunngatillugu apeqquteqaateqarpoq.
Ruth Heilmann, apeqquteqartoq:
Savimerngit eqqagassallu allat
arrortikkuminaatsut ataatsimut eqqaaveqarfeqalernissaannik
siunnersuuteqarsimavunga.
Tamatta anersaaraarput mingutsitsinersuaq
unitseqqullugu, qanorlu iliorpugut aammalu sumut killippugut?
Kommunit tamatta kissaatigaarput,
ikuallaavittaarnissarput, tamannalu pissusissamisoorluinnarpoq. Tassami
nunatsinni eqqagassat issittumiinnerput, nunattalu silaannata panernera
pissutigalugu, sivisuumik allanngoratik piusarput. Taamaattumillu
ikuallaaveqarnissarput pisariaqartittorujussuullugu.
Kommunillu tamarmik piaartumik
aaqqiivigineqarnissartik pisariaqarluinnarpaat. Maannakkut ikuallaaveqareersut
nunaqarfinni ajornartorsiutigaat, aamma kalaalimernit eqqakkat orsukut, neqikut
asiunikullu equallakkuminaannerujussui. Savimernit igitat, biilikut
assigisaallu aamma illoqarfimmissaaq ajornartorsiortitsipput. Sumi
tamaaniittoqarpoq illoqarfimmik pinnersaataangeqisunik.
Eqqaaneqanngitsoorneqarsinnaanngillallu aamma nappartakorsuit, uuliat puukorsui
sinerissami sumi tamaaniittut kusassaataanngivillutik.
Siusinnerusukkut umiarsuaq tamakkuninnga
katersisussaq eqqartugaasarpoq. Taanna aaqqiiniut sumummita killippa?
Eqqagassalerineq eqqagassanillu
eqqaatsumik aaqqissuussinissaq pisariaqarluinnarmat, neriuppunga
siunnersuutigisara ilalerluarneqarumaartoq. Eqqagassat uninngaannalernikut
katersorneqarnissaannik isummat piviusunngortittariaqarmata.
Taamatut uanga aamma
kaammattuuteqarnera Inatsisartoqatinnut Naalakkersuisunullu ingerlatippara,
neriullunga piviusunngortoqarnissaa anguneqassasoq.
Marianne Jensen, Naalakersuisunut ilaasortaq:
Siullermik Inatsisartunut ilaasortap
Ruth Heilmann-ip siunnersuutaa pillugu qujassuteqassaanga. Eqqakkanut
tunngasutigut avatangiisiitigut eqqortumik ingerlatseriaaseqarnissatta
sulissutigiuarnissaata pingaaruteqarluinnarneranik partiit amerlasoorpassuariarlutik,
maani Inatsisartut ataatsimiinneranni oqariartuuteqartarnerat Naalakkersuisut
nuannaarutigaat.
Fru Heilmann-ip
saafiginnissuteqarneratigut siunissami Kalaallit-Nunaanni illoqarfiinni eqqagassalerineq
pillugu ilioriusissanik pilersaarutip, kingullermik ukiakkut ataatsimiinnermi
Inatsisartut akuerisaata, piviusunngortinneqarnerata nassuiarnissaanut aamma
periarfissaqalerpunga.
Iliuusissatut pilersaarutit
inernerat Inatsisartut ilisimavaat. Tassa Qaqortumi eqqakkanut ikuallaaviup
pilersinneqalernera.
Ruth Heilmann-ip siunnersuutigaa
atortukunut kigaatsumik nungukkiartortartunut eqqaavissualiortoqassasoq,
immaqalu eqqakkat taakku sinerissami sumiiffippassuarni ittut, umiarsuarmik
katersorneqartarlutik. Savimminikut suujunnaarsinneqartarnerannik suliassaq
kommunini eqqakkanut tigooraaveqalernissaanik Naalakkersuisut
suliniutigilersimasaannut ingerlatsiveqarfimma KANUKOKA qanittumik
suleqatigalugu ingerlataanut atatillugu isigaara. Isumaliutersuutit
tigooraavinnut matumani saqqummiussakka nunami maani kommune-ingeniĝr-it
peqatigalugit oqallisigineqarumaarput, taakku november-imi Nuummi
katersuuteriarpata.
Eqqagassanut tigooraaviit
pingaarnerpaatillugu ima ilusilerneqassapput:
Suliaqarfiit assigiinngitsut eqqagassat
assigiinngitsut immikkut avatangiisinut navianaateqartut isumannaatsumik
suujunnaartinneqartarnissaannut pisariaqartut, sumiiffimmi ataatsimi katersorneqartussanngorlugit.
Uuliakut eqqaassanngikkaanni eqqagassat ulorianartut isumannaatsumik suujunnaartinneqarnissaannut
nunatsinni atortoqannginnatta, eqqagassat aallaruttariaqassapput, soorlu
Danmark-imi Kommune Kemi-mut.
Tigooraavinni aammattaaq
suliaqarfeqartariaqarpoq eqqagassat atoqqinneqartarnissaannik siuarsaasumik.
Assersuutigalugu ilaatigut eqqagassat annertuut ikuallajasortai immikkortiterneqartarnerat,
taamalu najukkami ikuallanneqarsinnaasunngorlugit, ilaatigullu savimminikut
immikkoortiterneqartarnerat taamalu nunani allani atoqqinneqarsinnaangorlugit.
Eqqagassat assartorneqartarnissaannut
tunngatillugu isumaqarpunga pitsaanerpaassasoq Royal Arctic Line-p sinerissami
Danmark-imullu useqarani angalasarneri atorluaraanni. Tamanna pillugu
ingerlatsiveqarfima Royal Arctic Line attavigisimavaa. Eqqagassat nunanut
allanut nassiunneqartarnerat kommunit ataqatigiissaartariaqarpaat,
atorsinnaalluartumillu aaqqiissuteqarnissap nassaariniarnerani
ikiuukkusuppugut.
Ruth Heilmann-ip apeqquteqaammini
oqaatigaa orsuku neqillu asiusut ikuallaavinni ikuallanniarnerat nunaqarfinni
ajornartorsiutaasartoq. Namminersornerullutik Oqartussat tapiissutigisaasa
ikuallaaviit minnerpaalluunniit eqqagassat tamakku ikuallassinnaassagaat
siunertaagaluarpoq. Taamaakkaluartoq eqqagassat taakku
ikuallanneqarsinnaasimanngippata ingerlatsinermi ajornartorsiutit pissutaasimassapput.
Ikuallaavinni ingerlatsinerup pitsaanerulernissa qularnaarniarlugu
ingerlatsiveqarfimma Nuummi Savimminilerinermik Ilinniarfik suleqatigalugu,
ikuallaavinni sulisunut ilinniartitsinissamut siunnersuutissaq
suliarilereerpaa.
Naggasiullugu oqaatigissavara
Naalakkersuisut 1998-imut aningaasanut inatsimmi katillugit 16 million koruunit
eqqagassalerinermut atortussanngorlugit immikkoortinneqarnissaat siunnersuutigimmassut.
Taakkunannga 3,6 million koruunit nunaqarfinni ikuallaavinnut, 9,5 million
koruunit illoqarfinni ikuallaavinnut, 2 million koruunit eqqakkanut
tigooraavinnut aammalu 1 million koruunit ilaatigut ilinniartitsinermut.
Ruth Heilmann, apeqquteqartoq:
Naalakkersuisup akissutaa qujassutigaara, paasigakku
nunarput minguitsuutinniarlugu qanoq iliuutsit ataqatigiissaartumik
suliniutigalugit aallartittoqarsimasoq.
Naatsorsuutigaara ajornartorsiut tamanna
kommunini tamani ajornartorsiutaammat, ilisimaneqarlunilu, taamaattumik
kommune-ingeniĝr-it november-imi Nuummi oqalliseqarnissaat neriuutigaara
aaqqiissutissanik aamma siunnersuuteqarfiujumaartoq.
Pingaartorujussuartut isumaqarfigaara
eqqagassanik immikkoortiterinerup pikkoriffiginerulerneqarnissaa. Taamaattumik
Naalakkersuisut ikuallaavinni sulisut pikkorissartinneqalernissaanni
ilinniartinneqalernissaannillu suliniuteqarnera paasigakku iluaraara.
Kaammattuutigerusupparalu piaartumik
tamanna pisariaqartoq. Uanilu ilanngullugu aamma eqqagassat
assartorneqarnissaannut tunngatillugu Royal Arctic Line-mut
isumaqatigiinniuteqarneq isumaqarpunga isumassaasoq pitsaasoq, taamaattumik
taassuma iluatsinnissaa aamma kissaatigilluinnarpara.
Uani 1998-imut aningaasartuutissanut
nassuiaateqarnera aamma qujassutigissavara, aammalu oqaatigissallugu ilaatigut
imaalertariaqarsorinngilara, kommunit akissaqartut akissaqarluartullu kisimik
taamatut ikuallaavimmik pilersorneqarnissaat. Taanna eqqarsaatigillaqquara.
Marianne Jensen, Naalakkersuisunut ilaasortaq:
Ilassutigalugu
ilisimatitsissutigiinnassavara, aatsaaginnaq Ruth Heilmann-ip apeqquteqaataanut
tunngatillugu tassa arrortikkuminaatsunik sammisaqarneq taanna
misiliiffillattaarneqarmat, ilaatigut kommunit suliffeqarfissuillu namminneq
suliniutigisaannik, aammalu uanga Naalakkersuisoqarfinninngaanniit aamma peqataaffigineqartumik
siunnersuiffigineqartumillu.
Taakkua misilittakkat ataasiakkaat
soorunalimi ilinniarfiginissaat naatsorsuutigaarput, kisianni soorlu
oqaaseqareersunga, aamma erniinnannguaq ataatsimiittoqartussaavoq, tassanilu uagut
neriuutigaarput pitsaasumik angusaqarfiusumillu naammassineqarumaartoq.
Kommunit akissaqanngitsut, imaluunniit
akissaqassusai pillugu eqqaasitsissutigiinnassavara, taanna
isumaqatigiinniarnikkut KANUKOKA-lu pisussaammat, aammalu ilaatigut tamakkua
arlalinnik maani tikillattaarneqareermata, naatsorsuutigaara tamakkua
oqaaserineqartut isumaqatigiiniarnerit ingerlaqqinnerini,
eqqumaffigineqarumaartut.
Finn Karlsen, ataatsimiinnermik aqutsisoq:
Taava maannakkut apeqquteqaatit sisamaannut:
Inatsisartunut ilaasortap Manasse
Berthelsen-ip sinerissap qanittuani raajartassat tamakkerlugit
aalisarneqarsinnaannginneri pillugit apeqquteqaateqarpoq.
Manasse Berthelsen, apeqquteqartoq:
Sinerissami qanittumi raajat
pisassaritinneqartut maannakkut ilimagineqarpoq ukiumanna
tamakkerneqarsinnaassanngitsut.
Aalisarnermut Naalakkersuisoq matumuuna
apeqquteqaateqarfigissavara ukiup tullissaanut, tassa aappaagumut, qanoq
iliuuseqartoqassamaarnersoq, ukioq manna tamakkersinnaassanngikkaluarpata.
Aalisariutit amerleqqinneqassanerlutik,
imaaluunniit allatut aaqqissuussisoqassamaarnerluni?
Paaviaaraq Heilmann, Naalakkersuisunut ilaasortaq:
Siullermik oqaatigissavara apeqqutissara
piffisap iluani naammassisinnaassannginnakku aalajangersakkat naalisarlugu
oqaatigiinnassavakka.
Naluvara aalajangersakkat
sukangavallaarnersut imaluunniit uagut akissutivut takivallaartarnersut.
Sinerissap qanittuani raajartassat
ukiormanna tamakkerlugit aalisarneqarsinnaannginnerat aallaavigalugu
Inatsisartunut ilaasortaq Manasse Berthelsen, apeqquteqaateqarpoq, Naalakkersuisut
ukiup tulliani qanoq pilersaaruteqarnersut, tassunga atatillugu aalisariutit
amerlineqassamaarnersut.
Sinerissap qanittuani raajarniarnermi
pisassiissutit inunnit ataasiakkaanit pigineqartut tuniniarneqarsinnaasut,
akuerisaasumik annertunerpaaffissallit, januar-ip aallaqqaataani 1997
atuutinneqalermatali Naalakkersuisut aalisarnerup ineriartornera
malinnaaffigeqqissaarsimavaat. 1997-imi september-ip naalernerani
pisarineqartussat siumut naatsorsornerini paasinarsisimavoq ukiup naalernerani,
sinerissap qanittuani raajartassat tamakkerlugit
aalisarneqarsinnaanavianngitsut.
Naalakkersuisut misissuisimapput
paasiniarlugu ukioq manna kutter-ersorluni raajarniartut pisaasa ukiut
siuliinut naleqqiullugit annikinnerunerinut suut patsisaanersut. Angallatit
mikinerusut arlallit raajarniarnermi pisassiissutinik pigisatik
tunisinnaavaat, taamaalillutillu raajarniarunnaarsimallutik. Angallatit
arlalissuit ESU-p naleqqussaanissamut periarfissarititaasoq atorsimavaat.
Naalakkersuisut 1998-imut qaammatit
siulliit aallartinneraniit aalisarneq pisarineqartartullu
malinnaaffigeqqissaarniarpaat. Tassami naatsorsuutigineqarmat, assersuutigalugu
aalisarsinnaassuseq, nutaatut isigineqarsinnaasoq, 79-erit sinerissap
qanittuani aalisarnermi ilanngunnerisigut ilimagineqarmat, pisassiissutit
annikitsuunngitsut taakkuninnga aalisarneqassasut. Immaqa pisassiissutit
pisarineqarsinnaatitaasut tamakkiisunit 20% tikillugu.
Naggataatigut Naalakkersuisut
eqqaasitsissutigissavaat ukioq manna 1998-2000 ukiut tamaasa 10 milllion
koruunit immikkoortinneqarsimammata aalisariutinut naleqqussaanissamut atugassatut.
Manasse Berthelsen, apeqquteqartoq:
Kiisami Aalisarnermut, Piniarnermut
Nunalerinermullu Naalakkersuisup angalajunnaarami apeqquteqaatiga akivaa,
qaammat ataaseq utaqqeriillartunga.
Taamatut aaqqissuussisimaneq erserpoq
aalisartunik uqiliallatsitsisimasoq. Taavalu ukiut siulliit
naatsorsuiffiusuninngaanniit allaanermik aalisarlutik. Ilaatigut Kujataani
raajartassatik august qaammat tamakkereersimallugit. Tassani ujartoqqissavara
aappaagumut taavalu ukiut tulliuttuni naleqqussaanissamik periarfissaqarnersoq.
Aammalu raajarniarusuttut nutaat, ingammik inuusuttut massakkut
utoqqaliarsaalersunik paarlaanissaminnut periarfissaat, tassani aamma immata.
Soorlu pisassanik aallarniutissaannik akeqanngitsumik tunineqartarsinnaanerat
TAC-p iluani, taamatut eqaatsumik aaqqissuusisinnaaneq tassuuna aamma
ujartorpara.
Ukua naggataatigut oqaatigerusuppakka.
Tusagassiuutitigut tusarparput 1997-imi raajat pisassat 3000 tonsit pallillugit
allaat pisarineqanngitsoortussaasut. Naalakkersuisullu akissummini kisitsisinik
taasaqanngimmat taanna ilumoortutut isigaara.
Paaviaaraq Heilmann, Naalakkersuisunut ilaasortaq:
Una naatsunnguamik oqaatigiinnassavara,
ukioq kingulliit pingasut pisarineqartut tulaassorneqartut
ikiliartorsimammata, tassa assersuutigalugu taasinnaavara 1996-imi
tulaaneqarsimapput 23.000 tonsit sinnilaarlugit. Naatsorsuutigaarpullu
maannakkut naliliigallarnerit malillugit uki- up naanerani tamassuma missaani
tulaanneqarumaartut.
Aaqqissuussinerup kingunerinngilaa
pisaasartut ikiliartornerannut, taannalu qangali appariarto-reersimavoq.
Finn Karlsen, ataatsimiinnermik aqutsisoq:
Taavalu maannakkut apeequteqaatit
tallimaat:
Karl Lyberth puisit amiinik pisinermi
tapiissutit pillugit apeqquteqaateqarpoq.
Karl Lyberth, apeqquteqartoq:
Ukiorpaalunngortuni puisit amiisa pisiariortornerinut Namminersornerullutik Oqartussat ukiut tamaasa aningaasarpassuarnik tapiisartut tamatta nalunngilarput.
Assersuutitut taaneqarsinnaavoq ukioq manna katillugit 38 million koruunit tapiisussavugut.
Eqqumiiginarsinnaagaluarpoq apeqqutigissavara, aningaasat tapiissutigineqartartut tamakkua kikkunnut tapiissutaasarnersut? Piniartunut tapiissutaappat imaluunniit Greet Greenland-imut tapiissutaanerlutik?
Apeequteqaateqarninnut tunngavigerpiarpara illoqarfinni arlalinni suliffeqarfiit namminersortut puisit amiinik piniartunit pisiortorniarlutik aallartinnissaminnik pilersaaruteqartut ilisimagakkit. Puisit amiisa nioqqutissiarinerinut tapiissutaasartut piniartunut tapiissutaappata, taava pissusissamisuunnginnerluni piniartut suliffeqarfinnut namminersortunut amminik tunioraasut aamma tapiissutisissappata.
Aappaatut apeqqutigissavara Greet Greenland-ip puisit amiinik tigooqqaasinnaanera qanoq killeqartiginersoq, aammalu killissani tikilinnginneraa?
Greet Greenland-ip tigusisinnaanerata killissani tikilerpagu piniartut killilersugaanngitsumik puisit amiinik tunisiuarnissaat qulakkeerniarlugu Naalakkersuisut qanoq pilersaaruteqarnersut paaserusunnassaaq, ilimagisariaqarmammi siunissami puisit amii tunineqartartut amerliartortuarnissaat.
Paaviaaraq Heilmann, Naalakkersuisunut ilaasortaq:
Aamma taanna takimmat naalisalaassavara.
Inatsisartuni ilaasortap Karl Lyberth-ip apeqquteqaataanut akissutigisinnaavara 1990-ikkut aallartiineraniilli puisit amiinik tunisineq tapiissutissat aningaasanut inatsisikkut ukiumut aningaasaliisutigineqartalermata. Tamatumunnga pissutaavoq amernik nunarsuarmi niuerfinni akiusut appasinnerujussuat. Taamaattumik pisariaqartinneqarsimavoq tapiissutitigut piniartut tapiiffigineqartarnissaat. Taamaalilluni tapiissutit piniartunut akiliutigineqartarput, kisianni tunisinermut tunngatillugu aningaasartuutit ilanngaatigalugit. Ammit akii Greet Greenland-ip KNAPK-llu akornanni isumaqatigiissutaapput, Greet Greenland-ip isumaqatigiinniarmi piginnatitaaffiisa Naalakkersuisut aalajangersortarpaat.
Tapiissutit tamarmiusut 1996-imi 32,2 million koruuniupput, tassa tunisat amerleriarujussuarnerisa immikkut aningaasaliissuteqarnissaq pisariaqartissimammassuk. 1997-imi tapiissutissat 34,6 million koruuniupput, tassa 1996-imi annertunaarutit 1997-imi akilerneqartussaaneri pissutigalugit.
Tapiissutit Greet Greenland-imit aqunneqarput. Greet Greeland-ip sullissinissamik isumaqatigiissuteqarfigisarsimavai KNI aamma Air Greenland, aammalu tunioraaviit namminersortunit ingerlanneqartut, taakku sinerissami pisiortornermut atatillugu suliassat isumagaat, taakkununnga ilanngullugu piniartunut akiliuteqarnissaq.
Pisiortortut tamatumunnga akilerneqartarput, pisiortornerup aqunneqarneranut Greet Greenland-ip aningaasartuutini aamma matussusertittarpai, tamakku saniatigut assartuinermut aningaasartuuteqarpoq tunisanut tapiissutit aqunneqarnerat tamarmiusoq 6 million koruunit missaani aningaasartuutitaqarpoq.
Apeqqutit aappaannut akissutigisinnaavara Greet Greenland-ip naammassisinnaasami killingat angusimanngikkaa, taamaattumik Naalakkersuisut maannakkut pilersaaruteqanngillat suliffioreersumi nutaanilu naammassisaqarsinnaassutsimik atorluaanngitsumik kinguneqartussamik aaqqissuussinissamik.
Ammit affaasa missaannaat pitsaassuseqarput A-mik aammalu B-mik, ammit sinneri pitsaassuseqarlutik C-mik aamma D-mik. Taakku maannakkut akiusut tunngavigalugit suliffeqarfiup aningaasarsiorneranut annikitsuaraannarmik ilapittuutaapput, tassa akit ukiuni kingullerni qaffarialaarsimammata, nunarsuarmi niuerfiinni akit appariaqqissappata ammit C-mik D-millu pitsaassusillit suliarineqarnerat annaasaqaataaqqilissaaq. Taamaattumik Greet Greenland-ip suliarisinnaasai suli anguneqanngillat, tamatumalu peqatigisaanik ammit pisiarineqartartut affaat suliffeqarfiup aningaasarsiorneranut iluaqutaanngillat.
Tamanna tunngavigalugu Naalakkersuisut isumaqarput ammit pitsaasut amerlanerulersinniarlugit suliniuteqartarnerit ingerlaqqittariaqartut, ilanngullugu siunissami qaninnermi nunatsinni ilimagisariaqarparput amernik suliareriikkanik nioqquteqarnermi unammillerneqarumaarnissarput, tassa Canada-mi, Namibia-mi ammeriverujussuit suliarineqarnissaat maannakkut pilersaarutigineqarmat. Siunissami pisiniarnerup, puisinniarnerup amminillu pisiortornerup qanoq ikkumaarnera qularnaatsumik Naalakkersuisuni eqqoriarneqarsinnaangilaq.
Karl Lyberth, apeqquteqartoq:
Akissummut qujavunga.
Paasivara piniartut illoqarfinni najugallit namminersortunik amminik pisiortortunut tunisisartut Greet Greenland-imullu isumaqatigissuteqarfigineqarsimanngitsunut tunisisartut piniartut tapiissutinik pisinnaanngitsut. Tassa imatut akissut paasigakku: Suliffeqarfik namminersortoq aatsaat Greet Greenland-imut isumaqatigiissuteqarsimaguni, Greet Greenland-imullu amminik ingerlatitseqqittaruni, taava aatsaat tapiissutinik pisinnaasoq.
Takorloorneqarsinnaagami aamma pilersaarutit malillugit, imatut paasinarami, assersuutigalugu Maniitsumi namminersortut pilersaaruteqarput amminik nunanut allanut tunioraaniarlutik. Tassa taamaattut piniartut taassumunnga suliffeqarfimmut tunioraasut tapiissutinik pisinnaangitsut paasinarpoq.
Finn Karlsen, ataatsimiinnermik aqutsisoq:
Taavalu ullumikkut apeqquteqaatit
kingullerpaartaat:
Inatsisartunut ilaasortap Naimanngitsoq
Petersen-ip Savissiviup eqqaani qaleralinnik aalisarnermik misileraanerup
malitseqartinniarlugu pilersaarutit apeqquteqaatigai.
Naimanngitsoq Petersen, apeqquteqartoq:
Naluneqanngitsutut ukiuni kingullerni
Savissiviup eqqaani qaleralinnik aalisarluni misileraasoqartarsimavoq.
Tamatumanilu misileraanermi iluatsittumik aalisartoqartarsimavoq.
Paasineqarsimavorlu Savissiviup eqqaani
qaleraleqarluartoq.
Ullumikkut piniartut
inuussutissarsiornermi pinngitsoorneqarsinnaajunnaarsimavoq saniatigut
isertitsissutaasinnaasumik inuussutissarsiornissaq, taamaaliornikkut
inuuniarneq oqinnerusumik ingerlanneqarsinnaasunngorlugu. Aammalu ullutsinnut
pissutsinut naleqquttuussaaq saniatigut aningaasarsiorfiusinnaasumik
aalisarnermik aallartitsisoqarnissaa.
Taamaattumik apeqqutiginiarpara
Naalakkersuisut qanoq pilersaaruteqarpat qaleralinnik aalisarnermi
misileraasimanerup kingunerisaanik, qanoq iliuuseqarnissamik? Isimaqarama
ullumikkut piffissanngortoq Avanersuarmi inuussutissarsiornikkut siuarsaanissaq
aallartittariaqalersoq, qaleralinnik aalisarneq eqqarsaatigalugu. Pingaartumik
apeqqutigisanni Savissiviup eqqaani aalisarfissuanngortitsinissaq anguniarlugu
aallartittariaqalersutut isigigakku.
Paaviaaraq Heilmann, Naalakkersuisunut ilaasortaq:
Savissiviup eqqaani
qaleralinniartitsilluni misileraasimanermi angusaasut pitsaasut aallaavigalugit
Inatsisartunut ilaasortaq Naimanngitsoq Petersen apeqquteqarpoq
misileraasimanermi angusaasut malitseqartinniarlugit Naalakkersuisut qanoq
pilersaaruteqarnersut.
1995-imi Savissiviup eqqaani Qaanaallu
Kangerluani, misileraalluni qaleralinniartitsisoqarpoq. 1996-imilu Qaanaap
Kangerluani misileraanerit nangeqqinneqarput, taamani misileraanerit ukiup
siuliani naammassineqarsimanngimmata.
Misileraanerup siunertaraa aalisakkanik
Avanersuup Kommuniani piniarnikkut inuussutissarsiuteqarnerup tapertassaanik
nassaarniarnissaq. Savissiviup eqqaani misileraanermi qaleralli angisuut
kusanartullu nassaarineqarput, tunisassiarissallugit piukkunnarluartut. Qaanaap
Kangerluani angusat Savissiviup eqqaani angusatut pitsaatig Inatsisartunut
ilaasortaq Naimanngitsoq Petersen-ip Savissiviup eqqaani misileraalluni
qleralinniarneq inngillat. Taamaakkaluartormi qalerallit kusanartut angisuut
nassaarineqarput.
Piginneqatigiilluni tunisassiorfik Akkoq
Amba Savissivimmiittoq Royal Greeland-imik ukioq manna tiguneqarpoq, aatsaalli
ukioq manna Royal Greenland-imit ingerlanneqalerpoq. Taamaattumik Savissivimmi
suliniutissat qanoq isikkoqassanersut Royal Greenland A/S oqaatigissallugit
ajornakusoortinneqarluni. Royal Greenland A/S-ip AMIS-imi
ilaasortaaffeqarnermigut taavani misileraalluni aalisartitsisimanermit
angusaasimasut ilisimavai.
Royal Greenland A/S-imillu taavani
innuttaasut naatsorsuutigisaattut naatsorsuutigineqarpoq Savissivimmi
qaleralinnik aalisarneq tunisassiornerlu ineriartortinneqarsinnaassasoq. Royal
Greenland A/S-ip ilisimatitsissutigaa massakkut tunisassiorsinnaassutsimik
annertunerusumik tunisassiortoqarsinnaappat, init tunisassiorfiusinnaasut toqqorsiveqarnermullu
tunngasut annertusineqartariaqartut.
Tassungalu tunngatillugu Savissivimmi
inaallagissamik, imermik assartuisarnermullu allatigullu angalatitsinermi
toqqavissat ilanngullugit eqqarsaatigineqartariaqartut.
Royal Greenland A/S naapertorlugu
pissutsit ullumikkutut itsillugit taavani tunisassiortartussanik aamma
tunisassiassanik akigissaartumik, soorlu qullukkanik timmisartukkut
assartorneqarsinnaasunik, tunisassiorsinnaaneq ingerlanneqartariaqartoq.
Naimanngitsoq Petersen, apeqquteqartoq:
Aalisarnermut, Piniarnermut
Nunalerinermullu Naalakkersuisup apeqquteqaatinnut akissuteqaata qujaruppara.
Tassa paasivara Royal Greenland
A/S-ip pilersaarutai oqaatigineqarsinnaangitsut. Aaammalu akissuteqaammut
naammagigallarpara.
Finn Karlsen, ataatsimiinnermik aqutsisoq:
Tassa taamaalilluta ataatsimiinnerput
tamaanga killeqarpoq. Taavalu tallimanngorpat nalunaa-qutaq qulinut
ataatsimiilluta aallartissaagut.
Ataatsimiinneq naammassivoq.