Oqaluuserisassani immikkoortoq 17-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataasinngorneq 16. februar 1998 nal.
17.10
Ataatsimiinnermik aqutsisoq:
Siulittaasoqarfimmi ilaasortaq Otto Steenholdt.
Kristine Raahauge, siunnersuuteqartoq,
Siumut:
Siunnersuutiginiarpara illunik allanngutsaaliortariaqartunik eqqissisimatittariaqartunillu suliaqarnermut aningaasat atugassaritinneqartut amerlineqarnissaat. Ilami ukiorpaalussuanngorput taammaallaat 600000-it missaat inatsisartunit aningaassaliissutaasarlutik nunatsinnut tamarmut atugassatut.Taakkualu saniatigut 1994-miit ukioq 1997 ilanngullugu Upernavimmi naalagaafiup illorsuaatigisimasaanut iluarsaassinermut atugassatut katillugit mill. 2.912. 000. Kr-nit atugassiillutaasimallutik. Agguaqatigiissillugillu ukiumut 700000-nit sinnerlugit atorneqartarsimallutik. Ullutsinnut akinut piumasarisaasunullu aammalu illuutit eriagisariallit amertornerat malitteqartariaqarpoq, aningaasat tapiissutaasartut amerlineqarnerannit kiisalu inatsisartut inatsisaat nr. 5 okt. 16-nit 1980-mersoq, qanganitsat eqqaassutissat imaaliinnarlugit peerneqarsinnaangitsut illullu eqqissisimatinneqarnerat pillugu aalajangersagaq eqqortumik malinneqassappattaaq. Ilami naalakkersuinikkut anguniakkat nunami illut ilusilersugaanermikkut avatangiisinut kultuurikkullu oqaluttuarisaanikkullu naleqartut sernigissallugit ajunngilluinnarmata tapersertariaqarlutillu.
Konrad Steenholdt, Kultureqarnermut, Ilinniartitaanermut, Ilaageeqarnermullu Naalakkersuisoq:
Qujanaq. Siunnersuutikkut siunertamut aningaasanik amerlanerusunik aningaasaliinissaq siunnersuutigineqarmat matumani pineqarpoq apeqqut aningaasanut inatsimmut tunngasoq. Taammaatumik 1999-mut aningaassanut inatsisissatut siunnertip Inatsisartunit oqaluuserineqarnissaannut atatillugu oqaluusserineqartariaqartoq. Taamaaliornikkut siunnersuut ilanngunneqarsinnaavoq Inatsisartut ataatsimoortumik pingaarnersiuineranni. Taamaammat Naalakkersuisut kaamattuutigisinnanngilaat siunnersuutip immikkoortunngortillugu oqaluuserineqarnissaa. Taamak naatsumik Naalakkersuisut oqaaseqarlutik ilanngullugu oqaatigissavaat inatsisartunut ilaasortap Fru Kristine Raahaugep siunnersuutaa tunngaviatigut tapersersoramikku. Tassami siunnersuuteqartup tunngavilersuutai Naalakkersuisut isumaqatigaat. Tamanna tunngavigalugu 1999-mut aningaasanut inatsisissatut siunnertip suliarineqarneranut atatillugu, siunertat tapersersortariaqartut, siunnersuuteqartup siunnersuuteqarnermigut pingaannerutinneqartussatut kissaatigisaassa annnertunersumik aningaassaliiffigineqarnissaannut periarfissat Naalakkersuisut nalilersussavaat.
Ruth Heilmann, Siumup oqaaseqartua:
Matuma inatsisartuni ilaasortap Kristine
Raahaugep illunik allanngutsaaliuinermut aningaassaliissutaasut
amerlineqarnissaannut siunnertaa Siumumiit tunngaviatigut isumatigaa.
Taamatullu Naalakkersuisut akissuteqarnerminni ukiaamut aningaasanik inatsimmi
uterfigineqarnissaanik isummersuinerat isumaqataaffigaluguttaaq.
Nunatsinni illut atorunnaartut
eriagisassat amerlaqaat, nalunaarsorlugillu nalilersorneqartariaqartut
pingaarnersiuillunilu iluarsaasarnissat aaqqissuutamik
ingerlanneqartariaqarnerat Siumumiit kaammattuutigissavarput. Nuna
tamakkerlugu katersugaassiveqarnermi ingerlatsisut misissuataarinissaat
matumani suliassaavoq annertooq taammaattumik aningaasat qanoq atsigisumik
qinnutigineqarsinnaasut annertussusilersinneqartinnagit taaneqartut pillugit
misissuilluartoqarnissaa Siumumiit piumasarissavarput. Nalunngilarput kommunini
arlaqaqisuni katersugaassiveqarnikkut eqqummaarissumik ingerlatsisoqartoq.
Arlaqartutigullu aamma siunnersuinissaq kaammatuuteqarnissarlu pisariaqartinneqartarluni.Tamannalu
qitiusumik Katersugaasivimmi ingerlanneqarnissaa pisariaqartutut Siumumiit
isumaqarfigaarput.
Takornariaqartitsineq
inerisaleruttorparput aammalu takornarissat tikisaminni alakkaqqaartagaasa
pingaartut ilagisarpaat katersugaasiviit aammalu illut qimanneqrsimasut
oqaluttuassartaqartut pulaarumaneqartartut ilagilluinnartarpaat. Taammaattumik
Siumumiit isumaqarpugut siuaasatta inuunerinik nittarssaaassisarnissarput
atorfissaqarteqigipput. Tassami inuttut kinaassusitta saqqummiunnissaanut
sorlavut ilisimasariaqaratsigit, kinguaatinnullu oqaluttuarisinnaasissaanik
toqqammavissaqarnissarput pingaarutilerujussuulluni.
Taammaattumik siunnersuuteqartup
siunertarisaa Siumumiit isumaqataaffigigatsigu, 1999-mi aningaasartuutissat
eqqartorneqarneranni uterfiginissaani Naalakkersuisut kaamattuutaat matumuuna
Siumumiit tapersiinassavarput.
Knud Sĝrensen, Atassutip oqaaseqartua:
Naalakkersuisunut ilaasortap Konrad Steenholdtip tikinneratigut sinniisussaa Pele Thomsen Inatsisartut ataatsimiittarfianni issiaunnaarpoq, tassalu inatsisartut oqaluttarfianninngaanniit oqaloqqaarutissaralua Pele Thomsenip taamaalillugu uanga atuassavara.
Illut kultuurikkut oqaluttuarisaanikkullu eriagisatut isigisatta ilarpassuisa illoqarfinni nunaqarfinni sinerissatsinnilu aserfallakkaluttuinnartut, koomuunillu aserfallattaaliinissamut iluarsaanissamut akissaqanngitsut aserfallakkaluttuinnarput. Tamakkulu aserfallakkiartorneri Naalakkersuisut aningaassaliissutinik qaffaanerisigut unikaallatsinneqarsinnaapput pigiuaannarnissaat eqqarsaatigalugit.Taamaattumik Kristine Raahaugep aningaasaanik tapiissutaasartunik qaffaaqqusilluni siunnersuutaa Atassummiit taperserparput. Aammalu Naalakkersuisut siunnersuummut tunngatillugu akissuteqaamminni 1999-mut aningaassatigut periarfissiiniarnerat Atassummiit aamma taperserparput. Tassa Pele Thomsen taama oqassamaaraluarpoq.
Evald Brĝnlund, Inuit Ataqatigiit oqaaseqartuat:
Nunatsinni illut allanngutsaaliorneqartut eqqissisimatinneqartullu amerliartorat ilutigalugu pisariaqarpoq aamma aningaasat atugassanngortinneqartartut, ullumikkullu akit eqqarsaatigalugit, malinnaatinneqartariaqartut. Nunatsinni illulioriaatsit allanngoriartorneratigut illullu nutaanngitsut tamarmik immikkut oqaluttuassartaqartut sivisuumik piujuarnissaat pingaaruteqarluinnartutut isigaarput.
Siunnersuutiip saqqummiunneqartoq ersarereermat Inuit Ataqatigiinnit oqaatigissavarput siunnersuut tunngaviatigut tapersersoratsigu 1999-mut aningaasanut inatsisissamut aningaassaliissutigineqartartut qaffanneqarnissaat isumaqatigigatsigu matumuuna nalunaarutigaarput.
Bjarne Kreutzmann, Akulliit Partiiat:
Akulliit Partiiat tamatumuuna naatsumik
oqaaseqarluni innassutigiinnassavaa. siunnersuut kinguartinneqassasoq, oqaluuserissanngorlugu
tulleriinnilersuinermi 1999-mut aningaasanut inatsisissap suliarineqarnerani.
Anthon Frederiksen, Kattusseqatigiit:
Inatsisartuni ilaasortap Kristine
Raahaugep siunnersuutaa soqutiginarpoq. Tassami sinerissami illut
allanngutsaaliortariaqartut eriagisariaqartullu, oqaluttuarisaanermut
pingaaruteqartut, ikitsuinnaangillat. Ilaatigut aserfallassimasut aamma
illoqarfinniinnaangitsoq kisiannili nunaqarfinni nunaqarfinnilu inuerussimasuni
ilaatigut illorsuatoqqat, assersuutigalugu takornariaqarnermut
atorneqarsinnaasut nalunaarsorluarlugit aserfallatsaalineqarnissaat
pisariaqarpoq.
Taammattumik naalakkersuisut
akissuteqaaminni 1999-mut aningaasanik inatsisissap suliarineqarnissaanut
nalilersuinissamik oqaaseqarnerannut tunngatillugu Kattusseqatigiinniit
kaammattuutigissavara Kultureqarnermut, Ilinniartitaanermullu
ataatsimiitsitaliap katersugaasiveqarneq suleqatigalugu nalilersuinerit
ingerlatissagaat.
Kristine Raahauge, siunnersuuteqartoq,
Siumut:
Tassa partiit tamarmik ersarissumik
tapersersuinertik oqaatigimmassuk nuannaarutigisorujussuuavara, uffa
aningaasartuutissamut 1999-mut atsaat atatillugit ersarissumik qanoq
atsigisumik anigaasaliinissaq eqqartorniarneqaraluartoq. Naalakkersuisullu
akissuteqarnerminni taamak tikkuartuinerat nuannaarutigaara uffa allaqqaamut
oqaraluartut akuerisinnaanagu, tassa aningaasartuutissalerinermut atammat.
Kisiannili inatsisartut suleriaasiat nutaaq malillugu inatsisartunut ilaasortat
periarfissaat atorlugu siunnnersuut ingerlassimavara. Massakkullu
oqaaseqaatigineqartut ilaatigut Siumumiit aamma suleriaqqinnissamut qanoq
iliorsinnaanermut tikkuartuisut neriuppunga Naalakkersuisoqarfimminngaaniit
aamma siunnersuusiornissamut atorluarneqassasut. Qujanaq.
Konrad Steenholdt, Kultureqarnermut,
Ilinniartitaanermut Ilageeqarnermullu Naalakkersuisoq:
Qujanaq. Una erseqqissumik
oqaatigilaarlara. Marluk imminnut attuumagaluartut kisianni erseqqilluinnartumik
immikkoortittariaqarput. Aningaasat ilaatigut atorneqartartut erseqqissumik
nalunaaqutserneqarlutik atorneqarsinnaanissaat pisariaqarluinnartutut
isigigakku. Uani pisagut tassaapput illorsuatoqqat, pingaartumik KGH-p KGH-nermini ukiorpassuarnerni ingerlanerani
pilersissimasai, kingornatigut Namminersornerullutik Oqartussanut tunniunneqarsimapput
ilaatigut kommuuninullu. Tamatumalu aamma kingunerisimavaa pisussaaffiit
aningaasanik nalillit annertoqisut.
Siunnersuuteqartup taammagu
assersuutigalugu Upernavimmi, tassa illoqarfitoqaq nutarterneqarsimavoq, illoqarfiup
nalliuttorsiornissaanut tunngatillugu. Taanna immikkorluinnaq
oqaluttuassartaqarpoq. Tassa siullermeersumik Skov- og Nturfredningsstyrelsi,
Danmarkimiittoq, neqeroorutéqarsimavoq nunatsinni ilorsuatoqqanut
nutarterinermut aningaassaliiumalluni, suliassaq Upernavimmiittoq
iluatsissappat, tassa Kommunip, Namminersornerullutik Oqartussat taavalu Skov-
og Naturfredningsstyrelsi suleqatigiinnnerisigut, aningaasat taakku atorlugit
illorsuatoqqat taamaalillutik nutarterneqarsinnaanissaat anguniarneqarluni.
Taanna ilungersuutigisimaqaarput. Allaat kommunilu, kommuni pineqartoq
Upernaviup kommunalbestyrelsia ilaatigut oqaatsit sakkortuut atorlugit suliap
inaarneqarnissaa, kusanartumik inerneqarnissaa pingaassusia
erseqqissartuarniarsimavarput.
Taamaatut akaareqatigiilluta
oqqatillattaaraluarluta kisianni nuannaarutissarsisinneqarsimavugut tassa
illorsuatoqqat taakkua kusanarluinnartumik inerneqarsimammata. Tamatumalu tassa
kingunerisussaasavaa siunissami taama Skov- og Naturfredningsstyrelsen aningaassaliinissaminut
ingerlaqqissinnaalissaammat. Tassa taamaalilluni illorsuatoqqat tamakkua
tulleriiaarlugit nutarterneqarsinnaalissapput.Taavalu taakkua nutarternerannut
tunngatillugu aamma aajuna ilaalluinnartoq illorsuatoqqat takkua
aaqissuunneqaraangata, taava tumatuma kingunerisarpaa kommuni aalajangertarmat
katersugaasivimmut imaluunniit allatut atussanerlugu. Taakkulu tassa
ataqqisariaqarput soorunami.
Una aamma oqaatigilaallara. Ukioq
kingulleq tassa ukiormannamut finanslovimut tunngatillugu aningaasat
atorneqartussat milliuuninut qaffannissaat
noqqaassuteqaatigereersimagaluarparput. Kisiannili ukiormanna
Namminersorullutik Oqartussat aningaasat sumut atorneqarnissaannik
inuiaqatigiit pingaarnerutitsinerat tungavigalugu tulleriiaarinermi allatut
ajornartumik sipaarutaasussatut illuartittariaqarsimallutik. Taamaattumik
nuannaarpunga uani soorlu oqartugut, siunnersuuteqartup uani
akerlilersorneqanngilaq tamakkua annaanissagutsigit taamak
aningaasaliissariaqarpugut. Unalu massakkut tunniunneqareerpoq
siunnersuuteqartuminngaanniit, suliassaq ingerlaqqissaaq. Tassalu 99-mi
aningasat inatsisaanni ilanngullugu nallilersorniarneqartussaassalluni.
Neriuppungalu partiit, uani assortuutoqanngimmat, partiit oqaluttuisa
oqalunnerat tunngavilugu siunnersuut taanna aningaasaqarnermut inatsisissap,
ukiumi tullermi atuuttussap suliarinerani saqqummeqqikkutta qiinuteqarqikkutta
taperserluarneqarumaarluta. Oqaaseqartut ataasiakkaarlugit uani oqaaseqaataat
oqaaseqarfigissanngilakka. Tassa tassani patsisigaara suliassaq ukiumi
tulliuttumi aningaasani inatsisissap ilusilersorniarnerani
uterfigeqqikkaluarnissagutsigu.....
Siunnersuuteqartorlu qutsavigaara uani erseqqissarmagu tamakkua
illorsuit eriagisariaqartut aamma oqaluttuarisaanitsinni imaannaangitsumik
ilaammata.
Ataatsimiinnermik aqutsisoq, Otto
Steenholdt:
Qujanaq. Tassa taamaalilluni inatsisartut
oqaluuserisassannut immikkoortoq 17 oqallisigineqareerpoq.
Oqaluuserisaq naammassivoq.