Oqaluuserisassani immikkoortoq 16-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataasinngorneq 16. februar 1998 nal.
Ataatsimiinnermik aqutsisoq: Inatsisartut
Siulittaasuat Anders Andreassen.
Jakob Sivertsen, siunnersuuteqartoq,
Atassut:
Ukioq manna inatsisartut
ataatsimiinneranni siunnersuummik imaattumik oqaluuserisassanngortitsisimavunga.
Kommunit killeqarfiisa ullutsinnut
naleqqussarneqarnissaat anguniarlugu inatsisartuni oqallinnissamik.
Inatsisartut ukiakkut 1997-imi
ataatsimiinneranni Kalaallit Nunaata nunap immikkoortuinut kommuninullu
aggorneqarnera pillugu inatsisartut inatsisaata allannguutissaa Naalakkersuisut
saqqummiuppaat. Tamatumani pineqartoq tassaavoq kommunit aqqisa
allanngortinneqarsinnaalerannik tunngasoq, kisiannili kommunit killeqarfiisa
allanngortinneqarsinnaanerannik ilaqartinneqarani.
Atassut-mit isumaqarpugut ullumikkut
imaatigut angallatit pitsanngoriartortillugit ungasissumut piniariartarneq
aalisariartarnerlu eqqarsaatigalugit kommunit killeqarfiisa ullumikkut
pissutsinut naleqqussarneqarnissaat maannangaaq oqallisigalugu
aallartinneqarnissaa pisariaqalersoq. Apeqqut taanna taama pingaartigisoq
nukingiunnagu peqqissaartumik sulissutigineqartariaqartoq Atassut-mit
nalunnginnatsigu. Soorlu aamma 1997-imi inatsisartut ukiakkut
ataatsimiinneranni Illoqqortoormiit inatsisartunut ilaasortaannik
kommuneqarfiup killeqarfiata annikikkaluamik aaqqissuuteqarfiginissaanik
siunnersuummik saqqummiussaqartoq nalunngikkipput. Tamakku takutippaat nunarput
tamaat ataatsimut isigalugu kommunit killeqarfiisa ullutsinnut
naleqqussarneqarnissaat qanoq pisariaqartigisoq.
Matumuuna nunatsinni kommuneqarfiit
killeqarfiisa ullutsinnut naleqqussarneqarnissaasa inatsisartuni
oqaluuserineqarnissaat siunnersuutigaara. Oqallinnissamut kommuunit
nammineersinnaanerat ataqqillugu nunatsinni kommunit tamarmik aperineqarnissaat
kommuunillu imminnut qanittut aamma isumasioqatigiittarsinnaanissaasa
ammatinneqarnissaat matumuuna innersuussutigalugu KANUKOKA
suleqatigilluinnarlugu kommunini killeqarfiit ullutsinnut
naleqqussarneqarnissaat inatsisartuni oqaluuserisassanngortippara.
Jonathan Motzfeldt, Naalakkersuisut
Siulittaasuat:
Kalaallit Nunaanni angallannermi pissutsit
pitsanngoriarsimanerat innersuussutigalugu kommunit
nammineersinnaassuseqarnerat ataqqillugu kommunit killeqarfii Inatsisartut
oqaluuserissagaat Jakob Sivertsen siunnersuuteqarpoq.
Kommunit agguataarneqarnerat pillugu
pingaarnerusutigut oqallinnissamut piffissanngorsimasoq kommunillu
oqallinnermi tassani soorunami peqataatinneqartariaqartut naalakkersuisut
isumaqatigaat. KANUKOKA-p oqaluuserisassaq taanna kommunit akornanni oqaluuseritilersaaraa
naalakkersuisut ilisimasitsissutigineqarpoq.
Kommunit agguataarneqarnerata ataatsimut
isigalugu oqaluuserineqarnissaa pingaartorujussuuvoq, aamma piffissaq sivisooq
atorlugu suliarineqartariaqarluni. Kommunit ilaasa ataatsimut kattutsinneqarnissaat
oqaluuserisassaavoq aalajangiivigineqannginnermini iternga tikillugu aamma
maani inimi oqaluuserisariaqartoq.
Aamma kommunini misiligutitut
aaqqissuussinerit pillugit inatsisiliorneq tassa kommunini suliassat siunissami
qanoq iliorluni suliarineqartarsinnaanerannik takutitseqataasinnaasoq
naalakkersuisut tamanna qularutiginngilaat. Aammalu taamaalilluni suliassat
kommunit killeqarfii ullumikkut atuuttut ilisimasavut tunngavigalugit
kommunini aningaasaqarnikkut sanngiinnerusuni suliarinngikkaluarlugit
annertunerusukkuutaarlugilli qanoq annertutigisumik suliarineqartarnissaat
pisariaqartinneqarnersoq aamma takussutisseeqataassalluni.
Ullumikkulli kommunit marluk
allannguuteqartitsinissamik isumaqatigiinnerat tunngavigalugu kommunit killeqarfiinik
pioreersunik allanngortitsinissaq pillugu erseqqissumik siunnersuutit
allaapput. Assersuutigalugu Ammassallip Ittoqqortoormiillu kommunii kommunit
taakku marluk akornanni killeqarfiup allanngortinneqarnissaanik
qinnuteqaateqarnissaq isumaqatigiissutigisimavaat. Taamaalillutik Kalaallit
Nunaata nunap immikkoortuinut kommuninullu aggorneqarnera pillugu Inatsisartut
inatsisaata nr. 5-ip 6. november 1997-imeersup allannguutissaanut siunnersuut
Naalakkersuisut massakkut suliaraat, suliamilu tassani kommunit killeqarfinnik
allanngortitsinissamik erseqqilluinnartumik kissaatigisaat ilanngullugit
suliarineqarlutik. Aammattaaq nunat aqqisa allanngortiterneqarnerat pillugu
inatsissami siunnersuummi tassani imaritinneqartussaavoq. Inatsisissatut
siunnersuut pineqartoq taanna ukioq manna upernaakkut ataatsimiinnermi
saqqummiunneqassasoq naatsorsuutigineqarpoq.
Kisianni oqaatigineqareersutut nunap
aqqinik allanngortitsinissamik siunnersuutit allaapput. Kommunit
agguataarneqarnerisa sukumiisumik allanngortiterneqarnerat allarujussuuvoq,
taamaaliortoqarnissaanilu sivisuumik oqallittarnerpassuit aamma
pisariaqartinneqartussaapput. Taamaattorli taamatut oqallitsitsinissaq
Naalakkersuisut aamma piareersimaffigilluinnarpaat.
Ruth Heilmann, Siumup oqaaseqartua:
Kommunit killeqarfiisa ullutsinnut
naleqqussarneqarnissaat anguniarlugu inatsisartuni ilaasortaq Jakob Sivertsen,
Atassut, inatsisartuni oqallinnissamik siunnersuuteqarpoq.
Tamanna Siumumi pisarnitsitut soqutigalugu
eqqartorsimavarput.
Siunnersuuteqartoq isumaqatigaarput
isumaqarmat oqallisissiaq peqqissaarulluinnarlugu aammalu nukingiunnagu
oqaluuserineqartariaqartoq. Kommunit imminnut qanitariittut isummersornissaat
pisariaqarpoq aammalu KANUKOKA peqatigalugu isumasioqatigiittarnissat
ingerlanneqarnissaat Siumut-miit pissusissamisoorluinartutut
isumaqarfigaarput.
Kommuninut iluarsaaqqinnermi
innersuussutaasut pingaarutillit ilagaat
kommunit imminnut qanitariittut sutigut tamatigut
suleqatigiiffigisinnaasaminnik ujartuinissaat kaammattuutigineqartoq. Suleqatigiiffiusinnaasunik eqqartuineq ukioq
borgmesterit ataatsimiinneranni Kanukokamit aallartinneqareersoq nalunngilarput, tamanna Siumup tungaaniit
isumalluarnartuutipparput tassami inuiaqatigiinni Kalaallit nunaanni najugaqartuni
aningaasartuutikillisaaneq suliniutigineqaleruttorpoq nukiillu
kattuttaarlugillu atorluarneqarpata tamatsinnut silatusaartumik ingerlatitsinerussaaq,
aningaasanillu qularnanngitsumik sipaaruteqarnermik kinguneqaannarani aamma
kommunit imminnut ataqatigiinerulernissaannik
susassareqatigiinnerulernissaannillu nassataqartussaassasoq Siumut-miit
ilisimavarput.
Maannakkut killeqarfiit pillugit
oqalliseqartarnissani aallartereersumilu killeqarfiit aporfigiunnaarlugit
eqaatsumik suleqatigiiffeqalernissamik assigiinngitsorpassuartigut
ataqatigiissaartumik suleqatigiiffissaqartoq Siumut-miit suliniutigineroqqullugu
innersuussutigissavarput soorlu inuutissarsiornikkut takornariartitsinikkut,
teknikkikkut siunnersorneqartarnikkut allatigullu periarfissaqartoq
nalunanngereermat.
Taamaattumik Naalakkersuisut
akissuteqarnerminni nassuiaatigisaat oqaatigissavarput Siumut-miit
iluarisimaaratsigit aammalu nunat
aqqisa allannguutissaannik Naalakkersuisut ataatsimoortumik saqqummiinissaat
upernaamut pisussaammat qilanaaraarput tamannalu Siumut-miit soqutigeqalugu
peqataaffigaarput.
Oqallisigineqartussat pingaaruteqartut
amerlapput soorlu aamma Nunatsinni nunat eqqissisimatinneqartut pillugit nalilersueqqinnissat
kiisalu qeqertat ilaasa eqqissisimatinneqartussat suunerinik
isummersortoqartussaalluni.Pingaartumillu una killeqarfinnut tunngasumik
oqalliseqarnissaq pisariaqartoq peqqissaarulllugu eqqartortariaqarluinnartoq
Siumut-miit piareersimaffigaarput.
Taamatut oqarluta innuttaasut
oqallinnissami peqataalluarnissaannik neriuuteqarfigalugit
oqaluuserisassanngortitsisoq taamatut ittumik saqqummiussaqarnera
oqaatigissavarput Siumut-miit nuannaarutigigatsigu.
Naimanngitsoq Petersen, Atassut-ip
oqaaseqartua:
Kommunit killeqarfiisa ullutsinnut
naleqqussarneqarnissaat anguniarlugu inatsisartut oqallinnissannik Jakob
Sivertsen-ip siunnersuutaa pillugu Atassut-mit imatut oqaaseqassaagut.
Atassut-mit nunatsinni ineriartorneq
malinnaaffigigatsigu malittarisassanik, peqqussutinik inatsisinillu
allanngortitsisarnerit suleqataaffigisimavagut, soorlu aamma maannakkut kommuunit
killeqarfiisa ullutsinnut naleqqussarneqarnissaat anguniarlugu Inatsisartuni
oqallinnissamik Jakob Sivertsen-ip siunnersuutaa pissusissamisoorluinnartutut
isigisimagipput.
Jakob Sivertsen-ip siunnersuuteqarnermini
erseqqissumik oqaatigaa Nunatsinni angallatit pitsanngoriartortillugit
ungasissumut aalisariartarnerit piniariartarnerillu annertuumik ukiuni
kingullerni ingerlanneqalersimanerat aallaavigalugu, piffissanngortoq kommunit
killeqarfiisa ullutsinnut naleqqussarneqarnissaat, tamanna pisariaqalersoq
siunnersuuteqartup erseqqissarmagu Atassut-mit tapersersorluinnarparput.
Kommunit killeqarffii ullutsinnut
naleqqussarneqarnissaat suliassaavoq annertooq, tamatumanilu kommuunit
minnerunngitsumillu nunatsinni Kommuuneqarfiit Kattuffiat, KANUKOKA, qanimut
suleqatigilluinnarlugu suliassaq soqutiginartoq pingaartorlu
ingerlanneqartussaavoq, kommunit akornanni killeqarfilerngusaannerit siunissami
pinngitsoortinneqartassappata.
Kalaallit Nunaata nunap immikkoortuinut
kommunillu aggorneqarnerat pillugu Inatsisartut inatsisaata nr.5-ip 6. November
1997-imeersup allannguutissaanut siunnersuutit kiisalu kommunit killeqarfinnik
allanngortitsinissamik kissaatigisaat ilanngullugit suliarineqartut
Naalakkersuisut oqaatigaat, naatsorsuutigineqarlunilu Inatsisartut ukioq manna
upernaakkut ataatsimiinnissaannut saqqummiunneqarnissaat siunnerfigineqartoq
oqaatigineqarmat, Atassut-mit pissangalluta utaqqissavarput, soorlu aamma
uanga 1996-mi Inatsisartut upernaakkut Maj-imi ataatsimiinneranni Qaanaap
Kommuniani qimusseriarsuarmi killeqarfiup eqqissisimatitap II-p allanngortinneqarnissaanik
siunnersuutigisama Inatsisartunit tamanit taperserneqartup ullumimut suli
piviusunngortinneqanngitsup aaqqinneqarnissaa pisariaqartikkipput.
Taamatut oqaaseqarluta Jakob Sivertsen-ip
siunnersuutaa tamakkiisumik taperserparput, kiisalu siunnersuummut
Naalakkersuisut siulittaasuata akissuteqaataa erseqqissoq aamma akueraarput.
Upernaamullu Inatsisartut ataatsimiinnissaannut kommunit killeqarfiisa
allannguutissaannik saqqummiisoqarnissaa pissangalluta utaqqissavarput,
suleqataanissarpullu piareersimaffigalugu.
Evald Brĝnlund, Inuit Ataqatigiit
oqaaseqartuat:
Inatsisartuni ilaasortaq Jakob Sivertsen-i
nunatsinni kommunit killeqarfiisa ullumikkut pissutsinut
naleqqussarneqarnissaat siunertaralugu piareersarneq aallartittariaqartoq
siunnersuuteqarpoq.
Naak siunnersuuteqartup tunngavilersuutituaa,
imaatigut angallatit pitsanngoriartortillugit ungasissumut piniariartarnerup
annertusigaluttuinnarnera sullugigaluarlugu siunnersuut Inuit Ataqatigiit
tunngaviatigut ilassilluarpaat.
Uagummi isumaqarpugut nunatta kommuninut
aggorneqarsimanerata oqaluuserinissaa pisariaqalersimasoq. Soorunami
siunnersuuteqartup oqarneratuulli suliassaq tamanna kommunit ataasiakkaat
aammalu taakku katuffiat peqatigalugu ingerlanneqartariaqarpoq. Tamanimmi
orniginarnerpaajussaaq killeqarfinnik allanngortiterinissat imaluunniit
kommunit qanitariit kattussinnaanerat suleqatigiinnerusinnaaneralluunniit
kommunit pineqartut akunnerminni piumassutsiminnik piviusunngortussatut
siunnersuutigisassappatigit.
Ilumut minnerunngitsumik attaveqarnermi
atortorissaarutitigut pissutsit ukiuni makkunanerpiaq sukkasuumik
allanngoriartorfiupput, angalaniarnermi atortut kisiisa eqqarsaatiginagit
aammali attaveqaatit elektroniskiusut. Nalunaarasuartaateqarneq,
allakkasuartaateqarneq aamma oqarasuaateqarneq, minnerunngitsumik pisortaqarfiit
suliffeqarfiillu allaffeqarfiisa akornanni, ullumikkut qarasaasiatigut
atortulersornermit qaangerneqariikatassimalerput.
Taamaattumik nunatsinni kommunit ullumikkut
18-iusut inuttussutsimikkut assigiinngeqisut, inukinnersaat 200-t qaqilaaginnarlugit
inuttunersaallu 13.000 sinnerlugit inoqartoq, kingullermik 1985-imi
inatsisiliakkut killeqarfilersorneqarsimanerisa nutarternissaa
pisariaqalersorinarpoq.
Inuit Ataqatigiit ilaatigut taama eqqarsarnitsinni
soorunami nunami maani katilluta 56.000-t sinnilaaginnarlugit amerlatigaluta
pisortatigut allaffissornermut aningaasat atortakkavut qissimigaalaanngitsoorsimanngilavut.
Kommuninimi 18-iusuni assersuutigalugu 1998-imi
pilersaarutaasut najoqqutaralugit aningaasat 1,2 mia kr kaaviiaartinneqartussat
ilaat 304 mio koruunit allaffissornerinnarmut atorneqassapput. Imaappoq,
kommunit innuttaasunik kiffartuussinerminnut aningaasartuutigisagaasa 20 %-ii
kommunit allaffiini allaffissornerinnarmut atorneqassapput. 1997-imilu
inatsisartut ukiakkut ataatsimiinneranni oqareernitsituut Namminersornerulluni
Oqartussat allaffeqarfianni maani ukioq mannamut 300 mio koruunit
allaffissornerinnarmut atorneqartussaapput.
Allatut oqaatigalugu inuiaat 56.000
sinneqalaaginnaraluarluta 604 mio koruunit missiliorlugit nalinginik ukiumut
uagutsinnut allaffissorfigissaagut!!!
Taamarujussuaq allaffissornerup
aningaasartuutaanera Inuit Ataqatigiit pissusissamisoortuusorinngilaat,
ileqquliutipalaaginnarneqarneralu allanngortittariaqartoq isumaqarpugut.
Aamma naatsorsuutigaarput qinikkap kialluunniit
aningaasarpassuit taakku ilarpassui allanut innuttaasunut toqqaannartumik
iluaqutaanerusunut atorusunnerungaassagai.
Tamannami qinikkat, allaffissornermi atorfillit
peqatigalugit, piviusunngortissinnaavaat. Apeqqutaaginnarpoq piumassuseqarneq,
aqutsisinnaaneq sulinermilu naammassinnissinnaanermik, soorlu suliassanik
aggutaarinerunikkut aammalu sulisut pikkorissuunissaannik piumasaqartuarneq
timitaliiviginiarlugu pikkorissartitsinertigut.
Kommunilli ataasiakkaat allaffissornermut
aningaasartuutaasa qaffasippallaarnerat naalakkersuisunit ullumikkorpiaq
tikkuartuiffigiuminaattussaasoq nalunngilarput. Naalakkersuisummi
taamaaliussagunik namminneq matumik killinga saniinnarnagu
nivarujussuaqqaartariaqassavaat.
Siuliani oqareernitsitut ullumikkut qarasaasiat
aamma nunatsinni inugaarutereerput, tamakkulu attaveqatigiinnermi
atorneqarnerisa tamanit iluaqutaasunngortinniarlugit atorneqarnerisa
annertusarnissaat inatsisartuni akuersissutaareerpoq.
Taamaattumik nunatta kommuninut
aggorneqarsimanerata allanngortinneqarsinnaanera, sivisuumik
piareersarneqartariaqartussaq, utaqqeqqaarnagu Inuit Ataqatigiit qangali
kaammattuutitut oqaatigisareersimasarput, tassalu kommunit akunnerminni
kiffartuusseqatigiinnikkut suleqatigiissinnaanerisa ullumikkornit
atugaanerusariaqarnera, matumuuna kaammattuutigeqqikkusupparput.
Namminersornerulluni Oqartussat KANUKOKA-llu
akornanni suleqatigiinneq taamaattoq tamakkiisuunngikkaluartumik
atorneqareerpoq.
Taamaattumik naalakkersuisut inakkusuppavut,
kommunit kattuffiannik peqateqarlutik kommunit akunnerminni
suleqatigiissinnaanerata annertusarnissaa siuarsaaqataaffiginiaqqullugu.
Qarasaasiatigut atortulersorneq
ungasigisaqanngilaq, taamaattumik suleqatigiissinnaaneq killeqanngiusarpoq.
Takorloorsinnaavarput kommunit arlariit
ullumikkornit annertunerungaartumik suliassat agguataarsinnaagaat. Soorlu
kommunip ataatsip kommunit suleqatigiit akileraartarnermi isumagisassaat tamakkerlugit
isumagissavai, kommunip allap isumaginninnermut tunngasut tamaasa aqukkai,
pingajuata teknikkimut avatangiisinullu tunngasut, allap sulisut
akissarsiassaannut tunngasut il.il..
Nutaavimmilli eqqarsarneq ikaarsaarfiussappat
takorloorneqarsinnaavoq peqqinnissamut tunngasut, angallannikkut
atortulersornernut tunngasut, atuartitaanermut ilinniartitaanermullu tunngasut,
inuussutissarsiutitigut siuarsaanermut tunngasut, suliffissaqartitsiniarnerup
siuarsaavigineqarneranut tunngasut pinngitsooratik nunap immikkoortuini
suleqatigiiffiusussanngortinneqartut.
Taamaattumik nunatta kommuninut
aggorneqarsimanerata oqaluuserinerata ingerlaqqinnerani ilumut ullumikkutut
kommunit 18-iuinnassanersut oqallinnermut ilaatinneqartariaqartoq Inuit
Ataqatigiit isumaqarpugut.
Oqimaaqatigiinnerusumimmi nunatta immikkoortuisa
ineriartortinnissaat, aningaasallu aannertusaarlugit amerlanerpaanut
iluaqutaasumik, soorlu suliffissanik pilersitsinernut, atortariaqarnerat
pisariaqarmat nunatsinni piorsaanernut aningaasaliissutaasartut ullumikkutut
kommunikkaaginnarnagit nunattali immikkoortuinut tunngatinneqarsinnaanerat
periarfissatut eqqarsaataasariaqalerpoq.
Taamatut periuseqarnissaq 1994-imi inatsisartut
upernaakkut ataatsimiinnerisa aappaanni Inuit Ataqatigiit sinnerlugit Josef
Motzfeldtip siunnersuutigimmagu inatsisartuni tamakkiisumik
akuersissutigineqareerpoq.
Apeqqutip, kommunit nammineersinnaanerannik
attuisuugami, peqqissaarullugu piareersarneqarnissaanik siunnersuuteqartup
oqarnera sulinermi najoqqutaasariaqarpoq.
Taamali isummersorneq isertuaatsumik,
ataasiakkaatut soqutigisat pingaarnerutinnagit, inuiaqatigiinnulli
tamakkiisumik iluaqusiinissamik siunnerfeqaratariaqarpoq.
Bjarne Kreutzmann, Akulliit Partiiat:
Kommunini iluarsaaqqinnermi
ataatsimiititaliarsuaq pilersinneqarmat AP-ta naatsorsuutigisimagaluarpaa,
tassa tamanna allamut tunngatillugu oqallinnermi aamma eqqaasimavaa,
iluarsaaqqiinermik saqqummiussisoqarumaartoq. Tassami ataatsimut isigalugu
inuiaqatigiinnut akikinnerussagaluarmat. Soorlu kommunit imminnut ima
qanitsigisut allaat imminnut takungajassinnaallutilluunniit tamarmik immikkut
kommuneqarfittut ingerlatsiunnaartuuppata tamarmik immikkut
kommunaldirektĝr-ilerlutik, tamarmik immikkut kommuneingeniĝr-ilerlutik akunnerminni
assiaqutaqartutut illutik imminnut attaveqanngitsutut naalagaaffeeqqatut
kommuneqarfiusutut ingerlallutik. Naluneqanngitsutut iluarsaaqqinnermik suliami
apeqqutit taamaattut qarsuataaginnarneqarsimapput, tamannalu AP-nut
pakatsinakujuttuusimavoq.
Kommuneqarfiit killeqarfii pillugit
inatsisartuni ilaasortap Jakob Sivertsen-ip apeqquteqaataa pillugu
oqallinnermut atatillugu akissuteqaammi matumani paasivarput, Kalaallit Nunaata
nunap immikkoortuinut kommunillu aggorneqarnera pillugu Inatsisartut
inatsisaata nr. 5-ip 6. November 1997-imeersup allannguutissaanut siunnersuut
naalakkersuisut massakkut suliarigaat, suliamilu tassani kommunit
killeqarfiinik allanngortitsinissamik erseqqilluinnartumik kissaatigisaat
ilanngullugit suliarineqartut.
Taamaattumik upernaamut
ataatsimiinnissatsinnut qilanaarissavarput, tamatumuunga tunngatillugu
inatsisissatut siunnersuummik ilimasaarutigineqartutut saqqummiussisoqarnissaa.
Tassami aamma oqaaseqarfigineqarnissaa taamanikkussami tunngavissaqarnerussaaq.
Anthon Frederiksen, Kattusseqatigiit:
Inatsisartunut ilaasortap Jakob
Sivertsen-ip siunnersuutaa soqutiginarluinnarpoq, aamma naalakkersuisut
akissuteqarnerminni oqaatigisaat, tassalu KANUKOKA-p oqaluuserisassaq taanna
kommunit akornanni oqaluuseritilersaaraat naalakkersuisut ilisimareermassuk,
qularnaateqanngimmallu, aammami ilumoormat oqaluuserisassaq taanna kommunit
akornanni annertuumik iternga tikillugu oqaluuserineqaqqaartariaqarmat
aalajangiisoqartinnagu.
Taamaattumik naalakkersuisut saqqummiussaat,
aammalu inatsisartut upernaakkut ataatsimiinnissatsinnut inatsisissatut
siunnersuummik saqqummiussaqarnissartik naatsorsuutigimmassuk, taakkua
akissuteqaataat isumaqatigaara.
Jonathan Motzfeldt, Naalakkersuisut
Siulittaasuat:
Qujassutigiinnassagaluarpara taamak
naalakkersuisut inatsisartunut ilaasortamut Jakob Sivertsen-imut akissutigisaat
isumaqatigineqartigimmat, taamaalilluni suliassaq ingerlaqqissaaq upernaamullu
aamma taamaalilluni saqqummiinissaq naatsorsuutigissavarput.
Taamaattoq oqaaserineqartut ilaat
oqaaseqarfigilaarniarpakka pingasut maani attorneqartut. Siullermik
isumaqarpunga kommunit iluarsaaqqinneqarneranni qanorluunniit oqaraluarutta
Siumup oqaluttuata Ruth Heilmann-ip imanngilluinnarlugu eqqortumik oqaatigisaa
kommunit iluarsaaqqinneqarneranni tunngavigineqarsimavoq tassaasoq, kommunit
killeqarfii aporfigiunnaarlugit taamak oqarpoq Ruth Heilmann-i. Eqaatsumik
suleqatigiiffeqalernissamik assigiinngitsorpassuartigut ataqatigiissaartumik suleqatigiiffissaqartoq
Siumut-mit suliniutigineqaqqullugu
innersuussutigineqarmat.
Tassarpiaavoq aammalu nuannaarutigaara
tassani Atassut-ip oqaaseqartuata saniatigut IA oqaaserisamikkut
erseqqilluinnartumik aamma kommission-imi IA suleqataanerminni uagutsitut
kisitsisinik aamma tunngaveqartumik naatsorsuutit atukkavut tunngavigalugit
erseqqissaateqarnerat IA ullumikkut aamma qujassutigaara. Tassani ilaatigut
aningaasat tungaatigut naatsorsuutit kommission-imilu saqqummiunneqartarsimasut
ilumoorput aamma IA oqaaseqarfiginninneranni erseqqissarneqarmat. Tassa
ingerlatsinermik pingaartumik aningaasartuutit naatsorsorneqarneranni
kisitsisit uani taaneqartut tunngavissatut ilumoortutullu aallaaviusimasut
aamma oqaatigisariaqarmata.
Aammalu nammineq uagut, soorlu aamma
oqaatigineqareersoq, inatsisartut siusinnerusukkut isumaqatigiissutigaat uagut
ingerlatsivitsinni pisariillisaanerit annikillisaanerit aqqutigalugit qanoq
sipaaruteqarsinnaanerput suliarissagipput. Taannalu aamma naalakkersuisuni
maannakkut misissorneqarpoq.
Taamaattumik patsisissaqarsoraara AP
ilumuunnginnerarlugu oqarfigisariaqarlugu, tassa oqaatigineqarmat
AP-aninngaaniit kommunit killeqarfii qarsuataaginnarneqarsimasut tamannalu
AP-ani pakatsinakujuttoq. Kommunit killeqarfii aallaavigalugit kommunimi
iluarsaaqqinneq suliarineqarsimagaluarpat suliarput ukiuni pingasuni
inersimanavianngikkaluarpoq. Taanna kommission-imi ilaasortaasut tamarmik
nalunngilaat.
Taamaattumik kingumut
oqaluttarfimminngaaniit maani oqaatigissavara aamma taanna oqaluttuata
erseqqissagaa ilumoormat, kommunit qanittut imminnut suleqatigiiffissaannik
nassaarniaqqullugit innersuussutigineqarpoq. Tassanilu soorlu oqaatigereeriga
IA erseqqissaanerullutik tassani aamma kommission-ip taakkartugaanik
ilumoortunik tikkuagaqarmata. Kommunit imminnut qanittut ilaatigut nunap
immikkoortortaa ataatsimoortoq takornariaqarnikkut ataatsimut
pilersaarusiorsinnaavaat, nunap immikkoortortai imminnut qanittut
inuussutissarsiornikkut tamarmik immikkut konsulent-ilersorani kommunini ataatsimut
inuussutissarsiornikkut konsulent-eqarfimmik pilersitsisinnaanerat
innersuussutigineqarpoq. Akileraartarnikkut, ilumoorpoq aamma taanna IA-nnit
aamma taaneqarpoq, tassuunakkut aamma ataatsimoortumik nunap immikkoortortaani
akileraartarnikkut kommuninit sullissinissamik
suleqatigiittuliortoqarsinnaavoq.
Tassa naatsumik oqaatigalugu suliassat
sammiviat amerlanernit inatsisartunit isumaqarpunga paasilluarneqarluni
saqqummiussinissamut tunngavissanik maannakkut naalakkersuisut erseqqissumik
pissarsiornerat aqqutigalugu oqallinnissamut uterumaneq maani pigineqartoq
tamannalu aamma qujassutigaara.
Jakob Sivertsen, Atassut:
IA-p sullugigaluaraa kisiat paasivara
oqaaserparujussuit atorlugit oqaaseqarfigigaa, tassuunakkut takuneqarsinnaavoq
sullunartutut nalilerneqarsinnaanngitsoq.
Siunnersuutigisannut partiit tamakkiisumik
tapersiinerat, kiisalu aamma naalakkersuisut siulittaasuata akissuteqaataanut
ersarissumut sukumiisumullu qujavunga.
Kiisami kommunit killeqarfiisa ullutsinnut
naleqqussarneqarnissaat pimoorullugu sammineqartussanngortoq
malugisinnaagakku. Aamma kommunit killeqarfiisa allanngortinnissaat kisiat
siunertarinagu aammalu kommunit imminut qanittut suleqatigiissinnaanerat
ilanngullugu maannakkut ammaanneqarmat assut uannut tulluuminarpoq. Suliassat
taamaattut peqqissaarullugit suliarineqartarput, taamaattumik maannangaaq
oqallisigalugit aallartinneqarnissaat pinngitsoorneqarsinnaanngilaq. Aamma
apeqqut pineqartoq kommuninut tunngalluinnarmat kommunit peqataatinneqarnissaat
pinngitsoorneqarsinnaanngilaq.
Atassut-mit oqaaseqartup sapinngisamik
kommunit killeqarfilinngusaatinnginnissaat anguniarlugu kommunit imminnut
qanittut qanimut suleqatigiinnissaat pingaartillugu oqaatigimmagut siunnersuuteqartutut
assut iluaraarput.
Assortuuterusaarneq
angusarinnissarigaluamut kinguarsaataasaqisoq nalunngilarput, taamaattumik
maannakkut innersuussutigineqartut partiinit naalakkersuisuninngaanniit aamma
akissut sukumiisoq qujarullugu tiguara.
Anders Andreassen, Inatsisartut Siulittaasuat:
Taamaalilluni imm. 16 oqaluuserineqarnera
tamaanga killippoq, upernaamullu aamma uterfigineqaqqikkumaarluni.
Oqaluuserisaq naammassivoq.