Oqaluuserisassani immikkoortoq 18-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataasinngorneq 16.januar 1998 nal. 16.05
Ataatsimiinnermik aqutsisoq: Inatsisartut Siulittaasuat Anders Andreassen.
Josef Motzfeldt, siunnersuuteqartoq, Inuit Ataqatigiit:
Ataatsimiinnissamut matumunnga Inuit Ataqatigiit sinnerlugit imaattumik siunnersuuteqarpunga: Nunat tamalaat akornanni niueqatuigiinnikkut kattuffissuup World Trade Organization-ip (WTO) aalajangersagaanni Kalaallit Nunatta inissisimanerata tunngaviusumik oqaluuserineqarnissaanik isummerfiginissaanik, isummernerullu danskit naaalakkersuisui peqatigalugit WTO-mut saaffiginnissutiginissaannik siunnersuut.
Tunngavilersuut: Apeqqut, nunatsinni tunisassiorfinnik, suliffinnik aallartitsiniarnermut aammalu tunisassianik puisineersunik avammut tuniniaanermut soqutiginaateqarami piffisami kingullermi Inatsisartuni oqallittarnerni ilanngunneqartarpoq. Itinerusumilli immikkut oqaluuserineqarnissaannut siunnersuuteqarnitsinnut WTO-mit nunarsuarmi nunat siuarsimassutsikkut assigiinngitsunut arlaqartunut immikkoortinneqarsimaneranni nunatta qanoq inissinneqarsimasinnaanera qitiutipparput.
Ilaatigut 1997-imi Inatsisartut Aningaasaqarnermut Ataatsimiititaliaata danskit Statsministeriata nunatta aningaasaqarneranut ataatsimiitsitaliaannit ataatsimeeqateqarneratigut paasinarsivoq immikkut ilisimasaqartunit ilimagineqarpoq Kalaallit Nunarput nunanut allannut apeqqutini danskit naalakkersuisuisa oqartussaaffianiikkami apeqqutini nunat tamat akornanni niueqatigiinnermi tunngasuni Danmarkip inissisimaneratut nalunaarsorneqarsimassasoq, tassa nunatut suliffissuaqarnikkut inerisimanerpaatut. Tamannalu ilumoorsimassaguni eqqortuliornertut taaneqarsinnaanngilaq, assersuutigalugumi taaneqarsinnaavoq nunatta Danmarkimut EU-mut ilaasortaasumut naalagaaffeqataagaluarluni aalisarnikkut apeqqutini aalisakkanillu akitsuutseqanngitsumik EU-mut tuniniaasinnaanermik isumaqatigiissuteqarsimasinnaannera.
Nunarput WTO-p nalunaarsuinerani eqqortumik inissisimanissaa pngaaruteqarpoq makku pillugit. Nunatsinni suliffiit amerlasuut pilersinneqarsinnaagaluarneranni maanni suliffeqarfiusinnaagaluartut minnerunngitsumik aallartisarnerminni aningaasartuutigisartakkamik qaffasippallaarnerisigut nunanit allanit eqqussorneqartunit unamminiarsinnaannerat killeqartorujussuuvoq. Maanni suliffeqarfiusinnaagaluartut taama aallartisarnermi avataaneersunut unammisinnaannginnermik aporfeqartartut, assersuutigalugu sanaartornermi atortussanik aammalu atisanik sullisaanerusunik sanaartorfiusinnaapput. Oqartoqartarneratulli tamakku illersorniarlugit avataanit eqqussukkanut killilersuutaasumik akitsuusiisinnaaneq imaluunniit ingerlatsivinnik tapersiisinnaaneq WTO-mi aalajangersakkanik aporfeqartinneqarnerartarpoq. Ungasinnerusormi eqqarsaatigalugu pisiassanik akikitsunik nuanit allanit pisiarisinnaasaraluatsinnik mattussineq isumatusaarnertut oqaatigineqarsinnaanngikkaluarpoq, tamatumali nalilerniarnerani inuiaqatigiinnut sunniutigisinnaasai tamakkerlugit nalilerneqartariqarput, soorlu suliffissaqartitsinikkut aammalu nunanit allanit eqqussukkatigut nunatta niuernikkut inissisimanera eqqarsaatigalugu, handelsbalancimik taaneqartartoq.
Nunat siuarsagassat aammalu nunat suliffissuaqarnikkut suli naammattumik piorsaavigineqarsimanngitsut eqqarsaatigalugit piffissami killilimmik ukiut tallimat angullugit tunisassiarisinnaasatik akitigut illersorlugit iliuuseqarsinnaannerat WTO-p aalajangersagaannik sanioqqutitsisuunngitsut isigineqarpoq, taammaattumik suliffiutigisinnaasagut, tunisassiortuuppata angallassinermilluunniit ingerltsiniartuuppata aallartisarnerini ukiut tallimat angullugit illersorusukkutsigit, tamanna nunat tamat akornanni isumaqatigiissutini unioqqutitsinertut isiginiarneqartussaagunanngilaq.
WTO-p aalajangersagai eqqarsaatigalugit nunatsinni suliassaq alla annertooq puisinik tunisassiat USA-mut eqquteqqunagit amerikkarmiut inatsisiliorsimanerannut tungasuuvoq. Inatsit miluumasut imarmiut illersorneqartariqarnerannut tunngasuunerarneqarpoq, MMPA-mik, qularnanngilaq oqallinnermi maanni taaneqartassasoq. Inatsisip pineqartup WTO-mi aalajangersakkanik sanioqqutitsisuusinnaannera Inuit Issittormiut Kattuffiata suliatut ingerlatereerpaa, tamaakkaluartoq pisariaqarpoq Namminersornerullutik Oqartussat pisortatigoortumik tamanna isumagineqarluni danskit, pisortatigoortumik isumagineqarluni danskit oqartussaassuinut apuunneqarnissaa.
Peter Grĝnvold Samuelsen, Takornariaqarnermut, Angallannermut, Niuermut Attaveqaatinullu Naalakkersuisoq:
Qujanaq, Inatsisartunut ilaasortaq Josef Motzfeldt nunarsuarmi niueqatigiinneq pillugu suleqatigiiffimmut WTO-mut attuumassuteqarnerput pillugu arlalinnik apeqquteqarpoq.
Naalakkersuisut 1994-imi novemberimi Namminersornerullutik Oqartussat WTO-mik isumaqatigiissutip, Inatsisartut Nunanut allanut Sillimanissamullu Ataatsimiititaliaannut aamma saqqummiunneqartumut, 1. januar 1995-imi atuutilernerani immikkut aaqqissuussivigineqaratik ilanngunnissaannik danskit naalakkersuisuisa siunnersuutaannut akuersipput.
Naalakkersuisut WTO-mi isumaqatigiissummut ilaalernissamut akuersinerat nunarsuaq tamakkerlugu suleqatigiiffimmut ilaasortaanerup iluaqutissartaasa akornutissartaasalu nalilersorneqaqqissaarnerannik tunuliaquteqarpoq. Taamaammat nunatta WTO-mi ilaasortaanera danskit naalagaaffeqatigiiffiata ilaatut inissisimavoq, tassa nunatut tamakkiisumik suliffissuaqarfiusutut ilaasortaalluta.
Ilaasortatut inissisimanerup allanngortinneqarnissaa akuersissuteqartarnermut tapiissuteqartarnermullu tunngasut aamma niuernermut akitsuusiisarnermullu politikkip WTO-mit misissoqqissaarneqarneranik nassataqassaaq, taamaaliortoqarneragullu nunarput eqqussuinermi akitsuutinut assigisaanullu tunngasutigut immikkut piumasaqaatinik arlalinnik piumasaqarfigineqaratarsinnaalluni. WTO-mi isumaqatigiissutit annertoorujussuupput paasiuminaaqisunillu malittarisassartaqarlutik, WTO-mili isumaqatigiissutini pingaarnertut tunngavigineqartut pingasut ima naatsumik nassuiarneqarsinnaapput: Siullermik, nunap WTO-mut ilaasortaasup nunamut ilaasortaasumut allamut akuersissuteqartarnera iluaqutissiisarneraluuniit (assersuutigalugu nioqqutissanut akitsuutit immikkut appasitsinneqarneri) ingerlaannartumik nunanut WTO-mut ilaasortaasunut allanut atuuttussanngortinneqassapput.
Tunngavik taanna iluaqutissarsinerpaanissamik tunngavimmik taaneqartarpoq. Tamatuma nassatarisarpaa nuna nukittooq iluaqutissarsivissaminik isumaqatigiissuteqarpat, nuna mikisoq sanngiitsoq nammineerluni isumaqatiginninniaraluaruni assingusunik angusaqarsinnaanngikkaluartoq, taamaaqataanik imaaliallaannaq iluaqutissarsissarmat. Aappassaattut, nuna WTO-mut ilaasortaasoq, nunami namminermi tunisassiortunik iluaqutissiisoq, nunani allani tunisassiortunik assingusunik iluaqutissiissaaq. Akerlianillu tamanna isumaqassaaq nuna alla, assersuutigalugu nunat allat tunisassiaannut immikkut avatangiisitigut piumasaqaasioruni, nunami namminermi tunisassiassanut unammillertuusunut aamma assinganik piumasaqaateqassasoq.
Tunngavik taanna nunami sumeersuunermik tunngavimmik taaneqartarpoq. Pingajussaattut, nunat ilaasortaasut WTO-mik isumaqatigiissutit nassuiarneqarnerannik isumaqatigiissinnaanngitsut isumaqatigiinnissartik anguniarlugu isumaqatigiinniassapput. Oqaloqatigiinnikkut nalinginnaasukkut isumaqatigiittoqarsinnaanngippat saqitsaakkunnaarsitsiniarluni aaqqissuussinerup atornissaanut pisussaatitaapput. Saqitsaakkunnaarsitsiniarluni aaqqissuussineq isumaqatigiissaassarnermut aalajangersimavissunik periuseqarfiusumut assinguvoq. Nuna isumaqaruni nuna alla WTO-mi isumaqatigiissutinik unioqqutitsisoq, nuna unnerluussisuusoq aalajangiisarfimmut (eqqartuussivimmut assingusumut) suliassanngortitsisinnaatitaavoq.
Aalajangiisarfimmi oqartussat suleriaasii eqqartuusisutullu aalajangiisussat kikkuunissaat erseqqivissumik nassuiaaserlugit aalajangigaapput. Aalajangiisarfiup aalajangigai ataqqineqassapput. Nuna nunamik allamik unnerluussitilluni ajugaatinneqarpat, nunap ajorsartup aalajangigaq ataqqisussaava. Aalajangiisarfiup aalajangiinera illuatungeriinnit tamanit ingerlatitseqqittarfimmut nangititassasut ingerlateqqinneqarsinnaavoq, tassanilu suleriaasiusut il.il. aalajangiisarfimmisut ipput. 1996-imi decemberimi WTO-p siullermeerluni ministerinik ataatsimeersuartitsineranut danskit aallartitaat peqatigalugit peqataavunga, tassanilu Nunanut allanut Ministeriaqarfimmut nunatta Danmarkillu WTO-mut ilaasortaaneranik ulluinnarni allaffissornikkut aqutsinermi akisussaasumut qanittumik toqqaannartumillu attaveqaatinik pilersitsivugut.
Suleqatigiilerneq tamanna Takornariaqarnermut, Angallannermut, Niuernermut Attaveqaatinullu Pisortaqarfiup siorna aprilimi Nunanut allanut Ministeriaqarfik suleqatigalugu WTO pillugu Namminersornerullutik Oqartussat qitiusumik allaffeqarfianni sulisunik isumasioqatigiissitsineranik kinguneqarpoq. Isumasioqatigiissitsinermi qitiusumik allaffeqarfimmiut WTO-mik paasisimasaqarnerulernissaannik neqeroorfigineqarnissaat siunertarineqarpoq, tassunga ilanngullugit taassuma siunertaa sulineralu, kiisalu immikkut pingaartillugu qitiutinneqarluni nunatta ilaasortaanera tamatumalu pingaassusia. Isumasioqatigiinnermi paasinarsivoq inuussutissarsiortortavut suliffeqarfiutivullu arlalitsigut immikkut pisarivut, taakkulu WTO-mi malittarisassanut tunngasutigut akerleriittoqalersinnaaneranik saqqummeriaannaasunik ulorianartorsiortitsisut.
Isumasioqatigiinnerup kingunerisaanik isumaqatigiissutigineqarpoq, siunissami WTO-mut attuumassutinut isummernissarput siunertaralugu, nunatsinni aningaasatigut tapiisarnernik aaqqissuussinernik inatsisinillu aqqusaartuilluni sukumiisumik misissunissami, WTO-mut tunngatillugu ajornartorsiuteqarfiulersinnaasunik, Nunanut allanut Ministeriaqarfiup Namminersornerullutik Oqartussat ikiussagaa. Tamatuma kingorna suleqatigiissitap pisortaqarfinnit assigiinngitsuneersunit inuttaqartup, Takornariaqarnermut, Angallannermut, Niuernermut Attaveqaatinullu Pisortaqarfimmit ataqatigiissaarneqartup, nunatsinni inuussutissarsiorneq pillugu inatsisinut aningaasatigullu tapiisarnernut aaqqissuussinernut atuuttunut tunngassuteqartut allakkiat amerlaqisut suliarai.
Paasissutissat Nunanut allanut Ministeriaqarfimmut tunniunneqarput, taannalu suliassaqarfinnik taagorneqareersunik WTO-mi isumaqatigiissummut attuummassuteqarfinnut sanilliussilluni nalilersuilluni aallartereerpoq. Kiisalu WTO-p iluani aaqqissuussaaneq, inatsisit atuuttut aningaasatigullu tapiissuteqartarnerit nalilerneqarnerat aallaavigalugit Nunanut allanut Ministeriaqarfik iliuusissatut pilersaarummik siunnersuuteqassaaq, ilaasortaanermi soqutigisat immikkut ittut pisariaqartullu pitsaanerpaamik isumerfigineqaqqullugit, nunatta siunissami qanoq WTO-mut tunngatillugu inissisimanissaanik imaqartut. Nunanut allanut Ministeriaqarfiup oqaaseqaatai tiguneqariarpata nassuiaammik suliaqartoqarumaarpoq, taannalu ukiakkut katersuunnissamut Naalakkersuisut Inatsisartunut saqqummiutilersaarpaat.
Nassuiaatip nunatta siunissami WTO-mut attuumassuteqarnissaa imarissavaa, ullumikkornit sukumiinerusumik tunngavissaqarluni isummernissaq periarfissaqalersillugu. Naalakkersuisut isumaqarput WTO-mut ilaasortaaneq niuernikkut soqutigisatta immikkut ittut nukittorsarnissaannut atorsinnaagipput. Nunatta nunanut suliffissuaqarnikkut siuarsimaqisunut soorlu USA-mut EU-mullu sanilliullugu naligitinneqartarnerata naleqquttuujuaannannginnera Naalakkersuisut Inatsisartunut ilaasortaq Josef Motzfeldt isumaqatigaat.
Nunatta immikkut nunarsuarmi inissisimara aningaasartornaqisumillu attaveqaatitigut pilersuinikkullu atortulersugaanerput pissutigalugit, nunarput nunat tamalaat akornanni niueqatigiinneranni ajoqqutaasinnaasumik sunnertiasoralaarsuuvoq, taamaattumillu nammineq tunisassiavut tapersersorniarlugit immikkut iliuuseqarfiusariaqarlugit. Taamaammallu aamma Naalakkersuisut kissaatigaat WTO pillugu nassuiaatip ukiakkut katersuunnermi saqqummiunneqarnerata kingorna Nunanut allanut Ministeriaqarfik peqatigalugu nunatta immikkut aaqqissuussivigineqarnissaanik WTO-p Genévemi allattoqarfianut isumaqatigiinniarsinnaanissarput.
Kissaatigaarput immikkut aaqqissuussivigineqarnitsigut soorlu assersuutigalugu nunat ineriartortut ilaasa pisinnaatitaaffiisa assigiisaasa ittunik pisinnaatitaaffeqalissasugut, nunatut ineriartortutut inissinneqanngikkaluarluta. Tamanna anguneqarsinnaassappat, soorlu savaaqqat neqaannik nunanit allanit eqqussukkanik annertujaamik akitsuuteqartitsinitsinnik ingerlatsiinnarnissatsinnik kinguneqarnissaa neriuutigaarput, aamma nunatsinni inuussutissarsiortut ilaannut immikkut aningaasatigut tapiisarsinnaanissarput ingerlatiinnarsinnaassagipput.
Naggasiullugulu Inatsisartunut ilaasortat eqqaasinniarpakka WTO-mi isumaqatigiissutit paasiuminaannerujussuat pissutigalugu USA-p Miluumasut Imarmiut Illersorneqarnissaannik Inatsisaa miluumasunik imarmiunit tunisassiat USA-mut eqqunneqarnissaanik inerteqquteqartitsisoq WTO-mi isumaqatigiissutinut akerliunersoq imaaliallaannaq nalilerneqarsiinnaanngimmat. Tamanna inaarutaasumik aalajangiivigineqassappat Danmark nunarput sinnerlugu WTO-p saqitsaakkunnaarsitsiniarluni aaqqissuussisoqarfianut USA-mik suliassanngortitsisariaqassaaq. WTO-p iluani aaqqissuussineq aqqutigalugu saassussissagutta akiniutitut arlaatigut iliuuseqarfigineqanngitsoornavianngilagut, navianartorsiortinneqartariaqanngilagullu uagutsinni iluarsisassagut iluarsereersimatinnagit.
Naalakkersuisulli isumaqarput inatsisitta aningaasatigullu tapiisarnermi aaqqissuussinitta WTO-mut naapertuunnerat, WTO-milu siunissami qanoq inissisimanissarput qulaajarneqaqqaartariaqartut, Miluumasut Imarmiut Illersorneqarnissaannik Inatsisip danskit nunanut allanut ministeriaqarfiannut suliassiissutigineqassanersoq, WTO-mi oqartussanut aalajangiisartunut suliassanngortinneqarnissaa siunertaralugu isummertinnata. Taamaattumik Naalakkersuisut Nunanut allanut Ministeriaqarfimmik suleqateqarneq taaneqa-reersoq aallartissimavaat neriuutigalugulu tamannarpiaq ukiaru apeqqummut Josef Motzfeldtip saqqummiussaanut oqalliseqarnissamut pitsaasumik tunngaviliissasoq.
Karl Lyberth, Siumup oqaaseqartua:
Nunat tamalaat akornanni niueqatigiinnikkut
kattuffissuup aalajangersagaanni Kalaallit Nunatta inissisimanerata
tunngaviusumik oqaluuseralugu aallartilinnginnerani siullerpaamik
nalilerniaqqaartariaqarparput nunatta assigiinngitsutigut ineriartornerata
sumut killinnerara imaluunniit nunat allanut naleqqiulluta suliffissuaqarnikkut
ineriartornitsigut sumut killissimanerput. Nunatsinni innuttaasut
ukiorpassuarni qasusuillutik eqiasuillutillu nersortariqartumik sulinermikkut
annertuumik ineriartornikkut angusaqarsimavugut. Nunarpullu
arlalippassuartigut nunanut siuarsimanerpaanut sanilliussinnaagaluarpoq.
Siumup tungaanniit miserratiginagu
oqaatigissavarput suli nunarput arlalitsigut, soorlu angallannertigut,
nammineq isertitatsigut, innuttaasut ukiumisigut agguataarnerisigut allatigullu
nunatut suliffissuaqarnikkut inerisimanerpaat akornaniilersimannginnerput
nassuerutigisariaqaripput. Ilami nunarput sulifissuaqarnikkut ineriartornera
namminersorneruneralu maannamut piffisami sivikitsuinnarmi ingerlasimavoq
naalakkersuisullu siulittaasuta Hr. Jonathan Motzfeldt-ip ukiortaami
oqalugiarnermini Namminersorneruneq eqqorluinnartumik oqaatigivaa, tassasoq
niviarsiannguaq nunarsuarmi nutaaliaasumi tamatumalu nassataanik tamanik
nassataqarluni inunngortoq. Niviarsiaq 18-inik ukiulik aatsaat siuarsarluni
angusaqarnialeruttortoq. Nunarsuarmi sutigut ineriartorneq sukkaqaaq,
minnerunngitsumik niuernikkut. Nunarput siumukaqataalluni ineriatoqataavoq
aammami kipinani siumukartuassaaq. Taamaattumik nunarsuarmi ineriartornermut
sukkaqisumut katataassanngikkutta nunat tamalaat akornanni niueqatigiinnikkut
kattuffissuarmi WTO-mi nunatta peqataanera Siumut tungaanniit tamakkiisumik
akuersaaratsigu erseqqissassavarput.
Kattuffissuarmut tassunga nunanit
132-init ilaasortaqartumut ilaasortaanitsigut nunat niueqatissagut
ajornannginerusumik oqaloqatigisinnaasavavut, taamatullu nunatta kusanartumik
avammut kiinnertarnissaa ajornannginnerulissalluni. Niueqatigiinikkut
kattuffissuarmi sumiluunniit nunatta peqataanera ingerlaavartumik aamma
Inatsisartuni nalilersortuartariaqarpoq, soorlu matumani apeqqutip
Inatsisartuni ilaasortamit Hr. Josef Motzfeldt-imit isummerfigeqquneqartoq
pillugu taamaaliussalluta. Naalakkersuisut nassuiaateqarneratut ilumoorpoq
WTO-mi isumaqatigiissutit nunatsinni Naalakkersuisunit 1994-imi ukiakkut
nalilersuilluareernikkut ilalerneqarsimapput, tamannalu sioqqullugu
Inatsisartuni Nunanut allanut Sillimaniarnissamut Ataatsimiititaliaannut
apeqqut saqqummiunneqarsimalluni.
Oqareernitsituut nunarput WTO-mut
ilaasortaanissaa Siumumiit pissusissamisoorluinnartutut pisariaqartutullu
isumaqarfigaarput. Taamaakkaluartorli Siumup tungaanniit
eqqaasitsissutigissavarput apeqqutit taamatut pingaaruteqartigisut
pineqartillugit Inatsisartut tamarmiusut saqqummiivigineqartarnissaat pingaaruteqarluinnarmat.
Qallunaat Nunaata WTO-mi naalagaaffittut ilaasortaanerata ataanilusooq nunarput
maannakkut tamakkiisumik WTO-mi ilaasortatut inissisimavoq, tassalu
naalagaaffiit aningaasarsiornikkut siuarsimanerpaat assigalugit. Matuminnga
oqaluuserisassanngortitsisup isummerfigeqqusaa Naalakkersuisut
akissuteqaataanni ersarissumik akineqartoq manna isumaqatigigatsigu Siumup
tungaanniit ersarissumik nalunaarutigissavarput.
Nunatsinni Naalakkersuisut qallunaat
naalagaaffinnit, tassanilu Nunanut allanut Ministeriaqarfimmik qanimut
suleqatiginnillutik nunatta WTO-mi ilaasortaanerata sukumiisumik
nalilersorneqalereersimanera paasillugu ilalerparput. Tamatumani pisariaqarpoq
WTO-mi ilaasortaanerup pitsaaqqutai sanngeeqqutaalu ilanngullugit
qaqilerneqartariqarnerat. Nunatut siuarsimasutut inerisarsimasutut
ineriartortitassatulluunniit nalilerneqarluta, aviisitigummi
ilassortaassanersugut aamma nalilersorneqassaaq. Naalakkersuisut
isumaqatigaavut oqarmata WTO-mi ilaasortaalersimanitsigut piginnaatitaaffiit
pisussaaffiillu naligiissumik naammassiniartariaqarigut, ullumikkullu
inissisimanerput aallaavigalugu pisussaaffitsinnut atatillugu
apeqquserneqarsinnaassunik inatsisitigut akitsuutsitigulluunniit
aaqqissuussisimanigut ilanngullugittaaq nalilersorluartariaqarpagut. Nunammi
tamalaat akornanni suleqatigiiffissuarmi peqataasagutta tamatuma
iluaqutissartaanik pissarsinitta saniatigut uagutsinnut piumasaqaataasut ulloq
sunaluunniit takusarneqarfissarput eqqarsaatigalugu aamma naammassiniartariaqaratsigit.
Nunarsuarmioqataanerput Siumuptamakkiisumik akueraa, tamatumani pisussaaffigut
piginnaatitaaffigullu ilanngullugit.
Nunanik allanik niueqateqarnitsinni
inissisimalluarnissarput, isumaqatigiissuteqarluarnissagut, allanillu qanoq
pissusilersornissarput pillugu tatigineqarluta
naatsorsuutigineqarluarsinnaasutut pissuseqarnissarput
pingaartilluinnartariaqarparput. WTO-mi ullumikkut inissimanitsinnit allaanerusumik
inississinnaanerput nalilersuilluarnikkut pissaaq. Nakooqqutai
sanngeeqqutigisinnaasaalu tapullugit.
Taamaakkaluartorli aamma
erseqqissumik unneqqarissumillu oqaatigisariaqarparput inuussutissat
sullissinerilluunniit suugaluartut nunanit allanit pissarsiarisinnaasatta
noqqaassutigisinnaasattalu akitsuusernerisigut, allatulluunniit killilersornerisigut,
maani inuuniarnermi aningaasartuutit qaffasereeqisut suli qaffariarsinnaanerat
mattussinnaassannginnatsigu. Tamanna Naalakkersuinikkut kissaatiginartuunersoq
siunnerfiilluunniit allat pingaartinnerussallugit oqimaaqatigiissitsisoqartariaqassaaq.
Puisit amiisa USA-mut eqquteqqusaannginneranut tunngatillugu apeqqummut
Naalakkersuisut akissuteqaataat naammagisimaaratsigu Siumup tungaaniit
annerusumik oqaaseqarfigissanngilarput. Tassungali tunngatillugu
oqaatiginngitsoorusunngilarput ajornartorsiutip pineqartup nunatsinnut
pingaaruteqarluinnarmat, minnerunngitsumik piniartut eqqarsaatigalugit.
Siumumiit neriuutigilluinnarparput
Naalakkersuisut suliniutaat iluatsitturnik kinguneqarluarumaartut.
Naggataasumik Siumup tungaanniit
oqaatigissavarput Naalakkersuisut akissuteqaataat iluarisimaaratsigu,
paasinarmammi nunanut allanut niueqatigiinnikkut ajornartorsiutinik siunissami
takkussinnaajumaartunik siumut isiginnereerluni aaqqiiniutaasut, tamaattumik
Naalakkersuisut Siumup tungaanniit sulilluarnissaannik
angusaqarluarnissaannillu kissaappagut. Taamatut oqaaseqarluta Siumup
tungaanniit piumasarissavarput suliami matumani Inatsisartut Niuernermut
ataatsimiitsitaliaata ingerlaavartumik malinnaatrinneqarnissaa.
Finn Karlsen, Atassutip oqaaseqartua:
Naalakkersuisut 1994-imi novemberimi
Namminersornerullutik Oqartussat nunarsuarmi niueqatigiinnikkut
kattuffissuarmik WTO-mik isumaqatigiissutaat, Inatsisartut Nunanut Allanut
Sillimaniarnermullu Ataatsimititaliamut saqqummiutereerlugu 1. januar 1995
atuutisilerpaat. Inatsisartunut ilaasortaq Josef Motzfeldt isumaqatigiissummut
tunngasunik arlalinnik apeqquteqarluni Inatsisartunut suliassanngortitsivoq.
Inatsisartunut ilaasortap tunngavilersuutaasa ilai soqutiginarluaraluartut,
taamaattoq Takornariaqarnermut. Angallannermut, Niueqatigiinnermut
Attaveqaatitigullu Naalakkersuisup erseqqilluinnartumik akissuteqaateqarnera
naatsuaqqamik oqaaseqarfigissavarput. Naalakkersuisup erseqqissumik
akissuteqaataani nassuiaatigai suliaq ingerlasoq, ukiamullu Inatsisartut
ataatsimiinneranni nassuiaammik saqqummiussisoqassasoq.
Taamaattumik annerusumik
oqaaseqarnata oqaatigineqareersut ukiakkut ataatsimiinnissami nassuiaammik
saqqummiussisoqarpat naatsorsuutigaarput annersusumik oqaaseqarumaarluta.
Taamatut naatsumik oqaaseqarluta Naalakkersuisup akissuteqaataa tusaatissatut
tigugallarlugu ukiamut saqqummiinissamut utaqqigallarniarpugut.
Johan Lund Olsen, Inuit Ataqatigiit
oqaaseqartuat:
Inuit Ataqatigiiniit
siunnersuuteqartoq, Josef Motzfeldt, isumaqatigalugu oqaatigissavarput, oqaluuserisassarlu
manna, tassalu nunat tamalaat akornanni niueqatigiinikkut kattuffissuarmut
WTO-mi nunatta inissisimanera Inatsisartunit nalilersuiffigissallugu maannakkut
piffissanngormat aammalu tamanna pissusissamisoorluinnarmat.
Siunnersuuteqartutummi Inuit Ataqatigiit isumaqarpugut danskit naalagaaffiannit
1995-ip aallartinnerani kalikkatarineqarluta maannakkut inissisimalersimanerput
unnersiutissaangitsoq, ilaatigummi suliffiit amerlasuut pilersinneqarsinnaannerinut
nunatsinnilu tunisassiorfinnik aallartitsiniarsinnaanerput minnerunngitsumillu
suliffeqarfiutigeriikkatta pioreersut nioqqutissianik avataaneersunut
unammillersinnaaqqullugit illersugaanissaraluat sapanginneqarsimavoq,
maannakkutut nunarput nunatut suliffissuaqarnikkut inerisimanerpaatut
kukkusumik inissisimatinneqarnitsigut.
Ukiunimi kingullerni pingasuni
WTO-mut immikkut aaqqissuussiffigineqarsimanata ilaalereersimalernitsinni
misilittagaqalereersimavugut huraartuutigineqarsinnaanngilluinnartunik, soorlu
kukkukuut perlukuisa savaaqqat neqaasa New Zealand-imeersut, puulukit
uummatersuisa il.il. immikkut akitsuusersuinikkut kalaaliminernik taarserlugit
aamma akikillileerusukkaluaraanngatta. Kalaalierngimmi peqinnangaartut
illersorniaraluaraanngatsigit tamatigorluinnangajak Naalakkersuisutta
WTO-orsuaq ersisaarutigijuartarpaat, tassagooq nunarput isumaqatigiissummut
tassunga pituttugaalluni Danmarki peqatigalugu ilaareermat, ajornatitaavoq
immikkut akitsuusersuinissarput.
Tamaattumik misilittakkat taamaattut
misillerfigereerlugit nunat siuarsagassat aammalu nunat suliffissuaqarnikkut
suli naammattumik piorsaavigineqarsimanngitsut eqqarsaatigalugit immikkut
aaqqissuussiffigineqarsimanerattut nunatta eqqortumik WTO-mi siunissami aamma
inissisimalernissarput. Eqqaamaqqussavarpummi nunarput isorartoorsuulluni
siamasissumik inuiattut ikittun-nguulluta aamma
inuuniarfigigatsigu, nunarsuarmi niueqatigiinikkut attaveqarfiginiagassatsinnut
ungasilluinnartumik aamma inissisimasoq, taamaattumillu
inuussutissarsiutigineqarsinnaasut tungaatigut qaffatsitsisinnaasunik aamma
suliffiit eqqarsaatigalugit aningaasartuuteqarfiusinnaareersoq.
Taamaattumik pissutsit tamakku
eqqarsaatigiinarlugilluunniit nunarput nunatut suliffissuaqarnikkut
inerisimanerpaatut, soorlu USA-tut EU-mi nunat amerlanerpaat assigalugit,
Japanikkunnut nunanullu allarpassuarnut imaaliallaannaq
assersuuneqarsinnaanngilaq, immikkulli nunarsuarmi niueqatigiinniarnikkut
isiginiarneqartariaqarluta. Nunatta pissarititai atorlugit
nioqqutissiorusunnerput taamatullu aamma nunatta imminut tunisassiassatigut
pilersorneqarsinnaajuarnissaa ineriartortitsiviunissaalu siunertaralugu
taamaattumik aamma anguniartuartariaqarparput nunani allani niueqateqarnitta pitsanngorsaavigiuarnissaa.
Tamannali anguneqassappat Inuit Ataqatigiit isumaqarluinnarpugut nunanut
allanut unammillersinnaanerput appakaanniarnitsinni WTO-p iluani nunanut
siuarsagassanut atugassaritinneqartut assigalugit tunisassiatigut
suliffeqarfiutittalu illersorneqarsinaaqqullugit ukiuni aalajangersimasunik
aaqqissuussiffigineqarsinnaasariqartugut. Tamanna pissusissamisuussaaq
inuiaqatigiit kalaallit ukiut untritilikkaat atoqqaarlugit
ineriartortitsivineqaqqaarsimanngilagut, taamaalillutalu Europamiutulli
allatuulli periarfissinneqarsimanngisaannarluta aallaqqaataanniit
inuussutissarsiornikkut aamma peqataanissatsinnut.
Taamaalilluta ilisimaneqartutuut
sanaartortitsinermi, silaannakkut angallassiniarnikkut allatigullu
aningaasatigut tunuliaquteqarfioreerfiusussanut nunap inuii
unammillersinnaallutillu peqataatinneqarnissaat maannamut ajornakusoorsimavoq,
illua tungaatigut aningaasat nunatsinni pilersinneqartut nunanut allanut
annissorneqaannarnerannik aamma kinguneqartumik. Taamaattumik nunatta aningaasarsiornikkut
nammineeriartulernissaa imminullu napatinnialersinnaanissarput danskit
naalakkersuinikkut suliaqartuisa oqarluartaarniutigiinnassanngikkunikku
ilumoorutivillugu illersorta-riaqarpaatigut WTO-mi nunatta immikkut
aaqqissuussifigineqarnissaa anguniarlugu, soorlumi EF-imit aningatta taamatut
aamma OLT-imik taallugu EU-mut anereerattali
aaqqissuussifigisimagaatigut. Inuit Ataqatigiit soorunami
nuannaarutigivarput Naalakkersuisutta nunatta immikkut
aaqqissuussiffigineqarnissaanik WTO Genevemi allattoqarfianut isumaqatiginnialernissaq
aamma ammaffigimmassuk.
Inuit Ataqatigiilli aamma
isumaqarpugut Naalakkersuisugut siunnersuuteqartumut akissuteqaamminni
nangaasaarivallaarpaluttumik nipeqarlutik aamma saqqummertut, pingaartumik
miluumasut imarmiut illersorneqarnissaanik USA-p inatsiseqartitsinerannut
tunngatillugu. Inuit Ataqatigiit tamanna ajusaarnartuutipparput isumaqarattami
inatsit pineqartoq inuttut pisinnaatitaaffitsinnik annertuumik
innarliiginnarani aamma inuutissarsiutitigut inerisaanissamut periarfisatsinnik
killilersuereeqisoq, taamaattumillu piaarnerpaamik Danmarki peqatigalugu
allan-ngortinniarneqartariaqartoq.
Taamaattumik isumaqarpugut suliassaq
taanna WTO-p saqitsaakkunnarsitsiniarluni aaqqis-suussisoqarfianut maannangaaq
aamma suliassanngortinneqareertariaqartoq, amerikkarmiummi nunatsinnut
akiliuteqannguaratik maani sakkutooqarfiliorsinnaappata, allaallumi aamma
Inughuit nunaanni utertitserunngippata,
sooq taava akuersaaginnassavarput aamma inuutissarsiutigisinnaasatta ilaannik
amerikkarmiunit akornusersortuarneqarnissarput, Marine Mamals Protection Act,
tassa MMPA aqqutigalugu. Taamatullu WTO-mut nunatta ilaatinneqarnera pillugu
oqaaseqareerluta, siunnersuuteqartorlu Josef Motzfeldt oqaluuserisassami pingaaruteqartumik
massuminnga aamma maanga oqqussisoq qutsavigiutigalugu Inuit Ataqatigiit
naatsorsuutigivarput WTO-mut nunatta ilasortaanerata suut
iluaqutissartarinerai suullu akornutaasinnaasutut isigineqarsinnaanersut
pillugit Naalakkersuisut ukiamut sukumiinerusumik saqqummiussassaqarumaartut.
Bjarne Kreutzmann, Akulliit Partiiat:
WTO-mut isumaqatigiissummut
Namminersornerullutik Oqartussat immikkut aaqqissuussivigineqaratik januarip
aallaqqaataani 1995-mi ilanngunnissaannik danskit naalakkersuisuisa siunnersuutaannut
naalakkersuisut 1994-mi novemberimi akuersipput.
Takornariaqarnermut, Angallannermut,
Niuernermut Attaveqaatinullu Naalakkersuusup akissuteqaataani paasivara
ilaasortaanissap iluaqutissartaasa akornutissartaasalu nalilersoqqissaarnerannik
tunuliaquteqarluni taamatut aalajangersimanermut patsisaasoq pingaarneq
tassaasoq, tassa: Akuersissuteqarnermut tapiissuteqartarnermullu aamma niuernermut akitsuusiisarnermullu
politikki WTO-mit misissoqqissaarneqartussaamamat. Tamanna tunngavigalugu
isumaqarpunga aalajangerneq eqqortutut oqaatigisariaqartoq.
Naalakkersuisut isumaat una isumaqatigaara
tassa WTO-mi ilaasortaanerput iluaqutiginiarsinnaagipput niuernikkut immikkut
soqutigisatta siuarsarnissaannut.
Taama naatsumik oqaaseqarlunga pissutsit
piviusut akissuteqaammi saqqummiunneqartut matumuuna tusaatissatut tiguakka,
nuannaarutigalugulu ukiaru ataatsimiinnissamut nassuiaateqartoqarnissaanik
naalakkersuisut neriorsuimmata tassa isumaqarama naleqqunnerullunilu piviusorpalaarnerussasoq
WTO-mut attaveqarnerup inaarutaasumik isummerfiginissaa taamanikkussami
pissappat.
Anthon Frederiksen, Kattusseqatigiit:
Siunnersuutiqartoq Inatsisartunut
Ilaasortaq Josef Motzfeldt -ip siunnersuutaa nunatsinnut soqutiginarpoq,
tassami ilumoormat apeqqut nunatsinni tunisassiorfinnik puisineersunik avammut
tuniniaanermut tunngasunik pitsaasunik sunniuteqarsinnaanera
soqutiginaateqarmat Kattusseqatigiit sinnerlugit taperserpara.
Minnerunngitsumik nunatta avammut niuernermini ukiuni kingullerni annertusigaluttuinnartumik
amigartooruteqartarneranut millisaaqataasinnaasutut sunniuteqarsinnaanera
Kattusseqatigiinniit naatsorsuutigineqarsinnaasutut isumaqarfigigakku.
Kisiannili maannakkut pissutsit
taamaakkallartillugit aammalu naalakkersuisut akissuteqaamminni ersersimmassuk
nunatta WTO-mut ilaasortaanermini inissisimanera qulaajarneqaqqaartariaqartoq,
ilaasortaanermullu malittarisassat ilaatigut paasiuminaannerujussuat, naak
tamanna utoqqatsissutigineqarsinnaanngikkaluartoq taamaattoq pisariaqarpoq
paasissutissat assigiinngitsut tamakkiisumik paasilluarlugit iliuuseqarnissaq,
kiisalu nunatta siunissami WTO-mi qanoq inissisimanissaa qulaajarneqaqqaartariaqarmat
pisariaqarpoq danskit naalakkersuisui paaseqatigalugit suliassap ingerlannneqarnissaa.
Taamaattumik suleqatigiisisatanik Namminersornerullutik Oqartussaniit
pilersinneqarsimanera pissusissamisoorpoq aammalu nunatta WTO-mut
ilaasortaanera danskit naalagaaffiata ilaattut inissisimanera taamaalilluni
Danmarkip nunarput sinnerlugu WTO-mi akisussaaqataanera ilaatigut pissutigalugu
maannakkut suliniutaasut Kattusseqatigiinniit soqutigalugit malinnaafigissavagut,
naalakkersuisullu ukiaru apeqqummik tamatuminnga saqqummiinissaat
piareersimaffigalugu aammalu naatsorssutigalugu oqallinnissamut
toqqammavissanik pitsaasunik saqqummiivigineqarnissarput pissangalluta
utaqqissavarput.
Taamatut naatsumik oqaaseqarlunga
siunnersuutip inaarlugu ukiamut oqallisigeqqinnissaa isumaqatigaara.
Josef Motzfeldt, Inuit Ataqatigiit:
Qujanaq oqaaserineqartunut aammalu
naalakkersuisut akissuteqaataanut qujavunga. Naalakkkersuisut atorfilittaasalu
pisinnaasaat aamma killeqarput ilaatigullu taamaassorinninnernik
ilaqartariaqartarlutik, taamaattumik pingaartuuvoq Inatsisartut naalakkersuisunut
suliakkiisartutut misissueqqissaarnissamik pisussaaffimminnik tamatigut
atuilluarnissaat. Soorunami siunnersuuteqartutut aamma uggoraara kattuffimmut
pineqartumut Danmarkip ilaasortanngornissaminut atatillugu nunarput
ilaarusunnersoq aperimmat sumininnguamilluunniit piumasaqaatitalernagu
naalakkersuisut tamatumunnga akuersisimammata.
Apeqqut Inatsitsisartut Nunanut Allanut
Sillimaniarnissamullu Ataatsimiititaliaanut taamanikkut naalakkersuisuusut
saqqummiussimavaat, ataatsimiititalli taassuma suliai isummerfigisaasalu
ilarpassui inimut maannga eqqunneqarneq ajorput namminersornerulernermi
aalajangersarneqarmat apeqqutit nunanut allanut tunngassuteqartut naalagaaffiup
oqartussaaffigigai.
1972-mi kunngeqarfiup Danmarkip
taamanikkut EF-usumut ilaasortanngornissaa taasissutigi-neqarmat nunarput
kalikattagaalluni EF-mut ilaasortanngortinneqarpoq. Tamatuma kinguneranik
namminersornerulernissamik isuma sakkortusineqarpoq.
1995-mi ukiortaamiit Danmark WTO-p
isumaqatigiissutaanut akuersimmat nunarput Danmarkip ilaviattut ilannguppoq
naalakkersuisut akuerisaannik. Ilaatigut tamatuma kinguneranik nunarput
Danmarkitut suliffissuaqarnikkut, niuernikkut atugartuussutsikkullu
siuarsimatigisutut WTO-mi isigineqalerpoq.
Naalakkersuisunut ilaasortap
siunnersuutinnut akissuteqaammini oqaatigaa nunatta ilaasortanngornissaani
isummerfiginerani naalakkersuisut kattuffimmut pineqartumut ilaasortaanerup
iluaqutissartai akornutissartaalu nalilersoqqaarsimagaat. Tamannami
pingaaruteqarluinnartoq aamma uanga siunnersuuteqartutut isumaqarfigaara.
Mannalu periarfissaq iluatsillugu Inatsisartut oqaatsimik ataatsimilluunniit
ilisimatinneqanngilagut iluaqutissat suut taama iluatinnarsimatiginersut allaat
nunarput niuernikkut il.il Danmarkimut
nallersuuttutut naliliinnarlugu naalakkersuisut akuersi-sinnaasimallutik.
Taamaattumik nunatta WTO-mi
ilaasortaanerata suut iluaqutissartarinerai suullu akornutaasinnaasutut
isigineqarsinnaasut oqaluuserisamut uunga atatillugu naalakkeruisunit
ullumikkut saqqummiunneqarsinnaanngippata ukiaru oqaluuserisap uumap
nanginneqarnissaata piareersarnerni tamakku ilanngunneqarlutik Inatsisartunut
saqqummiunneqassasut naatsorsuutigaara. Ilumoortormi mannaavoq aamma
naalakkersuisut akissuteqaaminni eqqaasaat: Niueqatigiinnermi Nunat Tamat
Isumaqatigiisutaat annertuujuvoq imaasiallaannarlunilu
paasineqarsinnaanngitsorpas-suarnik pappialarpassuartaqarluni,
pappialarpassuillu ilaminiinnannguisa misisuiffigineranni pingaartinnerullugu
1994-mi april 15-ani Marokko -p illoqarfiisa pingaarnersaanni Marrakeshimi
WTO-p isumaqatigiisutaanerani atsiorneqarsimasut marluk samminerusimavakka
ukuusut:
Siullertut: Agreement establishing
the World Trade Organizaton, WTO-p pilersinneqarnerani isumaqatigiissuut
aammalu
Aappaattut: Agreement of Safeguards,
ilaasortat ataasiakkat nunaminni pissutsini illersuisinnaanerat pillugu
isumaqatigiissut.
Siullertut taasanni artikel 11-p ' -sa aappaanni allassimavoq: Nunat
siuarsimannginnerusutut Naalagaaffiit Peqatigiinni inissisimasutut
nalunaarsorneqarsimasut periarfissaqartinneqartut aningaasarsiornikkut,
allaffissornikkut naalaakkersorneqarnikkullu pisinnaasatik najoqqutaralugit
naammasinnissinnaanermik piumasarisaasunut sanioqqutsisinnaanermut.
Isumaqatigiissutillu aappaattut
taasanni artikel 9-ip '-ni
marlunni allasimasut naapertorlugit nunarput nammineerluni
ilaasortaasimagaluaruni periarfissaqaraluarpoq
allaat ukiut qulit angullugit nunatsinni nioqqusiat imaluunniit
suliffeqarfiit illersorniarlugit iliuuseqassalluni. Tassa WTO-p aalajangersagaannik sanioqqutitsisutut
isigineqannguarani.
Taamaattumik siunnersuutinni
oqareernittut nunat WTO-p isumaqatigiissutaanut akuersinermikkut
siuarsagaanikkut inissisimanertit najoqqutaralugu pingasunut immikkoortinneqartarput
soorunami. Makkumi naalagaaffiit ullumikkut suliffissuaqarnikkut, niuernikkut
atugartuussutsikkullu allatigut siuarsimavissut suut illersuutaasinnaasut
atorlugit taama ullumikkut killiffimmisut angusaqarsinnaasimapput nunaminni
tunisassiat suliffeqarfiillu illersorniarlugit
killilersorneqan-nginnguanngikkallaramik.
Tamannaannarluunniit nunatta
nammineerluni ilaasortatut nalunaarsorneqalersinnaaneranut misissugassaqqippoq
naak naalakkersuisunut ilaasortap akissuteqarnermini ilaasortaanerup
allanngortinneqarnissaa ersinartuinnavittut isikkoqartinniaraluaraa.
Ullumikkutummi nammineq tunisassiatsinnik suliffiutitsinnillu ukiuniluunniit
aalajangersimasuni illersuisinnaannginnerarluta isumaqarnitsigut nunatsinni
suliffissatsiarparujussuit pilersinneqarsinnaasorinngivut paasinarpoq,
taamaalioraluarutta ersinartorsuut WTO-p ajortumik peqinammatigut
qununermik.
Pequsiorfiit, igalasserfiliorfiit
sanaartukkat atorfissaannik sanaartorfiit, mersortarfiit, umiarsuaateqarfiit, timmisartortitseqatigiiffiit
allallu avataanit eqqussugarpassuartinnut killiliisinnaasut suliffinnik
ikigisassaanngitsunik pilersitsiviusinnaapput. Tunisassiat puisineersut
tuniniarneqarsinnaanerisa annertusarneqarsinaanerannut aqqutissat
marluusorinarput siullermik:
- Ummasunut illersuisutut imminnut
taagortut miluumasunik imarmiunik tunisassiat niuerutigineqarnissaannut
akerliusut pisisartullu taakkunannga sunnerneqarsimasut allamik
isumataartinniarnerisigut aammalu suliassatut taassumatulli pingaartigaaq
inatsisiliornikkut inerteqqutigitinneqartut aturunnaarsinniarnissaat. Imarmiut
miluumasut illersorneqarnissaannut USA-mi inatsit MMPA-a aammalu EU-p puisinit
tunisassianik uumasullu nujuartat allat aalajangersimasut amiinik
eqqusseqqusinnginnerat suliassami tassani pingaarnerupput. Aappaattut
illiuuserisassaq:
- Nioqqusiat avammut
tuniniarnissaasa pilersaarusiukkamik siuarsaaviginissaat tamannalu anguniarlugu
sunniiniarnissaq.
Siulleq atorlugu angusaqarsinnaaneq
aappaata iluatsiffiunissaanut annertuumik sunniuteqartusaavoq.
Naalagaaffeqatigiinnerup iluani naalakkersuinikkut susassaqartut
sunnerniagassat paasissutissinneqartuartariaqartullu tassaapput danskit
naalakkersuisui folketingimilu partiit. Naalakkakkersuisunut pingaarnertut
Nunanut Allanut ministeri, Inuussutissalerinermut ministeri,
Ineriartortisinermut ministeri nunap inoqqaavinut apeqqutinut susassaqartoq
kiisalu ministeriuneq apeqqutinut naalagaaffigeqatigiinnermut tunngasunik
aallutaqartoq. Soorunami folketingmi ilaasortat tamakkerlugit apeqqummut
matumunnga paasitsikkusunnarput, piviusorsiornerussaarli folketingip Europamut
apeqqutini ataatstimiititaliaa Europaudvalgit salliutikkaanni, tassanimi
ministerit susassaqartut Europaudvalgimi qanoq isummersornissaat
aalajangersarneqartarput. Aamma folketingimi uumasut pillugit niuernermut
tunngasuni nunatsinullu apeqqutini oqaaseqartartugut sunnerniartariaqarput
soorlumi aamma nunnatsinnit folketingimi ilaasortat eqeersartuartariaqartut.
Tamakkuli qinikkat kisiisa pinnagit
nunanili allani inuttaasut illersuinianit sunnersimaneqarnerat
illuatungilersortuartariaqarpoq peqqissorsoorusukkunik kukkukuuaqqat
nersussuillu neqaat kisiisa neqitugareqqunagit puiserpassuaqarmallu taakkua
aminiik atisaliat plastikimik atisaliat pitsaanerungaarnerannik oqaluttuuttuarlugit.
USA-mi inatsisiliap MMPA-p
atorunnaarsinneqartariaqarnerata anguniarnerani EU-llu puisinit nioqqusianik
eqqusseqqusinnginnera atorunnaarsitsiniarnermi nunarput naalakkersuisutigut
sakkortusaarnerusariaqartoq isumaqarpunga. Nunani tamakkunani
tusaamaneqarlutik nuannaartorineqartut aamma sorsuuteqarnitsinni
ikiortiserineqarsinnaasut nassaassaapput, sooq periutsit naalakkersuisut
atorumanngikkaat? Piumassutsip killeqarpallaarnera tamaannga kipisariaqarpoq.
Kulturikkut inuiattut tunngavigisatta piniarnerup ajortuliatut
isikkoqartin-niarneqarnera inooriaatsitsinnik suujunnaarsitsiniarnerup
kukkukuuarartuumasut imminnut angisuutinniarnerattut sorsuffigisariaqagaq.
USA -mi inatsisip pineqartut MMPA-p atorunnaarsinniarnerni
nunatta WTO-mi ilaasortatut qanoq periuseqarnissaa naalakkersuisut
ilisimanngikkunikku suleqatigiiffimmi High North Alliance-mi - Avannaarsuani
iligiit aamma nunatsinnit KNAPK-p ilaasortaaffigisaani KNAPK-p sinniisaa
paasiniaaffigiinnarsinnaavaat.
WTO-mi ilaasortat
isumaqatigiinngissuteqarunik WTO-p saqittaakkunnaarsitsiniarluni aaqqissuussisussaanera
naalakkersuisut siunnersuutinnut akissuteqaammisut taaginnarnagu
atortariaqarpaat. Saqittaassutaasoq suliassanngortinneqarpat amanna
suliassanngortitsinermit ukioq qaangiutsinnagu
aalajangiiffigineqareertussaavoq. Nungusaataanngilluinnartumimmi
puisinniartunitsinnut USA-p Eu-milu ilaasortat piumasarisaat nunatsinni
naalakkersuisut qanoq iliuuseqarfiiginngipatsigit issittumiinnaanngitsoq
nunarsuarmili tamarmi piniarnerinnarmik inuussuteqartut imminnut
ilaquttaminullu napatitsiniarnerannik suujunnaarsitsiniarneq nunatta
pisortatigoortumik peqataaffigilersimagaa oqartariaqalissuugut.
Inuit Ataqatigiit sinnerlugit
siunnersuuteqartututisumaqarpunga taammaattoqartariaqan- ngilluinnartoq.
Peter Grĝnvold Samuelsen,
Takornariaqarnermut, Angallannermut, Niuernermut Attaveqaatinullu Naalakkersuisoq:
Partiit oqaaseqartuinut
siunnersuuteqartumut naalakkersuisut sinnerlugit qujavunga. Oqaaserineqartut
arlalissuit erseqqissaanerupput aamma uani akerleriissuteqanngilagut. WTO-p
iluani nunatta sorlertut inissisimanissaa taanna apqqut misissussavarput aamma
WTO-mut ilaasortanngorsimanerput akerlerineqanngilaq Inasisartunit tamanit
ilalerneqarpoq.
WTO-mut nunat tamalaat akornanni
niueqatigiiffissuarmut Kalaallit Nunaata ilaasortanngorsimanera pivoq 1994-ip
ukiaanerani taavalu atuutilerluni 1995-mi januarip 1-ani. Ujartorneqarmat
suliap tamatuma ingerlasimanera erseqqissarusuppara naalakkersuisut allakkanik
imaqqortuunik ilisimatitsisimammata ataatsimiititalianut ukununnga: Nunanut
Allanut Sillimaniarnemullu Ataatsimiititaliaq, Aalisarnermut
Ataatsimiititaliaq, Akileraartarnermut Ataatsimiititaliaq, Niuernermut
Suliffissuaqarnermullu Ataatsimiititaliaq, Aningaasaqarnermut
Ataatsimiititaliaq taakkulu inunnik assiginngitsunik Inatsisartunut
ilaasortaasunik 15-nik ilaasortaaffigineqarpput taakkunanilu
nassuiaatigineqartut tusaatissatut tiguneqarput.
Taamanikkut naalakkeruisuusut nalilersuisimapput
Siumukkut IA-lu. Maannakkut naalakkersuisuusunut sammitinnerullugu
huraartuutissaannginneranik oqalunneq taanna aamma isumaqarpunga
qinngasaarinerinnaasoq. Pissusissamisoortumik ilisimatitsineq
ingerlanneqarsimavoq aammalu naalagaaffeqatigiinnerup iluani oqartussaasut
tassani attaveqatigiissimapput nalilersuinerlu ingerlanneqarsimavoq
Akileraartarnermut Pisortaqarfimmi pisortaqarfinnilu tamani tassunga
tunngasutigut susassaqartuni. Aamma ujartorneqarmat WTO-mi ilaasortaanitta
ajunngequtaanik ajoqqutaanillu oqaaseqannginnera, taanna naatsumik
oqaatigissavara, tassa periarfissat pingasuusut, taakkua taanerisa saniatigut
nalilersorneqarsimammat ilaasortanngornikkut pitsaaqutissat, tassaasut nunat
ullumikkut 132-iusut akornanni akitsuutitigut allatigullu aporfeqanngitsumik
niueqatigiissinnaanermut nunatta ilaanissaa taamaalillunilu
nunatsinninngaaniit nioqqutissiat, nunanut tunisiffigineqartunut,
akitsuuserneqarnatik eqqunneqarsinnaanerat tassani periarfissaqarmat.
Akornutaasinnaasut imaluunniit
persaqutaasinnaasut WTO-mut ilaasortaanitsinnit tassaapput, nunatsinni
suliffeqarfiit pisortaninngaaniit pineqarnerannik nunani allani WTO-mut
ilaasortaasuni pisiniarfitsinni nioqqutissanik, tassani suliaqartut
ajornerusumik pisinnaasannginnatsigit. Taavalu aamma WTO-mut isumaqatigiissutit
naapertorlugit pisussaaffiit assigiinngitsut immaqa nunatsinnut
persaqusersuutaasinnaasut, imaluunniit nioqqutissiornermut
persaqusersuutaasinnaasut taakkua aporfigineqarsinnaapput. Kisianni tassa
ataatsimut isigalugu taakku qulequttat sukumiisumik maannakkut misissorneqarput
suleqatigiisitami Namminersornerullutik Oqartussat nunanullu allanut
ministeriaqarfiup akornanni.
Ataasiakkaat partiininngaannit
oqaaseqartut, siunnersuuteqartuninngaanniit oqaaserineqartut innersuussutigissavakka
qallunaat kalaallillu paaseqatigiinniarnerminni pisortatigoortumik ingerlasumi,
taakkua inatsisartuni oqaaserineqartut ilanngullugit aamma nalilersussagaat.
Tassa naalakkersuisut
pilersaaruteqarput ukiaru intasisartut ataatsimiinnissaannut sukumiisumik
saqqummiussinissaminnut, taamaalilluta maani inatsisartuni
tunngavissaqarnerulluta, kinami oqarpa ilaasortaanitta allanngortittariaqarnera
pisariaqassasoq anguniakkagut angusinnaagutsigit allanngortitsinertaqanngitsumik
kisiannili, tamanna aamma pisariaqarpat, pisariaqarsorigutsigu erseqqissumik
isummernissatsinnut tunngavissaqalerluta takusinnaagutsigu, taava taanna
oqaluuseritigu, inatsisartunilu naalakkersuisunut suliakkiissutigineqartut
ukiamut taamaalilluta ingerlatillugit naalagaaffeqatigiinnerup iluani,
nunattalu WTO-mut sammitillugu ilaasortaanera eqqarsaatigalugu.
Tassani una naggasiullugu
oqaatigerusuppara, aap, nammineq immaqa timitsigut aningaasaqarnitsigullu
misigisimavarput EU-mut aalisarnikkut isumaqatiginninniarnitsinni qanoq
pingaaruteqartigisoq tunitsivissat eqqarsaatigalugit ajunngitsumik
pitsaasumillu isumaqatigiissuteqarnissaq. Taamaaliornitsigummi
ajunngequtissanik, pitsaaqutissanik angusaqarsimavugut OLT-mut
inissisimanitsigut. Taamaassanngikkaluarpammi taava nunatsinninngaanniit
avammut nioqqutisssiagut tamarmik EU-mut eqqunneqartussat
akitsuuteqartinneqarsimassagaluarmata. Taamaattumik aamma ersinartuinnarnik
oqaluttoqanngilaq. WTO-mut ilaasortaanerput ajunngequtinik pitsaaqutinik
ilaqarpoq aamma kisianni pisussaaffiliinermik ilaqarluni. Taakkulu
pisussaaffiliinerit immikkut ittumik akuersissuteqarfigineqarsinnaappata,
uagutsinnut ajunnginnerusumik aamma taakku oqaloqataaffigissuagut.
Una illuatungaatigut nunatsinni, una
oqaatigilaarlara, inatsisartuni ilaasortap siunnersuuteqartup, Josef
Motzfeldtip oqaqqinnermini oqaatigisaa, suliffippassuit maani nunatsinni
pilersinneqarsinnaasut WTO-mut ilaasortaangikkaluarutta imaluunniit
pisussaaffigut annikinnerusimagaluarpata. Taava oqaatigiinnassavara qaammatini
24-ni tamakkua suliffiit, sooq qaammatit 24-it sioqqullugit tamakkua
pilerinneqarsinnaasimallngillat. Isumaqarpunga tamakkua suliffeqarfiit
pilersinneqarsinnaasimasut. Aamma WTO-mut ilaasortaangikkallarattali. WTO-mulli
ilaasortanngornitsinni pisussaaffiit Nalakkersuisuninngaaniit
eqqaasitsissutigineqartarsimasut ersisaarutitut isumaqarfiginngilagut, kisianni
eqqaasitsinerupput pisussaaffigilersimasatsinnut. Oqarnittuullu taakkua
persaqusersuutit assigiinngitsut anigorsinnaagutsigit, taava
anigorsinnaasariaqarpavut isumaqatiginniarnikkut. Tamannalu pitinnagu maani
Inatsisartuni saqqumiussiumavugut isummernissatsinnut tunngavissaqarumalluta
tamannalu pissaaq ukiaru.
Josef Motzfeldt, Inuit Ataqatigiit:
Naalakkersuisut oqaaseqaqqinnerannut
tunngatillugu oqaatigiinnarniarlugu, siunnersuuteqartutut
oqarsimanngisaannarama aamma oqarnaviannginnama, nunarput
ilaasortaasimanngikkaluarpat suliffissatsiarpassuit
pilersissimasinnaagaluarigut. Nunattanuna nunatsinni siuarsimassutsikkut
inissisimanerput najoqqutaralugu inissisimagaluarutta, tassani
illersuisinnaaneq nunat ilaasortat illersuisinnaanermik periarfissaat
atorlugit, ukiut qulit suliffiit, uagut suliffiutigut, maani nunami
suliffiutigut illersorsinnaagaluarivut WTO-mut ilaasortaagaluaruttaaluunniit,
kisianni nunatta ineriartornermigut killiffia toqqammavigalugu ilaasortaaneq
aalajangerneqarsimasuuppat. Aamma WTO-mut ilaasortanngornitsinni
iluatinnartutut Nalakkersuisunut Ilaasortap taasatuaa una 132-it ilaasortat
akornanni akitsuuteqanngitsumik nunarput niueqataasinnaasoq. Taamaatoqanngilaq.
Akitsuutit milliartortinniarneqarput, naatsorsuutigineqarluni ullumikkut
siunnerfiuvoq 40 %-mik ullumikkornit appasinnerusunngortinnissaa akitsuutit,
nunat niueqatigiit akornanni. Tammakua aamma angusinnaavavut nunarput nunatta
siuarsagassatut inissisimanermi killiffimminut naleqquttumik nalilerneqarluni
WTO-mi ilaasortaasimasuuppat. Ajunngilaq. Tamakkua sukumiinerusumik paasinarpoq
tamatta itisilertariaqarigut aamma misissuiffigisariaqarigut, Nalakkersuisut,
inatsisartuni partiit. Qarasaassiani atorlugit ippassigami ullumiluunniit
pinerpoq qujasaatineqarpoq inuaarussimasugut. Taamaappoq, makkua pappialat
qarasaassiatsinni toqqortaapput ujarlugit nassaarisariaannaat.
Ataatsimiinnermik aqutsisoq, Otto
Steenholdt:
Qujanaq. Tassalu taamaalilluta
oqaluusserissat immikkoortuat 18 WTO-mut tunngasoq oqallisigereerlugu
tullianut ingerlaqqissaagut.
Oqaluuserisaq naammassivoq.