Oqaluuserisassani immikkoortoq 24-3 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ataatsimiinnermik aqutsisoq: Inatsisartut Siulittaasuat Jonathan
Motzfeldt.
Ullumikkut marlunngornermi juunip
pingajuani Nuummi silaqqissuaq ataatsimiinneq aallartipparput.
Immikkoortoq 24 siulliullugu
saqqummiiffigineqassaaq pingajussaanneerneqartussaq:
Peter Gr. Samuelsen, Inuussutissarsiornermut, Angallannermut
Pilersuinermullu Naalakkersuisoq:
Naalakkersuisuni nuannaarutigaarput
matumuuna timmisartunut suluusalinnut mittarfinnik sanaartornissaq pillugu
Inatsisartut inatsisaata allanngortinneqarneranik, Inatsisartut inatsisissaattut
siunnersuut pingajussaanigassanngorlugu saqqummiussinnaagatsigu.
Naalakkersuisut mittarfiliortiternissaq
pillugu Inatsisartut inatsisaannik ' 1-imi, immikkoortoq 2-mut, Inatsisartut Angallannermut
Ataatsimiititaliaata allannguutissaatut siunnersuutaat ilannguppaat,
taamaalilluni inaarutaasumik oqaasertassai allanngortinneqassallutik imatut:
ATimmisartunut suluusalinnut mittarfiit
ataasiakkaat sanaartorneqarnissaannut piffissaq aallartiffiusussaq
Naalakkersuisut aalajangertassavaaat, tamanna inuiaqatigiinnut
iluaqutaasussatut nalilerneqarpat pissutsillu allat tamanna pisariaqartippassuk@.
Taanna imatut oqaasertaqalersillugu:
ATimmisartunut suluusalinnut mittarfiit
immikkoortoq 1-imik taaneqartut tamarmik sanaartorneqarnissaannut piffissaq
aallartiffiusussaq Naalakkersuisut aalajangertassavaat, piffissap sanaartorfiusussap
Inatsisartunit akuersissutigineqartup iluani@.
Naalakkersuisunit oqaatigeqqikkusupparput
nuannaarutigigatsigu Angallannermut Ataatsimiititaliat taamatut
ilanngussisoqarneratigut, inatsisissatut siunnersuut Naalakkersuinit saqqummiunneqartoq
akuersaarsinnaammagu, taamaalilluni Upernavimmi Paamiunilu mittarfissat
sanaartorneqalernissaat siuartinneqarsinnaalerluni. Illoqarfiit taakku
illoqarfinnut allanut ullumikkut mittarfiliortiterfigineqaleruttortunut
siusinnerusumik attaveqarsinnaanngorlugit. Taamaalilluni sineriapput
tamakkerlugu timmisartut suluusallit atugaalernissaat sukkanerusumik
periarfissaqalissaaq. Tamanna sakkortusarneqaqqippoq aammattaaq Qaanaaq
inatsimmut ilanngunneqarmat.
Taamatut oqaaseqarlunga timmisartunut
suluusalinnut mittarfinnik sanaartornissaq pillugu, Inatsisartut inatsisaata
iluarsiivigineqarnissaanik Naalakkersuisut siunnersuutaat Inatsisartunut
pingajussaaniigassanngortippara.
Ataatsimiinnermik aqutsisoq, Inatsisartut Siulittaasuat, Jonathan Motzfeldt:
Taava oqaaseqartoqarumavoq.
Josef Motzfeldt, Inuit Ataqatigiit:
Suliassap matuma 1 mia. kr.-it pallillugit
aningaasartaqartup nunatta annersaani angallannikkut iluaqutaasussap, piffisaliunneqartut najoqqutaralugit
ilaatigullu ingerlaqqinnermi siuaallatsinneqartarluni allaat
ingerlanneqarnera, Inuit Ataqatigiit nuannaarutigissallugu pissutissaqarput.
Qaqortoq
mittarfiliorfiussanngikkallartutut isummerfigineqaraluartoq, killiffik
eqqarsaatigalugu Inuiat Ataqatigiit
pingaartippaat, kujataani angallannikkut
pissutsit nunap sinneratulli nutarteriffigisariaqarnerisa
ingerlanneqartariaqarnerisa Inatsisartunit Naalakkersuisunillu paasineqartariaqarnerat.
Taamaattumik Narsarsuarluunniit aallaavigalugu kujataani angallannerup
piorsaqqinnissaa siunertaralugu misissuisoqarnissaanik Angallannermut
Ataatsimiitialiap inassutigisaata ingerlanneqarnissaa Inuit Ataqatigiit
malinnaaffigeqqissaassavaat.
Narsarsuaq ineriartortitsivioqqilluni
kujataani angallannerup nunap sinnerani katataannginnissaanut, helikopterit
angisuut nutaaliat pisariaqartinneqartut periarfissaasinnaammata, Inuit Ataqatigiit
tamanna peqataaffigisinnaalluarpaat. Tamakkuli saniatigut sanaartugassatigut
aningaasaliuttakkat nunap immikkoortuinut unneqqarissumik siammarneqassappata,
aningaasaliussat amerlanerit kujataani inuussutissarsiutitigut
ineriartortitsinermi atorfissaqartinneqarput.
Nunatta immikkoortuini oqimaqatigiissumik
ineriartortitsinerup siunissaq tamatsinnut qaamanerusoq kingunerisussaagaa,
Inuit Ataqatigiit qularinngilaat. Tamatumalu qulakkeerneqarnissaa anguniarlugu
aningaasanut inatsisitigut suleqataanerput ingerlattuassavarput.
Ataatsimiinnermik aqutsisoq: Inatsisartut Siulittaasuat Jonathan
Motzfeldt:
Tassalu pingajussaaneerneqarnerani
Angallannermut Ataatsimiititaliap allannguutissatut siunnersuutaa
ilanngunneqarsimasoq, aatsaannguaq Inuussutissarsiornermut, Angallannermut
Pilersuinermullu Naalakkersuisup saqqummiussinermini oqaatigisaa iluarsissutit
kingullersaraat.
Tassalu maannakkut pingajussaanneerneqarnerani
taama isikkoqarluni akuerineqarnissaanut isumaqataasut qinnuigissavakka
nikueqqullugit.
23-t, isersimasut tamarmik.
Akerliusoqarpa? Naamik.
Taamaalilluni immikkoortoq taanna
naammassivoq.
Oqaluuserisaq naammassivoq.