Kalaallit Nunaanni Inatsisartut

Oqaluuserisassani immikkoortoq 10-1		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Marlunngorneq 11.maj 1999 nal. 15.00

 

 

Oqaluuserisassani immikkoortoq 10

 

 

Inuutissarsiutinik ilinniartitaanerit inuutissarsiutinullu pikkorissartitsisarnerit pillugit Inatsi­sartut peqqussutissaatut siunnersuut.

(Kultureqarnermut, Ilinniartitaanermut Ilisimatusarnermullu Naalakkersuisoq)

(Siullermeerinninneq)

 

Ataatsimiinnermi aqutsisut: Johan Lund Olsen, Inatsisartut Siulittaasuat aamma Anthon Frederiksen, Siulittaasoqarfimmi ilaasortaq:

 

 

Lise Lennert, Kultureqarnermut, Ilinniartitaanermut Ilisimatusarnermullu Naalakkersuisoq:

Naalakkersuisut sinnerlugit maanna saqqummiutissavara Inuussutissarsiutinut ilinniartitaanerit inuussutis­sarsiutinullu pikkorissartitsisarnerit pillugit Inatsisartut peqqussutissaannut siunnersuut.

 

Siunnersuut suliarineqarpoq Kommuninik Iluarsaaqqinnermut Ataatsimiititaliarsuup isumaliutissiissutaata malitseqartinneqarneranut taamanikkullu Naalakkersuisuusut 1997-imi septemberimi suleqatigiinnissa­mik isumaqatigiissutaannut ilaatillugu, isumaqatigiissummi atuarneqarsinnaavoq inuussutissarsiutinut ilinniartitaanerit pitsaassusii naliliiffigineqassasut. Kiisalu siunertaraa aningaasanut inatsimmi konto 40.11.06 naapertorlugu inuussutissarsiutinut pikkorissartitsisarnermut tapiissuteqartarneq pillugu maleruagassat iluarsaanneqarnissaasa  tunngavissaqalersinneqarnissaa.

 

Kommuninik Iluarsaaqqinnermut Ataatsimiititaliarsuup isumaliutissiissutaata malitseqartinneqarnissaanut ilanngullugu STI-mi ilinniartitaanerit nalilersorneqarnissaannut suleqatigiissitaliaq pilersinneqarsimavoq. Ilinniartitaanikkut ingerlatsineq pillugu nassuiaat 1995-imeersoq aamma Kommuninik Iluarsaaqqinner­mut Ataatsimiititaliarsuup kaammattuutai suleqatigiissitaliap ataatsimoortillugit isiginiarsimavai.

 

Suleqatigiissitaliaq inuttaqartinneqarpoq: Nunami namminermi pissutsinut allaffiup, KANUKOKA-p, Isumaginninnermut, Suliffeqarnermut Pisortallu Suliassaqarfiutaannut Pisortaqarfiup aamma Kultureqar­nermut, Ilinniartitaanermut Ilageeqarnermullu Pisortaqarfiup sinniisaanik.

 

Siunnersuut manna suliarineqarpoq suleqatigiissitaliap kaammattuutai aammalu ukiuni kingulliunerusuni suliffeqarnermi illuatungeriit ilaatinneqarnerulerfianni, misilittakkat paasisimalersimasat tunngavigalugit. Siunnersuutip suliarineqarnerani tunngavigisat pingaarnersaraat inuussutissarsiutinut ilinniartitaanermik aaqqissuussinerup eqaatsup atorluarsinnaasullu, suliffiusinnaasut sulisunik ilinniarsimasunik pisariaqartitsi­nerannut, sukkasuumik naleqqussarneqarsinnaasup pilersinneqarnissaa.

 

Inuussutissarsiutinut ilinniartitaaneq, ilinniagaqarnermut tapiissutit inuussutissarsiutinullu tunngasunik siunnersuineq pillugu Inatsisartut peqqussutaata nr. 16-ip 28. oktober 1993-imeersup allanngortiterne­qarneranut pissutaasup aappaa tassaavoq malittarisassat paasiuminarnerulersinneqarnissaannik ilaatigut kissaateqartoqarnera, tassami ilinniagaqarnersiutit pillugit Inatsisartut peqqussutaata nr. 3-p 2. maj 1996-imeersup akuerineqarnerata kingorna ilinniagaqarnermut tapiissutinut malittarisassat atorunnaarsin­neqarsimammata.

 

Anguniagassat sinaakkutissatullu killiliussat peqqussutissatut siunnersuummi aalajangersarneqarput. Peqqussusiami aalajangersarneqartut tassaapput najoqqutassat inuussutissarsiutinut ilinniartitaanernut tamanut atuuttussat, tassungalu ilanngullugit inuussutissarsiutinut pikkorissartitsisarnerit Aningaasanut Inatsimmi konto 40.11.06-ikkut aningaasalersorneqartartut.

 

Siunnersuutip aamma inuussutissarsiutinut ilinniartitaanernut, ilinniagaqarnermut tapiissutinut inuussutis­sarsiutinullu tunngasunik siunnersuineq pillugit Inatsisartut peqqussutaata siunnersuutillu uuma assigiinn­gissutiginerpaasaat tassaavoq Inatsisartut peqqussutaata atuuttup ilinniartitaanernut killiliussanik ima­qannginnera, piginnaatitsinermulli aalajangersakkanik taamaallaat imaqarnera. Erseqqissarneqassaartaaq Nunatsinnut attuumassuteqarnissamik aalajangersagaq siunnersuummi ilanngunneqarsimanngimmat, tassami aalajangersagaq taanna nunat tamat akornanni isumaqatigiissutinut, ilaatigut nunanut avannarler­nut isumaqatigiissutinut kiisalu nunatsinni ilinniarfiutitta Nunavut-mit atorneqartarsinnaanerat pillugu naalakkersuinikkut nalunaarutaasimasunut tulluartuunngimmat.

 

Inuussutissarsiutinut ilinniartitaanerit inuussutissarsiutinullu pikkorissartitsisarnerit pillugit inatsisartut peqqussutaata imarisinnaassavai ilinniartitaanerit assigiinngitsut, tamannalu Inatsisartut peqqussutissaata matuma ilinniartitaanerit imarisaannik sukumiisumik immikkoortereqqissaannginnermut pissutaavoq. Peqatigitillugu peqqussut tunngavigalugu inuussutissarsiutinut ilinniartitaanerit sulisussanik aalajangersima­sunik pisariaqartitsineq aallaavigalugu iluarsaanneqarsinnaasariaqarput, pilersinneqarsinnaasariaqarlutik atorunnaarsinneqarsinnaasariaqarlutillu.

 

Ilinniartitaanernut qitiusumik ataatsimiititaliat nukittunerulersinniarlugit forstanderit ataatsimiititaliallu siulittaasuisa akornanni ataatsimiinnermi paasinarsisimavoq ataatsimiititaliat inuttalersugaanerisa ilusiligaa­nerisalu assigiinngisitaartuunissaat pisariaqartinneqartoq, tamatumanilu aalajangiisuussaaq ilinniarfiit ilinniartitaanernik sunik neqerooruteqartuunerat. Tamanna tunngaviuvoq Inatsisartut peqqussutissaattut siunnersuummi inuussutissarsiutinut ilinniartitaanerit aqunneqarnerata itisileriffigineqarsimannginneranut, tassungali taarsiullugu tamakku pillugit malittarisassanik erseqqinnerusunik nalunaarusiornikkut aalajan­gersaanissamut Naalakkersuisut piginnaatinneqassapput.

 

Peqqussutissatut siunnersuummi inuussutissarsiutinut ilinniartitaanerit ilusiligaanerat tunngavimmikkut allanngortinniarneqanngillat. Siunnersuut naapertorlugu periarfissaalissaaq ilinniakkanik ataasiakkaanik naliliisinnaanngorneq ilinniakkap pitsaassusissaa aamma aningaasaqarniarneq tunngavigalugit.

 

Siunnersuutip nassatarissavaa qitiusumik ilinniarfiit aamma najukkani inuussutissarsiutinut ilinniarfiit, matumanittaaq qitiusumik ilinniartitaanernut ataatsimiititaliat najukkanilu inuussutissarsiutinut ilinniartitaa­nernut ataatsimiititaliat, akornanni oqartussaanerit ersarinnerusumik immikkoortinneqalernerat.

 

Siunnersuut maanna naalakkersuisuusut siuliinit Inatsisartut 1998-imi ukiakkut ataatsimiinneranni saqqummiunneqarpoq, kinguartinneqarlunili kommunit akissuteqarnissaminnut piffissaqarnerorusumma­ta. Siunnersuut annikitsutigut allanngortilaarlugu kommuninut tusarniaavigineqartussanullu allanut tusarniaatigeqqinneqarsimavoq, tusarniaanermilu akissutaasut sapinngisamik siunnersuummut matumunn­ga ilanngunniarneqarsimapput.

 

Siunnersuut taassumunngalu oqaaseqaatit innersuussutigalugit matumuuna siunnersuut Inatsisartunit akuersaartumik oqaluuserisassanngortinneqarpoq.

 

Ruth Heilmann, Siumup oqaaseqartua:

Naalakkersuisut inuussutissarsiutinut ilinniartitaanerit inuussutissarsiutinullu pikkorissartitaanerit pillugit Inatsisartut peqqussutissaannut siunnersuummmut saqqummiinerat Siumumit qujassutigaarput.

 

Taanna saqqummiussissut oqaluuserisamut siullermut annertuumik attuumassuteqarpoq, taa-maattumik siullermut tunngatillugu Siumumiit oqaasissavut tassunga aamma tunngassuteqartut tikittareersimagatsigit matumani naatsumik saqqummiunneqartoq isumaqataaffigalugu iluarisimaarlugulu ilassuteqaataasunik oqaaseqalaaginnassaagut.

 

Siumumiit nuannaarutigaarput siusinnerusukkut inuutissarsiutinik ilinniartitaanerit immikkualuttunngorlugit akisussaaffigineqartut maanna eqaatsumik eqikkarniarneqarmata kontomut ataatsimut 40.11.06-mut aamma  inissinneqarlutik aningaasalerneqartalissallutik, tassami ilinniartitaanerit pikkorissartitaanerillu imminnut ataqatigiittariaqarput.

 

Assersuutigalugu HK-mi ilinniagaqartut suliffissaaleqisut arlaqareersut nalunnginnatsigu taakkua atorfinnut allanut immaqalu qullasinnerusunut tigusisinnaalernissaat anguniarneqassappat pikkorissartillu­git ingerlariaqqiffeqarsinnaalernissaat taamaalilluni anguneqarsinnaanngussaammat..Allatiguttaaq suliffiit inuttassaaleqissunneqartut eqaatsumik pikkorissaanikkut ingerlariaqqiffiusumik aaqqissuussisoqartarnis­saanik periarfissaqalernermik ingerlatsisoqarsinnaanngornissaa Siumumiit iluarinartuuteqigipput ilanngul­lugu oqaatigissavarput.Taamaaliortariaqarpugut tikisitat nunaqavissunik pikkorissunik taarteqartinneqar­nissaat pimoorullugu sulissutigineqassappat.

 

Ukiarmi tamanna saqqummiunneqarmat ilinniartitaanikkut killiffussamik imaqannginnera amigaatigisima­varput aammalu ilinniagassat suussanerinik ersarisaasoqarsimannginnera ujartuiffigisimallutigu.Maanna nassuiaatigilluarneqarpoq eqaatsumik forstanderit ataatsimiititaliallu peqatigalugit aalajangersaasoqarluni­lu atorunnaarsitsisoqarsinnaalissasoq. Taamatut piginnaatitaaffimmik Inatsisartut Naalakkersuisunut malittarinneqqusillutik tunniutaqarnissaannut Siumut peqataarusuppoq, piumasarissalluguli ajornanngip­pat Inatsisartunut ukiumoortumik killiffimmik siunnerfimmillu nassuiaateqartoqartassasoq.

 

Kiisalu oqaatigerusupparput Siumumiit iluarisimaaratsigu Nunatsinni ilinniarfitsinnut nunani allamiut Danmarki, soorlu aamma  avannaamioqativut Nunavummilu naggueqativut isersinnaalernerat, soorlu uaguttaaq aamma nunani allani taamatut periarfissaqartitaalersugut ilinniartitaanikkut suleqatigiinerulernis­satsinnut.Tassuunakkut matu qiverneqarpoq inuusuttut angusaqarluarusuttut annertunerusumik periarfis­sinneqarlutik tamannalu Siumumiit nuannaarutigigatsigu kissaatigaarput atorluarneqarumaartoq.

 

Taamatut Siumumit oqaaseqarluta peqqussutissamut siunnersuut aappassaaneerneqarnissaanut Ilinniarti­taanermut Kultureqarnermullu Ataatsimiititaliamut nalilersoqqullugu Siumumit innersuussutigaarput.

 

Augusta Salling, Atassuip oqaaseqartua:

Atassutip siunnersuut misissorluareerlugu siullermeerneqarnerani ima  oqaaseqarfigiumavaa:

Atassutip ilinniartitaanerit pitsaanerpaamik iluseqarlutillu ingerlanneqarsinnaanissaat pingartilluinnagaraa, taamaatumillu una peqqussutissatut siunnersuut massakkut naamassineqarsinnaalissammat nuannaaruti­gaa.

 

Suliaq peqqissaarullugu pisariaqartitsinerlu naapertorlugu ingerlanneqarsimavoq, Atassutillu  maluginiar­paa siorna ukiakkut saqqummiunneqarnermini ilutsini atorlugu saqqummiuteqqinneqartoq, taamaattumik Atassutip ajuusaarutigaa suliaq taama ilinniartitaanermut pingaaruteqartigisoq siorna ukiakkulli atuutsiler­sinneqarsimasinnaagaluartoq kinguarsarneqarsimammat.

 

Peqqussutissatut siunnersuut naleqqussaaneruvoq, pisariaqartitsinerlu naapertorlugu eqaannerusumik suleriarsinnaanermut aqqutissiuussisuulluni, ilusilersorneqaqqaarnerminiit suliamut attuumassuteqartut qanimut suleqatigineqarluarsimapput tamannalu Atassummi tutsuiginartuutipparput. 

 

Immikkuualuttortaalu ataasiakkaarlugit oqaaseqarfiginngikkaluarlugit  siunnersuut akuersaarlugu taaseqataaffiginiarparput.

 

Aammalu Siumup siunnersuutigisaa ataatsimiititaliamut ingerlateqqeqqaarneqarnissaa taanna taperseru­mavarput.

 

Olga Poulsen, Inuit Ataqatigiit oqaaseqartuat:

Inuussutissarsiutinik ilinniartitaanerit inuussutissarsiutinullu pikkorissartitsisarnerit pillugit Inatsisartut peqqussutissaattut siunnersuut matumuuna Inuit Atqatigiit oqaaseqarfigiumavaat.

 

Nunatta siunisssami ineriartortuarnissaa namminerlulu sulisussanik pilersortuararsinnaanissaa Inuit Ataqatigiinniit pingaarteqigatsigu, inuussutissarsiutitigut pikkorissaajuarnissat tapersersorluinnarpagut.

 

Inatsisartut peqqussutissaattut siunnersuutaasoq Inuit Ataqatigiinniit atuaqqissaarsimallugu, annertuumik oqaaseqarfiginagu, oqaluuserisallu siuliani oqaatigeriikkagut innersuussutigalugit aappassaaneerneqann­ginnermini, Kultureqarnermut Ilinniartitaanermut Ilisimatusarnermullu Ataatsimiisitaliamut ingerlateqqin­nissaa inersuussutigaarput.

 

Ilanngullugu naalakkersuisumut immaqa una apeqqutigilaarusuppara imaluunniit erseqqissaatigilaarusullu­gu peqqussuissami tassani atuagarisatsinni maluginiarneqarsimannginnersoq Kultureqarnermut, Ilinniarti­taanermut taavalu Ilageeqarnermut Pisortaqarfik taanna oqaaseq atorneqarmat, peqqussullu atulerne­qartussaaq tassaasussaalluni Kultureqarnermut, Ilinniartitaanermut Ilisimatusarnermullu Piosrtaqarfiup atulersitassaa, taanna oqaaseq aaqqinneqalaarsinnaannginnersoq.

 

Mads Peter Grønvold, Kattusseqatigiit oqaaseqartuat:

Inuussutissarsiutinut ilinniartitaanerit inuussutissarsiutinullu pikkorissartitsisarnerit pillugit  Inatsisartut peqqussutissaannut siunnersuut Kattusseqatigiinniit soqutigalugu misissorsimavarput.

 

Peqqussutissatut siunnersuummi amingaatitut maqaasinartutullu Kattusseqatigiinniit ujartorusupparput, STI-imi ilinniartitaaneq naammassineqaraangat, ilinniartup ilinniarnerminik naammassinnissimasup tamatigut suliffissaannik qulakkeerinninnissaq Arlalitsigut amingaataasarmat, tassami ukiuni kingullerni ilinniagaqarsimasut STI-imiamerlaqisut suliffissaqanngimmata.

 

Kattusseqatigiinniit isumaqarpungut peqqussutissatut siunnersuut  kapitalinut qulinut agguataarneqarnera, kapital 11-inut ilaasariaqartoq tassa STI-imi Ilinniartut ilinniakkaminnik naammassippata suliffissaannik qulakkeeriffigineqarnissaat isumannaassallugu. Nassuiaammi allassimavoq ' 1-imi imm. 2-mi allassima­voq isuaaneq allartippoq:

 

Ainuusuttuaqqanut ilinniartitaanerit tamakku aaqqissugaassapput inuussutissarsiutinut ilinniartitaanermik ingerlataqartut inuiaqatigiinnut taakkulu ineriartornerannut paasinnilersillugit aammalu tunngavississallugit siunissami suliaqarluni inuunissamut@. Issuaaneq naavoq.

 

Taamaatumik inuusuttut ilinniakkaminnik naammassigaangata suliffeqaannarnissaat anguniarlugu peqqussutissamut siunnersuummi taakku pillugit ersarissumik ilanngussisoqarnissaa   Kattusseqatigiinniit matumuuna kaammattuutigaarput.

 

Taamatut oqareerluta peqqussutissatut siunnersuutip sinneri annerusumik oqaaseqarfiginagit suliap aappassaanneerneqannginnerani ultureqarnermut, Ilinniartitaanermut Ilisimatusarnermullu Ataatsimiititali­ami sukumiisumik oqaluuserineqarnissaa inassutigaarput.

 

Lise Lennert, Kultureqarnermut, Ilinniartitaanermut Ilisimatusarnermullu Naalakkersuisoq:

Inuussutissarsiutinut ilinniartitaanerit inuussutissarsiutinullu pikkorissartitsinerit pillugit Inatsisartut peqqussutissaattut siunnersuutip partiinit Kattusseqatigiinnillu oqaaseqarfigineqarnerani oqaaseqartunut naalakkersuisut sinnerlugit qujavunga.

 

Partiit Kattusseqatigiillu saqqummiussaat tusarnaarlugit maluginiarpara inuusuttatta inuussuttissarsiutitaar­niarlutik ilinniarnissamut pikkorissarnissamullu periarfissaasa pitsanngorsartuarneqarnissaannut suleqa­taanissamut piumassusseqartoqartoq annertuumik, inersimasuusugummi inuusuttatsinnut mikinngitsumik pisussaaffeqarpugut ilinniaqqinnissaallu tapersersortuartariaqassallugu. Nammineq inuiaqatigiinni inissisimanerput imaluunniit naalakkersuinikkut inissisimanerput tunngavigiinnarlugu inuusuttut ilinniarnis­saannut pikkorissarnissaanullu periarfissat ineriartortittuarnissaannut aqqutissiuiniarneq pakkersimaarni­arsinaanngilarput. Naalakkersuisut isumaqarput kalaaleq ilinniarusuttoq pikkorissarusuttorluunniit kinannguugaluaruni kinarsuugaluaruniluunniit periarfissittariaqartoq.

 

Taava partiit oqaaseqartuinut: Partiip Siumup oqaaseqartua saqqummiussaanut imaattunik Naalakker­suisut sinnerlugit qujavunga. Peqqussutissap imarisaanut Siumut ersarissaumik tapersiinera maluginiar­parput. Siumup allaffissornermi niuernermilu ilinniarnerit assersuutigai. Ilumoorpoq nunatsinni allaffissor­nerup niuernerullu iluani ilinniarnerit iluatsilluarsimammata, kalaaleqaterpassuavut ilinniarnerit taakku tamatigoortut naammassisarsimavaat amerlaqisullu inuiaqatigiinnut iluaqutaangaarlutik suliffinni inissisi­mapput.

 

Aamma ilumoorpoq HK-assistentitut ilinniarsimasut ilaatigut suliffissaaruttalersimammata. Tamanna tunngavigalugu naalakkersuisut HK-assistentitut ilinniarnerup suli tamatigoornerulernissaa anguniarlugu suliniummik aallartitsisimapput. Siullermik ilinniarneq maanna inuiaqatigiinni piumasarisaasut annertusiar­tuinnartut naammassiniarlugit siunissami ilinniartunngorumaartunut piumasarisaasussanik sukateriniarma­ta. Naalakkersuisut naatsorsuutigaat ilinniarneq ukiup affaanik sivitsorneqassasoq. Aamma HK-assistentitut ilinniareernerup kingorna ilinniarnerit ingerlaqqiffiusut nutaat aaqqissorneqarniarput. Ilinniarnerit taakku qarasaasialerinernut, naatsorsuutilerinernut takornariartitsinermullu tunngassuteqartut aamma suli qaffasinnerusun-ngortinneqarnissaat pilersaarusiorneqarpoq.

 

Siumup siunnersuutigaa inuussutissarsiutinut ilinniartitaanerit inuussutissarsiutinullu pikkorissartitsinerit pillugit Naalakkersuisut ukiumoortumik killiffimmik siunnerfimmillu Inatsisartunut nassuiaateqartoqartas­sasoq. Tassunga siunnersuummut pitsaasumut naalakkersuisut isumaqataapput. Nalunaarusiat aqqutiga­lugit ilinniarnerit pitsaassusaannik naliliinissaq qulakkeerneqassaaq.

 

Inuit Ataqatigiit oqaaseqartuata aamma tapersiilluni oqaaserisai tiguakka. Taavalu aamma una aaqqiinis­samut tunngatillugu imatut oqaatigiinnassavara tassa uuma suliarineqarnerata nalaani ilaa taamatut taaguuteqarsimavoq, taavalu tassa suliniarnerup iluani naalakkersuisoqarfik taamatut taaguuteqarmat soorunami uani suliap iluani taakku taaguutit atorneqarsimapput.

 

Taavalu Atassutip oqaaseqartuata Augusta Salling-ip saqqummiussaanut. Nuannaarutigivara taamatut taperseerpaluttumik nipillimmik nipeqaannarnani kisianni oqaatsit erseqqissut taperseerpaluttut atorlugit uuma siunnersuutip suliareqqinnissaa ilalerassiuk, kisiannili aamma maluginiarpara taamatut kinguarsar­neqarsimanera uggorigissi. Taavalu aamma akuersaarnissinni ataatsimiititaliamut suliareqqinnissaanut tapersiinersi qutsatigaara.

 

Taavalu Kattusseqatigiit oqaaseqartuanut Mads Peter Grønvold-mut. Tassa uani ujartorparsi taamatut STI-mi iliniareernerup kingorna naammassineqaraangat ilinniartup ilinniarnermik naammassinnissimasup tamatigut suliffissaanik qulakkeerinnissaq. Soorunami massakkut una oqaluttarfik atorlugu neriorsuisin­naanngilanga kisiannili tassa kissaatigisarsi ingerlateqqinneqassaaq una ataatsimiititaliap suleqqinnissaanut ilanngussassatut qimerluugassatullu.

 

Olga Poulsen, Inuit Ataqatigiit oqaaseqartuat:

Unajuna, nalunngilara una peqqussutissatut siunnersuut suliarineqarami pisortaqarfik taamatut ateqarsi­masoq, kisianni una paasisinnaanngilara peqqussutissaq atulersinneqassaaq pisortaqarfik imaluunniit naalakkersuisoqarfik taamatut ateqalereersoq, tassami ateqartoq, taava uagut qanoq periarfissaqarpugut imatut immaqa periarfissaqarsinnaavugut ataatsimiisitaliami tullissaaneerneqarnissaanut immaqa piumas­sarisinnaavarput taassuma oqaatsip ilageeqarnerup ilisimatusarnermik taarserneqarnissaa, pissutigalugu naalakkersuisoqarfik taanna taamatut massakkut taaguuteqarpoq. Nalunngilarput aamma suliarineqar­nermini ilageeqarneqartoq taamanikkut.

 

Mikael Petersen, Isumaginninnermut Suliffeqarnermullu Naalakkersuisoq:

Pinngitsoorusunngilanga oqaaseqarfigilaassallugu Kattusseqatigiinninngaanniit saqqummiunneqartoq tassa inuussutisasrsiutinut ilinniartitaanerit aammalu pikkorissartitsisarnerit pillugit peqqussutissamut siunnersuummi ilanngussisoqassasoq ilinniagaqartoq naammassigaangat pinngitsoorani suliffissaqartitsi­sarnissamut. Maluginiarpara  Ilinniartitaanermut naalakkersuisup akissuteqarnermini inassutigigaa ataatsimiititaliami tamanna nalilersorneqassasoq.

 

Suliffeqarnermut Naalakkersuisutut Inatsisartunut qinnutigissavara taamatut ataatsimiititaliami nalilersui­nissami/misissuinissami eqqaamaqqullugu inuiaqatigiinni ullumikkut suliffeqarnermut tunngasutigut imaannaanngitsumik inissisimasoqarmat, 3.000-it missaani suliffissaaleqisoqarpoq kisianni taamaakkalu­arpalluunniit ilinniartitaanermut peqqussutitigut pinngitsoorani suliffissaqartitsinissamik piumasaqalissagut­ta taava suliffeqarnermut pissutsit Nunatsinni pituttussagatsigit aammalu Landskarsimut akisoorujussu­anngorsinnaammat isumaginninikkut aningaasartuutit eqqarsaatigalugit. Suliffeqarfiit kiffaanngissuseqar­nerat suliffiit assigiinngitsut kiffaanngissuseqarnerat eqqaamaqqussavara. Qanorluunniit suliffissaaleqineq annertutigileraluarpat, soorunami tamatta suliuarpugut taassuma ikilisarneqarnissaanut, kisianni ilinniarti­taanermut peqqussutitigut pituttuilissagutta ulorianartoqarpoq, aamma uagutsinnut akissorujussuanngor­sinnaasumik

 

Taamaattumik suliffeqarneq pillugu iluarsaaqqinneq ingerlapparput. Eqqaamaqqulaassavara aamma suliffeqarnermut iluarsaaqqinnermi iliniartitseqqiisarnerit annertuumik ingerlanneqarput/ sammineqarput aamma Inatsisartunut saqqummiunneqarumaartussat, suliffissarsiuussisarneq nutarterniarneqar­poq/nutarterneqalerpoq. Siunnersuisarneq sulisussanik annertusarniarneqarpoq, kommunit peqatigalugit suliffissarsiuussisarfiit nutarterneqassapput ullumikkornit pitsaanerusumik inuit sulisinnaasut tamarmik siunnersorneqartalernissaat siunertaralugu. Aamma taamaappoq sulinermik inuussutissarsiuteqartut sulisitsisullu peqatigalugit tamakkunuunatigut aaqqissuussinissat ingerlassammata.

 

Ilanngullugu Inatsisartunut ilisimatitsissutigissavara suliffeqarneq pillugu siunnersuisoqatigiit Naalakkersui­sut pilersilermatsigit uani qaammami majimi, taakkuussappullu aamma sulisitsisut sulisartullu kommunillu sinnerlugit Naalakkersuisunut oqariartuuteqartarumaartussat suliffeqarnerup tungaatigut aammalu suliffissaqartitsiniarnerup tungaatigut qanoriliuusaasinnaasut eqqarsaatigalugit.

Taamannak oqaaseqarlunga Inatsisartunut taamatut eqqaamasassaannik oqaaseqalaarpunga.

 

Anthon Frederiksen, Siulittaasoqarfimmi ilaasortaq:

Isumaginninnermut Suliffeqarnermullu Naalakkersuisumut qujanaq. Taamaalilluni ullumikkut oqaluuseri­sassaq immikkoortoq 10 tassalu Inuutissarsiutinik ilinniartitaanerit inuutissarsiutinullu pikkorissartitsisar­nerit pillugit Inatsisartut peqqussutissaattut siunnersuutip siullermeerneqarnera naammassivoq, aappas­saaneerneqannginnermili Kultureqarnermut, IlinniartitaanermulluAtaatsimiititaliamut ingerlateqqinneqas­saaq.