Oqaluuserisassani immikkoortoq 01-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Daniel
Skifte, Inatsisartut Siulittaasuat, Atassut.
Inatsisartut
upernaaq-manna ataatsimiilernerat matumuuna ammarneqarpoq.
Nuannaarutigaara
ataatsimiinnermut, aammalu ulloq 15. maj 2002 tikillugu sapaatip akunnerini
arlalinni ilungersorluni sulinissamut tikilluaqqusinnaagassi. Immikkut
tikilluaqqorusuppara naalagaaffiup sinniisuatut atorfineqqammersoq Peter
Lauritzen. Inatsisartut ataatsimiinneranni najuuttarneratigut
ilisarilerumaagassarput.
Ataatsimiinnermut
matumunngarpiaq Inatsisartutut sulinissatsinni nalliuttorsiorfittut
isigisariaqarparput, tassami tikilluaqqusisinnaavunga immikkut tamanna
nuannaarutigigakku tassaammammi Namminersornerullutik Oqartussat imaluunniit
Namminersornerullutik Oqartussaanerup atuutilerneraniit Inatsisartut
50-issaannik ataatsimiinnerat ullumikkut pisussaammat.
Nuannaarutigaaralu
nalluittorsiulluni ataatsimiinneq manna, oqaatigisinnaagakku pitsaanerpaamik
ingerlanneqassasoq. Inatsisartuni ilaasortaq Josef Motzfeldt, Inuit Ataqatigiit,
kujataani silamik peqquteqartumik ataatsimiinnerup ulluani siullermi
ataatsimeeqataasinnaanngilaq. Aqagu tikissaaq ullumilu ataatsimiinnissamut
sinniisussamik aggersaasoqarsimanngilaq.
Inatsisartuni
ilaasortaq Anthon Frederiksen Kattusseqatigiit nalunaarpoq ulloq 5. april-imiit
18. aprili ilanngullugu peqataasinnaanani. Taamaattumillu Anthon Frederiksenip
sulinngiffeqarnissaa siulittaasoqarfiup akuersaarsimavaa.
Qinigaanerup
misilitsinneqarnissaanut ataatsimiititaliap Kattusseqatigiit sinniisussaat
siulleq Tom Ostermann taassumap qinigaasinnaassuseqarnera akuerisimavaa.
Matumuuna inassutigisavara Tom Ostermann Anthon Frederiksenimut
sinniisussatut Inatsisartut ataatsimiinneranni ulloq 17. april 2002
ilanngullugu peqataanissaa Inatsisartut akuersissutigissagaat.
Akerliusoqarnerluni.
Naamik. Tom Ostermann tikilluarit qinnuigissavakkillu Inatsisartuni inissannut
ingeqqullutit.
Ullormut
oqaluuserisassani immikkoortunut matumunnga naggasiutigalugu matumuuna
oqaagtigissavara Inatsisartut taamatut ilaasortaqarlutik tamakkiisumik aalajangiisinnaassuseqarmata.
Oqaasissaqartoqarpa?
Ruth
Heilmann, Siumup oqaaseqartua.
Qujanaq,
Siulittaasoq. Siumumit Inatsisartut Siulittaasuanut upernaakkut
ataatsimiinnissamut tikilluaqquneqarnerput qujassutigaarput. Siumumit
piareersimavugut qilanaarlutalu ataatsimiinnerup ingerlanneqarnissaanut
suliassat annertuut aammalu ulapputissat ataatsimiinnerup
ingerlanneqarnissaanut aamma suliassat annertummata. Taakku tamaasa
Inatsisartoqatit Naalakkersuisut,
allatsit, nutserisut aammalu betjentit peqataalluartut tamaasa
neriuutigeqaarput pisarnertut suleqatigiilluarumaartugut.
Siumumi
nalunngilarput namminersornerulernitsinnit Inatsisartut 50-issaa maanna
ataatsimiinnerat pisussanngortoq. Tamanna pillugu pilluaqqusiniarpugut.
Siumumit
pissusissamisoortuutipparput kingumut qiviarluta suleqataasimasorpassuit
nunaqqativut innuttaasullu tamaasa danskit nunarpullu pillugu suleqataasut
tamaasa nunatta Namminersorneruleraniit angusarisaasut ajunngitsunik
angusaqarfiusimasut pillugit qujassalluta. Ilaat suli maani suleqataapput.
Ilaallu toqukkut qimaguttarsimallutik. Siumumiit pinngitsoorumanngilagut
tamaasa maanna ataatsimiinnerup ammarnerani uummammik pisumik qutsavigissallugit.
Inatsisartuni kommunini nunatsinni sineriassuarmi suliumatussuseq
isummerumatussuserlu alliartortinneqartoq isumalluarfigalugu angusaqarluarnissaq
siunissami suli annerusoq Siumumiit neriuutigeqaarput. Qujanaq.
Godmand Rasmussen, Atassutip
oqaaseqartua.
Uagut aamma naatsuararsuarmik
Atassumminngaaniit tikilluaqquneqarnerput qujassuteqarfigivarput. Aammalu
oqaatigineqartutuut Inatsisartut ataatsimiinnerata 50-issaanik massakkut
ammarneqarneranut Namminersornerunerminngaaniit peqataasimasut
arlalissuunngimmata maani aamma Atassummit immikkut pinngitsoornata
pilluaqqujumavagut tamaasa.
Neriuppugut una ataatsimiinnissaq
aamma uagut qilanaarivarput Atassutip iluaninngaaniit. Oqaluuserisassat
nalunngilagut ilaatigut imaannaanngitsortaqartut aammalu soorunami
pisinnaasarput tamaat suleqatigiilluarnikkunaasiit qularnanngilaq
ajornartorsiutaagaluartut anigoriarnissaannut nukissaqartarumaarluta.
Taamak immikkut naatsumik
oqaaseqarluta tikilluaqqusaanerput qujassuteqarfigeqqipparput. Qujanaq.
Daniel Skifte, Inatsisartut
Siulittaasuat, Atassut.
Godmand Rasmussenimut
qujanaq. Taava allanik oqaaseqarumasoqanngimmat, ingerlariaqqitsinnata
qinnuigissavara Siulittaasoqarfimmi siulittaasup tullia siulleq, Anders
Andreassen, aqutsinermik tigusilaaqqullugu uanga nassuiaateqartussaagama.
Anders Andreassen, ataatsimiinnermik
aqutsisoq, Inatsisartut Siulittaasuata tullia,
Siumut.
Aap, qujanaq.
Massakkullu tikissavarput
immikkoortoq 2. Tassalu ullormut oqaluuserisassanut nassuiaat.