Oqaluuserisassani immikkoortoq 101-1 |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut arfersaneq pingajuat, aataasinngorneq 13. maj 2002, nal.
14.59
Anthon Frederiksen, apeqquteqartoq, Siulittaasup tulliata sisamaat, Kattusseqatigiit.
Kalaallit Nunatsinni Inatsisartut suleriaasissaanni ' 36 tunngavigalugu matumuuna Naalakkersuisunut imaattumik apeqquteqarniarpunga:
Naalakkersuisut ukiarmi 2001-imi Utoqqaat aningaasatigut inissisimanerat pillugu nalunaaruteqarput.
Nalunaarummi takuneqarsinnaasut uppernarsineqartullu tunngavigalugit utoqqartatta amerlanersaat aningaasatigut ilaatigut annertuumik ajornartorsiuteqarput, tamanna miserratissaanngilaq nassuerutigineqartariaqarlunilu.
Tamakkualumi pillugit aamma uanga Inatsisartuni ataasiarnanga utoqqaat innarluutillit sulisinnaajunnaarnersiutillillu atugaasa iluarsineqarnissaat pillugit siunnersuuteqartarsimavunga, kisianni ajoraluartumik annerusumik tusaaneqartarsimanngitsunik.
Maannakkut qujanartumik misissuititsineritigut uppernarsarneqarpoq; ilumut Nunatsinni utoqqartavut aningaasatigut ilaatigut annertuumik ajornartorsiuteqartut. Misissuinerit ilaatigut takutippaat utoqqaat utoqqaanerujuartortillugit aningaasatigut pissarsiarisartagaat annikilliartortartut il.il.
Apeqqutissakkalu ilaatigut ukuupput:
Misissuisimanermi paasisat qanoq
atorneqarniarpat? Qaqugulu?
Naalakkersuisut Utoqqaat atugaasa
pitsanngorsarneqarnissaat qulakkeerniarlugu qanoq iliuuseqarniarpat?
Aama Naalakkersuisut utoqqaat
namminerisaminnik inillit pillugit qanoq aaqqiissuteqarniarpat?
imaluunniit qanoq
pilersaaruteqarpat?
Daniel Skifte, ataatsimiinnermik aqutsisoq,
Inatsisartut siulittaasuat, Atassut.
Athon Frederiksen qutsavigaarput. Taavalu maannakkut Naalakkersuisunut ilaasortaq Isumaginninnermut naalakkersuisoq Ole Dorph akissuteqassaaq.
Ole Dorph, Inunnik isumaginninnermut
Sulisoqarnermullu Naalakkersuisoq, Siumut.
Qujanaq.Siullermik ilisimasitsissutigissavara
siunnersuuteqartumut akissuterput Naalakkersuisuninngaanniit allaganngorlugu
ingerlatereernikuugatsigu.
Naalakkersuisunut utoqqaat
atugarisaat pillugit apeqquteqaammut atatillugu innersuussutigineqassaaq,
utoqqaat aningasaqarnikkut atugarisaat pillugit misissuineq 2001-imi
agguaanneqartoq.
Utoqqaat aningaasaqarniarnertik
namminneq qanoq misigisaqarfigisarneraat misissuinermit ilaatigut
paasineqarsinnaavoq. 27%-iisa assut naammagisimaarpaat imaluunniit
naammagisimaarlugu, 41%-iisa imannak naammagisimaanngilaat, 32%-iisalu
aningaasaqarniarnertik naammagisimaanngillluinnarpaat. Misissuinermiilli
paasineqarsinnaanngilaq utoqqaat aningaasaqarniarnerat inuiaqatigiinni annanut
sanilliullugu qanoq inissisimanersoq.
Inuuniarnermi atugarisat pillugit
1994-imi misissuinermit paasineqarportaaq ilaqutariit ilinniagaqarsimasuunngitsut
aammalu ilaqutariit aalisartukkormiut piniartukkormiullu annikitsuinnarnik
isertitaqartartut taamatullu aningaasaqarnikkut atugarisaat ajornartorsiorfiusut.
Taamatuttaaq ilinniartut annikitsuinnarnik isertitaqaateqartartutut
taaneqarsinnaapput. Misissuinermi paasinarsitinneqarpoq qitornallit
kisimiillutik pilersuisuusut aninaasaqarnikkut ajornartorsiutilittut aamma
inissisimasuusut. Maannamut misissuinernik nutaajunerusunik
pigisaqartoqanngilaq isertitakinnerusut aammalu akunnattumik isertitaqartartut
atugarisaannut sanilliunneqarsinnaasunik.
Kommunit ataasiakkaat tamarmik
2001-ip ukiaanerani apeqquteqaateqarfigineqarput soraarnerussutisialinnut inummut
tapit tuniunneqartartut pillugit. Kommuni ataaseq eqqaassanngikkaanni kommunit
aningaasanik atugassiissuteqartitsisarput (rċdighedsbelĝb),
soraarnerussutisiallip aalajangersimasumik aningaasartuutissat
akilerneqareeraangata sinneruttussanik. Kommunit amerlanerit kisimiittunut
qaammammut 2.500-3.500 kr.-inik atugassiissuteqartitsisarput, aappariinnullu
3.500-6.000 kr.-inik, tassalu imaappoq soraarnerussutisiallit ilaat
aalajangersimasumik aningaasartuutissatik akilereeraangamikkit allanit
isertitakinnerusartunit amerlanerusunik aningaasassaqartarlutik.
Utoqqaat ilaasa
aningaasakilliornerartarnerat sooraarnerussutisiat qaffanneqarnissaannut immini
tunngavissiissutaasinnaanngilaq, taamaattorli soraarnerussutisiat 1998-imili
qaffanneqarnikuunngimmata anguniagaavoq soraarnerussutisiat inuuiaqatigiinni
allanut, isertiaasartut eqqarsaatigalugit, aningaasaqarnikkut 1998-imiilli
qaffariaataasimasut malillugit qaffaaffigineqassasut.
Utoqqarnut akiliutigineqartartut
pineqartut utoqqaliartornerat ilutigalugu ikiligaluttuinnartarnerarlugit
misissuinermi nalunarunnaarsitsineq arlalinnik peqquteqarsinnaavoq.
Peqqutaasinnaavoq soraarnerussutisiarisartakkat saniatigut allanik
isertitakinnerusalerneq imaluunniit allanik isertitaqarunnaaartarneq.
Peqqutaasinnaasoq alla aamma tassaavoq utoqqaat illuannut nuunneq, tamatumani
pineqartunut maleruagassa malillugit soraarnerussutisiat ikinnerusut
akiliutigineqartarmata.
Misissuinermit paasisat qanoq
atorniarneqarnerannik apeqqummut atatillugu ilisimatitsissutigineqarsinnaavoq
taamatut misissuititsisimaneq pisortanit soraarnerussutisiat pillugit
Inatsisartut peqqussutaata allanngortinneqarnissaanut suliaqarnermut tamakku
ilaatinneqarumaarmata, taamatumanilu peqqussummi naapertuutinngitsunik
nalaassassaqartoqarneq immikkut alaatsinaanniarneqartussaammat.
Naalakkersuisut missingersuutit
pillugit qanittukkut isumasioqartigiippuut, tassanilu soraarnerussutisiat
pitsanngorsaavigineqarnissaat eqqartorneqarpoq. Pitsanngorsaataasinnaasut -
inuiaqatigiinni isertitatigut ineriartornerit malitsigisaannik tamanut
atuuttumik qaffaanissap saniatigut - qulakkeerinnissutaassapput
soraarnerussutisiallip nammineq isertitaqaateqarneq ajortup, aapparisap
isertitarisartagarisinnaasai apeqqutaatinnagit, aningaasanik aalangersimasunik
pisinnaasaqarsinnaatitaalernissaanut, aammalu soraarnerussutisiarisartakkat
aukangannginnerusumik ikililerneqartalernissaannut, tamatumani
soraarnerussutisisiaqartoq nammineq sulinermigut saniatigut isertitaqalaartarput
imaluunniit tjenestemanditut suliffeqarnermiilluunniit
soraarnerussutisiassaqartarpat.
Naalakkersuisut ilimagaat
Inatsisartut 2002-mi ukiakkut ataatsimiinneranni pisortanit sorarnerussutisiat
pillugit Inatsisartut peqqussutaata allanngortinneqarnissaanut siunnersuummik
saqqummiussissallutik, taamatullu matuma siuliani taaneqareersut ilaatillugit.
Naalakkersuisut utoqqaat nammineq
inissiaateqartut ikiorserneqarnissaannut qulakkeerinnissutaasinnaasunik qanoq
iliuuseqarniarnerannik pilersaaruteqarnerannilluunniit apeqqummut tunngatillugu
ilisimatitsissutigineqarsinnaavoq BSU-mi illuutit pineqartillugit ineqarnermut
tapiissutit atorunnaarsinneqarnerannut atatillugu imaalissammat BSU-p
illuutaanik piginnittut isertitakinnerusut akiligassarisaminnik aammalu
kapitali 4 malillugu taarsigassiamik akiitsuinik sinneruttunik
isumakkeerfigineqarsinnaalissasut, taamaasillunilu aamma akiitsut
isumakkeerinnissutaasussanngorlugit.
BSU-p illuutaanik piginnittut,
piffissamilu 1. maj 2002-imiit 30. april 2002-p tunngaanut ineqarnermut
tapiissutisisimasut, akiligassarisaminnik sinneruttutullu akiitsorisaminnik
isumakkeerinniffineqarsinnaatitaasussaassapput- piginnittullu taakku INI
A/S-imit allagarsitinneqarumaarput atsiorneqariarluni INI A/S-imut utertillugu
nassiunnqartussamik, taamaasilluni akiligassarisat akiitsullu sinneruttut
isumakkeerinnissutaassammata. Taamatuttaaq piginnittut ukiuni kingullerni
marlunni akileraaruteqarfiusuni inoqutigiittut ukiumut 128.000 kr.-it ataallugu
isertitaqartarsimasut akiligasarisamik aammalu sinneruttutut akiitsorisamik
isumakkeerinnissutigineqarnissaat qinnuteqaatigisinnaassavaat.
Isertitarisimagassatut killigititaq meeqqamut ataatsimut 4.000 kr.-inik
qaffanneqartassaaq (taamaattorli meqqat amerlanerpaamik arfinillit), tamatumani
inoqutigiinni meqqat 18-it inorlugit ukiullit pineqartuni suli
najugaqartuuppata.
Pineqartut tassaapput BSU-p
illuutaanik piginnittut katillugit 386-it. Ineqarnermut, Attaveqarnermut Pilersuinermullu
Pisortaqarfik illut taakku pineqartut sinerissami piginnittuisalu utoqqaassuserisaat
malillugu qanoq agguataarsimanerannik paasissutissaateqanngilaq,
qularnanngilarli soraarnerussutisiaqartut arlallit BSU-nik illuuteqarmata,
taamatullu aamma kapitali 4 malillugu taarsigassarsianut akiliggassarisanik
sinneruttutullu akiitsorisanik isumakkeerinniffigineqartussanut ilaanissaat.
Sinneruttutut akiitsorisat aammalu
akiligassarisat isumakkeerinnissutaanerisa kingunerisassaat tassaassaaq illut
kapitali 4 malillugu taarsigassarsiffiusimasut atorneqarsinnaanerannut
killiliussaasartut atorunnaarsinneqarnissaat. Taamasilluni illu pineqartoq
tunineqarsinnaalissaaq. Illulu boligstĝttimik aaqqissuussinermut
ilaatinneqarunnaartussaammat boligstĝttimik aaqqissuussineq malillugu
iluarsartornissaanut pitsanngorsarnissaanulluunniit taarsigassarsiniarnissamut
qinnuteqaatigineqarsinnaajunnaassaaq. Akerlianik pitsanngorsarnissaanut
taasigassarsinissamik 10/40/50-imik aaqqissuussineq malillugu
qinnuteqartoqarsinnaasoqalissaaq.
Daniel Skifte, ataatsimiinnermik aqutsisoq,
Inatsisartut siulittaasuat, Atassut.
Isumaginninnermut naalakkersuisumut
akissuteqaataanut qujavugut. Taava apeqquteqartoq naatsuararsuarmik
oqaaseqaqqissinnaavoq. Anthon Frederiksen.
Anthon Frederiksen, apeqquteqartoq, Siulittaasup
tulliata sisamaat, Kattusseqatigiit.
Akissuteqaammut qujavunga, aammalu akissuteqarnermi oqaatigineqartut Naalakkersuisut ilimagisaat tassa Inatsisartut ukiakkut 2002-mi ataatsimiinnissaanni pisortani soraarnerussutiat pillugit Inatsisartut peqqussutaata allanngortinneqarnissaannik kinguneqartussaasoq paasivara misissuisitsisimaneq. Tamannalu pissangallunga aamma malinnaaffigilluarumaarpara ukiamut. Qujanaq
Daniel Skifte, ataatsimiinnermik aqutsisoq, Inatsisartut siulittaasuat, Atassut.
Anthon Frederiksen qutsavigaarput.