Kalaallit Nunaanni Inatsisartut

Oqaluuserisassani immikkoortoq 46-1		[ Ataatsimiinnerit ] [ Tilbage ] [ Op ] [ Næste ]
Siullermeerneqarnera	Aappassaanneerneqarnera		Pingajussaaneerneqarnera

Ullut ataatsimiiffiusut aqqaneq tallimaat, ataasinngorneq 6. maj, nal. 12:32

 

Oqaluuserisassaq immikkoortoq 46.

 

 

Pisortanit ikiorsiissutit pillugit malittarisassat aaqqiivigineqarnissaannut periarfissat pisariaqartitsinerlu pillugit ' 35 naapertorlugu apeqquteqaat aallaavigalugu oqallinnissamik siunnersuut.       

(Mads Peter Grønvold)

 

Mads Peter Grønvold, Kattusseqatigiit.

Pisortanit ikiorsiissutit pillugit malittarisassat nutarterneqarnissaannut periarfissat pisariaqartitsi­nerillu apeqquteqaat aallaavigalugu oqallinnissamik siunnersuut.

 

Nunatsinni inunnik ikiorsiisarnermut tunngasut ukiuni kingullerni nutarterneqartariaqartut isumaqarpunga. Taamatut piumasaqarninnut tunngavigaara ilaatigut inuit ikiorneqarnissaminnik pisariaqartitsisut ikiorneqartarnissaat pisariaqartoq isumaqarama.

 

Inuit isumaginninnikkut ikiorserneqartarnerat qiviaraanni ukiuni kingullerni naleqqussarneqartaria­qartoq ilaatigut takuneqarsinnaavoq. Assersuutigalugu inuit aappariit qiviaraanni apparisaq sulippat ilaatigut pineqartoq inunnik isumaginninnermik ikiorserneqarsinnaaneq ajorpoq. Naak ilaatigut pineqartut ikiorseqartariaqaraluartut.

 

Assersuutigalugu aappariit marlunnik qitornaqartut aasaanerani suliffissaqarluarnermikkut ukiumut aningaasarsilluartaraluarlutik ukiuunerani aappaasoq suliffeerukkaangat ilaatigut ineqarnermut akiligassanik artukkerneqartarput. Naak ilaatigut aappaariit tamarmik sulilluartillutik ineqarnermut akilersuisinnaanerat ajornannginnerusartoq.

 

Taamaattumik pingaaruteqarluinnarpoq aappariit apeqqutaatinnagit aappaasoq sulingikkaluarpat ikiorserneqartarnissaat. Ilaatigummi ulluinnarni inuuniarneq ilaqutariinni kisimiilluni suliffeqarluni nammanneqarsinnaajunnaaraluttuinnartoq ukiuni kingullerni takuneqarsinnaavoq.

Ukiuni kingullerni ilaatigut aappariit iluanni aappaasoq suliffissaarukkaangat kisimiilluni sulisoq annerusumik aningaasarsiaqannginnini pissutigalugu tamarmik suliunnaarnissartik aalajangertar­paat. Taamaaliornikkut ilaqutariit inunnik isumaginninnikkut ikiorsernearsinnaalersarput.

 

Isumaqarpunga inunnik ikiorsiisarnermut tunngasut iluarsartuunneqartariaqalersut apeqqutaatinna­gu aappaasoq sulisarnersoq. Tamarmik suliffeeruttut ikiorserneqartarnissaat pisariaqartoq isumaqarama.

 

Naalakkersuisunikkut soqutigineqartariaqarpoq inuit ukiuunerani suliffissaqartinneqartarnissaat ulluinnarni inuuniarneq ukiuunerani ajornarsiartuinnartartoq ilaatigut oqaatigineqarsinnaammat.

 

Soorlumi ukiuunerani kiassarnermut aningaasartuutit aamma qaffakkaluttuinnartartut. Soorlumi aamma utoqqaat siusinnaarlutillu sulisinnaajunnaarnersiutillit aningaasaqarnikkut atugaat ukiuni kingullerni pitsanngorsarneqartariaqartut oqaatigineqartariaqartartoq. Ilaatigut utoqqaat ilaat inunnik isumaginninnermut ikiorserneqartariaqalersimapput ulluinnarni utoqqaat inuuniarnerannut aningaasat tunniunneqartartut akiligassanut naammaqqarluinnartut ilaatigut tunniunneqartarmata.

 

Inuit namminneerlutik suliffissaqannginnertik pissutigalugu aningaasarsiorsinnaajunnaarsimasut inunnik isumaginninnikkut ikiorserneqartarnissaat ukiuni kingullerni anguniarneqartariaqalersoq isumaqarpunga. Soorlumi aamma utoqqaat atugaasa pitsanngorsarneqarnissaat eqqarsaatigalugu.

 

Isumaqarpunga nunarput akissaqartariaqartoq inunnik isumaginninnikkut atugaasa nunaqarfinni illoqarfinnilu assigiinnerusumik ingerlanneqartarnissaannut. Naggataatigut isumaqarpunga nunatsinni inunnik ikiorsiisarnermut tunngasut ukiuni kingullerni naleqqussarneqarneqartariaqaler­sut. Nunarput tamakkerlugulu. Soorlumi 1960-kkunni 70-kkunni 80-kkunni ulluinnarni inuuniarneq akikinnerusumik ingerlanneqartarsimasoq. Kisiannili ukiuni kingullerni inuuniarneq naluneqanngi­laq akitsoriapiloorsimasoq.

 

Taamatut siunnersuuteqarlunga Inatsisartuni Naalakkersuisunilu ilaasortat oqallilluarnissaannik kissaappakka.

 

Ole Dorph, Isumaginninnermut Suliffeqarnermullu Naalakkersuisoq, Siumut.

Inatsisartunut ilaasortaq Mads Peter Grønvold pisortanit ikiorsiissutit pillugit malittarisassat nutarterneqarsinnaanerat periarfissaqarnersoq periarfissaqartinneqarnersorlu apeqquteqaammik saqqummiussaqarpoq.

 

Apeqquteqaat Inatsisartut Siulittaasoqarfiata akuersineratigut oqaasiinnakkut isumaqatigiinniutigineqartussanngortinneqarpoq.

 

Utoqqarnut siusinaartumillu pensinisialinnut pisortat ikiorsiissuteqartarnerat pisortanit pensionisiat pillugit inatsisinik tunngaveqarpoq. Tassani kommuni pineqartoq pensionisiallit atugarisaasa nakukkami pissutsit aallaavigalugit naliliisussaavoq inummut tapiissuteqartoqassanersoq.

 

Taamaammat tunngaviatigut utoqqaat pisortanit ikiorsiissutit pillugit Inatsisartut peqqussutaanni ilaatinneqanngillat.

 

Naalakkersuisut pisortanit ikiorsiissutit pillugit malittarisassat iluarsaanneqarnerat sulissutigilereerpaat. 2000-mi upernaakkut katersuunnermi Inatsisartut isumaginninnermi isumannaallisaatitut tunniunneqartartut allanngortinneqarneri pillugit nalunaarusiaq isumaqataaffigaat. Tassani Naalakkersuisut inassuteqaatigimmassuk aaqqissuussat isumaginninnermut tunngassuteqartut aammalu suliffeqarnermut tunngassuteqartut ersarissumik immikkoortinneqassasut. Taamaalilluni ataasiinnarmik periuseqarluni pisortanit ikiorsissutitut aaqqissuussaq inunnut allatigut imminnut ilaquttaminnullu pilersuisinnaanngitsunut tunngatinneqartoq pilersinneqassammat.

 

Aammalu inunnut taamaallaat suliffissaaleqinermik napparsimanermilluunniit pissuteqartumik pilersuisutut ikiorserneqarsinnaanissaannik qinnuteqartunut suliffissaarunnissamut sillimmasiisar­fimmik pilersitsisoqassalluni.

 

2001-imi upernaakkut katersuunnermi Naalakkersuisut saqqummiuppaat siunissami suliffissaarun­nissamut sillimasiisarnermik aaqqissuussinissamut tunngaviit pillugit nassuiaat, taannalu Inatsisartunit pitsaasumik ilassilluarneqarpoq.

Nassuiaatip ilaatigut piffissalersuinerit imarai,

Annertussusileriikkamik ikiorsiisarneq pillugu peqqussut iluarsiiviginiarlugu ikaarsaariar­nermi aaqqissuussinissaq 1. januar 2002-imi atuutilersussaq.

Suliffissaarunnissamut sillimasiisarneq pillugu inatsit nutaaq 1. januar 2003-imi atuutiler­sussaq peqatigitillugulu annertussusileriikkamik ikiorsiisarneq pillugu, Inatsisartut peqqussutaat atorunnaarsinneqassasoq, kiisalu Pisortanit ikiorsiissutit pillugit Inatsisartut peqqussutaat iluarsiivigineqarluni.

 

Nassuiaat suliarineqareermat annertussusileriikkamik ikiorsiisarneq pillugu peqqussut iluarsaanne­qarpoq, tassani annertussusileriikkamik ikiorsiisarneq peqqussut nutaaq 2001-imi ukiakkut katersuunnermi akuersissutigineqarmat. Peqatigitillugulu aqutsisooqatigiit pilersinneqarlutik, siunissami suliffissaarunnissamut sillimmasiisarnerup pilersinneqarnissaa siunertaralugu sulisussaq.

 

Suliffeqarneq pillugu siunnersuisooqatigiit saaffigisartakkatut atuuppoq, siunnersuutinik ajornartorsiutaagunnartunillu oqalliseqataasartussaq, kiisalu kaammattuutinik saqqummiusisartus­saq.

 

Immikkoortup aappaani suliap ingerlaqqinnerani paasineqarpoq Inatsisissanik siunnersuusiorto­qannginnerani pissutsit arlallit qulaajaavigineqartariaqartut, ilaatigut qulaajarneqartariaqarpoq suliffissaarunnissamut sillimmasiisarnermik aaqqissuussinissami ikiorsiissutaasartussat ilusissaan­nik avissaartitsinissaq qanoq annertutigissanersoq. Taamaalilluni suliffeqanngitsup isumaginninner­mi ikiorsiissutinik isumalluuteqaannannginnissaat qulakkeerniarlugu.

 

Tassani eqqarsaatigineqarpoq suliffissaarunissami sillimasiisarnermik aaqqissuussinermi ullormusiaq qaffasissusissaat, qaffasissusiat akissarsiat qaffasissusiannut naammaginartumik naapertuutissasoq, taamaasilluni ullormusiaqarnissamit akissarsiaqarluni sulinissaq kajungernar­neruniassammat. Peqatigitillugulu nammineerluni imminut pilersornissap kajungernarnerunissaa qulakkeerniarlugu Pisortanit ikiorsiissutinik ullormusiat qaffasinnerusariaqarput.

 

Sulineq imminut akilersinnaasariaqarpoq taamaammat qulakkeerneqartariaqarpoq pilersuinermut isumaginninnikkut ikiorsiissutit aamma siunissami suliffissaarunnissamut sillimmasiisarnermi aaqqissuussinissap akornani ataqatigiinneqartitsinikkut ajornartorsiutitaqannginnissaat. Taamaam­mat kisitsisitigut erseqqinnerusumik nalilersuilluni misissueqqissaartoqartariaqarpoq pilersuinermut isumaginninnermi ikiorsiissutit ataqatigiinneqartitsinikkut ajornartorsiutaasinnaasut minnerpaann­gortinnissaat qulakkeerniarlugu.

 

Aningaasatigut kingunerisassaanik naatsorsuineq maannamut taamaallaat annertuumik eqqoriaa­nerit tunngavigalugit pisinnaasimavoq, paasissutissagut tunngavissat amigarpallaarnerinik pissuteqartumik.

 

2002-imi martsip qaammataani isumaginninnermut tunngatillugu kisitsisitigut naatsorsueqqissaari­nernik paasissutissanik nutaaq saqqummersinneqarpoq, tassani ilaatigut annertussusileriikkanik ikiorsiissutit, pisortanillu ikiorsiissutit aningaasartuutit kisitsisitigut takussutissinneqarlutik. Taamaalilluni naatsorsunissamut periarfissat annertuumik pitsanngoriarput.

 

Taamatuttaaq erseqqinnerusumik misissorneqartariaqarpoq inuit sorliit suliffissaaleqisutut nalunaarsorneqarsimanersut, annertussusileriikkanik ikiorsiissutinik pisartagaqaratik. Aamma qanoq annertutigisumik inuit taakku siunissami aaqqissuussinissamik atuisuussanersut. Suliffissaa­leqisut tamakkerlugit pingajorarterutaasa missaat annertussusileriikkamik ikiorsiissutisisarmata suliffissaaleqisut amerlanersaat erseqqinnerusumik qulaajaavigineqartariaqarput.

 

Maannakkut suliffissaaleqineq annikitsuinnaavoq. Ajornartorsiutiviusoq tassa ukiup ilaani suliffissaaleqisarneq aamma suliffissaqalernissamut piareersimanissami pisussaaffeqarneq. Taamaammat suliffissaarunnissamut sillimmasiisarnermik aaqqissuussinermut siunnersuutip suliarineqarnerani ajornartorsiutit taakku marluk sapinngisamik aaqqiiviginiarneqartariaqarput.

 

Suliffeqarnermi illuatungeriit aaqqissuussineq aningaasalersortussaavaat. Aaqqissuussinerup aallartinneqarnera qulakkeerumallugu nammineq aningaasaatit pilersinneqaqqaartariaqarput. Suliffeqarnermi illuatungeriit aaqqissuussinermi akulersuisussaammata sulinermut annertunerusu­mik peqataanissaannut periarfissaqartinneqartariaqarput.

 

Ulluni 12.- 13. marts 2002-imi siunissami suliffissaarunnissamut sillimmasiisarnermik aaqqissuus­sinissaq pillugu isumasioqatigiissitsisoqarpoq, tassani suliffeqarnermi illuatungeriit peqataallutik.

 

Malitsigisaanik isumasioqatigiissitsinissaq majimi pilersaarutigineqarpoq.

 

Suliffissaarunnissamut sillimasiisarnermik aaqqissuussinissap piareersarneqarnera naammattumik piffissaqarfiumallugu, Naalakkersuisut piffissalersuineq allanngortissimavaat imaalillugu, inatsisissamut siunnersuut 2003-imut upernaakkut katersuunnermi saqqummiunneqartussanngorlu­gu aamma aaqqissuussinermut akilersuinerit 1. januar 2004-imiit atuutilertussanngorlugit. Aaqqissuussinerlu tamarmiusoq ilanngullugu sillimmasiisimasunut tunniussisarnerit 1. januar 2005-imiit atuutilertussanngorlugit.

 

Tassunga atatillugu Pisortanit ikiorsiissutit pillugit Inatsisartut peqqussutaat iluarsaateqqinneqas­saaq, taamaalillunilu isumaginninnermi ikiorsiissutit suliffeqarnermullu tunngatillugu tunniuttakkat akornanni ataqatigiinneqartitsinikkut ajornartorsiuteqannginniassammat, kiisalu isumaginninnermut tunngatillugu aamma suliffeqarnermut tunngatillugu aaqqissuussinerit akornanni erseqqissumik immikkoortitsisoqarnissaa qulakkeerniarlugu.

 

Inatsisartut isumaginninnermi suliffeqarnermullu ataatsimiititaliaat sulinermut tassunga piffissaler­suinerit allanngortinneqarnerani oqaasiinnakkut ilisimatinneqarsimavoq.

 

Anders Andreassen, Siulittaasup tulliata aappaa, Siumut.

Maannalu Partiit, Kattusseqatigiit Attaviitsullu oqaaseqartussaat oqaaseqassappat, siulliullunilu oqaaseqassaaq

 

Ruth Heilmann, Siumup oqaaseqartua.

Qujanaq.

Pisortanit ikiorsiissutit pillugit malittarisassat nutarterneqarnissaannut periarfissat pisariaqartitsiner­lu pillugit apeqquteqaat aallaavigalugu oqallinnissamut siunnersuut, taamalu Inatsiartunut ilaasortaq Mads-Peter Grønvold, Kattusseqatigiit apeqquteqaat aallaavigalugu oqallisissamik Inatsisartunut saqqummiutaqarpoq.

Inatsisartuni ikiorsiissutit pillugit oqallittarneq arlalitsigut ingerlanneqartarpoq, aamma qinigaaffiup iluani tamanna takornartarineqanngilaq. Isumaginninnermi Iluarsaaqqinnissami Ataat­simiititaliarsu­aq sulisinneqarpoq aamma ikiorsiissutit nutarteriffigineqarnissaannik aqqutissiuusseqqusaalluni, tamanna sulineq 1995-97 ingerlanneqarpoq. Ikiorsiissutit atortinneqarnerat kommunimiit kommunimut assigiinngisitaartorujussuarmik ingerlanneqartut taamanikkut paasisat pingaarutillit ilagaat. Taamaattumillu nalimmassasoqarnissaanik kaammattuuteqartoqarpoq assigiinnerusumik ikiorsiisarnissat Inatsisillu naapertorlugit ingerlatsisoqarnissaannut kommuninut KANUKOKA-mullu kaammattuutigineqarluni.

 

Inatsisit atortinneqarneranut sullissisut pikkorissartinneqarnerulernissaat kaammattuutigineqartunut ilaavoq, nuannaarutissaavorlu arlalitsigut kommunit, KANUKOKA-lu namminneerlutik aamma tassuunakkut sulisorisanik pikkorissaanernik ingerlataqarmata.

 

Maluginiagassaavortaaq kommunit imminnut qanitariit assigiinnerusumik periuseqalernissamik suliniuteqartarmata, soorlu aamma qeqqani kommuneqatigiit taamatut angusaqarnisarsimasut, unalu eqqaamaneqartariaqartuuvoq kommunit aamma namminneq pisinnaatitaaffeqartinneqarmata ikiorsiissuteqarnerup annertussusilerneqarsinnaaneranut qanoq ittumik pitsanngorsaatinik atugassaqartitsinissaminnut kiffaanngisuseqartitaallutik, soorlu inummut tapeq aqqutigalugu aammalu Pisortanit ikiorsiissutit aqqutigalugit. Tamannalu namminneq pingaarnersiuinerminni tulleriiaarinerminnut piumagunik ilaatissinnaallugu.

 

Iluarsaaqqinnermut ataatsimiititaliarsuaq sulinerminik kaammattuuteqarpoq pisariaqartitsineq naapertorlugu aammalu innuttaasut pisariaqartitsisut naligiimmik periarfissaqartillugit ikiorsiissute­qarneq aaqqissuunneqartariaqartoq ingerlanneqartariaqarlunilu.

 

Tamanna malitseqartinniarlugu Naalakkersuisut Inatsisartunut suliakkerneqarnikuupput, soorlu Naalakkersuisut akissutaanni isumaginninnermi isumannaallisaatitut tunniunneqartartut allanngor­tinneqarneri pillugit nalunaarusiut saqqummiunneqarnerata malitsigisaanik annertuseriikkamik ikiorsiissutit iluarsartuuteqqinneqarneri pisimapput, kattuffiit pineqartut peqataatillugit. Tassani anguneqarpoq kikkut tamarmik sumut ilaasortaaneq apeqqutaatinnagu periarfissinneqarnerat, soorlu aamma suliffissaarunnissamut sillimasiisarneq pillugu inatsit 2003-imi suliarineqartussaq tamakkiisumillu 2005-imi 1. januar atuutilertussaq taaneqarsinnaavoq.

 

Tassunga tunngatillugu isumaqatigiinninniarnerit suliffeqarfiqarnermi illugiimmik ataqatigiissumil­lu paaseqateqarluni ingerlasoqarnissaa Siumumiit pingaartikkatigu Naalakkersuisut taamatut suliamik ingerlataqarnerat Siumumiit iluarinartuutipparput.

 

Siunnersuuteqartoq isumaqatigaarput pisariaqartitsisut ikiorneqarnissaat pisariqartuusoq, tamanna kommuninut saaffiginninnikkut aatsaat pisinnaavoq, piffissaagallartillugulu saaffiginninnissaq pisariaqarpoq. Tassami tamatta pisinnaatitaaffigaarput ikiorserneqarnissarput pisariaqartitsinerput pissutissaqarsimassappat. Soorlu suliffissaarunnikkut, isertitaarunnikkullu inigisamut akiliinissamik ajornartorsiuteqalerneq nalunaarutigineqartussaavoq aammalu ajornartorsiulivinneq pitinnagu oqarnitsituut piffissaagallartillugu saaffiginninnikkut, tamanna piaartumik pigaangat tamanut oqinnerusumik sullinneqarneq pisinnaasarmat.

 

Taamaattumik Siumumiit pisariaqartutut isigaarput inatsisit periarfissiissuteqarneranik paasisitsini­aanissap ingerlanneqarnissaata pingaaruteqassusia, tamannalu pillugu Naalakkersuisut piumaffigi­neqassasut suli annertunerusumik tassuunakkut paasisitsiniaanermik ingerlataqaqqullugit.

 

Siumumiit Naalakkersuisut isumaqatigaagut isumaqarmata sulineq imminut akilersinnaasariaqar­toq, ikiorsiissutinillu pisartagaqarneq aatsaat pisariaqartitsineq naapertorlugu

ingerlanneqartariaqartoq.

 

Taamatut Siumumiit oqaaseqarluta Naalakkersuisut akissutaat suliniutinillu ingerlatsinerat naammaginartuutillugu tusaatissatut tiguarput.

 

Godmand Rasmussen, Atassutip oqaaseqartua.

Inatsisartuni Ilaasortaq Mads-Peter Grønvold-ip siunnersuutaa Atassummiit imatut oqaaseqarfigis­savarput.

 

Siunnersuuteqartulli tunngavilersuutigisaa paasinarluaraluarput. Naalakkersuisullu akissuteqaataan­ni kommunit pineqartut naliliisarnerat, tassalu tapiissuteqarsinnaaneq periarfissaareersut oqaatigi­saat ilumoormata.

 

Kommunit tamarmik killeqanngiusartumik aningaasanik peqartuugunik qularinngilarput periarfissat qaffaanissamik isumalik annertuumik atortassagaluaraat. Kisiannili kommunimiit kommunimut pissutsit aningaasaqarnikkut atugarisaat assigiinngeqaat.

 

Naalakkersuisullu akissuteqaataat tassalu Pisortanik ikiorsiissutit iluarsarneqarnerat sulissutigine­qareersoq, akissullu Atassummit iluarisimaaratsigu oqaatigeriissavarput.

 

Naalakkersuisummi akissutaat ersarimmat oqartariaqarpugut siunnerfik pineqartumik qaamaneru­lersitsinera iluarisimaarnarmat. Siunnersuuteqartulli Ilulissat kommuniat meeqqerivinnut qaammammik ataatsimik akikillisarsimannginneranik oqaatigisaa inimi maani akuliuffissarinngilar­put.

 

Kommunimmi pisussaaffii Atassummit akuliuffigissallugit innimigilluinnaratsigit, taamatut oqaaseqarluta Naalakkersuisut akissuteqaataat akuersissutigaarput.

 

Anders Andreassen, Siulittaasup tulliata aappaa, Siumut.

Erseqqissaatigilaassavara tassa uani oqaaseqartussaagaluarmat Asii Chemnitz Narup, kisiannili nuappallaarnini pissutigalugu Paninnguaq Olsen-ip oqaasissaai saqqummiutissavai.

 

Paninnguaq Olsen, Inuit Ataqatigiit oqaaseqartuat.

Qujanaq. Inatsisartuni ilaasortap Mads-Peter Grønvold-ip oqaluuserisassanngortippai apeqqutit pingaaruteqarluinnartut. Oqaluuserisassanngortitsisup saqqummiussamini Pisortanit ikiorsiisarneq pillugu Inatsisartut peqqussutaata tunngaviusumik oqallisigineqarnissaa ujartoraa Inuit Ataqatigiin­nit paasivarput.

 

Saqqummiussinermilu pingaarnerutitaminut ilannguppaa ikiorsiissutinik annertussusiliisarneq assersuutigalugu aappariit pisortanit ikiorsiissutinik pisartagallit, annertussusiliiniarnermi qanoq isigineqartassanersut. Saqqummiussaq ilassilluarparput isumaqaratta Pisortanit ikiorsiissutit pillugit Inatsisartut peqqussutaata nalilersornissaanut ullumikkut pissusiviusunut nutarternissaanut Naalakkersuinikkullu isumaginninnikkut anguniakkanut naleqqussarnissaanut piffissanngortoq.

 

Ukiut tallimat qaangiupput Isumaginninnermik Iluarsaaqqinnermut ataatsimiititaliarsuup isumaliutissiissutaata saqqummiunneqarneranit, sulili ataatsimiititaliarsuup Pisortanit ikiorsiissuti­nut allannguutissatut inassutai timitalerneqanngillat.

 

Inuit Ataqatigiit peqqussutip siunertassaanut tunngavissaanut pingaartitassaanullu tunngaviusumik isumaat saqqummiutsinnagu manna oqaatigeqqaassavarput.

 

Inuiaqatigiit ingerlalluartut tassaapput innuttaasunut suliffissaqartitsiniarnikkut pitsaasunik periarfissiisut, inuillu pisinnaasaannut naleqquttunik naammattunillu suliffissaqartitsisut. Inuiaqatigiit ingerlalluartut tassaapput sulisartut atorfillillu sulisutut inuttullu ataavartumik ineriartortuarnissaannik periarfissiisut.

 

Tamakku qulakkeerneqarsimatillugit inuit imminnut pilersorsinnaanerat aamma qulakkeerneqas­saaq, inuillu imminnut napatikkusussuseqarnerat qajannaallisarneqassalluni. Suliffissaqartitsiniar­nikkut periarfissat imak pitsaatiginngillat siuliani taasagut, ullutsinni tamakkiisumik naammassine­qarsinnaallutik. Suliffissaaleqinermit inuit nalaanneqartarput, napparsimanerluunniit peqqutaalluni suliunnaarallartoqartariaqartarluni.

 

Inuit suliffissaaruttut napparsimalersullu inuiaqatigiinni ikiorsinneqartarnissaat pissusissamisoor­poq, tamatumunnga periarfissat ilaat Pisortanit ikiorsiissutit pillugit Inatsisartut peqqussutaatigut tunngavissinneqarput.

 

Inuit Ataqatigiit isumaat malillugu ikiorsiinermi siunertat makkuussapput.

 

Inuit imminnut pilersorsinnaajunnaarallarneranni aningaasatigut taakkulu malitsigisaannik inuttut ilaqutariissutsikkullu ajornartorsiutaannik ikiorsiinissaq.

 

Inuttut inooqatigiissutsikkullu ajornartorsiutit pinaveersaartinnissaat.

 

Inuit imminnut napatinnissamut piumassuseqartuarnissaasa sulerusussuteqartuarnissaasalu siuarsarnissaat.

 

Inuit Pisortanit ikiorserneqartarnissamik isumalluuteqarnerat pisariaqartitsinerat sapinngisa­mik sivikkinnerpaajutinnissaat.

 

Isumaginninnerup iluani sullissinnermi periutsinik inerisaanissamut kaammattuinissaq.

 

Inuit ilaqutariillu ataasiakkaat sullinneqarnerisa saniatigut inunnik peqatigiiaanik sullissi­nissaq.

 

Inuit Ataqatigiit isumaat malillugu innuttaasunik sullisinermi tunngaviit makku pingaartinneqartari­aqarput.

 

Sullisseriaatsimut tunngatillugut. Siusissukkut pilertortumik qanoq iliuuseqartarnissa. Isumaginninnerup iluani sullissinermi susassaqartut suleqatigiinnerisa nukittorsarnissaat. Innuttaasut ammasumik, inussiarnersumik, inuppalaartumik, isertuaatsumillu sullissinissaq. Pineqartut sutigut tamatigut oqartussaaqataatillugit. Kalaallisut oqaatsigut sullinneqarnissa­mik pisinnaatitaaffiup illersorneqartuarnissaa.

Kiffartuussinermi pingaartitassanut tunngasut. Inuup inuunini qanorlu iliuutsini pillugit akisussaaffeqarneranik pingaartitsinissaq. Inuup pisariaqartitaasa tamakkiisumik isiginiar­neqarnissaat. Timikkut misigissutsikkut inooqatigiissutsikkut anersaakkullu. Inuup inoqatiminut pitsaasumik pissarsiffiusumillu attaveqarnissaata peqateqarnissaatalu periarfissinnissaa. Inuup piginnaasaasa nukittuffiisalu tappiffiginissaat. Inuup inuttut sulisutullu ataavartumi ineriartornissaanut periarfissinnissaa. Inuup inuiaqatigiinni ineriartortitseqataanissaanut kaammattornissaa, inuiaqatigiinnilu atorfissaqartinneqarnera­nik misigisimatinnissaa. Allatut oqaatigalugu peqqussutip ullumikkut atuuttup Inuit Ataqatigiinnit tunngaviatigut nalilersoreerlugu isumaqarpugut atuuffissaata siaarnerunissaa pisariqartoq, inuit ajornartorsiulereersut ikiorsernissaat pinnarnagut aammali ajornartorsiu­lernissaasa pinaveersimatinnissaanut sammiveqartariaqarmat.

 

Siunertat tunngaviillu taakku tamarmik iluarsaaqqinnermik pingaartinniarlugit aaliangiunneqartari­aqartut Inuit Ataqatigiit isumaqarput.

 

Inuit Ataqatigiit isumaqarpugut nunatsinni isumaginnittoqarfiit aaqqissuussaanermikkut avatanni pissutsinik issuaanertut isikkoqarpallaartut aaqqissuunneqartut. Piffissanngorpoq nunatsinni inuiinillu tulluarsakkanik allaffissornikkut allatigullu sullisseriaatsinik inerisaanissamut, inatsisi­liortunut tamatumunnga kaammattuisariaqarpugut taamaaliorsinnaanerlu peqqussutitigut tunngavissinneqartariaqarsoraarput.

 

Tassunga atatillugu Inuit Ataqatigiit tungaanniit eqqaasitsissutigissavarput Isumaginninnermi Iluarsaaqqinnermi ataatsimiititaliarsuup ikiorsiissutinut tunngatillugu inassutigimmagu, nunatsinni tamarmi pisartakkat, akiligassat akilereerlugit aningaasat inuuniutissat assigiimmik annertussusiler­neqartarnissaat minnerpaaffiliinikkut.

 

Taamaaliornissaq innuttaasut Pisortanit assigiimmik kiffartuunneqarnissamik kissaataannut piumasaqaataannullu naapertuuppoq, oqaatigisariaqarporlu inassuteqaataasimasup piviusunngortin­neqarnissaa innuttaasunit erinitsaanneqarmat.

 

Isumaginninnermut Naalakkersuisup Mads-Peter Grønvold-imut akissuteqarnermini oqaatigaa suliffissaarunnissamut sillimmasiisarnerup pilersinneqarnissaata pilersaarutigineqaqqaarneranit kinguartittoq, maannalu 1. januar 2005-imit sillimasersimasunut tunniussisarnissat atuutilernissaat naatsorsuutigineqarluni.

 

Inuit Ataqatigiinni isumaqarpugut tamanna utaqqinagu Isumaginninnermi Iluarsaaqqinnermi ataatsimiititaliarsuup inassuteqaataata piviusunngortinneqarnissaa piaartumik sulissutigineqartaria­qartoq. Suliffissaarunnissamut sillimasiisarneq pillugu inatsisiliornissamut tunngatillugu Inuit Ataqatigiit tungaanniit pinngitsoorumanngilagut statsministeriap nunatta aningaasaqarniarneranut siunnersuisoqatigiivisa nalunaarutaata kingulliup mianersorfissanut imaannaanngitsunik ilaqartup issuaavigilaassallugu.

 

AAtaatsimut isigalugu naliliineq imaappoq, taamatut aaqqissuussinerup atuutilersinnginnerani paasilluartariaqarluni suliffissaarunnisamut sillimmasiisarnermut aningaasalersuinissap, immikkul­lu isigalugu isumaginninnermut pisartakkanik allanik taarserneqarsinnaasunik aningaasalersuinis­sap ilusilersorneqarnissaa qanorpiaq ataqatigiissuteqarnersoq@.

 

Inuit Ataqatigiinni naatsorsuutigaarput mianersorfissatut tikkuarneqartut soorunami nalilersoqqis­saarlugit suliffissaarunnissamut sillimmasiisarnermut inatsisissaq piareersarneqarumaartoq.

 

Immikkoortoq kommunit nammineersinnaatitaanerannik tunngasoq.

Nunatsinni kommunini 18-ini kommunit nammineersinnaatitaanerannik isummamik tunngaveqar­luni aqutsisoqarpoq. Aaqqissuusseriaatsip taassuma ersiutaa pingaarneq kommunit ataasiaakkat, kommunimi akileraarutip qanoq annertutiginissaanik aalajangersinnaaneraniippoq.

 

Kommunit nammineersinnaatitaanerat toqqammavigalugu isumaginninnikkut peqqussutit arlaqartut suliaapput, assersuutigalugu pisortanit ikiorsiissutit meeqqanut inuusuttuaqqanullu ikiorsiisarner­mut tunngasut. Tamatumuuna kommunit ataasiakkaat pisinnaatitaaffigivaat namminneq innuttaasu­nik kiffartuussinerup qanoq qaffasitsiginissaanik aalajangersagaliorsinnaaneq.

 

Tamatumalli kingunerivaa innuttaasut nunarput ataatsimut isigalugu assigiinngitsorujussuarnik ikiorserneqartarmata naammagittaalliuutigineqartaqisumik.

 

Inuit Ataqatigiit anguniagarivarput nunatta inuisa sumiikkaluarunilluunniit sapinngisamik assigiimmik pisortanit kiffartuunneqartarnissaat.

 

Kommunit nammineersinnaatitaanerisa tamakkiisumik nalilersuiffiginissaat taamaammat piffissanngorpoq aaqqissuusseriaatsip taassuma iluanni innuttaasut pilliutigineqartariaqanngimma­ta. Kommunit Kattuffiata isumaliutersuutai tamatumunnga tusarunnassapput.

 

Inuit Ataqatigiinni ujartortuakka ilagaat paasissutissat sukumiisut qinikkatut assigiinngitsutigut aalajangiiniarnitsinni toqqammavissat. Minnerunngitsumik isumaginninnerup iluani kisitsisitigut paasissutissat amigarluinnartarsimapput. Taamaattumik nuannaarutigaarput Inatsisartut ukiakkut 1999-imi naatsorsueqqissaartarfimmut immikkut aningaasaliinikkut isumaginninnikkut pissutsit pillugit kisitsisinik paasiniaasinnaanngortimmagu.

 

Aningaasaliisimanerup inerititai siulliit upernaaq manna takussutissaqalerpoq, qanittukkummi naatsorsueqqissaartarfiup kisitsisinngorlugit saqqummiuppai Isumaginninnikkut 1999-imiit 2000-imut  ikiorserneqarsimasut.

 

Paasissutissat arlaqartut eqqarsalersitsipput. Assersuutigalugu paasineqarpoq ukiup 2000-ip ingerlanerani nunatsinni inuit 25-44-illu akornanni ukiullit sisamararterutaat pisortanit ikiorsiissuti­nik pisartagaqarsimasut, ajuusaarnaraluartumilli takuneqarsinnaanngilaq qanoq sivisutigisumik pisartagaqarsimanersut, taamaammallu takuneqarsinnaanani kikkorpiaat suliffittaarnissamut periarfissaalatsinerusut immaqalu inuuniarnikkut ajornartorsiortuunersut.

 

Inuit Ataqatigiit tungaanniit kissaatigaarput siunissami tamakku ilanngullugit paasissutissiissutigi­neqartarsinnaanissaat inuit sapinngisamik amerlasuut sulilerseqqinnissaat anguniarlugu pilersaaru­siornissamut toqqammavissaasarmata.

 

Nunatsinni isumaginninnikkut pissutsit eqqartortillugit minnerunngitsumik pisortanit ikiorsiissutit iluarsiivigineqarnissaat eqqartortillugu innersussutigissavarput statsministeriap nunatta aningaasa­qarniarneranut siunnersuisoqatigiivisa nalunaarusiaat kingulleq martsip qaammataani saqqummer­soq, sukumiisumik misissorneqarsimasut ilagaat isumaginninnikkut peqqussutit tunngavigalugit ikiuutinik pisartagaqartitsineq. Isumaginninnikkullu peqqussutit ataqatigiissarneqarnerat qanoq innersut. Uppernarsineqarporlu maleruagassat ilaat inuit sulerusussusiannik siuarsaaqataanatik paarlattuanik kinguneqarsinnaasut.

 

Aallartinnitsinni oqaatigaarput inatsisit ikiorsiinerillu siunertarisariaqaraat inuit imminnut napatinnissamut piumassuseqartuarnissaannut, sulerussussuseqartuarnissaannullu kaammattuisuu­nissaa. Taamaammat Inuit Ataqatigiinniit Naalakkersuisut aamma inunnik isumaginninnermut ataatsimiititaliaq kaammattussavagut isumaginninnikkut, suliffissaqartitsiniarnermilu peqqussutit ataatsimut nalilerserqqullugit, naammaginartumik ataqatigiissaagaanersut ilanngullugu nalilersoq­qullugu.

 

Taamatut oqaaseqarluta kissaatigissavarput Mads-Peter Grønvold-ip apeqquteqaat aallaavigalugu oqallitsitsinerani oqaaserineqartut tamarmik siusunnerusukkut oqaluuserineqartup immikkoortup 80-ip Isumaginninnermut Ataatsimiititaliami nangilluni suliarineqalermat ilanngunneqarnissaa.

 

Anders Andreassen, ataatsimiinnermik aqutsisoq, Siumut.

Ja qujanaq. Paatsuungasoqaqqunagu erseqqissaatigissavara suleriaatsimi ' 35 malillugut, tassalu apeqquteqaat aallaavigalugu oqallinnermi aalajangiisoqarsinnaanngimmat, imatut paasillugu ataatsimiititaliamut ingerlaqqissinnaanngilaq.

 

Loritha Hendriksen, Kattusseqatigiit.

Qujanaq. Kattusseqatigiinniit siunnersuuteqartoq paasilluarparput, annertuumimmi aamma ukiuni kingullerni maani oqaluttarfimmi ajornartorsiut oqallisigineqartuartarmat aaqqiissutissanillu erinitsaanneqarluni.

 

Siunnersuuteqartup ersarissumik Pisortanit ikiorsiissutit piaartumik aaqqiivigineqarnissaa ujartorpaat. Tunngavilersuutaalu ersarilluarpoq, tassani ajornartorsiut nalunngisatsituut sinerissami tamani kommunip akissaqassusia naapertorlugu Pisortanit ikiorsiissutit inummut tunniunneqartar­put. Ajoraluartumillu tamanna annertuumik ajornartorsiutaavoq.

 

Tamannalumi siunnersuuteqartup ujartorpaa, ujartuineralu ajornartorsiummut paasinarluartoq oqaatigerusupparput. Naalakkersuisut akissuteqaamminni oqaatigisaa nakeriallaatigalugu oqaatigissavarput aamma oqaatigeqqikkusupparput, tassa Pisortanit ikiorsiissutinik aaqqiinissaq pilersaarutaareersut naapertorlugit aamma atuuffigisassaa kinguarteqqinneqartussanngormat.

 

Nassuiaatigisaalu paasinarluaraluartut Kattusseqatigiinniit eqqaasissutigeqqikkusupparput kingullermi Inatsisartuni oqallinnitsinni annertuumik peqqissaarullugu tunngavilersukkamillu misissuinerit paasissutissallu uagutsinnut tunniunneqarsimasut aallaavigalugit oqallissimagatta siunnerfeqarlutalu.

 

Ukiummi atuutilerfissaa aamma aalajangikkanut ilanngussimagatsigu. Taamaattumik kinguartitseq­qinnermut patsisigineqartut akueriuminaatsipparput, taamanikkummi oqallinnitsinni aammalu ataatsimiititaliami suliani annertuumik piffissaq atuiffiusimammat, suliarmi sapinngisamik peqqissaarullugu naammassineqarnissaa anguniarsimagatsigu.

 

Taamammat oqaatigeqqikkusupparput akissuteqaammi Naalakkersuit piffissalersuinermi allanngortitsinissamik nalunaarutaa nalunaaruteqarpoq oqallinnissarlu aatsaat upernaakkut 2003-imi saqqummiunneqartussanngorluni. Tamannalu kinguartitsineq Kattusseqatigiinni akuersaarsin­naanngilarput, makku pissutigalugit:

 

Pissutsit piviusut ullumikkut qiviaraanni aappaasoq suliffeerukkallarnermini annertuumik aamma aappaasoq kisimi pilersuilersartarnera. Annertuumik ilaqutariinnut artukkiisarmat, ilaquttamut inuutitsiniarnermi akiligassanullu. Taamaalillunilu inummut tarnikkut annertuumik sanngiillisitsi­sarluni nanertissutaasarlunilu.

 

Taamatut naatsumik oqaaseqarluta Naalakkersuisut kaammattoqqikkusuppagut piaarnerusumik naammassineqaqqullugu tassami Inatsisartut 2003-imi upernaakkut ataatsimiinnissaat utaqqinagu.

 

Inuit pineqartut suli annertunerusumik eqqorneqarnissaat pinngitsorumallugu, tassami taamatut pineqartut eqqorneqassammata, tamanna Kattusseqatigiinniit akuersaarsinnaanngilarput.

 

Mads-Peter Grønvold, siunnersuuteqartoq, Kattusseqatigiit.

Taamatut siunnersuuteqarama tungavigaara ukiuni kingullerni inunnik ikiorsiisarnermut tunngasut ukiuni kingullerni naleqqussarneqartariaqartutut isumaqarama, tassami Inatsisartuni 1995-imiit 1997-ip tungaanut Inunnik Isumaginninnermi Ataatsimiititaliarsuup suliai ingerlanneqarsimapput naammassineqarlutillu, tamatumalu kingorna suliakkiissutit tassanilu ersarilluinnartut Inatsisartunut suliarisassanngorlugit tunniunneqarsimapput annerusumillu maannamut tamakku suli kinguneqar­tinneqaratik. Tassa tamakkorpiaapput ilaatigut tunngavigisakka Pisortanit ikiorsiissutit ukiuni kingullerni nalimmassartariaqarnerannut ujartuininnut.

 

Uani oqallisissiatut siunnersuuteqarama assersuutigalugu allappunga aasaanerani suliffissaqarluar­neratigut illoqarfiit ilaanni aappariit tamarmik sulereerlutik, aappaasoq suliunnaaraangat ilaatigut akiligassanut angummassinnaajunnaartarnerat ajornartorsiutaartoq aammalu ikiorsiissutinik pissarsiniarnerugaluami inatsisit ilaat inunnik isumaginnittoqarfiit illoqarfiit ilaanni immaqa paasisimaffigineqarpallaannginnertik pissutigalugu ikiorserneqartussagaluit ikiorserneqanngitsoor­tartut amerlasoorujussuugamik, taamaattumik Isumaginninnermi Pisortaqarfinni illoqarfinni immikkoortortaqarfiini sulisut inatsisitigut pikkorissartinneqartarnissaat pingaaruteqarluinnartoq uanga isumaqarpunga, Inatsisartuni ilaasortatut tassami ilaatigut inunnik isumaginninnermi ikiortitut sullissisut allaffissornermut ilinniarnikorpassuit Inunnik Isumaginninnermi ikiortitut sulitinneqartarmata.

 

Naak inunnik isumaginninnermut ikiortitut sullisisussaagaluartut inatsisit malillugit ilinniagaqarsi­masut, tassa inunnik isumaginninnermi ikiortitut ilinniagaqarsimasut tamakkua sullissisussaagalu­aramik, kisiannili naluneqanngilaq ukiuni kingullerni kommunini arlaqartuni Inunnik Isumaginnin­nermi ikiortitut siunnersortitullu atuarsimasut arlalippassuit amigaatigineqartut, taamaalilluni illoqarfiit ilaanni siunnersortinneqarnissartik annerusumik pitsaasumik tunniunneqarneq ajorpoq ikiorneqartussaagaluaruni, taamaalillunilu inatsisitigut periarfissaqareeraluartoq inatsisitigut paasisimasaqarluannginnertik pissutigalugu sullissisut ilaasa  ikiorneqartussaagaluit itigartittarmati­git.

 

Tamakku ajornartorsiutit isumaqarpunga annertuumik ilisimaarineqaraluartut suli kisianni aaqqinneqanngitsut ilaatigut taamatut sullissisut aningaasarsiaqarnertik allallu pitsaannginnerat pissutigalugu kommunini arlaqartuni atorfissaqartinneqaraluarlutik suliffeqarfigiumaneq ajormatigit.

 

Taamaattumik inunnik Pisortanik ikiorsiissutinik tunngatillugu isumaqarluinnarpunga uanga nammineerlunga taamatut sullissisut sapinngisamik inatsisit tungaatigut ataavartumik pikkorissar­tinneqartarnissaat aammalu inunnik isimaginninnermik ilinniarsimasut tamakkunani atorfinnik atorfeqartilerneqarnissaat annerusumik anguniarneqartariaqaleraluartoq ukiuni kingullerni.

 

Uani Siumukkut Atassutillu oqaaseqaataat annerusumik Naalakkersuisut oqariartuutaanut akuersaarnerusuummata, naak Inunnik Isumaginninnermi ataatsimiititaliarsuuup sulinerani taamatut Pisortanit ikiorsiissutinik atugaqartut iluarsiissutigeqqusaat nalunngikkaluarlugit, naalakkersuisut suliaqarnerannut annerusumik piumasaqannginnerat paasiuminaatsilaarpara, tassa uanili Inuit Ataqatigiit taamatut saqqummiinerat, oqallisissiamut akissuteqarnerminni saqqummiinerminni oqaasii paasinarluinnarput. Tassa Inuit Ataqatigiikkut taamatut oqallinnermi malinnaalluartarnerisa takutittarpaat sulianut soqutiginnilluarlutik ingerlatsisarmata, aammalu taamatut Naalakkersuisunut kisiat tusaaniaratik innuttaasut pisariaqartitaat naapertorlugu taamatut oqallilluaqataasarnerat aammalu siunnersuilluartarnerat uanga iluarisimaarpara. Soorlu aamma Kattusseqatigiit oqaaseqar­tuat taamatut assigiinngitsunik tapersiilluni oqaaseqartoq.

 

Kisianni tassunga maqaasiinnarpara 1995-1997-imut Inunnik Isumaginninnermut Ataatsimiititaliar­suup suliassatut Inatsisartunut tunniussaasa suli maannamut annersumik suliniuteqarfigineqanngin­nerat utaqqikatakkakku. Tassani Inunnik Isumaginninnermi Ataatsimiititaliarsuup suliaani assigiinngitsorpassuit Pisortanit ikiorsiissutinik tunngasut iluarsineqartariaqartut taakkartorneqarni­kuummata Naalakkersuisunit tamakkua toqqammavigalugit ingerlanneqarluarsinnaasut isumaqara­ma.

 

Taamatut oqaaseqarlunga nuannaarutigaara partiinit tamanit oqaaseqarfigineqarmat, naak ilaatigut partiit ilaannut akissuteqaatit naammaginngikkaluarlugit.

 

Ole Dorph, Isumaginninnermut Suliffeqarnermullu Naalakkersuisoq, Siumut.

Uangattaaq Naalakkersuisut sinnerlugit saqqummiussassinnut assut qujassuteqassuunga, aamma malunnarpoq inatsisit assigiinngitsut piffissami tulliuttumi nutarternissaannut Inatsisartut soqutiginnilluartut aamma taamaattussaavoq - soorunami.

 

Oqaatigeriikkattut inatsisinik nutarterineq massakkut aallartileruttorpoq aammalu Inatsisartut aalajangersimasaat periusissat malillugut inatsisit allanngortinneqarneri massakkut suliarineqartut tassuuna siusinnerusukkut taareerpara, soorlu annertussusileriikkanik ikiorsiissutinut tunngassute­qartut massakkut taanna peqqussut atuukkallartoq 1. januar allartippoq, taannalu taarserneqartus­saassooq suliffissaarunnissamut sillimasiisarnermut peqqussut suliarineqarluni Inatsisartuninngaan­niit akuersissutigineqarpat.

 

Taavalu tassunga malitsigitillugu tullinnguuttussaassooq Pisortanit ikiorsiissutit pillugit peqqussu­tissap nutarternissaa, taanna suliassaq aamma annertuusussaavoq.

 

Aammalu oqaaseqartup kingullerminngaanniit aallartikkuma akissuteqarfigissavara Mads-Peter GrønvoldBi tassa Inunnik Isumaginninnermi ataatsimiititaliarsuup innersuussutai sumiinnersut, annertunerusumik ullumikkut kinguneqarsimannginnerat suli pisoq oqaatigimmagu.

 

Tassa ilumoorpoq Inunnik Isumaginninnermut Ataatsimimiititaliarsuup 1997-imi isumaliutissiissu­taa Inatsisartuni akuersissutigineqarpoq. Aammalu innersuutai ilumut taanna isumaliutissiissut atuaraanni oqaatigisariaqarpoq innersuuterpassuit ullumikkut inatsisartuninngaanniit naammassine­qareerput. Soorunami suli ilaqarpoq naammassineqarsimanngitsunik, tamakkulu massakkut tullinnguullugit naammassineqarnissaat suliarineqarnissaallu soorunami suliarineqartussaassooq.

 

Aamma sulisunik pikkorissaasarnermut tunngassuteqartunik oqaaseqarnermi oqaatigissavara, soorunalimi inunnik isumaginninnermik suliaqartut soorlu sap.ak. kingulleq Inatsisartuni ilaasortap Anthon Frederiksen-ip Inunnik Isumaginninnerup iluani sulisut pikkorissartinneqartarnissaanut suut periarfissaanersut apeqqutigimmagit, tassani nassuiaateqarpugut periarfissat pikkorissartitsi­nerit ingerlanneqartarneranut tunngassuteqartut annertuut massakkut ingerlanneqartut, aamma ingerlanneqartuartussaasut.

 

Taamaattumik periarfissaqarpoq aamma pikkorissarnerit assigiinngitsut qujanartumik kommuninit  tamaniit peqataaffigineqartarpoq, aamma taamaattuartussaavoq.

Tassani eqqortumik aamma oqaatigineqartut ilagaat ullumikkut inunnik isumaginninnermi sullissisut tamatigut ilinniarsimasuunngillat, kisianni taamaakkaluartoq sulisut qujanartumik sapinngisartik naapertorlugu innuttaasunut sullissiniarnertik ingerlattuarpaat, taanna assut aamma periarfissaq manna aqqutigalugu inunnik isumaginninnermi suliffeqartut suliaqartullu annertuumik qutsatissaqarfigissavagut, sineriassuatsinni atugassaritaasut oqimaassinnaasaraluartut, artornarsin­naasaraluartut sapinngisartik naapertorlugu sulissussiniartuarmata innuttaasunut.

 

Soorunalimi aamma innuttaasut suliakkiissutaat Pisortaninngaanniik ilaannikkut itigartinneqartar­put, soorlu aamma siunnersuuteqartoq aatsaannguaq oqartoq. Kisianni tassa aamma itigartitsinermi itigartitsisoqarsimappat, soorunalimi itigartinneqartoq nassuiaanneqartussaavoq sooq itigartinneqar­simanersoq aamma itigartitsissutip qanoq ililluni naammagittaaliuutigalugu ingerlateqqissinnaa­nera, taanna kommunini aamma kommunit tamarmik pisussaaffigivaat naammassiniassallugu. Taamaattumik tamakkua aamma pikkorissaatitsinerit assigiinngitsut aallaavigalugit ingerlanneqar­tuartarput.

 

Taava Kattusseqatigiinninngaanniit oqaatigineqartoq tassa suliffissaarunnissamut sillimmasiisarnis­sat kinguartinneqarneranut suna peqqutaanersoq, tassa oqaatigissavara suliaq taanna aallartinne­qarami immaqa takorloorneqarsimanngikkaluarpoq qanoq annertutigisoq, kisianni suliap aallartisimatsiarnerani takuneqarsinnaalersimavoq suliaq qanoq annertutigisoq taamaattumillu periarfissaqartinneqartariaqartoq inuit assigiinngitsut suliffeqarfiit assigiinngitsut suliami uuma suleqataasussat tamakkua tamaasa peqatigalugit ingerlaqatigalugillu ingerlanneqarnissaa pitsaasumik pissappat.

 

Soorlu aamma uani nassuiaateqarnermi aamma Inuit Ataqatigiit oqaaseqartuata oqaatigigaa naatsorsueqqissaartarnikkut paasissutissat amigarsimapput, taamaattumillu ilaatigut eqqoriaanerin­naat aallaavigalugit suliaq ingerlanneqarniarsarisimavoq. Kisianni massakkut tamakku qaangiupput, paasissutissat naatsorsueqqissaartarfimmiit massakkut inunnik isumaginninnermi tunngassuteqartut pisariaqartinneqartut pissarsiarineqarsimapput aammalu tamakkua suliamut suliallu ingerlaqqinnis­saanut atorneqartussaapput.

 

Suliffeqarnissamut, suliffissaarunnissamut sillimmasiisarfimmik pilersitsisoqassappat soorlu aamma ilissi Inatsisartuni ilaasortat ilisimagissi kattuffiit assigiinngitsut tassani aamma peqataatin­niarneqarput, unalu aaqqissuussinissaq ajornanngippat kattuffinnit, suliffeqarfinnillu akilersorne­qartussaavoq. Aamma massakkut oqallinneq killippoq soorlu aamma uani akissuteqarninni oqaatigigiga martsimi Kangerlussuarmi isumasioqatigiititsinerup kingorna Kattuffeqarpoq ingerlaannaq akuersaartunik, aamma Kattuffeqarpoq nalornisunik aamma Kattuffeqarpoq soqutiginninngitsunik. Unalu aaqqissuussineq nutaaq eqqunniagarput piviusunngortissagutsigu tamakku Kattuffiit suleqatigilluarneri pisariaqarpoq, taanna Naalakkersuisuninngaanniit eqqumaffi­giniarsaraarput. Taamaattumik Kattuffiit nalornisut uanga nammineq isumaqarpunga suli akuersaartinnersinnaanissaat anguneqarsinnaasoq.

 

Kisianni Kattuffiit qulaatiinnarlugit aaqqissuussinermik pilersitsissagutta Kattuffiit tunuartilertus­saanerat uanga annilaangaatigaara, taamaattumik periarfissaqarluarluni aammalu suliap pitsaasumik ingerlanneratigut oqaatigeriikkattut aaqqissuussineq isumaqarpunga iluatsittumik nunatsinnut eqqunneqarsinnaasoq.

 

Taamatorpiaq aamma Savalimmiut misilittagaqarsimanerat paasisimavarput. Savalimmiuni suliffissaarunnissamut sillimmasiisarnermik eqqussisimapput ukiorpassuunngitsut matuma siornatigut. Aamma Savalimmiuni misilittakkat takutippaat ajornartorsiuteqarsimasut annertuumik taassumap pilersissimanerata kinguninnguatigut. Aammalu paasisimavaat kinguartiallassimagalu­aruniku immaqa pitsaanerusumik suli aaqqiinermik eqqussisinnaasimagaluarlutik, taamaattumik ajornartorsiutigisimasatik nammineq aqqusaarsimasatik kissaatiginngilaat uatsinnut tutsinneqassa­sut, taamaattumik Savalimmiormiut aamma oqarput taakku issuaannartariaqanngilagut. Kisianni uatsinnut oqariartuutaat unaavoq peqqissaartumik suliassarsi suliarigussiuk atuutilernerata kingornatigut taava ajornartorsiutaasussat suugaluarnersut pinngitsoortissinnaavasi. Taannalu soorunalimi oqariartuut uatsinnut tunniunneqartoq aallaavigalugu suliassap ingerlaqqinnissaa pinngitsoornagu Naalakkkersuisuninngaanniit ingerlattussaavarput.

 

Taava aamma Paninnguaq Olsen, Inuit Ataqatigiinninngaanniit ujartuivoq Pisortanit ikiorsiissutit qaqugu nutarterneqarnissaanut tunngassuteqartumik. Oqaatigereerparpullu taassuma suliassap oqallisigineqarnera tassa soorlu massakkut angerlanneqartoq. Kisiannili una suliassaq tassa suliffissaarunnissamut sillimmasiinissamut aaqqissuussinissaq peqqussutissaq, taanna ineqqaann­gippat ajortussaavoq una Pisortanit ikiorsiissutit pillugit Inatsisartut peqqussutaattut ilusilersornis­saa. Takoqqaartariaqarparput Inatsisartut suliffissaarunnissamut sillimmasiinermik aaqqissuussinis­saq qanoq isikkulik akuersaarneraat. Taava peqqussutissap akuersaarneqarneratigut taassumallu kingornatigut takuneqarsinnaalissooq, taavalu suut Pisortanit ikiorsiissutitut aaqqissuussinissami ilanngunneqassanersut.

 

Taamaattumik periusissaq aamma soorlu uanga saqqummiussininni aallaqqaammut oqaatigigiga Inatsisartut akuersaarsimasaat 2000-imi aamma 2001-imi taanna malillugu suliassaq taanna ingerlanneqarpoq.

 

Aamma oqaatigineqarpoq Inuit Ataqatigiinninngaanniit soorunami ikiuinissaq innuttaasunik ikiorserneqarnissamik pisariaqartitsisunik ikiuinissaq soorunami sukkasuumik ingerlanneqassasoq. Soorunami taamaattariaqarpoq.

 

Aamma ukua statsministerip rådgivende udvalg-iata oqariartuutai inunnik isumaginninnermut aamma suliffissaqartitsiniarnermut attuumassuteqartut soorunalimi taakkua suleqqinnissami aamma qimerloorneqartussat ilagisussaassavaat.

 

Soorunalimi sulinissaq sulinerullu kajorngernassusia tamanit pingaarnerusussaavoq, taamaattumik suliffissaarunnermi aningaasatigut inunnut ikiorsiissutitut tunniunneqartussat taakkua eqqarsarluar­nitsigut inissittariaqarpagut. Sapinngisamik inuit imminut napatissinnaanerat, suliffeqarnerullu imminut akilersinnaajuaannarnissaa tassani qulakkeerniartariaqaratsigu.

 

Aamma oqaatigineqartoq tassaavoq kommunit pisuut, kommunillu piitsut taakkua inunnik isumaginninnikut innuttaminut atugassaqartitsinerisa assigiinnginnerujussuannut pissutaasartoq. Ullumikkut kommunit pisinnaatitaaffeqarput namminneq nalilersuinertik aallaavigalugu, soorunami inatsisit peqqussutillu iluanni nammineq nalilersuisinnaanissaminnut, tassa ullumikkut kommunit pisinnaatitaaffia taamaappoq.

 

Taamaattumik tupinnarneq ajorpoq kommunit oqaaseq atussallugu uanga soqutigineq ajoraluarpara piitsut pisuullu. Kisianni kommunit aningaasatigut ingerlalluartut aammalu aningaasatigut ajornartorsiuteqartut innuttaminnut atugassarititai assigiinngittarmata. Taanna uggornarpoq taamaattariaqanngikkaluarpoq, aamma taanna nalunngilara utoqqarninngaanniik, aamma utoqqaat uani taaneqarmata aamma allatigut ikiorserneqartartut mamaagiuartaraat.

Kisianni tassa taanna pinngitsoornani aamma eqqumaffigineqartariaqartut ilagisussaassavaat.

 

Taava Atassumminngaannit aamma oqaatigineqartoq maluginiagara unaavoq kommunit aningaasa­tigut naammattorsuarmik killeqanngitsumik peqaraluarunik, taava immaqa qularutissaanngikkaluar­toq aningaasatigut innuttaasuminnut ikiorsigaliuttagai immaqa qaffasinnerujussuussagaluarmata. Tassuuna erseqqissaatigiinnassavara, soorlu aatsaannguaq aamma taariigara suliffeqarnerup pingaartinneqartuarnissaa taanna pinngitsuuvinnani qullerpaalluni inissinneqarsimajuartussaavoq.

 

Taava aamma Siumuminngaannit oqaaseqartup Ruth Heilmann-ip oqaatigisai aamma apeqqutigisai tikkuagai, tikkuarneqartunut allanut sanilliullugit allaanerungaanngillat aamma ikiorsiissutit assigiinnginnerusut kissaatigai siunissami innuttaasunut tunniunneqartarnissaat pinngitsornagu anguniarneqassasoq.

 

Taavalu pikkorissaasarnerit ingerlanneqartarnissaat aamma taanna ataavartumik ingerlanneqartar­nissaa pisassasoq. Kiisalu aamma soqutiginarluinnartoq oqaatigisaa tassaavoq inuit isumaginnin­nikkut ajornartorsiuteqaleraangamik taava kingusinaarnatik saaffiginnittarunik Inunnik Isumagin­nittoqarfinnut taava ajornartorsiutitik annertuallaannginnerani ikiorsiissutit assigiinngitsut Pisortanit tunniunneqartartut pisarsinnaagaluarmatigik.

 

Tassuuna innuttaasut imminnut kukkuuttarput nalunngilarput. Arlaatigut ajornartorsiuleraangamik taava ajornartorsiutit nammineq pigiinnalertarpaat, aatsaallu sapiliivikkaangamik imaluunniit inigisaminninngaanniit anisitaasussanngoraangamik aatsaat Pisortanut saaffiginnillutik - taanna kukkuneruvoq. Taamaattumik kommunit ilai taamannak saaffiginnittoqaraangat tassa ilaannikkut ajornartorsiutinik pilersitsisarput, immaqa pisariaqanngikkaluartunik.

 

Taamaattumik inuk ajornartorsiutilik, ilaqutariit ajornartorsiutillit ajornartorsiutitik takkukkaangata kingusinaarnatik saaffiginnittarnissaat taanna pinngitsuuvinnani pisartussaavoq. Tassanilu aamma kaammattuutigineqarpoq pikkorissaanerit aamma paasititsiniaanerit ingerlanneqassasut, aamma taanna sapinngisamik naapertorlugu soorunalimi naammassiniarsarissavarput aamma ingerlappar­put.

 

Annertuulioqqinnanga oqaasissinnut assut qujassuteqassuunga aamma soorunalimi oqaatigeriikkat­tut uumap Pisortanit ikiorsiissutit pillugit suliap ingerlaqqinnissaa aammalu periusissat suut atorlugit ingerlaqqinnissaanut oqallinneq massakkut ingerlanneqartoq assut uanga iluarisimaarpara aamma naatsorsuutiginngilara aamma kissaatiginngilara unitsinneqassasoq, kisiannili inunnik isumaginninnikkut pissutsit sapinngisamik pitsanngorsartuarnissaat taanna anguniartuartariaqarpar­put aammalu naatsorsuutigilluinnarpara suleqatigiinniikkut taanna anguneqarsinnaasoq aamma pitsaasumik inernilimmik.

 

Daniel Skifte, ataatsimiinnermik aqutsisoq, Atassut.

Naalakkersuinermut ilaasortamut qujavugut, tulliulluni oqaaseqassaaq

 

Ruth Heilmann, Siumut.

Qujanaq. Ruth Heilmann-iuvunga suli Ole!

Mads-Peter Grønvold-ip taamatut siunnersuutigisaa isumaqarpunga tamatta oqaaseqarfigigatsigu aamma ajornartorsiut taanna ukiut arlalinngortut ingerlanneqarsimasut, taanna ersarissarparput aammalu annertuumik Isumaginninnermi Iluarsaaqqinnermi ikiorsiissutit pillugit oqallittoqarnikuu­voq, taamaattumik siunnerfiit taakku Naalakkersuisunut suliassanngortinneqarnikuummata uagut suut tamaasa pullavigalugit oqaaseqanngilagut.

 

Kisianni isumaqarpunga pingaaruteqartoq una, tassa kommunip nammineersinnaatitaaneranik aamma Inuit Ataqatigiit taanna erseqqissaanerat, ilumut taamatut ingerlasoqartariaqarnersoq. Tassami kommunit kiffaanngissuseqarumasimapput aamma iluarsaaqqinnerup ingerlanneqarnerani kommunit namminneerlutik kissaatigivaat, soorlu inummut tapip nammineq aningaasaqarnertik naapertorlugu aamma iluarsartuussisinnaanertik aamma annertussusiliisinnaanertik taanna eqqarsaatigalugu.

 

Tassani ilumoorami ajornartorsiut unaasoq kommunit aningaasaqarnermikkut atukkamikkullu sinerissami assigiinngissitaartorujussuupput. Aamma pingaartumik ukiuni kingullerni suliffissuit matoorartillugit suliffissaaleqinerlu eqqarsaatigalugu aappariit pingaartumillu aamma sulisartut atugaat tassani eqqorneqartorujussuunerat tamatta ilisimavarput.

 

Kisiannili uagut Siumuminngaanniit oqaatigisatsinni periarfissaqarput aamma taakkua ikiorsarne­qarnissaminnut. Kisianni tassami ajussaqaaq sulerusukkaluarluni ikiorsaassutaannarnik inuuniar­saraluni, taamaattumik suliffinnik pilersitsiortorneq aamma sinerissami illoqarfiit taakkuinnaat eqqarsaatiginagit illoqarfiit allat ineriartortinnissaat tassa pingaaruteqartorujussuuvoq. Tassani Inatsisartut aamma qiviarneqartariaqarput aningaasaliissuteqartarnermikkut aamma illoqarfinnut kommuninullu agguataarineralutik taanna ingerlanissaat tassani eqqarsaatigineqartariaqartoq.

 

Uani uagut oqarnitsinni aamma oqaatigivarput kommunit periarfissaat tassani namminneq aamma periarfissarititartik atorlugit namminneq iliuuseqarsinnaanerannik.

 

Tassani aamma pikkorissaanerit ingerlanneqartut isumaqarpunga kommunit ilaasa atorluaraat. Tassani Mads Peter Grønvold-ip ujartorpaa aamma inatsisitigut pikkorissaanerit annertunerusut ingerlanneqarsinnaanerat. Taanna aamma uagut Naalakkersuisunut annerusumik iliuuseqarfigeqqul­lugu kaammattuutigaarput.

 

Iluarsaaqqinnerup ingerlanneqarnerani ilumoorpoq suliniarnitsinni aamma kigaalaqutaasimapput kisitsisinik naatsorsueqqissaartarfimminngaanniit tassani misissuisimanernik amigaatinik taamatut peqartorujussuunera. Massakkut 1999-miit annerusumik naatsorsueqqissaarfiup suliarilersimavaa aamma isumaginninikkut qanoq ingerlatsinerup aamma tassani naatsorsuutitigut suliarineqalertaler­nerat. Taamaattumik tassuunakkut isumaqarpunga malinnaalernialersimanerput aamma iluarisi­maarnartuusoq.

 

Aamma kommunit namminneq pisussaaffigivaat soorunami qanoq sulisoqarnikkut aaqqissuussis­sallutik. Ilumoorpoq Mads Peter Grønvold oqarami aamma isumaginninnermik suliaqartunik tassa ilinniarsimasunik amerlasuunik amigaateqarpugut. Taamaattumik suliassatik suliarinagit aamma iluarsaaqqinnerup uparuartuuffigivaa taanna. Isumaginninnermik ilinniarsimasut inuit tikillugit sulisariaqarnerannut kaammattuivoq, taavalu suliassat allaffissornikkut suliarineqarsinnaasut aamma allaffimmiunik suliarineqarsinnaasut.

 

Isumaqarpunga kommuni nammineerlutik tassani aamma allaffiup iluani aaqqissuussisinnaaneran­nik periarfissaqartitsisoqarnera tassani aamma taakku eqqarsaatigalugit agguataarineq ingerlanne­qarsinnaasoq massakkut taamatut ilinniarsimasunik sulisunik amigaateqaleruttorfitsinni.

 

Qujanartumillu Isumaginninnermik ilinniarsimasut akissaataat taakkua ukiuni arlalinni maani aamma iluarseqqullugit aaqqeqqullugillu oqariartuuteqartarpugut Inatsisartuni. Aammalu maj-ip 1.-ni paasinarpoq peqatigiiffitsik aqqutigalugu tassuunakkut iluaallaataasumik aamma aaqqiisoqar­simasoq.

 

Kisiannili ilinniarsimasut amerlanerulernissaat aamma namminneq ilinniarsimasut oqimaatsumik suliaqarlutik soorlu annertuumik suliakkersorneqarnerat taanna oqilisaaniarlugu suli ilinniarsimasu­nik amerlanerusunik peqalernissaq anguniarlugu annerusumik ilinniartitsinikkut taanna kaammat­tuuteqarneq isumaqarpunga uani oqaatigisariaqarlugu tassa pingaaruteqartoq aamma maani akuersusissutiginikuugatsigut nunagisaq qimannagu aamma isumaginnittunngorniarnerup ingerlanneqarsinnaanera.

 

Tassuunakkut ataatsimiititaliami paasitinneqarpugut taanna pilersaarusiorneqarluni naammassere­eraluartoq Inatsisartunit suli aningaasaliiffigineqanngitsoq. Taamaattumik Inatsisartunit taanna eqqumaffiginiartariaqarparput, aamma tassuunakkut aningaasaliisoqarsinnaaneranik.

 

Suliffissaarunnissamut sillimmasiisarfik ilumoorpoq Naalakkersuisut akissuteqarnerminni annertuumik peqqissaaartumik suliarineqarnera ingerlanneqartariaqartoq. Tassani malunnartorujus­suuvoq Kattuffiit suleqatiginiarnerat aamma tassani ajornartorsiutaasinnaasoq naak siunertaq pitsaagaluaqisoq. Taamaattumik naammassineqassaguni isumaqatigiilluinnarluni aamma naammassineqarnissaa taanna Siumuminngaanniit uagut pingaaruteqartorujussuartut isumaqarfi­gaarput. Taamaattumik suliap peqqissaarullugu naak uagut aamma erinitsikkaluaqaluta, iluarsaaq­qinnermi suliat aamma innuttaasunik erinitsaanneqarnerat taanna aamma uagut paasilluartorujus­suullutigut, kisiannilu suliap peqqissaartumik ingerlanneqarnissaa taanna Siumuminngaanniit assorujussuaq pingaartipparput.

 

Uani erseqqissaatigeqqittariaqarparput Siumuminngaanniit isumaginninnikkut isumagineqartussat taakku isumagineqartariaqartut, aammalu Inuit Ataqatigiit isumaqatigilluinnarpakka aamma uani uparuaassuteqarmata tassani misissorneqartariaqartoq isumaginninnikkut ikiorsiissutinik massakkut tunniussisarnerput uppernarsartariaqartoq ilumut sulerusussuseqartarnermut naapertuuttumik iliornersugut. Taanna misissugassaqqittutut aamma uagut Siumuminngaanniit oqaatigisaratsigut, isumaqarpunga taanna aamma Naalakkersuisut eqqumaffigisariaqaraat. Qujanaq.