Ullut ataatsimiiffiusut pingajuat, pingasunngorneq aprilip 10-at 2002, nal |
|
||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut pingajuat,
pingasunngorneq aprilip 10-at 2002, nal. 13:10
Ataatsimiinnermik aqutsisoq: Anders
Andreassen, Inatsisartut Siulittaasuat, Atassut.
Ruth Heilmann, Siumut.
Qujanaq. Kalaallit Nunaanni angallannikkut
pissutsit qanoq iliornikkut eqaannerulersinneqarnissaat pillugu apeqquteqaat
aallaavigalugu oqallisissamik siunnersuuteqarpunga.
Nunatta iluani silaannakkut imaatigullu
minnerunngitsumillu Atlantikoq ikaarlugu silaannakkut angallannikkut pissutsit
aaqqissuussaanerisa pitsaanerulernissaat siunertaralugu Inatsisartut
aalajangersimasumik siunnersuuteqarnissaat pisariaqalerpoq. Tassa
angallannikkut politikkikkut ersarissoq eqaatsorlu saqqummertariaqalerpoq.
Tassami takornariaqarnerup
siuarsarniarnera kommunini arlaqartuni ajoraluartumik arlalitsigut
angallannikkut pissuteqartumik kinguarsarneqarlunilu ilungersornartorsiortitsivoq.
Aammalu innuttaasut peqatigiiffiit eqqarsaatigalugit timersoqatigiiffiit
minnerunngitsumillu ilaqutariit inuillumi ataasiakkaat angalaniarnerminnik
ajornartorsiortitaasut tusartuartarpagut tamannalumiaasiit aasariartornera
ilutigalugu suli annerusumik ilungersornartorsiortitsinissaa
ilimagereersinnaavarput.
Taamaattumik eqaallisaanissaq
siunertaralugu piffissaq qaninnerusoq ungasinnerusorlu isigalugit qanoruna
alloriartoqarniartoq aamma iliortoqarniartoq.
Taamatut Inatsisartuni ilaasortaasutut
saaffigineqartarpunga. Isumaqarpungalu tamanna pillugu arlaatigut
angallannikkut pissutsit maanna ukiuni kingullerni ajorseriaateqartumik
oqaatigineqartarnera tusaanngitsuusaaginnartariaqanngitsoq.
Taamatut ajorseriaateqartumik
tamakkiisumik oqarnissaq nangaanartoqartaraluarpoq mittarfiimmi arlaqartut
pilersinneqarnikuupput Ilulissani, Nuummi Sisimiunilu takornariaqarnikkut
siuariartoqarsimanera taakkunani ersarissuuvoq aamma. Taavami nunatta sinnera
qanoruna aaqqiiffiginiaripput.
Arlalitsigut angallannikkut
uparuaassuteqartarpugut aamma Inatsisartutigut, kisiannili angallannikkut
ingerlatsiviit tikinneqaraangamik pissutsit piviusut aallaaviusussat
qimanneqariataartarput allatorujussuaq ilaatigut inerniliisoqartarluni. Soormitaavaana taamatut ittoqarpa?
Takornarissanik tikisitsiniarlutik
oqaloqatigiittarnerit aamma aningaasarpassuarnik naleqareersut
aaqqissuussamillu isumaqatigiissuteqartoqareertillugu pilersaarutit aaqqereersullu
arlaatigut pisoqartarpoq. Tassalu angallannermut ingerlatsisut sinerissap
iluani pissutsinik allanngortitseriataartarmata.
Soorlu Grønlandsfly SAS aamma
taamatut misigisaqartitsisarlutik. Aammalu isumaqatigiissuteqarnikkut
timmisartut attartukkat ilaatigut ukiuni tallimani
isumaqatigiissuteqarfigineqarsimasut Air Alfa taamatut
allanngoriataartoqartarnera aamma Greenland Healing Skiingip aamma Greenland
Adventure Sport ApS-ip aamma nuanniitsumik misilittagaqarfigaa. Taannalu aamma
allakkami bilagitut ilanngunneqarpoq.
Aammalumi tamanna Qeqertarsuarmi,
Upernavimmi, Uummannami, Tasiilami aamma allani kujataani
maluginiarneqartarpoq. Tassami tusartarpugut aamma kujataamioqatigiinni
ataatsimiinnerni tamanna ilungersunartuulluinnarlunilu aamma
oqaluuserineqartarpoq Inatsisartunut Naalakkersuisunullu
ingerlateqqikkumasaminnik. Tassa kujataamioqatigiit ataatsimiinneranni aamma
upernaap ingerlanerani pisumi tamanna uani oqaatiginiarsarivara.
Taamaattumik suliassaq ilungersunartutut
isumaqarfigisariaqarpoq. Avannaamioqatigiit januarimi Oslomi tassa Nordisk Rådi
ataatsimeeqatigiinneranni aamma qulequttat pingaarutillit ilagaat tassa
angallanneq. Nunat avannaamioqatigiit susassareqatigiillutik qanimut imminnut
tikisarlutik suleqatigiinnerulernissaannik isuma tamanna aamma Vestnordisk
Rådip ataatsimiinnissaani junimi savalimmiuni pisussami pimoorullugu
ataatsimiissutigineqartussaavoq. Aamma taanna qulequtaritinneqarluni. Tassa
angallannerup nunat avannaamioqatigiinni aaqqissuussaanera.
Uagullu nunatsinnit aallartitaasugut
isumaqarpugut angallannikkut pissutsit eqarpallaartut akisuallaartut aammalu
ataqatigiissaarneqartariaqartut. Taamaattumillu nunat sanilerisatta aamma
sanilerisavut saaffigaavut pissutsinik aaqqiiniaqataaqqullugit.
Apeqqutigisariaqarporlu taavami
qanoq aaqqissuussisoqassava. Ullumikkut ulluvut piumasaqartorujusussuupput.
Piffissaq tamarmi aningaasanik naleqartarmat ulapaarfiup nalaani tamatta
piffissaq atorluarusuttaqaarput. Angalarusuttarlutalu eqaatsumik orninniagaq
sukkanerpaamik tikikkusuttarlutigu. Aamma angerlamut taamatut apuukkusuttarpugut.
Nunaqarfiit aamma
naammagittaaliuuteqartuartuupput. Angallannikkut aamma timmisartutigut
periarfissaqanngillat aammalu ullorpassuit utaqqisariaqartarput angalanissaminnut.
Taamaattumillu aamma takornariaqarnikkut aaqqissuussiniarnissaminnut
periarfissaaruttaannarput. Naak periarfissaqaraluartik
neqerooruteqartarnissaminnut.
Aamma inuutissarsiortut namminersortut
taamatut ingerlatserusuttuupput. Eqqaaginnarsinnaavagummi aalisariutaatillit
atortumik aalajangersimasumik amigaateqaraangamik utaqqisinneqaleraangamik
qanoq inuttanut aalisariutaateqartunullu annaasaqaataatigisarnera aamma
tassuunakkut eqqaaginnarsinnaavarputtaaq.
Taamatut oqallisigisassamik allagaqarpunga
neriuutigalugu oqalliseqarnitsigut arlaatigut angusaqarumaarluta,
pitsanngoriaataasinnaasunik aamma nassataqartunik. Qujanaq.
Jørgen Wæver-Johansen, Ineqarnermut,
Attaveqarnermut Pilersuinermullu Naalakkersuisoq, Siumut.
Qujanaq. Naalakkersuisut angallannermut
tunngatillugu Naalakkersuinikkut anguniagaraat nunatsinni atuisunut
timmisartutigut angallassinerup pitsanngorsartuarnissaa. Angasunut aamma
Namminersornerullutik Oqartussanut sapinngisamik
aningaasartuutikinnarnerpaamik.
Naalakkersuisut erseqqissumik kissaatigaat
timmisartutigut angallassinerup pitsanngorsarneqarnissaa
pisariillisaavigineqarnissaalu. Taannami inuiaqatigiinni kalaallini
attaveqarnermi pingaarnerpaat ilagimmassuk. Anguniagaajuarpoq
ataqatigiissaakkamik angallasseriaaseqalernissaq nunatsinni
inuussutissarsiutinut inuiaqatigiinnullu tunngatillugu ineriartortitsinermik
qulakkeerisumik.
Angallannerup
ataqatigiissaarneqarneratigut ataatsimut sunniutaasussat sapinngisamik
annertunerpaamik iluaqutiginiarsinnaasariaqarpagut.
Suliassallu tamakku
ajornaatsuinnaanngillat. Kalaallit Nunaat nunarput nuna angisoorsuuvoq. Nunap
pissusia pissutigalugu attaveqarniarneq ajornakusoortuulluni.
Inuiaqatigiiuvugut ikittuinnaat illoqarfippaalussuarnut nunaqarfippaalussuarnullu
aggulussimalluta. Tamannarpiaavorlu unammillerniagassarput.
Taamaammat Naalakkersuisut aammattaaq
angallannermut tunngatillugu Naalakkersuinikkut anguniagaqarpugut ilaatigut
kinguneqartussanik aningaasaliissutinut killiliussat tassa Inatsisartut
aalajangersartagaasa iluanni ukununnga attaveqartarnerup sulissutigissallugu
sapinngisamik amerlanerpaanut sapinngisamik akulikinnerpaamik sapinngisamillu
akikinnerpaamik.
Taamaakkaluartorli anguniakkani taakkuni
imminut naapertuutinngitsoqarpoq tassami inuit ikittuuneri killiliisuummata.
Taamaammat timmissartuussinermut
aningaasaqarnermullu tunngatillugu oqimaaqatigiissaarisariaqarpugut.
Qanorluunniit aalajangiisoqassagaluarpat naammagittaallioqqajaasoqartuassaaq,
aalajangiinermi oqimaaqatigiissaarineq allaanerulaartoq kissaatiginerullugu.
Tassanissaaq annertuunik
unammilligassaqarpugut. Naalakkersuisut sulissutigiuarniarpaat nukissat
killeqareersut pitsaanerpaamik atorneqarnissaat. Eqqortumik aalajangiinissamut
tunngavissat oqartariaqarpugut maannakkutut pitsaatigisimanngisaannarput.
Timmisartuussinerup sinneqartoorfiusup amigartoorfiusartullu
avissaartinnerisigut amigartoorutigalugu timmisartuussinerup
isumaqatigiissuteqarfigineratigut pisortat tapiissutaasa qanoq
atorneqartarnissaat ersarissivoq paasinarsillunilu.
Siunertaavoq kiffartuunneqarnissamik
isumaqatigiissutip annertujartuinnartumik sakkutigineqalissasut angallannermut
tunngassuteqartuni Naalakkersuinikkut tulleriaarinermut ilusilersuinermullu.
Taamaalilluni angallannermut tunngatillugu Naalakkersuinermi anguniakkat
ukununnga tunngatillugu aalajangersarneqarsinnaasammata qanoq
annertussusiliinissamut angallassinerup qanoq ittuunissaanut aamma taakku
akornanni ataqatigiissaarinerusinnaasunut nunamut siammaanissamut kiisalu
atuisunut akigititat annertussusissaannut.
Kiffartuussinissat annertussusissaat
ukiunut tulliuttunut kiffartuunneqarnissami isumaqatigiissuteqarfioreersunut
aalajangersarneqareerput, kisiannilu 2001-imut paasissutissanik sukumiisumik
peqareerpugut nunatsinni sumiiffinni assigiinngitsuni timmisartuussinerup
siunissami allatut aaqqissuussiginissaanut periarfissiisunik.
Maannakkuuttaaq nalunngilarput sumiiffinni
ataasiakkaanut ilaasunut ataasiakkaanut Namminersornerullutik Oqartussat tapiissutinik
qanoq annertutigisumik akiliuteqartarnersut.
Oqaatigisinnaavara nunatta ilaani bilitsit
akiviisa 90%-ii sinnerlugit tapiissuteqarfigineqartarmata. Tassa ilaasut
nammineq timmisartuunneqarnerinut aningaasartuutaasut nammineerluni akilissagaluarpagit
tamanna eqqarsaatigalugu.
Ataatsimut isigalugu Namminersornerullutik
Oqartussat kiffartuussinermi isumaqatigiissuteqarfiusuni 2001-ip ingerlanerani
billitsit tamarmik agguaqatigiissillugu akiviisa 60,3%-iannut tapiissuteqartarsimammata.
2001-imi Kalaallit Nunaanni siunissami
timmisartuussinerup ilusiligaanissaa pillugu misissuisoqarsimavoq imarpik
qulaallugu maanilu nunatsinni timmisartuussinermut tunngatillugu. Misissuinerup
inerneri pingaarnerit oqallisissianngorlugit imaluunniit angallanneq pillugu
nassuiaatinngorlugit 2001-imi ukiakkut Inatsisartut ataatsimiinneranni
agguaanneqarput.
Naalakkersuisut qulakkiissallugu
pingaartilluinnarpaat siunissami timmisartuussinermut
aningaasaliissutaasarumaartussat inuiaqatigiit aningaasaqarnerannut
tunngatillugu illersorneqarsinnasumik aalajangiinernik tunngaveqarnissaat.
Taamaammat angallannikkut
attaveqaqatigiinnerup tamarmiusup ataatsimoortillugu naliliivigineqarneratigut
aalajangiisoqartassaaq.
Tamatuma ilagisaatut timmisartortitseqatigiiffiit
mittarfeqarfiit allallu tamatumani soqutigisallit oqallinnermut
peqataatinneqarput. Inatsisartut attaveqarnermut pilersuinermullu aamma
ineqarnermut ataatsimiititaliaat taamatuttaaq annertuumik peqataasimavoq.
Tamatumuuna qulakkeerneqassammat aningaasaliinissani aalajangiinerit najukkani
ataasiakkaani Naalakkersuinikkut immikkut soqutigisat aallaavigalugit
pisassanngitsut.
Pingasunngornermi marts-ip ulluisa
arfernanni 2002-mi Nuummi Kalaallit Nunaanni siunissami timmersartuussinerup
ilusiligaanissaa qulequtaralugu angallanneq pillugu isumasioqatigiinnermi
inerniliineq pingaarutilik tassaavoq Nuummi Ilulissanilu mittarfiit 1199
meterinngorlugit tallineqassasut.
Taamatuttaaq Qaqortumi mittarfimmik 1199
meterinik takissusilimmik sanasoqarnissaa tassa Narsarsuaq taamaatillugu
inuiaqatigiit aningaasaqarnerat eqqarsaatigalugu isumatuumik isumassarsiaasutut
isumaqarfiginarpoq.
Narsarsuarmi annertuumik
iluarsaassisoqartussaavoq. Taannalu matuneqarsinnaassappat ukiuni tulliuttuni
25-ni milliuuninik utritilinnik sipaartoqarsinnaassaaq. Taamatuma
peqatigissaanik mittarfeqarfiit ingerlatsinerminnut ukiumut annertuunik
atuinikinnerulissapput.
Qaqortumi mittarfiliornikkut taamatuttaaq
kujataani qulimiguulinnik timmisartuussineq annikillisinneqassaaq
akikillisinneqarlunilu, kisianni aalajangiivittoqartinnagu soorunami
aningaasaliissutissat inuiaqatigiit aningaasaqarnerannut sunniutissaat
erseqqinnerusumik nalilersorlugit misissorneqaqqaassapput.
Grønlandsfly A/S-ip isertorsimanngisaannarpaa
timmisartut DASH 7-it atorneqaannassappata timmisartuni billitsit akii
qaffariartuinnassasut naatsorsuutigineqartariaqartoq. Tamatumunnga pissutaapput
kingoraartissanut aningaasartuutit nalinginnaasumillu aserfallatsaaliinermut aningaasartuutit
qaffariartupiloorneri.
Taamaammat nukinginnarsigaluttuinnarpoq
angallassinermut atortulersussalluni timmisartut DASH 7-it pisoqalisut
timmisartuni anginerusuni taarsersortussanngorlugit qulakkeerlugu taamaalilluni
timmisartuussinermi akit qaffariartuinnartut appartissinnaajumallugit.
Tamakku eqqartortillugit
puigussanngilarput ullumikkut timmisartuussinermi kaaviiaartitaasartut
ilarpassui aningaasanut inatsimmi aningaasaliissutitigut
pissarsiarineqartarmata. Billetit akitsornerisa ataatsimut isigalugu
kingunerisinnaavaat aningaasaliissutinik amerlarnerusunik
atorfissaqartitsisoqalernera.
Ilulissani, Nuummi Qaqortumilu 1199
meterinik takissusilinnik mittarfiliortoqassagaluarpat imatut
naliliisoqarallarpoq maani nunatsinni timmisartortitseqatigiiffipput
timmisartunik nutaanik pisinissaminnut aalajangiinissaminnut
periarfissarissaarnerulissasoq.
Kangerlussuup nunanit allaniit
pingaarnertut isaavigissallugu nalinginnaasumik isumaqatigiissutigineqarnerata
saniatigut nutaamik ilusiliineq angallannerup ineriartorteqqinneqarnissaanut
periarfissiissaaq inuussutissarsiornerup takornarianerullu
ineriartortinneqarnerannut.
Soorunami Grønlandsfly
aalajangiijartuaarneq tamakkerlugu suleqataatinneqassaaq. Ingerlatseqatigiffiup
susassaqartullu allat. Namminersornerullutik Oqartussanut
uppernarsartariaqarpaat attaveqarnermi annertuuni aningaasaliineq sullissinerup
pitsaanerulersinneqarneratigut taamatullu billitsit akikinnerulersinneratigut
inuiaqatigiinnut nuannaarutissanngussammata.
Neriuppunga Naalakkersuisut ullumikkut
oqallinneq aqqutigalugu Inatsisartunik ilaasortanit pitsaasunik
isummersorneqassasugut. Taamaalilluni angallannermi ineriartortitsineq pillugu
siunissami aalajangiisarnissat sapinngisamik isumaqatigiilluarnikkut
aalajangiiffigineqartarlutik. Taamatut oqaaseqarlunga pitsaasumik
angusaqarluarnartumillu oqallinnissamut qilanaarpunga.
Daniel Skifte, ataatsimiinnermik
aqutsisoq, Inatsisartut Siulittaasuat, Atassut.
Naalakkersuisup akissuteqaataanut qujavugut.
Maannakkut partiit oqaaseqartuinut pissaagut.
Per Rosing-Petersen, Siumup
oqaaseqartua.
Qujanaq. Siumumi Inatsisartuni
ilaasortap Ruth Heilmannip apeqquteqaat aallaavigalugu oqallinnermut
siunnersuutaa imatut oqaaseqarfigissavarput.
Siunnersuuteqartoq malunnaatilimmik
angallannikkut aaqqinneqartariaqartunik arlalinnik peqarnera isumaqatigaarput.
Siumumiit aallarniuteqarnitsinni una
oqallisissiaq pingaaruteqartoq aammalu angallannermut tunngasuni oqallinnermut
tunngaviulluarsinnaasutut Siumumit isigaarput. Taaqqaalaassavarpulli
nunatsinni angallannermi aaqqiiniarnerit pisortat tungaaniit aalajangiiniarnermi
qitiulluinnartussaammat innuttaasut toqqammavigalugit aallaavigalugillu
angallannermik aaqqiiniartoqarnissa.
Angallannermik aallaaveqartumik
oqallinnerit nutaajunngillat. Taamaattumik oqartariaqarpugut oqallinnerit
peqatigiilluta timitaqartinneqarnerunissaat suliarissagipput Siumumiit
neriuuutigigatsigu. Ilaatigut tamanna tunngavigalugu siornaak angallannermut
tunngassuteqartuni oqallinnerup kingunerisaanik Inatsisartut innersuussinerat 2
million koruuninillu aningaasaliinerit aallaavigalugit Naalakkersuisut
misissuisitsipput nalunaarusiami oqallissaarutaasumik kingunilimmik.
Taannalu nalunaarusiaq siorna ukiariartoraa
naammassineqarluni Inatsisartunut agguaanneqarpoq. Siumumiit nalunaarusiaq
tunngavigalugu isumasioqatigiittoqarmat aamma peqataavugut.
Naatsorsuutigaarpullu tamatumap kingunerisaanik Inatsisartuni Naalakkersuisunut
tikkuussinermik ilaqartumik nassuiaateqarumaartut. Oqallinnertalimmik
angallannermi aaqqiiniarnermi toqqammaviusussamik.
Taamatullu Naalakkersuisut
ersarissumik saqqummiussaqarnissaat pisariaqarluinnartutut isigigatsigu
kaammattuutigissavarput ukiamut Inatsisartut ataatsimiinneranni taamak ittumik
saqqummiusseqqullugit.
Taamatut saqqummiussaqarnermi
aaqqiivigineqartariaqartutut Siumumiit isigisavut makku ilanngullugit
nalilersorneqarnissat kissaatigissavarput. Siulleq maanna tikillugu mittarfiit
arfineq marluk sinerissami sanaartorneqarnikuupput. Inatsisartut
aningaasaliisimanera aallaavigalugu taamaasiornerullu siunertarisimasaasa
ilagaat nunatsinni angalanerup akisuallaarujussuarnerata
akikinnerulersinnissaa.
Ajoraluartumilli tamanna
nassuerutigisariaqarparput suli tamanna malunnaatilimmik anguneqarsimanngitsoq.
Tamanna siunertamut naapertuutinngilaq. Tassami innuttaasuni pissutsit
atugassarititaasut angallannikkut ilusiliisimanerup suli aamma
eqarpallaaneranik pissuteqarmat pitsanngorsartariaqarlunilu.
Tamatumani Siumumi ilisimallugu
nassuerutigissavarput mittarfeqarfinni tapiissutinik Inatsisartuni
piiaasimanerput ilanngulluni akitsorsaaqataasimasoq. Taamaattumik tamatumap
nutaamik naliliiffigineqarsinnaangorlugu ukiamut uterfigineqarnissaa
kissaatigaarput.
Timmisartut mittarfii
sanaartornikuupput aningaasarpassuit atorlugit. Taamaattumik tamakku
atorluarneqarnerulernissaat aqqutissiuuttariaqarpoq. Isumaalliornerusutummi
isigaarput mittarfiit aningaasarpassuit atorlugit pilersitat sapaatip
akunneranut taamak akuttutigisumik akisutigisumillu atortassallugit.
Taamattumik Naalakkersuisut
tamatumani qanoq aaqqiisoqarsinnaanera ilanngullugu misissussagaat
kissaatigaarput tassani ammasumik unammilleqatigiiffiusuni sineriatsinni timmisartuussineq
allatut ilaasunik iluaqutaanerusumik aaqqiivigineqarsinnaannginnersoq
ilanngullugu.
Ullumikkummi oqaatigineqartarmat
silaannakkut angallannermi assiliaq ilumoortoq imaattoq inuiaqatigiit
ikinnerussuteqartuni tassalu 15%-iisa taamaallaat silaannakkut angalanissamin-nut
nammineq akilikkaminnik angalanissamut akissaqaramik. 85%-iilu akissaqaratik
akiliunneqanngikkunik.
Angallannermi aaqqiiniarnermi
tigussaanerusumik ataqatigiinnerusumillu qanoq aaqqiisoqarnissaa
nalunaarusiassami ilaatinneqartariaqartutut isumaqarfigaarput. Tassunga
ilanngullugit Ruth Heilmannip ujartugai aamma ilanngullugit qanoq
iluarsiivigineqarsinnaanersut.
Uani ilaatigut aamma
takornariaqarneq eqqartorneqarmat Naalakkersuisuni Inatsisartuni
paasissutissiissutigineqartariaqartoq qanoq avammut attaveqarniarnermi
ataqatigiissaakkamik aaqqiiniartoqarnersoq.
Ilanngullugu aamma kissaatigaarput
Naalakkersuisut ukiamut saqqummiussami sinersortaatinik angallassinerup
siunissami aaqqiissuteqarnissaanik siunnersuuteqarniarnerlu-tik
saqqummiuttariaqarpaat.
Siumumimi arajutsisimanngilarput
sinersortaatit ilaat ukiut ingerlanerani sivisuumik kisaqqaannartarnerat.
Kiisalu kissaatigissallutigu ingerlaarfinni kiffartuussinissamik
isumaqatigiissuteqarfiusuni angallassinerit nalilersorneqarnissaat. Tassani
minnerunngitsumik Qeqertarsuup tunuani tunumilu naammagittaalliornerpassuit
tunngavigalugit qulaajaasoqarnissaa.
Naggataatigut kissaatigissavarput
ukiamut saqqummiunneqartussami siunnerfigineqartussatut
siunnersuutiginiarneqartut tamarmik inuiaqatigiit ataatsimut
aningaasaqarnerannut iluaqutaassanersut ilanngullugu misissorneqassasut.
Apeqqutit arlallit
siunnersuuteqartup qaffakaatitai paasilluarlugit Siumumit taperserpagut
naatsorsuutigalugu piaartumik qulaajaaffigineqarumaartut. Pissutsit ilorraap
tungaanut ingerlassappata ilumoormat eqaallisaanerunikkut
inerniliisoqartariaqarnera soorlu Naalakkersuisup akissutaa aamma taamatut
takutitsisoq.
Pissutsit piviusorsiortut
tunngavigalugit siunissami angallannikkut aaqqiinissarput Siumumiit
kissaatigaarput. Taamaattumillu ukiamut saqqummiussaqarnissami Naalakkersuisut
ersarissumik kaammattoqqissavagut qulaani ujartukkagut akissuteqarfigalugillu
aaqqiissutissanik siunnersuuteqarnissaat.
Siumumi oqallinnissarput maanna
qilanaarisimavarput neriuutigaarpullu kinguneqarluartumik peqatigiilluta
siunnerfiusussamik nassaartoqatigiiffigiumaaripput. Qularutigissannginnatsigumi
peqatigiilluni suleqatigiillunilu siunnerfeqaraanni siunnerfigisaq
angujuminarnerusarmat. Qujanaq.
Godmand Rasmussen, Atassutip
oqaaseqartua.
Kalaallit Nunaani angallannikkut
pissutsit qanoq iliorluni eqaannerulersinneqarnissaanut Inatsisartuni
ilaasortap Ruth Heilmannip oqallisissiaanut Atassummiit imatut oqaatigissavarput.
Eqqartorneqartoq inimi maani
nukippassuarnik siusinnerusukkulli pisarsimanera. Naluneqanngilarmi
illoqarfinni arlaqalersuni timmisartunut suluusalinnut mittarfinnik sanaartorneq
ingerlanneqarsimavoq. Tamannalu alloriarnerusimavoq kusanartoq.
Nassuerutigisariaqarparpulli akit
tungaat isummersuutaasimasullu siunertaannut ajoraluartu-mik tamakkiisumik
sunniutaa killeqarsimaqaluni. Tassami atuisut eqqarsaatigalugit. Naalakkersuisut
akissuteqaataat ersarippoq. Arlalitsigullu isumaqatiginarluni. Angallannikkullumi
siunnerfeqartumik ataatsimiinnerit arlaqartut pisarsimapput. Soorlu martsip
arfinani tamanna Nuummi pisimasoq. Ajuusaarnartumillu tassa angallannermi
ataatsimiititaliaq tamakkiisumik peqataasimanngilaq. Piffissallu arlaatigut
ilaasortanut kipusoortitsinerat pissutaallutik.
Maannamullu imaqarniliaq suli
ataatsimiititaliamut anngussimanani. Siunnersuuteqartut oqariartuutaat
ilisarnartut arlaqarput. Eqqaasimasaasalu illoqarfiit ilaanni aalisartut
motoriminni kingoraartissanik utaqqisarnerminni annaasaqartarnerat
akuersaarneqarsinnaanngilaq. Tamannami piffissamik asiutitsinermik
kinguneqartarmat.
Naalakkersuisut akissuteqaamminni
angallannermilu akikinnerpaamik aningaasartuutikinnerpaamillu angallannerup
atugaalernissaat oqaatigaat. Aammalumi nunatta isorartunerujussua pisooqataasoq
oqaatigineqarluni. Naluneqanngilarmi atuisut kikkunnit tamanit akit
akueriuminaatsinneqaqimmata.
Angallannerulli ilaani nunatsinni
ilaasukinnerpaaffiusartumi amigartoorutit annertusaqalutik. Naak piffiit
ilaanni allatut isikkoqartaraluartut. Oqaatigineqarpormi piffiit ilaanni 90%-ii
tikillugu tapiissuteqartariaqartarneq.
Tassuunakkut takuneqarsinnaalerpoq
ingerlaaseq taamak ittoq ingerlaannarsinnaanngitsoq. Allatulli
eqqarsartoqartariaqalersoq.
Atassummiit Naalakkersuisut
akissuteqaamminni oqaaseq atugaat isumaqatigaarput tassami angallannermi akit
appasinnerpaaffissaat oqaatigineqarmat anguniagaasoq. Eqqarsarnartoqartilluguli
Narsarsuup siunissami matuneqarnissaani siunniussaq. Nunatsinnimi pioreersunik
matooraassagutta isumatuumik naliliinertuut nalilerneqarsinnaanngitsutuut
Atassummiit isumaqaratta.
Oqaaseqaammi Qaqortup
mittarfilerneqarnissaa 1199 meterinik takissusilimmik eqqaaneqarpoq. Ukiut
ungasinnerusut kungulissagullu eqqarsaatigissagutsigit nalilersuilluar-neq
isumatuumillu eqqarsarneq avaqqunneqarsinnaanngilaq.
Saqqummiussaq una ukiut
ungasinnerusut eqqarsaatigissagutsigit kujataanilu inerisaassagutta suna
inuiaqatigiinnut pitsaanerpaassava? Nunap qanoq issusia soorlu
umiarsualiveqarneq inerisaanissaq illuliornernik annertuumik inerisaaneq, silap
qanoq ittuunera, mittarfinnilu sanaartornerup pitsaanerpaaffissai.
Taamaattumik siunissaq ungasinnerusoq
eqqarsaatigissagutsigu kujataani ineriartorneq peqqissaarussamik
misilluilluartoqarnissaa pisariaqarpoq. Kiisalu avannaani mittarfimmik
talliliinisaq aammalu Ilulissat siunniunneqarneri Atassummiit isumatuumik
naliliinertut oqaatigerusupparput.
Nalunaarummi Grønlandsflyp
isertuunnagu oqaatigisimasaa ullumi angallannermi timmisartut
atugaaginnassappata akit qaffariartuinnarnissaanik oqaatigineqartoq Atassummiit
paasilluarparput. Soorlu aallaqqaasiinermi oqareersugut pissutsit ullumi
atukkagut nalilersorluartariaqarpagut. Taamaaliornertigummi atuisut
akikinnerusumik angalasalernissaat anguartuaarneqassammat.
Pitsaasuunngilarmi silaannakkut
immakkullu akinik qaffaanerit nunatta karsianut tutsinneqartuaannartarneri.
Atuisullu piumasaqaataat annertusiartuinnartut. Taamattumik isummanik nutaanik
puttallartuartoqartassaaq. Killissaanillu aaqqiinerup tungaanut
pitsaanerpaaffiata anguneqarnissaanut Atassut suleqataanissaminut
tunuarsimaarnianngilaq.
Siunnersuuteqartulli isummiussaa
Atassummiit ilassilluarparput. Oqallinnerullu ilorraap tungaanut
alloriartitsinissaa kisaatigalutigu.
Ole Lynge, Inuit Ataqatigiit
oqaaseqartuat.
Qujanaq. Tassa Inuit Ataqatigiinniit
nunatsinni angallannikkut pissutsit ullumikkut killiffiusut qanoq
iliuuseqarnikkut eqaannerulersinneqarnissaannut aqqutaasinnaasunik ujartuilluni
manna oqallinnissaq pingaaruteqartutut isigaarput.
Nunatsinni silaannakkut imaatigullu
angallannerup ilusilersorneqarneranut suliniarnermi Inuit Ataqatigiit annertuumik
akisussaaqataanermikkut suleqataaffigisarsimavaat. Oqallisissiamik
saqqummiussaqartup apeqqutit arlaqartut saqqummiuppai. Pingaartumillu
ullumikkut angalaniarnikkut aaqqissuussinermi kinguussaasutut
taaneqarsinnaasut qanoq iliuuseqarfigineqarnissaat ujartorlugu.
Minnerunngitsumik nunatsinni
inuussutissarsiutaalersut pingaaruteqartut ilaat takornariartitsinikkut
angallannikkut pissutsinik kigaallassaarisunngunnginnissaa pingaartillugu.
Inuit Ataqatigiinniit
pingaartipparput nunatsinni angallannikkut ataqatigiissaarineq
inuussutissarsiutit ineriartortinneqarnerannut inuiaqatigiillu
aaqqissugaanerannut sapinngisamik naleqqussagaasariaqartoq.
Oqallisissiami aammalumi
Naalakkersuisup akissutaani erserpoq siunertarineqartutut sapinngisamik
piffinnut amerlanerpaanut sapinngisamik akulikinnerpaamik sapinngisamillu
akikinnerpaamik anguniakkat imminnut naapertuutinngitsut. Tassami pissutsit
piviusut pisariaqalersippaat silaannakkut angallassineq eqqarsaatigalugu
siullermik mittarfiit pioreersut naammattumik takissuseqannginnerisa
isummerfigineqarnissaat. Minnerunngitsumillu innuttaasut akuttunngitsumik
attaveqartoqartarnissaa kissaatigaat kiisalu angallassinermi pilersuinermilu
namminersortut innuttaasulluunniit pisariaqartitsinerannut naleqqussaajuarnissaq
pisariaqartinneqarluni.
Inuit Ataqatigiinniit
oqaatigisariaqarparput naliligassat oqimaatsut ilagilluinnarmassuk suluusalinnik
angallassinerup annertusarneqarnissaa siunertaralugu ingerlaqqinnissamut
inuiaqatigiit aningaasaliissutigiumaagassaat qanoq annertutigissanersut. Aamma
ukiuni qassinut aningaasaliissutaajumaartussat siammarneqarsinnaasanersut.
Angallanneq pillugu
isumasioqatigiinnerit nunatta kujataani qeqqani avannaanilu aamma ataasiakkaani
kommunini pisarsimapput. Kingullermillu martsi aallartisimalersoq Nuummi
taamaaliortoqarluni.
Soorunami isumasioqatigiinnernit
pisarsimasunit inassuteqaatit arlaqartut Inuit Ataqatigiinniit malittaraagut.
Inerniliinerit inassuteqaatillu nunatta suatungaanut tunngasuunerinik pissutsit
aallaaveqakkajupput. Malunnarporli inassuteqaatigineqartut tamakkerlugit
malinneqassappata nunatta karsiata suli aningaasarpassuit tamatumunnga
atortariaqassagai.
Taamaattumik matuma kingorna
pingaarnersiuinerup tulleriaarinermilu tunngavissat tamakkiinerusut
pisariaqartinneqartussaapput. Annertuumillu Inatsisartut aningaasanut
inatsisissaannuttaaq attuumassuteqarlutik.
Tamanna tunngavigalugu
Naalakkersuisunut kaammattuutigissavarput Inatsisartut ataatsimiinnissaannut
atatillugu sinaakkutissanik erseqqinnerusunik ataatsimoortumillu
saqqummiussaqaqqullugit. Manna apeqquteqaat aallaavigalugu oqallinnerummat
aalajangiiffiusussaanngilaq pissutsinilli qulaajaanerulluni.
Tunngaviusumik
kiffartuunneqarnissamik isumaqatigiissutit annertunerusumik angallannermut
tunngassuteqartuni Naalakkersuinikkut tulleriiaarinermut ilusilersuinermullu
sakkugineqartarnissaat Inuit Ataqatigiit isumaqatigaat. Tassalu qanoq
annertussusiliinissamut angallassinerup qanoq ittuunissaanut nunamut
siammaanissamut kiisalu atuisunut akigititat annertussusissaannut.
Oqallisissiamik saqqummiussaqartup
ilanngullugu tikippaa ukioq manna junimi nunat avannarliit killiit
siunnersuisoqatigiiffiata angallanneq qulequtaralugu ataatsimeersuartitsinissaa.
Qujanartumik siunnersuisoqatigiiffimmit tamarmiusumik
isumaqatigiissutigineqarsimavoq pisariaqavissoq Kalaallit Nunaata, Islandip
Savalimmiullu akornanni angallannerup siunissami oqilisaassiffiginiarnissaa
pisariillisarneqarnissaalu.
Pissanganassaaq nunat taakku pingasut
akornanni angallannikkut aaqqissuussinerup pisariinnerulersinneqarnissaanut
aqqutissaasinnaasunik sunik saqqummiussaqassanersut. Oqaatigineqartariaqarpoq
nunani avannarlerni angalarusussuseq annetugaluaqimmat akigititalli
assigiinnginnerujussuisa pingaartumillu nunatsinni akit qaffasinnerujussuisa
inuppassuit takornariarusukkaluit killilertarpaat.
Taamaattumik pisariaqarpoq nunat
taakku akornanni naalakkersuinikkut isumaqatigiissuteqartarnissaq siunertarineqarsinnasut
ilagimmassuk akigititatigut nalimmassaaniarnissaq timmisartutileqatigiit
amerlanerusut unammilleqatigiilersinnaanerat il.il.
Naalakkersuisup akissuteqaammini
ilanngullugu eqqaasissutigaa 2002-mi martsip arfinani siunissami timmisartuussinerup
ilusiligaanissaa pillugu isumasioqatigiit inassuteqaataat. Inassutigineqartut
ilagaat Nuummi Ilulissanilu mittarfiit 1199-inngorlugit tallineqassasut.
Taamatullu Qaqortumi mittarfimmik 1199 meterimissaaq takissusilimmik
sanasoqassasoq.
2001-imi Inatsisartut ukiakkut
ataatsimiinneranni siunissami timmisartuussinerup ilusiligaanissaa pillugu
misissuisimanernit saqqummiunneqarsimasunut sanilliussissagaanni ullumikkut
saqummiunneqartut allaassuteqarput. Tassami qitiusumik Atlantikoq qulaallugu
mittarfissatut siunissami Keflavik Islandimiittoq Kangerlussuarmut taarsiullugu
atorneqalissasoq aamma tikkuartorneqartarsimagaluarmat.
Misissuinermut atatillugu nunatsinni
timmisartuutileqatigiiffik Grønlandsfly A/S annerusumik tusarniaavigineqarsimanngilaq.
Aatsaallu isumasioqatigiinnermi qanittumi pisumi isummaminik
saqqummiussaqarsinnaasimalluni.
Grønlandsflyp saqqummiussamini
piffissamik annertunerusumik sukumiinerusumillu misissuisimanermut
uppernarsaatinik paasissutissanillu tutsuviginarnerusunik pisariaqartitsi-neq
aamma piumasaralugu kissaatigaa.
Inuit Ataqatigiinniit kissaatigisaq
tamanna isumaqatiginartipparput. Tassami suliaq taamak annertutigisumik
inuiaqatigiinnut attuisussaq erseqqissumik tutsuiginarnerusumillu
tunngavissaqarluni ingerlanneqartariaqarpoq. Taamatullu inuiaqatigiinni suli
oqallisigineqarnerusariaqarluni.
Tamanna ilaatigut tunuliaqutaralugu
maannangaaq tulluassanngilaq atlantikoq qulaallugu nunatsinni isaaviusup
Kangerlussuup mittarfiata allanngortinneqarnissaa. Maannamullu paasissutissat
pineqareersut naapertorlugit Nuummi mittarfiup tallineqartariaqarnera
saneqqunneqarsinnaassanani.
Misissuinerilli allat nunatta
sinneranut tunngasut tamatuma ataani Ilulissat Qaqortoq immaqalu Aasiaat mittarfiisa
tallineqarnissaannut apequtit qulaajaalluaqqereernikkut
isummerfigineqartariaqartut Inuit Ataqatigiit isumaqarfigaat.
Soorunami nunatta sinneranut
silaannakkut angallannermi ineriartorneq ukiunut arlalinnut
pingaarnersiuvilluni sinaakkusersorneqartariaqarpoq. Illoqarfiit ataasiakkaat
qanimut suleqatigalugit piorsaaneq ingerlasariaqarpoq.
Timmisartut atukkagut ukiuni
arlalissuarni atorsinnaasariaqarpagut. Aamma taakkua
kingoraartissaqartuartariaqarput.
Timmisartumi inissat
annertunerpaamik atorneqartarnissaat aamma anguniarneqartariaqarpoq. Inissat
atorneqanngitsoortut akikillisaanikkut neqerooruteqarnikkulluunniit
atorluarneqarnerusinnaasariaqarput.
Naalakkersuisup akissumminissaaq
aningaasaliinissamik aalajangiinerit najukkani ataasiakkaani
Naalakkersuinikkut immikkut soqutigisat aallaavigalugit pisannginnginnissaannik
qulakkeerinnikkumammat isumaqatigiinnarsinnaavarput.
Aamma maannamut naliliinerit suli
pisariaqalersinneruvaat aningaasaliissutaajumaartussat ilumut ungasinnerusoq
isigalugu nunatsinnut tamarmut kinguneqarluartumik aningaasaliissutaanissaannik
qulakkeerinninniarnissaq.
Taamattumik Inuit Ataqatigiit
illoqarfiit taaneqartut saniatigut illoqarfiit minnerusut naannerusunillu mittarfiliorfigineqarsinnaasut
ilanngullugit ukiamut aalajangivittoqartinnagu isummersorfigineqarnissaat
pisariaqarluinnartutut isigaat.
Isumasioqatigiittarnerit
naammattumik tunngaveqarluni pissusiviusunik ersersitsinersut
qulakkeerniartariaqarput.
Silaannakkut angallassinerup
saniatigut usernartorsiornaraluartoq imaatigut angallassinerup nioqqutissanik
inuussutissarsiornermillu sammivilimmik aaqqissuulluagaanerunissaa Inuit
Ataqatigiinni ilanngullugu eqqaanngitsoorusunngilarput.
Imaatigut angallanneq nunatta
kujataani ukioq kaajallallugu ingerlanneqarsinnaasarput. Avannaanili ukiup
ilangaatsiaa matoqqatinneqartariaqartarluni.
Pissutsit taamaatsillugit
pinngitsoorneqarsinnaanngilaq angallannikkut pilersuinerup tungaatigut pitsanngorsaaniarnissaq.
Inuit Ataqatigiillu qilanaarpugut ukiamut tamatumap aamma annertunerusumik
sammineqarnissaanut periarfissaqassagatta.
Taamatut oqaaseqarluta apeqquteqaat
aallavigalugu oqallisissiaq oqaaseqarfigaarput.
Mogens Kleist, Kattusseqatigiit
oqaaseqartuat.
Qujanaq. Aallaqqaammut oqaatigissavara
saqqummiussassakka erniinnaarannguaq takkutissammatigit ajornartorsiuteqarneq
pissutigalugu.
Ruth Heilmannip saqqummiussai
ilisarnartorujussuupput. Tassami ullumikkut silaannakkut angallanneq qissimissagutsigu
takusinnaavarput qanoq politikkikkut pilersaarusiorneq erloqinartigisoq ulloq
manna tikillugu.
Kusanartunik anguniagaqartoqartaraluarpoq
taamaattorli anguniakkat pitsaasumik piviusun-ngortinniarneri
ajornarnerusarmata. Nalunngilarpummi Naalakkersuisuusarsimasut 1990-ikkut
qeqqaniit anguniarsimagaluaraat nunatsinni innuttaasut tamarmik silaannakkut
angallanneqalissasut.
***atortorissaarutinik ajutoorneq,
piaartumik aaqqinneqassaaq
Sinerissami umiarsuaaqqat... bånd nr 11 uani naavoq.
(Bånd nr. 12-p (Mogens Kleist) nanginnera, Båndit immiunneqarnerini oqaluttup oqaasii overlappertinneqarsimanngillat, taamaattumik oqaluttup oqaasii amigaateqarput)
Ymiit
ullumikkut silaannakkut angalasinnaanngillat. Silaannakkut akit akisungaarmata. Siornatigut akinut tunngasut
eqqartortareernikuugatsigit annertunerusumik iserfigissanngilagut. Taamaattorli
Kattusseqatigiinniit oqaatigissavarput silaannakkut angallassinermi akit
naleqqunnerusut apeqquserusullugit.
Aammalu apeqquserusupparput siunissaq
ungasinnerusoq isigalugu arlaatigut aaqqiisoqassanersoq Naalakkersuisut
tungaanninngaanniit. Ullumikkut aperisariaqarpugut kikkut silaannakkut
angalasarnersut.
Taamaattorli nalunngilarput pisortani
sulisut annertuumik angalasartut, tassa 15%-it angullugit. Inuiaqatigiilli
ilaannaat silaannakkut angalanissaminnut akissaqarput tassalu 85%-ii.
Politikkikkut anguniakkat ilagigaluarpaat
takornarissat amerlaqisut nunatsinnut tikittalernissaat. Taamaattorli suli
anguniakkat anguneqarsimanngillat silaannakkut akit pisooqataasunut ilaammata.
Taakku saniatigut nunatta iluani
angallannikkut ajornartorsiutit imaannaanngitsuupput. Ullumikkut illoqarfiit
arlalissuit silaannakkut angallannermut ajornartorsiuteqartuupput. Taakkartorneqarsinnaasut
arlaliupput soorlu saqqummiisup taakkartugaasa ilagaat
takornariaqartitsiniarnermi ajornartorsiutit.
Illoqarfik Maniitsoq kisimi taamatut
ajornartorsiuteqanngilaq illoqarfiilli sinerissamiittut arlalissuit
silaannakkut angallannikkut ajornartorsiuteqarput. Taasinnaasat ilagaat Paamiut
kommuniat silaannakkut angallannermi aammattaaq ajornartorsiuteqartoq suli
manna tikillugu annertuumik.
Kujataaniit Danmarkimut angalaniartut
annertuumik ukioq manna eqqorneqartussaapput. Tassami Grønlandsflyp
Danmarkimiit kujataanut timmisartorsuata siuartinneqarmat kujataaniit
Danmarkiliartussat pinngitsaalisaallutik Grønlandsflyp qulimiguuanut
ilaasariaqalissammata angummanniarunik.
Siornatigut Najaaraq Ittuk atorlugu
aammalu akikinnerusoq atorlugu angalasarnerit kiputinneqarput. Taamatut
Grønlandsflyp angallannikkut allannguineratigut. Kujataamiut
pinngitsaalineqarlutik angalanissaat Kattusseqatigiinniit
akuersaarsinnaanngilluinnarparput. Nalunngilarpummi kujataani kommunit ajornartorsiut
aaqqiiviginiassallugu taakkartuisaraluartut taamaattorli ulloq manna tikillugu
soorlusooq tusarniarneqarsimanngitsutut ittut.
Ruth Heilmannip taakkartugaasa
takutiinnarpaat nunatsinni silaannakkut angalanerup qanoq erloqinassusia.
Allaanngiivippormi Maniitsoq mattunneqartutut isikkoqartoq.
Assorujussuaq paaserusunnarpoq
Grønlandsflyp maannakkut pilersaarusioraangami illoqarfiit qanimut qanoq
suleqatigisarnerai. Malunnarmammi taamatut isikkoqanngitsoq. Namminerli
aningaasatigut iluanaarsinnaanissaq anguniarlugu pilersaarusiortartoq taamatut
iliuuseqarluni.
Takornariaqarnerit eqqarsaatigissagutsigit
aperisariaqarpugut Namminersornerullutik Oqartussat suliffeqarfiutaat qanoq
qanimut imminnut suleqatigiinnersut pitsaanerpaamik sullissinissaq anguniarlugu.
Takornariartitsivimmi Namminersornerullutik Oqartussat pigisaraat. Taamaattorli anguniagaat ullumikkut sumut killissimanersut assorujussuaq paaserusunnarmat. Aammalu qanoq nalimmassaasoqarsimanersoq apeqqutigerusunnarluni.
Politikkikkut anguniakkat naammassiniaraanni taava pingaaruteqarluinnarpoq unilaarluni naliliinissaq. Ullumikkut takornarissat nunatsinnut tikittartut anguniakkat toqqammavigalugit qanoq inissisimappat. Anguniakkat anguniaraanni suut aaqqiivigisariaqarpat. Angallannerit qanoq nalimmassarneqassappat silaannakkut imaatigullu.
Aap apeqqutit imaanaanngitsut qulaajarneqartariaqarput anguniakkat qanimut malinnaaffiginiaraanni. Angallanneq ullumikkut nutaamik naliliffigisariaqarparput. Ajornartorsiutimmi illoqarfinniiginnanngillat aammattaaq nunaqarfinni silaannakkut tikinneqartarneri assigiinngitsut ajornartorsiutaasarput.
Ilanngullugu Kattusseqatigiinniit oqaatigerusupparput sooq suli silaannakkut nunatsinni qallunaat nunaannut angalanerit suli taamak akisutiginersut.
Aammalu taamaaginnassanersoq taamalu taamaaginnassanersut siunissaq ungasinnerusoq isigalugu. Sooruna taamak angalaneq akisutigisoq nunat allat qissimissagutsigit tupinnaqaaq akigititaat takullugit allaanerussusii.
Inuussutissarsiutinik siuarsaaniarutta aammattaaq nunatsinni suliffeqarfiit takornariartitsiviit qanimut suleqatigisariaqarpagut. Aatsaat taamatut isiornikkut atorluaaneq anguneqarsinnaammat. Ruth Heilmannip ilanngussatut ikkussimasaani ersarissumik taakkartorneqarput qanoq erloqinartigisoq suliffiit siuarsarniaraluarlugit aporfissat suunersut. Oqartariaqarpugummi takornarissat amerlarnerusut nunatsinnut tikisittalerniarutsigit taava pinngitsoorata takornarissanut sullissisut qanimorluinnaq aammattaaq suleqatiginissaat anguniartariaqarmata.
Taamatut iliunngikkutta anguniakkat takornarissat tungaannut anguneqarnavianngillat. Ullumikkut aperisariaqarpugut Namminersornerullutik Oqartussat suliffeqarfiutaat Greenland Tourism A/S, Grønlandsfly A/S Arctic Umiaq Linelu qanimut imminnut qanoq suleqatigiinnersut angallannerup tungaatigut.
Ukiut marluk matuma siornatigut Naalakkersuisuusumut taamanikkut Naalakkersuisuusumut ersarilluinnartunik apeqquteqaateqarnikuuvugut silaannakkut angallannermut tunngasunik. Apeqquteqaatigisimavarput Grønlandsflyp timmisartuni DASH 7-it qanoq ililluni taarsersorniarnerai. Tassami timmisartut taakku ullumikkut sananeqarunnaarnikuupput. Aammattaaq pilersaarutit qanoq isikkoqarnersut Kattusseqatigiinniit assorujussuaq paaserusuppagut.
Eqqaamalluinnarparpummi Naalakkersuisuusimasut 2000-imi annertunerusumik akissuteqaateqannginnera oqaatigaluguli Grønlandsfly A/S aktieselskabiummat Naalakkersuisuniit annertunerusumik ulluinnarni ingerlatsineranut tunngasunik iserfigisinnaanngimmatigit. Aap, taamanikkut paasisinnaakutsoorparput taamaattorli ukiut kingulliit Grønlandsflyp imaluunniit Grønlandsflymiit oqaatigineqartarpoq DASH 7-it taarserneqassappata taava mittarfiit tamarmik tallineqassasut.
Ullumikkut Naalakkersuisup akissuteqaateqarnermini taasaasa ilaat paasisinnaakutsoorpagut. Taamaattorli aperisariaqarpugut Naalakkersuisut nalunnginneraat qaqugu Grønlandsflyp timmisartuni taarsersulissagai nalimmassaaneq eqqarsaatigalugu.
Paasisinnaavarput inuiaqatigiinnut akikinnerpaamik silaannakkut angallassiniaraanni periuseq pitsaasoq ujassallugu. Tamanna tamatta anguniartariaqarparput inuiaqatigiit iluanni Qaqortumi mittarfiliornissaq Naalakkersuisup oqaatigisaa Kattusseqatigiinniit imatut oqaaseqaateqarfigissavarput.
Narsarsuarmi mittarfiup suna ajoqutigigamiuk? Taamatut annertuumik aaqqissuinissamut aammalu matuneqarsinnaanissaanut suunuku millionit untritillit sipaarfiusussatut taakkartoritit. Saqqummiussami allaqqannginnami ukiut 25-t tulliuttut.
Oqaatigisariaqarparput ullumikkut nunatta aningaasaqarnera eqqarsaatigissagutsigu qaqortumi mittarfiliornissaq akissaqartinngilarput.
Taamatut mittarfiliorniarutta allatut ajornaqaaq aningaasanik avataaniit aatsaat atoqqaarluta sanaartorsinnaassagatta. Aammattaaq oqaatigerusupparput nunatta ilaani aalisarnermut tunngasut aaqqiivigeriarlugit Qaqortumi mittarfiliornissaq eqqarsaatigisariaqaraat Naalakkersuisut.
Uani assersuutigisinnaavarput avannaani qaleralinniarluni aalisarnerit qanoq erloqinartigisut. Tassami taamatut aningasanik kaaviiaartitsilerutta avannaaniit taava aningaasat skattimut isertut toqqammavigalugit aaqqissuinissat angusinnaagatsigit.
Siornatigut oqallinnermi Kattusseqatigiinniit oqaatigisarsimavarput ullumikkut siunissaq ungasinnerusoq eqqarsaatigalugu tassalu ukiut 10-15-it maannakkumiit pilersaarusiortariaqartugut angallannikkut qanoq anguniagassaqassanerluta.
Taamatummi iliunngikkutta siornatigut pilersaarutaasarsimagaluit maliinnassavagut tassalu kukkussutit inuiaqatigiinnut akisoqisut atoqqissallugit. Assersuutissat arlaliupput.
Taamaammat ataatsimoorluta ersarissumik pilersaarusiorniarta taava pilersaarusiornerit nutaamik nutartertariaqarpagut.
Naalakkersuisut oqaatigisaasa ilagaat Grønlandsflyp qanimut suleqatiginerani akit akikinnerusut silannakkut angallannermi pilersinneqarsinnaasut. Taakuunnginnerput Naalakkersuisuusarsimasut siornatigut neriorsuutigiuartagaat sulilu piviusunngortinneqanngitsut uteqqiinnarlugit.
Aperisariaqarpugummi qanoruna Naalakkersuisut iliuuseqarniartut taassumap tungaatigut. Ullumikkut nunatta iluani akigititaasut qissimissagutsigit tupinnaannartumik akit qaffasittuupput atorneqarlutillu.
Kattusseqatigiinniit oqaatigissavarput ullumikkut siunissaq ungasinnerusoq isigalugu oqaatigeeriikkatigut pilersaarusiorniarta tassalu ukiut 10-15-it maannakkumiit ataatsimoorluta silaannakkut angallanneq inuiaqatigiinnut pitsaanerpaaq kingunissaa anguniarutsigu.
Taamatut oqaaseqarluta oqallinnissamut ilaanissarput kattusseqatigiinniit ammaffigaarput. Qujanaq.
Otto Steenholdt, attaviitsoq.
Qujanaq. Inatsisartunut ilaasortat ilaata Ruth Heilmannip Kalaallit Nunaanni angallannikkut pissutsit qanoq iliornikkut eqaannerulersinneqarnissaat pillugu apeqquteqaat maanga eqqussimavaa. Maani oqaaseqarnissanni Naalakkersuisut akissutaat samminerussavakka.
Siunnersuuteqartup siunnersuutaa paasinarluarmata. Naalakkersuisoq saqqummiussanni quppernerit pingajuanni imanna oqarputit issuakkannik @isumasioqatigiinnermi inerniliineq@ issuagara tassunga naavara. Taakku inerniliisimasut inuulluaqqutinniarigit oqarfigalugillu Inatsisartunngooq kiserluinnarmik inerniliillutillu oqallinnermik matumannga aalajangiisussaapput.
Nunatsinni mittarfeqarneq ukiorpanngortuni uteqattaartuarlugu maani oqallisigisarparput. Pimoorussamillu qangaaniilli nammineq isummersimanerit misissorlugit aaqqeeriarfigineqarsinnasut eqqarsaatigeqqinneqartarput. Massakkullu uanga aamma taamaaliorpunga.
Uteqattaarinissaq piumananngikkaluaqaaq. Isummalli allanngortissimanngikkaanni allatut oqaatigineq ajornaqaat. Timmisartunut mittarfissat EF-ersuarli taamanikkut nalaanili sananiarneqalermata sakkortuumik Inatsisartuni inassutigisimavara taamani EF-imit tapiissutit annertoqisut timmisartunut mittarfinnut takisuunut allaat internationaliusunut taaneqartartunut uuttuutaat malillugu sanasoqaqqullugu.
Uagut akiligassarinnginnatsigit avatitsinninngaaniit tilskudetut ilillugit sanaartornialermatigit. Tamanna malikkumaneqarsimanngilaq. Aamma taamanikkut partiit Naalakkersuisuutitaqartup EF-imullu akerlioqisup inuiaat isaasa saavanni taamak akerlerisap aningaasaataanik atuilluarnissaq pitinnagu kingorna oqallisaalerumaartut tassalu ullumikkut mittarfiit skakbrættetut atsigisut tallinissaat namminneq Kalaallit Nunatsinnut akisussaqisoq namminerlu akilersornialugassat siunnersuutigiumaaramikkit.
Mittarfiit naatsuararsuit ulloq manna tikillugu sanaartorneqarniarsaripput, naak nalunngikkaluarlugu saqqummiuttuarlugulu Naalakkersuisut timmisartut ukiuni makkunani atukkavut pisoqalilersut kingoraartissallu akitsoriartuinnartut billitsit akiinut tuniluukkaluttuinnartumik.
Timmisartut siunissami atugassat mittarfinnik takisuunik atorfissaqartitsipput. Ilami sinerissami timmisartorsuarmik sineriak atuarlugu timmisartussamik neriuutit aatsaat ukioq manna takkuteriataaraluarput. Naluneqanngitsumik uanga aamma taamanikkut eqqarsaat manna qangarsuarli inimi maani timmisartunut mittarfiit takinerusut sanaartorneqaqqullugit ilungersuuteqarninni inassutigisimagaluarpakka.
Maanna ukiut ima amerlatigisut qaangiutillartullu piukkutiummerneqartaleraluarpummi. Massa nalunagu mittarfiit suli ullumi sanaartorumasat timmisartunit taamaattunit miffigineqarsinnaanngitsut.
Qangali
ilungersuullugu inassutigisartagara uteqqillara, utoqqatseraluarlunga imaattoq.
Timmisartunut
mittarfeeraliornersuaq unitsilluinnarneqarniarli. Minnerpaamik nunatta kitaani
mittarfik timmisartorsuarnit miffiusinnaasoq tassa Narsarsuup aappariligassaa
kisiat siunniunneqarli.
Toqqarneqarli piffik piukkunnartoq
aammalu akikinnerusumik sanaffiusinnaasoq. Taakku oqaatigiinnaraanni
naluneqanngilaq uanga Aasiaat toqqartuarikka. Saqqummiussami
oqaatigineqannguarujoq aalajangiinerinngooq najukkani ataasiakkaani
Naalakkersuinikkut immikkut soqutigisat aallaavigalugit pisassanngillat.
Ilulissat imaasiallaannarlu Qaqortoq
pilersaarusiorfigineqalersutut takkuteriataarmata oqaatsit taamatut
aninneqartut tangeeruttutut oqaatigisariaqarsoraakka. Taamannak oqarpunga
oqallisinnguasaarnitta ilaanni erseqqissarneqarmat Ilulissat mittarfiat
tallineqarsinnaanngitsoq allamulli sammivilimmik aatsaat nutaamik
sanasoqarsinnaasoq.
Aap, mittarfiit pioreersut marluk
tallineqarsinnaasullu illoqarfinni sanileriingajanniipput. Aasianni Ilulissanilu
ataasiarunnaarluta tusartarparput Aasiaat mittarfiata tallineqarsinnaanera
sinerissami mittarfinnit tamanit tallineqartussaattut aamma
naatsorsuunneqarsinnaasunit akikinnerpaamik tallineqarsinnaasoq.
Taanna Naalakkersuisunut
apeqqutigissavara taamatut nassuiaasimaneq suli attanneqarnersoq. Sooq
akikinneq ukiut aningaasassaaleqiffiusut nalaanni alarterneqarpa?
Tamanna aningaasassaaleqinermik
oqalunnermut tulluarpa? Taamattumik Naalakkersuisunut ersarissumik
paatsuugassaanngilluinnartumillu Inatsisartunit suaarutigineqarli manna
timmisartunut mittarfeeqqagut pioreersut akikitsumik tallineqarsinnaasut
siulliullugit talliortorneqarlit.
Qaqortumik mittarfiliorumallerneq
assuaralugu oqaatigeerakku Inatsisartunut ilaasortanut allakiaq ersarissoq
Nanortalimmeersorlu innersuukkusuppara. Allakkiaq allaat ima ersaritsigisumik
oqartoq, issuarpara AQaqortumi
timmisartunut mittarfiliornissaq siunniunneqarsimassappat
upperisinnaanngilarput. Taamalu oqarneq kujataani kommunit angallanneq pillugu
isumaqatigiissutaannik aamma Qaqortumi borgmesteriusup isumaqataalluni
allakkioqataaffigisimasaanik tunuliaqutaqartoq paasivara.
Kingumut saqqummiussami oqaatigisaq
tassalu najukkani immikkut soqutigisat tunaartarineqannginnissaannik oqalunneq
sanioqqunneqannginnerpa?
Ungasissorsuunngitsukkut timmisartut
atorlugit siunissami angalasarnissaq ataatsimeersuaatigineqannguarujoq.
Ataatsimeersuarneq taanna, naak Naalakkersuisunit ilaasortap
isumassarsiffigilluarsimallugu oqaatigigaluaraa isertussanngilara tusarnaarlugu
ilaatigut ileqimisaarnartoqaqimmat.
Ilami allaat Reykjavik nunatsinni
avammut timmisartuussisarnermi siunissami mittarfittut qitiulersinnaasutut
oqaatigineqarpallammat.
Inatsisartut manna aalajangiunniarlissuk,
aningasarissaanngeqaagut timmisartunut mittarfigut naappallaarnertik pillugu
siunissami atorsinnaangitsut sanaartorneri unitsinneqarniarlik.
Tulleriaarilluarneq aallaavigalugu timmisartut Atlantikoq qulaallugu
timmisartut nunatta kitaani mittarfeqalernissaat tulliullugu
siunniunneqarniarli. Taavalu mittarfeeqqat tulleriiaarlugit
eqqarsaatigilluakkamik talliortorlugit.
Takuat timmisartunut mittarfiit
takisuut siunniuppagut. Nammineq akilersugassagut. Milliardinik
ikittuunngitsunik akeqartussat. Sumillu aningaasat tamakku nanissanerlugit
nalusatsinnik akeqartussat. Naalakkersuisut ilaanneeriarlutik oqarta tallimik
illua qullarlugu pilersaarutiminnik imannaannaq akeqartussanik
suaarutiginnittarput.
Maanna Royal Greenlandimi, Puisimi
allanilu pisimasut naassaanngitsumut pukusummiorisariaqalikkavut
uterfiginngikkaluarlugit taamatut pissusilersortarneri allamut assersuunneq
ajorpakka ila soorlu lottomik eqquiniarlutik immersukkaminnik tunniussisimasut.
Ajungaanissaminnillu qulanngingaaramik pilersaarutitik imaaliallaannaq
utertinneqarsinnaanngitsut kingornali akiitsutut inuiaqatigiinni
naalliunnartumik ersunneqartuarlutik akilersorniagassat
aalajangiutiinnartarlugit.
Mittarfitta pioreersut siulliullugit
tallineqarnissat iluarsaanneqarnissaallu siunniutsigu. Taamaasiornerit
siunissami iluanaarutinngorlutik aningaasat taakkua isertitaat mittarfiliassa-
nut timmisartunullu anginerusunut pisiniarnissatsinnut atussagatsigit.
Akissaqartinngisagut
ataatsimeersuaatigiunnaarlugit pigeriikkatta iluarsarneqarlutik
atorluarneqarnerulernissaat aningaasatigullu isaatitsillualernissaat
peqqaakkunnaarlugu ataatsimeersuaatigikutsoortarniarlutigit.
Per Berthelsen, attaviitsoq.
Qujanaq. Uani oqallisaasoq
qularnanngitsumik uagut inuutilluta oqallisaajuassaaq. Aaqqikkuminaatsuuvoq
kisianni sumilluunniit taanna uniffiussanngilaq maannamit pitsaanerusumik
eqqarsarlutalu aaqqiiniarnissatsinnut.
Saqqummiunneqartorlu paasilluarpara.
Ilami uparuartugassat imaannaanngitsut tassaniipput. Taamaattumik
nuannaarutigeqaara aamma una uani Siumuminngaanniit Ruth Heilmann-iminngaaniit
qaqinneqarmat. Tassami aamma uanga siunnersuuteqarpunga qaammatip uuma
naannginnerani oqallissaasussamik. Tassalu nunatsinni silaannakkut
angallassissutit pioreer- sut atorluarnerunerisigut akinik apparsaaniarnermik
imaqartoq.
Nerioqaangalu misilittakkat
siusinnerusut tassani uteqqinneqassanngitsut. Tassalu imarisaasoq piunnaarlugu
inuttarsiuineq aallaavigalugu siunnersuutinik tusaajumannginneq. Neriuppunga
taanna aporfigissanngikkipput oqaluuserisassaq tanna tikikkutsigu.
Tassanimi Inuit Ataqatigiit
oqaaseqartua, Ole Lyngep, ilumoorluinnarpoq piusut maani atorneqartut
atorluarnerisigut innuttaasut pitsaanerusumik kiffartuunniarnissaat
anguniartariaqarparput.
Tassami aamma oqaatigineqartutut
peqqissimineq siulliunngisaannarpoq. Taamaattumillu uani pingaartuuvoq
inuiaqatigiinni uagut aalajang.. ukua aallavigalugit ingerlatsinermi kukkunerit
assigiinngitsut nassuerutigisarnissaat.
Taamaattumik Siumup
oqaaseqartuaninngaaniit saqqummiunneqartoq nuannaarutigaara. Tassalu
nalilersoqqittariaqarunartoq soorlu mittarfeqarfiit siornatigut
tapiiffigineqartarlutik ingerlatsisut massakkut namminersoriartuaartitaasut
taamaaliorneq maanna eqqortuunersoq.
Qularnanngimmammi ilaatigut tamanna
nipilersoqataasoq nunatsinni angalaniarnermi minnerunngitsumik silaannakkut
angallanneq eqqarsaatigalugu taamatorujussuaq innuttaasunnguakkuluit
sumiiffinnut pituttorlugit angalasinnaajunnaartillugillu ingerlanitsinni.
Aamma tassani qularnanngitsumik
eqqarsaatigisariaqarluinnarpoq pineqartup iluani unammilleqatigiitsitsineq
aqqutissaanersoq. Tassami nassuerutigineqarpoq aammalu nassuerutigisariaqarluni
nunatsinni niuerfigissallugu tunuliaqutaasoq killilerujussuusoq. Taamaammallu
ingerlatsivimmi taamatut akisutigisumi unammilleqatigiissitsinikkut akinik
apparsaasinnaaneq sinnattuarnerinnaannginnersoq.
Isumaqarpungami aamma uanga Inuit
Ataqatigiit oqaatigisaattut pioreersut atorluarnerisigut innuttaasunik
sullissineq pitsaaninngorsartariaqarsinnaagaluartoq. Aammalu taamannak
ingerlasariaqaraluartoq. Aamma allakkatigut poortukkatigullu assartuineq
eqqarsaatigalugu nalilersortariaqarpoq ilumut nunatsinni agguluinerujussuaq
taamaattoq ingerlanneqassanersoq.
Uanimi pineqartut tamarmik
Namminersornerullutik Oqartussaninngaanniit arlaatigut pigineqartuupput.
Taamaattumillu taakku iluini unammillertitsisutullusooq ililluni ingerlatsi-neq
apersuusigassaavoq sakkortoorujussuarmik.
Uanga nammineerlunga maannarpiaq
oqassaguma taava isumaqarpunga siunissami silaannakkut angallassineq
annertunerusumik eqqarsaatigalugu tassani pisariaqartoq akuerissallugu
niuerfik ima killeqartigaaq, nunap ingerlanniarnera imatut oqimaatsigaaq,
akisutigaaq tassani unammilleqatigiissitisinikkut aaqqiisinnaaniarneq
piviusorsiortumik eqqarsaraanni angujuminaatsuujuassalluni.
Mittarfiit pioreersut iluamik
silatuumik tulleriiaarinikkut soorlu attaviitsoqatima Otto Steenholdtip
oqaatigigaa iluamik isumatuumik pioreersut iluamik naammaginartumik
aaqqiiviginerisigut tamanna aaqqunniartariaqarpoq. Tassami nunatsinni
akissaqanngilagut eqqaassutissiassutut napasussat salliutillugit
sanaartornissamut nunami maani ajornartorsiuti-vut isumatuumik
tulleriaatinikkut tulleriaakkanillu iluamik aallussinikkut sangoqattaarnata
aatsaat aaqqikkiartorsinnaassavagut.
Aamma tamanna atuuppoq mittarfiit
eqqarsaatigalugit. Taakkartorneqarpoq ilaatigut mittarfiit ilaasa 1200 meter
baaninngorlugit, tassa 1.199 meterinngorlugit tallilerneqarnissaat taanna
isumaqatigilluinarpara, kisianni maannangaaq isumaqarpunga
tunngavissaqanngippallaartoq aalajangiutissallugu soorlu Narsarsuup
matusinnaanissaa. Iluamik tamuaarisariaqarpoq. Tassami uteqqissavara
pioreersunik atuilluarnikkut akilersinnaasumik ingerlatsinissaq taanna
ujartorneqartariaqarmat. Tuniniaaviusut killearnerujussuat peqqutigalugu.
Kisiannili taamak oqaraluarlunga
pingaartippara takornariaqarneq aamma uani ilanngunneqarmat illoqarfiit
piorsagassat mittarfeqarneq eqqarsaatigalugu tassani salliutittariaqassammata
aningaasarsiorfiusinnaasut.
Tassami illoqarfiit mittarfiit
aallaavigiinnarlugit ingerlanneqartut napatinniarneri akisuupilorujussuupput.
Qanorluunniit ilioraluarutta tamakku amigaateqarput. Taamaattumik ernumanaatsumik
aamma takornariat toqqissisimassutigisinnaasaannik aaqqissuissagutta aammalu
takornariat aningaasarsiorfiginissaat pitsaanerpaaq anguniarlugit
ingerlaniassagutta. Taava illoqarfiviit qanigisaanni mittarfeqarnissaq
isumaqarpunga isumatuujullunilu silatuujussasoq.
Tallilerinikkut aamma mittarfinnik
periarfissaq nutaaq suli allanit taaneqanngitsoq tassaavoq nioqqutissianik
nillataartunik nunanut allanut toqqaannartumik ingerlatsisinnaaneq. Isumaqarpunga
taanna uani eqqarsaatiginngippallaaripput.
Medi international lufthavnit, tassa
mittarfiit 1.200 meteriusut aallaavigalugit periafissaqalissaagut soorlu
Canadami illoqarfissuarnut toqqaannartumik timmisartukkut
ingerlasinnaalernissamut. Tamassuma Qeqertarsuup Tunuani iluatinnaateqassusia.
Tamanna maani illoqarfiit pingaarnersaanni Nuummi iluatinnassusia. Tamanna
kujataani iluatinnassusia.
Taamaalilluta immaqa aamma avammut
tuniniaaneq uummarsarsinnaassagaluaratsigu. Taamaalillutalu aamma uagut
nunarsuup sinneranut ammassuserput allisarsinnaassagaluaratsigu.
Siunissarlu eqqarsaatigalugu
nammineerlunga upperilluinnarpara siunissami sullissinissamik
isumaqatigiissutit piumasaqaatitallit siunnerfiillu aamma ersarissumik tikkussinilersorlugit
ilusilikkat siunissami atorneqarnerusariaqartut. Tassa inuiaqatigiinni
aningaasat killeqaqisut iluini aningaasaliisarutta aamma anguniagassanik
siunnerfeqartariaqarpugut malersorneqarsinnaasunik.
Aatsaammi taamatut iliornikkut kukkuluttuutit
ataannarunnaarsillugit piffissaatillugu iluarsiniarsinnaanerat
ammaassinnaagatsigu. Taamaattumik resultatkontraktit imaluunniit
servicekontraktit iluamik immersugaasut siunnerfilerlugit
piumasaqaatitalerlugillu atorneqarnissaat siunissami iluamik
ingerlanniartariaqassavagut.
Anguniagassaq tassaassaaq
sapinngisamik ingerlanneqartut iluani nammineq napasinnaanis-saq annerpaaq
piginiarsaralugu ingerlanissaq. Taanna tamanut atuuttariaqarpoq. Taamaattumik
eqqarsaatigilluartariaqarpoq unammilleqatigiissitsineq taanna arlaatigut
killilersortariaqannginnersoq maanna nunatsinni timmisartuussisoqarpugut,
kisianni iserniartarput allallu aamma ilaatigut isereerlutik, kisianni
apeqquterujussuuvoq maannamummi akitigut apparsaatinik iluaqutaasutut tamakkua
takussaannginnerat aallaavigalugu ilumut eqqortumik iliornerluta.
Uanga tassa tunginninngaanniit
oqaatigissavara isumaqataalluinnarpunga eqqarsartunut piusut isumatuumik
inerisaqqinnerisigut pitsaanerpaamik angusaqarsinnaaneq aallaavigalugu
ingerlatsinissaq uani pineqartariaqartoq. Tamanna ersarilluinnartumik
aalajangiusimasamillu tulleriiaarinermik imaqartariaqarpoq.
Neriuppungalu tamanna anersaaralugu
aamma oqaluuserisassat allat qaqinneqarumaartut ilaatigut uanga nammineq
oqaluuserisassatut qaqitara taanna isummersorfigineqarumaartoq. Qujanaq.
Daniel Skifte, ataatsimiinnermik
aqutsisoq, Inatsisartut Siulittaasuat, Atassut.
Per Berthelsenimut qujavugut.
Ingerlariaqqitsinnata eqqaasitsissutigissavara apeqquteqartoq minutsit qulit
sivisunerpaamik tulliani oqalussinnaatitaammat. Partiit allallu oqaaseqartut 10
minutit. Kiisalu allat soorlu partiit avataatigut oqaaseqartut sivisunerpaamik
minutit tallimat.
Mannakkut oqaaseqassaaq
siunnersuuteqartoq.
Ruth Heilmann, Siumut.
Qujanaq. Tassa nuannaarutigaara
angallannikkut nunatsinni ersarissumik aamma eqaallisaasoqarnissaanik
oqallisissiama partiinit tamanit Kattusseqatigiinnit aamma Attaviitsunit
tigulluarneqarnera. Aammalu minnerunngitsumik Naalakkersuisup akissuteqarnermini
taagorneqartut aaqqiiniuteqarnerminilu aamma tunngaviusoq ersarissoq aamma
saqqummiummagu. Taavalu aamma ilaatigut siunissamut ungasinnerusumi
eqqarsaatiminik aamma ersarissaanera tassuunakkut aamma saqqummiullugu.
Erseqqissaatigissavara una eqaallisaanissamik
kissaat tassa martsimi angallannikkut isumasioqatigiinnissaq sioqqullugu
oqaluuserisassanngortitarigakku. Isumaqarpungalu aamma isumasioqatigeereernerup
kingorna aamma uanga nammineq isumasioqatigiinneq sinniisussa-tut ilaallunga
peqataaffigaara.
Aammalu isumaqarlunga isumasioqatigiinneq
aamma soqutinartorujussusoq. Taamaattumik una oqaluuserisassaq isumaqarpunga
pisariaqartoq aamma massakkut Inatsisartuni oqaluuserissallugu. Tassa
angallannikkut Inatsisartuni oqalliseqarnissaq pingaaruteqarpoq. Aamma soorlu
Atassut oqaaseqarnermini taamatut oqarpoq. Pissutsit ullumi atukkagut aamma
uterfigeqqittariaqarpagut pitsaanerusorlu anguniarlugu aamma
alloriartariaqartarluta.
Tamanna pingaaruteqarpoq. Aamma inuit
oqaluuserisaqaat angallannerup akisunerujussua allaat oqaatigineqartarluni
nunarsuarmigooq nunatsinni angalaneq akisunerpaartaasoq. Tamanna Inatsisartuni
ilaasortatut aamma pisussaaffigaarput akisussaaqataaffigaarput iluarsissallugu
sapinngisamik soorlu Naalakkersuisup oqaatsit taakku atugai sapinngisamik
amerlanerusut angalanissaat eqqarsaatigalugu. Kisianni aamma imatut
oqartoqartariaqarsorinarpoq pinngitsoorani taakku amerlanerpaat
eqqarsaatigineqartariaqar-toq. Aamma sapinngisamik akulikinnerpaamik aammalu
sapinngisamik akikinnerpaamik.
Taakku oqaatsit atorneri
isumaqatigilluinnarpakka. Aap, nalunngilarput nunarput isorartoqisoq aammalu
aningaasarpassuit atorlugit angallannikkut aningaasaliisoqartartoq. Taamaallaat
aamma aningasaliinikkut annertuunik angallannikkut aaqqissuussineq
ingerlassinaavarput.
Aamma tamanna Siumumiit
Naalakkersuinikkullu anguniarlugu annertuunik aamma iliuuseqartoqartarpoq.
Soorlu aamma mittarfiit arfineq marluk pilersinneqarnikuupput. Tamanna nassuerutigeqqittariaqarparput.
Immaqa tapiissutip ikilisarneqarsimaneri immaqa naapertuussimanngilaq.
Tassuunakkut annertuumik billitsitigut eqquisoqarpoq akitsuisoqarlunilu.
Tamanna eqqarsaatigeqqittariaqarparput.
Tassa aatsaat innuttaasut imminut qaninnerusumik
ammalu susassareqatigiinneq eqqartortuagarput Inatsisartuni
anguneqarsinnaappat tamanna tamatta atuisullu pisariaqartikkatsigu aamma
isumaqarpunga pilliuteqartarnissaq tamatta akuersaarsinnaagip-put.
Inuit nunatsinni siammarsimapput ilinniagaqartut
angalasariaqartarput ilaqutariit aamma soorunami meeqqatik ilagalugit aammalu
ilatik tikeraarlugit soorlu nalliuttuni allanilu. Aamma ilaatigut tusartarpagut
ukiorpassuit imminnut takunatik aatsaat takusut ilaatigut angallannerup
akisunerujussua tassuunakkut aporfiusarsimasoq nalunngilarput.
Taamaattumik amerlanerpaat
angalanissaannik periarfissiinissaq siunnerfigineqartariaqarpoq.
Minnerunngitsumik takornariaqarnermik inuussutissarsiuteqalernitsinni aamma
tamanna pingaaruteqaqaaq angallannerup eqaatsumik aaqqiiffigineqarnissaa.
Tamaana takornariaqartunik angallassiniartut ingerlatsisullu peqatigalugit
soorlu aamma Kattusseqatigiit tamanna pingaartikkaat. Taakku qanimut
suleqatigalugit aamma angallannikkut aaqqissuussineq pilersaarusioqatigiinnerlu
taanna pisariaqarpoq.
Tamanna aamma neriorsuutigineqarpoq
martsimi isumasioqatigiinnermi. Taakku qanimut suleqatiginerullugit allaat
ukiut affakkaartumik imminnut qanimut tikittarlugit aamma piorsaanissartik
aamma aaqqiiffiginiaraat. Tamanna neriulluarnartutut isigisariaqarpoq.
Aamma martsimi isumasioqatigiinnermi
peqataaffigisatsinni aamma eqqaavarput Inatsisartuninngaaniit Lorithap
eqqaavaa aamma ilaqutariit qitornaqartut akikillisaaviginearnissaat. Soorlu
Tommy Marøp siunnersuutiginikuuvaa aamma aqqaneq marlunnik ukiullit
inersimasutut akiliuteqartarnerat tanna pissusissamisoortuunngitsoq. Tamannalu
tamatta isumaqataaffigigunarparput.
Taamattumik tamakku tamaasa ilaatillugit
Naalakkersuisup ukiamut saqqummiinissamini eqqarsaatigisassatut tigusariaqarai
isumaqarpunga.
Aammalu junimi Vestnordisk Rådemi
angallanneq pillugu eqqartuinissami pisussami massak-kut
immersorneqaatigaarput maannakkut oqallinneq. Taanna assorujussuaq iluarpoq. Taamaattumik
Vestnordisk Rådemi oqallinnissami naatsorsuutigatsigumi Naalakkersuisup
peqataanissaa. Tassa aamma qularnanngitsumik nunat killerni avannarlernilu
saqqummiutassaqassapput aamma uagutsinnut iluatinnateqarsinnaasunik.
Tamakku tamaasa ilanngullugit
ukiamut saqqummiinissaq tassani assorujussuaq pissanganassooq. Aammalu
ataatsimiititaliami eqqaaneqartut ilagivaat Canadamut illuatungitsinnut aamma
angalanerup qanoq periarfissaqartiginera aammalu qanoq aaqqissuunneqarnera
uagut immaqa ilisimanngisarput aamma annertunerusumik paasisaqarfiginissaat
taanna pisariaqartikkipput.
Tassami angalaarneq inuuneruvoq.
Tamatta aamma taanna nalunngilarput taannalu atorluarneqartariaqarluni
inuusuttunit allarpassuarnillu. Taamaattumik periarfissat tassuunak-kut
annertusartuarneqarnissaat pisariaqarpoq.
Otto Steenholdt neriuppunga, manna
oqallinneq mittarfilerngusaannermut sangutinneqassanngitsoq. Tassami uanga
oqallisissiara ullumikkut periarfissarititaasut aallaavigalugit
oqallisissiaavoq aammalu ullumikkut soorlu Per Berthelseni oqarpoq ullumikkut
periarfissaasut aallaavigalugit eqaallisaanissaq pisariaqarpoq. Aamma
isumaqarpunga periarfissaqartoq taamaaliussalluni.
Taamaattumik tassuunakkut
angusaqarluarnissaq assut neriuutigivara. Qujanaq.
Jørgen Wæver-Johansen, Ineqarnermut,
Attaveqarnermut Pilersuinermullu Naalakkersuisoq, Siumut.
Siullermik Inatsisartuni partiit, Kattusseqatigiit attaviitsullu sinnerlugit oqaaseqartut tamaasa qujassuteqarfigerusuppakka. Oqallinneq maani siunnersuutigineqartoq una tunngavigalugu pilersitarsi isumaga naapertorlugu siunnerfigissaarluni ingerlanneqarpoq. Tamanna qujanar-poq.
Oqaaseqartut ataasiakkaarlugit oqaaseqarfigerusuppara imaluunniit akissuteqarfiginiarsarissavakka. Siullermik Siumup oqaaseqartua, Per Rosing-Peterseni, maluginiarpara Naalakkersuisut nalunaarusiornissaat ukiamut ujartorneqartoq isummerfigineqarsinnaasumik aammalu naliliiffigineqarsinnaasumik kiisalu assigiinngitsunik imaqartinneqartumik.
Taanna Naalakkersuisut tungaanninngaaniit suliarisinnaavarput taamaalilluta ukiamut naliliffigineqarsinnaasumik angallanneq pillugu ataatsimut isiginnilluni nalilersuinissaq aamma minnerunngitsumik aningaasaqarnermut inatsisissap suliarineqarnissaanut tunngatillugu atorluarneqarsinnaasumik suliaqarnissarput neriorsuutigissavara.
Maluginiarpara aamma Siumut tungaaninngaaniit mittarfeqarfinnut tapiissutit appartinneqarsimaneri nutaamik isummerfigineqarsinnasutut isigineqartoq soorunami nalilersuilluarnikkut.
Ilumoornerassavara Per Rosing-Petersenip
oqaatigimmagu tapiissutip piiarneqarnikuusut. Ukiumi 2000-imi finanslovimi
ingerlatsinermi kontot marluk assigiinngitsut tapiissutaat ataatsimut
katiteraanni mittarfeqarfinnut tunniunneqarsimasut aningaasat 65,6
millionkroniupput 2001-imi tunniunneqartut taakkunani kontoni katillugit 25
millioniupput. Tassa
appariaat 40 millionit sinnerlugit ukiumiit ukiumut.
Mittarfiit ingerlanneqartussaammata taava
aningaasartuutissat matussutissaat allaminngaaniit aaneqarput. Aaneqarput
ilaasut akiutigisartagaanninngaanniit. Taamaattumik ullumikkut mittarfinnik
atuinerput akeqartipparput.
Nuummiit Maniitsuliartoqarpat Maniitsumut
minneq 225 kroneqarpoq. Narsarsuarmiit helikoptererluni Qaqortup
heliportianukartoqarpat heliportimut minneq ilaasumut ataatsimut 135
kroneqarpoq.
Københavnimiit Kangerlussuarmut minneq 275
kroneqartipparput ilaasumut ataatsimut. Taamattumik tassani
takuneqarsinnaapput soorlu Nuummiit Maniitsumut uterlugulu mittarfiit
atornerinnaannut ilaasup ataatsip minnerpaamik 450 kronet akiliutigisarpai.
Taamaattumik tassaniipput
nalilersugassagut. Aammalu aningaasat atorneqarnissaanut tunngatillugu
pingaarnersiuilerutta tulleriaarileruttalu aamma nalilersugassagut, kisianni
nalunaarusiassamut aamma ilannguneqarsinnaasut ilaattut tikkuartorneqarmat
tamanna neriorsuutigissavara.
Siumumiit mittarfeqarfiit minnerit
sananeqarsimasut ilaasa atorneqannginnerujussui imaluunniit akulikinnerusumik
atorneqartariaqarneri tikkuartorneqarpoq. Taanna assortorneqarsinnaanngilaq.
Mittarfiliortoqarsinnaanngilaq sapaatip akunneranut ataasiaannarluni
marloriaannarluniluunniit atorneqartussanik.
Siunnerfiusariaqarpoq mittarfiliornissaq
atorluarneqartunik innuttaasunillu iluaqutigineqartunik. Taamaattumik
Siumuminngaaniit oqaatigineqartoq una annerusumik unammilleqatigiiffiusumik
sineriatsinni timmisartuussineq allatut ilaasunut iluaqutaanerusumik
aaqqissuussivigineqarsinnaannginnersoq ilanngullugu misissoqquneqarpoq. Aamma Attaviitsumit Per
Berthelsenimit taanna siunnersuutigineqarpoq.
Ilumoorpoq nunatsinni ilaasinnaasut
timmisartuussinermi ima ikitsigaat unammillertoqarujussuarnissaa
takorloorneqarsinnaanani. Taamattumik immaqa ilaasunik kiffartuunneqartussanik
atugassarititaasut pitsaanerusut angusinaagaluarpagut soorlu selskabit arlaat
unammilleqatigiisseriarlugit arlaat toqqarutsigu soorlu assersuutigiinnarlugu
ilissi maannakkut ukiuni arfineq marlunni tulliuttuni kisimiillusi
Maniitsumiit Maniitsumullu timmisartuussineq isumagisinnaavarsi.
Taava immaqa Maniitsumut
kiffaartuussineq pitsaanerulersinneqarsinnaavoq landskarsimut
akeqanngikkaluartumik, kisiannili immikkut timmisartuutileqatigiinnut
aalajangersimasumik pisinnaatitaaffimmik tunniussinikkut.
Taanna aamma ukiamut
nalilersorneqarsinnaasunut ilanngunneqarsinnaasutut isigaara.
Ataqatigiinnerusumik angallattoqarnissaa tassa imaatigut silaannakkullu.
Taanna siunnerfigineqaqquneqarpoq aammalu tassuunakkut Naalakkersuisut qanoq
siunnerfeqarnisaat ilanngullugu nalunaarusiami kissaatigineqarluni.
Tassami taanna aamma
ilumoortuunerartariaqarpara. Taamaattumik aamma ilaatigut Inatsisartut
siornatigut piumasarisartagaat tassalu angallannermi ataqatigiinnerusumik
ingerlatsisoqarnissaa anguniarlugu aammalu ataatsimiititaliamit piumasarineqartarnerat
tunngavigalugu isumasioqatigiinneq matumani eqqartorneqartup kinguninngua
nunatsinni angallassinermik suliaqartut tamarmik angallassinermik
ataqatigiinnersumik pilersaarusiortalernissaq siunissami anguniarlugu
tunngavilerniarlugulu ataatsimiitinneqarput.
Tassani Grønlandsfly, Air Alfa, SAS,
Artic Umiaq Line, Greenland Tourism - angallannermut attuumassuteqartut
tamarmik mittarfeqarfiit allallu peqataatinneqarput. Tassuunatigut
oqaloqatigiissutiginiarlugu qanoq pitsaanerpaamik siunissami ataqatigiinnerusumik
kiffartuussineq tunniussinnaanerlugu.
Siumuminngaaniit aamma
ujartorneqartoq Artic Umiaq Linemut tunngatillugu ilaatigut umiarsuit
sivisuumik uninngaannartartut maani takuneqarsinnasut ilaatigut ukiuunerani.
Taakku qanoq pillugit siunnersuuteqartoqarniarnersoq Naalakkersuisut
tungaaninngaanniit ujartorneqarluni aammalu nalunaarusiassamut ukiamut
ilanngunneqartariaqartutut oqaatigineqarluni
***atortorissaarutinik ajutoorneqa,
piaarnerpaamik iluarsineqassaaq
.... imaqarniliaq suliarineqartoq
naammassineqariaruni aamma agguaanneqarumaarpoq.
Maluginiarpara aamma Atassutip
tungaaninngaanniit kissaatigineqartoq ingerlaaseq ullumikkut piusoq allatut
eqqarsarluni nutarterneqartariaqartoq, taamaattumillu aamma tassuunatigut
ujartorneqarluni Naalakkersuisut qanoq isummersorsinnaanissaat. Taamaattumik
taanna oqariartuut paasivara aamma Atassutikkormiut isumaqatigigaat ukiaru
nalunaarusiassamik saqqummiussisoqarnissaa nutaamik allatut eqqarsarluni
qanoq ingerlariaqqittoqarsinnaaneranut
tunngatillugu.
Narsarsuup matuneqarnissaa
Naalakkersuisut siunniussimasaattut oqaatigineqarpoq. Taanna
eqqoqqissaanngilaq. Naalakkersuisut suli taamatut isumminngillat, kisiannili
isumasioqatigiinnermi peqataasut tassa inerniliinerminni isumaqatigiissutigisaat.
Taamaattumik Naalakkersuisut
isumminnginnerminni erseqqissarpaat soorunami inuiaqatigiit ataatsimut
aningaasaqarnerput taanna nalilersorluareerlugu aatsaat isummertoqarumaartoq,
kisianni avaqqussinnaanngisarput nalilersuiffigissallugu tassaavoq
mittarfeqarfiup Narsarsuarmi ingerlanneqarnera minnerpaamik ukiumut 6
million koruuninik
amigartooruteqarfiuvoq, 6 millionit ukiunik qulinik gangeraanni, ukiut qulit
ingerlanerini inuiaqatigiit mittarfeqarfiit aqqutigalugit amigaartoorutaat
tassani 60 million koruuniupput.
Kiffartuussinermut isumaqatigiissut
kujataani 20 million koruunit sinnerlugit naleqarpoq, kisianni
kiffartuussinermut taassuminnga atuisut amerlanerpaartaat imaluunniit affai
sinnerlugit Qaqortumukartuupput. Taamaattumik isumaqatigiissut taanna 20
million koruunit sinnerlugit naleqartoq Qaqortumut nuussinerup kingunerisaanik
affaannanngortinneqarsinnaappalluunniit, taava ukiumut 10 millionit
sipaarneqartalissapput. 10 millionit ukiunik qulinik gangeraanni, taava 100 millionininngoriasaarput.
Taamatullu soorunami
nalilersuinissat allarpassuit aamma pisariaqarpoq aalajangiinnginnermi,
taamaattumik aamma ukiamut nalunaarusiassami inuiaqatigiit aningaasaqarnerat ataatsimut
isigalugu iluaqutaasinnaanersoq imaluunniit isumassarsiapalaanersoq
ilanngullugu nalilersorneqartussanut ilaatikkusuppavut.
Soorunami ilumoorpoq Godmand
Rasmussenip oqarneratuut sanaartornermi tulleriiaarineq qanoq ittoq perusunneripput
aamma ilanngullugu uterfigisussaassavarput. Imaassinnavoq Inatsisartut tamarmik
sanaartornerit allat unitsillugit AAtuarfitsialak@
kisiat sammerusukkaat, taanna Inatsisartut piginnaatitaaffigivaat, kisianni
aamma imaassinnaavoq inuiaqatigiinnut ungasinnerulaartoq aamma isigalugu
imminut akilersinnaasutut inissikkumaartut taakkua isumassarsiatut pitsaasutut
isigalugit Inatsisartut suliareqqinneqarnissaat kissaatigigaat.
Maluginiarpara Atassumminngaanniit
Ilulissat tallineqarnissaa isumatuutut isigineqartoq, aammalu
nalilersuilluarnissaq taamatut aalajanginnginnermi pisariaqartutut
isigineqartoq. Angallannermut isumatuumik nutaamik aaqqiissuteqarnissaq
Atassutip ujartorpa. Naalakkersuisuni taanna isumaqatigaarput, taamaattumik
aamma qujarupparput Atassut suleqataajumalluni nalunaartuteqarnera.
Inuit Ataqatigiit sinnerlugit Ole
Lyngep saqqummiussaa isumaqatiginartorpassuarnik aamma imaqarpoq.
Ataqatigiissaarineq pitsaanerusoq pisariaqartinneqartoq taakkartorneqarpoq.
Isumasioqatigiinnerup kinguninngua
angalatitseqatigiiffiit ataqatigiissaarineq pitsaanerusoq anguniarlugu
ataatsimiissimanerat eqqaavara, tassanilu ataatsimiinnerminni taamatut
naapisinneqarnertik iluarisimaangaaramikku, uagut siunnerfigigaluaratsigu
ukiumut ataasiaannarlutik taamaalliortarnissaat, kisiannili namminneq
siunnersuutigivaat ukiumut Naalakkersuisuisoqarfiup aaqqissuussaanik
marloriarlutik taamatut ataqatigiissaarinerunissaq siunertaralugu naapeqatigiisinneqartarnissartik.
Ole Lyngep oqaatigimmagu
pingaarnersiunermut tunngavissat pitsaanerusut aalajangiinnginnermi
pisariaqartinneqartut kissaatigimmagit isumaqatigilluinnarpara, taamaattumik
aamma Inuit Ataqatigiit uani takusinnaavara erseqqinnerusunik nalunaarusiamik
ukiakkut ataatsimiinnermi 2002-mi Inatsisartunut Naalakkersuisut
saqqummiussaqarnissaat taanna takusinnaavara.
Inuit Ataqatigiit aamma eqqartorpaat
Nunani Avannarlerni Killerni angallanneq pillugu isumsioqatigiinnissaq aasaru
junimi ingerlanneqartussaq. Tassunga tunngatillugu oqaluttuarisinnaavara
isumasioqatigiinnermi maani martsimi ingerlanneqartumi aamma Savalimmiormiut
Islandermiullu aamma peqataatinneqarmata, tassanilu
timmisartuutileqatigiiffiit nunani taakkunaneersut kiisalu maani Nunatsinni
timmisartuutileqatigiiffik isumqatigiipput siunissami pinngitsooratit
annertunerusumik suleqatigiittariaqarlutik, aammalu oqallinnitik
ingerlateqqinniarlugit Nunat Avannarliit Killiit ataatsimeersuarnissaannut
Torshavnimi pisussami, taamaattumik tassani angusaqartoqarsinnaanera aamma Naalakkersuisut
tungaanninngaanniit neriuutigeqaarput.
Erseqqissalaassavara una
nalunaarusiaq ukiaq agguaanneqartoq oqallissaarutaammat, taamaattik
Keflavikkimut tunngasoq soorunami oqallissaarutaavoq. Aamma taamani
saqqummiunneqartoq aamma qujanartumik oqallinnermi nalilersuinernillu
annertuunik nassataqartitsivoq taamatut oqallissaaruteqarneq, taannalu
Naalakkersuisuniit nuannaarutigaarput.
Grønalndsflymut
tusarniaasimannginneq taanna oqaatigineqarpoq, tassa imaakkami oqallissaaruterput
naligiimmit tamanut agguaanneqarpoq, Grønlandsflylu tassa oktoberimi
agguaaneqarmalli isumasioqatigiinnerup tungaanut qaammatinik tallimanik
periarfissaqarnikuuvoq akissuteqarnissaminut, taamaattumik tassani
periarfissaqarluarnikuupput.
Maluginiarpara Kangerlussuup nunatta
isaaviatut atorneqarnissaa Inuit Ataqatigiit isumaqatigigaa, taamatuttaaq Nuup
tallilerneqarnissaa avaqqunneqarsinnaanngitsutut Inuit Ataqatigiit
tungaaninngaanniit isigineqartoq. Taavalu sukumiinerusumik misissuinerit
pereerpata Ilulissakkut, Qaqortukkut Narsarsuakkut tamakkua
uterfigineqarnissaat kissaatigineqartoq.
Inuit Ataqatigiinninngaanniit
pingaarutilik ataaseq tikkuartorneqarpoq, tassalu timmisartut siunissami
suulluunniit atorneqartussaagaluarnersut nalugaluarlutigu taamaattoq
eqqumaffiginiarneqartussaasoq timmisartut taakkua toqqarneqartussaassasut
tassaammata aamma isumatusaatumik aningaasalersuiffigineqartut,
imaassanngimmat timmisartut pisoqalinngujoortut imaluunniit pisoqasaat
nioqqutissiarineqarneri unitsinneqalersut, taakkua toqqarneqassaut, kisiannili
ukiuni tulliuttuni 20-30-ni taakkua atorneqarsinnaasut toqqarneqartariaqartut.
Taamaattumik aamma tassani soorunami eqqumaniartoqartariaqarpoq.
Nuannaarutigaara Inuit Ataqatigiit
tungaaninngaanniit isumaqatigineqarmat sumiiffiit ataasiakkaat
naalakkersuinikkut anguniagaat kisiisa tunngavigalugit aalajangiinerit
pisissannginneranik siunniussaqarnerput taanna isumaqatiginartinneqarmat.
Taava aamma maluginiarpara nalunaarusiassami
tassani Inuit Ataqatigiinninngaanniit ilannguteqquneqartut ukiuni siunissami
tulliuttuni mittarfiit minnerusut illoqarfinni minninerusuni qanoq
takorloorneqarsinnaanersut inerisarneqarnissaat, ilaatigut ujaraakkanik
qallikkanik mittarfittallit tassani eqqarsaatigineqarlutik.
Aamma Inuit Ataqatigiinninngaanniit
angallanneq imaatigut qanoq ingerlanneqarnissaa ilanngullugu nalunaarusiassami
ilanngunneqartussatut tikkuartorneqarpoq, minnerunngitsumillu aamma
pilersuineq, minnerunngitsumik isorliunerusunut nunaqarfinnullu, taanna
pitsaanersumik aaqqissuunneqarnissaa siunissami kissaatigineqarluni.
Kattusseqatigiinniit Mogens Kleistip
saqqummiussaani akit annertuallaarneri taakkua Naalakkersuisut
tungaaninngaanniit qanoq isumaqarfigineqarneri ujartorneqarpoq. Tassunga
tunngatillugu, aningaasaqarnermut inatsit 2003-mut suliarinissaanut
tunngatilllugu Naalakkersuisut pisussaapput siunnersuusiussallutik
Inatsisartunut, taamaattumik kissaatigineqartutut malugisinnaavara aamma
Naalakkersuisut taamatut pingaarnersiunerminni sammisaassaannut
ilaatinneqartariaqarmata mittarfeqarfinnut tapiissutit.
Kattusseqatigiinniit aamma
taakkartorneqarpoq illoqarfiit minnerusut arlallit Maniitsuinnaanngitsoq,
kisiannili aamma Paamiukkutut ittut angallannikkut ajornartorsiuteqarmata.
Taanna soorunami ilumoortortaqarpoq, kisianni aamma puigorneqartariaqanngilaq
januaarip aallaqqaataaninngaanniit Paamiut pingasoriarluni sapaatip
akunneranut tikinneqartalermat, ilaatigut aamma tassani kommunalbestyrelsi
isumaqatigiissuteqarfigalugu, tassa marloriarluni sapaatip akunneranut
tikinneqartalermat.
Kujataani angallassinermut
tunngatillugu ajornartorsiutaasimasut eqqartorneqarput Kattusseqatigiinninngaanniit
oqaatigineqarlunilu soorlusooq tusarnaartoqanngitsoq, kisianni tusarnaartoqarpoq
aamma siunissami pitsaanersusumik ataqatigiinnerusumillu ingerlatsisoqarnissaa
taanna siunniunneqartariaqarpoq.
Apeqqutigineqarpoq aamma
Namminersornerullutik Oqartussat suliffeqarfiutaat assigiinngitsut qanoq
akunnerminni suleqatigiittarnersut. Tassunga tunngatillugu oqaatigerusuppara
suleqatigiinneq annertusiartuaarpoq aamma minnerunngitsumik massakkut
Islandimut attaveqaqqilernissap, taanna qangalili sulissutigineqartup,
massakkut Islandermiut suleqatigilluinnarlugit naatsorsuutigilluinnarparput
2003-mi kujataani angallassisarnerup toqqaannartumik Islandiminngaanniit
aallartisaqqinneqarnissaa. Tassani aamma kujataamioqatigiit sumiiffinnut
tikinnermi suut pilerinartutut aaqqissuuneqarsinnaasut pillugit ataatsimoorussamik
suleqatigiiffiliornikuupput imaluunniit piginneqatigiiffiliornikuupput.
Danmakiliarneq sooruna taama
akisutigisoq? Mogens Kleisti
ilaatigut taamatut apeqquteqarpoq. Tassunga tunngatillugu
ilisimatitsissutigisinnaavara, assersuutigigutsigu Danmarkimiit Savalimmiunut
kilometerimut 1,71 koruuneqarpoq. Kalaallit Nunaannut Danmarkimiit
Kangerlussuarmut 1,21 koruuneqarpoq kilometerimut. Danmarkimiit Islandimut
2,00 koruuni sinneqarpoq. Taamaattumik ajornatorsiut uani uaniinngilaq
Kangerlussuarmiik Danmarkip tungaanut, taanna akisugineqarsinnaanngilaq allanut
naleqqiullugu, kisianni Nunatta iluaniuna akigitinneqartut taakkua
qaffasinnerujussui aamma annertuumik pissutaaqataasut.
Apeqqutigineqarpoq Narsarsuarmut
tunngatillugu suna ajornartorsiutaammat. Ilaatigut oqaatigisinnaavara
(regulariteti) tikikkuminassuseq ilanngullugu aamma ajornartorsiutaammat. Timmisartorsuaq
Kunuunnguaq 14-eriarluni kujataanukarpoq ukioq manna Danmrkiminngaanniit,
arfineq-marloriarluni kinguaattoorpoq silamik pissuteqarluni kujataani.
Taamaattumik tassaniippoq aamma ajornartorsiutit taavalu soorunami
inuiaqatigiit ataatsimut aningaasaqarnerat taanna isigalugu. Aamma uanga
isumaqatigaara Mogens Kleisti oqarmat immaqa unilaarluni naliliinissaq
pisariaqarsinnaasoq, ajunngilaq taava naliliissaagut nalunaarusiornikkut
ukiamut saqqummiussatsinnik taanna taava erseqqissumik
isummersorfigineqarsinnaasumik aalajangiivigineqarsinnaasumillu
ilusilersorneqassaaq.
Otto Steenholdtiminngaanniit tunngatillugu
Aasiannut assigisaannullu mittarfinnut takinerusariaqartunut tunngatillugu
saqqummiussaanut tunngatillugu oqaatigerusuppara akikinneq sunaanersoq aamma
nalilersugassaammat. Imaassinnaavoq sanaartorneqarnera akikitsoq, kisianni
tassani sanaeqarnea tunngavigalugu angalasut amerlanerpaartaat
kiffartuunneqarnerat ajorseriaateqarpat, aammalu taakkununnga angalaneq
akitsorpat, taava soorunami apeqqutaavoq ilumut taanna akikinnerpaasimanersoq.
Taamaattuminguna Otto Steenholdtip siunnerfigisaa isumaqatigaara
imaattariaqarmat inuiaqatigiit aningaasaqarnerput ataatsimut nalilerlugu atagu
takoriartigu suut tallineqarnissaat suullu nutaamik pilersinnissaat imminut
akilersinnaanersoq. Taava taakkua saqqummiunneqareerpata kisitsisai, taakku
tunngavigalugit naliliilluta, taamaaliornissarpullu tassa
siunnerfigitikkusupparput soorlu siunnersuutigineqartoq ukiamut.
Kujataani mittarfik aammalu
kujataamioqatigiit kommunit peqatigiiffiata qanoq oqariartuuteqarnera aamma
ilisimaaraarput soorunami, aammalu qanoq isumaqatigiissuteqarsimanersut taakkua
eqqaamallugit, kisianni taakkua isumaqatigiissutaat nalilersikkatsigit
aningaasanngorlugit milliardit sinneqarami, aqquserngit mittarfiillu taakkua
tikkuartorsimasaat eqqarsaatigalugit, taamaattumik allatulaaq isummernissamut
siunnerfeqarnissarput pisariaqassannguatsiarpoq.
Reykjavikkimut tunngatillugu tassa
oqaatigeqqiinnassavara taanna oqallissaarutaanikuummat, oqallinnerlu
tunngavigalugu erseqqissumik tamanit isumaqatigineqarluni, tassa
Kangerlussuaq Nunatta isaaviatut
aallaaviusariaqarpoq. Paasivara Otto Steenholdtip kissaatigigaa mittarfiit
pioreersut aallaavigalugit tulleriiaarisoqassarnissaa.
Per Berthelsenip saqqummiussaqarnermini
siunnersuutini pioreersut atorluarneqarnerunissaannik oqariartuuteqarnini
taanna oqaatigaa aamma isumaqatiginarpoq, taamaattumik aamma uagut
qilanaarpugut tassuunatigut qanoq Inatsisartut eqqartuiumaarnissaat uumap
qaammatip naalernerani. Maluginiarpara aamma Per Bethelsenip kissaatigigaa
mittarfeqarfinnut tapiissutaasimasut taakkua naliliivigineqaqqinnissaat
nutaamik. Aamma pingaartumik taakua ilaasunut akigitinneqartut siuliani
taasakka tunngavigalugit isumaqarpunga pissutissaqarluarluta
naliliinissatsinnut.
Taava Per Berthelsenip aamma
siunnersuutigaa soorlu Siumup siunnersuutigigaa ammasumik taanna
unammilleqatigiinneq nalileqqinneqartariaqartoq nutaamik, aammalu allatut
ilaasunut iluaqutaanersumik aaqqissuussisoqarsinnaannginnersoq taanna
tikittariaqaleripput, immaqa selskabi ataasiinnaq koncessionilerlugu
Maniitsumut Paamiunulluunniit.
Aamma Per Berthelsenip kissaatigivaa
allakkat assartugassallu assigiinngitsut taamatut unammissutigineqarneri
immaqalu inuiaqatigiit aningaasaqarnerat ataatsimut isumatusaarnerunngitsoq
taanna qanoq iliuuseqarfigineqartariaqartoq. Oqaatigissavara tasa Air Alphakkut
allakkanik Post Greenland sinnerlugu angallasisuusut Grønlandsflyllu
oqaloqatigiinnerminni punkti taannarpiaq aamma ilanngunniarmassuk. Taamaattumik
oqaloqatigiinnerni taakkunani angusaqarluartoqarnissaa uaguttaaq
Naalakkersuisuni kissaatigaarput.
Eqqaassutissanik pilersitsinani
pioreersunik inerisaanissaq taanna maluginiarpara aamma Per Berthelsinnip
kissaatigigaa taavalu isumaqataalluni Nuummi Ilulissanilu 1200 meterimut
talliliisoqarnissaanut.
Kisianni avaqqunneqarsinnaanngilaq
ilaatigut aningaasarsiorfiusinnaasut inuiaqatigiit aningasaqarnerannut
nalilersuinissatsinni ilanngitissallugit soorlu Per Berthelsenni oqartoq.
Islandimi qanittukkut paasiniaanitsinni
paasivarput Islandimi ukiut tallimat arfinillit matuma siorna aalisakkat
nillataartitat avammut timmisartukkut nioqqutigineqarneri suunngitsuararsuusimasoq,
kisiannili ukioq kingulleq Keflavikkiminngaanniit Europamut Amerikkamullu
aalisakkat qeritinneqaratik nillataartillugit angallanneqarsimasut 13.000
tonsiusut. Tassa
suunngitsuaqqamiit 13.000 tonsinut. Taamaattumik tassani
periarfissaqartoqarnera aamma Nunatsinnut soqutiginarpoq pingaartumik
paasillugu Pangnertuumi Canadami uagut qaleralinniarnermik ilinniartitatsinnut
tunngatillugu aamma qalerallit pisaatik tamaasa Bostonimut assartortarpaat
timmisartukkut. Pangnertoormiut pisinnaappata sooq uagut pisinnaassanngilagut?
Taamaattumik tamakkua aamma aningaasatigut nalilersuinitsinni
ilaatittariaqarpavut sumiiffinnut ataasiakkaanut qanoq kinguneqarsinnaaneri.
Maluginiarpara Per Berthelsenip
aamma siunissami kiffartuussinermi isumaqatigiissuteqarfinnut tunngatillugu
piumasaqaatit suli ersarinnerusut aammalu immaqa amerlanerusut taamanikkornissaanut
nalilersuinissamut aamma ilaatinneqarnissaat.
Naggataatigut oqaatigilara
paasilluarsinnaavara siunnersuuteqartoq nuannaarutigimmagu taamatut
oqallittoqarnera. Uagut Naalakkersuisuniit aamma nuannaarutigaarput taama
siunnerfeqarluartigisumik Inatsisartuni oqaaseqartut saqqummiussqarmata.
Qujanaq.
Per Rosing-Petersen, Siumut:
Qujanaq. Ukua Naalakkersuisup
oqaaseqartut allat annertungaatsiartumik oqaaseqarfigereermagit aamma taakkua oqaaseqarfigineqarneri
tunngaviatigut isumaqatigikannerakkit annertunerusumik tikissanngilakka.
Illuatungaatigullu ukua Naalakkersuisup oqaaseqaatai ilaatigut naatsunnguamik
oqaaseqarfigeqqilaarusuppakka.
Tassa ilumoorpoq Siumut
tungaaninngaanniit oqariartuuteqaratta timmisartut mittarfii pioreersut suli atorluarnerusariaqarpavut. Ilaatigut
taamannak oqariartuuteqarnitsinni nalunnginneqartutuut nunarput isorartuvoq
aammalu illoqarfiit assigiinngitsut toqqammavigalugit sanaartortoqarnikuusoq,
kisiannili inuttalersornermikkut, tassa sillimaniarnermut tunngatillugu
inuttalersornermikkut, tamarmik assigiissungajammik inuttaqartinneqartut.
Tassa ilaatigut mittarfiit marloriaannarlutik sapaatip akunneranut
tikinneqartartut inuppassuarnik sulisoqartarput ilaatigullu immaqa ulloq
naavillugu kaffisorujoorlutik utaqqerujoortarput susoqarnissaanut. Tamakkua
naapertuutinngillat ilaatigullu aamma qularnanngilluinnarpoq tamakkua tamaasa
misissorluaraanni milliunit qulikkaat ataasiinnaanngitsut
ileqqaarutaasinnaangaluarput tassuunartaatigut. Tamakkua misissorluarlugit
atorluaanikkut ingerlanneqarnissaat kaammattuutigisariaqarpoq.
Ukiut 15-16-it missaani
timmisartortartutut sulisimaninni ilaatigut aamma nunat allat tikittarsimavakka.
Europami timmisartortarnikkuuvunga, Skandinaviap avannaani timmisartortarnikuuvunga.
mittarfiit tikittarnikuuakka Nunatsinni assingusorujussuit, kisianni ilaatigut
alutorilluinnarlugit tupigisarpakka soorlu Sverigimi timmisartortartutut
sulillunga illoqarfeerannguaq .... assiinngitsutut 3.500-it missaannik inullit
tikittarpakka Nunatsinnitut AFIS-inik inuttallit kisianni mittarfinni
sulisorisarpaat inuit pingasut. Inuit pingasut ulloq naallugu ulapittarput
arfinerninngaanniit unnukkut arfineq-pingasut tungaanut paarlakaallutik
assigiinngitsutigut. Tamakkua ila alutornassusaat. Maani sineriammi
Uummannakkunni Upernavikkunni ilaa akuttusoorujussuarmik mittarfiit
tikinneqartartut tikikkutsigit, naluara qanoq amerlatigisut sulisarnersut,
kisianni ilaatigulluunniit immaqa qaleriiaatiinnangajavittarput.Tamakkua
eqqarsaatissatut ilaasriaqarput.
Aamma Kalaallit Nunatsinni
timmisartortarnikuuvunga ukiorpaalussuarni ilaatigut nammineq
timmisartuuteqarlunga. Aamma kujataa akulikitsuaqqamik tikittarnikuuvara. Aamma
Naalakkesuisup oqarneratut regulariteti pingaaruteqartorujussuuvoq.
Narsarsuarmi ukioq manna 14-riarluni orninneqarsimasoq arfineq-marloriaannarluni
iluatsissimasoq eqqaavaa. Kisianni aamma uanga assigiinngitsut
misilittagaqarfigaakka uanilu aamma Qaqortup eqqaani mittarfiliorfissaq aamma
timmisartuussiffigisarnikuullugu, tamakkualu aamma eqqaamalluarlugit aamma
tassani regulariteti misissorluarnissaa kaammattuutigissvara, ilaatigummi aamma
Narsarsuarminngaanniit ajornerusinnaasutut nalilersorneqarsinnaammat.
Akissuteqaaterni eqqaavatit
qupperneq siullermi pingasoriarlutit taavatit sapinngisamik amerlanerpaamik,
sapinngisamik akulikinnerpaamik sapinngisamillu akikinnerpaamik. Taakkua
isumaqataanaraluartut kaammattorusissavakkit siulleq sapinngisamiunani
pinngitsoorani amerlanerpaanut.pisariaqartumik taanna innersuukkusukkaluarpara,
pinngitsoorani tassa amerlanerpaanut. Sinneri tassa sapinngisamik
imaattoraluarpata ajunngilaq.
Narsarsuarmut uteqqilaassaguma ukua
qupperneq pingajuani taakkartukkatit Narsarsuarmi annertuumik
iluarsaassisoqartussaaneranik eqqartukkatit imaassinnaavoq atorfilittavit
assigiinngitsut paasissutissat naammanngitsut pigigai, kisianni siorna aamma
isumasioqatigiinnermi Narsarsuarmi aamma ataatsimiititaliap peataaffigisaanik
misissuisimanerit assigiinngitsut saqqummiunneqarput, uanilu taakkua aamma
milliuunit untritilinnik sipaarneqarsinnaaneri uanga takujuminaatsilaarakkit
kaammattorusussavakkit misissorlualaaqqullugit ilatigut milliuunit
marlussuinnaat ilaatigit taakkartorneqarmat taavalu ukiut tulliuttut 20-t ukiut
tamaasa 2 mio.-nit missaanik atorneqarsinnaaneri taakkua aamma misissuinermi
ingeniøret misissorsimasaanni takussutissaallutik.
Tamakkua ilumoorami
pingaaruteqarluinnarpoq aningaasat tulleriiaarinerani silatusaarnermik tamakkua
ingerlanneqartussaammata taakkua kaammattuutit ilinnut apuukkusuppakka aamma.
Taavalu aamma uani quppernit pingajuanni
aamma eqqartukkat ilumoorpoq Dash 7-it qangarsuarli 80-ikkunnili
sanaartorneqarunnaarnikuupput taakkualu manna tikillugu atorneqarlutik.
Isumasioqatigiittarnerni arlalippassuarni aamma angallannernut tunngasuni
peqataasarnikuuvunga, tassanilu aamma nalunngilara aamma Grønlandsfly
peqataasarnikusoq aammalu ukua mittarfiit sanaartulinnginneranni aamma
sanaartornerisa nalaanni aamma Grønlandsfly peqatasarnikuuvoq, tassanilu aamma
qangalili nalunnginnikuuvaat Dash 7-it sanaartorneqarunnaarnikuusut.
Grønlandsflyp tungaaninngaanniit arlaleriarluta oqariartorfigitittarnikuuvugut,
taamaattumik una Grønlandsflymut nutaajunngilaq, ukua pilersaarutit
nutaajunngillat, ksiannili suna pinerpoq manna tikillugu immaqa
nipangersimaarutigisimaneraat taanna ajuusaarnartutut soruunami
oqaatigineqarsinnaavoq.
Taakkua timmisartut anginerusunik
taarsersortussanngorlugit qulakkeerlugu pinissaa kisiannertaqalaarsinnaavoq,
tassami sapinngisamik aamma akulikinnerpaamik soorlu qupperneq siullermi oqariartuuteqartutit
sapinngisamik akulikinnerpaamik siunertaqassagutta illoqarfinnut mikinerulartunut
timmisartoq 70-80-it angullugit ilaasoqarsinnaasoq immaqa
naapertuunnerpaarsuunngilaq, taava immaqa sapinngisamik akulikinnerpaamik
pinissaa atornarsilissaaq imminut napatissinnaajunnaassaaq. Tamakkua
eqqarsaatigalugit aamma naleqqunnerusut soorlu aamma siorna oqallinnermi
mittarfeqarfiit pisrotaata oqaatigigaa mittarfiit pioreersut
atorluarniassagutsigit aamma immaqa timmisartut mikinerusut akulikinnerusumik
naapertuunnerusumillu kiffartuussisinnaasut atorluarsinnaagaluarpavut,
tamannami aamma misissorneqareernikuuvoq aamma uppernarsineqareernikuulluni
tamakkua ajornanngivissumik aaqqiiffigineqarsinnaasut.
Tassani ilaatigut eqqarsaatigaara
Donair 228-it taakkua suli sanaartorneqarput, aamma misilittagaqarluarfigineqarput
nunani allani Svalbardimi. Uagut Nunatsinni Upernaviup Qaanaallu
avannarpasitsigisut ittuni misilittagaqarfigineqarluarput, taakkualu
timmisartut uanga nammineerlugu misilittakkakka toqqammavigalugit Nunatsinnut
naleqqulluinnartutut isigisariaqarpakka. Taakkua mittarfiit mikinerusut
sinerissatsinni illoqarfinni assigiinngitsuniittut ajornanngiivissumik aammalu
kiffartuussinermut ajortitsiivinngissumik tamakkua aaqqiissutaasinnaaneri soorunami
nalilersuinermi ilaajumaartussat qularinngilluinnarpara.
Taamatut oqaaseqarallarlunga
oqallinneq aamma uanga taamatut ittoq qujassuteqarfigerusuppara, tassami una
siuneqartussaammat aamma isummat assigiinngitsut aniatinneqarneratigut aamma
Naalakkersuisut ukiamut saqqummiussinissaminnik annertunerusumik aamma
tunngavissaqarluarnerullutillu saqqummiisinnaassammata. Qujanaq.
Gudmand Rasmussen, Atassut.
Uanga takisuuliornianngailanga. Siullermik
nuannaarutigivara assut taama sukumiitigisoq pingaaruteqartigisoq Inatsisartuni
ilaasortap Ruth Heilmannip taanna oqallisissiaq saqqummiummagu. Aamma
Naalakkersuisoq qutsavigissavara uani saqqummiussagut amerlanertigut isumaqataaffigimmagit
aamma taamaattussarpiaavoq.
Siullermik uanga
oqaatiginngitsoorusunngilara una 1999-imili Inatsisartunut iserama Angallannermi
Ataatsimiititaliami issianinni pissutsit taakkua uteqattaartuakkat qatsuppakka,
taamaattumik Ruth Heilmannip una saqqummiussaa assut soqutiginaateqarpoq
ugguuna uninngavugut - kisaqqalluta uninngavugut, kisianni qaputtuarluta,
motori aallartikkumanagu ingerlavugut kisaqqalluta aallarumanatali.
Periarfissanik ullumikkut ujaasinissamut
naammalerpoq piffissaq, nukippassuit uani atukkavut amerlavallaaqaat.
Nassuerutigisariaqarporli pinngitsuuilluinnarlugu tamatta immaqa pugiortoortagarput.
Uani Naalakkersuisut nalunaarusiaanni tupinnanngilaq 50%-i sinnerlugu ilaatigut
tapiissutitigut atuisitsisoqartarsimanera, tassni suna aallaaviuva? Tamatta
immaqa paasineq ajugarpoq uaniippoq Kalaallit Nuaat inuttunngilaq kisianni
sineriassuarput angeqaaq. Inuit suliffillit aasakkut feeriap atornerata nalaani
angallanneq annertusaqaaq, kisianni inuit suliffimminnut uteraangata
kikkuulersarpat uninngalertartut? Ikittunnguupput inuit uninngalertartut,
taamaattumik tupinnanngilaq pisortat tapiissutaat uani annertuumik
atorneqartarsimappata, Nunatta inukissusiata taanna nammineerluni
pituttuiffigereermagu.
Nunarput inuttoorsuugaluarpat ullumikkut
immaqa angallanneq allarluinnaqqeqqissaaq atorsinnaassagaluarput. Tassa
maannakkut nassuerutigisavarput ullut nutaat tikissimavavut atuisut
piumasaqaataat sakkortusigaluttuinnarfii, aamma taanna immini tupinnanngilaq
aamma taamaatussaaavoq.
Kisiannili ersarissumik
nassuiaatigineqarsinnaasuugaluarpat aamma inuiaqatigiit tamatta
paasisinaasuugutsigu ullumi piumasaqaatigut aamma killeqassusia qanoq
ittuunera, aamma tamaatta assigiimmik paasisinnaasuugutsigu aamma
ajussanngikkaluaqaaq.
Nalunngilarput aningaasat tungaatigut
akimmiffeqartugut annertuumik. Arlalitsigut Nunatta ineriartornerani
taamaattunik uninngaveqarpugut, kisiannili atuisutuut piumsaqartuarpugut
nalunngikkaluarlugu taamaaliornerput inuiaqatigiinnut
akisoorujussuanngorsinnaasoq, kisianni nakkaannarumata suli aamma aammalu
taamatut piumasaqartuarpugut. Taanna periaaseq isumaqarpunga eqqoqqissaarlunilu
naleqqukkunnaartoq.
Una oqaatigineqartoq Naalakkersuisup
aatsaangnuaq oqaatigisaa, tassa timmisartut pilersinneqarnerat
mittarfeqarnermut aalisakkanut attuumassuteqarluni, tassa taannarpiaagaluarpoq
siunertaasoq mittarfiit taamanikkut atulertinniagaammata siunniunneqartoq,
kisianni kingusinnerusukkut paasivarput EU-p piumasaqaatai taanna
pitsaanerpaamiinngitsoq.
Uanga una pingaartinnerpaasarput Atassumminngaanniit
oqaatigisariaqarpara. Mittarfinnik tallilerineq sumiikkaluaruniluunniit
apeqqutaanngilaq apeqqutaasorli aana: sumiikkuni inuiaqatigiinnut aningaasat
tunngaatigut iluqutaanerpaassava? Soorunami uani Ilulissat uangut uniffigigatsigut
pissutigut assigiinngillat. Ullumikkut Ilulissaninngaanniit ukioq kaajallallugu
aalisakkat aamma assartorneqarsinnaanerat iluatsissinnaappat akitigut aamma
inuiaqatigiit ilutsinni tamatsinnut pitsaasortaa sunniuteqassaaq. Sumiiffipput
eqqarsaatigissanngilarput. Aammali mittarfinnik tallileriniarnermi
puigorneqartartoq aanna, mittarfiunngooq tallinissaa uani akikinneruvoq,
kisianni Aasiaat eqqarsaatiglaartigit. Timmisartorsuaq mikkuni 200-it missaanik
ilaasulik mittarfeerannguup illutaa taama mikitigitillugu taava sussappat?
Ullumikkut AUnnuisa@ Namminersornerullutik Oqartussat
akissaqarpaa hotelinut apiissutissanut? Ilulissat annertuumik hotelinik
pigisaqareerput, aamma ajunngilaq. Ilulissani aningaasarsiorneq ilorraap
tungaanut tamatsinnut aamma ajunngitsortaa aamma tussaaq. Sumulli
iluaqutaassava takornarisanik ussassaarinerup nalaani timmisartoq Aasiannut
mikkaluarluni ajutoorpat ilaasorpassuillu unnuiffissaarullutik. Milliuunnerit
takornariarusuttut piumasarisinnaanngilaat utoqqaat illuani utoqqarnik tutitaqarnissartik,
tamakku aamma eqqarsaatigisariaqarpavut.
Una uani oqallillerni
oqaatigineqaqattaartoq assut taanna uanga isumaqarpunga aamma attupillattariaqarlugu.
Nunatta iluani angallannermi, Nunatta iluani isorartoqisumi timmisartut
ullumikkut nassuierutigisariaqarpavut atukkavut naammanngillat
pitsaanerpaajunngillat, kisianni piffiit ilaanni ajunngikkaluarlutik.
Taava Angallannerput Ataatsimiititaliami
eqqartorneqartuartoq aammalu immikkut pisussaasunik ilisimasalinninngooq oqaluttuunneqartuarpugut
timmisartut mikisunnguit sukkasuulli Nunatsinni atugaalernissaat
oqariartuutigineqaqattaarpoq, kisiannili iserpugulli Inatsisartunut taanna
siunniutaq, taava qaquguuna naammassineqarniartut, taakku tassa takunatigillu
immaqa toqoraannassaagut kiisa. Taamannak pilersaarusiorneq unittarialerpoq
inuiaqatigiinni killiffigisarput una massakut taamma imaannaanngitsigisoq
pimoorullugu qanoq iliuuseqanngikkutta kingunissatta aamma nukiit
atulussinnaqataalertussaavaat. Tassunga unittariaqalerpugut - pimoorullugu
misissuiniarta. Ajornartorsiut angisoorujuussuuvoq, una tassa siumaqarpunga
qalleqqittariaqarlugu - Nunatsinni angallanneq ilumoorpoq taanna akisuvoq,
taanna akuerineqarsinnaanngilaq, kisianni sunaana tassani aallaaviuvoq?
Sunaava? Tamatta immaqa nalugunanngilarput. Timmisartut ullumikkut atuuttut
Nunatsinni naleqqussimanngillat akitigut. Ilaatigut useqaratik inunnik
angalaartuartarput sumi tamaani, aamma piumsagut qasukkalaariartigit.
Uani Naalakkersuisut aamma akissuteqaamminni ilaatigut imaluunniit eqqaatsiarsimasaat ilaatigut immaqa timmisartuussisarnerit akitsuallatsinneqarsinnaaneri piffiit ilaannut, aamma taamaalisoqaraluarpat tamavissuatta nillissaagut, naamik akulikinneruniarli akulikinneruniarli. Aammaana Nunatta tunniussinnaasai sipporlugit immaqa piumasaqarnermut ullumikkut sakkortuallaalersoq, aamma takornartaanngilaq nunaqarfinnguilluunniit ilaanni yogurteerukkaangami nilliaannalerpaluttartut timmisartukkut pajoqullutik. Tamakku eqqarsaatigilluartariaqalerpavut inuiaqatigiit ataatsimut imminnut isigissagutta. Qujanaq.
Otto Steenholdt, attaviitsoq:
Inatsisartunut siunnersuuteqartumut Ruth Heilmannimut oqaatigissavara uanga mittarfilerngusaannermik maani eqqartugaqarusunnginnama, taamaattorli akikinnersiorluni tallisassaq iluatinnartoq tusareersimasara, taanna puttarsigakku. Tassa Aasiammiuujunnaareernikuugama aamma Aasianni mittarfiliornissaq immaqa soorunami illersoraluarlugu, taanna unginnaarfigigallassanngilara.
Kisianni ilumoorluinnarpoq billittit akisunerujussui qanoq iliussanerlutigik - ilumut ingasapput. Kisianni tassa sanileriisikkajuppakka uanga timmisartumut - timmisartoq isertitsiniartussaavoq amigartooruteqanngitsumik ingerlassaguni, tassalu assartugassai qanoq amerlatigaat? Ilaasussai qanoq amerlatigaat? Aamma attartorneqarsinnaava? Tassa taakkua aningaasarsiutigisinnaassavai nammineq imminut akilersinnaasumik ingerlassaguni, taavalu sanilliunneqarsinnaallutik, taassuma nammineq akiligasarissagai tassa ingerlateqarnini sulisunilu. Taakku aamma sanileriillutik pisinnaasappata tapiissuterpassuarnik pinani, isumaqarpunga imminut akilersinnaasumik ingerlasinnaaneq tassaniissagaluartoq, kisianni timmisartunut mittarfiliagut tamaasa ataasiakkaarlugit misissuataarutsigit.
Takusarpagut ilaannikkut miffigisaminnut niusoqaratillu ikisoqarneq ajortoq, taama oqaannaraanni ajunnginnerussaaq. Mikkaluaannarpoq immaqa niussavai appelsiinat 10 kiilu taavalu tingilluni. Ilaasunik niusoqanngilaq, ilaasunik ikisoqnngilaq. Tassunga attartortitsiniartunik aamma soqanngilaq, taamaalilluni timmisartoq miffigisaraluaminut iluanaarutissani annaavai. Tassa takuneqarsinnaavoq tassani tassunga minneq akitsortaaleqaaq, tassa ingerlatiminut akilagassaminullu akiligassami pissarsiaqarfiiginngilai.
Aamma taamaalluinnrpoq umiarsuaaqqamik ilaasortaammik ingerlatsiniartussamut tamakku eqqarsaatigissallugit. Kapisilinnukartitsissagaani piumasarineqarpalluaasiit immaqa qullersaninngaanniit pinngitsoorani Kapisiliartoqartassasoq sapaatip akunneranut marloriarluni.
Taakkua qulaani taariikkakka amigaatigineqarpata assartugassaqanngitsoq ilaasoqanngitsoq umiarsuaaraq aamma tappavunnarnissminut qanorujussuaq timmisartutulli aningaasatigut ajunaaruteqaannartussaavoq.
Aamma takusarparput tusareerlugulu USA-mi ajunaartoqarmat nunarpassuit timmisartuutileqatigiiffiit qanoq ilaatigut uniinnartariaqalersut qanoq amerlalluinnaqqissaartigisut. Silarsuaq taama imminut ataqatigiitsigaaq timisartornikkulluunniit angallanneq kisiat eqqarsaatigissagaanni.
Allatut ajornaqaaq tapiissutit kisiisa isumalluutigisariaqnngikkaluarpagummi, kisianni isumaqarpunga timmisartukkut angallassineq tapiissuteqarfigineqarujussuartinnani inunnut naammaginartumik kiffartuussisinnaajunaarsimasoq. Ilumut taakkartortariaqarsimassagaluarput immaqa tamakkua qiiaamminartut Thuleminnganniit Qaqortuliartoqassaguni inoqutigiinnguanut pingasnut qanoq akeqarumaarnersoq apeqqutinngorlugu inuutissarsiutaassa taavanimiut taanna akilesinnaaneraat. Akissutissaq uaniigunarpoq naamik akilersinnaanngilaq!
Aamma timmisartukkut angallanneq neriuutigilluinnarpara Royal Greenlandip ingerlannerani qanga iliorfigineqassanngitsoq. Politikkerit tamarmik piumasaraat imaassaaq imaassaaq, inuiaqatigiinnut kiffartuussiniarli, naaggaartortukassat pinngitsaalillugu suliassillugu oqaluunneqaraluarluni, ukorsiiaa taakkua akissaajaatigiinnarpakka imaluunniit akilesinnaanngillat taakkua unitsilaarniarsigit. Tamakku uteqqinneqassanngitsut Grønlandsflyp tungaanut kissaatigilluinnarpara.
Ajuusaarnarpoq ataatsimeersuarnerup taassumap isumassarsiorluarfiusimasup inerniliissutai suli ataatsimiititaliamut suli anngussimanngimmata, immaqa pitsaanerusimassagaluarpoq, allatummiaa ajornartumik, oqallinnisssami aallaavigiumallugit qanoq oqaluttoqarsimanersoq qiviallattaarsimasinnaagaluaraanni.
Atassutip Ilulissalerinerujussua pakatsissutigaara isumaqarluinnarama Atassut imaattoq, aamma akikinnerusumik aamma imminut akilesinnaasumik pilersitsineq tassaniittussaassagaluartoq siunertarisaa taassumap partiip eqqassagaanni. Liberalismiugunanngilaq akisunersiorluni toqqaaneq.
Uangaana iluatigisaraluaringa manna tikillugu taamatut timmisartorsuarmik tikittut pilerigisarpiaviannut nunnigunneqassanngitsut. Tassani takusassat takoreerunikkit oqassapput aa sinneri imminiik, taavalu angerlamut aallarlutik, tusaamagamikku takussaast pitsaasut tassaniittut. Iluatigineerussagaluarpara tassunga mitseqqaarnagit allamut avataaniittumut Diskobugtimiittumut arlaanut mitseqqaarlugit Diskobugti kaajallatseqqaarlugu aatsaat pilerigisaannut kingulliullugit tikisillugit tassanngaanniit aallariartortussanngorlugit. Tassa taanna aningaasanik kaaviiaartitsinissami oqaasinnaaq aamma tassaneqqissaamiippoq Diskobugtimi nunaqarfiit illoqarfiillu tikeraanik aningaasarsiuteqarnissaat eqqarsaatigissagaanni. Kisiannili taakku eqqarsaatiginngikkaanni oqartariaqarpoq ajunngilaq Ilulissanut minniarlik sermersuaq taanna takoreerunikku tingilllutik aallaannarniarlik, taanna uanga upperisarinngilara.
Narsarsuarmunngooq ukiut ingerlanerani arfineq-marloriarluniunnguatsiarpoq minngitsoortoqarsimavoq. Soorluli oqartoqartariaqartoq, taamaattumik taannarsuaq peerlugu allamut tassalu Qaqortumut mittarfissuaq taanna nuunniarli. Taanna isumaqarpunga uninngaarfissaanngitsoq aammalu Siumupoqaaseqartuata taanna uparuareerpaa, taamatut oqarneq tutsuiginagi.
Aasiannut tunngatillugu oqaatsikka uteqqissanngilakka maanna paasineqareermata, kisianni Siumut oqaaseqartua Per Rosing-Petersen tusarnaarluarpara. Inuit oqallisigisamut namminneq misigisaqarlutik qanoq misigisaqarnerminnik qanoq oqarnera assut taanna tusarnaarluarpara, tassa timmisartortutuut suliuarsimanera aallaavigalugu. Eqqumiigisaraluarpara oqartoqartarmat timmisartoq imminut akilersinnaassaguni silaannarmiittuaannartariaqaraluartoq. Tassa taamaassiavoq. Uninngalerangami atorneqarani akisoorujussuanngortarluni.
Taavalu uterfigeqqilaarlara Inatsisartuni Landsrådemilu oqallisigisaqaagut tamakku. Qanga umiarsuarnik sineriakkut angalaarneq ingerlallualaartukassak. Taamanikkut oqallisigilerparput tamakkua tungaanut ilillugu, isumaqarluinnarpunga siunissami aalluttariaqalersut, aammalu timmisartut mittarfii naappallaat taakkua unitsinneqaqqullugit, tassa aamma nalunnginnatsigu timmisartunut mittarfiit massakkut sanariikkat ilaat atorsinnaanatik allaat kukkusumik sananeqarsimaneri aallaavigalugit sanaartorneq unitsittariaqartoq.
Daniel Skifte, Inatsisartut Siulittaasuat, Atassut.
Otto Steenholdtimut qujavugut, maannakkut oqaaseqassaq partiimi oqaaseqartip avataatigut Mads-Peter Grønvold, tulliuppoq Mogens Kleist.
Mads-Peter Grønvold, Kattusseqatigiit.
Oqallisigisaq soqutiginermut aamma misigisimavunga Inatsisartuni ilaasortatut qaqisariaqarlugu. Tassa siunissami angallannerup aaqqissuussaanera pillugu maannakkut oqallippugut, aammalu Namminersornerullutik Oqartussani pigineqartut ingerlatsiviit allallu niuernerpalaartumik ingerlanneqarnissaat piumasaqaatigiuarlutigu, tapiissutit ikilisarnissaat anguniarlugu. Taanna oqaatigiuarparput maanngaanniit oqaluttarfimmiit, aamma aningaasanut inatsit eqqartorneqaraangat taanna annertuumik naalakkersuinikkut oqariartuutigineqartarpoq, piviusunngortinniartariaqartoq.
Taavalu aamma ilaannikkut oqaluttarfimmiit oqallisilillaraangatta ingerlatsinermut aningaasartuutit qaffassarneqarnissaannut kinguneqarsinnaasut puigorlugit, selskabip piumaffigisamut niuernerpalaartumik ingerlaniaraluartut arlaleriarninngorlugu mittaqqullugit illoqarfinnut pineqartunut allanut naammagittaalliuleraangata piumaffigineqartarput. Naak timmisartut maannakkut atorneqartut qiviarutsigit 50-it sinnerlugit ilaasoqarsinnaasut, illoqarfiit ilaannut mikkiartortarput marlussuit ilaanni niuniarlugit. Taamannak timmisartuussisarnermi soorunami akilersinnaasumik ingerlatsisoqarnersoq niuernerpalaartumillu ingerlatsisoqarnerso apeqquserneqarsinnaavoq.
Uani uanga piviusorsiortutut isiginngilara piffiit ilaanni timmisartuutitsileqatigiiffiit arlaasa una ingerlakkaat, piffiit ilaanni arlaasa - eqaannerulersitsineq ajorpoq taamannak timmisartuussinerit, soorlu Qeqertarsuup tunuani timmisartuussineq qiviarutsigu Air Alpha timmisartuussinermut Grønlandsfly kisermaassiunnaarmat allaat ullaassakkut sisamanut bagagejariartortaratta, naak Grønlandsfly timmisartuussigallarmat 09.00-10.00 eqqaani aatsaat bagagejariartortarluta Nuummut ulloq taanna angumersissagutta, kisianni maannakkut 04.00-05.00 eqqaani bagagejariartortariaqartarpugut. Allaat ilaanni angajoqqaat mikisunnguanik meerallit, meeqqat aatsaat sinilluataaleruttortut aallariartortinneqartarput.
Privatinngorsaanerup aamma kinguneri sissuertariaqakkat taamaattut. Uani nunatta iluani timmisartuussisoqassappat aammalu nunatta iluani timmisartuussineq akikinninngussappat sapinningisamik aamma una anguniartariaqarpoq nunatta avataanut timmisartuussinermi akilersinnaalluartunik ingerlatsivinni, nunatta iluani timmisartuussisut ingerlatsilernissaat - taanna piumasaqaataasariaqaraluarpoq. Sinneqartoorutaallutik timmisartuutiffiusuni akilersinnaanngitsumik nunatta iluani timmisartuutitsiviit ilaat taamaalillutik matussuserneqartassagaluarput, Landskarsimik aningaasanik tapiiffigineqanngikkaluarlutik kisianni sinneqartoorutit iluani timmisartuutileqatigiiffiit iluani sinneqartoorutit atorlugit akit apparsarneqarsinnaassagaluarmata. Taamaaliornikkut Inatsisartut ingerlatsinermut aningaasartuutinut matussusiiuarnerat qimakkiartuaarneqarsinnaagaluarmat.
Uanili siunissami angallassinerup aaqqissuussaanera pillugu maannakkut aaqqissuussinerit ilaat pitsaalluinnartumik ingerlanneqarput, soorlu Ilulissat qiviaraanni. Kangerlussuarmiit Ilulissat tungaanut ilaasussat naammalluartut ilaasorineqartarput, takornarissat amerlasuut tikittarput, piffinni takornariaqarnermi sullissisut namminersortut assigiinngitsut amerlasuut pigineqarput, unnuiffissat naammattut pigineqarput.
Tassa taamatut ingerlatsisut tapersersorluagassat, aammalu akornusersornaveersaagassat. Aamma uani siusinnerusukkut Inatsisartuni oqallittarnitsinni Kattusseqatigiinniit oqaatigiuarparput suluusalinnut mittarfiit, aalisakkanik avammut niuernermi atorneqartariaqartut, ingammik avannaani Uummannap eqqaa qiviarutsigu aalisakkat ukiuunerani toqqorsivissaaruttarput, tamakku toqqorsivissaaruttartut annikillisassagutsigit timmisartunik mittarfiit atorlugit avammut annissuunneri ingerlattariaqarpagut.
Daniel Skifte, Inatsisartut Siulittaasuat, Atassut.
Tassa oqalussinnaatitaanerup sinnerlualaarmagu taamaalilluta Mads-Peter Grønvold qutsavigaarput.
Mogens Kleist, Kattusseqatigiit.
Naalakkersuisup oqaaseqaataanut
tunngatillugu qujassaagut. Una iserfigilaarniarlugu Narsarsuaq eqqartorneqarmat
kukkunersiuisuninngaanniit taamatut Narsarsuaq aqqusaarlugu Qaqortumut
misissuiartornitsinni mittarfeqaria, aammalu mittarfeqarfimmi pisortaasoq
oqaloqatigisimagatsigu, mittarfiup taassuma aaqqissuunneqarnissaanut
aningaasat qassit milliuunit pisariaqartinneqarnersut assersuutigiinnarlugu
mittarfittaanut.
Asfalterneqarnissaanut aningaasat
taakkartorneqartut 40-50 mio.kr. akornani - eqqortumik oqarsimanngilanga
affaata missaai. Kukkunersiuisuninngaanniit taamatut 20 mio.kr. missaaniissimassapput
oqaatigineqarpoq, tassani mittarfimmi pisortaminngaanniit. Taamaattumik apererusunnarpoq
maannakkut siunissami taamatut mittarfiup matuneqassagaluarpat
kingunerisinnaasaai sukumiisumik naliliiffigeqqaarnissaat tungitsinninngaanniit
oqaatigerusullugu.
Una aamma taamatut angallannermut
ataatsimiititaliaminngaanniit eqqartortarsimasatta ilagivaat, taamatut
Grønlandsflyminngaannit servicekontraktinik massakkut sanasarnerup nutaamik
naliliiffigineqarnissaa, imaalillugu resultat kontrakt toqqammavigalugit suut
ammaanneqarsinnaanersut ujartorneqassasut, akinut apparsaasinnaassappata
arlaatigut ujartuisoqassasoq, servicekontrakti taanna atuinnassava imaluunniit
resultat kontrakti atorneqassava? Tassa taakku aamma annertungaatsiartumik
eqqartornikuuvagut.
Uku aamma iserfigilaarusuppakka
timmisartut DASH-7-it, naluneqanngillat qangalili sananeqarunnaarnikuusut.
Grønlandsflyp pisortartaava maannga nunatsinnut atorfineqqaarmat, Angallannermut
Ataatsimiititaliaminngaanniit oqaloqatigigatsigu oqarpoq angallannermut akit
appartinneqarsinnaasut affaannanngorlugit, piffinni aalajangersimasuni
timmisartunik angisuunik taamatut atuilernikkut.
Assersuutigalugu Nuup mittarfia tallippat,
Ilulissat mittarfia tallippat, kisianni aningaasat tassani aamma
Naalakkersuisuninngaanniit qularutiginngilluinnarpara annaaneqartussat, tassani
toqqaannartumik timmisartut maannga tikittalissappata Kangerlussuarmut taakku
aningaasat tuttussaagaluit sipaarneqartussaaneri, imak annaaneqarsinnaaneri
taakku eqqarsaatigisariaqassagatsigit.
Taamaattumik pingaaruteqarpoq
maannakkuminngaanniit aamma pilersaarusiorniarutta ukiunut 10-15-inut
angallannerup tungaatigut qanoq pilersaarusiorniarpugut maannakkuminnganniit,
qanoq ililluta DASH-7 taakku timmisartut qanoq ittunik taarsersorneqassappat.
Inuiaqatigiinnut Naalakkersuisut oqarput pitsaanermik akilersinnaanerusumik
ingerlatsisoqarniartoq, taava eqqarsartariaqarpugut nutaamik.
Taamaattumik Ilulissani aammalu maani Nuummi
mittarfiit tallineqassagaluarpata kingunerisinnaasaai sukumiisumik
misissuinikkut uagut tungitsinninngaannit aamma qulaajaaffigineqartussatut
oqaatigerusuppagut Angallannermi Ataatsimiititaliamiit aammalu
minnerunngitsumik naalakkersuisuminngaanniit.
Piffiit ataasiakkaat taakkartorneqarput
Aasiaat, Ilulissakkut taakku annertunerusumik iserfigissanngilakka, kisiannili
oqaatigineqarsinnaasut ilagivaat taakku piffinni aalajangersimasunik Ilulissani
aammalu Nuummi, Kangerlussuarmilu kujataanilu. Taakku timmisartunik angisuunik
200-it tikillugu immaqa ilaasoqarsinnaasunik taamatut angallassinikkut akinut
appartitsisinnaaneri aamma qissimittariaqaratsigit.
Aammalu taava illoqarfiit taakku
akornaniittut timmisartunik mikinerusunik taakku ingerlanneqarsinnaanissaat
eqqarsaatigineqarsinnaallutik. Uanga nammineq ajuusaarutigissavara taamatut
angallannermut seminareqarsimanermi ilaasimannginnama, kisiannili una
oqaatigerusullugu nuannaarutigigakku taamatut kujataani angallassinermut
maannakkut Islandimiut suleqatiginiarnerisigut ammaanniarneqalersoq,
kisiannili illuatungaatigut pakatsissutigalugu una Grønlandsfly timmisartunik
taamatut ullaakkut tikiaartarnerisa kingunerimmagut, kujataamiut
pinngitsooratik helikoptererlutik Narsarsualiartalernerat. Siornatigut Najaaraq
Ittuk atorlugu aallarsinnaasaraluarput, kisianni tassa pinngitsaalisaallutik
massakkut akisunernut timmisartunut ilaasalerput. Una pissutigalugu Najaaraq
Ittuk tallimat-qeqqa ullaassakkut aallarsinnaanngimmat maleruagassat
toqqammavigalugit.
Taamaattumik arlaatigut aaqqiisoqarnissaa
tassani uagut ujartukkatta ilagivaat, umiarsuaaqqatigut angallannerup aammalu
Grønlandsflykkut, takornariartitsiviillu qanimut suleqatigiinnermikkut taamatut
pitsaanerusumik angallannerup tungaatigut aaqqiisinnaanissaa ujartoratsigu,
taanna aamma isumaqarunga takornarissat amerlanerpaat
nunatsinnukartinniarutsigit aamma taanna toqqammaviusariaqartoq
tungitsinninngaannit oqaatigerusupparput.
Jørgen Wæver-Johansenip taakkartugaasa
ilagivaat nunarput ungasissorujussuummat kilometerimut taamak akeqarpoq - aap,
kisianni uanga Grønlandsflyp timmisartua nalunngisama ilaat tassunga
ilaanikuuvoq, maanngaannit Danmarkimut akeq taanna annertooq atorlugu, kisianni
Danmarkiminngaanniit Europamut samunga ungasissumut affaannarmik akilerlugu
timmisartorsinnaapput, taava suna assigiinngissutigisimassavaa. Ungasissusaa
eqqarsaatigalugu akit appasinnerujorujussuit europami atorneqarput,
taamaattumik Grønlandsfly ukiumut milliornerpassuarnik sinneqartooruteqartartoq
eqqarsaatigissagutsigu, sukumiisumik naliliiffigisariaqarparput sooruna akit
suli taamak qaffasitsigisut, kilometerimut taanna akeq eqqarsaatigissagutsigu
europamut aamma sanilliutissallugu. Taamaattumik qulaajagassat arlaliupput.
Uku mittarfeqarfinnut tapiissutit
piiarneqarsimanerisa Naalakkersuisuninngaanniit ukioq marluk matuma siornatigut
aallartinneqarmat, mittarfeqarfinnut tapiissutit piiarneqalermata, taava kikkut
akiliisussaappat - timmisartumi ilaasut. Tassa aatsaat taanna
kinguniinnaavissua uagut Naalakkersuisuninngaanniit paasitinneqarpugut
taamatut iliortoqassasoq. Taamaattumik naliliisariaqarpugut ullumikkut
angallannerup tungaatigut aaqqiiniarutta qulaajagassat arlalissuupput, aamma
inuiaqatigiit akissaqanngilagut 1,2, 3 assigiinngitsunik mittarfinnik
talliortitsiniarutta, imaluunniit takisuunngortitsiniarutta.
Eqqarsarluaqqaarluta taakkua
naliliiffigisariaqarpagut aammalu sukumiisumik piareersarnikkut.
Daniel Skifte, Inatsisartut Siulittaasuat,
Atassut.
Mogens Kleistimut qujavugut. Tulliulluni
oqaaseqassaaq Ruth Heilmann naatsuararsuarmik pingajussaaniilerami, aammalu
kaammattuutigiuminarpoq suli arlalissuit oqaluuserisassarigatsigit
ajornanngippat naatsuliornissaq.
Ruth Heilmann, Siumut.
Qujanaq, Siulittaasoq.
Taperserniarluguuna Inuit Ataqatigiit
oqaaseqarfiginngitsuulaarakku, tassa uku mittarfiit atorluarneqarnissaanut
tunngatillugu tassa inuutissarsiutit ineriartortinneqarnerannut sapinngisamik
naleqqussartariaqarnerat atorluarneqarnissaanullu taanna innersuussutaa aamma
naalakker
suisut suleriaqqinnissaanut taanna
eqqarsaatigillaqquara.
Aammalu nuanaarutigaara Siumuminngaanniit
oqaatigineqarmat aamma sinersortaatit eqqarsaatigalugit aammalu periarfissaq
tassani suli ersarinnerusunngortinniarneqarnera aammalu periarfissaasoq una
umiarsuup massakkut aasaannakkut atorneqartartut immaqa atorluarneqarnerullugu
sinerissaamut aamma angalatinneqarsinnaanera, kisianni aamma
eqqarsaatigisariaqarpoq nunaqarfinni ajornatorsiut aamma tassaniittoq aamma
ilanngullugu aaqqinneqartariaqarnera. Tassani umiarsuit sinersortaatit angisuut
kisiisa amigaatiginngilagut, kisianni aamma mikinerusut angallatit
amigaatigaagut.
Uani Naalakkersuisut saqqummiinermini
soorunami inuit ikittuuneri taanna angallannermut killiliisuunera aamma
eqqaasissutigivaa, kisiannilu aamma Mads-Peter Grønvold oqaaseqarnermini aamma
uanga upperaara, takornarissat amerliartortillugit aamma angalasut aamma
amerliartortarmata, taamaalillunilu aamma angalasut amerliartortillugit aamma
angalaneq akikinneruleriartortarmat. Aammalu illuatungaatigut oqaatigalugu
bilitsit akikinneruppata aamma angalasut amerlanerulisassut.
Taamaattumik taamatut naatsumik
oqaaseqarlunga nuannaarutigingaarpara Naalakkersuisoq taamak
soqutiginnitsigaluni aamma piumassuseqartigalunilu ukiamut saqqummiinissamut
oqaaseqarnera.
Qujanaq.
Daniel Skifte, Inatsisartut Siulittaasuat,
Atassut.
Ruth Heilmannimut qujavugut. Maannakkut oqaaseqassaaq
Ole Lynge, Inuit Ataqatigiit, tulliupporlu Tommy Marø.
Ole Lynge, Inuit Ataqatgiit.
Immaqa oqaaseqaqqinnissara
pisariaqarpallaarunanngikkaluarpoq, kisianni isumaqarpunga
erseqqissaateqalaartariaqarlunga. Tassa Inuit Ataqatigiit uani taamatut
mittarfinnik tallileriniarnermut apeqqummi, nalornissutaasa ilagilluinnarpaa
aamma pingaaruteqarnerpaanut immaqa ilaavoq timmisartunuku qanoq ittut
siunissami atorniarivut. Aamma tallileriniaannarluni tallilerinissaq taanna
kissaatiginanngilaq.
Teknikikkut atortorissaarutigullu
ineriartorneq aamma sukkasoorujussuuvoq. Naluarpulluunniit siunissami
pullartagarsuit akikitsuaqqat atorlugit angallassisarneq taanna
atulissanerlutigu, taamaattumik mittarfiit taakkua tasittarpallaaleqaagut
immaqa uani, kisianni taanna oqaatigilaaginnarpara aappaatigut
avaanngugilaarakku oqartoqarmat assersuusiorluni illoqarfimmi ataatsimi tassani
timmisartorsuaq ajutuussagaluarpat, sumut taava iliorassavagut? Tassa tamani
timmisartorsuarni mittarfinni takisuuni missinnaasunik sanasoqassappat,
sinerissami sumiluunniit massakkut aamma mittarfeqareeraluartuni, tamarmik
pisariaqartitsisussaapput malitsigisaanik kiffartuussinermut atortussanik
aningaasartuuteqarnissap pinngitsuussanngilaq taanna.
Aamma inerisaanissaq, atlantikorlu aamma
ikaarlugu allatigut containerinik assartuinikkut umiarsuarnik aamma
assartuinikkut pissutsit qimerloortariaqarput ataqatigiissaakkamik pisoqassappat.
Ussernartorsiornaraluarpoq, kisianni 10
min. atorsinnaasakka atussanngilakka, isumaqarpunga oqalliseqqinnissamut
periarfissat maannakkut annertuut, kisianni siunnerfik aamma sunarpiaassanersoq
tamatta arlaatigut nalornissuteqarfigivarput, taamaakkami sivitsorsaaqqinnanga
tassunga killippara.
Qujanaq.
Daniel Skifte, Inatsisartut Siulittaasuat,
Atassut.
Ole Lynge annertuumik qutsavigaara 10
minuttinik atuiumanngimmat, qujanaqaa. Taava tulliulluni oqaaseqassaq Tommy
Marø partiimi oqaaseqartitap avataatigut. Taavalu tulliuppoq Ineqarnermut,
Attaveqarnermut Pilersuinermullu Naalakkersuisoq.
Tommy Marø, Siumut.
Qujanaq. Naatsorsuutiginngikkaluarakku
aamma uanga maannga oqaluttarfimmut qaqillunga isummannik annitsinissara,
kisianni oqallinnerup allamut sangujartornerata pisariaqalersissimavaa
oqaaseqartariaqalernera.
Tassa siullermik oqaatigissavara
naatsorsuutigisimanngikkaluarakku Inatsisartuni ilaasortat maani oqallittarfik
atorlugu oqallinnerminni ajunngitsumik siunnerfeqartumik aallarteriarlutik,
taava kujataani mittarfiit pineqalerneratigut taava Narsarsuup mittarfiata
qitiutinneqaannarnissaa taakkartormassuk.
Uani eqqaamasariaqarparput oqallinnitsinni
aamma Inatsisartut soqutigisariaqagaat tassaasariaqarmat innuttaasut aammalu
inuit angallassassat taakkua qitiutilluinnarlugit maani sulisarnissarput.
Maani ilisimatoorsuartut immaqaluunniit ilisimasalissuartut aammalu
misilittagalittut maani oqalunnitsinni arlallit taamak pissusilersorlutik
oqalunneranni, tassa taannaavoq uanga ajuusaarutigisara, inuk
qitiutilluinnarlugu maani sulinissarput pingaaruteqarmat. Kina oqarpa
Narsarsuaq qaqugorsuarmut piviuaannassasoq. Narsarsuaq pilersinneqarnikuuvoq
nalinginnaasumik inuit angallanneranni qitiusussatut. Narsarsuaq
pilersinneqarnikuuvoq sorsunnersuarmi atatillugu Amerikarmiut taamani
sanammassuk, maannakkullu nutarterlugu allatigullu pisariaqartitsinera tamatta
ilisimavarput aamma Naalakkersuinikkut suliallit ilisimavaat.
Kikkut Narsarsuarminngaanniit allamut
sinerissamut toqqaannartumik ingerlasussaagamik, sullitat angalasussallu
tamarmik Narsarminnganniit, Qaqortuminngaanniit, Nanortalimminngaanniillu
ingerlaqqitussaapput tamarmik. Taakkulu eqqarsaatigiinnarlugit Narsarsuarmut
aqqusaartarnerinnarminnut Qaqortormiut uanga assersuutigissagukkit,
nalinginnaasumik angallanneq eqqarsaatigalugu siumut utimullu Narsarsuarmut
aqqusaarnerinnarminni 1.800 kr.-inut aningaasartuuteqaqqaartussaapput
sinerissamut ingerlaqqissagunik.
Tassa taanna pilliutiginiarneqarpa
innuttaasunut nutaamik periuseqarluni aaqqiiniarnerminngaanniit, tassa taanna
Inatsisartunut uanga ilissinnut apeqqutigisassara.
Qujanaq.
Daniel Skifte, Inatsisartut Siulittaasuat,
Atassut.
Tommy Marø qutsavigaarput. Maannakkut
oqaaseqassaq Jørgen Wæver-Johansen, tulliussaaq Per Rosing-Petersen,
pingajussaaniilerami naatsuararsuarmik.
Jørgen Wæver-Johansen: Ineqarnermut, Attaveqarnermut
Pilersuinermullu Naalakkersuisoq, Siumut.
Naatsorsuutiginngilara
takisuulioqqinnissara, kisianni naatsumik oqaaseqarfigilaarusuppakka
saqqummiunneqartut ilaat.
Siullermik ilumoorpoq soorunami
mittarfeqarfiit ilaasa timmisartunik mikinerinnarnik miffigineqarsinnaasunngorlugit
aalajangiiffigineqarpata, taava sulisorisatigut sipaarniartoqarsinnaammat.
Tamannalu misissortissimavarput, millionilikkaat qulikkaat
sipaarneqarsinnaanngillat, nutaat tamarmik taamatut timmisartunut
minnerinnarnut miffigineqarsinnaasunngorlugit aaqqinneqassapata, taava
sipaarutigineqarsinnaasut 9,7 mio.kr.-iuvoq taava skattitigut annaasassat,
sulisorisat tassani aamma eqqarsaatigalugit taakkua 3,5 mio.kr. missaaniipput.
Tassa mittarfiit nutaat tamarmik
timmisartunik minnerinnarnik tikiffigineqarsinnaanissaat aaqqissuunneqassappat.
Soorunami nutarterisoqarsinnaavoq oqarlunilu tassa mittarfiit uku taamaallaat
timmisartunik minnerinnarnik tikiffigineqartalissapput, kisianni
akulikinnerusumik. Kisianni taassuma tassa pisariaqartissavaa pinngitsoorani
taava taamatut aallartitserusuttut piumasaqaatigissavaat qularnanngitsumik
imaattorusullutik - kisimiillutik tassunga timmisartuussisarusullutik. Taanna
nalilerneqarsinnaavoq.
Aamma nalilerneqarsinnaasut ilaat
ullumikkut suliaq taaneqarsimanngitsoq tassaavoq soormi mittarfiit pioreersut
tamaasa kommunimut pigisassanngorlugit tunniunneqarpata. Taava kommunip
nammineq kiffartuussineq qanoq ittoq tunniukkumanerlugu aalajangersinnaavoq.
Taanna aamma nalilerneqarsinnaavoq.
Narsarsuarmut tunngatillugu
timmisartorsuup 14-eriarluni aggernerani 7-riarluni kinguaattoorsimanera
oqaatigaara, imaanngitsoq tikinngitsoortoq, kisianni kinguaattoornertalimmik
tikippoq - ataasiaannarluni eqqaamanerlunngikkukku tikinngitsoorpoq,
imaluunniit ulloq ataaseq sinnerlugu kinguaattoorpoq.
Uani millionit 100-likkaat taagakkit,
tassani tunngavigaakka taanna nalunaarusiaq suliaritissimasarput, tassami
misissorneqarnikuupput ukiuni 25-ni tulliuttuni Narsarsuarmi iluarsagassat
ataatsimut katillugit qanoq naleqarnersut. Tassanilu nalunaarusiami
missingersuusiorneqarsimapput ukiut 25-t tulliuttut ingerlanerini Narsarsuaq
ataatsimut isigalugu, tassa mittarfittaannaanngitsoq kisianni aamma illutai
allat taakkua iluarsaanneqarnissaminnut 191 mio.kr.-inik pisariaqartitsippunngooq,
tassa ulluinnarni suliaqartut tamakkuninnga naliliinerat. Taamaattumik taanna
aamma eqqaamasassaavoq.
Ukua timmisartut annerumaat massakkut eqqartorneqartut
DASH-7 ilaatigut taartissaatut 70-80-inik ilaasoqarsinnaasut tassa 72-inik
ilaasoqarsinnasut, tassani ilaatigut pineqarput. Taakkua tassa
takorloorneqanngilaq mittarfinnut tamanut atorneqarnissaat, kisiannili inuit
angallaffigiunerpaasaannut, tassa Ilulissanut, Nuummut kujataanullu taavalu
Kangerlussuarmut. Taamaattumik angisoorsuit tallimanik pisiniartoqanngilaq,
kisianni ataaseq immaqaluunniit marluk, taakkua aallaaviupput.
Timmisartunik minnernik aamma
atorneqarsinnaasut nunatsinnilu ukiuni arlalinni atorneqartareersut Don-Air-it
taakkua taaneqaraluarput, kisianni saniatigut aamma Twinn Otterit taaneqarsinnaapput
aamma nunatsinnut naleqqulluinnartutut aammalu sumiiffinni minnerusunut
taaneqarsinnaapput.
Godmand Rasmussenip oqaatigivaa
qatsulluinnarlugu uninngasutut innerput, ingerlaqqittariaqarnerpullu.
Isumaqarpunga oqallinnerup ualeq manna takutikkaa Inatsisartut kissaatigigaat
uninngaannarunnaarluta aalajangiiffigineqarsinnaasumut ukiamut
takusaqarusuppugut, taannalu isumaqatigiissutigalugu ini manna - ualeq manna
qimakkumaarparput imaluunniit oqaluuserisassaq manna taavalu taanna
tunngavigalugu suliassap ingerlateqqinneqarnissaa taanna suliarineqassalluni.
Aamma Ole Lyngeimut tunngatillugu tassa
timmisartut suut eqqarsaatigineqarnersut taamaalillunga
erseqqissaateqarfigaakka.
Qujavunga isumassarsiarpassuarnik aamma
ukiaru suut sunik nalunaarusiaq pinngitsooranik imaqartariaqarnerannik
Inatsisartuniit Naalakkersuisut tungaanut oqariartuuteqarnissat pillugit.
Daniel Skifte, Inatsisartut Siulittaasuat,
Atassut.
Jørgen Wæver-Johansenimut qujavugut. Taavalu maannakkut oqaaseqassaaq Per Rosing- Petersen pingajussaaniilerami naatsuaraararsuarmik. Tullerissavaalu Lars Sørensen.
Per Rosing-Petersen, Siumut.
Siullermik Naalakkersuisup
ilassutaanut qujarusuppunga, tassunga atatillugu.
Taava nalinginnaasumik Narsarsuarmi
regularitet 72%-iusarpoq misissuisimanerup aamma taanna takutippaa, aamma
unaana apuukkusulaarlugu ilaatigut eqqartorneqarnikuunngimmat, periarfissat
assigiinngitsut taakkartornerani aamma soqutiginaateqarsinnaavoq qaatsiartaatit
misissuiffigineqarnissaat piffinni assigiinngitsuni, soorlu immaqa Qeqertarsuup
Tunuaniluunniit eqqarsaatersuutigineqarsinnaavoq. Aamma soqutiginartutut isigaara
assersuut taanna taakkartukkat Island-iminngaanniit qanoq qeritinneqanngitsut
aalisakkat tunisassiarisarsimasaat, ukiumut 13.000 ton angullugu massakkut
avammut tunisassiarineqartalersimanera, tassuunaana 1990-ikkut
aallartilaarneranni saqqummiukkakku eqqaamavara taamanikkut Royal Arctic Linep
pisortarisimasaata illaruaatigalunga tamakkua assigiinngitsut
piviusorsiorpalaanngitsutut eqqaammagit.
Taavalu naggataarutaasumik una
eqqaalaarusuppara massakkut akunnerit pingasut missaani angallannermut oqallinnitsinni
ilaatigut nunatta isorartunerujussua, akisunerujussua, tamakkorpassuillu
eqqartortillugit ullaaq una danmarkip aviisiata ilaata saqqummiussaa, Jyllands
Posten-ip tassa piginneqatigiiffik tuluit nunaaniittoq, Rayan Air taakkua
ilaatigut misissugarimmassuk qanoq akeqanngitsumik siunissami
angalasoqartalersinnaanera silaannakkut - ila tupinnaraluassusaa.
Daniel Skifte, Inatsisartut
Siulittaasuat, Atassut.
Per Rosing-Petersenimut qujavugut.
Maanakkut oqaaseqassaaq Lars Sørensen, Inuit Ataqatigiit, partiimi oqaaseqartup
avataatigut. Kiisalu naggataamik oqaaseqassaaq tulliulluni Otto Steenholdt
pingajussaaniilerami naatsuararsuarmik.
Lars Sørensen, Inuit Ataqatigiit.
Siullermik Godmand Rasmusseni
oqarneratuut oqassuunga oqallinnerit immaqa annertuavallaat pilerpagut
Inatsisartuni angallannikkut tunngasunik. Aamma Naalakkersuisut siorna
upernaakkut oqallippugut angallannermut tunngasunik, ukiarmi angallannermik
tunngasunik eqqartuivugut aamma massakkut oqaatsit taakkorpiaat
ataasiinnarmilluunniit nutaartaqanngitsut aamma saqqummiunneqaqqipput.
Qularnanngitsumillu immaqa
Naalakkersuisut silaannakkut angallannermi sangujoraarluni ingerlaniarnerat
taanna ajornartorsiutaavoq. Tassa suliat aammalu suliassat ilaai naammatsinneqanngitsut
allanik sinnattuaqilluni eqqartuisitsisaqattaarnera aammalu
isumasiuisaqattaarnera isumaqarpunga taanna sanngeequtaasoq.
Massakkut
immikkoortinneqartariaqarput uanga isumaga malillugu, tassa inunnik
silaannakkut assartuineq taavalu aamma niuernikkut usinik assartuineq. Soorlu
imaatigut taamaaliortoqareernikuuvoq, tassa Umiaq Arctic Lineip isumagisarivaa
ilaasunik assartuineq, taavalu Royal Arctic Line-ip isumagisaralugu niuernikkut
assartuineq. Qularnanngitsumik aamma silaannakkut taamaaliortoqartariaqarpoq,
pissutigalugu maannakkut aaqqissuussisimaneq uanga upperinngisaannarakku -
oqartoqartarnera uunga akilersinnaanngilaq - uunga akilersinnaanngilaq.
Taamatut eqqartuiuartilluta taava aamma mittarfiit qanorluunniit takitigisut
qanorluunniit naatsigisut taakkua eqqartortuassavagut, kisiannili massakkut
pilerseriikkat atorluarnissaat aallaavigissagutsigu taava
eqqartuisaqattaarsinnaanngilagut una matussooq - una aggissanngilaq - taamaaliortoqartariaqanngilaq.
Narsarsuup siunissaa oqallinnerit tamaviisa
assigiinngitsutigut apeqquserneqartarpoq, ilaasunik angallannermi Qaqortormiut
amerlanerit tassunngarmata, kisianni taava Narsarmiut Paamiormiullumi.
Isumaqarpunga massakkut Tommy Marøkkut politikkikkut eqqartuinerminni siunnerfigisariaqaraat
aamma siunnerfigereerpaat Qaqortoq Narsallu kommunea ataatsimut kattunneqassooq.
Narsarsuaq qitiusunngortinniarli, taava Qaqortumi mittarfiliortiterniarnerit
allallu eqqartorneqarneri taakkua unitsinneqarsinnaapput.
Tassa imaappoq akilersinnaassuseq -
akilersinnaanngissuserlu aallaavigalugit eqqartuisoqartillugu qaquguluunniit
aaqqiinavianngilagut. Ataatsimik nalilersuinerit ingerlanneqartariaqarput,
ataatsimik aamma oqallinnerit siunnerfeqartariaqarput.
Uanga upperinngilara soorlu Per Rosing-Petersenip
oqaatigigaa timmisartunngooq mikisunnguit atorlugit piffinnut taakkununnga
ingerlaartinneqartassapput, kisianni massakkut sinersorluni
aallartittoqartarpoq angallannermi imaatigut. Tassa Qaanaaminngaanniit
Upernavimmut aqqut taanna atorlugu ingerlaartoqarpoq.
Massakkut suna tamaat
qarsuteqattaarlugu silaannakkut ingerlatsiniarnermi soorunami taamatut
aaqqissuussiniarneq taavalu oqartarluni imminunngooq akilersinnaanngilaq.
Soorunami taamatut aaqqissuussineq itsillugu qaquguluunniit tamakkua
iluarsiniarneqarnavianngillat.=
Uagut Ilulissaninngaannit maannakkut
tamaanngaratta illoqarfiit tamaasa aqqusaaratsigit - nuanneq ingerlaarnerput.
Imaallaat illoqarfiit assigiinngitsut takuagut, kisianni peerneqarniartariaqartut
tassaassooq angallassinermi, assartuinermilu akitsuutip taassuma
peerneqarnissaa. Taamaakkami aamma nalilersuinerni assigiinngitsuni tamakkua
pinngitsoornatik isiginiarneqartariaqarput.
Taakkua oqaatigilaarusuppakka,
isumaqarama oqallinnerit annertuut ingerlanneqareernikuusut aammalu
nutaarsiassartaqanngitsut, kisiannili neriuppunga Naalakkersuisut
suleriaqqinnissaminni tamakkua aamma nalilersorumaaraat.
Daniel Skifte, Inatsisartut
Siulittaasuat, Atassut.
Lars Sørensen qutsavigaarput. Taavalu Otto Steenholdt
pingajussaaniilerami naatsuararsuarmik.
Otto Steenholdt, attaviitsoq.
Tassa aamma uanga Tommy Marø paasilluarsinnaavara taamatut piumasaqarnini nalilersumisaarlugu imatut nalilerunarmagu soorluuna amerlanerussuteqartut kissaatigivallaanngikkaat Qaqortumi taamatut sananeqarnissaa, naluara kisianni taamatut uanga nalilerpara, kisiannili maani aamma ataatsimeeqataasugut oqaloqataasugullu soorlu silatoorsuartut uatsinnut oqalunnianngitsukasaagaluarpugut, kisianni Inatsisartuni oqaaseqassagaanni allatut ajornaqaaq, isummanik itisiliinissaq pisariaqartarpoq.
Godmand Rasmussenimuna oqaasia aamma oqaatigilaassallugu. Soorunami timmisartorsuarmik Aasianni qanorluunniit unittoortoqassappat ullumikkut pissutsit atorsinnaanngillat, isumaqatigilluinnarpakkit, kisiannili aalajangertoqariarpat Aasianni allisaasoqassasoq taanna sioqquterujussuarllugu utaqqisarfikasik allerujussuarneqassaaq, taamaalillunilu utoqqaat illuani aamma qaleriiaaginnartoqarnissaa pinaveersaartinneqarluinnartussaalluni.
Daniel Skifte, Inatsisartut Siulittaasuat, Atassut.
Otto Steenholdt qutsavigaarput. Allanik apeqqut pillugu oqaseqarumasoqanngimmat taamaalilluni Inatsisartuni oqallinneq naammassivoq.
.... tassa nappaavutit - akueraakkit immikkut naggasiileraluarnera pillugu.
Piaarnerusumik nappaasoqartarnissaa kissaatigaara. Naggataamillu taamaaliorlunga.
....kinaanerpoq oqaluttarfimmut qaqivoq:
Qujanaq periarfissikkamma. Uaniuna servicekontraktit assigiinngitsutigut taakkartorneqaqattaarnera ilutigalugu, taakkartorneqarmat ilaatigut ajortuinnarmik nipeqangajattumik taakkartorneqarlutik. Saqqummerneqartarneri aallaavigalugu. Ittoqqortoormiit soorlu aamma Islandimiut suleqatigalugit taamaaliorfigineqarsimasoq assersuusiorfigilaarusukkiga.
Tassa Ittoqqortoomiuni siornatigut Grønlandsfly angallasisarallarmat aki pavanerujorujussuarmiipput, taavalu Islandimiut suleqataalernerat ilutigalugu Danmarkimut angalasarneq, Europamut angalasarneq apparujorujussuarpoq. Ilaatigut 60-70% angullugu bilitsit apparujorujussuarsimapput, taavalu kingullermik saqqummiisoqaqqimmat tassuunatigut Grønlandsfly, Iceland Air-ilu unammeqatigiiinnerat ilutigalugu saqqummiunneqartut aallaavigalugit trekantflyvning-imik taaneqartartoq: Kulusuk, Nerlerit Inaat, Islandilu aallaavigalugu Grønlandsfly peqatigalugu neqeroornermi Air Icelandiri ajugaarujussuarpoq.
Aammalu tassani ilutigalugu akit apparujussuartinneqaqqipput, kisiannili ajoraluartumik taassuma kingunerisaanik pisoqarpoq, Grønlandsflyp Kulusuk tungaanut, Kulusukkooqqaartalersussaasugut, Kulusummiunut, Illoqqortoormiunut naatsumik oqaatigalugu illoqarfiit tunumiittut tamarmik akitigut qaffaaffigerujussuarneqarput, ilaatigut 65-70%-imik annertuseriarlutik.
Taavalu taanna annertuseriarneq kisimi ajornartorsiutaanngilaq, kisianni aamma ajornartorsiuterujussuit angallannikkut allat saqqummerarneqarput, tassalu Grønlandsfly ajoraluartumik Iceland Airirimik suleqateqarnera assigiinngitsutigut ajorseriaataasumik ajorsaarisutut isikkoqartumik allaat pissusilersorfigineqartarluni. Soorlu ilaatigut assersuutigisinnaavara Ittoqqortoomiiniit ilaasut Kulusummi mittussanngortut, 15-20 minuttiinnanngortut minnissamut Grønlandsfly timmisartorluni kitaanut Kangerlussuarmut aallarsimavoq. Tassani paasiniaanermi erseqqilluinnartumik oqariartuutigineqarpoq Iceland Airigooq nammineq angallassinera Grønlandsflyip akisussaaffiginngilaa, nammineq nalunaaquttat inissereersimasut malittussaagamigik.
Ilaatigut Grønlandsfly taamatut assigiinngitsutigut suleqateqarniarnermini akunnattoorfigisartagaai ilutigalugu neriuppunga aamma Naalakkersuisup arlaatigut ukiamut saqqummiinissaminut qanoq kontraktiliortoqarnerani aamma qulakkeerniassagaa, siunissami selskabet assigiinngitsut imminnut suleqatigiittussanngortarneri taamatut pitsaanerusumik aaqqinneqarnissaa qulakkiillaqqullugu.
Tassanimi eqqorneqartarput ilaasut, kiffartuunneqartut tassalu taakku akiliisuusut naak qitiusumiit taamatut taperneqarluni ingerlanneqaraluarlutik, kisianni taava piumasaqaatitaqarneri killeqartarmata ilaasut annertuumik eqqugaavallaartaqimmata.
Aamma mittarfiliortitsilernissat ilaatigut soorunami kaputartuunneqarmata tupiginngilakka, aamma nuannaarutigaara Naalakkersuisup oqariartuutigimmagu akilersinnaasut periarfissinneqassasut. Naalakkersuisut marlussuit Ittoqqortoormiuninngaanniit ersarilluinnartumik toqqammavilersuilluta Ittoqqortoormiut mittarfiat nuunneqarnissaa saqqummiuttarnikuuvarput, kisiannilu maannakkut Naalakkersuisup oqariartuutaa naapertorlugu inuiaqatigiinni siunissami sipaarutissanngorlugu nuunneqarsinnaanngitsoq Ittoqqortoormiut mittarfiup nipeqartumik ilaatigut saqqummiummagu, tassuunatigut kisitsisit ersarissut soorunami sipaarutaasinnaanerat uppernarsartakkat taakku saqqummiunnerat ilutigalugit.
Taamaattumik taamatut inuiaqatigiit sipaarutaasinnaasumik aaqqiisoqaannarani aamma angallannikkut sumiiffimmi tassani eqqartorneqartumi, ilaasut angallassinerat, nioqqutissanik pilersuineq aamma aaqqiissutaasinnaammat.
Taava naggataatigut oqaatigissavara nunatsinni angallassineq SLV qallunaat nunaaninngaanniit
piumasaqaataa naapertorlugu, nunatsinni timmisartuussineq ingerlapparput. Millionæritut suna tamaat limousiniusariaqartutut ingerlapparput.
Tunumiipput grusbanet arlallit, allaat nunatsinni mittarfiit annersaat Station Nordimiippoq, Boeing 747-t allarpassuillu timmisartut aasakkut meqattaartarput, tassanilu sulisut beredskabet assigiinngitsut killeqartinneqarput. Taavalu Mestersvigi sakkutooqarfittut maannakkut ingerlagaluartoq, tassani sulisut marluupput. Ullut tamaavissa ilaannikkut ullormut arlaleriarlutik timmisartunik miffigineqaqattaarlutik pisarput. Ilaatigut takornariarpassuarnik ilaasoqarlutik taamak utikajaartarlutik.
Tassa taamaattumik Pilup takusimasaai aamma nunatsinni atuukkaluarput, kisianni ilaannakusoortumik. Taamaattumik aamma Naalakkersuisut suleqqinnermini neriuppunga nunat sanilerisagut Islandimiut, Canadamiut avatangiisiminni naleqqussarlutik aaqqissuussimanerat aamma qissimigaartarumaraat.
Daniel Skifte, Inatsisartut Siulittaasuat, Atassut.
Taamaalilluta oqaluttumut kingullermut qujavugut. Allanik oqaaseqarumasoqanngilaq immik-koortoq 73 pillugu.
Taamaalillutalu apeqquteqaat aallaavigalugu Inatsisartuni oqallinneq tassunga killippoq.
Maluginiarpara Naalakkersuisut ukiamut nassuiaateqarnissaminnut apeqqut pillugu neqerooruteqarmata tamanna tusaatissatut tigussavarput.
Taavalu immikkoortumut tullermut nuutinnata siulittaasoqarfimmi ilaasortat ilaat Lars Karl Jensen qinnuigissavara aqutsinermik ingerlatsilaaqqullugu.