Oqaluuserisassani immikkoortoq 79-1 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ullut ataatsimiiffiust qulingiluaat,
ataasinngorneq aprilip 22-at 2002
Ataatsimiinnermik aqutsisoq: Anders Andreassen, Siulittaasoqarfimmi
ilaasortaq, Siumut.
Anders Andreassen, ataatsimiinnermik aqutsisoq, Siulittaasoqarfimmi
ilaasortaq, Siumut.
Qujanaq. Erseqqissaatigilaassavara tassa
arfinernut taamaatissagutta suli suliassasut arfineq marluk angumeriniartussaassavagut,
neriuppungalu aamma assortuuttoqarpallaarani ingerlasoqarumaartoq.
Massakkullu tikissavarput immikkoortoq 79,
tassalu taanna apeqqutaavoq. Isumaginninnikkut suliaqartut
pikkorissartinneqartarnerat pillugu Naalakkersuisunut apeqqut.
Apeqquteqartussarlugu qinnuigissavara
saqqummiusseqqullugu, Anthon Frederiksen kattusseqatigiit.
Anthon Frederiksen, Kattusseqatigiit.
Inatsisartunut siusinnerusukkut
siunnersuuteqarpunga inunnik isumaginninnermi sullissisut pikkorissartinneqartarnissaanut
tunngassuteqartumik.
Nalunngilara suliaq taanna Inatsisartut
Inunnik Isumaginninnermut ataatsimiititaliaanik suliarineqarsimasoq. Maanilu
ataatsimiinnermi apeqqutiginiarpara suliap sumut killissimanera aamma Inunnik
Isumaginninnermi sulisut pikkorissartinneqarnissaat qanoq ingerlanneqarpa?
Qanorlu tulleriiaarineq ingerlanneqarpa?
Anders Andreassen, ataatsimiinnermik aqutsisoq, Siulittaasoqarfimmi
ilaasortaq, Siumut.
Qujanaq. Tulliulluni akissuteqassaaq
Isumaginninnermut Suliffeqarnermullu Naalakkersui-soq.
Ole Dorph, Isumaginninnermut Suliffeqarnermullu
Naalakkersuisoq, Siumut.
Inatsisartunut ilaasortaq Anthon
Frederiksen isumaginninnermut sullisisut pikkorissartitsisarnissat pillugit apeqquteqarpoq.
Siulittaasoqarfimmik Inatsisartut oqaasiinnartigut saqqummiussassanngortinneqartumik.
Inatsisartunut ilaasortap
isumaginninnermut sullissisut pikkorissartinneqartarnissaasa inissisimanerat
aamma pikkorissartitsinerit qanoq ingerlaneqqartarnersut kiisalu aamma
pikkorissartitsinerit qanoq ingerlanneqartarnersut kiisalu qanoq
tulleriiaarisoqartarnersoq apeqqutigai.
Inatsisartut ukiakkut 2000-imi
ataatsimiinneranni aningaasanut inatsimmi kontoqarfimmi 30-mi isumaginninnermi
sulisunik ilinniartitseqqittarnermut aningaasanik immikkoortitsisoqassasoq
aalajangerneqarpoq. 2000-mi aningaasanut inatsimmi katillugit 1,6 million
kronit kontomut pingaarnermi 30.14.22-mi isumaginninnermi siunnersuinermik
ilaqutariinnillu katsorsaanermik nukitsorsaaneq kontomilu pingaarnermi
30.14.23-mi isumaginninnermut siunnersuinermik kiisalu
atornerlunneqarsimasunik katsorsaanermi nukitsorsaaneq aammattaarlu 2002-mi
aningaasanut inatsimmi 1.6 million kronit immikkoortinneqarput.
Kontomi pingaarnermi 30.14.22-mi
isumaginninnermi siunnersuinermik ilaqutariinnillu katsorsaanermi
nukittorsaaneq tunuliaqutaavoq Inatsisartut 2000-mi oktoberip ulluisa pingajuani
meeqqat angerlarsimaffiup avataani inissinneqarsimasunut angajoqqaajusut qanoq
iliorluni katsorsarneqarsinnaanerat pillugu immikkoortumik taassuminnga
oqaluuserinninnerat.
Maannakkut neqeroorutigineqartumik
nukittorsaaneq kiisalu sulisunik kommuneni atorfeqartunik
ilinniartitseqqittarneq ingerlanneqarput. Paasinarsimmat sulisussanik piukkunnartunik
atorfinitsitsiniarnermut atasumik annertuumik ajornartorsiuteqartoqartoq.
Aningaasaliissutit kommuneni sulianik
ingerlatsisartut ukiut pingasut sinnerlugit ingerlaneranni
immikkoortukkuutaartumi pikkorissartitsinissamut atorneqarput.
2001-mi immikkoortut siulliit marluk
kommuneninngaannersunit 30-nik peqataaffigineqartut ingerlanneqarput.
Immikkoortup aappaata kingorna nunap immikkoortukkuutaartumik sulisut
tikillugit nukittorsaaneq ingerlanneqarpoq. Immikkoortullu tulliuttut marluk aprilimi
kiisalu 2002-mi ukiakkut ingerlanneqarnissaat pilersaarusiorneqarluni.
2003-mi immikkoortut kingulliit marluk
ingerlanneqassapput. Aammattaaq immikkortut sinneruttut akornanni nunap
immikkoortukkuutaartumi sulisut tikillugit nukitsorsaaneq aaqqissuunneqassaaq.
Taamaalilluni sapinngisamik annerpaamik pikkorissaanerup pissarsiffiginissaa
pikkorissarnermi peqataasut qulakkeerniassammassuk. Pikkorissartitsineq
ingerlanneqassaaq pikkorissartitsisuniik pisortaqarfiup iluaneersunik kiisalu
avataaninngaaneersunik.
Pikkorissartitsinermut
peqataasussarsiornermik kommuneni sapinngisamik amerlasuuninnganniit
peqataasoqarnissaa pingaartinneqarpoq. Pingaartinneqarluni peqataasussat
isumaginninnermi siunnersortitut assigisaanilluunniit ilinniarsimasuunissaat.
Inuussutissarsiornikkut sivikinnerpaamik
ukiut marluk misilittagaqartuullutik kiisalu soorunami ulluinnarni
ilaqutariinnik katsorsaanermik suliaqartuullutik.
Peqataasut pikkorissartitsisullu tamarmik
pikkorissartitsinerup manna tikillugu ingerlanera assorsuaq naammagisimaarpaat.
Isumaginninnermi suliffeqarnermullu naalakkersuisoqarfiup ataana taamatut
pikkorissartitsineq eqqaassanngikkaanni ilinniartitaanermut
naalakkersuisoqarfik tassaavoq isumaginninnermi sullissisunik ilinniartitsinernik
ilinniartitseqqiinermillu isumaginnittartoq.
Perorsaanermik ilinniarfik kiisalu
Isumaginninnermi Siunnersortinngorniat ilinniarfiat kommuneni isumaginninnermi
sullissisunik ilinniartitseqqittarnerit neqeroorutigineqarnissaanik
inatsisitigut pisussaaffeqarpoq.
Perorsaanermik ilinniarfimmut
tunngatillugu pikkorissartitsisarnermut immikkoortoq
ineriartortinneqarluarsimasoq piuvoq. Kommuneni suliffeqarfinni tassa
ulluunerani paaqqinnittarfinni utoqqarnillu paaqqinnittarfinni
isumaginninnermilu sullisisunut pikkorissartitsinermik ilinniartitseqqiinermik
ingerlaavartumik neqerooruteqartartoq.
Isumaginninnermi siunnersortinngorniat
ilinniarfiat aammataaq pikkorissartitsiveqarpoq, pingaarnerusumik isumaginninnermi
siunnersortinik ilinniartitseqqiisarnernik siunertaqartumik.
Taamaattoq pikkorissartitsinissanik
neqeroorutit ukiuni kingullerni annikissimapput, aningaasaqarniarnermik
pissuteqartumik. Tamatumanilu Isumaginninnermi siunnersortitut ilinniartitaanermik
namminermik aallussinissaq pisariaqarnerusimavoq.
Peqqinnissaqarfiup ataani Peqqinnissamik
ilinniarfik ilinniagaqaqqinnissanik pikkorissarnissamillu
annikigisassaanngitsunik neqerooruteqarpoq. Peqqinnissamik tunngasunik
ilinniagalinnut pikkorissaanerit sulisut isumaginninnermut tunngasut
ilinniagalinnut peqataaffigineqarnissaannik periarfissaqartitsillutik. Uani
eqqarsaatigineqarput pikkorissartitsinerit nunaqarfinni peqqinniissamik
ineriartortitsineq, aliasungaarneq nalaataqarnerlunnerlu, aammalu meeqqanut
tarnikkut nappaatilerineq, utoqqarnik isumassuineq paaqqutarinninnerlu.
Kommuneni tarnikkut nappaatilinnut
tapersersortitut sulisunut pisinnaanngorsaalluni pikkorissartitsinerit aamma
Peqqissaanermik ilinniarfiup ingerlassimavai.
Ukiut tamaasa Paarisa kommuneni
pitsaaliuinermi siunnersortitut sulisunik pikkorissartitsisarpoq.
Sammineqartarlutik peqqinnissamik siuarsaanissami aamma pitsaaliuinermik
suliaqarnermi sinaakkutissat paasinninnissarlu.
Tamatumalu ingerlaavartumik
pikkorissartitsisoqartarpoq, najukkami oqartussaasoqarfiit assigiinngitsunik
suliallit aammalu nammineq kajumissutsiminnik sulisut ajornartorsiutinik soorlu
imminortarnerit meeqqanik kinguaassiutitigut atornerluinerit ilaalu
ilanngullugit suliaqarnerinut atatillugu.
Kommunenut annertuumik
ajornartorsiuteqartunut soorlu Illoqqortoomiuni immikkut suliniarnerup
malitsigisaanik taamatuttaaq Peqqinnissaqarfiup ataani, najukkanik inunnik
isumalluutinut piginnaanngorsaalluni pikkorissaasoqarpoq, marlunnik
immikkoortortalimmik.
Inatsisartunut ilaasortap Anthon
Frederiksenip apeqqummi itisilerneqarnissaa kissaatigippagu Naalakkersuisunit
kaammattorparput, pisortaqarfimmut attuumassuteqartumut saaffiginneqqullugu.
Anders Andreassen, ataatsimiinnermik aqutsisoq, Siulittaasoqarfimmi
ilaasortaq, Siumut.
Qujanaq. Taavalu apeqquteqartoq.
Anthon Frederiksen, Kattusseqatigiit.
Akissuteqaammut qujavunga. Aammalu
kaammattuutigineqartoq atorluarniarumaarpara. Qujanaq.
Anders Andreassen, ataatsimiinnermik aqutsisoq, Siulittaasoqarfimmi
ilaasortaq, Siumut.
Apeqquteqartup naammagisimaarpaa,
taamaakkaluartoq periarfissaqarpoq ilaasortat ataasiakkaat imaluunniit minutit
marluk atorlugit apeqquteqarsinnaalluni imaluunniit uparuaasinnaanermut. Asii
Chemnitz Narup, Inuit Ataqatigiit.
Asii Chemnitz Narup, Inuit Ataqatigiit.
Tassa imaa arlalinni imaa
oqaasissaqalaarlunga.
Maluginiagassat soqutiginartut
arlaqarput. Soqutiginarnerpaajugunarpoq uani Perorsaanermut ilinniarfiup kursusertitsisarnissaminut
aningaasatigut periarfissarissaarnera. Taava tassunga sanilliullugu
Isumaginninnermut Siunnersortinngorniat ilinniarfiata imaa aningaasanik
amikkisaarneq imaluunniit annikissimapput aningaasaliissutit, taamaalilluni
aamma naak peqqussutitigut pisussaaffigigaluarlugu neqerooruteqartassalluni
pikkorissartitsisarnissanut tamanna periarfissaasimanngilaq.
Eqqaamaneqassajunnarsivoq 2000-imi
ukiakkut aningaasanik inatsisissami siunnersuutip eqqartornerani annertuumik
pikkorissartitsisanermut tunngasoq apeqqut eqqartorsimagatsigu maani inimi.
Aporaassutigisarlugu taamani ujartukkatta ilagivaat ataqatigiissaarineq qanoq
ittut ingerlanneqarnersut. Taamanikkullu oqarfigineqarpugut kontonut
assigiinngitsunut siammarsimagaluartut inulerisut pikkorissartinneqartarnerat
taamaakkaluartoq ataqatigiissaarineq ingerlanneqartartoq.
Taava oqaatigilaarusussavara aamma
Anthon Frederiksenip apeqqutigigaluarpaa aamma qanoq
tulleriiaarisoqartarnersoq, taanna akineqanngilaq, kisianni inuttaata
naammagiinnarmagu soorunami sinnerlugu ulapputigissanngilarput.
Taava Isumaginninnermut
naalakkersuisoq akissuteqaatani Isumaginninnermi ataatsimiititaliami
ilaasortatut, malinnaatinneqarnerput najoqqutaralugu ilisimavarput aamma ulloq
unnuarlu angerlarsimaffinni sulisut annertuumik modulikkaartumik pitsaasumik
ilinniartitseqqiinertut ilusilimmik ilinniarteqqinneqartut. Taanna
ilassutigilaaginnarpara.