Ulloq ataatsimiiffik siulleq, tallimanngorneq septembarip 21-at 2001, nal. 11:00

Oqaluuserisassani immikkoortoq 1

Ataatsimiinnerup ammarneqarnera.

(Inatsisartuni sivisunerpaammik ilaasortaasimasunit angajulleq)

 

Otto Steenholdt, attaviitsoq, ataatsimiinnermik ammaasoq:

Inatsisartuni ataatsimiinneq maannakkut nalunaarutigaara ammartoq. Silarsuarmi pisimasut tamanit ilisimaneqarput. Taamaattumik pissusissamisoorsoraara Inatsisartut ataatsimiinnerat maanna ammartoq aallaqqaaserlugu nikuilluta misiginneqatigissummillu ilumiugisaqarluta minutsimik ataatsimik nipaallisimagallassasugut.

Qujanaq.

Tassa inatsisartuni suleriaaseq naapertorlugu siulittaasoqarfimmik qinersineq piareersarlugu ammaanersiorluni ataatsimiinneq Inatsisartut ilaasortaannit sivisunerpaamik ilaasortaasumit siulersorneqartussaavoq.

Maannalu oqaatigilara uanga kisima sivisunerpaamik maani ilaasortaasimannginnama, kisiannili marluugatta, aalajangiinermullu toqqammaviusoq tassaasimavoq utoqqaanerusup Inatsisartut ataatsimiinnerat ammassagaa. Taamaalillunga uanga taanna ataqqinaat tigusimavara.

Taamaattumik pisarnera malillugu ullumikkut aamma nuannaarlunga killitsisimaarpunga Inatsisartuni ilaasortaqatikka ukiumut suliffiusussamut aamma ukioq manna maani nalliuttorsiorpalaartumik ataatsimiittarfitsinnut tikilluaqqusinnaagakkit.

Inatsisiliortuni ilaasortaaneq annertuumik akisussaanermik nassataqartuuvoq. Taamaammat inuit inatsisinik malinnittussat qitiutillugit eqqarsaatigisarisigit. Aamma taamatorluinnaq kaammattorumavassi nunatta asasatta inatsisiliortutut suliffigineratigut pitsaasumik tusaamaneqalersissagissi, oqaatsit uku nalunngeriikkasi eqqarsaatissinniitsittuarnerisigut, tassalu nuna inatsisitigut aqunneqassaaq.

Naalaakkersuisuttaaq qamannga pisumik maanga Inatsisartut ataatsimiittarfiannut inatsisiliortunik qanimut suleqateqarluarnissaannik kissaateqarlunga tikilluaqquakka.

Allaffeqarfiit marluusut sulisorpassui ataatsimiinnermi ulapissaqisut Inatsisartunilu pinngitsoorneqarsinnaanngitsut sulilluarnissaannik suleqatiginnilluarnissaannillu kissaakkumavakkattaaq.

Taamatuttaarlu aamma pissusissamisoorluinnartumik Naalagaaffiup Sinniissuutitaa, Rigsombudsmandia kiisalu aamma Inatsisartut nammineq Ombudsmandiat ataatsimiinnerup nalaani takkuttuartartussat tikilluaqqungaarpakka.

Nunaqqativut sineriassuarmi radiokkut tusarnaarlutillu TV-kkut isiginnaarutikkut malinnaajuartitassat aamma taamatuttaaq tikilluaqqungaarniarpakka.

Oqaatigissavara maanna ataatsimiinnerup aallartinnerani marlussuit najuussinnaannginnerat kingusinnerusukkut tikikkumaarakku, taakkualu aamma sinniisussaat soorunami tikilluaqqujumaarlugit.

Inatsisartuni ilaasortaq Olga Poulsen piffissaq ataatsimiiffiusoq tamaat sulinngiffeqarnissamik qinnuteqaateqarpoq. Aammalu Inatsisartunut ilaasortaq Finn Karlsen, ullormiit 21. september aallartittumit sulinngiffeqarallarnissaminik qinnuteqarpoq pissutissaqavissumik. Taakkulu qinnuteqaataat Siulittaasoqarfiup akuerereersimavai.

Olga Poulsenimut Finn Karlsenimullu sinniisussatut taartaasussat, tassaasut Paninnguaq Olsen aamma Saaleeraq Johansen, aggersarneqareersimapput. Qinigaasinnaanerup Misilinneqarnissaanut Ataatsimiititaliap nalunaarutigereersimavaa pineqartut tamarmik qinigaasinnaasutut isigineqartut.

Tamanna pissutigalugu Inatsisartunut inassutigissavara Paninnguaq Olsen Olga Poulsenip erninermi kingorna sulinngiffeqarallarnerani aamma Saaleeraq Johansen Finn Karlsenip sulinngiffeqarallarnerani Inatsisartut ataatsimiinnerini peqataassasut.

Taamaattumik Inatsisartunut apeqqutigissavara inassuteqaat taanna akuerineqarsinnaanersoq?

 

Akuerineqarpoq.

 

Taavalu kissaatigissavara taakkua sinniisussatut maani taaneqartut issiavissaminnut ingikkiartoqqullugit. Tikilluaritsi sulilluarisilu.

 

Taavalu taamatut naatsumik oqaaseqareerlunga aammaarlunga ilaasortat ataatsimiinnermi najuuttut tikilluaqqoqqippakka. Neriuutigaara ataatsimiittarnissavut torersumik imartuumillu ingerlasarumaartut.

Suliassama matumarpiaap tullia tassaavoq Inatsisartut Siulittaasussaannik qinersineq. Tassa ukioq manna 2001-imi Inatsisartut ukiakkut ataatsimiinnerata ammarnersiorneqarnerani ullormut oqaluuserisassani immikkoortoq 5, Inatsisartut Siulittaasuannik qinersineq tikipparput.