Oqaluuserisassani immikkoortoq 12-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut arfersaneq arfineq pingajuat, sisamanngorneq 25. oktober 2001,
nal. 18:10
Ataatsimiinnermik
aqutsisoq: Ole
Lynge, Inatsisartut Siulittaasuat, Inuit Ataqatigiit.
Jonathan
Motzfeldt, Naalakkersuisut
Siulittaasuat, Siumut.
Sierra
Leonip Liberiallu tungaanut aalajangersimasutigut malittareqqusat pillugit
Kalaallit Nunaannut peqqussutissatut siunnersuut aamma Liberiap tungaanut
aalajangersimasumik malittareqqusat pillugit Kalaallit Nunaannut
peqqussutissatut siunnersuut Namminersornerullutik Oqartussanit
oqaaseqaateqarfigisassaq nunanut allanut ministereqarfiup nassiuppai.
Peqqussutit suliarineqarput naalagaaffiit peqatigiit isumaqatigiissutaat normu
1.306 5. juli 2000-imeersoq aamma 1.343 7. marts 2001-imeersoq
naammassiniarlugit.
Peqqussutissami
pingaartumik Sierra Leonimit Liberiamillu diamantinik eqqussuineq sakkusssanillu
Sierra Leonimut Liberiamullu nioqquteqarneq maligassiuunneqarpoq. Sierra Leonimi
innuttaasut akunnerminni sorsunnerat 1991-ikkut qiteqqunneranni aallartippoq.
Tamatuma nassataralugu nunat tamalaani arajutsisimaneerummat sakkussanik
diamantinik akilersillugit nioqquteqarneq pikitsitsisut sakkutooqatigiivisa ROF
diamanteqarfissuit sakkussanik atortussanillu pisiniarnermut
aningaasalersuissutaasut nakkutigisarai.
Naalagaaffit
peqatigiit naliliipput tamatumalu pingaartumik nunarsuup immikkoortuanut
qanitarisanut ilanngullugit Liberia aamma Burkina Fasu ROF-ip sakkutooqarnikkut
iliuuseqartuarnissaa ajornarunnaarsikkaa. Isumaqatigiissutini peqqussutinilu
anguniarneqarpoq nunarsuup immikkoortuani tassani pikitsitsisut
aningaasalersuisinnaassusiisa sakkussanillu pissarsisinnaanerisa
killiliiffigineqarnissaat sorsunnerit unitsinneqarnissaat siunertaralugu.
Taamatut
oqaaseqarlunga suliassaq Inatsisartuni akuersortumik oqaluuserisassanngortippara.
Peter Grønvold-Samuelsen, Siumup oqaaseqartua.
Peqqussutit pineqartut naalagaaffiit peqatigiit isumaqatigiissutaassa 5. juli 2000-imeersup aamma 7. marts 2001-imeersup naammassiniarneqarneranik imaqartut Siumup akuerseqataaffigerusuppai. Peqqussutitigut pingaartumik Sierra Leonimik Liberiamillu diamantinik eqqussuineq sakkussanillu Sierra Leonimut Liberiamullu nioqquteqarneq inerteqqutaalersinniarlugu maleruagassiuunneqarput.
Malittareqqusat nunanut allanut ministeriaqarfiup Namminersornerullutik Oqartussanut oqaaseqaateqarfigeqqusai taamaalilluta Inatsisartuni akuersaarneqarnissaat Siumup tamakkiisumik peqataaffigissavaa.
Daniel Skifte, Atassutip oqaaseqartua.
Qallunaat nunaata nunanut allanut ministereqarfiata siunnersuut kunngikkormiumit atugassanngortinneqartussat nassiuppaa. Sierra Leonimit Liberiamillu diamantinik silineqanngitsunik silisanilluunniit Kalaallit Nunaata toqqaannartumik toqaannanngikkaluamilluunniit nunatsinnut eqqussuisinnaanissaanik imaqartoq.
Qinnuteqaatip pingaarnertut siunertaraa sorsunnikkut akersuunnerit unitsinniarnissaat. Tassami nunani taakkunani pikisitsisut diamantinik pisuussuterpassuit aqutaraat. Taakkunanngalu iluanaarutit sorsunnerit ingerlatiinnarnissaannut aningaasalersuutaallutillu sorsunnermi sakkussanut atortussanut pisiortuutigineqartarmata.
Atassutip tamakkiisumik qinnuteqaat tapersersorpaa. Kiisalu inuit suleqatigiiffiit piginneqatigiiffiit assigisaallu peqqussummik unioqqutitsisut pinerluttarnermut inatsisit malillugit pineqaatissinneqartarnissaat akuersaarlugu.
Lars Sørensen, Inuit Ataqatigiit oqaaseqartuat.
Sorsunnerup unitsinneqarnissaat eqqisseqatigiinnissarlu anguniarlugu iliuusissanut Inuit Ataqatigiit peqataassalluta piareersimajuarpugut. Inatsisartuni aalajangiiffigisassatut siunnersuut Naalagaaffiit peqatigiit aalajangersagaannik aallaaveqartoq manna tamatuminnga siunertaqarpoq. Afrikkamilu Sierra Leonimi sorsunnerit unitsinneqarnissaat eqqisseqatigiittoqarnissaanullu kaammattueqatigiinnissamik aamma ilaqarluni.
Nunarput tamatumani peqataassalluni pisussaaffeqarpoq. Taamaattumillu annerusumik oqaaseqarnata Inuit Ataqatigiit saqqummiussaq manna akuersaarparput.
Mogens
Kleist, Kattusseqatigiit
oqaaseqartuat.
Aap, annertunerusumik oqaaseqarata Naalakkersuisut Siulittaasuata
innersuussutai akuersaassallugit Kattusseqatigiinniit oqaaseqassaagut.
Qujanaq.
Otto Steenholdt, attaviitsoq.
Saqqummiussaq soqutiginarluinnartoq kiisami nunatta avataaniittumut oqaseqarniliassagatta. Tassa nunanut allanut Danmarkimi ministereqarfiup peqqussutissaatut siunnersuutit nassiussai pissusissamisoortut ilassilluartariaqarput. Peqqussutissaq nunatsinnit akueralugu oqaaseqarfigisariaqarluinnartut Naalagaaffiit peqatigiit isumaqatigiissutannit naammassinninniutaapput.
Aamma tallisaanianngikkaluarlunga makku ilanngutilaarlakka. Nunat taakku marluk Afrikap kitaaniittut oqaluttuarisaanerat sammilaarlugu. Tassaapput nunasiaqarnianit killissaa tikillugu pigineqarsimasut. Liberia nunatsinni ilisimaneqarluarpoq umiarsuit nunanit allanit pigineqaraluartut qularnanngitsumik akileraarutit pinerullugit Liberiap erfalasuanik erfalasoqarajummata.
Nunallu aamma taassumap
inussianik nioqquteqarsimaneq assut attuumassuteqarfigaa. Tassa
amerikami qernertut inussiaajunnaartut amerlaqisut Liberiamut uterarsimammata.
Ukiullu arlaqartut inuiaqatigiinni taakkunani siuttuusimallutik.
Saqqummiussami nunat taaneqartut inuit imminnut manna tikillugu
sorsuuttuartutut taasariaqarput. Tassalumi taamak sorsuuttuarnerat inunnillu
atugarliortitsiuarnerat kipitinniarlugu Naalagaaffiit peqatigiit qanoq
iliuuseqarniarsaripput.
Nunat taakku pisuussutaat diamantiinaanatik guultiinaanatik aamma
saffiugassat allat taagorneqarsinnaasut tassaajuarput sorsunnerminni
sakkussaminnik pisissutigisartagaat. Taamattuttaaq iliortartunut ilaavoq
afrikkap kitaata avannaaniittut Burkina Faso.
Kalaallit Nunaannut peqqussutissap missiliuutaani Sierra Leoni kisimi § 1-imi ersarissumik peqqussutissami taakkarsorneqarmat. Taamaatumik
Naalakkersuisut siulittaasuat aperisariaqassavara sooq peqqussutissamit
taaneqanngitsut Liberia aammalu Burkina Faso saqqummiussissummi
ilannguneqarsimanersut. Dronningip atsiugassaani tassani taakkua marluk
ilaanngimmata.
Sorsunnerit kipitittariaqassappata sakkussanik pissarsisarnerat sunillu
akiliisarnerat nakkutigisaasumik nakkutiginiartariaqarpoq.
Taamak oqaaseqarlunga oqaaseqarfigisassatut nassiussaq akuersaarlugu
oqaaseqatsiarpunga.
Ole
Lynge, Inatsisartut
Siulittaasuat, Inuit Ataqatigiit.
Apeqqutigissavara
Naalakkersuisut Siulittaasuat oqaaseqaqqinniarnersoq. Taamaappasinngilaq.