Taamaalilluta immikkoortoq 16 tikiinnassavarput. 

Tassalu piniarneq aallaaniarnerlu pillugit Inatsisartut inatsisaata allanngortinneqarneranik Inatsisartut inatsisissaatut siunnersuut.

( Aappassaaneerneqarnera)

 

Tassa eqqaasissutigiinnarlugu taakkununnga ataatsimiititaliat isumaliutissiissuteqarsimapput. Immikkoortoq 16-imut tunngatillugu amerlanerussuteqartut pisariqartissimanngilaat ataatsimiititaliap isumaliutissiissutaanik saqqummiussaqarnissaq. Taamaattumik apeqqutigiinnassavara immikkoortoq 16 pillugu oqaaseqartoqarniarnersoq?

 

Anthon Frederiksen, Kattusseqatigiit.

Piniarneq aallaaniarnerlu pillugit Inatsisartut inatsisaata allanngortinneqarneranik Inatsisartut inatsisissaatut siunnersuutip aappassaaneerneqarneranut tunngatillugu Kattusseqatigiinniit imaattumik oqaaseqarniarpugut.

 

Allannguutissatut siiunnersuutip siullermeerneqarnerani Kattusseqatigiinni oqaaseqaatigut innersuussutigalugit aalisarnermut piniarnermut nunalerinermullu ataatsimiititaliap isumaliutissiissutaa aammalu Naalakkersuisut akissuteqaataat misissoreerlugit imaattumik oqaaseqarfigissavagut.

 

Kattusseqatigiinni maluginiarparput suliap siullermeerneqarnerata kingorna paaqqinnittarfimmut tunngatillugu isumaliutissiissutikkut aammalu Naalakkersuisut akissuteqaataatigut ersarissarneqartoq paaqqinnittarfik pineqartoq tassaassasoq imaluunniit tassaasoq isumaginninnermi paaqqinnittarfiit inunnik perorsaanerminni piniarnermik aallaaniarnermillu periaatsinik ukioq kaajallallugu atuisut.

 

Suliap siullermeerneqarnerani Kattusseqatigiinniit ilaatigut oqaatigaarput aalisarnermit piniarnermillu inuutissarsiuteqartut pisortat ingerlataannit unammillerneqarnissaannut aallarniutaasinnaasunik iliuuseqarniarnerit Kattusseqatigiinniit akuersaarsinnaanngilluinnarigut. Aamma maannakkut akissuteqaatini maluginiarparput paaqqinnittarfik pineqartoq piniagassanik killeqanngitsumik piniarsinnaatitaasanngitsoq. Tamanna soorunami pissusissamisoorpoq. Aammalu suliap siullermeerneqarneraniit piumasarineqartunut sukaammiutaasoq paasillutigu.

 

Paaqqinnittarfiup pineqartup piniarsinnaatitaalernissaani aalisartunut piniartunullu iluaqutaasumik aammalu aalisartunut piniartunullu paaqqinnittarfimmi pineqartumi ilitsersuussisussatut ilinniartitsisutulluunniit annertunerusumik aalisartut atorneqarnissaat aaqqiiniartoqassappat ajorinngilarput.

 

Tamanna maannakkut tamanna akineqarsinnaappat soorunami qujagissavarput. Tassami inuusuttuaqqat ajornartorsiutillit aamma ikiorserneqarnissaat eqqarsaatigalugit tamanna pisariqarsoraarput. Isumaqaratta inuusuttuaqqat ikiortariallit aamma piniarnermik inuutissarsiuteqavissunik ilitsersuunneqarpata pissusissamisoornerpaajussasoq. Kisianni oqareernitsituut aalisartut piniartullu periarfissaannik ajornerulersitsisumik iliuuseqarfiussappat Kattusseqatigiinniit akuersaarnartinngilarput.

 

Taamaammat uggornarpoq suliap aappassaaneerneqannginnerani tusarniagassat tamakkerlugit tusarniarneqarsimannginnerat. Minnerunngitsumik aamma paaqqinnittarfimmiit pineqartumiit paasissutissinneqarsinnaasuugutta immaqa oqaaseqaativut allaanerussagaluarput. Taamaattumik aalajangigassani suugaluartunilluunniit susassaqartut tamakkiisumik tusarniarneqarnissaat suli aammaarluta piumasaqaatigeqqipparput. Tassami naammaginanngitsumik sulinissarput maani perusunngeqaarput. Kisiannili paasissutissanik tamakkiisunik aalajangigassanut tunngasunik naammattunik peqarluta aalajangeerusuppugut, soorunami.

 

Tassami paasivarput imaluunniit paasisagut malillugit suliap suliaq manna inunnik isumaginninnermut ataatsimiititaliamiluunniit oqaluuserineqarsimanngilaq. Uffa massa inuusuttuaqqat ulloq unnuarlu paaqqinnittarfimmi pineqartumi najugaqartut aamma sunniuteqaqataanissaminnut tusarniaaffigineqarsimasuugunik immaqa qularnanngitsumik pitsaasunik saqqummiussaqaraluartut.

 

Taamatut oqaaseqarluta akissuteqarfigineqarnissarput naatsorsuutigivarput.

 

Ole Lynge, Inatsisartut Siulittaasuat, Inuit Ataqatigiit.

Qujanaq, taava apeqqutigissavara akissuteqarfiginiarneqarnersoq.

Hans Enoksen, Aalisarnermut, Piniarnermut Nunaqarfinnullu Naalakkersuisoq, Siumut.

Qujanaq. Tassa malugaara ataatsimiititaliami amerlanerussuteqartut isumaqatigiillutik inatsisissatut siunnersuutigineqartoq akuersaaraat. Aamma taanna Naalakkersuisut sinnelugit qujassutigissavara. Taavalu uani apeqqutigineqartut Kattusseqatigiinninngaaniit soorlu ilinniartitsisut allallu misilittagaqarnissat piniarnermik eqqartorneqartoq piniarnermik inuussutissarsiuteqavissunik ilitsersuunneqarpata pissusissamisoornerpaajussasoq. Tassa taakkuupput taamatut atorneqartut.

 

Sisimini taanna paaqqinnittarfik taamatut taasarmassuk. Qasapermiut tassani aalisariutaanni tassa taakkuupput inuttaasut. Aalisarnermik piniarnermillu ilitsoqqussallit. Taamaammat sunniuteqarluartumik tassani perorsaaneq ingerlanneqartoq aamma uanga takusinnaasakka malillugit illersorneqarsinnaavoq. Tassanilu taakku atorneqarput.

 

Isumaqarpunga, tusarniaanissamut tunngasut allallu ingerlanneqareersimasut, kisianni soorunami ataatsimiitialiamut aamma uterteqqinneqarsinnaavoq. Kisianni isumaqanngilanga ataatsimiititaliami suliareqqinneqassasoq isumaqatigiinneq takusinnaagakku annertungaatsiartoq inatsisissap uumap allangortinneqarnissaanut.

Taakku oqaatigisatit siunissami eqqumaffigineqarnissaat sillimaffigiumaarparput.

Qujanaq.

 

Ole Dorph, Isumaginninnermut Suliffeqarnermullu Naalakkersuisoq, Siumut.

Kattusseqatigiinninngaanniit Anthon Frederiksenip apeqquteqaataanut aamma uangattaaq Aalisarnermut Piniarnermullu Naalakkersuisup oqaatigeriigai taakku uteqqinnianngikkaluarlugit oqaatigissavara taanna inissiisarfik tassasoq Qasapermiut tassani ulluinnarni nakkutilliisut assigiinngitsunik tunuliaquteqarput. Ilai pædagogiupput ilai aalisartuupput piniartuupput. Taavalu ilaat aamma piniarnermik aalisarnermillu angallatit naalagassaanut naammassisaqarnikuullutik.

 

Taamaattumik nakkutigineqarnerat nalilersinnaavarput ajunngivissuusoq. Aamma akisussaassuseqartumik taanna ingerlanneqartoq. Aamma tassunga atatillugu naatsoralannguamik oqaatigiinnassavara massakkut imaginninnermut pisortaqarfimminngaaniit naatsorsuutigineqanngilaq makkua angerlarsimaffiit paaqqinnittarfiit allat uani qinnuteqaammut assingusumik qinnuteqassasut.

 

Tassa taakkua uani kisimik pineqarput. Aammalu taakkua oqareernittut kisimik pineqarlutik. Allanik takkuttoqarsinnaanissaa ilimanaateqanngilaq. Taamaattumik taanna naatsuaqqamik nassuiaateqarfigilaavinnarpara kissaatigineqarnera aallaavigalugu.

 

Johan Lund-Olsen, Inuit Ataqatigiit:

Tassa naatsuaraannannguaminguna una aalisarnermut piniarnermut nunalerinermullu ataatsimiititaliami siulittaasutut una erseqqissaatigiinnarniariga tassa ataatsimiitialiaq isumaqatigiilluni uani isumaliutissiissuteqarmat. Taanna isumaqarpunga erseqqivissumik oqaatigisariaqartoq. Tassami aatsaavinnaq Aalisarnermut Piniarnermut nunaqarfinnut Naalakkersuisoq kukkullatsiarluni oqaatigivaa ataatsimiitialiami amerlanerussuteqartoqarsimasoq. Ikinnerussuteqartoqarsimasorlu, kisianni tassa taamaanngilaq.