Ullut ataatsimiiffiusut arfersaneq arfernat, ataasinngorneq 22. oktober 2001, nal. 13:15

Oqaluuserisassani immikkoortoq 20

Takornariartitsisarnermik inuussutissarsiuteqarnerup aamma nunami inuussutissarsiutit siuarsarneqarnissaat pillugit Inatsisartut inatsisissaatut siunnersuut.

(Naalakkersuisut Siulittaasuat)

(Aappassaaneernera)

 

Ataatsimiinnermik aqutsisoq: Ole Lynge, Inatsisartut Siulittaasuat, Inuit Ataqatigiit.

Ole Lynge, Inatsisartut Siulittaasuat, Inuit Ataqatigiit.

Tassani aamma immikkut Inatsisartut inuussutissarsiornermut ataatsimiititaliaat isumaqatigiilluni isumaliutissiissuteqarpoq piumasaqaateqartoqarsimanngilaq immikkut aappassaaneerneranik oqaaseqarnissaq. Taava apeqqutigissavara allanik oqaaseqartoqarniarnersoq.

 

Jonathan Motzfeldt, Naalakkersuisut Siulittaasuat, Siumut.

Takornariartitsisarnermik inuussutissarsiornerup aamma nunami inuussutissarsiutit siuarsarneqarnissaat pillugu Inatsisartut inatsisissaatut Naalakkersuisut siunnersuutaat pillugu Inatsisartut inuussutissarsiornermut ataatsimiititaliaata isumaliutissiissutaanut Naalakkersuisut sinnerlugit qujavunga.

 

Ataatsimiitialiap inatsisissatut siunnersuummini aningaasalersueriaatsit assigiinngitsut allaffissornikkut aqunneqarnera pillugu Sulisa A/S-imik suleqateqarnissanik Naalakkersuisunut kaammattuuteqarpoq.

 

Namminersornerullutik Oqartussat inatsisit ilaata allaffissornikkut aqunneqarnera sulisamit tamanna pillugu isumaqatigiissuteqareersimammata erseqqissassavara. Taamatuttaaq Namminersornerullutik Oqartussat inatsisit ilaata allaffissornikkut aqunneqarnera pillugu Greenland Tourism A/S tassa takornariaqarneq pillugu siunnersuisoqatigiinnik aamma isumaqatigiissuteqarput. Inatsisip allaffissornikkut aqunneqarnerata siunissami iliuuserisinnaasaa aamma niuernermik inuussutissarsiornermillu siuarsaaneq pillugu nassuiaammi 2002-mi upernaakkut katersuunnermi saqqummiunneqartussami qulaajarneqassapput.

 

Aamma ataatsimiitaliap Naalakkersuisunut kaammattuutigaa isumaliutigeqqullugu aningaasaateqarfiup unnuisap siulersuisunut Sulisa A/S-ip sinniisaanut toqqaanissaq pissusissamisoornersoq. Naalakkersuisut soorunami siunissami aningaasaateqarfiup unnuisap siulersuisuinut toqqaasarnissaminut atatillugu tamanna eqqarsaatigiumaarpaat.

 

Nunat allamiut umiarsuaasa sinersorlutik takornariartitsisartut akitsuusiiffigineqarsinnaanerinik misissuisoqarnissanik siunnersuut kiisalu pinngitsooratik umiarsuit taakku ilisimasortaqartalersinnaanerat aamma oqaaseqarfigilaaniarpakka.

 

Naalakkersuisut taakku misissorneqarnissaat pissusissamisoortutut isumaqatigaat. Taamaattumik Naalakkersuisut suliniummik aallartitsereerput qulaajarniarlugu umiarsuit atorlugit sinersorluni takornariartitsisarneq annertusiartuinnartoq qanoq annertutigisumik iluaqutigisinnaaneripput. Aammalu tassunga atatillugu akitsuusiisarnikkut assigisaatigulluunniit iliuuseqartoqarnissaa aamma pisariaqarnersoq aamma misissorniarparput.

 

Tamatumunnga ilanngullugu aamma ilisimasortaqartarnissap eqqunneqarsinnaanera aamma qulaajarneqassaaq.

 

Tassa qujassutigaara taamatut tapersiisimaneq Naalakkersuisut sinnerlugit maani saqqummiunneqartoq.

 

 

 

Ole Lynge, Inatsisartut Siulittaasuat, Inuit Ataqatigiit.