Oqaluuserisassani immikkoortoq 21-2 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut arfersaneq arfineq pingajuat, sisamanngorneq 25. oktober
2001, nal. 17:40
Ataatsimiinnermik
aqutsisoq: Ole
Lynge, Inatsisartut Siulittaasuat, Inuit Ataqatigiit:
Oqaatigissavara
Siulittaasoqarfimmut immikkut ataatsimiititaliamit oqaaseqarfiginissaanut
qinnuteqartoqarsimanngitsoq, taamaattumik apeqqutigiinnassavara
oqaaseqarumalluni nappaasoqarnersoq.
Mads-Peter Grønvold, Kattusseqatigiit.
Kattusseqatigiinniit siullermeerneqarnerani oqaaseqaatigut innersuussutigalugit imatut aapaassaaneerneqarnerani oqaaseqassuugut. Siullermik Kattusseqatigiinniit isumaqarpugut taamatut peqqussutissatut siunnersuutip allanngortinneqarnerani aningaasalersuisinnaasut qulakkeerneqarsimasariaqaraluartut. Inatsisartuni eqqaamaneqartariaqarmat taamatut allannguinermi aningaasaliissutigineqartunik annertuumik malitseqartariaqarmat.
Kattusseqatigiinniit pingaaruteqarluinnartutut isigaarput aningaasalersuisinnaanerup qulakkeerneqarnissaa. Soorlu Inatsisartuni ilaatigut oqaatigineqarsimasoq aningaasalersuisinnaasut allat peqataasariaqartut. Taamaattumik Kattusseqatigiinniit pingaaruteqarluinnartutut isigaarput aningaasalersuisinnaasut aamma allat qulakkeertariaqarnerat.
Naallakkersuisunit oqaatigineqarpoq 30,5 millionit aamma aningaasaliissutigineqartut. Taakkua aningaasaliissutigineqartut aalisarnermut nunalerinermut inuussutissarsiuteqartunut atorneqartussaapput. Eqqaamaneqartariaqarpoq ukiuni siusinnerusuni ESU-mut aningaasaliissutit ilaatigut 60 millionit tungaanut annertussuseqartut atorneqartarmata.
Taamaattumik maannakkut sinerissap qanittuani aalisarnerup nutarterneqarnissaanut aningaasaliissutit naammanngitsut Kattusseqatigiinniit isumaqarpugut. Pisariaqarluinnarpoq sinerissap qanittuani aalisarneq ineriartortinneqarneqassappat aningaasaliissutit piviusorsiortut aningaasaliissutigineqartariaqaraluarmata. Kattusseqatigiinniit peqataasinnaavugut maannakkornit annertunerusunik aningaasaliisoqarsinnaanera Naalakkersuinikkut qulakkeerneqarsinnaappat.
Kattusseqatigiinniit piareersinnaavugut aningaasaliissutinik qaffaanissamut ujartueqataasinnaanermut nunatta aningaasaqarneranut pitsanngorsaataasinnaasut suli annerusumik aallunneqarnerisigut nunatta karsianut aningaasat isertinneqarsinnaasut annertunerusinnaammata. Aammalu Naalakkersuisunit qulakkeerneqarsinnaappat ukiuni aggersuni sinerissap qanittuani aalisarnerup ineriartortinneqarnissaanut aningaasaliissuteqarsinnaaneq. Taamatut aningaasalersuisinnaaneq qulakkeerneqarpat Kattusseqatigiinniit peqqussutissatut siunnersuut peqataaffigisinnaavarput.
Siusinnerusukkut Kattusseqatigiinniit peqqussutissamut peqataarusunnginnitsinnut tunngavigaarput aningaasalersuisinnaanerup annerusumik qulakkeerneqarsimannginnera. Sinerissap qanittuani aalisarnermi angallatit atorneqartut amerlalluinnartut naluneqanngilaq. Taamaattumik aningaasalersuisinnaasut annertuumik atorfissaqartinneqartut Kattusseqatigiinniit takusinnaagatsigit aningaasalersuisinnaanerup qulakkeerneqartariaqarnera pinngitsoorneqarsinnaanngitsoq isumaqarpugut.
Taamaattumik Kattusseqatigiinniit neriuutigaarput sinerissap qanittuani aalisarnerup pitsanngorsarneqarnissaanut Naalakkersuisut ukiuni aggersuni aningaasaliissuteqarumaartut suli annerusunik. Aningaasaliissutigineqarsinnaasut ukiuni aggersuni qaffanneqarsinnaanngippata sinerissap qanittuani aalisarnerup ineriartortinneqarsinnaanera angujuminaassinnaasoq Kattusseqatigiinniit isumaqarpugut. Maannakkummi pineqarput sinerissap qanittuani raajarniat qaleralinniallu.
Kattusseqatigiinniit isumaqarpugut aamma eqqaamaneqartariaqartoq saarulliit ukiuni aggersuni takkukkiartornerat taamaattumik aamma pisariaqalertussaavoq angallatit allat nutarterneqartariaqalernissaat. Naggataatigit Kattusseqatigiinniit eqqaasariaqarparput umiatsiaararsorlutik aalisartut aamma ilaat kalaalimineerniarfiit atorlugit aalisakkanik tuniniaasarmata. Taamaattumik Kattusseqatigiinniit isumaqarpugut aamma umiatsiaararsorlutik aalisartut periarfissinneqartariaqartut mattunneqaratik.
Tassami inoqarfiit tamarmik aalisakkanik tunitsiveqanngillat. Tunitsiveqanngitsut Naalakkersuisunut suliaqartunik ilisimaneqarmat. Taamatut oqaaseqarluta siunnersuut taamatut isikkoqartillugu Kattusseqatigiinniit akuersaarsinnaanngilarput.
Hans Enoksen, Aalisarnermut,Piniarnermut Nunaqarfinnullu Naalakkersuisoq, Siumut.
Qujanaq. Naalakkersuisut sinnerlugit Inatsisartut inuutissarsiornermut ataatsimiititaliaat isumaliutissiissuteqarneranut qutsavigerusuppara. Inuussutissarsiornermut ataatsimiititaliap apeqqutigaa angallatit qassit maleruagassat allanngortinneqarpata tapersiissuteqartoqarneratigut ukiumut pissarsiarineqartartussatut naatsorsuutigineqarnersut.
Tamatumani eqqarsaatigineqarput angallatit qaleralinniutit. Apeqqutigineqartumut tunngatillugu oqaatigisinnaavara 2002-mut aningaasanut inatsisissatut siunnersuummi kontomi 51.07.10-imi taarsigassarsiat erniaqanngitsut akilersugassaanngitsullu aamma kontomi 51.07.32-imi taarsigassarsiarititat ernialersukkat ilanngaasigaanngitsut 2002-imi katillugit 30,5 millionit kr-nit ukiunilu missingersuusiorfiusuni aamma aningaasat taamatut amerlassusillit immikkoortinneqarmata.
Aningaasaliissutissat taakku sinerissamut qanittumi aalisarnermut nunalerinermillu inuutissarsiummut aningaasaliissutitut matussutissaapput. Aningaasaliissutit siunertanut assigiinngitsunut soorlu iluarsaassinernut taarsigassarsianut aamma aalisariutinik nutaanik pisaarniartunut taarsigassarsianut agguaanneqarnissaanni aalisartut savaatillillu qinnuteqaataat takkussortut apeqqutaassapput.
Tamakku tunngavigalugit angallatit ukiumut aningaasaliiffigineqartartussat qassiunissaat siumungaaq aalajangeruminaappoq. Pingaartumik iluarsaassinernut taarsigassarsiassanut pisariaqartitsineq allanngorarsinnaammat. Ukiumut aningaasaliissutinit tamarmiusunit angallatinit 30 fods-it missaanik angissusilinnik nutaanik pisaartornermut 10 million kr-nit atugassanngortinneqassappata aningaasat taakku atorlugit angallatit taamaattut, taamatut angissusillit arfinillit arfineq marlulluunniit pisaarineqartarsinnaassapput.
Angallatit arfinilli arfineq marlulluunniit imaaliinnarlugu amerlagineqarsinnaanngillat. Eqqarsaatigineqartariaqarporli angallatit arfinillit arfineq marlulluunniit taaneqartutut angissusillit tamarmiullutik qalerallit ukiumut 1.000 tonsinit amerlanerusut aalisarsinnaassammatigit.
Tunisisinnaanissamut periarfissanik naammaginartumik pilersitsiniarluni ilungersuuteqarnerit iluatsissappata Naalakkersuisut naatsorsuutigaat angallatit maannakkut pigineqareersut ataatsimut isigalugu avannaani biologit kaammattuutigisaannik amerlanerusunik qaleralissinnaasut. Taamaattumik Naalakkersuisuni naliliivugut qaleralinnik isumalluuteqartuarnissarput eqqarsaatigalugu aalisarnermut tamatumunnga angallatit nutaat amerlasuut siunissami qaninnermi aalisalersinneqartariaqanngitsut.
Inuutissarsiornermut ataatsimiititaliattaaq Naalakkersuisunut eqqarsaatigeqqusaa aalisartut siunnersorneqartarnissaminnut periarfissinneqarsinnaanersut tassa nunalerineq pillugu siunnersuisooqatigiit taakkulu ataanni sullissiviit aqqutigalugit savaatillit siunnersorneqartarnerannut assingusumik.
Naalakkersuisut ataatsimiititaliap kaammattuutaa malinniarpaat. Siullermillu aalisartut siunnersorneqartarnissaannik apeqqut ataatsimiititaliamut aalisarnermi pissutsit pillugit nassuiaat tunngavigalugu oqallinnerup kingunerisaanik pilersinneqartumut sukumiinerusumik naliliiffigisassanngortinniarlugu. Inuutissarsiornermut ataatsimiititaliap isumaliutissiissutaani takuneqarsinnaasutut ataatsimiititaliami amerlanerussuteqartut aalisarnermut piniarnermut nunalernermullu tapersiisarneq pillugu Inatsisartut peqqussutissaattut siunnersuut allanngortinnagu akuersissutigineqassasoq inassutigaat.
Taamaattorli ikinnerussuteqartup siunnersuut itigartitsissutigineqassasoq inassutigaa. Aalisarnermut piniarnermut nunalerinermullut tapersiisarneq pillugu Inatsisartut peqqussutaatigut tamatumunnga aningaasanut inatsimmi atugassanngortinneqartut Naalakkersuisunit qanoq allaffissornikkut aqunneqarnissaanik maleruagassat aalajangersarneqarput.
Aningaasaliissutilli amerlassusissaat aningaasanut inatsisissap suliarineqarneranut atatillugu aalajangerneqartarpoq. Tamatumunnga aningaasaliissutitigut killiliussat Naalakkersuisut pinngitsooratik eqqartinniartussaavaat. Inatsisartullu peqqussutaanni aningaasanut inatsimmi aningaasaliissutit atorlugit matusissutissanik annertunerusunik taarsigassarsisitsinissamut periarfissiisoqanngilaq.
Taamaammat Naalakkersuisut paasiuminaatsippaat ikinnerussuteqartut peqqussutissatut siunnersuut isumaqatiginngimmagu sinerissamut qanittumi aalisarnerup aaqqissuussaanerata naleqqussaaffigineqarnissaanut angallatinullu nutaanik pisaartornermut aningaasaliissutissat ikippallaartut atugassanngortinniarneqarnerannik isumaqarnini tunngavilersuutigalugu.
Matumuuna inuutissarsiutinut tapersiisarnermi aaqqissuussinermut sinerissamullu qanittumi raajarniarnermi naleqqussaanermut aningaasaliissutitut atugassanngortinneqartut pulaffigissanngilakka. Apeqqutit taakku pisarnertut aningaasanut inatsisissap suliarineqarnerani ingerlasumut ilaammata.
Taamatut oqaaseqarlunga Naalakkersuisut sinnerlugit kaammattuutigissavara aalisarnermut piniarnermut nunalerinermullu tapersiisarneq pillugu Inatsisartut peqqussutissaatut Naalakkersuisut siunnersuutaata allanngortinnagu akuersissutigineqarnissaanik ataatsimiititaliami amerlanerussuteqartut inassuteqarnerat Inatsisartut malissagaat.
Qujanaq.
Ole Lynge, Inatsisartut Siulittaasuat, Inuit Ataqatigiit.
Tassa avataaniittut paasiniassammassuk nappaasimasoqanngimmat allanik oqaatiginngit-soorakku. Tassa taasisussanngorpugut, kisianni amerlanerit maaniipput taanna oqimaaqatigiissaarinermut ajorunanngilaq.
Anthon Frederiksen, Kattusseqatigiit.
Peqqussutissatut siunnersuut ussernartorsiorfiginaraluarpoq akuersissutigissallugu, kisianni takusinnaagaanni umiatsiaararsortorpassuit avannaani qalerlinniarlutik inuussutissarsiuteqartut aammalu umiatsiaararsornermit inuussutissarsiuteqartut tamaasa ataatsimut isigigaanni maannakkut mattunneqartussat. Isumaqarpugut tamanna akuersaarneqarsinnaanngilluinnartoq. Tassami nalunngilarput aalisarnemik inuussutissarsiuteqarnerup oqaluttuarisaanerani nunatsinni aalisartut suminngaaniit aallartittartut. Umiaasaarannguaniit pujortuleeqqanut raajarniutinut kilisaassuarnut. Taamatut qaffakkiartuaarlutik angusaqariartuaarlutik ullumikkut iluatsilluarsimasut arlalissuit nalunngilagut.
Maannakkut umiatsiaararsorluni aalisarneq peqqussutikkut mattunneqarpoq tamarmi mattunneqarpoq periarfissaaruppoq. Taava eqqarsalaariarussi kina aalisartoq qanoq-ilillunilu ullumikkut umiatsiaararsortoq 30 fodsiminngaaniit aallartilluni aallaqqaataaniik aalisarnini qaffakkiartuaartissavaa. Suulluunniit inuutissarsiutit naqqaniik aallartillugit ingerlanneqartut pitsaanerpaamik ineriartortartut nalunngilarput.
Aalisarneq pillugu nassuiaat pineqarmat oqaatigineqarpoq umiatsiaararsortut 1.250-it missaaniittut taakkunanngalu aamma qimussimik aalisartartut ikikkaluartut ikinnerugaluartut ilanngunneqarput. Aamma kingullermik immikkoortoq una sammineqarmat Godmann Jensenip kusanarluinnartumik saqqummiussaqarpoq umiatsiaararsorlutik aalisartut eqqarsaatigeqqullugit, kisianni tamakku eqqarsaatissiissutit paasinarpoq isumaliutigineqarsimanngitsut.
Tassami umiatsiaararsortorpassuit aamma eqqarsaatigisariaqarpagut ilaquttaminnik inuutissarsiutiminnik inuuniartitsipput ilungersungaarlutik. Massakkullu aamma taarsiiniarlutik periarfissaminnik suli mattunneqartut imaaliallaannaq uumap peqqussutip akuersissutigineqarneratigut assorujorujussuaq ilungersunartumut suli pitinneqartussaanera qularnanngilaq.
Taamaattumik Naalakkersuisup akissuteqarnermini ippigusuuteqarnera uanga paatsuunganartippara. Isumaqarsimagaluaratta Naalakkersuisoq taamaannammi aamma oqartarmat umiatsiaararsortunik illersuilluartuusoq, kisianni massakkut umiatsiaararsortut nungutinniarneqarnerat uagut Kattusseqatigiinniit akuersaarsinnaanngilarput.
Killormorluinnaq pisoqarpoq akuersaaruminaalluinnartumik. Taamaammat aalajangiusimavarput uani ussernartorsiornaraluarpoq aamma qularnanngikkaluarpoq una peqqussutissaq aalisartut ilaannut iluaqusiisinnaasoq, kisianni ilaannaanut iluaqusiisussaavoq. Ilumut pissaqarnerusut pissaqarnerulissapput, pissakinnerusullu suli katataanerussapput. Taanna kialluunniit takunngitsuusaarsinnaanngilaa.
Hans Enoksen, Aalisarnermut, Piniarnermut Nunaqarfinnullu Naalakkersuisoq, Siumut.
Qujanaq. Ilumoorpoq
umiatsiaararsortunut tunngatillugu massakkut atukkat ilungersunartuusut. Aamma
taanna assortorsinaanngilarput. Aammalu tunisassiornikkut piumasaqaatit
takkukkiartortut umiatsiaararsortut ilaatigut periarfissaat tuniniaanerminni
annertoorujussuarmik killilerneqartussaasut siulittuutigineqarpoq.
Aamma
taanna aalisartut kattuffianinngaaniit KNAPK-mi nipituumik oqaatigineqarpoq.
Umiatsiaararsorneq siunissami ajoraluartumik illersuinnassallugu
tunngavissaqanngitsoq. Umiatsiaararsortut atugaat qiviaraanni massakkut
ilungersunartumiittut tamatta nassuerutigissavarput, kisiannili periarfissat
pitsanngorsarniarneqarput. Ikioqatigiillutik anginerusunut nooriarnissaat
imminullu akilersinnaasumik ingerlalernissaat taanna siunnerfigineqartoq,
isumaqarpunga maluginngitsuusaarneqarsinnaanngitsoq.
Tassami
aquuteralassortut tamakkua ukiut tamaasa motoritaarput. Motoritaarneq
40.000-it missaani naleqartuaannarpoq umiatsiaararsortumut motori aquuteralaat
nukkiortinneqartuarlutik annertunerpaamik immaqa ukioq ataatsip ingerlarnerani
immaqami sivisunerpaamik ukiut marluunngitsulluunniit atorneqartarpoq.
Isumaqarpunga, taamatut ingerlaannarsinnaanngitsut. Inuutissarsiornerat
pitsaanerusumik illersussagutsigu periarfissaat pitsanngorsartariaqarpagut.
Aamma
aningaasat atugassagut killeqarput. Atorluarneqassappatalu
Kattussuussinnaaneranut tunngasut imminut akilersinnaanerusumik
ingerlalersinnaanerannut tunngasut aaqqiissuteqarfiginiartariaqarpagut. Aamma
soorunami umiatsiaararsortut napasinnaasariaqarput. Illumut
akilersugassaqartarput. Ilaqutariinni pilersuisussaapput massakkullu
umiatsiaararsorneq qiviaraanni ajoraluartumik sippulimmik
tunniussassaqanngillat.
Amerlanerpaat
orsussamut taavalu aserfallatsaaliinermut atortarpaat. Usillu pisarisinnaasaat,
usigineqarsinnaasullu killeqartorujussuullutik. Taamaammat ullormiit ullormut
inuutissarsiornerata isumannaannerusumik aqqutissiuunneqarnissaa taanna
isumaqarpunga eqqortuliornerusoq. Soorunami ikaarsaariarnermi aamma
periarfissarsiuunneqarnissaat imatut oqaannavissinnaanngilagut tassa tassunga
killippusi pisortaninngaaniit ikiorneqarsinnaanngilasi. Periarfissaqarpoq
aamma ikaarsaariarnissaminni oqilisaannissaannut.
Periarfissarsiuunneqarnissaat tassanilu minnerunngitsumik aamma KNAPK
peqatigalugu ilusilersuinissaq aamma eqqartorneqarsinnaavoq.
Kattusseqatigiit
isumaqarunik aningaasanik amerlanerusunik aalisarnermut atugassanik
siunnersuuteqarniarlutik taava siunnersuuteqartariaqarput ersarissumik
suminngaaniit taakku aningaasat tiguneqassanersut. Nalunngilarput massakkut
aningaasanut inatsisissaq assut annertuumik ilungersunartumik suliarineqartoq
aammalu suliarineqareersimasoq.
Soorunami
nikisiterisoqarsinnaavoq, kisiannili aamma aalisarneq kisimi
ajornartorsiorfiunngitsoq aamma eqqaasitsissutigissavara. Inuiaqatigiinni
allat pisariaqartinneqartut amerlaqaat. Isumaginninnermut tunngasut,
meeqqerivinnut tunngasut, illussaaleqinerit allarpassuillu aamma
aningaasalersugassaapput. Taamaammat oqimaaqatigiissaaraluta ataasiakkaarluta
qineqqusaartutut pissusilersorata ataatsimut ajornartorsiutit isigalugit
aaqqiiniarnissarput taanna siunnerfigisariaqarparput.
Massakkut
aalisartut ilungersunartorsioraluartut aamma inuiaqatigiinni allani
ilungersunartumik atugaqartoq taanna Kattusseqatigiit paasisariaqarpaat.
Qujanaq.
Mads-Peter Grønvold, Kattusseqatigiit.
Eqqaamaneqartariaqarpoq maannakkut qineqqusaartoqanngimmat aamma eqqaamavarput massakkut ataatsimiinneq radiokkut ingerlatinneqanngitsoq toqqaannartumik innuttaasunut aamma tusaaneqarsinnaanngitsoq, kisianni Inatsisartunut ilaasortat taavalu tusarnaariat arlaqanngitsut kisimik tusarnaarput. Taamaattumik qineqqusaarnertut nalilerneqartariaqanngilaq. Oqariartuutigut aamma pingaaruteqarput soorunami.
Aningaasalersueriarsinnaaneq
ujartorneqassappat. Ilaatigut aningasalersuivugut
piviusunngortissinnaanngisatsinnik. Sanaartugassat ima qaffasitsigisarput
ukiuni kingullerni naammassisinnasagut sipporlugit aningaasalersuilluta. Taakkua
soormi ilanngaallassinnaanngilagut 20-30 millioninilluunniit. Taamaalilluta
aningaasaliisinnaavugut taakkununnga aamma ajornanngilluinartumik.
Universitetsparkikkut allallu kingulliusariaqaraluarput.
Aningaasannaffiusinnaasut
allat aningaasalersorluarnerisigut aningaasat allat isertinneqarsinnaasut
takkuttussaammata. Taamaattumik una oqaatigisarput aamma anguniagarput
soorunami siullermik oqaaseqaqqaarama assigiinngitsut toqqammavigut
eqqartorpakka.
Taamaattumik
aamma aalisartunik arlalinnik oqaatigineqartarpoq. Aamma nalunngilara KNAPK
taanna nalussanngikkaa. Qaleralinniarlutik aalisarnermi umiatsiaararsorluni
ingerlatsisut oqartarput ningittakkersornermi imminut akilersinnaanerpaajusoq
kisimiilluni ningittakkersoraanni pujortuleeqqamik ningittakkersoraanni
aningaasartuutit amerlanerupput.
Akilersinnaaneruvorooq
angallammik anginngitsumik Q-21-milluunniit qaleralinniaraanni piginnittoq
qaleralinniarluni ingerlatsissooq tassani aalisarnermi. Saniatigut
aningaasartuutissaqanngilaq inuttanut allanullu.
Aalisarfiit
assigiinngitsut qiviaraanni piffiit ilaanni aalisarfissuaqarpoq annertuumik.
Ningittakkersorlutik arlallit ingerlatsisinnaapput kisianni piffiit ilaanni
eqqaamaneqartariaqarpoq aalisarfiit ima annikitsigaat amerlarnerusut
aalisarsinnaanatik. Aningaasartuutit nammanneqassappata piffinniit piffinnut
assigiinngitsuupput. Taanna aamma eqqaamaneqartariaqarpoq.
Oqartarpugut
aamma uagut, aamma ilaatigut oqarluartaartarpugut immaqa aamma nalunngilara
Hans Enoksen oqarluartaartarpoq.
Ole
Lynge, Inatsisartut
Siulittaasuat, Inuit Ataqatigiit.
Tullia
pitinnagut oqaatigissavara aappassaaneerinerummat una. Aamma ataatsimii
qularnanngitsumik taakku kingulliit oqaluuserineqarsimassapput. Aamma
periarfissaqarsimavoq allannguutissatut siunnersuuteqarsinnaanissaq.
Hans
Enoksen, Aalisarnermut,Piniarnermut
Nunaqarfinnullu Naalakkersuisoq, Siumut.
Kattusseqatigiit
aamma isumaqassanngillat uanga qanorluunniit aalisartut
illersortigigaluarukkit piumasakka tamaasa pissagikka Naalakkersuisut allat
piumasaat qaangiinnarlugit taamaattoqarsinnaanngilaq.
Ilungersungaarlutik
Naalakkersuisut inissitsereernikuusut uanga ilannguppunga. Periarfissaqanngilarlu
aamma annerusunik allanngortiterinissannut. Oqarputit umiatsiaararsortut
kisimiillutimmi aalisarunik imminut akilersinnaaneruvoq. Kisianni aamma
oqarputit aalisarfiit annikingaarmata aalisariutit ilaneqarsinnaanngitsut.
Periarfissikkusuppagut ungasinnerusumut aalisariarnissaannut piffit ataaseq
kisiat atorunnaarlugu. Taava
pisussutit assigiinnerusumik atorneqalissapput. Piffiit ataasiakkat kisimik
imaajarneqassanngillat.
Qujanaq.
Ole
Lynge, Inatsisartut
Siulittaasuat, Inuit Ataqatigiit.
Tassa
taamaalillut taasinialissuugut. Tassalu aalisarnermut piniarnermut
nunalerinermullu tapersiisarneq pillugu Inatsisartut peqqussutissaatut
siunnersuut. Siunnersuutip aappassaaneerneqarnerani Inatsisartut
inuussutissarsiornermut ataatsimiititaliaa amerlanerussuteqarluni
isumaliutissiissuteqarpoq. Tassalu Siumup Inuit Ataqatigiit, aamma Atassutip
ilaasortaatitaata inassutigimmassuk. Taamatut isikkoqarluni
pingajussaanerneqarnissaminut ingerlaqqinnissaa taasissutigineqssasoq.
Taamaalillunga
isumaqatasut qinnuigissavakka nikueqqullugit.
22.
Akerliusut
qinnuigissavakka nikueqqullugit.
4.
Taavalu
taaseqataanngitsut qinnuigissavakka nikueqqullugit.
Taamaattoqanngilaq.
Taamaalilluni
immikkkoortoq 21-p aappassaaneernera naammassivoq tassalu
pingajussaaniigassanngortinneqarpoq.