Ullut ataatsimiiffiusut arfersaneq arfineq sisamaat, tallimanngorneq oktoberip 26-at 2001, nal. 13:02

Oqaluuserisassani immikkoortoq 23

Isumaginnittoqarfiup aqunneqarnera aaqqissuussaaneralu pillugit Inatsisartut peqqussutissaattut siunnersuut.

(Isumaginninnermut Suliffeqarnermullu Naalakkersuisoq)

(Aappassaaneernera)

 

Ole Lynge, Inatsisartut Siulittaasuat, Inuit Ataqatigiit.

Eqqaasitsissutigissavaralu immikkoortoq 23 pingajussaaneerneqarnissaanut ingerlaqqinnissaanut taasissutigiumaaratsigu. Immikkut isumaginninnermut suliffeqarnermullu ataatsimiititaliaq qinnuteqaateqarsimanngilaq isumaliutissiissutip saqqummiunneqarnissaannut. Taamaalilluni apeqqutigissavara oqaaseqartoqarumanersoq. Siullermik Isumaginninnermut Suliffeqarnermullu Naalakkersuisoq Ole Dorph.

 

Ole Dorph, Isumaginninnermut Suliffeqarnermullu Naalakkersuisoq, Siumut.

Qujanaq. Isumaginnittoqarfiup aqunneqarnera aaqqissuussaaneralu pillugit Inatsisartut peqqussutissaattut siunnersuut siullermeerlugu suliarineqarnerata kingorna siunnersuut Inatsisartut isumaginninnermut suliffeqarnermullu ataatsimiititaliaanik suliarineqarpoq. Ataatsimiititaliarlu isumaliutissiissuteqarluni.

 

Isumaliutissiissummi takuneqarsinnaavoq siunnersuut saqqummiunneqartoq annertuutigut aamma taamaalilluni suliassat ilaasa isumaginninnermi naammagittaalliuuteqartarfimmi suliarineqartussat suliarineqartarnerat eqaannerusumik pisalernissaat ataatsimiititaliap naammagisimaaraa.

Ataatsimiititaliaq aalajangersakkat allanngortinneqarnissaannik siunnersuummi saqqummiussaqarpoq. Siullermik ataatsimiititaliamit kissaatigineqarpoq isumaginninnerup iluani nakkutilliinerup ingerlanneqartarnera pillugu Naalakkersuisut pinngitsooratik erseqqinnerusumik maleruagassiortarnissaat. Ataatsimiititaliap tamatumunnga tunngavigaa isumaqaramik assut nalornissutaasartoq Naalakkersuisut nakkutilliisussaatitaanerat qanoq annertutigissanersoq. Aamma nakkutilliineq qanoq ingerlanneqassanersoq.

Aapaattut ataatsimiititaliamit kissaatigineqarpoq kommunalbestyrelsemi ilaasortanit inunnik isumaginninnermik suliaqartunik Naalakkersuisut pinngitsooratik pikkorissartitsisassasut. Ataatsimiititaliap siunnersuutigaa pikkorissartitsisarnerit taamaattut pinerit tamaasa kommunalbestyrelsemut qinersinerup kingorna ukiup ataatsip qaangiutinnginnerani ingerlanneqartassasut.

Naalakkersuisut siunnersuut isumaqatigivaat taamaalilluni kommunalbestyrelsemi ilaasortanut suliffissaqartitsiniarnermut tunngasuni suliaqartunut pikkorissartitsisarnissanik massakkut pisussaaffeqarnermut assingusumik aaqqissuussisoqassasoq. Taamatuttaaq akisussaaffeqarfiit allat pillugit kommunalbestyrelseni aamma nunaqarfinnut aqutsisuni ilaasortat pikkorissartinneqartarnissanik neqerooruteqartarnissamut Naalakkersuisut peqataanissamut kissaateqarput.

Pikkorissartitsinerillu taamaattut kommunit KANUKOKA-lu ineriartortinneqartariaqarlutik. Ataatsimiititaliamit kissaatigineqartutut taakku siunnersuummut saqqummiunneqartumut allannguutissatut siunnersuummut Naalakkersuisut saqqummiussaqarput.

Naalakkersuisut malugeqqussavaat pinngitsoorani pikkorissartitsinnaatitaanermut siunnersuutip malitsigisaanik 2002-mut aningaasanut inatsisissaattut siunnersuutip suliarineqarnissaanut allannguutissatut siunnersuummik saqqummiussaqartoqassammat.

Naalakkersuisut taamatut oqaaseqarlutik Inatsisartunut suliassap ingerlateqqinneqarnissaa suliassanngortippaat.

Qujanaq.

 

Asii Chemnitz Narup, Inuit Ataqatigiit oqaaseqartuat.

Qujanaq Inuit Ataqatigiit tungaaninngaaniit nuannaarutigalugu maliginiarparput Isumaginninnermut Suliffeqarnermullu Naalakkersuisoq peqqussutissatut siunnersuutip aappassaa-neerlugu oqaluuserinissaanut allannguutissanik marlunnik siunnersuuteqarmat. Naalakkersuisup allannguutissatut siunnersuutaat marluk isumaginninnermut suliffeqarnermullu ataatsimiititaliaata kaammattuutai tunngavigalugit saqqummiunneqarput. Tamanna qujassutigissavarput.

Allannguutissatut siunnersuutit akuerseqataaffigissavagut. Inuit Ataqatigiit isumaat naapertorlugu taakku akuersissutigineqarnerigut suliassat pingaartuteqartut peqqussutitigut tunngavissinneqassapput. Siullermik Namminersornerullutik Oqartussat kommuninut nakkutilliisussaatitaanerisa malittarisassiornissaa.

Tamakkua ukiorpaalunngulersuni ujartorneqartarput. Aamma ukioq kingulleq Inatsisartut ombudsmandianit. Allannguutissatut siunnersuutip aappaat § 5-imut allannguutissatut siunnersuut iluarisimaarnarpoq. Kommunalbestyrelsenut ilaasortat qinikkatullut isumaginninnermut tunngasunik suliaqartussat pikkorissartinneqarnissaannut tunngavoq. Allannguutissatut siunnersuut akuerineqarpat qulakkeerneqassaaq upernaaq manna kommunalbestyrelsenut qinigaasut 2002-p ingerlanerani pikkorissartinneqarnissaat.

Taamaalilluni innuutaasut pitsaanerusumik kiffartuunneqarsinnaanissaat aqqutissiuunneqassalluni inatsisitigullu illersugaanerat pitsaanerulissalluni. Taamatut oqaaseqarluta nalunaarutigeqqissavarput allannguutissatut siunnersuutit akuerseqataaffigissagatsigit. Taamatullu isikkoqarlutik pingajussaaneerneqarnissat akuersaarlutigu.

 

Jakob Sivertsen, Atassutip oqaaseqartua.

Qujanaq. Isumaginnittoqarfiup aqunneqarnera aaqqissuussaaneralu pillugit Inatsisartut peqqussutitigut siunnersuutip aappassaaneerneqarneranit Atassummit takisuuliornata imatut oqaaseqassaagut. Nunatsinni innuttaasut inatsisitigut illersugaanerat Atassummit assut pingaartipparput.

Aamma taamaappoq inuit isumaginninnikkut ikiorserneqartartut pingaartumik innorluutillit innarluutillillu inatsisit peqqussutillu malillugit eqqortumik ikiorserneqartarnissaat assut pingaaruteqarmat. Inunnik isumaginninnermik sullissineq inuit misigissusaannut annertuumik attuisartoq nalunnginnatsigu.

Taamaattumik inunnik isumaginninnermik sulliat innuttaasunik naammagittaalliuutigineqarsinnanerannut nalornissutaasartut peqqussutissakkut erseqqissaaffiginiarneqarnerat Atassummit pissusissamisoortutut nalilerparput. Aamma ataatsimiititaliap § 5-imut Naalakkersuisut kommuninut qinikkat nutaat inunnik isumaginninnermut ataatsimiititaliamut ilaasortaalersut 2002-mi pikkorissartinneqarnissaannik kiisalu kommunimut qinersinerup kingornatigut aamma qinikkat nutaat pikkorissartinneqarnissaannik peqqussutissami erseqqissaanisami ataatsimiititaliap piumasaqaateqarnera Atassummit tamakkiisumik taperseratsigu matumuuna oqaatigaarput.

Taamatullu aamma § 1, immikkoortoq 2-p oqaasertaliornerani toqqannarnerusumik Naalakkersuisut aalajangersagaliornissaannik ataatsimiititaliamit piumasaqaatigineqartoq aamma Atassummit taperseratsigu. Soorlu peqqussutissamut siunnersuutip siullermeerneqarnerani Atassummit kommuninut inunnik isumaginninnermut tunngasunik sullissinerannut Naalakkersuisut nakkutiginnittussaanermik pisussaaffeqarnerat erseqqissarsimagipput.

Naalakkersuisut kommuninut inunnik isumaginninnermut sullissineranni nakkutilliisussaanertik ukiuni kingullerni tamakkiisumik atorluarsimanngikkaat Atassummit maluginiarparput. Pingaartumik innarluutillit innarluutillillu ulluinnarni sullinneqarnerat tamatumani eqqarsaatigalugu.

Taamaattumik inunnik isumaginninnermut ataatsimiititaliap Naalakkersuisut kommunit inunnik isumaginninnermut sullissinerannut nakkutiginnittussaanerisa peqqussutissamut siunnersuummii erseqqissaaffigineqarnissaa ujartormassuk Atassummit tupiginngilarput. Ataatsimiititaliamit peqqussutissap allanngortinneqarnissaanik Naalakkersuisunut kissaatigineqartut Naalakkersuisunik paasineqarlutik akuersaarneqarnerat Atassummit qujarupparput. Peqqussutissap allanngortinneratigut Naalakkersuisut kommuninut inunnik isumaginninnermut tunngasunik ingerlatsinerannut nakkutilliisussaanerat qulakkeerneqartussaammat.

Taamaatut Atassummit oqaaseqarluta peqquussutissamut siunnersuutip taamatut iluseqarluni pingajussaaneerneqarnissaanut ingerlateqqinnissaa Atassummit akuerserlugu taaseqataaffigissavarput.

Qujanaq.

 

Loritha Henriksen, Kattusseqatigiit oqaaseqartuat.

Aap, peqqussutissaattut siunnersuut Naalakkersuisuninngaaniit saqqummiunneqartut marluk tamakkiisumik imaatigut tapersersoreerlugit aammalu siullermeerneqarnerani oqaaseqatigut innersuussutigalugit taperserpagut.

Nuannaarutigaarput aamma kommuninut pikkorissartinneqarnissaat sukumiisumik tassani eqqaaneqarmat. Taamatut pingajussaaneerneqarnissaanut akuerineqarnissanut innersuussutigaarput innersuussutigaarput.

 

Ole Dorph, Isumaginninnermut Suliffeqarnermullu Naalakkersuisoq, Siumut.

Qujanaq. Siullermik Naalakkersuisut sinnerlugit qujassuteqarfigissavakka partiit sinnerlugit oqaaseqartut Inuit Ataqatigiinninngaaniit taavalu aamma Atassummiit Jakob Sivertsen, taava Kattusseqatigiinniit Loritha Henriksen.

Uani apeqqummi Naalakkersuisut ataatsimiititaliarlu Inatsisartullu assortuussuteqanngillat. Ilumoorpoq allannguutissatut siunnersuummi ataatsimiititaliaq kissaateqarsimavoq. Taannalu Naalakkersuisut sinnerlugit peqataaffiginikuuvara. Aammalu taassumap isumaqatigiinnerup kingornatigut Naalakkersuisut allannguutissatut siunnersuut saqqummiunnikuullugu. Taamaattumik uani apeqqummi massakkut paaseqatigiinneqarpoq. Aammalu taamaalilluni siunnersuut Naalakkersuisuninngaaniit allannguutissaq siunnersuutigineqarluni.

Taamaattumik annertunerusumik oqaaseqaqqinnanga tamassinnut qujanaq. Aamma taamaalilluni pingajussaaneernissaminut suliassaq ingerlaqqissooq.