Oqaluuserisassani immikkoortoq 23-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut tallimaat, tallimanngorneq septembarip 28-at 2001, nal.
16.52
Ataatsimiinnermik
aqutsisoq, Inatsisarsartut Siulittaasuat Ole Lynge, Inuit Ataqatigiit:
Ole
Dorph, Isumaginninnermut Suliffeqarnermullu Naalakkersuisoq, Siumut:
Isumaginnittoqarfiup
aqunneqarnera aaqqissuussaaneralu pillugit Inatsisartut peqqussutissaattut
siunnersuut matumuuna Naalakkersuisut saqqummiuppaat.
Siunnersuut
saqqummiunneqartoq allaffissornikkut aalajangikkat, Isumaginninnermi
Naammagittaalliuuteqartarfimmut
naammagittaalliuutigineqarsinnaanerat kommuninit, innuttaasunillu
nalornissutaasarnera pissutigalugu.
Peqqussutissatut
siunnersuummi erseqqissaatigineqarpoq kommunalbestyrelsip aalajangigaa,
Isumaginninnermi Naammagittaalliuuteqartarfimmut
naammagittaalliuutigineqarsinnaasoq. Tamatuma kingorna nalornissutaajunaassooq
Isumaginninnermi Naammagittaalliuuteqartarfimmut
naammagittaalliortoqarsinnaasoq, aalajangiineq kommunimi, politikikkut
imaluunniit allaffisornikkut aalajangerneqarsimanersoq apeqqutaatinnagu.
Aammattaaq
aalajangersakkamik nutaamik ilanngussisoqarpoq, tamatumani Naalakkersuisut
kommunini ataatsimiititalianik sulianik Isumaginninnermut tunngasunik
suliaqartunik pikkorissartitsinissamut periarfissiisumik. Tamanna pivoq
ataatsimiititaliat aalajangiinerminni tunngavissaannik
nukittorsaaviginiarlugit, taamaalilluni kukkusumik aalajangiisarnerit
sapinngisamik pinngitsoortinniarsariniaqqullugit.
Isumaginninnermi
Naammagittaalliuuteqartarfimmi suliassanik suliarinnittarnerup
agguaqatigiissillugu
sivisussusia sivikillisinniarlugu suliassaq Isumaginninnermi
Naammagittaalliuuteqartarfimmut saqqummiutinngikkaluarlugu siulittaasup
aalajangiisinnaaneranik siunnersuummi periarfissinneqarpoq. Tamannali aatsaat
pisinnaavoq suliassaq illersorneqarsinnasumik tunngavissaqarsimappat, aammalu
aalajangiinissaq nalorninaateqarnani. Siulittaasup soorunami ilaasortat
sinneri kingusinnerusukkut aalajangiisimanerminik ilisimatissavai.
Paasiumanarsarnissaa
pingaartillugu siunnersuut saqqummiunneqarpoq Inatsisartut Peqqussutaattut nutaatut, peqqussutip atuuttup allannguutissaatut pinnani.
Isumaginninnermut
Naammagittaalliuuteqartarfiup allattoqarfia allannguutissanik siunnersuummik
saqqummiussisimavoq, taakkualu ilanngunneqarsimapput. Tamatuma saniatigut
tusarniaanermut akissutit allannguutissanik pissutissaqalertitsisimanngillat.
Taamaasillutik
Naalakkersuisut taamatut oqaaseqarlutik siunnersuut Inatsisartunut
suliassanngortippaat.
Ole
Lynge, Inatsisarsartut Siulittaasuat, Inuit Ataqatigiit:
Taavalu
partiit oqaaseqartuinut. Siuliussaaq
Mikael Petersen Siumut.
Mikael Petersen, Siumup oqaaseqartua:
Isumainnittoqarfiup aqunneqarnera aaqqissuussaaneralu pillugit Inatsisartut
peqqussuttissaattut siunnersuut, Naalakkersuisunit saqqummiunneqartoq
Siumumiit ilassilluarparput.
Siumumiit iluarisimaarparput peqqussutip oqaasertamigut ilusiligaanermigullu
ullumikkut pissutsinut naapertuuttunngorsarneqarnera, aammalu
iluarisumaarlutigu kommunalbestyrelsit aalajangigaasa
naammagittaalliuutigineqarsinnaanerannut aalajangersakkat
ersarinnerusunngortinneqarmata.
Taamatullu Naammagittaalliuuteqarfiup sulianik ingerlatsisarnerata
pisariillisarneqarnera iluarisimaarlutigu, taamaalilluni naammagittaalliuutit
aalajangiiffigineqartarneri utaqqisitsivallaarani piaarnerusumik
suliarineqartalernissaat naammassineqarsinnaalerluni.
Siumumiit ilanngullugu iluarisimaarparput peqqussummut nutaamik § 5-imik
ilanngussisoqarmat, kommunini Isumaginninnermut Ataatsimiititaliat
kommuninut qinersereernerit kingorna pikkorissartinneqartarnissaat
qulakkeerumallugu. Paasivarpulli tamanna aatsaat soorunami pisinnaassasoq
tamatumunnga siunertamut aningaasanik immikkoortitsisoqarsimasaraangat, tassa
aningaasanut inatsisikkoorlugu.
Siumumit isumaqarpugut aalajangersagaq tamanna allanngortinneqartariaqartoq,
kommunini Isumaginninnermi Ataatsimiititaliat nutaat pinngitsooratik
pikkorissartinneqartarnissaat atuuttussanngorlugu.
Siumutmiit piumasaraarput peqqussutissatut siunnersuut manna iluatsillugu
peqqussutissatut siunnersuutip § 2-ini pineqartut, tassa Isumaginninnikkut
sanaartugassanut tunngasutigut periusissat pillugit aalajangersakkat
Isumaginninnermi Ataatsimiititaliamit nalilersoqqissaarneqarnissaat,
peqqussutissatut siunnersuutip aappassaaneerneqannginnerani.
Taamannak oqaaseqarluta peqqussutissatut siunnersuutip
aappassaaneerneqannginnermini Inatsisartut Isumaginninnermut
Suliffeqarnermullu Ataatsimiititaliaannut suliassanngortinneqarallarnissaa
inassutigaarput.
Jakob Sivertsen, Atassutip oqaaseqartua:
Isumaginnittoqarfiup aqunneqarnera aaqqissuussaaneralu pillugit Inatsisartut
peqqussutissaatut siunnersuut saqqummiunneqartoq, Atassummiit imatut
oqaaseqarfiginiarparput:
Atassummiit pingaartipparput, innuttaasut kikkulluunniit inatsisitigut
illersugaanerat. Aamma taamaappoq inuit isumaginninnikkut ikiorserneqartartut
inatsisit peqqussutillu malillugit eqqortumik ikiorserneqartarnissaat assut
pingaaruteqarmat.
Inunnik isumaginninnermik sullissinermi inuit misigissusaannut annertuumik
attuisartoq nalunnginnatsigu. Isumaginninnikkut suliat
naammagittaalliuutigineqarsinnanerat kommuninit innuttaasunillu
nalornissutaasarnerat peqqussutissakkut erseqqissaaffiginiarneqarmata
Atassummiit iluarisimaarparput, kiisalu peqqussutissami kommunimi qinikkat
isumaginninnermik suliassanik aalajangiisartut, tassalu Inunnik
Isumaginninnermut Ataatsititaliami ilaasortat pikkorissartinneqartarnissaannik
§-imik nutaamik ilanngussisoqarsimanera Atassummiit taperserparput.,
isumaginninnermi suliat eqqortumik suliarineqartarnissaat
pingaartorujussuummat.
Taamatut periarfissiinikkut isumaginninnermi suliat
naammagittaalliuutigineqartartut ikinnerulernerannik kinguneqassasoq
naatsorsuutigilluinnaratsigu.
Inunnik isumaginninnermik kommunit innuttaasunik sullissinnerat
Naalakkersuisut nakkutigisussaavaat. Ataatsimut oqaatigalugu
Isumaginninnermut Naalakkersuisup nakkutilliineq isumagisussaavaa.
Taamaattumik Atassummiit piumasarissavarput kommunit inunnik isumaginninnikkut
pingaartumik innorluutilinnik innarluutilinnillu sullissinerit ullumikkornit
nakkutigineqarnerunissaat pisariaqartoq, angajoqqaat innorluutilinnik
innarluutilinnillu meerallit naammagittaalliuuteqartuartarnerat
nalinginnaalersimaqisoq sissuerluinnartariaqarmat.
Taamatut oqaseqarluta peqqussutissamut siunnersuut akuersaarparput,
ataatsimiititaliamillu misissoqqissaarneqarnissaa aamma kissaatigalugu.
Asii Chemnitz Narup, Inuit Ataqatigiit oqaaseqartuat:
Naalakkersuisut siunnersuutigaat peqqussutip Isumaginnittoqarfiup
aqunneqarneranut aaqqissuussaaneranullu tunngasup
allannguuteqartiallalaarnissaa. Allannguutissatut siunnersuutit amerlanngillat
pingaaruteqarlutilli. Minnerunngitsumik Isumaginninnermi
Naammagittaalliuuteqartarfiup
suleriaasiata eqaallisarneqarnissaanik siunertaqartut. Inatsisartut
Isumaginninnermut Ataatsimiititaliaanni nalilersoqqissaagassatut
tikkuarusutatta saniatigut nalunaarutigeriissavarput allannguutissatut
siunnersuutit iluarisimaaratsigit tapersersorlugillu.
Taamatuttaaq iluarisimaarparput maanna inatsisitigut tunngavissinneqassammat
kommunini qinikkat (tassa isumaginninnikkut suliaqartut)
pikkorissartinneqartalernissaat. Isumaginninnermi Naalakkersuisoqarfimmit
aaqqissuunneqartartussani.
Ilisimaneqarpoq Naalakkersuisut pisussaaffigigaat isumaginninnermi
malittarisassanik kommunit ingerlatsinerat nakkutigissallugu.
Nakkutilliinissamik pisussaaffiup naammassiniartarnerata ajornaatsuinnaaneq
ajornera ilisimaneqarportaaq. Maluginiagassaavorlu allannguutissatut
siunnersuutinut ilanngunneqarsimammat Naalakkersuisit
aalajangersagaliorsinnaasut nakkutilliinerup qanoq annertutiginissaanut
ingerlanneqarnissaannullu, tassa § 1 imm. 2imi tamanna siunnersuutigineqarpoq.
Inuit Ataqatigiinniit kissaatigaarput, maleruagassaq taanna
pisussaaffiliinertut nipeqartinneqassasoq, imatut allassimagami "Naalakkersuisut
aalajangersagaliorsinnaasut" uagut "aalajangersagaliussasumik"
oqaasertaqartikkusupparput, tamanna ataatsimiititaliami nalilersoqqussavarput.
Taamatut naatsunnguamik oqaaseqarluta peqqussutissatut siunnersuutip
aappassaaneerneqannginnerani Isumaginninnermut Suliffeqarnermullu
Ataatsimiititaliamut innersuupparput.
Loritha Henriksen, Kattusseqatigiit oqaaseqartuat:
Inatsisissatut siunnersuut Kattusseqatigiinniit ima oqaaseqarfigissavarput.
Inatsisissatut peqqussutissatullu siunnersuut nutaajusoq oqaatigissavarput,
siunnersuut Kattusseqatigiinniit iluarisimaaratsigu, kiisalu
oqaatigerusupparput siunnersuummi
aalajangersakkanut §-ini allannguutissat taagorneqartut tamakkiisumik
akuersaaratsigit.
Ilisimaarereerneqareerpormi ukiuni arlaqalersuni ajornartorsiutaasarsimasoq,
kiisami eqaatsumik piffissamillu sivikinnerusumik atuisussamik
aaqqiivigineqartussanngormat. Peqqussutissatullu atuutilerneratigut
pineqartut kommunalbestyrelsi sinnerlugu politikikkut imaluunniit
allaffisornikkut eqqunngitsumik aalajangiiffigineqarsorisut
periarfissinneqartussaassammata, Isumaginninnermi Naammagittaalliuuteqarfimmut
ingerlatitseqqinnissaminnut. Taamaalilluni periarfissaq sivikkinnerusoq
atorlugu naammagittaalliuuteqarneq akissuteqarfigineqartartussanngormat.
Naluneqanngitsutummi siornatigut naammagittaalliuuteqassagaanni aqqutissat
assigiinngitsut aqqusaaqqaarlugit aatsaat sivisuumik utaqqerujussuaqqaarluni
akineqartarmata. Tamannalu sullissisumut sullitamullu annertuumik
pitsanngoriaataasussaasoq naatsorsuutigisinnaavarput allakkatigut
akineqajaartarnikkut.
Taamatuttaaq nuannaarutigaarput aalajangersakkami nutaami
ilanngunneqarsimammat kommunini ataatsimiititaliani sulianik
isumaginninnermut tunngasunik suliaqartussanut pikkorissartitsisarnissaq
aamma periarfissinneqarluni.
Taamatut naatsumik oqaaseqarluta, peqqussutissatut siunnersuut
aappassaaneerneqannginnerani Inunnik Isumaginninnermut Ataatsimiititaliamit
suliarineqarnissaa inassutigaarput.
Ole Dorph, Isumaginninnermut Suliffeqarnermullu Naalakkersuisoq, Siumut:
Partiit oqaaseqartitaannut assut qujavunga, aamma nuannaarutigaara una
siunnersuutissatut allannguutissatullu siunnersuut tamanit
iluarisimaarneqartoq. Siumumut, Kattusseqatigiinnullu oqaatigissavara,
ilumoorpoq siusinnerusukkut naammagittaalliuuteqarniaraanni ilaannikkut
ajornartorsiutigineqartarsimavoq, kommunalbestyrelsi utaqqineqartarmat,
kommunalbestyrelsillu ilaannikkut sisamariarlutik tallimariarlutilluunniit
ataatsimiittarlutik. Taamaattumiguna naammagittaalliuuteqaraluartut
sivisoorujorujussuarmi utaqqisinneqartarsimasut, kisianni tassa uumap
siunnersuutip taamaalilluni akuerineqassappat, ajornartorsiut
qaangerneqartussanngussaaq, aamma tassunga atatillugu oqaatigissavara
ullumikkut utaqqisoqanngingajaavigunarmat, utaqqisoqanngikkuniluunniit immaqa
nungussimapput tamakku kinguaattoorutit.
Pikkorissartinneqarnissamut apeqqut taanna uani periarfissiissutinut aamma
ilaasoq, taanna periarfissaavoq soorunami, aamma qinersinermi uani taanna
pikkorissartitsineq suliarineqarsimanngilaq, massakkulli siunnersuut
malillugu anguniagarlu malillugu pikkorissartitsineq pisussaassaaq 2005-imi
tullissaanik kommunalbestyrelsimi qinersineqarpat.
Kisiannili kissaatigineqarpat Inatsisartuninngaanniik massakkut qinikkat
immikkut pikkorissartinneqassasut, taava aamma Inatsisartut
eqqaamasariaqartussaassavaat aningaasanik tassunga atugassanik aamma
aningaasanut inatsisikkut immikkoorsitsinissaq.
Taava Atassumminngaanniit Inuit Ataqatigiinniillu oqaatigineqartoq tassaavoq
nakkutiginninnerup ullumikkorninngaanniit sukanganerulernissaa. Ilumoorpoq
taanna ilaannikkut ajornartorsiutigineqarsinnaavoq aamma ajornartorsiut
annertusinnaasarluni, taamaattumik tassuuna Naalakkersuisoqarfimminngaanniit
suliniummik saqqummertoqassappat isumaqarpunga, tulluaannartoq. Nunarput
angisoorujussuuvoq ilaannikkullu tamakkua eqqumaffigineqanngit-sooriataartarput,
taamaattumik taanna ajornartorsiut sukangasuunik inatsisiliornikkut aamma
kommuninut pituttuinermik malitsilimmik aaqqiineqarsinnaguni taava tamatta
najoqqutassaqalissaagut ajornartorsiutip taassumap tamatsinnut
naammaginartumik aaqqiivigineqarsinnaaneranut, kisianni tassa
oqaatigineqareersutut aamma oqaaseqartuninngaanniit una suliassaq massakkut
siullermeerneqarpoq, aappassaaneerneqarnissaanullu ataatsimiititaliami
ingerlanneqartussaassaaq, taava tassani oqariartuutit takussavagut qanoq
isikkoqassanersut, taamaalillunilu imaassinnaavoq allannguuteqartoqalaartoq
imaassinnaavorlu aamma ukua pikkorissartitsinissamut, taannami annertuumik
ujartorneqarmat taassumap isummerfigineqarnissaa aamma ataatsimiititaliami
ingerlanneqassasoq.
Ole
Lynge, Inatsisartut Siulittaasuat Inuit Ataqatigiit:
Tassa
taamaasillugu immikkoortoq 23; Isumaginnittoqarfiup
aqunneqarnera aaqqissuussaaneralu pillugit Inatsisartut peqqussutissaattut
siunnersuut?-ip, siullermeerneqarnera naammassivoq.
Isumaqatigiissutigineqartutut
aappassaaneerneqartinnani Suliffeqarnermut Isumaginninnermullu
Ataatsimiititaliamut ingerlatinneqassaaq.