Oqaluuserisassani immikkoortoq 24-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut tallimaat, tallimanngorneq septembarip 28-at 2001, nal.
16:10
Ataatsimiinnermik
aqutsisoq: Ole Lynge, Inatsisartut Siulittaasuat, Inuit Ataqatigiit.
Ole
Dorph, Isumaginninnermi Suliffeqqarnermullu Naalakkersuisoq, Siumut:
Qujanaq.
Isumaginninnermi iluarsaaqqiinermi ataatsimiititaliarsuup 1997-iminngaaniit
innersuussutigineqartut tunngavigalugit matumuuna ulluunerani
paaqqinnittarfiit, ulluunerani angerlarsimaffinni paaqqinninneq il.il.
pillugit Inatsisartut peqqussutissaatut siunnersuut Naalakkersuisut
saqqummiuppaat.
Aalajangersakkat
meeqqat inuusuttullu ikiorserneqartarnerat pillugit Inatsisartut
peqqussutaanni immikkoortinneqarsimavoq. Aallaqqaasiullugulu oqaatigissavara maani
saqqummiussininni siunnersuut 20. september 2001-imeersoq saqqummiussisininni
aallavigissagakku.
Isumaginninnermi
iluarsaaqqiinermi ataatsimiitititaliarsuup malittarisassat maannakkutut
iluseqartillugit attatiinnaqquvai. Suliassaqarfiup ataatsimut isigalugu
inatsisitigut malittarisassaqarluarnera kiisalu meeqqanut sanngiitsunut
isumaginninnermi pissutsit immikkut isigineqartuartartut
malittarisassaqartareernerat innersuutigalugit.
Ulluunerani
angerlarsimaffinni paaqqinninneq ataatsimiititaliarsumiik tassa
isumaginninnermik ataatsimiititaliarsuarmiik, isumaginninnermik suliassatut
isiginngilaat. Inuit atugarisaat, atugarisatigut pisartut
paaqqutarineqartalernerannik pisariaqartitsisarnerannillu
aallaaveqakkajunngimmata.
Taamaattumik
peqqussutissatut una siunnersuut annertunerusumik allannguuteqartoqarnissaanik
siunnerfeqanngilaq.
Pequssutissatummi
siunnersuutip ataatsimut isigalugu ullumikkut meeqqat paarineqartarnerannut
aalajangersakkat imarai.
Naalakkersuisut
isumaliutersuutigaat ulluunerani paaqqinninnermik suliassaqarfimmi
Atuarfitsialak
assigalugu ulluunerani paaqqinniffitsialak taaguutigalugu
siunnersuuteqartoqarsinnaannginnersoq. Meeqqalli suli
atuartunngorsimanngitsut tamaasa eqqarsaatigalugit aammalu 53,5% taamaallaat
ulluunerani paaqqinnittarfimmiittartut kisiisa pinnagit Naalakkersuisut
tassunga taarsiukkallarlugu Atuarfitsialammut periareersarneq pitsaasoq
suliarissavaat.
Siunnersuut
Naalakkersuinikkut akisussaassutsip ukiut ingerlaanerani
oqartussaaffeqarnermut allanut nuunneqarsinnaanissaanut periarfissiivoq.
Suliassaqarfimmik taamatut allamik nuussineq Atuarfitsialak eqqarsaatigalugu
Naalakkersuisut suliniutit ingerlassimassaasa pitsaanerusut
ataqatigiissillugit aaqqissuunneqarsinnaanissaannik aammattaaq
nassataqarsinnaavoq.
Nuussisinnaaneq
suliassaqarfimmi isumaginninnermi perorsaanikkut suliniutit eqqarsaatigalugit
allannguutissanik nassatassaqartussaanngilaq. Peqqussutissatut siunnersuut
aammattaaq misiligutitut aaqqissuussisinnaanermut periarfissiissooq.
Taamaalillutik kommunit paaqqinnissinnaanermut neqeroorutinik
misileraasinnaaniassammata. Tamatumuunalu suliassaqarfiup ineriartornera
taamaasilluni pisinnaassalluni.
Naalakkersuisut
taamatut oqaaseqarlutik siunnersuut inatsisartunit akuersaartumik
oqaluuserineqarnissaa inassutigaat.
Ole
Lynge, Inatsisartut Siulittaasuat, ataatsimiinnermik aqutsisoq, Inuit
Ataqatigiit:
Aap,
Isumaginninnermut Naalakkersuisumut qujavugut. Taavalu partiit oqaaseqartuinut
ingerlaqqippugut.
Mikael Petersen, Siumup oqaaseqartua:
Siumumiit nuannaarutigaarput isumaginninnermik iluarsaaqqiinermut
ataatsimiititaliarsuup innersuussutai malillugit Naalakkersuisut
piviusunngortitsiuarmata.
Soorlu uani ulluunerani paaqqinnittarfinni ulluuneranilu angerlarsimaffinni
paaqqinninnermut peqqussutip suliarinera eqqarsaatigalugu. Ilumoorpoq
isumaginninnermut iluarsaaqqinnermut ataatsimiitititaliarsuup malittarisassat
maannakkutut iluseqaannarnissai ataatsimullu inatsisitigut
malittarisassiuunneqarnissai kiisalu meeqqat sanngiinnerusut immikkut
isigineqartariaqarnerat pingaartissimammagu innersuussutigalugulu.
Siumumiit aamma nuannaarutigaarput meeqqat ilaannai eqqarsaatiginagit,
meeqqalli sapinngisamik tamarmik atuarfitsialammut isernissaminnut
meeqqerivinnik periareersartittalernissat Naalakkersuisut suliniutigilermassuk.
Tamannami Siumup pingaartilluinnagaanut ilaammat.
Ilaqutariittut inuuneq sulinerlu imminnut ataqatigiipput. Angajoqqaat
naatsorsuutigisinnaasariaqarpaat inuiaqatigiit meeqqat paarinninnissaannut
pisariaqartumik pitsaasumillu neqerooruteqartarnissaat.
Siumumiit pingaartipparput nunarput tamakkerlugu illoqarfinni nunaqarfinnilu
meeqqanik paaqqinnittarfiit sanaartorneqarnerisa pisariaqartinneqartumut
naapertuuttunngorsarneqarnissaat. Taamatullu meeqaanut sunngiffimmi
sammisassaqartitsiviit tassa Fritidshjemmet nalun-ngilarput annertuumik
pisariaqartinneqaraluartut ullumikkulli annertunerusumik suli
naammassisaqarfiusimanngitsut.
Taakku naammaginartumik aaqqiiviginissaat siunertaralugu inassutigissavarput
atuarfiit meeqqanullu paaqqinnittarfiit suleqatigiissinnerisigut tamanna
anguniarneqassasoq.
Siumumiit taamatut naatsumik oqaaseqarluta siunnersuutip
aappassaaneerneqannginnermini isumaginninnermut suliffeqarnermullu
ataatsimiititaliamut ingerlatinneqaqqaarnissaa innersuussutigaarput.
Jakob Sivertsen, Atassutip oqaaseqartua:
Qujanaq. Ulluunerani paaqqinnittarfiit, ulluunerani angerlarsimaffinni
paaqqinninneq il.il. pillugit Inatsisartut peqqussutissaatut siunnersuut
siullermeerneqarnerani Atassummit imatut oqaaseqarniarpugut.
Angajoqqaat marluullutik suliffeqarsimappata imaluunniit kisermaalluni
meeraqarlunilu suliffeqarsimagaanni meeqqat akisussaassuseqartumik
paaqqutarineqartarnissaat pinngitsoorneqarsinnaanngilaq. Ataatsimut
oqaatigaluguu meeqqerivinni meeraaqqerivinnilu kiisalu ulluunerani
angerlarsimaffimmi paarsisitsisarnissaq pinngitsoorneqarsinnaanngilaq.
Tamaammat
peqqussutissamut siunnersuut Atassummit tigulluarparput. Aamma inunnik
isumaginninnermut iluarsaaqqinnissamik ataatsimiititaliarsuup
anguniagassanut ilaatillugu innersuussutaa piviusunngortinneqartussanngormat.
Naak peqqussutaareersumut annertuumik allannguinermik
kinguneqanngikkaluartoq. Taamaakkaluartoq ulluunerani meeqqanik
paaqqutarinnittarnerup peqqussutissakkut erseqqissarneqarnera Atassummit
pitsaasusut isigaarput ullumikkummi ulluunerani meeqqanik paaqqinnittarfimmi
inissat taamak killeqartigitillugit ulluunerani angerlarsimaffimmit meeqqanik
paaqqinnissinnaaneq pingitsoorneqarsinnaajunnaarmat.
Ulluunerani meeqqanut inissanik kommunit namminneerlutik aaqqissugaannik
misileraalluni pilersitsisinnaanerit peqqusutissakkut
periarfissinniarneqarnerat Atassummit tulluartuusoraar- put kommunit
namminneq periarfissatik aallaavigalugit suliniuteqarsinnaanerat
ammaanneqassammat.
Isumaginninnermut Naalakkersuisup saqqummiussaqarnermini Atuarfitsialak
assigalugu ulluunerani paaqqinniffitsialak taaguutigitillugu
suliniuteqartoqarsinnaannginnersoq oqaatigaa. Erseqqissarluguli
Naalakkersuisut tassunga taarsiullugu Atuarfitsialammut piareersarneq
pitsaasoq Naalakkersuisunit suliniutigineqassanersoq aamma
suliniutigineqassasoq aamma oqaatigalugu.
Matumuuna Atassummit paaserusupparput Atuarfitsialaap oqaluuserineqarneranut
peqatigitillugu inunnik isumaginninnermut ataatsimiititaliamit
meeqqerivitsialak siunissami anguniarneqartariaqartoq
piumasaqaatigineqarsimalluni meeqqerivitsialammik anguniagaqarnissap
qimanneqarsimanera sunik peqquteqarnersoq nassuiaatigineqarnissaa
piumasaraarput. Mee raq anguniakkamut Meeqqerivitsialammik anguniagaqarneq
imminnut atalluinnarmata.
Naggataatigut -tsialak, soorlu Atuarfitsialak, Paaqqinniffitsialak,
Meeqqerivitsialak, immaqa tullinnguuttut Seminariatsialak, Katuatsialak,
Pilersuiffitsialak, Pisiffitsialak il.il. Atasummit isumaqarpugut -tsialak
ingasaallugu atorneqalersoq, -tsialammik taaguusersuissagaanni taaguusikkap
naammassisaqarsinnaassusianut naleqquttuusariaqartoq Atassummit
isumaqarfigigatsigu.
Taamatut oqaaseqarluta peqqussutissamut siunnersuutip siullermeerneqarnera
Atassummit oqaaseqarfigaarput. Aappassaaneerneqartinnagu ataatsimiititaliamit
misissoqqissaarneqarnissaa innersuussutigalugu.
Asii Chemnitz Narup, Inuit Ataqatigiit oqaaseqartuat:
Ulluunerani paaqqinnittarfeqarneq, ulluunerani angerlarsimaffimmi
paasisarneq il.il. pillugit peqqussutissaatut siunnersuut ataatsimut
nalilissagutsigu Inuit Ataqatigiit tungaanniit peqqutissaqanngilagut
siunnersuummut akuerseqataannginnissatsinnut.
Taamaattoq oqaatigeriissavarput amigaateqarsorigatsigu aamma
maqaasisaqalaaratta. Peqqussutissatut siunnersuutip imarivai meeqqat
ulluunerani paaqqutarineqartarnerat pillugu malittarisassat. Assinguppullu
meeqanit inuusuttunillu ikiorsiissarneq pillugu peqqusummi malittarisassanut
maanna atuuttunut.
Siunnersuummi oqaaseqatigiit paasiuminarsarneqarsimapput, malittarisassallu
tulleriinnilersorneri ataqatigiinnerulersutut ipput. Tamakku
eqqaassanngikkaanni peqqussutissatut siunnersuut annerusumik
iluarsaaqqinnermik nassataqartussaanngilaq. Peqqussutissatut siunnersuummi
oqaaseqarfigerusutagut ataasiaakkaat saqqummiutereerutsigit ulluunerani
paaqqinnittarfeqarnermut pissutsit killiffissiorlugit Inuit Ataqatigiit
naliliinigut nalunaarutigissavagut.
Siullerpaajutillugu una oqaatigilarput pissusissamisoorsorigatsigu
peqqussummi meeqqeriveqarnerup siunertaa tunngaviilu erseqqissarlugit
immikkut malittarisassiuuneqarnissaat. Meeqqeriveqarneq inuiaqatigiit
ilaqutariinnut meerartalinnut neqeroorutigivaat. Inuiaqatigiillu
neqeroorutaata taassumap sumik imaqarnissa peqqussutikkut
nalunaarutigineqartariaqarpoq.
Oqallisigisariaqartutut isumaqarfigaarput meeqqerivinnik meerartagut ilumut
paarineqaannassanersut. Taamatummi
oqaaseq taanna atorneqarami § 1, immikkoortoq 1-imi. Tulluarnerunngila
oqassalluni meeqqeriviit paarsillutillu perorsaanermik suliaqartuusut. Ilami
pissutsit piviusut imaapput nunatsinni meeqqat suli atualinngitsut affaasa
missaat namminneq angerlarsimaffiginngisaminni ullukkut paarineqartarput,
meeqqat eqqumanerpaaffianni, piuminarseruttorfiannilu inunnik allanit
isumagineqartariaqartarput, akunnerni meeqqat ilikkalertoruttorfii.
Taamaammat
oqartariaqarpoq meeqqerivinni sulisut naammassisartagaat
paaqqutarinninnerinnarmik
imaqanngitsoq suliaat perorsaanermik aamma imaqarput.
Perorsaaneq
mianernartuuvoq perorsaariaatsillu assigiinngitsorpassuullutik. Taamaammat
angajoqqaat meeqqerivinni sulisut peqatigalugit ersarsissumik
siunnerfeqarlutik qanimut isertuaallutik ataqqeqatigiinnermillu
tunngaveqarlutik peqatigiinnissaat pisariaqarpoq. Ikioqatigiittariaqarput
siunertaralugu meerartatta inuiaqatigiinni sukkaqisumik allanngorarfiusumi
toqqiisisimasumik peqqinnartumillu ineriartorsinnaanissaat.
Maluginiarparput
peqqussutissatut siunnersuummi kommunalbestyrelsi meeqqerivinnik
angerlarsimaffinnillu ullukkut meeqqanik paarsisunik nakkutilliisussaatitaasoq.
Taanna iluarisimaarparput. Ippigaarpulli peqqussummi atuuttumi
nakkutilliisussap immikkut piginnaasaqarnissaanik piumasaqaat siunnersuummi
peerneqarsimammat.
Tamanna
akuersaanngilarput Inuit Ataqatigiinni isumaqarpugut meeqqanik isumaginninneq
sullissinerlu tamaat meeqqerivinni angerlarsimaffinnilu paasinerit mininnagit
pitsaassutsimikkut qaffasissuusariaqartut sullissinerlu
inerisartuartariaqartoq.
Taamaammat
nakkutilliinissaq pingaaruteqarluinnarpoq tamatuminngalu suliaqartussat
immikkut piginnaaneqartariaqarsorivagut. Ima isumaqartinngilarput
nakkutilliisup qaffasissorujussuarmik ilinniagaqartuusimanissaa, kisianni
perorsaanermik suliaqarnermikkut misilittagaqartuunissaa. Meeqqallu
pisariaqartitaanik ilisimassaqartuunissaa pingaartipparput.
Inatsisartut
isumaginninnermut ataatsimiititaliaata tamanna aamma nalilersoqqissaassagaa
kaammattuutigaarput.
Iluarisimaarnarpoq
misileraanerit atorlugit ullukkut meeqqeriveqarnerup nutaanngorsarlugulu
ineriartortinneqarsinnaanera peqqussutikkut periarfissiissutiginiarneqarmat.
Apeqqutigissavarpulli sooq misileraanerit ukiunut pingasunut
killilerneqarsimanersut, imaluunniit killilerniareqarnersut.
Isumaginninnermut
Naalakkersuisup saqqummiussilluni oqaaseqarneratigut paasinarpoq ulluunerani
meeqqeriveqarnermut maleruagassat immikkut peqqussusiuunneqarnissaat qangali
kissaatigineqarsimasoq. Assersuutigalugu isumaginninnermik iluarsaaqqiinermi
ataatsimiititaliarsuarmit.
Naalakkersuisup
ilanngullugu oqaatigaa ataatsimiitsitaliarsuup inassutai tunngavigalugit
siunnersuut suliarineqarsimasoq. Taava aperisariaqarpoq siorna upernaakkut
Inatsisartut ataatsimiinnitsinni ulluunerani paaqqinnittarfiit pillugit
oqallikkatta Inatsisartut innersuutai inassuteqaataat kaammattuutaallu
ullumikkumut suleriaqqinermi qanoq tunngaviginiarneqarsimanersut.
Siorna
juni aallartilaartoq Isumaginninnermut Naalakkersuisup meeqqat inuusuttullu
pillugit Sisimiuni isumasioqatigiissitsimmat ulluuneran meeqqeriviit
sammineqartut ilagaat isumasioqatigiinnermi peqataasut innassutaat
kissaataallu sumut pippat?
Siorna
Inatsisartut upernaakkut ataatsimiinneranni isumaginninnermut
iluarsaaqqinnermi ataatsimiititaliarsuup meeqqeriveqarneq pillugu siunniussaa
Inatsisartut ilalerpaat. Assersuutigalugu ukioq 2005-imi meeqqanut
atualersimanngitsunut inissaqartitsinerup 80%-iunissaa.
Taamaammat
kaammattuutigineqarpoq sanaartugassanut pingaarnersiuilluni
tulleriissaarinissami meeqqeriveqarnermut aningaasaliissutissat
annertusisarneqassasut. Ukioq 2002-mut aningaasanut inatsisissanut siunnersuut
qiviaraanni nassuerutigisariaqarpoq anguniagaq ukiuni qaninnerpaani
piviusunngortinneqarsinnanngitsoq. Sanaartugassat eqqarsaatigalugit
pingaarnersiuineq allanngunngippat.
Meeqqeriviliornermi
kommunit Namminersornerullutillu Oqartussat akornanni aningaasalersueriaatsit
ilanngullugit allanngortinneqartariaqartutut inatsisartuni
isumaqatigiissutigineqarpoq. Kommunit akiliisinnaassuseqarnerusut
akiliinerulersillugit.
Periarfissaq
manna iluatsillugu apeqqutigissavarput nutaaliorneq taanna
misilittagaqarfigineqalereersimanersoq.
Sisimiuni
meeqqat inuusuttullu pillugit isumasioqatigiinnermi eqqartorneqartut ilagaat
Meeqqerivitsialaat. Unalu nipi paatsoorneqarsinnaanngitsoq tusarliunneqarpoq.
Ulluunerani meeqqeriveqarnerup qulaajaavigineqarlunilu
misissueqqissaarfigineqartariaqarpoq. Atuarfitsialak Meeqqerivitsialallu
siunertaqarluartumik ataqatigiissinneqarsinnaaqqullugit.
Isumaq
taanna Inuit Ataqatigiinnit tapersersorparput. Inatsisartullu
isumaginninnermut ataatsimiititaliaani suleqataanerput aqqutigalugu
ataatsimiititaliami ilaasortaqativut peqatigalugit Naalakkersuisunut
apussimavarput ataatsimiititap pingasoriarluni allakkatigut
saaffiginnissutigisimavaa kinguneqanngitsumilli.
Isumaginninnermut
Naalakkersuisup saqqummiussissummini oqaatigaa Naalakkersuisut
meeqqerivitsialammut taarsiullugu Atuarfitsialammut piareersarneq pitsaasoq
suliniutigilersaarlugu.
Tunngavilersuutigivaat
meeqqat ulluunerani paaqqinnittarfimmiittartut kisiisa sullikkusunnginnamikkit.
Tamanna immini ajunngilaq.
Atuarfitsialammut piareersarneq pitsaasumut
suliniuteqartoqalersaaraluarpalluunniit
patsisissaasorinngilarput meeqqeriveqarnerup sukumiisumik
qaqilerivigineqarnissaanut tunaartassat tunngavissallu ersarissarneqarnissaat
siunertaralugu.
Aatsaat taamaaliornermi atuarfinnik meeqqerivinnillu inerisasanerit
ataqatigiissaakkamik ingerlanneqarsinnaassammata.
Inuit Ataqatigiinni isumaqarpugut Inatsisartut pisussaaffigigaat meeqqanut
inuusuttunullu inuiaqatigiinnit sulissutiginiarneqartut ataatsimoorussamik
siunertaqarluartumik ataqatigiissaakkamillu ingerlatsisoqarnissaa
ilungersuutigissallugu. Taamaammat isumaqartuarsinnarpugut meeqqeriveqarneq
immikkut sammineqartariaqartoq tamannalu nukinginnarpoq.
Meeqqerivinni sulisorpassuit angerlarsimaffinnilu meeqqanik paarsisuusut
akisussaaffimmik angisuumik paarisaqarput. Nersortarialimmik sulipput,
meerartatsinnut ulluunerani paarsisussaqanngikkutta inersimasut amerlasuut
suliffimminnik paarsisinnaanngillat nunattalu aningaasarsiornera unissalluni.
Sulisoqarniarnerup tungaatigut ajornartorsiutit aaqqiiviginissaat aamma
nukinginnarpoq, meeqqerisut perorsaasut angajoqqaallu tamanna kissaatigivaat
uagullumi.
Naggasiutigalugu apeqqutigissavarput angajoqqaat meeqqerivinnut
akiliutigisartagaasa naatsorsornerinut tunngaviit Naalakkersuisut
allanngortinnialersaarneraat.
Inuit Ataqatigiinni isumaqarpugut anguniagassatut siunnerfigineqassasoq
angajoqqaat kikkulluunniit akeqanngitsumik meeqqerivimmiititaqartarnissaat.
Taamatut oqaaseqarluta siunnersuutip aappassaaneerneqannginnerani
isumaginninnermut ataatsimiititaliamut suliarineqarnissaa inassutigissagatsigu.
Loritha Henriksen, Kattusseqatigiit oqaaseqartuat:
Inatsisissatut siunnersuut Kattusseqatigiinniit imatut
oqaaseqarfigissavarput.
Inunnik Isumaginninnermi suleqataalerattali angorusutatta
suleqatigiiffigisattalu ilagilluinnarsimavaat patajaatsumik
isumannaatsumillu ulluunerani meeqqanut 15-it ataallugit ukiulinnut
paaqqinnittarfiit patajaatsut, sinaakkutsilimmik toqqissimanartumillu
peqqussusiornissaat.
Anguniagarlu minnerulinngilaq Atuarfitsialak annertuumik eqqartorneqalermat.
Atuarfitsialammi patajaatsumik aallartissinnaanngilaq meeqqerivimmik aamma
sulianut aallartinneqanngippat. Tamannalumi Inunnik Isumaginninnermi
Ataatsimiititaliami suliassatut pingaartilluinnarsimavarput.
Nalunngisattitullu Isumaginninnermi Iluarsaaqqinnermi Ataatsimiititaliarsuup
isumaliutissiissutaani 1997-imi ersarissumik takuneqarsinnaavoq
anguniagassatut pingaartut ilaattut. Ulluunerani paaqqinnittarfiit,
ulluunerani angerlarsimaffimmi paaqqinnittarfeqarneq pillugu aalajangersakkat
immikkoortillugit avissaartinneqarnissaannik siunnersuuteqartoq Inatsisartullu
peqqussutaanni siunnersuutigineqareertutuut.
Kattusseqatigiinniit peqqussutissatut siunnersuut paasilluarlugu
tapersersorparput, tassani pineqarmat Meeqqat inuusuttuaqqallu 15-it
ataallugit ukiullit inatsisitigut erseqqissumik nalorninaatsumillu
illersorneqarnissaat qulakkeerniarneqarmat.
Maluginiarsimavarpullu ersarissumik Meeqqat inuusuttuaqqallu ikiorsiisarneq
pillugu Inatsisartut peqqussutaanni nr. 9-mi, 30. oktober 1992-imeersumi §-imi
maannamut atuuttut eqqarsaatigalugit annertuumik allanngortitsinissamik
pilersaaruteqanngimmat.
Kiisalu isumaqatigaarput Meeqqat inuusuttunillu ikiorsiisarneq pillugu
Inatsisartut peqqussutaanni nr. 9-imi, 30. oktober 1992-immersumi § 31
peerneqarnissaa, taannalu akuersaaratsigu.
Takusinnaagatsigu uani peerneqartup Isumaginninnermi pitsanngorsaaneq
pillugu kaajallaasitami 213-imi iluarsiivigineqareersoq, peerneqartumut
matussutissaasumik. Taamaalilluta §-it ikkunneqartut aammalu peerneqartut
isumaqataaffigaavut.
Aammattaaq oqaatigerusupparput tulluartutut nalilerusukkatsigu,
kommunerisanut meeqqeriveqarneq ulluinnarni ingerlanneqarnerata
atuartitaanermi allaffimmut nuutinneqarnissaa pilersaarutigineqarmat,
kommuninilu arlalinni atorneqalereerluni.
Naggataatigut Kattusseqatigiinniit kaammattuutigerusupparput, meeqqat
kommuneqarfiit iluanni fritidshjemmeniittartut, allallu ukiumikkut
immikkoortinneqarnissaat sulissutigineqaqqullugu, makku pissutigalugit:
Meeqqat ullumikkut fritidshjemmeniittartut arfinillinniit 13-14-inik
ukiulinnut ataatsimoortinneqarlutik pineqartarmata. Atuareernerup
kingorna sunngiffimmi sammisassaqartinneqartarput. Kisiannili nalunngisagut
misilittakkagallu naapertorlugit, meeqqat qulit missaanni 13-14-inik ukiullit
soqutigiunnaartarpaat meeqqat mikinerusut ilagissallugit. Tamannalumi
paasineqarsinnaalluarpoq, meeqqat inuusuttuaranngulernerminnut
ikaarsaarialernertik arlalitsigut malunnaateqartittarmassuk
avatangiisiminnut sunniuteqartumik.
Taamaattumik
Kattusseqatigiinniit siunnersuutiginiarpagut meeqqat inuusuttuaranngulersut
aammattaaq immikkut sullinneqarnissaat isummerfigineqaqqullugu. Tassami
meeqqat inuusuttuaranngulernerminni ikaarsaalernertik assigiinngitsunik
aamma eqqarsaatigalugit, minnerunngitsumik ilinniagaqarnermut tunngasut,
akisussaassuseqarnermut tunngasut, imigassamik naamaarniartarnermullu
ikiaroornartumullu atornerluinermut tunngasut. Minnerunngitsumillu
kinguaassiuutitigut ajornartorsiuteqartartunut tunngasut.
Aammalu
imminoortarnermut tunngasut ajornartorsiutaasartut paasineqarnerullutik
qaangerneqarnissaat, akisussaaffeqarnerusumillu sammineqarnissaat
anguniarlugu.
Taamatut
oqaaseqarluta peqqussutissatut siunnersuut aappassaaneerneqannginnerani
Inunnik Isumaginninnermi Ataatsimiititaliamut suliarineqarnissaa
inassutigaarput.
Ole
Lynge, Inatsisartut Siulittaasuat, Inuit Ataqatigiit:
Taamaalilluni
allanik nappaasoqanngilaq, taava Isumaginninnermut Naalakkersuisoq
oqaaseqaqqikkumavoq.
Ole
Dorph, Isumaginninnermut Suliffeqarnermullu Naalakkersuisoq, Siumut:
Siullermik
partiit, Kattusseqqatigiit attaviitsullu saqqummiussaannut tunngatillugu
oqaasiinut assut qujavunga. Malugisinnaavara una apeqqut tamanit
soqutigineqartoq, aamma naammassineqarnissaa kissaatigineqartoq.
Siullermik
partiit oqaaseqartuinut akissuteqassaguma Siumut-mingaanniit eqqaaneqartoq
tassaasut ilagaat paaqqinnittarfiit, illoqarfinni nunaqarfinnilu
sananeqartartut immaqa ukiuni makkunani annikitsuinnarmik
piorsaavigineqartarsimasut. Ilumoorpoq meeqqeriviit sinerissami illoqarfinni
amigaatigineqarput, aamma nalunngilarput nunaqarfinni meeqqeriviit
sananeqarusukkaluarlutik
ullumanna suli annertunerusumik periarfissinneqarsimanngitsut,
taamaakkaluartorli
nalunngilara nunaqarfiit ataasiakkaat massakkut apeqqutit tamakku suliarigaat,
aamma meeqqeriviliortiternerit aallartinnialeraat.
Jakob
Sivertsenimut Meeqqerivitsialaap peerneqarsimaneranut oqaaseqarneranut
atatillugu oqaatigissavara oqaaseq "Meeqqerivitsialak" piffissaq
ungasinnerusoq eqqarsaatigalugu eqqunneqarnissaa siunnersuutigineqarmat.
Siorna ataatsimeersuartitsinerit aallaavigalugit innersuutigineqarsimasoq
unaavoq, "Meeqqerivitsialak" eqqunneqassappat, tassani meeqqat tamarmik
pineqartussaammata, ullumikkullu oqaatigineqareertutut meeqqat taamaallaat
affaasa missaat meeqqerivinni inissaqartinneqarlutik. Taamaattumik maannakkut
siunnersuusiarineqarsimasoq "Meeqqerivitsialak"-mut piareersarnerup
eqqunneqarsinnaanissaa piffissaq qaninnerusoq atorlugu tassaasariaqartoq
taanna maani suliniutigineqartariaqartoq.
Taamaattumik
oqaatigissavara taanna siunertaq qimanneqanngimmat, aamma
qimanneqarnavianngilaq,
kisiannili oqaatigeriikkattut apeqqutit assigiinngitsut eqqarsaatigalugit
ullumikkut taanna siunnersuutigineqartoq Naalakkersuisuninngaanniit taamatut
isikkoqarpoq.
Taavalu
Inuit Ataqatigiinninngaanniit Asii Chemnitz Narupip aamma
naatsorsuutigeriikkattut apeqqut taanna sukumiilluinnartumik sammisimavaa,
aamma malunnarpoq taanna tapersersuineq uummammeersuusoq, aamma apeqqutit
assigiinngitsut soorunami tamaasa maanngaanniit uanga
akissuteqarfigisinnaanngilakka, kisiannili pisariaqartinneqassappat aamma
allakkatigut tamakku ilaasa akissuteqarfigineqarsinnaaneri, taanna
periarfissaasuaannarpoq.
Meeqqerivinni
inissisimasut paarineqaannartarnissaannut apeqqummut atatillugu
oqaatigissavara,
soorunalimi meeqqat asuli meeqqerivinni uninngasuutigineqarsinnaanngillat.
Meeqqanik pædagogikimik ilinniartitsineq tassani soorunalimi
ingerlanneqartariaqartoq uanga naatsorsuutigaara, aamma taamaattariaqarpoq,
sualummik meeqqat atuarnissamut piareersarnerat tassani
eqqarsaatigineqassappat.
Ullumikkut
nakkutilliinermi sulisoqarniarnermut tunngassuteqartut aamma eqqaaneqarput.
Sulisoqarniarneq ullumikkut kommunini ataasiakkaaniippoq, aamma kommunit
ullumikkut namminersortutut inissisimapput, aamma qulaaninngaanniit
piumaffigineqarsinnaanngillat imannak, imannak iliussaasi, kisianni
taamaakkaluartoq nalunngilara kommunit periarfissatik tamaqqinnaasa atorlugit
inunnik meeqqerinermik ilinniarsimasunik pissarsiortuaraluarlutik
ajoraluartumik ilaannikkut pissarsineq ajortut, kisianni taanna
ilinniartitaanermut attuumassuteqarpoq, aammalu neriuutigissavarput
meeqqerisunngornianik ilinniarfiup ukiuni makkunani apeqqummik tassannga
annertuumik aallussineq aqqutigalugu, tamakkua ajornartorsiutit ukiuni
aggersuni aaqqeriarsinnaanissaannut aamma suleqataassasoq.
Una
"Meeqqerivitsialak"-mut piareersarnermut atatillugu, imaanngilaq piareersarneq
ukiut pingasut qaangiuppata taamaatinneqassasoq, imaappoq piareersarneq una
misiliinerlu, taannalu eqqarsaatigalugu ukiut pingasut qaangiuppata
nalilerneqassooq, misiliineq taanna ataavartumik aallartinneqassanersoq,
imaluunniit misiliineq imak ajortigisimappat taamaatittariaqarluni, taava
taanna aamma allatut isummerfigineqartussaassaaq. Taamaattumik ukiut taakku
qaangiuppata taanna apeqqut pinngitsoornani uterfigineqartussaassaaq,
misiliineq ataavartutut aaqqiiffigineqassanersoq.
Taavalu
meeqerivinnik sanaartorneq eqqarsaatigalugu aningaasalersueriaaseq aamma
taaneqarpoq, ullumikkullu taanna nalunngilarput qanoq kommunit
Namminersornerullutik Oqartussallu akornanni aaqqiivigineqartartoq. Taassuma
qanoq siunissami aaqqiivigineqarsinnaanissaa soorunami Inatsisartut
aalajangertussaavaat, kommunillu isumaqatigiinniartussaassapput , siunissami
aningaasalersueriaaseq qanoq isikkoqassanersoq.
Taavalu
aamma angajoqqaat akiliutaannut tunngassuteqartunut apeqqut tikilaarusutara
tassaavoq, angajoqqaanut akilersueriaatsit ullumikkut atuuttut uunga
nalunaarummut attuumassuteqanngillat. Taakku immikkut
nalunaarusiorfigineqartarput, taannalu nalunaarutissaq soorunami ajorineqaruni,
taava immikkut sananeqartussaassaaq.
Immaqa
taamaasillunga apeqqutigineqartut tamakanniisa akissuteqarfigaakka.. Loritha
Henriksenip tapersuinini takutimmagu aamma nuannaarutigaara, kisianni tassa
malunnarpoq, una apeqqut unalu anguniagaq tamanik tapersersorneqartoq, aamma
apeqqutit tamaasa akissuteqarfigisinnaanngilakka, taanna nassuerutigissavara
maani, taamaattumik apeqqutit sukumiinerusut taakkua allakkatigut
akissuteqarfiginissaat taanna pissooq, aammalu soorunalimi Inatsisartut
Isumaginninnermi Ataatsimiisitaliaata una suliassaq suliarileruniuk, taava
uagut sapinngisatsinnik aamma immersueqataalersinnaanissarput
pisortaqarfimminngaannit isumaginiarsarissavarput. Qujanaq.
Asii
Chemnitz Narup, Inuit Ataqatigiit:
Isumaginninnermut
Naalakkersuisup oqaaseqaqqinnermini akissuteqaataanut Inuit
Ataqatigiinninngaannit oqaaseqaqqilaarusussaagut. Nakkutilliisoqarnermut tunngatillugu soorunami
uagut siunertarinngisaannarparput maani Inatsisartuni suligaangatta kommunit
qulaaninngaanniit naqisimarusullugit, kisianni isumaqaratta maani
pisussaaffeqarluta, Inuit Ataqatigiinninngaannit sinaakkusersuinermi
erseqqissumik aamma meeqqat sukkut illersorsinnaanissaat oqaasertalimmik
malittarisassaliuutissallugu, taamaattumik nakkutilliisoqarneq taanna immini
isumaqarpugut pingaaruteqartorujussuusoq, minnerunngitsumik "meeraq
pingaarnerutillugu"-mik qulequtserlugu suliniutit massakkut ingerlareersut
eqqarsaatigalugit.
Aamma
Isumaginninnermut Ataatsimiititaliami suligaangatta, soorunami suliassarpiavii
uagutsinnut innersuunneqartut salliutittarpavut, katsorsaanerit
pinaveersaartitsinerillu. Tassan-ngaanniit aamma suliarput siaartarparput
isumaqaratta, soqutigisariaqarlutigu uagut qulequttat allat uagut
suliniarnitsinnut attuumassuteqartut, soorlu ilisimatusarnerit aammalu
ilinniartitaanerit.
Ilinniakkamikkut pitsaasumik tunuliaqutanngippata, socialip
iluani sulisut taava qaffassaasinnaannginnatta, isumaginninnerup iluani
suleriaatsit eqqarsaatigalugit. Taamaattumik qissimittuaannaavittarpavut,
apeqqutit ilinniartitaanermut tunngasut, minnerunngitsumik isumaginninnerup
iluani sulisut eqqarsaatigalugit. Aamma suleriaaseq taanna
ingerlatiinnassavarput.
Taava
akissuteqarfigillaqqussagaluarpara taanna maannamut Naalakkersuisut qanoq
ittunik takorluugaqarpat? "Meeqqerivitsialak"-mut tunngasoq qulequtaq
qimassimallugu oqarputit. Aap, taava nutaamik qulequtsiisimavusi, taanna
qulequtaq nutaaq sunik imaqarpa? Oqaatigigaluarpat sukkulluunniit
allakkatigut saaffiginnissinnaasugut, aap soorunami taamaaliussaagut, kisianni
oqaatigisariaqarpara aamma saqqummeeqqaarninni oqaatigivara pingasoriarluta
allakkatigut saaffiginnissutigisimavarput "Meeqqerivitsialak"-mut tunngasoq
pingaartikkatsigu,
aamma isumaqaratta Naalakkersuisut uagullu ataatsimiititaliami
suleqatigiissutigisariaqaripput taanna. Pakatsinarsimaqaaq aamma
nalinginnaanngitsorujussuusimavoq taamatut pineqarnerput ataatsimiititaliap
tungaaninngaanniit, sungiusimagaluarparput pitsaasumik ataqqeqatigiilluni
suleqatigiinneq, taamaattumik pakatsisimaqaagut aamma taamaattumik oqarnerit
taanna sukkulluunniit allakkatsigut saaffiginnittoqarsinnaasoq, neriussuugut
taava tulliit akineqartarumaartut, una apeqqut
pingaaruteqartorujorujorujussuummat. Atuarfitsialammut inerisaaneq
nuannaartunaqaaq, aamma maligassiuipput isumarput malillugu, tassani
tunngaviit taavalu siunnerfiit naqqaninngaanniit mumittaqattaarlugit
pineqartut akornanni oqallisigitillugit, angajoqqaat qanimut peqatigalugit,
susassaqartut isumasioqatigiissittarlugit. Periuseq taanna
Meeqqerivitsialammut tunngatillugu atorneqarusukkaluaqaaq.
Aamma
siorna Sisimiuni Isumaginninnermut Naalakkersuisup isumasioqatigiissitsimmat ,
suleriaaseq taanna ujartorneqarpoq, aamma ulluunerani paaqqinnittarfinni
sulisut qasseeriarlutik tusagassiutitigut avammut nalunaarutigereerpaat
tassunga peqataarusullutik, suliarlu nukinginnartutut nammineq
isumaqarfigalugu. Atuarfitsialak oqaasiinnanngussaaq, Meeqqerivitsialak
aamma piorsaaffiginngikkutsigu. Isumaqarpunga, tamakkua oqaatsit
asuliinnaanngitsorujussuusut,
taamaattumik suleqataarusuppugut, aap, kisianni tusalaariartigu
Naalakkersuisut qulequtaq nutaaq taanna aalajangiusimasaat sumik imaqarnersoq.
Naggasiutigalugu
oqaatigilaarlara sanaartugassanut tunngatillugu apeqqutigisimavarput, nutaamik
periuseqartoqarnissaa massakkut timitalerlugu aallartinniarneqalereernersoq,
peqqutigalugu Aningaasaqarnermut Naalakkersuisoq KANUKOKA-llu siulittaasua
julimi atsioqatigiillutik taanna immikkut naqissusereersimammassuk, kommunit
akileraarutitigut isertitarissaartut anginerusumik nammataqalernissaat
siunnerfigalugu, kisianni paasivarput tamanna suli aallartissimanngitsoq.
Ole
Lynge, Inatsisarsartut Siulittaasuat, Inuit Ataqatigiit:
Qujanaq.
Una oqaatigilaassavara, pisariaqanngitsumik sivitsorsaasoqaqqunagu,
oqaaseqartut tamarmik inatsisissatut siunnersuut taperserlugu oqaaseqarmata
aamma Isumaginninnermut Suliffeqarnermullu Ataatsimiititaliami apeqqutit
assigiinngitsut suliarineqaqqikkumaarmata.
Ataatsimiititaliami
ilaasortat aamma qinnuigilaassavakka taamatut saaffiginnissutinik
pilaartoqartarsimappat,
Siulittaasoqarfimmut saaffiginnittaqqullugit, tassanngaanniit
kukkusoqarsimappat
aamma uagut saaffiginnissinnaasaratta. Taamaattumik tullinnguuttut
qinnuigissavakka sapinngisamik uunga oqaluuserisatsinnut tunngasorpiamik
sammisaqaqqullugit.
Massakkullu
tullinguuppoq Jakob Sivertsen, Atassut. Tulleriumaarpaa Loritha Henriksen.
Jakob Sivertsen, Atassut:
Naatsunnguamik. Iimmaqa Inuit Ataqatigiit taanna aamma apeqqutaanut
assingummat, Atuarfitsialammut piareersaanermut taarsiullugu ilaa
Meeqqerivitsialak peerneqarsimammat. Tassa annertunerusumik saqqummiussami
nassuiarneqarsimannginneranut uanga taanna apeqquteqarninnut peqqutigigiga,
soorunami nassuiarneqarsimagaluarpat sooq Meeqqerivitsialak tassa
Atuarfitsialammut piareersaaneq pitsaasumik taarserneqarsimanersoq, taanna
annertuuliuutigissanngilara.
Inuit Ataqatigiit saqqummiussaa ataaseq soqutiginartikkakku, aamma
isumaqarpunga nalilersoqqittariaqartoq, tassa angajoqqaat meeqqerivinnut
akiliutigisartagaasa naatsorsorneqartarnerisa tunngavii Naalakkersuisut
aalajangersaaffigisarmassuk, taassuma allanngortinneqarnissaa isumaqarpunga,
sanioqqunneqarsinnaajunnaartoq. Tassa ukioq aallartittussaq tulleq 2002
aallarnerpat meeqqanut tapiissutit annertuut piiarneqartussaapput, soorlu
ineqarnermut. Taamaattuumik taakkununnga taartaasinnaasumik arlaatigut meeqqat
pingaartumik meeqqerivinni akiliutigineqartartut nalimmassarneqarsinnaanerat
eqqarsaatigineqaqqullugu uanga aamma kissaatigaara. Tassa ullumikkut
assigiinngitsorujussuupput 0-miit 3.000-ip tungaanut assigiinngissuseqarput,
taamaattumik qangarsuarli taanna akilersueriaaseq allanngortinneqarsimanngilaq,
taamaattumik soqutigaarput uagut aamma taanna tikinneqassappat
suleqataaffigissallugu.
Loritha Henriksen, Kattusseqatigiit:
Naalakkersuisunut apeqqutigerusukkigaana, taakkua oqaaseqaatitsinnut ilanngussimasagut, inuusuttuaqqat 13-14 ukiullit ajornartorsiutigisartagaat qanoq isumaqarfiginerai, isumaqarama tassani takussutissaasartut meeqqat inuunermini aallariarfimmini, taakkua aallariarfittut qilersorfigisarmagit, taamaattumik apererusuppara taakkua saqqummiussagut iluatiginerai imaluunniit ingerlateqqinnissaa allatulluunniit ilillugit kaammattuutigisinnaanerai.
Ole Dorph, Isumaginninnermut Suliffeqarnermullu Naalakkersuisoq, Siumut:
Kingullerminngaanniit aallartissuunga, tassa Loritha Henriksenimiit; taakku saqqummiussatit ilumut ajornartorsiutaapput, tamanna nassuerutigisariaqarparput. Meeqqat meeqqerivinnut angivallaartut ungdomsklubbinullu mikivallaartut, taakku ukiuinut tunngatillugu ajornartorsiut nunatsinniittoq annertuvoq. Taamaattumik taassuma tungaatigut ilumut suliniuteqartoqartariaqarpoq. Aamma qujanartumik kommunini ataasiakkaani taassuma tungaatigut eqqumaneqarpoq, taanna ajornartorsiut qanoq suleqatigiinnikkut nalunngilara aaqqiivigineqartartoq. Aamma uani nassuiaammi meeqqat inuusuttullu pillugit nassuiaammi ajornartorsiutaanera aamma tikitsiarneqarpoq, taannalu oqallinneq piffissaq alla atorlugu ingerlanneqartussaavoq. Neriuutigissavaralu aamma taanna ajornartorsiut qanoq ililluni suleqatigiinnikkut Namminersornerullutik Oqartussat kommunillu akunnerminni suleqatigiinnerisigut aaqqiivigineqarsinnaassasoq, ilumut meeqqat taamatut ukioqarlutik iluamik nakkutigineqarunik ajunngitsumik aallartarput, nakkutigineqanngikkaangamik ilaannikkut ajoraluartumik pinerlunniakujunnermik aallartittarput. Taamaattumik meeqqat tamakkua nalaanni ukiullit mianerisassaapput aamma nakkutigeqqinnaagassaapput.
Taava Meeqqerivitsialak aamma Atuarfitsialammut piareersarneq pitsaasoq eqqarsaatigalugu ilisimatinneqarpunga, ukiassap ilaani Isumaginninnermut Ataatsimiititaliaq Naalakkersuisumik aggersaasimasoq, tassanilu oqaloqatigiinneq ingerlanneqarsimasoq suna pissutigalugu taanna qulequtaq maannakkut qimanneqarallarsimanersoq, kisianni oqaatigissavara uanga sinerissaminngaanniit taanna Meeqqerivitsialak massakkut piareersaatigineqartoq nalunngilara, taamaattumik taanna piareersarneq uagut maanngaanniit unitsisanngilarput, ikummarissaaqataassaagut taassumallu sapinngisamik ajunngitsumik aallarteriarsinnaanissaa anguniarlugu, aamma neriuutigissavara maanngaannit taanna qulequtaq piffissanngorpat tikinneqassasoq.
Taavalu Atuarfitsialammut imaluunniit Atuarfitsialammut piareersarneq pitsaasup suna qulequtaraa, taassumamuna suna anguniaraa? Qanoq-una taanna piviusunngortinneqarsimasoq? Tassani pineqarput meeqqat sisamaninngaanniit arfinillit tungaanut ukiullit. Aamma nalunngilara ataatsimiittoqareersimasoq maani, aammalu suleqatigiissitaq pilersinneqarsimasoq ilaasortaaffigineqarpoq, kommunininngaanniit, atuarfinniit, paaqqinnittarfinniit aamma angerlarsimaffinni paaqqinnittarfinniit, tarnit pissusaanik ilisimaqartuninngaanniit, angajoqqaaniit, KIIIP-iminngaanniit kiisalu aamma Inunnik Isumaginninnermut Pisortaqarfimminngaanniit.
Naatsorsuutigineqarpoq, suleqatigiissitaq taanna maannakkut aallartisaleruttortoq, suliani ingerlatissagaa novembarip qaammamminngaanniit aasamut majip qaammat 2002-ip tungaanut. Tassalu suleqatigiissitap siunertaraa periarfissanik ukiuni meeqqanut 4-6 ukiulinnut atualinnginnermi meeqqat taakkua atuarfimmut ikaarsaarnissaannut sapinngisamik ajornannginnerpaamik taanna ingerlanniaqqullugu piareersarnerup pitsaasumik ingerlanneqarnissaa. Tassalu KIIP-iminngaanniit taanna piareersarnermut atatillugu assigiinngitsunik innersuuteqartoqarsimavoq, tassalu meeqqat ataasiakkaat atuanngitsialernermi piareersarneqassasut atuarfik, meeraq taavalu aamma meeqqanik meeqqeriviup taakkua akornanni suleqatigiinnerup qanoq piareersarnerullu qanoq isikkoqarnissaa.
Taavalu aamma ukiut kingulliit meeqqerivinni meeraq inissisimatillugu atuarnissamut piareersarnerup qanoq ingerlanneqarnissaa, taavalu aamma meeqqat meeqqerivinniinneq ajortut, tassa meeqqat affangajai nunarput tamaat eqqarsaatigalugu, taakkua qanoq sunillu periarfissanik neqeroorfigineqarsinnaanersut. Taavalu aamma pingaaruteqartoq aamma siusinnerusukkut ullullu ilaa eqqartorneqartoq tassa angajoqqaat aamma tassani mininneqassanngimmata, tassalu angajoqqaat aamma meeraq atualinnginnerani pikkorissartinneqarsinnaanissaat aamma pingaaruteqartutut isigineqarpoq, taamaalillutik angajoqqaat meeqqamik atuarlutik aallartinnginneraniit aallartinneraniillu sapinngisamik malinnaariarsinnaanissaat annertunerpaamik anguniarlugu.
Taavalu aamma suleqatigiissitap taassumap eqqartukkama isummerfissaasa ilagisussaavaat, nunani allani taamannak piareersarnerup ingerlanneqarnikuunera, ingerlanneqarnera qanoq misilittagaqarfigineqarnersoq, kiisalu aamma maani nunatsinni kommuneqarnersoq, imaluunniit kommunit ataatsimik-marlunnik imaluunniit arlalinnik misileraanermi aallartitsisinnaannginnersunik.
Tassaapput
taassumap piareersarnerup imarisassatut suliassatullu sunniussimasai. Ilumut
meeqqat meeqqerivinniittartut taakkua meeqqerivinniisillugit
akiliutigineqartartut, taakkua kommuniminngaanniit kommunimut assigiinngitsunik
inissinneqartarput. Ilaatigut apeqqutaatinneqartartoq tassaavoq kommunip
aningaasatigut qanoq inissisimanera. Kommuneqarpoq aningaasarissaartunik aammalu
akissaqartunik meeqqat meeqqerivinni inissisimanerup nalaani annikitsunnguamik
akiliuteqartitsisartunik, aamma kommuneqarpoq feriap nalaani akiliisitsineq
ajortunik. Kiisalu aamma kommuneqarpoq aningaasarsiornikkut equngasumik
ingerlanertik aallaavigalugu akiliutinik qaffasitsittisartunik. Taanna
nalunaarutikkut tamarmi erserpoq, tassalu kommunip akisussaaffia tassaniippoq,
nammineq aalajangissallugu qanoq meeqqat pillugit akiliutillu pillugit
politikkeqassanerluni. Taanna kommunip oqartussaaffianiippoq.
Ole
Lynge, Inatsisartut Siulittaasuat Inuit Ataqatigiit:
Qujavugut,
taava tassa taamaalilluta immikkoortoq 24 Ulluunerani paaqqinnittarfiit,
ulluunerani angerlarsimaffinni paaqqinninneq il.il. pillugit Inatsisartut
peqqussutissaattut siunnersuutip siullermeernera naammassivoq.
Oqaatigineqarneratullu
aappassaaneerneqartinnani Isumaginninnermut Suliffeqarnermullu
Ataatsimiititaliaamit suliarineqassaaq.