Oqaluuserisassani immikkoortoq 25-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut arfineq-aappaat, pingasunngorneq oktobarip 3-at 2001
nal. 13.05
Ataatsimiinnermik
aqutsisoq: Anders Andreassen, Siulittaasoqarfimmi ilaasortaq, Siumut.
Ole
Dorph, Isumaginninnermut Suliffeqarnermullu Naalakkersuisoq, Siumut:
Pisortanik
pensionisiat pillugit Inatsisartut peqqussutaata allannguuteqarnissaanut
siunnersuut,
matumuuna Naalakkersuisut sinnerlugit saqqummiutissavara:
Aallaqqaasiullugu
malugeqqussavara siunnersuummut naqqiissuteqartoqarmat. Siunnersuut 24.
september 2001-imeersoq atuuppoq. Siunnersuut piginnaanngorsaqqinnissamut
ikiorsiisarneq pillugu Inatsisartut peqqussutaata 2001-imi upernaakkut
Inatsisartut 1. januar 2002-mi atuutilertussatut akuersissuteqarnerup malitsigaa.
Tamatumap
kingunerisaanik siusinaartumik pensionisiaqarnerup aningaasalersorneqarnera
aammattaaq allannguuteqarpoq. Maannakkut aaqqissuussinermi siusinaartumik
pensionisiaqartarnermut aningaasartuutit tamarmik nunatta karsianit
akilerneqartarnerat allannguuteqartussaassalluni.
Piginnaanngorsaqqinneq
pillugu aalajangersakkamut allannguutissatut siunnersuut, kommuninut
Sulinermik Inuussutissarsiuteqartut Kattuffiinut, sulisitsisunut, Utoqqaallu
Peqatigiiffiinut tusarniaassutigineqarsimavoq. Tusarniaanermi akissuteqaatini
aalajangersakkamut siunnersuummut oqaasissaqartoqarsimanngilaq.
Inatsisartullu
ataatsimiinneranni matumani Naalakkersuisuni saqqummiunneqartussaavoq, utoqqaat
aningaasaqarnikkut atugarisaat pillugit nassuiaat. Naatsorsuutigineqarpoq
2002-mi misissuisimanermi paasisat pensionisiat pillugit peqqussummut
allannguuteqarnissaanik siunnersuummik saqqummiussisoqarnissaa, tamatumunngalu
atatillugu pisortat pensionisiat pillugit Inatsisartut peqqussutissaattut
nutaarluinnartut siunnersuummik saqqummiussisoqassalluni.
Siunissami
siusinaartumik pensionisiaqarnermut aningaasartuutit affai nunatta karsianit
affaalu kommuninit akilerneqartalissapput. Kommunit
aningaasartuuteqarnerulernissaat ataatsimoortumik tapiissutit pillugut
KANUKOKA-mut isumaqatigiinniarnermi ilanngunneqareerpoq. Nunatta karsianit
sipaarutissat 1. januar 2002-miit kommunit piginnaanngorsaqqinnermi
aningaasartuutaasa 50%-inut matusissutissatut atorneqassapput.
Naalakkersuisut
taamatut oqaaseqarlutik siunnersuut Inatsisartunut suliassanngortippaat.
Anders
Andreassen, Siulittaasoqarfimmi ilaasortaq, Siumut:
Ja,
qujanaq. Maannalu partiit, Kattusseqatigiit attaviitsullu oqaaseqartussaat
oqaaseqassapput, siulliulluni oqaaseqassaaq Ruth Heilmann, Siumut,
tulliullukumaarpoq Jakob Sivertsen, Atassut.
Ruth Heilmann, Siumup oqaaseqartua:
Siumumiit iluarisimaarput Naalakkersuisut pisortanit pensionisiat pillugut
peqqussutissap allannguutissaatut siunnersuut saqqummiummassuk, upernaaq
piginnaanngorsaaqqinnissamut ikiorsiisarneq pillugu peqqussutip
Inatsisartunit akuerineqarnerata malitsigisaanik.
Siumumiit maluginiarparput pensionisiaqarnermut aningaasartuutit siunissami
affai Nunatta karsianit affaalu kommuninit akilersorneqartalissasut,
kommunilli taamatut aningaasartuuteqarnerulernissaq ataatsimoortumik
tapiissutit pillugit KANUKOKA-mut isumaqatigiinniarnermi ilanngunneqassasoq.
Siumut isumaqarpoq Nunatsinni innuttaasoq kinaluunniit utoqqalinermini
isumannaatsumik toqqissisimasumillu atugassaqartitaasariaqartoq, tamannalu
uani siunnersuummi innarlerneqarani ingerlanneqartussatut isikkoqarmat
siunnersuut Siumumiit akuersaarparput.
Jakob Sivertsen, Atassut:
Pisortanit pensionisiat pillugit Inatsisartut peqqussutaata
allanngortinneqarneranik Inatsisartut peqqussutissaattut siunnersuut
siullermeerneqarneranut Atassut-mit imatut oqaaseqarniarpugut.
Peqqussutip allannguutissaata tunngavigaa upernaaq majimi Inatsisartut
ataatsimiinnitsinni siusinaartumik pensionisiaqarlernissamik qinnuteqartut
tamarmik sulisinnaanngoqqinnissaat anguniarlugu piginnaanngorsarneqarlutik
sulilerseqqinniarneqartarnissaat peqqussutikkut 1. januar 2002-mi
atuutilersussami inatsisartuni aalajangerneq.
Upernaaq Inatsisartut ataatsimiinnitsinni piginnaanngorsaqqittarneq pillugu
Inatsisartut peqqussutissaata 1. juli 2001 atuutilersinneqarnissaata
siusippallaarnera Atassummit uparuarsimavarput, kommunini
pilersaarusiorluarnissaq piareersarluarsimanissarlu tamatumani
eqqarsaatigalugu.
Qujanartumillu partiit allat paasinnillutik 1. januar 2002
atuutilersinneqarnissaa akuersaarsimavaat, tamanna Atassummit
tulluusimaarutigisimavarput, maannakkut uppernarsigatsigu
kinguartitsiniarnermik piumasaqarnerput tunngavissaqarsimasoq peqqussutip
atuutilinnginnerani isumannaareersimasassat, qarsupinneqarsimagaluartut
maannakkut aaqqinniarneqarmata.
1. januar 2002 aallarnerfigalugu siusinaartumik pensionisiaqalersussanut
aningaasalersuineq annertuumik allannguuteqartinneqartussaavoq, tassa kommunit
aningaasartuutit 50%-iat tassa affaat aningaasartuutigisartussanngussavaat.
Ullumikkut aningaasartuutit katillugit taamaallaat 10%-iat
aningaasartuutigisarlugit. Siunissami qularutissaanngilluinnartumik kommunit
siusinaartumik pensionisiaqalertussanut aningaasartuuteqarnerulernissaannik
tamanna kinguneqartussaavoq.
Ullumikkut inuit sulerulussimanermikkut ajoquteqalernertik peqqutigalugu
imminnut ilaquttaminnullu tamakkiisumik pilersuisinnaajunnaarsimasut,
siusinaartumik pisortanit pensionisiaqartinneqalersartut nunatsinni
amerlasoorujussuupput, tamanna Atassummit tupiginngilarput.
Inuit siusinaartumik pisortanit pensionisiaqalersartut amerlanersaat
piniarnermik, aalisarnermik sulerulunnartunillu
inuussutissarsiuteqarnermikkut inuusukkaluarlutik timimikkut ima
nungullarsimatigisarput, piginnaanngorsaqqikkaluarunilluunniit sulinermikkut
tamakkiisumik imminnut ilaquttaminnullu pilersuisinnaanissamut
nukissaaruttarlutik. Tamannami piniartoqarfiini aalisaartoqarfinnilu
takornartaanngeqisoq nalunnginnatsigu, tamakku aningaasalersueriaatsip
allanngortinneratigut sipaarniarfigineqassanngitsut Atassummit piumasaraarput.
Soorlu Danmarkimi siusinaartumik pensionisiaqarnissaminnik qinnuteqartartut
tamarmik piginnaanngorsaqqinneqaraluaraangamilluunniit tamatigut iluatsinneq
ajortut ilisimasaqarfigigut. Nunatsinni piginnaanngorsaqqinnissamut
periarfissat taamak killeqartigitillugit siusinaartumik
pensionisiaqalersartut ikinnerulernerannik kinguneqarpallaarnavianngitsoq
nalunnginnatsigu.
Inimi maani arlaleriarluta ilaatigut oqaatsit sakkortuut atorlugit
utoqqartatta aningaasatigut atugaat pillugut oqallittarsimaqaagut. Ullumimut
annertunerusumik kinguneqanngitsumik. Matumuuna Atassummit naalakkersuisuut
utoqqartatta aningaasatigut atugaat pillugit misissuisimanermi
paasissutissat tunngavigalugit peqqussutissamik nutaarluinnarmik 2002-mi
saqqummiussaqarnissaminnik neriorsuutaat pissangalluta Atassummit
utaqqissagatsigit, naatsorsuutigilluinnarlugulu utoqqartatta ullumikkut
aningaasatigut ajornartorsiutaat aaqqiissuteqarfigineqarsinnaajumaartut.
Taamatut Atassummit oqaaseqarluta peqqussutip allannguutissaanik siunnersuut
akuersaarlugu oqaaseqarfigaarput ataatsimiititaliamilu
misissoqqissaarneqarnissaa kissaatigalugu.
Qujanaq.
Asii Chemnitz Narup, Inuit Ataqatigiit oqaaseqartuat:
Inatsisartut upernaq manna piginnaanngorsaaqqinneq pillugu nutaamik
peqqussusiorput. Tamatumuuna malitsigisaanik pisariaqalerpoq peqqussutit
atuutereersut ilaat allannguuteqartinnissaat, piginnaanngorsaaqqinneq
pillugu peqqussummut nutaamut naleqqussarnissaat siunertaralugu.
Naalakkersuisut upernaaq neriorsuipput Inatsisartut ukiaanerani manni
ataatsimiinnitsinni Inatsisartut peqqussutaat piginnaanngorsaaqqinnermut
tunngasunik maleruagassanik ilaqartut imminnut ataqatigiissaarneqassasut,
matumanilu tamanna naammassiniarneqarpoq.
Naalakkersuisut siunnersuutigivaat pisortanit pensionisiat pillugit
peqqussummi piginnaanngorsaqqinneq pillugu malittarisassat, paragraffit
ataasiakkaannguit atorunnaarsinneqassasut. Siusinaartumik pensioninik
pisartagaqalerumalluni qinnuteqaateqartoqarpat pisartagaqalinnginnermi inuup
pineqartup piginnaanngorsaqqaarnissaanik piumasaqaat suli atuutissaaq,
kisianni ingerlanneqartalissalluni piginnaanngorsaaqqinnissamut ikiorsiisarneq
pillugu peqqussut tunngavigalugu.
Inuit Ataqatigiinnit upernaaq oqaatigeriikavut innersuussutigalugit
Naalakkersuisut pisortanit pensionisiat pillugit Inatsisartut
peqqussutaannut allannguutissatut siunnersuutaat akuersaarpagut.
Taamatut oqaaseqarluta peqqussummut allannguutissatut siunnersuutit
Isumaginninnermut Suliffeqarnermullu Ataatsimiititaliamut
suliareqqitassanngorlugit innersuuppagut.
Loritha Henriksen, Kattusseqatigiit oqaaseqartuat:
Pisortanit pensionisiat pillugit Inatsisartut peqqussutaata
allanngortinneqarsinnaaneranik Inatsisartut peqqussutissaatut siunnersuut.
Inatsisartut peqqussutissaatut siunnersuutaanut Kattusseqatigiinnit imatut
oqaaseqarfigissavarput.
Inatsisartut 2001-imi upernaakkut ataatsimiinneranni Kattusseqatigiinniit
siunnersuutaasumut taperseeqataalluta oqaaseqarsimavugut. Tassami
annertuumik isumalluaratta piginnaanngoorsaaqqiinermut ikiorsiineq
annertuumik pimoorussamillu aqqutissiuunneqarumaartoq. Inummi ukiuni
arlalinni suliffeqarsimanngitsoq annertunerusumik sulilertinneqartussanngormat
pisinnaasaa naapertorlugu, suliffimmut naleqquttumut siunnersorneqarlutillu
piginnaanngorsarneqartussanngormat.
Taamaattumik isumaqatigaarput allanguutissatut siunnersuut ullumikkut
saqqummiunneqartoq pissusissamisoortutullu nalilerlugu.
Taamaattorli uggoraarput piginnaanngorsaqqiinneq pillugu aalajangersakkamut
allanngutissatut siunnersuummut susassaqartut assigiinngitsut
tusarniaaffigineqarsimagaluartut, tusarniaanermili aalajangersakkamut
siunnersuummut allaffigineqarsimagaluarnertik oqaaseqarfigineqarsimannginnera
uggornatutut isigigatsigu. Tassa ukuusut kommuninut, Sulinermi
Inuutissarsiuteqartunut Kattuffiannut, Sulisitsisunut, kiisalu Utoqqaat
Peqatigiiffiata Kattuffiannut. Taamaattumik naatsorsuutigaarput
allannguutissatut siunnersuut aperineqartuniit tamanit
iluarisimaarneqarsimasoq.
Mannalu iluatsillugu oqaatigerusupparput qilanaarigatsigu ukiaq manna
ataatsimiinnermi Naalakkersuisunit saqqummiunneqartussaq, tassa utoqqaat
aningaasaqarnikkut atugarisaat pillugit paasissutissat nutaajusut 2001-imi
misissuisimaneq tunngavigalugit. Tamannalu aallaavigalugu peqqussutissamik
nutaalluinnartumik siunnersuummik saqqummiussisoqarnissaa qilanaaralugu
oqalliseqataanissarput naatsorsuutigaarput.
Taamaattorli paasisat naapertorlugit uggornartutut isigaarput utoqqaat
atugaannut atatillugu kommuninut tusarniaasimagaluarneq annertunerusumik
akissuteqarfigineqarsimannginnera, tassami kommunit 18-nit, marluk kisimik
akissuteqarsimasut paasinarmat.
Taamatut oqaaseqarluta pisortanit pensionit pillugit Inatsisartut
peqqussutissaata allanngortinneqartussamut siunnersuut Kattusseqatigiinniit
akuersaarparput, ataatsimiititaliamullu ingerlaqqinnissaa kissaatigalugu.
Otto Steenholdt, attaviitsoq:
Aallaqqaasiullugu nalunaarutigissavara saqqummiussami oqaatigineqarmat Inatsisartut ataatsimiinneranni matumani utoqqaat aningaasaqarnikkut atugarisaat pillugit nassuiaat Naalakkersuisunit saqqummiunneqassasoq. Pilersaarullu taanna nutaarluinnaassasoq, allatut oqarfiussanngilaq qanortoruna tassani utoqqalinersiutit kiisami akileraarutaarutiivillugit saqqummiunneqarili.
Allannguutissatut siunnersuut manna naatsuinnarmik oqaaseqarfigaara, tassani qitiutinneqartoq aningaasat akiliutaasartut Nunatta karsiata, Kommunillu Kattuffiata aveqatigiittalissagaat. Tamanna Kattuffimmiit akuersaarneqarsimasoq naammagisimaarinnernittut tassa nalilerneqartariaqarpoq. Taamaattoq eqqumiiginartpoq tusarniaanermi siunnersuummut oqaaseqartoqarsimanngimmat, tamannaluuna aallaavigalugu ilaanni oqartariaqalersartoq, immaqaana Inatsisartuninngaanniit ilaannikkut Inatsisartut tassa aalajangigassaasa tusarniaassutigineqartarnipilorujussuat ilaanneeriarluni ingattaanneqartartoq, allaat saaffigineqarluartut oqartalersimannguatsiarlutik: aasimmiaasiit, taavalu akissuteqassanatik.
Ole Dorph, Isumaginninnermut Suliffeqarnermullu Naalakkersuisoq, Siumut:
Siullermik saqqummiussininnut qisuariaatissinnut qujanarsuaq; partiit, Kattusseqatigiit, attaviitsullu. Una siunnersuut utoqqartatsinnut pingaaruteqartussaavoq, taamaattumik akissutisi assut nuannaarutigaakka.
Siullermik Siumuminngaanniit Ruth Heilmannip oqariartuutaa, tassa siunnersuummik tapersinnera assut nuannaarutigaara aammalu allat oqaaseqaataat taamatut nipillit assut nuannaarutigaakka. Aamma Jakob Sivertsenip oqaasia, tassa siusinnerusukkut ajornartorsiutaasimagaluartut massakkut siunnersuummi saqqummiunneqartumi tamakku peersimanerat, taanna neriuutigissavara uumap suliassap ingerlaqqinnissaani aamma ajornartorsiut peereermat una suliassaq ajornaatsumik aaqqiivigineqarsinnaassasoq.
Ilumoortoq kommunit Namminersornerullutillu Oqartussat 90/10 atorlugu taanna akileriaaseq atorsimagaluarpaat, massakkulli KANUKOKA-mik isumaqatigiissuteqarsimaneq malillugu massakkut aveqatigiinneq 50/50 atorlugu siunissami taassumap suliassap aningaasartalersuunneqarnissaa isumaqatigiissutigineqarsimavoq. Aamma kommunip aningaasartuuteqanerulernissaa blok tilskudditigut isumaqatigiinniarnikkut aaqqinneqarsimavoq. Aamma oqaatigineqarpoq ataasinnaanngitsuninngaanniit tassa utoqqaat pillugit misissuisitsineq, aningaasarsiornikkut misissuisitsineq massakkut ingerlanneqartoq, tassa utoqqaat maani inuiaqatitsinnut allanut sanilliullugit aningaasaqarnikkut qanoq atugarisaasa issusaa, taanna massakkut misissoqqissaarneqarpoq, aammalu ataatsimiinnerup matumap naannginnerani naatsorsuutigineqarpoq suliareqqissaarsinnarlugu Inatsisartunut ilaasortanut agguaanneqassasoq, taavalu kingusinnerusukkut Naalakkersuisuni sammisinnarlugu aammalu Inatsisartuni ilaasortat soqutiginninnerat takusinnarlugu, taava taassumap upernassamut saqqummiunneqarnissaa pisussaassooq.
Aamma taamatorpiaq Inuit Ataqatigiit oqaaseqartuat Asii Chemnitz Narup oqaaseqarpoq, aamma nassuerutigineqassaaq 1990-ikkut aallartilaarneranni nunatsinni kommunerpassuit ajoraluarmik, taamak oqaatigisariaqarpara siusinaarlutik soraarnerussuteqalersunik pilersitsiortorsimammata, taamanikkut suliffissaaleqigatta nunatsinni annertunera aallaavigalugu, kisianni tamakkua massakkut naliliiffigisarnissaat pinngitsoornani pinngitsoortussaanngilaq pisartussaavoq, aamma inatsimmik ? inatsit una saqqummiunneqartoq taamatut oqariartuuteqarpoq.
Kattusseqatigiinninngaanniit Loritha Henriksenip aamma oqaaseqarnermini utoqqaat eqqaagamigit oqaatigivaa, kommunit marluinnaat qisuariaateqarsimasut, taanna ilumoorpoq. Nunatsinni kommunit 18-iupput, taamaattumik uggornaqaaq kommunit marluinnaat qisuariaateqarsimanerat, taamak apeqqummut pingaaruteqartigisumik kommunit tamarmik akissuteqarsimasariaqaraluarput.
Taannalu aallaavigalugu HS Analyse piumaffigineqarsimavoq suliassamut taassuminnga ingerlattitseqqullugu, taanna suliassaq massakkut ingerlavoq, oqaatigeriikkattullu naammassineqartussaassooq piffissami qaninnermi.
Utoqqaat aamma inooqataapput uatsitulli, uanga naluara utoqqaat oqarusunnersut uagut akileraarusunngilagut, kisianni aamma utoqqaat kinguaaminnik pingaartitsisuupput, utoqqaat uanga akileraartarnermikkut aamma kingulimik, meeqqamik, ernuttamik, ernutaqqiummik, ernutaqqiutiminnik akilersueqataanissaq taakkulu sapinngisamik ajunnginnerpaamik inuuneqarnissaannik aamma peqataarusupput, taamaattumik taassumap naliliiffiginissaa Ataatsimiititaliami ingerlanneqartussaassooq, aamma siunissap takutittussaassavaa utoqqaat akileraarutaarutitinneqassanersut imaluunniit utoqqaat akileraartiinnarneqassanersut imaluunniit aaqqissuussineq qanoq isikkoqartoq eqqunneqassanersoq. Taanna oqallinneq taamanikkornissaanut tikissaqqaarparput, taamaattumik oqaaserisassinnut qujanarsuaq aamma naatsorsuutigilluinnarpara suliassaq aappassaaneerneqannginnermini ataatsimiititaliami suliareqqissaarneqarumaartoq.
Ruth Heilmann, Siumup oqaaseqartua:
Uagut Siumuminngaannit oqaaseqarnitsinni Naalakkersuisup ilassinnilluarnera
qujassutigaarput, aamma uani Naalakkersuisut utoqqaat atugarisaat pillugit
misissuitittiniarnera taanna pillugu ilaatigut massuma kinguarsarneqarnera
ilaatigut toqqammaveqarmat aamma Siumumiit taanna paasilluarparput, tassami
pingaartipparput peqqussutissap peqqissaartumik suliarineqarluni
naammassineqarnissaa.
Aamma isumaqarpugut Siumuminngaanniit utoqqaat atugarisaat pillugit
tamakkiisumik paasisaqarfigilluartariaqartut, tassami nalunngilarput
kommuniminngaanniit kommunimut atugarisatigut assigiinngitsorujussuarmik
pineqarput utoqqaat. Taamaattumik eqqaaneqaannarsinnaavorluunniit aamma
kommunimiit kommunimut akileraarutit inunnut tunngasut aamma
assigiinngitsorujussuupput, ilai annertunerullutik ilai annikinnerullutik.
Tassuunnaannarluunniit aamma kommunini utoqqaat aamma eqqorneqartut
assigiingiiaartarput.
Taamaattumik Naalakkersuisut saqqummiussassaat utoqqarnut taanna tunngasoq
assorujussuaq nassuiaat taanna neriuppugut ukiap ingerlanerani
naammassineqarumaartoq, qilanaareqigatsigu.
Uani upernaaq pisortanit pensionisiat pillugit Inatsisartut peqqussutaata
allanngortinneqarnissaanut oqallinnermi aamma ataatsimiititaliami
assigiinngitsutigut tusarniaasarsimavugut, aamma KANUKOKA-miit aammalu
ataatsimiititaliap nammineerluni immaqa eqqumalluarnermigut taamatut
kinguartitsineq aamma ataatsimoortumik piumasarisimavarput, taamaattumik inuup
ataatsip imaluunniit partiip ataatsip taanna
erfalasulersaarutigisariaqanngikkaanni
immaqa oqartariaqarpoq. Una Otto Steenholdtip utoqqalinersiutit kiisami
akileraarutaarullugit saqqummiunneqarniarli, taanna eqqaamavara
Isumaginninnermi Iluarsaaqqiinnermi Ataatsimiititaliarsuarmi utoqqaat
atugarisaat sammineqarmata aamma taanna apeqqut sammineqarpoq,
akileraaruserneqassanersut utoqqarnut isumannaallisaatit imaluunniit
akileraaruserneqassannginnersut,
kisianni ataatsimoortumik utoqqaat piumasarinikuuvaat tassa nipaata aamma
utoqqaat inuiaqatigiinni akisussaassuseqarusukkamik utoqqaligaluarlutik,
taamaattumik akileraarutip atatiinnarneqarnissaa taanna piumasarisimavaat.
Kisiannimi ullumikkut ullut allanngorarput, imaassinnaavoq aamma allatut
isummertoqarsinnaasoq.
Anders Andreassen, Siulittaasoqarfimmi ilaasortaq, Siumut:
Qujanaq. Allanik oqaaseqartoqarnianngimmat taamaalilluni ullumikkut
oqaluuserisassat immikkortoq 25, Pisortanit pensionisiat pillugit Inatsisartut
peqqussutaata allanngortinneqarneranik Inatsisartut peqqussutissaattut
siunnersuutip siullermeerneqarnera tamaannga killeqarpoq, kisiannili
oqaatigissavara malunnarmat amerlanerussuteqartut Isumaginninnermut
Suliffeqarnermullu Ataatsimiititaliamut suliap ingerlaqqinnissaa kissaatigigaat,
taamaattumik aappassaaneerneqartinnagu Ataatsimiititaliami tassani
suliarineqarallassaaq, tamatumalu kingorna aamma aappassaaneerneqarumaarluni.