Oqaluuserisassani immikkoortoq 27-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut arfineq-aappaat, pingasunngorneq oktobarip 3-at
2001, nal. 13:25
Ataatsimiinnermik
aqutsisoq: Anders Andreassen, Siulittaasoqarfimmi ilaasortaq, Siumut:
Ole
Dorph, Isumaginninnermut Suliffeqarnermullu Naalakkersuisoq, Siumut:
Suliffissaaleqisunik
sulilersitsiniarneq pillugu Inatsisartut peqqussitissaattut siunnersuut
Naalakkersuisunik matumuuna saqqummiunneqarpoq.
Aammattaaq
malugeqqussavarput siunnersuummut naqqiissuteqartoqarmat, siunnersuut 24.
september 2001-imeersoq matumani tunngavigineqarpoq. Siunnersuummut
tunuliaqutaavoq upernaaq manna Inatsisartut ataatsimiinnerminni
piginnaanngorsaqqinnissamut ikiorsiisarneq pillugu Inatsisartut peqqussutaat
1. januar 2002-miit atuutilertussanngorlugu akuersissutigimmassuk.
Piginnaanngorsaqqinneq
pillugu peqqussutip akuerineqarnerata kingunerisaanik akissarsianut
tapiissuteqartarneq allamillu ilinniagaqaqqinneq pillugit aalajangersakkat
sulilersitsiniarnermut peqqussummi aturunnaarsinneqartariaqalerput,
taamaaliornikkut pissutsit ataatsit marloqiusamik inatsisitigut
malittarisassaqartussaajunnaassammata. Akissarsiatigut tapiiffigineqarluni
sulinermi piginnaanngorsaqqinnermut attuumassuteqarpoq, suliffissaaleqisumi
pissutsit imaassimammata nalinginnaasumik sulinermi atugarititaasut
naapertorlugit pineqartoq sulilerseqqinneqarsimanngitsoq. Taamatuttaaq
allamik ilinniagaqarnermi taamaappoq. Siunissami suliniutit taamaattut
piginnaanngorsaqqinnissami ikiorsiineq pillugu Inatsisartut peqqussutaat
naapertorlugu ingerlanneqartassallutik.
Kommunilli
sulilersitsiniutaani sulinerit suliffissaaleqisumut suliffimmi nalinginnaasumi
suliffeqarsinnaasumut tunngasuupput. Matumani ajornartorsiutaammat
suliffiusinnaasunik peqannginnera. Isumaginnittoqarfiup aqunneqarnera
aaqqissuussaaneralu pillugit Inatsisartut peqqussutaat innersuussutigalugu
naammagittaalliorsinnaanermut periarfissat atorunnaarsinneqarput. Peqqussut
isumaginninnerup iluani malittarisassanut ilaanngimmat, taamaattumillu
naammagittaalliorsinnaanermut taaneqartumut attuumassuteqartuunani.
Suliffissaaleqisunik
sulilersitsiniarneq suliffeqarnermi suliniutaavoq. Taakkununngalu
naammagittaalliorsinnaanermut
malittarisassanik aalajangersaasoqarsimanngilaq.
Naqqiissutissat
taaneqareersut saniatigut oqaatsitigut naqqiisoqarpoq, kommunillu
allaffisornikkut
aqutsinerat oqilisaaffiginiarlugu peqqussutip 1994-imili atuuttup
allannguutissaanik siunnersuuteqartoqarnerani peqqussutissaq nutaarluinnaq
saqqummiunneqarluni.
Inatsisartut
peqqussutaannut atuuttumut naleqqiullugu kommunit Naalakkersuisulluunniit
siunnersuutip kingunerisaanik allaffisornikkut
suliaqarnerulersitsisorineqanngilaq. Aammattaaq siunnersuut nunatta
karsianut, kommunilluunniit aningaasatigut kinguneqartissangatinneqanngilaq.
Akissarsianut tapiissuteqartarnerup atorunnaarsinneratigut kommunit
sipaarutissai,
piginnaangorsaqqinnissamut ikiorsiisarneq pillugu peqqussummi assingusumik
aaqqissuussinermi atorneqartassapput.
Siunnersuut
Namminersornerullutik Oqartussat iluanni, KANUKOKA-mi, Sulinermik
Inuutissarsiuteqartut
Kattuffiini kiisalu Kalaallit Nunaanni Sulisitsinermik Peqatigiiffiani
tusarniaassutigineqarsimavoq.
Tusarniaanermi akissutit siunnersuutip allannguuteqarnissaanik
pissutissaqalersitsimanngillat, aalajangersakkanilli ataasiakkaani
oqaaseqaatit arlaqartunik ilaneqarsimallutik.
Naalakkersuisut
taamatut oqaaseqarlutik siunnersuut Inatsisartunut suliassanngortippaat.
Anders
Andreassen, Siulittaasoqarfimmi ilaasortaq, Siumut:
Qujanaq.
Maannalu partiit, Kattusseqatigiit attaviitsullu oqaaseqartussaat
oqaaseqassapput, siulliulluni oqaaseqassaaq Mikael Petersen, Siumut,
tulliullukumaarpoq Jakob Sivertsen, Atassut.
Mikael Petersen, Siumup oqaaseqartua:
Siumumiit iluarisimaarparput Naalakkersuisut suliffissaaleqisunik
sulilersitsisarneq pillugu peqqussutissamut siunnersuut saqqummiummassuk.
Upernaaq piginnaanngorsaqqinnissamut ikiorsiisarneq pillugu peqqussutip
Inatsisartunit akuerineqarnerata malitsigisaanik.
Siumumiit maluginiarparput siunnersuut kommunit allaffisornikkut suliaasa
pioreersut annertussusaannut sunniuteqartussaassangatinneqanngitsoq,
taamatullu nunatta karsianut kommunillu aninaasaqarniarnerannut
sunniuteqassanngatinneqanngitsoq.
Siumut isumaqarpoq pisortat ikiuutitut inunnut aningaasat atortagaat
annertunerusumik suliffissanik pilersitsiortornermut atorneqassasut,
taamaalilluni suliffissaaleqisut suliffissaqaqqilersinnaanerat anguneqassammat, peqqussummullu siunnersuut Siumup anguniagaanut naleqqummat
akuersaarparput.
Jakob Sivertsen, Atassutip oqaaseqartua:
Qujanaq. Suliffissaaleqisunik sulilersitsiniaaneq pillugu Inatsisartut
peqqussutissaatut siunnersuut siullermeerneqarneranut Atassummit imatut
oqaaseqarniarpugut:
Inuit peqqissut sulisinnaasullu namminneerlutik sulinermikkut allatigullu
imminnut napatinnissaat Atassummit pingaartitaraarput, inuit namminneerlutik
pilersornissaat inuttut pisinnaatitaaffiannut ilaalluinnarmat.
Taamaattumik nunatsinni suliffissaqanngitsut suliffissaaleqinerup nalaani
pikkorissarsinnaanerannut periarfissat assigiinngitsut kommunit
eqqummaariffigissagaat Atassummiit piumasaraarput. Suliffissaaleqisut
pingaartumik inuusuttut suli ineriartortut suliffissaqartitaannginnertik
peqqutigalugu tamanna utaqqiinnalernerannik kinguneqaleqqunagu.
Peqqussutissamut siunnersuutip pitsaaqutaasa ilagaat kommuneni
suliffissaaleqisoraleriataartarnerata oqilisaassivigineqarnissaa, kommunit
sulilersitsiniaanerminnut suliniuteqarnissaannik periarfissinneqarnissaat
erseqqissaaffigineqarmat.
Suliffissaaleqisut kommunip suliassissiniutaanni sulisinneqarnissaannik
neqerooruteqartarnissaq, soorlu inuusuttut suliffissaaleqisut
ilinniagaqaqqinnissaannik ilinniaqqinnissaannillu
neqerooruteqarfigineqartarnissaat kiisalu inuusuttut suliffissaaleqisut
ilinniarnerminni ilinniakkamut pineqartumut ikiorsiissutissanik aamma
periarfissinneqartarnissaat peqqussutissami qularnaarniarneqarmat.
Atassummit peqqussutissamut siunnersuut ataatsimut isigalugu
suliffissaaleqisunut, pingaartumillu inuusuttunut periarfissaq
atorluarneqarpat suliffissaaleqisunut annertuumik tamanna iluaqutaajumaartoq
takusinnaagatsigu.
Taamatut oqaaseqarluta peqqussutissamut siunnersuut Atassummit
taperserparput Ataatsimiititaliamilu misissoqqissaarneqarnissaa
innersuussutigalugu.
Asii Chemnitz Narup, Inuit Ataqatigiit oqaaseqartuat:
Qujanaq. Inatsisartut upernaaq manna piginnaanngorsaaqqinneq pillugu
nutaamik peqqussusiorput januarip aallaqqaataani ukioq 2002
atortuulersinneqartussamik.
Piginnaanngorsaaqqinneq pillugu nutaamik peqqussusiornikkut
piginnaanngorsaqqittup pisinnaatitaaffii pisussaaffiilu erseqqinnerulerput.
Inatsisartut peqqussutaanni allani marlunni apeqqutit
piginnaanngorsaqqinnermut tunngasut siusinnerusukkulli
malittarisassaqartinneqareermata
pisariaqalersimavoq peqqussutit taakku allannguuteqartinnissaat.
Taamaammat pissusissamisoorpoq suliffissaaleqisunik sulisitsiniarneq pillugu
Inatsisartut peqqussutaanni piginnaanngorsaqqinnermut attuumassuteqartut
maleruagassat atorunnaarsinnissaat. Naalakkersuisut ullumikkut
saqqummiussaqarnermikkut tamanna anguniarpaat.
Inuit Ataqatigiinnit allannguutissatut siunnersuutit akuersaarpagut,
piffissarlu iluatsillugu Isumaginninnermut Sulilffeqarnermullu
Naalakkersuisumut apeqqutigissavarput kommunit suliffissaarusimasut peqqussut
tunngavigalugu sulisinneqartartut kisitsisitigut nalunaarsornissaannut
pisussaaffitsik ukiuni qaangiuttuni ajunngitsumik naammassisarneraat.
Ilanngullugu apeqqutigissavarput, kisitsisit taakku qanoq
paasissutissiinersut?
Apeqquteqarnitsinnut ilaatigut patsisigivarput Kommunit Kattuffiata
Namminnersornerullutillu Oqartussat akornanni ataatsimoortumik tapiissutit
pillugit ukioq 2002-mut isumaqatigiissutaat aqqutigalugu
erseqqissarneqarsimammat kommunit pisussaaffeqartut kisitsisitigut
paasissutissiisarnissaminnut.
Ilanngullugu oqaatigilaarlarput Inuit Ataqatigiinni pingaartikkatsigu
apeqqutini inuiaqatigiinnut pingaarutilinni kisitsisitigut
tunngavilersorluakkanik toqqammaveqartumik oqallittarnissaq
aalajangersagaliortarnissarlu.
Taamatut oqaaseqarluta peqqussummut allannguutissatut siunnersuutit
Isumaginninnermut Suliffeqarnermullu Ataatsimiititaliami
suliareqqinneqarnissaat innersuussutigissavarput.
Loritha Henriksen, Kattusseqatigiit:
Inatsisartut peqqussutissaattut siunnersuuteqarnermut Kattusseqatigiit imatut oqaaseqarfigissavarput:
Soorlu upernaaq Inatsisartut piginnaanngorsaaqqiinermut ikiorsiineq pillugu oqallinnermi tamakkiisumik tapersersueqataasimasugut annertuumillu piginnaanngorsaaqqiineq aallunneqaruni periarfissinneqarunilu pitsanngorsaateqartussaammat.
Naqqiissuummilu aallaaviummata pissutsit ataatsit marloqiusamik atuuttut inatsisitigut malittarisassaliuunnissaat patajaatsumik anguneqarnissaat siunertaalluni.
Neriuutigaarpummi ilinniagaqarnissamik neqerooruteqarnikkut suliffissaaleqisut sulisinniarneqarnissaannut kommunalbestyrelsep aalajangiisinnaatitaanera tamannalu kommunenit namminneq atorluarneqarnissaa kissaatigissavarput.
Sullitanullumi iliuuseqarnissamut periarfissat pisariinnerusumik aaqqiissutissat taamaalillutik anguneqarsinnaammata. Maluginiarsimavarpullu pitsaaquteqartoq ilinniaqqikkusuttunut ilinniagaqarnermi pikkorissarnermiluunniit ilinniakkanik tapiissutissanut aalajangersariikkanut annertuumik annertussusileriikkanik ilinniagaqarnermut ikiorsiissutissaasinnaasunik aamma pilersitsiniarneqarmat, tamannalu tulluartutut isigaarput pitsaasutullu nalilerlugu
Tassuuna suliffissaaleqisut nalunaarsorsimasut annertuumik imminnut ikiulerusuttunut piumassutsimillu takutitserusuttuni iluaqutaasussaammat.
Taamatut oqaaseqarluta peqqussutissatut siunnersuut Kattusseqatigiinniit akuersaarparput.
Otto Steenholdt, attaviitsoq:
Massakkut oqallisigisarput Danmarkimi revalideringimik taaneqartartoq aallartisarneqalermalli oqallisaasimaqaaq sulilu manna tikillugu oqallisaavoq, ilumut taanna revalidering kinguneqarluartumik ingerlanneqarnersoq.
Nunatsinni aallartinniarsarisarput tassunga assingoqaaq, tassa uanga imatut eqqarsartarama kinaluunniit sulisimagaluarluni ilinniarfigisimavaa suliassaq inuunerminut qinerlugu suliffigilerlugulu. Kisianni pisimasoqartarpoq immaqa peqqiilliornermik imaluunniit suliffiup matuneranik, taamaalilluni sulilluaruttulerluni unitsinneqartarluni nappaannarlunilu. Inuit taamatut ilinniagaqarsimasut imaaliallaannaq allarluinnaqqissaamut nuutsinniarneq ajornartaqaat, taamaattumik ilinniartitaanissaq Danmarkimi siunniunneqartarpoq nalunnginnamikku suliffissarpassuaqartoq nunaminni siammasissumi taassuma assinganik.
Angallanniarneq Danmarkimi ajornannginneroqaaq ilinniariartortinneqartarlutik tassunga taavalu qitornaqarsimagunik, ilaqutaqarsimagunik imaaliallaannaq aamma tikissinnaasarlugit. Nunatsinni taamaaliorneq ajornarluinnarpoq, taama oqaraanni ajunnginneruvoq.
Peqqiilliorneq taanna susinnaanngilarput, peqqiilliortoq ilinniarteqqinneqarsinnaanngitsutut uanga naatsorsuutigigakku.
Suliffiup matunera, soorlu nunaqarfimmi imaasiallaannaq nutaamik asserluinnaanik taarserneqarneq ajorpoq, aammalu taamatut pineqartut nunagisaminniikkusuttarnerat nunanit allamiuninngaanniit annertunerungaarpoq.
Uagununa kalaallit nunagisatsinnut pigaangatta qimakkumajunnaamisaartaripput, taamatut aamma soorlu illoqarfik eqqarsaatigigaanni. Taamatut suliffigisimasaq suliffiullu annaaneratigut imaaliallaannaq illoqarfimmut allamut ingerlaniarnissaq ilimananngilaq, pingaartumik suliffeqarsimasoq utoqqaliarsaalersimappat.
Tassa taanna siullermulli eqqarsaatigisartagara nunatsinni revalideringip aaqqinniarsarinera ajornakusoortorujussuussasoq. Una oqaatigineqartaraluarpoq piginnaanngorsaaqqinneq. Taanna oqaaseq uanga paasisarpara imannak, tassa suliffiup assiginngisaanut piginnaanngorsaaqqinneq allatut ajornartumik.
Tassa taanna utoqqaliarsaalereersimasunut ajornassangatittariga apeqqutaassammat taamatut piginnaanngorsaqqinniagaq qanoq ukioqartoq, qanoq utoqqaliarsaarsimatigisoq, nalilerneqartariaqarluni piginnaanngorsaqqinneqarluni imaluunniit piginnaanngorsaqqinneqarneranut aningaasat atorsimasat taassuma suleqqilerneranut naleqqiullugit qanoq iluaqutaasimatiginersut.
Tassa aningaasartuutigingaatsiaqaarlugu piginnaanngorsarsimasaq imaaliallaannaq aamma piginnaanngorsaqqinneqarsimanini atorpallaarnagu tunuaqqippat nunap aningaasaqarneranut aamma iluaqutaasinnaanngimmat.
Tassa sumiippa piginnaanngorsarneqarfissaa aammalu kiap aqussavaa? Taamalu taamaalereerpat aajuna tulliuttoq: Taamatoq pineqartoq naalakataaginnarusussanngilaq, inuit tamatta taamaappugut. Oqarfigineqassanngilagut: Uumaak-aa, qaa piginnaanngorsarniarit sulisinnaarsuuvutit, kisiannili pissutissaqarsorarluni nassuiaagaluarpat tamannalu tusarumaneqanngippat pissutissaqarluinnarpoq angut arnarluunniit taanna taamatut pineqartoq maalaaruteqassalluni.
Maani inatsisikkut maalaarsinnaanerat peerniarneqartoq uanga isumaqatiginngilara. Inuit tamatta piginnaaffigaarput pitsaasumik pineqarsorinngikkutta aamma saaffissaqassaluta inatsisitigoortumik taamatut maalaartarfeqassalluta. Maalaartarfiup uani inatsisissami peerneqarnissaanut oqaatigisaq isumaqatiginngilara.
Ole Dorph, Isumaginninnermut Suliffeqarnermullu Naalakkersuisoq, Siumut:
Qujanaq.
Siullermik aamma maannakkut partiit oqaaserisaannut qujassuteqassaanga.
Tassa una siunnersuut saqqummiunneqartoq malugisinnaavara tunngaviatigut tamanik tapersersorneqartoq. Tassami taanna aallaaveqarpoq upernassaq Inatsisartut piginnaanngorsaqqinnissamut ikiorsiisarneq pillugu Inatsisartut peqqussutissaannik maani Inatsisartut ataatsimiittarfiani akuersissuteqartoqarnerata kingunerisaanik.
Taamaattumik taanna suliniut massakkut ingerlavoq massakkullu siullermeerneqarluni, aammalu malunnarpoq tamarmiusuninngaanniik ilalernartuutinneqartoq.
Annertuuliornanga taamaakkaluartorli Inuit Ataqatigiinninngaanniit Asii Chemnitz Narupip apeqquteqaataanut, tassa suliffissaarusimasut peqqussut tunngavigalugu sulisinneqartut kisitsisitigut nalunaarsorsimanissaannut kommunit pisussaaffitsik ukiuni qaangiuttuni ajunngitsumik naammassisarneraat. Tassunga atatillugu oqaatigissavara kommunit ukiut tamaasa soorunami kisitsiserpassuarnik pisortaqarfinninngaanniit assigiinngitsuninngaanniit piumaffigineqartarput, aamma suliassat imaattut eqqarsaatigalugit.
Apeqquteqaammullu massakkut apeqqutigineqartumut tunngatillugu oqaatigissavara kisitsisit taakkartorneqartut Asii Narupiminngaanniit massakkut maani pisortaqarfimmi katersorneqaleruttormata. Taamaattumik kisitsisit taakkua qanoq oqariartornerat torrutiinnarlugu akissuteqarfigisinnaanngilara, kisianni misissuinerit aallaavigalugit aamma uuma suliassap ingerlaqqinnissaanut kisitsisit neriussaanga paasissutaasinnaasut aamma suliassap ingerlaqqinnissaanut atorneqarsinnaasut pissarsiarisinnaalissallugit.
Aamma qujanartumik oqaatigissavara nunatsinni taamannak inuusuttut suliffissaarusimasullu ukiuni makkunani suliffissaarussimanerisa nalaani suliassaqartinneqarnissaannut ujartuineq annertoorujussuarmik pingaartinneqaleraluttuinnarmat illoqarfinni aamma nunaqarfinni.
Pingaruteqarpoq suliffisaarusimanerup nalaani inuit inuusuttuuppata inersimasuuppataluunniit sulileqqissinnaanissaannut suliffimmut ajornanngippat attuumassuteqartittuaannarnissaat qulakkeerniassallugu.
Taamaattumik ukua suliniutit aappassaaneerneqarnissaannut annertuuliornanga qutsatigaara maanngaanniit iniminngaanniit oqaatigineqartut, sapinngisamik peqataaniarsarissaagut uuma suliassap ingerlaqqinnissaani.
Qujanaq.
Otto Steenholdt, attaviitsoq:
Tassa naammagisinnaanngilluinnakkannik pisoqarnera pissutigilluinnarpara. Oqaloqatigiissupput siulleq, tassa immikkoortoq siulleq oqaatigigatsigu, aamma attaviitsuninngaanniit oqaaseqarnera eqqaasitsissutigissavara.
Aammalu massakkorpiaq tulliuttoq aamma naaleraluarparput attaviitsumut sumulluunniit oqaaseqartoqarani.
Maani qinigaasugut tamatta naatsorsuutigisarparput oqaatsigut aamma oqaaseqarfigineqalaarsinnaasartut. Soorlu uanga oqaatigisara inuit nalakataaginnarusunngitsut oqartarmata: Naamik, uunga unnerlussaanga. Uanga taanna peequnngisara oqaaseqarfigineqanngilaq. Taamaattumik massaskkut naalakkersuisoq oqarfigissavara pissutsit maani atortakkagut atorneqassasut. Assigiippugut tamatta oqaaseqarsimasugut, tassa sumilluunniit qaangiinnarneqarnerput nuannarineq ajorparput. Siunissami taanna ilikkartariaqarpaa.
Ole Dorph, Isumaginninnermut Suliffeqarnermullu Naalakkersuisoq, Siumut:
Qujanaq, Otto Steenholdti, puigutsiarsimagakkit imaluunniit atit taasimannginnakku utoqqatsissutigaara. Siunissami eqqaamasassavakkit aamma oqaaserisatit soorunami maluginiarpakka, aamma neriorsuutigissavara uuma suliassap ingerlateqqinnissaani aamma qatangiinnarneqarnatik aamma nalilersuinissami ilanngunneqassasut. Qujanaq.
Asii Chemnitz Narup, Inuit Ataqatigiit:
Qujanaq. Naatsunnguamik. attaviitsumut Otto Steenholdtimut minnerunngitsumik naalaartartut radiokkut malinnaasut eqqarsaatiginerullugit, soorunami kikkulluunniit innuttaasut pisinnaatitaaffeqarput Ombudsmandeqarfimmut maalaaruteqartassallutik. Taanna periarfissaq ammavoq. Uani pineqaramik suliffissaqartitsiniarnerup iluani pissutsit, taavalu soorunami isumaginninnermi suliat pillugit maalaartarfimmut ingerlateqqinneqarsinnaanngillat. Taanna iluarsineqarmat, taava ombudsmandi periarfissaassaaq.
Anders Andreassen, Siulittaasoqarfimmi ilaasortaq, Siumut:
Qujanaq. Taamaalilluni oqaaseqartoqarnianngimmat suliap immikkoortoq 27-p siullermeerneqarnera tamaanga killikkallarpoq, kisiannili aamma kissaatigineqarpoq Ataatsimiititaliami sammineqaqqaassasoq aappassaaneerneqartinnani, aammalu tassani qularutiginngilluinnarpara maani oqaaserineqartut ilanngullugit aamma Ataatsimiititaliap sammiumaarai.
Taavalu ingerlaqqissaagut, massakkullu tikissavarput immikkoortoq 30, tassalu annertussusileriikkanik ikiorsiissutit pillugit Inatsisartut peqqussutissaattut siunnersuut, siullermeerneqarnera, aammalu taanna saqqummiunneqassaaq Isumaginninnermut Suliffeqarnermullu Naalakkersuisumit.
Ole Dorph, Isumaginninnermut Suliffeqarnermullu Naalakkersuisoq, Siumut:
Qujanaq. Matumuuna Naalakkersuisut annertussusileriikkanik ikiorsiissutit pillugit Inatsisartut peqqussutissaattut siunnersuut saqqummiuppaat. Malugeqqussavaralu siunnersuummut naqqiissuteqartoqarmat, siunnersuut 24. september 2001-imeersoq maannakkut saqqummiussininni atorpara.
Siunissami suliffissaarunnerup sillimmasiisarnermik aaqqissuussinissamut tunngavissat pillugit nassuiaat upernaaq manna Inatsisartut ataatsimiinneranni akuersissutigineqarpoq. Aammattaaq suliffissaarunnerup sillimmasiisarnermik aaqqissuussinerup pilersikkiartuaarnissaa marlunnik immikkoortortaqassasoq akuersaarneqarluni.
Siullermik: Ikaarsaariarnermi aaqqiissutissatut annertussusileriikkanik ikiorsiissutit pillugit Inatsisartut peqqussutaat allannguuteqartinneqassaaq. Allannguuteqartitsinermi sulinissamut sulisitsinissamut pisinnaatitaaffiit pisussaatitaaffiillu pillugit aalajangersakkat pilersinneqassapput. Allaffissornikkut aqutsinermi pisariillisaarneqarlutik kiisalu SIK-mut ilaasortaajunnaartitaaneq atorunnaarsinneqassalluni.
Immikkoortut aappaattut: Suliffissaarusimanermut sillimmasiisarnermik aaqqissuussaq pilersinneqassaaq, tamatumunngalu tunngatillugu Naalakkersuisut 2002-mi upernaakkut ataatsimiinnissamut siunnersuummik saqqummiussaqassammata. Taamatut aalajangernermi naapertuuttumik annertussussileriikkanik ikiorsiissutit pillugit Inatsisartut peqqussutaattut siunnersuut saqqummiunneqarpoq. Aalajangersakkat sapinngisamik paasiuminarnerutinniarlugit siunnersuutip peqqussutissap nutaatut saqqummiunneqarnissaa toqqarneqarsimavoq, peqqussummut 1982imeersumut kingusinnerusukkut allanngortinneqartarsimasumut allannguutissatut pinnagu.
Annertussusileriikkanik ikiorsiissutinik pisartagaqarnissamut SIK-mi ilaasortaanissamut piumasaqaatip atorunnaarsinneqarnissaa Naalakkersuisut eqqarsaatigeqqissaarsimavaat, aalajangersakkallu atorunnaarsivinneqarnissaanut taarsiullugu Sulisartut Kattuffiannut ilaasortaanissamik piumasaqaammut allanngortinneqarsinnaanissamut periarfissat misissorneqarsimallutik.
Arlaannik apeqquserneqartarsimavoq Sulisartut Kattuffiinut aalajangersimasumik ilaasortaanissamut piumasaqaat nunat tamalaat isumaqatigiissutaannut ilumut akerliunersoq. Tamannarpiaq aamma apeqqutigineqarsinnaavoq. Annertussusileriikkanik ikiorsiisarnermut qinnuteqartartut Sulisartut Kattuffiinut arlaannaannulluunniit ilaasortaanerminnik uppernarsaasuussappata. Taamattumik aalajangersakkamik atorunnaarsitsinissamik siunnersuut saqqummiunneqassaaq, aalajangiunneqarpoq.
SIK-mut ilaasortaanissamut piumasaqaatip atorunnaarsinnissaanut siunnersuut SIK-mut saqqummiunneqarsimavoq, taakkulu oqaaseqaateqarput taamatut allannguinissaq akerlerinagu, matumani ilaasortatik immikkut ajornerusumik inissinneqassanngippata. Siunnersuut saqqummiunneqartoq naapertorlugu ajornerusumik inissisimalersussaanngillat.
Siunnersuutigineqarpoq piffissap ilaani suliffeqarallarnermi qaammatit 12-t ingerlaneranni sap. akunnerini tallimani annertussusileriikkanik ikiorsiisoqarsinnaaneranik aalajangersagaq atorunnaarsinneqassasoq. Piffissap ilaannaa suliffeqarallarnermi annertussusileriikkanik ikiorsiisoqarsinnaaneranik aalajangersagaq maannakkut atuuttoq tunngavigalugu tunniussisoqartarpoq sulinermik inuutissarsiuuteqartoq sap. akunneranut 40 tiimit sulisarsimanersoq. Sulisitsisorlu isumaqatigiissuteqarsimappata pineqartoq piffissap sivikitsup ingerlanerani piffissap ilaannaa sulisarallassasoq. Tamanna suliffinni pissutsinik, soorlu nioqqutissaaleqinermik imaluunniit peqqiilliornermik pissuteqarsinnaavoq.
Aalajangersakkamik atorunnaarsitsinissaq pillugu SIK oqaloqatigineqarsimavoq, aalajangersagarlu atorunnaarsinneqarsinnaasoq isumaqataasimalluni, isumaqarfigineqarmat ullumikkut pissutsinut naleqqukkunnaarsimasoq. Inuit sap. akunnerata ingerlanerani ullut ataasiakkaat suliffissaaleqilersut ullunut taakkununnga ataasiakkaanut annertussusileriikkanik ikiorsiiffigineqarsinnaapput, taamaattumik allannguinermi eqqorneqarsinnaanatik.
Siunnersuutip annertuussusileriikkanik ikiorsiissutinik qinnuteqartut suliffeqalernissamut piareersimanissamut pisussaaffii il.il. pillugit Naalakkersuisut erseqqinnerusumik malittarisassaliorsinnaatippai. Tamanna tunngavigalugu Naalakkersuisut peqqussutip atuutilernissaa sioqqullugu nalunaarummik saqqummersitsiniarput. Siunnersuummi erseqqissarneqarpoq suut isumaginninnermi naammagittaalliuteqartarfimmut naammagittaalliutigineqarsinnaasut. Soorlu isumaginninnerup iluani inatsisini allani taamaaliortoqartareersoq.
Inuit annertussusileriikkanik ikiorserneqarsinnaasut ilaneqarnerat pissutigalugu peqqussut kommunenut annikitsumik aningaasartuuteqarnerulerannik kinguneqassangatinneqarpoq. Aningaasartuutaalersussat ilai pisortanik ikiorsiisarnermi sipaarutissanik matussuserneqartussaapput. Aningaasartuutaanerulersussat kommunenut ataatsimoortumik tapiissutinut ilanngunneqareerput.
Tamanna tunngavigalugu taakku 2002-mi 5 mio. kr.-nik amerlineqarlutik. Tamatuma saniatigut annertussusileriikkanik ikiorsiissutit pillugit Inatsisartut peqqussutaannut 1982-meersumut maannakkut atuuttumut naleqqiullugu aaqqissuussinermut tunnganerusumik allannguisoqarpoq.
Siunnersuut kommunenit allaffissornikkut annikitsumik kinguneqassangatinneqarpoq peqqussummi arlalitsigut pisariillisaasoqarmat. Ilanngullugit siunissami annertussusileriikkanik ikiorsiissutit pilersugaqarneq pilersugaqannginnerluunniit apeqqutaatinnagu tamanut tunniunneqartalertussaassammata. Naatsorsuisarneq pisariinnerulissaaq, massakkutut sap. akunneri tamaasa naatsorsuisoqartarunnaartussaammat.
Peqqussutip januarip aallaqqaataani 2002-mi atuutilinnginnerani naatsukullammik ilitsersuisoqartussaassaaq, ilaatigut naatsorsuinermik assersuusianik imaqartussamik. Siunnersuut KANUKOKA-mut, suliffeqarnermi illuatungeriinnut Namminersornerullutillu Oqartussat iluani tusarniaassutigineqarsimavoq. Oqaaseqaatit tiguneqartut peqqussutissatut siunnersuutip allannguuteqarnissaanik kinguneqartitsisimanngillat, kisiannili aalajangersakkanut ataasiakkaanut erseqqissaatinik oqaaseqaatit ilassutigitinneqarput.
Naalakkersuisut taamatut oqaaseqarlutik siunnersuut Inatsisartunut suliassanngortippaat.
Ruth Heilmann, Siumut:
Qujanaq. Siumumiit Inatsisartut peqqussutissaattut siunnersuut
Naalakkersuisunit saqqummiunneqartoq qujassutigaarput.
Tamatta nalunngilarput Naalakkersuisunut isumaginninnikkut iluarsaaqqinneq
1995-imi 97-imilu suliarineqarmat ikiorsiissutit isumannaallisaatitut
tunniunneqartartut nalilersuiffigineqarnissaat suliassanut pingaartitanut
ilaatinneqartoq. Tamannalu annertuumik soqutigineqarluni
oqaluuserineqarsimaqaaq kommunenit kattuffinnillu peqataaffigineqarluartumik.
Ataatsimiititaliarsuarmit isumaliutissiissutip saqqummiunneqarnerani suliat
malitseqartinniarlugit iliuutsit maanna malunnaatilimmik
ingerlanneqalernerat Siumumiit pissusissamisoortuutipparput. Tamannali
Inatsisartunit arlaqartutigut kaammattuutigisareeratsigu maanna
pimoorussisumik piviusunngortitsinialerneq iluarinartuutipparput.
Iluarsaaqqinnermi isumannaallisaanikkut ikiorsiissutit ataatsimoortumik
isiginnilluni nalilersuerfigeqquneqarput, aamma allaffissornikkut
eqaallisaanermik pisariillisaanermillu malitseqartinneqartussaq.
Ataatsimiititaliarsuup pingaartilluinnarlugu oqariartuutigivaa
ikiorserneqarnissaminnut kikkulluunniit tamarmik pisariaqartitsisut
pisortatigoortumik isumaginnikkut sullinneqartarnissaat
siunnerfigineqartariaqartoq.
Kattuffimmut peqatigiiffimmulluunniit ilaasortaaneq peqqutigalugu immikkut
iliuuseqarfiginninnissaq ullumikkut pissutsinut naleqqukkunnaarsimavoq,
kisiannili kikkut tamat naligiissumik pisortatigut isumannaallisaanermi
ikiorsiissutitigut periarfissaqartinneqarnissaat siunertaralugu
aaqqissuussisoqartariaqarluni. Tamanna siunertaasoq aallaavigalugu
Naalakkersuisut
suleriarsimanerat Siumumiit nuannaarutigaarput. Aamma SIK
annertussusileriikkamik
ikiorsiisarnermi ukiorpassuarni ingerlatseqataasoq paaseqatigalugu
annertussusileriikkamik ikiorsiisarnermi periutsip
allanngortinneqarnissaanik aammalu aalajangersakkamik
atorunnaarsitsinissamik akuersaartumik nipeqartumik peqataarusussuseqarnera
paaseqatigiinnermik alloriarusunnermillu ersersitsisumik takutitsivoq.
Tamanna Siumumiit pingaaruteqarluinnartutut isumaqarfigaarput. Soorunalimi
inuiaqatigiit ingerlaasiannik ataatsimoortumik isummat nutarterinermi
aallaaviusariaqarmata.
Annertussusileriikkamik ikiorsiissutit pillugit peqqussutip
allanngortinneqarnissaanut suliffissaarunnissamut sillimmasiisarnermik
aaqqissuussinermik ilaqartinneqartariaqarnerannik naapertuussaaniartoqarnera
allaffissornikkullu eqaallisaanermik inatsisissamillu
paasiuminartunngorsaaniarnermik
ilaqartinniarneqarmat Siumumiit pissusissamisoortuutipparput.
Taamatullu suliffeqalernissamut piareersimanissamut pisussaaffiit ullumikkut
pissusiusunut naleqqussarneqarnissaat eqaallisarneqarnissaallu
piumasarissavarput. Suliffissaaleqilersoq suliffissaaleqisorlu sulianik
sunilluunniit tigusaqarsinnaanera neqeroorfigineqarsinnaaneralu suli
annertunerusumik ammanerusunngortinneqarnissaat Siumumiit
sulissutigineqarluinnartariaqarnera pingaarluinnartutut isumaqarfigigatsigu.
Inuiaqatigiinnimi suliassat annertoqaat aamma eqaallisaanikkut
naammassisaqarfiginiarneqartut.
Taamaattumik Siumumiit isumaqarpugut kommunit suleqatigilluinnarlugit
suliassaq ingerlanneqartariaqartoq. Oqartoqaraluarpoq annikitsumik
allaffissornikkut kinguneqartinneqartussaasoq aammalu
aningaasartuuteqarnerunissamik 5 mio.-nik 2002-mi
immikkoortitsiffigineqareersoq.
Tamanna soorunami Siumumiit upperaarput, kisiannili suli nalilersuilluarnissaq
Siumumiit piumasarissavarput, aammalu piumasarissallugu peqqussutissap
suliarineqarnerani Ataatsimiititaliap sukumiisumik suleqatigineqarnissaa.
Taamatut oqaaseqarluta Siumumiit peqqussutissatut siunnersuutip
aappassaaneerneqarnissaminut ingerlaqqinnissaa akuerseqataaffigiumaarparput.
Anders Andreassen, Siulittaasoqarfimmi ilaasortaq, Siumut:
Qujanaq. Oqaaseqartussaq tulleq tikitsinnagu Naalakkersuisut siulittaasuat
maanga tikilluaqqussavara sulilluarnissaanillu kissaallugu.
Jakob Sivertsen, Atassut:
Qujanaq. Annertussusileriikkanik ikiorsiissutit pillugit Inatsisartut
peqqussutissaattut siunnersuut siullermeerneqarnerani Atassummit imatut
oqaaseqarniarpugut: Annertussusileriikkanik ikiorsiissuteqartarneq kiisalu
pisortanit ikiorsiissutit nunatsinni innuttaasut akornanni assigiinngitsumik
ikiorsiisarnermik kinguneqartartut aaqqinniarlugit Atassummit arlaleriarluta
oqaluttarfik manna atorlugu uparuaasarsimavugut, pisortat innuttasut
assigiimmik ikiorserneqarlutik atugassaqartitaanissaat pisussaaffigimmassuk.
Assigiinngitsunik periuseqarluni inunnik ikiorsiisarneq innuttaasut
migissusaannik annertuumik attuisartoq nalunnginnatsigu. Taamaattumik
Atassummit tulluusimaarutigaarput innuttaasut assigiimmik
ikiorserneqartarnissaat
anguniarlugu sulisartunut kikkunnulluunniit SIK-mut ilaasortaaneq
ilaasortaannginnerluunniit
apeqqutaatinnagit peqqussutissakkut suliffissaaruttunut tamanut assigiimmik
ikiorsiisalernissaq Naalakkersuisunit siunnerfigineqarmat.
Suliffissaarunnermi annertussusileriikkanik ikiorsiissuteqartarnissami
peqqussutissaq Sulisartut Kattuffiannut aalajangersimasunut
ilaasortaanissamik tunngaveqarunnaarluni sulisartunut tamanut atuuttussamik
aaqqiiniarneq inunnut ataasiakkaanut minnerunngitsumillu ilaqutariinnut
pilersugaqartunut assut pingaaruteqarpoq, inuit namminneq pisussutiginagu
suliffissaaruttartut nammineersinnaaqqilernissaannik ikorfartuutaassammat. Tamanna
Atassummit qujarupparput.
Siunissami
annertussusileriikkanik ikiorsiisarneq kisimi sulisartut suliffissaarunneranni
ikiorsiissutissatut isumalluutigineqarsinnaanngilaq, pingaartumik sulisartut
pilersugaqartut tamatumani eqqarsaatigalugit. Taamaattumik suliffissaarunnermi
sillimmasiisalernissamik Inatsisartut upernaaq ataatsimiinneranni
Naalakkersuisut 2002-mi upernaakkut peqqussutissamik 2003-mi
atuutilersussamik saqqummiussaqarnissaannik kissaatigisap
kinguarsarneqannginnissaa
Atassummit piumasaraarput. Ullumikkut nunatsinni suliffissaaleqineq taama
nalinginnaatigitillugu suliffisaarunnissami sillimmasiisalernissaq
tuaviuuttariaqartoq Atassummit isumaqarfigigatsigu, soorunami
isumannaagassat qulaajagassallu puigornagit.
Annertussusileriikkanik
ikiorsiissuteqartarnerup nutarterneqarnissaanik siunnersuut siornatigut
SIK-mit akerlerineqarsimasup maannakkut paasilluarneqarluni
isumaqataaffigineqalersimanera Atassummit iluarisimaarparput, sulisartut
tamarmik suliffissaarunnerminni assigiimmik pisortanit
ikiorserneqartarnissaat Atassummit pingaartikkatsigu. Annertussusileriikkanik
ikiorsiisalernissaq sulisartunut tamanut atuuttussanngorlugu
allanngortinneqarpat kommunenut aningaasartuuteqarnerulernermik
kinguneqartussaanera sillimaffiginiarlugu Naalakkersuisut nunatta karsiata
2002-mut aningaasanut inatsisissaanni 5 mio. kr.-nik kommuneni
ataatsimoortumik tapiissutinut qaffaaniarnerat Atassummit iluarisimaarparput,
peqqussutip atuutilerneranit suliffissaaruttunut iluaqutaassappat
aningaasartuutitassaasa sillimmaffigineqarnissaat pisariaqarmat.
Annertussusileriikkanik
ikiorsiisalernissamik peqqussutissap nutaap januarip aallaqqaataaniit
2002-mi atuutilernissaanut tunngatillugu kommunenit paasiuminartuunissaa
eqqortumillu peqqussutissap atuutinneqarnissaa anguniarlugu Naalakkersuisut
nalunaarummik saqqummiussiniarnerat Atassummit taperserparput,
ikiorsiissutit eqqortumik atuisussanut atuutinneqarnissaat pingaaruteqarmat.
Taamatut
oqaaseqarluta peqqussutissamut siunnersuut Atassummit taperserparput
Ataatsimiititaliamillu
misissoqqissaarneqarnissaa innersuussutigalugu. Qujanaq.
Lars
Sørensen, Inuit Ataqatigiit:
Upernaaq
manna Inatsisartut ataatsimiinnerani siunissami suliffissaarunnissamut
sillimmasiisarnermik aaqqissuussinissamut tunngavissat pillugit nassuiaat
Naalakkersuisuniit saqqummiunneqarpoq. Tamanna tunngavigalugu
ikaarsaariarnermi aaqqissuussassatut annertussusileriikkanik ikiorsiisarneq
aammalu ikiorsiissutit pillugit Inatsisartut peqqussutaat 1. november
1982-imeersoq atorunnarsinneqarnissaanut allanngortinneqarnissaanullu Inuit
Ataqatigiit tunngaviatigut isumaqataalluta nalunaaruteqarnikuuvugut.
Isumaginninnermik
iluarsaaqqinnermi Ataatsimiititaliarsuup upernaakkut 1997-imi kaammattuutigaa
pisortanit isumannaallisaatinik ataasiinnarmik periuseqarluni siunissami
tunniusseriaaseq atorneqalissasoq, allaffissornikkut aqutsinermi malittarisassanillu
pisariillisaasoqarnissaa ilanngullugu aamma taamanikkut kaammattuutigalugu.
Isumaginninnermi
iluarsaaqqinnermi ataatsimiititaliarsuup upernaakkut 1997-imi kaammattuutigaa
pisortanit isumannaallisaatinik ataasiinnarmik periuseqarluni siunissami
tunniusseriaaseq atorneqalissasoq. Allaffissornikkut aqutsinermi
malittarisassanillu pisariillisaasoqarnissaa ilanngullugu taamanikkut
kaammattuutigalugu.
Taamanikkut
Inuit Ataqatigiinniit piumasaqaatigaarput aaqqissuussinissami nutaami
pinngitsoorani
sulisartut kattuffii peqatigiiffiillu aaqqissuussinissamut attuumassutillit
isumasioqatigiinnerisa kingorna atuutilersitsinissaq siunnerfigineqassasoq.
Inuit Ataqatigiit isumaqaratta kattuffiit pisortallu akornanni
isumaqatigiinniarneq atorlugu angusarisimasat innarlerneqannginnissaat
tamatumani pingaaruteqartoq.
Inuit
Ataqatigiit annertussusileriikkanik ikiorsiissutinik pisartagaqarnissamut
SIK-mi ilaasortaanissamik piumasaqaatit inatsisartunit innuttaasunillu
apeqquserneqartarnera tunngavigalugu paaserusupparput ilumut tamanna nunat
tamalaat isumaqatigiissutaanut akerliunersoq uppernarsarneqarsimanersoq.
Ilisimaneqartutut
siorna Inatsisartut aningaasanut inatsisaat aqqutigalugu aningaasanik
immikkoortitsisoqarpoq
tamannarpiaq pillugu kattuffiit ilaanniit apeqqusiineq tunngavigineqarluni.
Inuit
Ataqatigiit iluarisimaarparput siunnersuut SIK-mut saqqummiunneqarsimammat.
Taakkulu oqaaseqarnermikkut taamatut allannguinissaq akerlerinagu
oqaaseqarsimammata. Taamaattoq isumaginninnermut ataatsimiititaliamut
kaammattuutigerusupparput peqqussutissap matumap suliareqqinneqarnissaanut
ataatillugu tusarniaasimanermut oqaaseqaatit ilanngullugit nalilersoqqullugit.
Inatsisartut peqqussutissatut siunnersuummi maluginiarparput malittarisassat
inunnik atuisussanit paasiuminartuunissaat aammalu atuisussanut
pisariitsuunissaat pingaartinneqarsimasoq.
Tamanna
isumaginninnermi iluarsaaqqinnermi ataatsimiititaliarsuup kaammattuutaanut
naapertuuppoq. Pingaartumik isumaginninnikkut malittarisassat ullumikkut
atukkagut piffissap ingerlanerani arlaleriaqalutik pissutsinut atukkatsinnut
naleqqussartuarnerisa aammalu ilaartortuarnerisa kingunerisaanik
malittarisassanik pisariillisaasoqarnissaanut pitsanngorsaasoqarnissaanullu
timitalersuinerit aallartinneqarneri aamma Inuit Ataqatigiinniit
iluarisimaarpagut.
Upernaakkut
ataatsimiinnissamut peqqussutissat immikkoortup aappaatut
suliffissaaleqinermut
sillimmasiisarneq tamatumalu aaqqissuussap nutaap pillugu Naalakkersuisut
saqqummiussaqarnissaat Inuit Ataqatigiit pissangalluta utaqqissavarput.
Taamatut
oqaaseqarluta annertussusileriikkanik ikiorsiissutit pillugit Inatsisartut
peqqusutissaatut siunnersuut Inatsisartut aappassaaneerlugu
suliareqqinnginneqarnerani Inatsisartut isumaginninnermut ataatsimiititaliaani
suliareqqinneqarnissaanik inassuteqarpugut.
Loritha Henriksen, Kattusseqatigiit:
Annertussusileriikkamik ikiorsiissutit pillugit Inatsisartut peqqussutaattut siunnersuut. Annertussusileriikkamik ikiorsiissutit pillugit Inatsisartut peqqussutissaattut siunnersuut Kattusseqatigiinniit ima oqaaseqarfissavarput. Peqqussutissatut siunnersuut annerusumik oqaaseqarfiginagu oqaatigissavarput siunnersuummi innuttaasut atuisullu tamarmik assigiimmik pineqalernissaat anguneqartussanngormat, taannalu iluarisimaaratsigu.
Siornatigummi annertussusileriikkanik ikiorsiissutit aatsaat tunniunneqartaraluarmata SIK-mut ilaasortaasimagaanni. Akuersaarnitsinnullu aamma tunngavigaarput aalajangersakkat atorunnaarsinneqarnissaat pillugit SIK oqaloqatigineqareersimammat. Aalajangersakkallu atorunnaarsinneqarnissaannik isumaqatigiissummullu isumaqatigiissimalluni.
Minnerunngitsumillu ullumikkut pissutsit aamma naleqqukkunnaarsimanerat naliliiffigeqataasimallugu. Taamatut oqaaseqarluta peqqussutitut siunnersuut misissorluareerlugu Kattusseqatigiinniit akuersissutigaarput ingerlaqqinnissaalu innersuussutigalugu.
Otto Steenholdt, attaviitsoq:
Peqqussutissatut siunnersuummut matumunnga pingaartumik siunissaq eqqarsaatigalugu aaqqissuussinissamut tunngavissat upernassaq akuersaareersimavagut. Kiisalu sillimmasiisarnermik nassuiaat aamma akuersaareersimallugu. Siunnersuut manna takkuteqqaarmalli ilisimagisimagaluarpara SIK sakkortuumik tukernersussasoq. Tassa pitsaaqutit kattuffimmut tassunga ilaasortaanissamik aallaavillit soorunami kattuffiit ilaasortami amerlisarnissaanut sakkugilluartussaallugit sakkugilluarsimagaluarmagit.
Tamannali uparuartorneqartuarsimavoq. Nunanili allani soorlu Danmarkimi oqallisaajuarsimavoq sulisartoq kinaluunniit qilersorsimanani kattuffimmut sumulluunniit ilaasortaasariaqartoq. Ajornerusumillu pineqassanngitsoq. Uangalu naak, sulisartoqarneq kattuffeqarnerlu illersortuugaluarlugit allanngortitsinermut akerliunianngilanga SIK-p allannguinissaq isumaqatigisimammagu.
Inuit annertussusileriikkanik ikiorserneqartalersussat amerlinerat soorunami aningaasanik naleqartussaq sillimaffigalugu milliuuninik tallimanik, tassa koruuninik aningaasalerneqarsimasoq isumaqarpunga tulluartuusoq.
Inatsisartut peqqussutaat
1982-imeersoq aaqqissuiffigineqarsimavoq kiisalu pisariillisaasoqarsimalluni,
kiisalu pilersugaqarneq imaluunniit pilersugaqannginneq taakku
apeqqutaatinnagit
annertussusileriikkanik ikiorsiineqartartussanngorluni. Manna pisarneq
malillugu tusarniaassutigineqarsimavoq akissutillu allannguutissaasimanatik. Taamaattumik
peqqussutissatut siunnersuut akuersaarpara.
Ole Dorph, Isumaginninnermut Suliffeqarnermullu Naalakkersuisoq, Siumut:
Qujanaq. Siullermik oqaatigisassinnut qujanaq. Erseqqissaatigissavaralu
soorlu aamma ilissi maani inimi nalunngikkissi uumap suliassap tunngavissaa
upernassaq maani inatsisartuni eqqartorneqarsimavoq. Tunngavissallu
ersarissimammata siunnersuut massakkut annertuumik katersuuffigineqartoq
saqqummiunneqarsimalluni.
Taamaattumik Siumuminngaaniit Atassumminnganiit Lars Sørensen, IA
-minngaaniit, taavalu Loritha Henriksen, Kattusseqatigiinniit, kiisalu Otto
Steenholdt attaviitsuminngaanniit saqqummiunneqartut assut uanga
ilassilluarpakka.
Apeqqut ataaseq saqqummiunneqartoq akissuteqarfigissavara. Tassa Inuit
Ataqatigiinningaaniit apeqqutigineqartoq. Tassa annertussusileriikkanik
ikiorsiissutissanik siunissami maani pisartagaqassagaanni pinngitsoornani
SIK-mut ilaasortaasariaqarnersoq. Soorlu tamatta nalunngikkipput upernassaq
imaluunniit siorna PIP perorsaanermik ilinniagaqarsimasut peqatigiiffiat
Paamiut kommuniat eqqartuussivimmut tunniussimavaa. Taanna ajornartorsiut
eqqartuussinikkut naliliiffigineqarnissaa kissaatigalugu.
Oqaatigisariaqarparalu eqqartuussivimmi taanna suliassaq upernassaq
februarip qulingiluaani suliarineqarsimavoq. Kisianni ulloq manna tikillugu
suli eqqartuussivik aalajangiisimanngilaq. Suliassaq taanna qanoq
eqqartuussinikkut aalajangerneqassanersoq. Naatsorsuutigineqarporlu aatsaat
immaqa ukiamut juullip eqqaani, sioqqutilaarlugu kingoqqutilaarluguluunniit,
taanna suliassaq eqqartuussinikkut aalajangiiffigineqassasoq.
Aamma Naalakkersuisuninngaaniit oqaatigissavarput soorlu aamma oqaaseqartut
oqaatigereeraat una suliassaq, suliassap malitsigisussaassavaa
suliffissaaleqinermi sillimmasiinissamut peqqussutissaq. Taanna massakkut
suliaralugu allartinneqarpoq oqaatigineqareersutullu naatsorsuutigineqarluni
aappaagumut inatsisartunut saqqummiunneqarnissaa.
Taamaattumik oqaaserineqartunut qujallunga uumap suliassap taamatut
suliarineqarneranut oqaaseqarpunga. Aammalu oqaatigineqareersutut suliassaq una
ataatsimiititaliami ingerlanneqassooq. Aappassaaneerneqannginnermini tassanilu
naatsorsuutigilluinnarpara aamma suliassaq tassani ataatsimiititaliami
peqqissaarullugu suliarineqarumaartoq. Qujanaq.
Augusta Salling, Siulittaasoqarfimmi sinniisussatut ilaasortaq, Atassut:
Isumaginninnermut Suliffeqarnermullu Naalakkersuisumut qujavugut. Allanillu
oqaaseqartoqarnianngimmat taamaalilluta immikkoortoq 30 taamaalilluta
naammassivarput. Aappassaaneeneqannginnerminilu isumaginninnermut
ataatsimiititaliamut ingerlaqqaarallassaaq.