Ullut ataatsimiiffiusut 21-at, ataasinngorneq 5. november 2001, nal. 13:20

Oqaluuserisassani immikkoortoq 26

Inissiani attartortittakkani ineqarnermut tapiissutit pillugit Inatsisartut peqqussutaata allannguuteqarneranik Inatsisartut peqqussutissaattut siunnersuut.

(Ineqarnermut, Attaveqarnermut Pilersuinermullu Naalakkersuisoq)

(Pingajussaaneernera)

   

Ataatsimiinnermik aqutsisoq: Ole Lynge, Inatsisartut Siulittaasuat, Inuit Ataqatigiit.

   

Ole Lynge, Inatsisartut Siulittaasuat, Inuit Ataqatigiit.

Tassani aamma Inatsisartut Isumaginninnermut, Suliffeqarnermullu Ataatsimiititaliaa isumaliuutississuteqarpoq. Amerlanerussuteqartut taamatut siunnersuut iluseqarnilu pingajussaarnerneqarnerani akuerineqassasoq. Ikinnerussuteqartut kinguartitsinissaq kissaatigisimallugu. Taamaattumik taasinialissaagut. Taasitinnata Jakob Sivertsen, Atassut, oqaaseqarusuppoq.

 

Oqaatigilaartariaqarpara oqalussinnaatitaaffiit suleriaatsillu maanna eqqartunnginnatsigit, matuma kingorna Siulittaasoqarfimmut naammagittaalliutissaqarussi anngukkisigit. Tulliullutik oqaaseqartussat qinnuigissavakka naatsukullammik oqaluuserisassamut uunga tunngasumik oqaaseqaqqullugit.

 

Jakob Sivertsen, Atassut

Qujanaq. Paasinarpoq ineqarnermut akiliummik qaffaaniarneq ilaqutariippassuarni allaat aamma inissiani najugaqartut peqatigiiffianni sillimaffigineqanngitsoq tusarniaatigineqarsimananilu. Tamanna Atassummiit akuerisinnaanngilarput. Soorlu uupernaaq inissianik attartorneq pillugu Inatsisartut peqqussutissaattut siunnersuummi Inatsisartuni akuerineqartumi aamma uagut akuerisatsinni §12, immikkoortoq 2-mi imatut allassimasoq issuassavara.

Najugaqatigiiffiup siulersuisui aalajangiisinnaapput najugaqatigiiffimmik naammaginartumik pitsanngorsaanermik nutarterinermillu suliassat suliarineqassasut. Tamanna peqatigitillugu najugaqatigiiffiup siulersuisuisa pisariaqartinneqartumik ineqarnermut akiliutit qaffanneqarnissaat akuerisinnaappagu najugaqatigiiffiup siulersuisuisa aalajangiinerat najugaqatigiiffiup ataatsimiinnerani akuersissutigineqassaaq".Issuaaneq naavoq.

 

Taavalu immikkoortoq 3 imatut allassimavoq aamma issuassavara: "Ineqarnermut akiliutit qaffanneqarnissaannik piumasaqaat attartortunut ataasiakkaanut immikkoortoq 1-imi taaneqartutut ilimasaarutigineqarluni allakkatigut ilimasaarutigineqassaaq. Imarissallugillu qaffaanerup naatsorsorneqarnerani, qaffaanermut pissutaasumik aamma, qaffaanerup annertussusianik qaammammut koruuninngorlugit taallugit paasissutissat", issuaaneq naavoq.

 

Taavalu naalisaagama erseqqissassavara aamma kommuunit inissiaataanni Namminersornerullutik Oqartussallu inissiaataanni ineqarnermut akiliutip naatsorsorneqartarnissaa pillugu nalunaarutip nr. 32-p, 17. august 2001-imeersumi, §3 imatut allassimasoq issuarpara:

 

"§5 naapertorlugu inissiap ingerlanneqarneranut atatillugu pisariaqartunik aningaasartuutit, kiisalu §6 naapertorlugu aningaasaliissutaasimasunik iluanaarutit sinnerlugit ineqarnermut akiliutit angissuseqassanngilaq, akiliut angissuseqassanngilaq", issuaaneq naavoq.