Oqaluuserisassani immikkoortoq 32-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut arfineq-pingajuat, tallimanngorneq oktobarip 5-aat 2001,
Ataatsimiinnermik
aqutsisoq: Ole Lynge, Inatsisartut Siulittaasuat, Inuit Ataqatigiit.
Jørgen
Wæver-Johansen, Ineqarnermut, Attaveqarnermut Pilersuinermullu Naalakkersuisoq,
Siumut:
Naalakkersuisut
sinnerlugit matumuuna saqqummiuppara Inatsisartut peqqussutissaattut siunnersuut
piginneqatigiilluni inissiat pillugit Inatsisartut peqqussutaata
allanngortinneqaatigisassaa.
Inatsisartunut
ilaasortaq Mikael Petersen Inatsisartut 2001-imi upernaakkut ataatsimiinneranni
piginneqatigiilluni inissialianut massakkumut anginerpaaffiliunneqartartoq
qaangerlugu periarfissiisoqarnissaanik siunnersuuteqarpoq. Tamatuminngalu
Inatsisartut oqallisiginninnerata kingunerisaanik peqqussutissatut siunnersuut
manna matumuuna saqqummiunneqarpoq. Aammattaaq peqqussutissatut siunnersuut
manna piginneqatigiilluni inissiat pillugit Inatsisartut peqqussutaannik
annertunerusumik nutarterinissamut alloriaataavoq siulleq.
Naalakkersuisut
aammattaaq pilersaarutigaat siunnersuutip aappassaaneerneqarnissaanut
oqaasertatigut annikinnerusumik allannguutaasussanik siunnersuuteqarnissartik.
Peqqussutissatut
siunnersuummut maanna saqqummiunneqartumut oqaaseqaatit aammattaaq
innersuussutigalugit Inatsisartut peqqutissaattut siunnersuut
piginneqatigiilluni inissiat pillugit Inatsisartut peqqussutaata
allanngortinneqaatigisassaa matumuuna Inatsisartunut oqallisigilluaqqussavara.
Siunnersuutaavoq siunnersuutip aappassaaneerneqannginnermini Ineqarnermut
ataatsimiititaliamit oqaluuserineqarnissaa.
Ole
Lynge, Inatisartut Siulittaasuat, Inuit Ataqatigiit:
Taava
partit oqaaseqartuinut ingerlaqqippugut.
Per
Rosing Petersen, Siumup oqaaseqartua:
Siumumiit
iluarisimaarparput Naalakkersuisuni Inatsisartuni ilaasortap Mikael Petersen
Siumut upernaaq siunnersuutaanut naapertuuttumik peqqussutissatut
siunnersuummik saqqummiussimmata.
Siumumiit
peqqussutissatut siunnersuut 1. januar 2002 atuutilertussap isumaqatigalugu
imatut oqaaseqarfigissavarput.
Siunnersuutip
qangali piginneqatigiilluni inissialiortarnermut orniginartinneqartartut
ujartorneqartartullu toqqammavigilluinnarlugit ilusilersorneqarsimavoq,
tassalu piginneqatigiilluni inissialiortarnerup annerpaaffissaa maannakkut
suli 105 m2-iusoq qaangerlugu namminerli qaangiinneq aningaasartuutigalugu
periarfissamik maannakkut ammaassisoqarniarmat. Tamannalu periarfissanik
annertusaanermik ammaassimmat Siumumiit qujassutigaarput, aammattaarlu
maluginiarlugu akit qummut killeerutinnginnissaat siunertaralugu
Naalakkersuisuni annertunerpaaffissanik m2-mut 15.000 kr.-init
killiffigissagaat aningaasaleeqataaniarnermi.
Tamannalu
aamma isorinartutut isiginngilarput, tassami akit killeerullutik qummut
aallannginnissaat sissuerneqartariaqarluinnarmat. Periarfissaq iluatsillugu
aamma Naalakkersuisunut kaammattuutigissavarput maannamut nammineq
illutaarniartunut aningaasalersueriaatsimi inatsimmi kap. 3 § 4 10/40/50-imik
aningaasalersueriaatsimi aalajangersimanerusumik pisortat aningaasaliissutaasa
oqaasertamigut ersarinnerusumik pisussaaffilerneqartariaqarmata, tassanimi
oqaaseq atorneqartoq immikkoortoq aappaanni
taarsigassarsisoqartitsisoqarsinnaavoq ersarinnerusumik iluarsisariaqarmat
imatut oqaasertalimmik:
"Taarsigassarsitsisoqassaaq"
taamatut allassimasoqalerneratigut Namminersornerullutik Oqartussat aammalu
kommunit pisussaaffii ersarissarneqartassammata.
Taamatut
oqaaseqarluta peqqussutissaq tamakkiisumik taperserlugu
innersuussutigissavarput Attaveqarnermut, Pilersuinermut Ineqarnermullu
ataatsimiititaliamut ingerlaqqinnissaa.
Godmand
Rasmussen, Atassutip oqaaseqartua:
Piginneqatigiilluni
inissiat pillugit Inatsisartut peqqussutaata allanngortinneqarneranut
Inatsisartut
peqqussutaannut siunnersuummut imaattumik Atassummi isummersimavugut.
Nunatsinni
ajornartorsiut annerpaartariligaasa ilagaat inissaaleqinerujussuaq.
Naalakkersuinikkut anigoruminaannerpaat aaqqiivigiuminaannerpaat
ajornakusoornerpaallu ilaat. Atassummiilli uparuagassaqqiginarpoq
piginneqatigiilluni inissianik sanaartornermi immikkut katerisimaartarfinnik
ilaatitsisarneq. Naluneqanngitsutuut inissaaleqinerup aqqani
pissusissamisoorsorinanngilaq piginneqatigiit immikkut
qaaqusisarfeqartitaanerat, imaluunniit ataatsimoortarfeqartitaanerat,
inissiarsuarniluunniit taamak katerisimaarfeqarnerit suli
ajornartorsiutaatillugit.
Immikkut
piginneqatigiilluni illutaartarneq immini ippinnaateqanngilaq.
Naluneqanngitsutuulli 66%-iannik inuiaqatigiit akileereersut inigisap
angeqataanik katerisimaartarfeqartitsisarneq inissaaleqinermi
naleqqussorinarani.
Naalakkersuinikkulli
isummeqqittoqarsinnaalluni. Inatsisissami uani 05 m2-imut qummut killiussaq
Atassumiit isumaqataaffigaarput. Piginneqatigiilluni illulianut anginerusumik
tapiisalissagutta siunissami kikkut tamarmik, aamma anginerusunik
piginneqatigiinnikkut illutaarusuttalissagaluarmata ajornartorsiutillu
anigorniarneqarnerata sukkanerusumik inissaaleqinerup anigorniarneranut
pinissaa Atassummiit qularnartutuut isumaqarfigaarput. Aammalu KANUKOKA-mi
tusarniaasimaneq pitsaasutuut nalilerparput.
Atasummiit
taamatut oqaaseqarluta Inatsisartut allannguutissaattut akuersaarusupparput,
pineqartullu aappassaaneerneqannginnerani Ineqarnermut ataatsimiititalimut
ingerlanissaa innersuussutigalutigu.
Johan
Lund-Olsen, Inuit Ataqatigiit oqaaseqartuat:
Tassa
naatsuarannguuvoq. Siunnersuutigineqartoq manna Inatsisartut upernaakkut
ataatsimiinnitsinni isumaqatigiissutigereersimasatsinnut naapertuummat Inuit
Ataqatigiit annertunerusumik oqaaseqarnata maanna nalunaarutigiinnassavarput
saqqummiussaq tamakkiisumik taperserniaratsigu.
Ove-Karl Evaldsen, Kattusseqatigiit oqaaseqartuat:
Piginneqatigiilluni inissiat pillugit Inatsisartut peqqussutaata allanngortinneqarnissaatut Inatsisartut peqqussutaat 2000-imersup siunnersuummut Kattusseqatigiinniit imatut oqaaseqassaagut.
Allannguutissatut siunnersuut annertunerusumik oqaaseqarfiginagu Kattusseqatigiinniit isumaqatigalugu akuersaarnissarput oqaatigissavarput. Tassalu piginneqatigiilluni illuliornermi killigititassat ersarissarneqarneri matumuuna saqqummiunneqarmata.
Oqaatigisariaqarparpummi piginneqatigiilluni illuliornermi aningaasatigut piumasaqaataasut aammalu atuuttut qaangerneqarpata piginneqatigiilluni illuliornermi aningaasatigut atorniarsinnaanissaat inatsisaatigut periarfissereermata.
Taamatut oqaaseqarluta peqqussutissamut siunnersuut Kattusseqatigiinniit akuersissutigissavarput.
Otto Steenholdt, attaviitsoq:
Inatsisartut peqqussutaata allannguuteqaatigisassaanut oqaasissara naatsoralaannguuvoq ? aap.
Jørgen Wæver-Johansen, Ineqarnermut, Attaveqarnermut Pilersuinermullu Naalakkersuisoq, Siumut:
Qujarusuppunga tamarmik tapersiinerinut, taamaalillunilu suliassaq tassa Ineqarnermut ataatsimiititaliamut aappassaaneerneqartinnagu ingerlanneqartussaassammat qularinngilara aamma tassani pitsaasumik suliarineqarumaartoq.
Maluginiarpara Siumut tungaaninngaanniit periarfissaq iluatsillugu peqqussut alla, tassa 10/40/50-imut tunngassuteqartoq, tassunga tunngatillugu siunnersuuteqartoqartoq. Neriorsuutigissavaralu kaammattuut taanna ilassilluarlugu misissorneqarumaarmat taamatut aaqqiinissaq ilumut pisariaqartinneqarnersoq.
Maluginiarpara aamma Atassutip oqaaseqartua, oqaaseqarnermini ilaatigut siunnersuutigipajaaraa katerisimaartarfinnik ilanngullugit aningaasalersueqataasarnerput taanna killeqartariaqartoq, inissaaleqinerup aqqani. Taanna soorunami aamma Inatsisartuniit taamatut naliliiffigineqarsinnaavoq aamma misissorneqartussanut ilangunneqarsinnaavoq. Aamma qularutiginngilara taanna Ineqarnermut ataatsimiititaliami ilanngullugu eqqartorneqarumaartoq.
Oqaaseqartut ilaasa oqaaseq
killiliinissamik taanna atorpaat, kisianni uani pineqartoq tassaavoq
ersarissaaneq. Pisortat
tapersersueqataassapput imaluunniit aningaasalersueqataassapput 105 m2
tikillugu. Taassuma qaavatigut anginerusumik sanaartorusuttut nammineq
aningaasartuutigisassavaat. Imaappoq aamma periarfissaq nutaaq
killilersuinngitsoq kisiannili ammaassisoq pilersinneqartussaavoq. Taannalu
inuppassuit nalunngilara iluaqutigilluarumaaraat siunissami.
Otto Steenholdt, attaviitsoq:
Atassutip oqaaseqartuata oqaasii oqaaseqarfigilaarusuppakka. Tassa uani pineqarmata peqatigiillutik inissialiorsimasunut, tassa taakkua peqatigiinnermikkut aningaasanillu katersinermikkut inatsillu tamatumunnga atugassaq atorlugu taamatut periarsinnaanerat inissaaleqinermut iluaqutaaqisoq, aamma taakkua qanoq iliorsinnaanerat killilersorneqaqqunagu maanngaanniit uanga oqaatigissavara. Nammineq pilersaarusiorlugu ingerlataat aamma akuersaarneqartariaqarpoq, soorlu aamma Mikael Petersen-ip taamanikkut oqaatigigaa angisuumik perusukkaangata akuersaarlugit ilalaarniarsigit, taanna akuersaarsimavarput namminneq akilerusukkunikku ajunngilaq. Aamma soorlu katerisimaarfeqartarnissaat pissusissamisoorluinnarpoq aamma nammaineq soorunami taanna akiligassarissagaat naatsorsuutigaara.
Uanga maani Inatsisartuni ilaasortaallunga allaffiminersuaqarpunga, kisimiinniarlunga tattuutigaara inissaarulluinnarlunga, massalu partit arlalissuit eqqissisimaartarfeqartut atorneq ajukkaminnik. Namminneq akilersimaneraat naluara, tamakku eqqaassagaanni aamma oqartariaqarpoq pisariaqartitsisimagunik ajunngilaq, taamaattut akuersaartariaqarput aamma nammineerlutik illuliorniartut illuliortullu piumasaat akuersaarneqarnerusariaqassapput, namminersornerulersillugit taamaliunngikkaanni piumassusiat minneruleriartussammat inissaqarniarnermullu immaqa ajoqutaalerluni.
Ataatsimiinnermik aqutsisoq: Inatsisartut Siulittaasuat Ole Lynge, Inuit Ataqatigiit:
Tassa taamaalilluni aamma immikkoortumut tassunga oqaaseqarumasut killeqarput. Tassalu tamanit oqaatigineqartutut aappassaaneerneqartinnagu immikkoortoq 32 Ineqarnermut ataatsimiititaliap suliareqqaassavaa.