Oqaluuserisassani immikkoortoq 36-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut aqqaneq sisamaat, pingasunngorneq oktoberip 17-iat 2001,
nal.
17:20
Ataatsimiinnermik
aqutsisoq: Anders
Andreassen, Inatsisartut Silittaasuata Tullia, Siumut.
Alfred
Jakobsen, Peqqinnissamut
Avatangiisinullu Naalakkersuisoq, Inuit Ataqatigiit.
Siullermik
oqaatigilaassavara uani saqqummiussiissummi oqaaseqatigiit agguaanneqartunut
sanilliullugu assigiinngitsutigut iluarsiivigisariaqarsimagakku imarisaatigut
allannguuteqanngikkaluartumik.
Naalakkersuisut
siunnersuutigaat nunarput pillugu immikkut piumasaqaatitaqanngitsumik Kyotomi
isumaqatigiissummi tapiliussamik Danmarkip atsiorluni
atortuulersitsisinnaanissaa Inatsisartut ilalissagaat. Danmarkip nunattalu
akornanni sinaakkusiussatut isumaqatigiissutaat Naalakkersuisut Inatsisartunut
saqqummiussaannut pingaaruteqarluinnartutut isigaarput.
Kyotomi
isumaqatigiissummut tapiliussaq silap pissusii pillugit nunat tamalaat
isumaqatigiissutaannut tapiliussatut 1997-imi atsiorneqarpoq. Danmarkip
december 1993-imi silap pissusii pillugit isumaqatigiissut
Namminersornerullutik Oqartussat tusarniaavigereerlugit atortussanngortippaa,
nunarpullu ingerlaannartumik isumaqatigiissummi pisussaaffinnut
ilaatinneqalerluni. Maannalu Danmark aalajangerpoq Kyotomi isumaqatigiissummut
tapiliussaq atortuulersinniarlugu tassungalu tunngatillugu kissaatigalugu
Kalaallit Nunaat oqaaseqaateqassasoq.
Isumaqatigiissummut
tapiliussap siunertaraa inuit pilersitaannik silaannaap allanngorartarnerata
killilersimaartinneqarnissaa, gassit nunarsuup silaannaanik kissatsitsisartut
aniatinneqartartut annikillisarnerisigut. Tassunga atatillugu gassinik
nunarsuup silaannaanik kissatsitsisartunit CO2 annertunerpaamik
pilersitsisuuvoq.
Silap
pissusiinut immikkut ilisimasallit amerlanerit isumaqatigiissutigaat gassinik
nunarsuup silaannaanik kissatsitsisartunik nakkutigineqanngitsumik
aniatitsiuarnerup nalinginnaasumik silap pissusiisa allanngorartarnerat
ajorseriartinngikkuniuk sakkortusassagaa.
Danskit
atortuulersitsineranni nunarput ilanngunneqarpat gassit nunarsuup silaannaanik
kissatsitsisartut aniatinneqarnerat 8%-mik annikillisittariaqassaaq,
piffissami siullermi pisussaatitaaffimmi ukiuni 2008-miit 2012-imut, tassa
1990-mi killiffiusumut naleqqiullugu.
Nunatsinni
pingaartumik nukissiornermi, aalisarnermi, assartuinermi aammalu
inuussutissarsiornikkut suliffeqarfinni ikummatissat imerpalasut atornerisigut
CO2-mik aniatitsisoqartarpoq. Piffissami 1990-imiit 2000-imut CO2-mik
aniatitsineq pillugu naatsorsuinermi ukiumut aallaaviusumut 1990-imut
naleqqiullugu aniatitsineq -21%-ip aamma +6%-ip akornanni allanngorartartoq
takuneqarsinnaavoq. Piffissami 1990-imiit 1999-imut aniatitsineq ukiuni
pineqartuni tamani 1990-imit annikinnerusimavoq, agguaqatigiissillugu
annikilleriaat 10%-ingajaalluni. Aniatitsineq annikillinerpaavoq 1994-imi
Utoqqarmiut Kangerluarsunnguani erngup nukinganit innaallagissiorfiup
atorneqalernerata kingorna.
Ukioq
2000-miit gasoliamik atuinerup annertusisimanera ilutigalugu aniatitsineq
annertunerulersimavoq, taamaalilluni mingutsitsineq 1990-imut naleqqiullugu
siullerpaamik annertuseriarsimalluni, tassa 6%-it missaanniilluni. Taamatut
pisoqarnera siunissami ingerlaannassanersoq imaluunniit annikilleqqissanersoq
qularnaatsumik oqaatigiuminaappoq maannakkuugallartumik.
Taama
annertuumik allanngorartoqarnerata isumaqatigiissummut tapiliussami
pisussaaffinnik nunatta naammassinnissinnaanera nalorninalersissinnaavaa,
taamaammallu Naalakkersuisut killissarititaasumik imaluunniit
sinaakkusiussamik isumaqatigiissutissaq pillugu Danmarkimut
isumaqatigiinniarput. Tassani danskit gassimik nunarsuup silaannaanik
kissatsitsisartunik naatsorsuusiornerannut nunarput ilaassaaq.
Isumaqatigiissut malillugu 2008-miit 2012-ip tungaanut 8%-imik
annikillisitsinissamik anguniagaasut angunissaannut nunarput suleqataassaaq.
Anguniakkat qanoq angunissaannut iliuusissat piaarnerpaamik suliarineqassapput.
Isumaqatigiissummi
aamma inuussutissarsiutinik aatsitassarsiornermillu ineriartortitsinissamut
periarfissat ilaatinneqarput. Piffissap pisussaatitaaffiup siulliup 2008-miit
2012-imut ingerlasup ingerlanerani 8%-imik annikillisitsinissamik
pisussaaffiup naammassineqarnissaanik ajornartitsilersunik suliffeqarfinnik
annertuumik aniatitsisunik nunatsinni nunattalu eqqaani pilersitsisoqassappat
tamanna immikkut isumaqatigiinniarnermik malitseqartinneqassaaq.
Danskit
avatangiisinut nukissiuuteqarnermullu ministeriaqarfiat Namminersornerullutik
Oqartussat qanimut suleqatigalugit nunatta gassinik nunarsuup silaannaanik
kissarnerulersitsisartunik aniatitsineq pillugu paasissutissanik
missingiinernillu pisariaqartunik ingerlaavartumik
tunniussisarsinnaanissaannut peqataassapput.
Pingaaruteqarpoq
eqqaamassallugu Kyotomi isumaqatigiissummut tapiliussap siunertaa
aningaasaqarniarnermut inuussutissarsiutinillu ineriartortitsinermut
tunnganani silap pissusiisa allanngoriartornerinut avatangiisinullu tunngammat,
naak nunatta gassinik silaannarmik kissatsitsisartunik aniatitsinera
nunarsuarmi aniatitsinermut tamarmiusumut sanilliullugu suunngitsutut
isigineqarsinnaagaluartoq, pingaaruteqarpoq eqqaamassallugu nunarsuarmi
ineriartornermi aamma uagut akisussaaffeqaratta, taamatullu aamma
ineriartorneq pineqartoq nunatsinnik eqquisussaammat.
Qanorpiaq
eqqorneqassanersugut eqqoriaruminaappoq, kisiannili silap pissusiisa
allanngorarnerat issittumi uumasut ilaasa piujuarsinnaanerannut
sunniuteqarsinnaavoq, soorlu aamma tamanna aalisagaqassutsimut
rajaqassutsimullu inuiaqatigiinnut pingaaruteqaqisunut sunniuteqarsinnaasoq.
Taakku assersuutaannaapput.
Uagut
nammineq aniatitsineq assigiinngitsorpassuartigut annikillisissinnaavarput,
ikummatissanik imerpalasunik atuinitta annikillineratigut, soorlu illut
pitsaanerusumik ussersarneqartalerneqarnerisigut ikummatissanik sipaarniarluni
suliniuteqarnikkut, ikummatissamik sipaartoqartariaqarneranik inuit
isummertinniarnerisigut, atorluaanerunikkut aamma erngup nukinganit
innaallagissiorsinnaanermut periarfissat iluaqutiginiarnerisigut.
Suliniutaasinnaasut
taakku ilaatigut pilersaarusiorneqareerput, malinneqarunillu aniatitsinermik
annikillisitsissallutik, taamalu ineriartortitsinissamut
inissaqartitsilerlutik.
Nunarsuatsinni
tamarmi nukissiornermut atortut pitsaanerulersinniarlugit ilisimatusarneq
annertuvoq, ungasinnerusoq eqqarsaatigalugu aamma nunatsinnut
iluaqutaalersussamik. Ikummatissaqarniarneq eqqarsaatigalugu mianersortumik
Naalakkersuinikkut ingerlatsinikkut aqutsinermilu sakkussat pigineqartut
atorlugit CO2-mik aniatitsineq ilorraap tungaanut saatinneqarsinnaavoq
timitalimmik suliniuteqarnikkut. Arlalippassuartigulli aallartilluareerpugut.
Isumaqatigiissummut
tapiliussaq allakkiartalik Aningaasaqarnermut Pisortaqarfimmut,
Naatsorsueqqissaartarfimmut, Ineqarnermut, Attaveqarnermut Pilersuinermullu
Pisortaqarfimmut, Aatsitassanut ikummatissanullu Pisortaqarfimmut, Nunanut
allanut tunngasunut Allaffimmut, Inatsisileriffimmut, Inuussutissarsiornermut
Pisortaqarfimmut, KANUKOKA-mut, Sulisitsisut Peqatigiiffiannut
suliffeqarfinnullu angisuunut arlalinnut tusarniaatigineqarpoq. Tamatumunnga
atatillugu Aatsitassanut ikummatissanullu Pisortaqarfiup aamma
Inuussutissarsiornermut Pisortaqarfiup maluginiaqquaat suliffissuit nutaat
aamma oliamik aatsitassanillu qalluinerit nunatsinni aniatitsinermut ajortumik
sunniuteqarsinnaammata. Tamatuma kingorna Danmarkimik isumaqatigiinniarnerit
aallartinneqarput sinaakkusiussatut isumaqatigiissummik inerneqartumik.
Sinaakkutissatut
isumaqatigiissut Ineqarnermut, Attaveqarnermut Pilersuinermullu
Pisortaqarfimmut, Aatsitassanut ikummatissanullu Pisortaqarfimmut
Aningaasaqarnermullu Pisortaqarfimmut tusarniaatigineqarpoq.
Nukissiuuteqarnermut Aqutsisoqarfik isumasio-reerlugu tusarniaanermut
akissutit isumaqatigiissummut ilanngunneqarput.
Siunnersuut
tassungalu ilanngussat innersuussutigalugit siunnersuutigissavara siunnersuut
suliassap aappassaaneerneqannginnerani sukumiinerusumik misissugassanngorlugu
Inatsisartut Eqqissisimatitsinermut Avatangiisinullu Ataatsimiititaliaanut
suliassanngortinneqassasoq.
Peter Grønvold Samuelsen, Siumup oqaaseqartua.
Nunarsuarta silaannartaata mianernartuunera inuiassuillu suliffissuaqarnikkut ineriartortitsiuarnerannik aallaaveqartumik innarlerneqariartornera ilisimasaqarnikkut ukiut kingulliit paasisaqarfigineqaleraluttuinnarpoq.
Maani nunatsinni avatangiisit innarlitsaalineqarnissaannik pingaartitsiffiusumi, pingaartumillu pinngortitaq qanitaralugu inuussutissatsinnik pissarsiffiusartumi pinngortitap mingutsinnaveersaarneqarnissaa tamatsinnit pingaartinneqaannarnani aamma isumaginiarneqartariaqarpoq. Taamaattumik aamma Siumup tungaaniit Kalaallit Nunaata nunat tamalaat akornanni avatangiisit illersorneqarnissaat siunertaralugu suliniarnermi peqataanissaa kissaatigalugulu akuersaarsimavarput.
Taamaaliortariaqarpugut pinngortitamik mingutsitsineq nunarsuarmi sumiikkaluarpalluunniit naggataatigut tamanna aamma nunarsuup issittortaanut taamatullu Kalaallit Nunaannut annguttussaammat sunniuteqarnerlussinnaallunilu.
Nunarsuatta mingutsitsiffiunnginnissaata sapinngisamik killilersimaarneqarnissaa silaannaallu illersorneqarnissaa maani nuanarsuatsinni innuttaasugut tamatta pisussaaffigisariaqarparput, taamaaliunngikkutta assersuutigalugu nunarsuup silaannartaata innarlerneqarneratigut nunarsuup klimaata allanngorsinnaanera annilaangassutigisariaqarmat, tamannalu kingulissagut eqqarsaatigalugit pinaveersimatittariaqarlutigu. Maannakkummi inuusugut nunarsuaq piginngilarput, inuit uumassusillillu allat uagut peerutereernitsinni aamma maaniittussaammata.
1992-imi Riomi avatangiisit pillugit nunat tamalaat amerlaqisut ataatsimeersuaqatigiinneranni Kalaallit Nunaat alaatsinaattunik peqataatitaqareersimavoq. Taamanikkullu avatangiisit illersorniarlugit iliuusissarpassuit ilaata, tassa klima pillugu Isumaqatigiissusiarsuup 1993-imi Danmarkimit atortussanngortinneqalernerani Namminersornerullutik Oqartussat tusarniaavigineqareersimaput akuersaarsimallutillu.
Suliniutit, tassa klima pillugu suliniutissanut tapiliussat Kyotomi isumaqatigiissutitut oqaatigineqartartut 1997-imi atsiorneqarsimapput 2002-milu atortussanngortinneqartussaallutik. Kalaallit Nunaat maanna Danmarkimit aperineqarpoq isumaqatigiissummut Danmarkip pisussaaffiisa iluanni peqataarusunnersoq.
Siumut isumaqarpoq Kalaallit Nunaata Kyotomi isumaqatigiissummi piumasaqaataasut Danmark peqatigalugu akuersaassagai. Taamalu piffissami 2008-miit 2012-ip tungaanut 1990-imut naleqqiullugu gassinik nunarsuup silaannaanik kissatsitsisartunik aniatitat 8%-imik annikillisinniassallugit.
Taamatuttaaq Siumup Naalakkersuisunut ilaasortaq isumaqatigaa, taanna oqarmat oqaluuserisaq manna kiisalu Kyotomi isumaqatigiissummut tapiliussap atuuttussanngortinneqarneranik killiliussatut nunatsinni Danmarkimilu Naalakkersuisut isumaqatigiissusiarisimasaat ilanngullugu Inatsisartut Eqqissisimatitsinermut Avatangiisinullu Ataatsimiititaliami misissuataarneqassasut suliassap Inatsiartuni aappassaaneerlugu oqaluuserineqarnissaa sioqqullugu, tamatumani ilanngullugit nunatsinnut aningaasartuutaasinnaasut eqqarsaatigalugit kingunerisinnaasai qanoq iliorluta maani nunatsinni CO2-mik aniatitsinitta annikillisarneqarluniluunniit killilersimaarneqarsinnaanera kiisalu siunissaq eqqarsaatigalugu inuussutissarsiutinik ineriartortitsinermut aporfeqartitsinnginnissaanik qulakkeerinninneq pisimanersoq pillugit misissuataaqqullugit.
Taakku oqaatigeriarlugit Siumup makku pingaartillugit oqaatigerusuppai: Siullermik, nunarsuaq tamakkerlugu qiviarutsigu naalagaaffissuit suliffissuaqarfiusut inupaasuallillu pinngortitamik mingutsitsinerat takullugu gassinillu nunarsuup silaannartaanik kissatsitsisartunik aniatitsinerisa annertussusiat takullugu, taava Kalaallit Nunaanni inuit ima ikitsigaluta, assersuutigalugu CO2-mik silaannarmut aniatitsinerput annikitsuaraannaavoq. Taamaakkaluarpalluunniilli peqataasariaqarpugut nunarsuatta silaannartaatalu innarlitsaalineqarnerani. Pissutigalugu nunarsuarmi imavissuit sarfai aqqutigalugit anori nunarsuattalu silaannartaata nillertinnera kissatsinneraluunniit aqqutigalugit mingutsitsineq killeqarfeqanngimmat nunarsuarmioqatigiissugullu tamatta eqqorneqaatigisinnaallutigu.
Naalakkersuisut saqqummiussinerminni oqarnerattuut Nuup Kangerluarsunnguani erngup nukinga iluaqutigalugu innaallagissiorfissuup 90-ikkut aallartinneranni atulerneratigut Kalaallit Nunaanni CO2-mik aniatitsineq annikilleriarujussuarsimavoq, tamatumalu malitsigisaanik taamanikkut olia avataanit pisiarisartagarput appariangaatsiarsimalluni. Tamanna tulluusimaarutigisariaqarparput, tassami 1992-imi Riomi avatangiisit pillugit ataatsimeersuarnerli sioqqullugu maani nunatsinni nukissiuuteqarnitta oliatortumik erngup nukinganut ikaarsaariartortinnissaa ingerlariarfigereersimagatsigu. Erngup nukinga iluaqutigalugu nukissiuuteqarneq oliatortumut sanilliullugu mingutsitsinnginneruvoq. Taamaattumik aamma Tasiilami innaallagissiorfissap erngup nukinganik aallaaveqartinnissaanik siunniussineq Siumup tapersersorluinnarpaa, kiisalu aamma ukiuni aggersuni Kujataani Sisimiullu eqqaani erngup nukinganik iluaquteqarluni nukissiorfiliornissanik periarfissat Siumup tungaaniit tapersersorluinnarlutigit. Taakku aqqutigalugit nunarsuup silaannartartaata innarlernaveersaarneqarnerani Kalaallit Nunaat pisussaaffini naammassiinnassanngilai, aammattaarli oliamik avataanit pisariaqartitsinerput piffissaq ungasinnerusoq eqqarsaatigalugu annikinnerulersittussaavarput, taamalu aningaasarsiornikkut periarfissagut pitsaanerulersillugit.
2002-mi Inatsisartut aningaasanut inatsisissaattut Naalakkersuisut siunnersuutaanni aamma Nuka A/S-imut sumiiffissalerlugit ukiuni tulleriinni ukiumut 5 mio. kr.-t immikkoortinniarneqarput, qerititsiviit freonimik annertuumik atuiffiusut iluarsaanneqarnissaannut.
Siusinnerusukkut Inatsisartut nukissiuuteqarneq pillugu oqallittarsimanerannut atatillugu nalunaarusiaasarsimasuni partiit anguniagaanni Inatsisartunilu ilaasortat ataasiakkaat siunnersuutigisarsimasaanni erngup nukingata saniatigut, soorlu seqernup nukinganik, anorip nukinganik allanillu iluaquteqarluni nukissiuuteqarsinnaanermut periarfissat saqqummiunneqartareerput. Tamakkua nunanik allanilluunniit peqateqarluni misilittaavigalugillu ineriartortinneqarsinnaanerat pillugit periarfissat Naalakkersuisunut misissoqqissaaqqussavagut aamma misilittaanernut ineriartortitsinissamilu aningaasaliisuusinnaasut nassaariniarnerat eqqarsaatigalugu.
Siumumi isumaqarpugut avatangiisit innarlitsaalineqarneranni pisortat kisiisa isumalluutigisariaqanngikkivut, uagulli innuttaaqataasugut tamatta pisussaaffeqartugut. Tamanna nukissiuutinik atuinitsinniissinnaavoq, assersuutigalugu qaammaqqutinik atuinitta isumatuumik annertussuseqartinnissaa eqqarsaatigalugu, motoorit eqqarsaatigalugit, biiliuppata umiatsiaappataluunniit ingerlatinnginnerisa nalaani tamatigut unitsinneqartarnissaat eqqarsaatigalugu. Tamakku suunngitsuusaaraluartoq kingulissatsinnut maligassiuinerput silarsuup inuuffigisatta mianerisariaqassusianik paasinninnissamut innarlitsaaliuinissamullu aqqutaasinnaapput.
Naggataatigut Inatsisartut Eqqissisimatitsinermut Avatangiisinullu Ataatsimiititaliamut Naalakkersuisunullu eqqumaffigeqqussavarput Kyotomi isumaqatigiissummut tapiliussap naalagaaffissuarnit peqataaqqaarsimagaluartunit ilumut tamakkiisumik peqataaffigineqarniarnersoq malittareqqullugu, tusartakkavummi najoqqutaralugit naalagaaffissuit suliffissuaqarfiusut aningaasarsiornikkut soqutigisaminnik salliutitsinialersinnaanerat ernummatigineqarmat. Imaanngitsoq naalagaaffissuit ataasiakkaat peqataanissaminnit tunuartiterpata Kalaallit Nunaata pilersaarutini unitsissagai. Naagga, Siumut taama isumaqanngilaq. Siumut isumaqarpoq Kyotomi isumaqatigiissummut tapiliussaq aqqutigalugu anguniakkat ataatsimoorfigineqanngikkaluarpataluunniit Kalaallit Nunaat suliniumminik aallartisariikkaminik aalajangiussisimaannassasoq. Tamannatoq aamma nunani tamalaani pinngortitamik illersuiniaqatigiiffiit atuakkiortullu tusagassiorfissuit atuakkallu aqqutigalugit kalaallit piniariaasiannik kalaallinillu piniakkanik nungusaaneraallutik assuarinnittartut tusarniarilissuk.
Anders Andreassen, Inatsisartut Siulittaasuata Tullia, Siumut.
Qujanaq. Oqaaseqartussaq tulleq tikitsinnagu oqaatigilaassavara, tassa arfinernut taamaatittarnissarput maani isumaqatigiissutigereeratsigu taavalu una immikkoortoq naammassillugu suliareriarlugu inassutigissavara punktit tullinnguuttut marluk kinguartissagigut ullormut allamut una suliaq naammassilaariarlugu.
Daniel Skifte, Atassutip oqaaseqartua.
Qujanaq. Naalakkersuisut Kyotomi isumaqatigiissut taamatut isikkoqarluni akuerineqarnissaanut siunnersuutaat pillugu Atassut imatut oqaaseqaateqarniarpoq: Ukiut untritilippassuit, ilami ukiut tuusintilikkaat Kalaallit Nunaata silaannaata pissussaa nunatsinni inuuniarnermut aalajangiisuusarsimavoq. Aammalu piorsarsimassutsikkut ineriartornitsinnut inuuniarnitsinnilu avatangiisitsinnut nalimmassartarnitsinnut sunniuteqaqataajuartarsimalluni.
Taamaattumik kinguaariit ingerlanerini silaannaap nammineerluni allanngorartarnera ilisimalluarlugu inuusaasitsigut tulluartumik naleqqussartarsimavugut. Kisiannili inuit namminneq silaannaap allanngorarneranut pisuusaraangata tamanna pissusissamisoortutut isigineq ajorparput. Taamattumik taamatut pisoqarnera tunngaviatigut akerlerisarparput, pingaartumik silaannaat aniatinneqartut silarsuup silaannaanik kissatsitsisartut annertusigaluttuinnartut eqqarsaatigalugit. Taamaattumik Atassut isumaqarpoq silaannaat silaannatsinnik kissatsitsisartut peqqissaartumik piareersaateqarnikkut siunnerfilimmillu suliniarnikkut ukiut 2008-miit 2012-ip tungaanut 8%-imik millisinneqarsinnaanissaannut anguniagaqarneq anguneqarsinnaasoq.
Atassummiilli assersuutit ataani taaneqartut siunissami eqqarsaatigillaquagut:
Siullermik, illut inissiallu oqorsarneqartarneri pitsaanerusunngortissinnaavagut, tassami ungasinngitsunnguakkut sanaartornermi maleruaqqusat 1982-imeersut ullumikkumut naleqqussarneqarnissaat Inatsisartuni sammisimavagut.
Aappassaanik., nukissianik ileqqaarnissamut suliniuteqarsinnaavugut aammalu nukissianik atuinikinnerusinnaanerit pillugit paasisitsiniuteqarsinnaalluta, soorlu nerisassiornermi nalinginnaasumik kallerup inneranik atuinermi, kallerup inneranik kiassaateqarnermi assigisaanilu atuinermi ileqqaarutaasinnaasunik paasititsiniaanerit aqqutigalugit.
Pingajussaanik, imermik nukissiorfinnik pilersitsisinnaavugut, pilersaarutit pigineqareerput.
Sisamaattut, seqernup qinngorneri aammalu anori nukissianik pissarsiffigisinnaavagut aamma piffinni mikinerusuni.
Tallimaattut, immap ulittarnermini tinittarnerminilu nukit pilersittagai taakkulu assigisaat atorluarneqarsinnaapput.
Kiisalu arfinilissaattut: Aammalu immakkut silaannakkullu angallannermi mingutsitsinerit annikillisarniarlugit suliniuteqarsinnaavugut, kiisalu inuutissarsiutigalugu sukisaarsaatigalugulu angallatit qamuteralaat, tassa snescooterinik taaneqartartut assigisaallu mingutsitsisarnerat millisarniarsinnaallugu.
Taaneqartut saniatigut Atassummiit susassaqartut attuumassuteqartullu tusarniaanermi saaffigineqartarsimammata naammagisimaarparput. Taamatut oqaaseqarluta Naalakkersuisut siunnersuutaannut akuersaarpugut, suliassallu Inatsisartut Eqqissisimatitsinermut Avatangiisinullu Ataatsimiititaliaanni Inatsisartuni aappassaaneerneqartinnani suliarineqarnissaanut innersuussuteqarluta.
Maliinannguaq Markussen-Mølgaard, Inuit Ataqatigiit oqaaseqartuat.
Qujanaq. Nunarsuatta mingutsaaliornissaa Inuit Ataqatigiinniit pingaaruteqarluinnartutut isigaarput, tassami ukiuni kingullerni malunnarsiartuinnalersimavoq nunarsuatsinni nunat mingutsitsinerisigut avatangiisit pinngortitallu sunnertikkaluttuinnarneri. Allaammi mingutsitsineq ersarinnerpaamik malugisimavarput uumasut inuunitsinnut kulturitsinnullu pingaaruteqarluinnartut eqqorneqartalernerisigut. Soorlu Tunumi nannut suiaassutsimikkut arnaallutillu angutaasut, misissuinerillumi takutissimavaat imartatta mingutsinneratigut piniagassat nerisarilluakkatta akuutissanik arrortinneqarsinnaanngitsunik akoqalersimaneri, ilaatigut inunnut ulorianarsinnaasunik. Taakkuli uani Kyotomi isumaqatigiissummi pineqanngillat, pineqartorli tassalluni silaannaap mingutsinneqarnera aamma siunissami piniagassanut allatigut sunniuteqarsinnaasoq.
Nunarsuarmimi maanna mingutsitsinerit aarlerissutigineqartut ilagilluinnarpaat gassinik nunarsuup silaannaanik kissatsitsisartunik aniatitsinerup kinguneranik mingutsitsinerujussuaq. Ukiunimi kingullerni silaannaap kissakkiartornerata nunarsuullu nammineerluni oqimaaqatigiissumik pissusaata allanngoraluttuinnarnerata kinguneranik sermersuup nunallu qeriuaannartup aakkiartulersimanera uppernarsineqarsimammat. Tamanna aarlerinarluinnartutut isigisassaavoq, tassami tamatumap kingunerisinnaammagu nunarpassuit qarsutsinermik suli annerusumik nalaanneqartalerneri, illua-tungaanilu panernersuit takkussinnaasut kaannersuarnik nassataqartut. Nunatsinnullumi tamakku aalisarnermut annertuumik kingunipilutsitsisinnaapput immap kissarpallaalernerata kinguneranik imartatsinni uumasut navianartorsiulissammata.
Taamatut navianartorsiortitsisut ilaatigut tassaapput olia benzinalu. Taakku ullutsinni inuunitsinni pinngitsoorsinnaanngilagut, ingammik nunatsinni. Taamaattumillu Inuit Ataqatigiinniit ukiuni tulliuttuni taakku atornerisa milliartuaartinnissaasa sulissutiginissaat pingaartutut isigaarput. Tamanna pisinnaavoq teknologi aqqutigalugu nutarterinermi misissuilluni periarfissanik atorluaanikkut. Aammattaaq sanaartornermi illut oqorsaataasa pitsanngorsarnerisigut ilaatigut issittumut naleqqussarluakkanik sanaartornikkut, kiisalu uagut inuit ataasiakkaarluta kallerup inneranik kiassaasersornikkullu sipaarnerulernitsigut tamanna pinaveersimatinniarsinnaavarput. Nalunngilarpulli aamma tamanna aningaasanik naleqartoq, taamaattumik isumaqatigiissummut eqqartukkatsinnut atasumik ineriartortitsinissami periarfissat nalilersuilluarluni atorluarnissaat kaammattuutigerusuppagut. Isumaqatigiissummimi taamatut akiuiniarnermi ilisimasat Naalagaaffiit Peqatigiit ataanni ataatsimut katersuiveqarnissaat siunertaavoq, tassanilu innaallagissiornermi allatigullu atuinerup millisarnissaanut ilisimasat katersorniarneqarput, ilaatigut isumaqatigiissummut ilaasunut atorluarneqarsinnaassallutik.
Tassanissaaq suulluunniit ingerlatat gassinik aniatitsisut annikillisarnissaanik siunertallit akileraartarnikkut pilerinarnerusunngorlugit aaqqissuussiffiginissaanik isumaqatigiissut imaqarmat ilalerusupparput. Tassami mingutsitsinaveersaarnerup piviusunngortinnissaanut pilerinarsarnissaa pisariaqavissoq Inuit Ataqatigiinniit isumaqarpugut, taamaalilluni piumassuseq annertunerulersinnaammat.
Mingutsaaliuinermut tunngatillugu artikel 2, imm. 8-mi aqqutaasinnaasut ilaattut taaneqarpoq eqqakkat metaninik akullit atueqqiinikkut annikillisarsinnaaneri. Inuit Ataqatigiinniillu manna iluatsillugu eqqaaveqarnikkut ullumikkut pissuserisatta nunattalu mingutsinnginnissaanik suliniuteqarnerup pimoorullugu ingerlanneqarnissaa pingaartikkatsigu, matumuuna kaammattuutigerusupparput eqqakkat pillugit nalunaarusiortoqarnissaa Inatsisartuni saqqummiussassamik. Isumaqarattami piffissanngortoq eqqakkat tungaasigut nunarput tamaat ataatsimut isigalugu nalilersueqqinnissaq. Tassami ullumikkutut ingerlaannarsinnaajunnaarpugut, nunani allani atorneqartoq angerlarsimaffinniit aallaaveqartumik eqqakkat immikkoortiterneqartarneri siunissami eqqarsartaatsitsinnut ilaasariaqalerpoq. Tassami nunatta minguitsuunissaa pimoorukkutsigu tamanna avaqqunneqarsinnaanngitsoq Inuit Ataqatigiinniit isumaqarpugut.
Ukiuni kingullerni nunatsinni gassinik aniatitsinerit misissorneqarsimaneranni Inuit Ataqatigiinniit nuannaarutigaarput 1990-imiit maannamut taamatut aniatitsineq annikilleriarsimammat. Ilaatigut Utoqqarmiup Kangerluarsunnguani erngup nukissiorfeqalernitsigut. Taamaattumik siunissami atuinerup millisarnissaanut peqataassagutta erngup nukissiorfii pilersiortorneqartariaqarput. Tamannali naleqaqaaq pilersaarusiorluarnikkullu nunattalu aningaasaqarnerata inissisimaneranut naleqquttumik ingerlanneqartariaqarluni.
Kyotomi isumaqatigiissutip taassumap akuersaarneratigut immitsinnut pisussaaffilertussaavugut. Taamaattumik Inuit Ataqatigiinniit isumaqarpugut taassumap tungaatigut ersarissumik politikkeqarluta ineriartortitsisariaqarluta. Periarfissat suuppat suullu nunatsinnut tulluarnerpaarpat.
Ataatsimiinnermi matumani siusinnerusukkut taasimasarput seqerngup qaamarngata atorluarneqarsinnaaneranut Center for Arktisk Teknologi aqqutigalugu paasisat nunatsinni atorluarneqarnissaat siunertaralugu ineriartortitsinissaq Inuit Ataqatigiinniit kaammattuutigerusuppagut.
Isumaqatigiissummi artikel 11-ani ilaatigut nunat ineriartortitassanik taaneqartut ikiorserneqarsinnaaneri taakkartorneqarput. Tassungalu atatillugu Avatangiisinut Naalakkersuisoq apererusupparput uagut tamatumap tungaasigut atorluaasinnaanissatsinnut qanoq inissisisimanersugut. Tassungalu atatillugu nunat qanigisatta issittumiittut suleqatiginissaat pisariaqarluinnartoq isumaqarfigaarput. Naak nunat issittumiittut ilaata oqartussaasuisa USA-p isumaqatigiissut atsiorumanngikkaluaraa isumaqarpugut naggueqatitta suleqatiginerisigut nunami pineqartumi Naalakkersuisut sunnerniarneqartariaqartut. Sumummi iluaqutaassammat nunat ilaannaasa akueripassuk nunallu mingutsitsinerpaat ilaasa akueriumanagu.
Inuit Ataqatigiinniit pingaaruteqarluinnartutut isigaarput isumaqatigiissutip pimoorullugu piviusunngortinneqarnissaa. Taamaattumillu ajuusaarnaqisutut isigaarput nunarsuarmi tamatumap tungaatigut nuna mingutsitsinerpaaq tassalu USA akuersaarusunngimmat. Maanna sorsunnermik aamma mingutsitseqisumik ingerlatsivoq USA-llu pisussaaffigisariaqarpaa nunarsuarmi pissaanilissuartut nunanut allanut maligassiuvissalluni.
Nunarpassuimmi isumaqatigiissut akuersaarsimavaat USA-lli akuersaarusunnginnermigut takutippaat qanoq imminuinnaq eqqarsaatigeqqajaatigaluni. Tamanna akuersaarneqarsinnaanngilaq USA-mullu sunniiniarneq suli sakkortunerusariaqarpoq. Aningaasarpassuit amerlangaaramik taassallugilluunniit nalunartut sakkussiornernut missilinullu illersuusiornernut atorniarlugit aalajangeeqqammerpoq. Illuatungaaniillu nunarsuup mitsaaliornissaanut akisussaaqataajumanani.
Tamanna akueriuminaaqaaq paasiuminaallunilu. Mannalu iluatsillugu Naalakkersuisunut apeqqutigissavarput Kyotomi isumaqatigiissutip piviusunngortinneqarnissaanut suliniutit sumut killinnersut qaqugulu atuutilernissaat naatsorsuutigisariaqarneripput.
Nunarsuaq kingornutarput ukiorpassuarnilu piusussatut isigisarput paarilluartariaqarparput. Tassami nunami maaniluunniit peerukkaluarutta kinguaassagut ingerlatseqqittussaapput. Taamaattumik nunarsuarmioqataasugut tamatta pisussaaffeqarpugut minguitsuutsiniarnissatsinnut.
Taamatut oqaaseqarluta Inuit Ataqatigiinniit nuannaarutigaarput nunat 39-t peqatigalugit akuersaassagatta neriuutigalugu nunat suli amerlanerit akuersaarumaarnissaat. Innersuussutigissavarpullu pineqartoq avatangiisinut eqqissisimatitsinermullu ataatsimiititaliamut ingerlateqqinneqassasoq.
Mogens
Kleist, Kattusseqatigiit
oqaaseqartuat.
Qujanaq. Kyotomi isumaqatigiissummik danskit atortuulersitsineranik
Namminersornerullutik Oqartussat oqaaseqaateqarnissaat pillugu
aalajangiiffigisassatut siunersuut Naalakkersuisut saqqummiussaat
Kattusseqatigiinniit imatut oqaaseqaateqarfigissavarput.
Naalakkersuisut saqqummiussai soqutiginartutut Kattusseqatigiinniit
oqaatigissavagut. Aammalu Kyotomi isumaqatigiissutip nunatsinnut
atuutsilerneqarnissaa pissanngatigalugu maani oqallinnissamut ilaassaagut.
Kyotomi isumaqatigiissutip danskit naalagaaffiata akuersaarsimavaa
taamaattorlu nunatsinnut aammalu savalimmiunut suli atuutsinneqarani.
Isumaqatigiissutip nunatsinnut atuutsilerneqarnissaa pitinnagu assigiinngitsut
misissugassat qulaajarneqarnissaat Kattusseqatigiinniit sukumiisumik
qissimeqquniarpagut.
Tassami nunat allat piumasaqaataat assigalugit Naalakkersuisut
saqqummiinerminni nunatta anguniagassaat taakkartormagit.
Paasisinnaakutsoorparput nunarsuarmioqatigiit drivgassinut CO2-mut
ajornartorsiutaat annertoqisut. Taamaattorli nunatta immikkorluinnaq
inissisimanera qissimittariaqartutut Kattusseqatigiinniit oqaatigerusukkatsigu.
Nunatsinnimi nunanut allanut sanilliulluta suliffissuaqanngilagut.
Suliffissuilli ataasiakkaat pigivagut aammalu ullumikkut aperisariaqarpugut
nunatta suut sukumiisumik taasariallit eqqumaffigisariaqarai siunissaq
ungasinnerusoq isigalugu. Aammalu Kyotomi isumaqatigiissutip
atuutsilerneqarnissaanut tunngatillugu. Naalakkersuisoq taakkartuivoq imeq
atorlugu nukissiuutinut tunngasunik tassanilu oqaatigalugu Tasiilami,
Qaqortumi Narsamilu pilersaarutit.
Taamaattorli Kattusseqatigiinniit oqaatigerusupparput pilersaarutit
taamaattut qaqugorpiaq piviusunngortinneqassasut aammattaaq eqqaarusupparput
Ilulissani aammalu Sisimiut eqqaanni imeq atorlugu nukissiuuteqalernissamut
pilersaarutit sumut killissimanersut. Aammalu siunissaq ungasinnerusoq
isigalugu qaqugorpiaq piviusunngortinneqassanersut.
Ullumikkummi nalunngilarput nunatta karsia aningaasatigut pigisai
killeqaqisut. Ilanngullugu pingaarutilittut oqaatigerusupparput Sisimiuniittoq
Artic Centeri qanimut suleqatiginissaa kaammattuutigerusukkatsigu. Taamatut
Artic Centerip suleqatigineratigut EU-mit tapiissutaasinnaasut avatangiisinut
aningaasat atorneqartartut aqqutigalugit misissuisinnaanerat annertunerusumik
ammaanneqarsinnaanissaa eqqumaffigeqqugatsigit.
Kalaallit Nunaata aammalu Qallunaat nunaata isumaqatigiissuteqarnissaat
tamakkiisumik Kattusseqatigiinniit taperserlugu oqaatigissavarput.
Ilanngullugu eqqumaffigisassatut oqaatigerusuppagut nunatsinnut annertuumik
artukkiinissaa eqqarsaatigeqqullugu.
Qujanaq.
Otto Steenholdt, attaviitsoq:
Aallaqqaamut ersarissumik paatsuugassaangitsumillu nalunaarutigissavara siunnersuummut tapersiilluinnarama.
Silarsuarmi uagut inuit pilersitatsinnik silaannaap mingutsitaagaluttuinnarnera aamma uagut nunatsinni pissutsinik allanngortitsilluinnarsinnaasutut oqaatigineqartalereersoq pisinnaasaroput tamakkerlugu akiorniarneqarnera suleqataaffigisariaqarparput. Pissutissaqaraluarpugut silarsuarmi naalagaaffissuarnik pisuutitsissalluta. Taakkua qangarsuaaniilli mianersoratik silaannarmik mingutsitsiuarsimasutut tikkuartorlugit. Taamaasiornissaq orniginanngilaq.
Silarsuarmiulli tamarmik suleqatigiiffigisariaqagaannut aamma uagut kalaallit nangaanngivilluta suleqataasariaqarpugut. Silaannarsuup mingutsitaanermigut nunarsuarmik illersuutiginiagaa nungusarneqaraluttuinnartoq tusaamavarput. Klimallu kissatsikkiartornera alliartussasoq seqerngullu qinngorneri inunnik peqqiilliortitsilersinnaasut alliartuinnassanngippata silaannarsuarmik mingutsitsilluni inuiannik atugarliortitsilersinnaaneq pinaveersaartinniarlugu suleqataasariaqarpugut.
Silaannarmik kissatsitsisartut nunarsuarmiit aniatinneqarnerat 8%-imik annikillisittariaqarpoq. Aamma nunatta suleqataaffigissavaa. Tassunga tunngatillugu oqaatigilara Kangerlussuarmi Thulemi oqartami Thule annnerusumik eqqarsaatigalugu motorersorneq isiginiarneqarnerusariaqartoq. Tassa issittorsuunera pissutigalugu motorit pingaartumik biilit ulloq unnuarlu ingerlatinneqartuartarmata. Tamaaliunngikkaannik aallartinneqarsinnaajunnaartarmata ullaakkut.
Tassa taanna adresselerpara USA-mut atsiorumanngitsumut. Immaqa
saaffigineqarsinnaasoq Kalallit Nunaat, imaluunniit Kalaallit Nunaata
Inatsisartuisa pimoorullugu oqallisigisimagaat nunamik Kyotomi
isumaqatigiissummut ilaajumanera. Taamaattumillu aamma uparuaraat USA-p
Kyotomi isumaqatigiissummut atsiorumanngitsut iliuuseqarnera
oqaatigineqarsimasoq motorit issinnersua pissutigalugu ingerlatinneqaratik
unnuaq ullorlu ingerlatinneqartut mingutsitsinnermut ilaalluinnarmata. Naak
Kalaallit Nunaat kisimiilluni imannarsuaq mingutsitsinnaanngikkaluartoq.
Isumaqarpunga naak akisugaluaqisumik erngup nukingata nukissiuutitut
nunatsinni atugaanissaanik aalajangersimanerput eqqortuliornerusimasoq.
Tamannalumi saqqummiussami oqaatigineqarpoq. Kangerluarsunnguami
nukissiuutip naak ataasiinnaagaluarluni silaannarsuup mingutsitaaneranut
nunatta aamma pisooqataasimanera iluaquserlugu millisitsereersimanera.
Maani saqqummiussisarninni kiassarnermi atortuakkatsinnik tassa uuliamik
atuinitta misissorneqarnissaa siunertaralugu taakkartortarsimavakka seqerngup
kissarneranik anorip nukinganik sarfallumi atugaanerulernissaanik
eqqartuisarsimallunga. Taamaattumik uuliamik atuivallaarnitta
millisinniarneqarnerani qularutissaanngilaq ikummatissat silaannarmik
mingutsitsinnginnerusut atugaanerulernissaannut pinngitsoorani alloriarnermik
pinngitsoorneqarsinnaanngitsumik aallarnissaasoq.
Tunitsivinnilli aamma nunatsinni pilersinneqarsinnaasunik
ujarlertuarnitsinni naapitaqarsinnaavugut allatut ajornartumik ikummatissanik
silaannarsuarmik mingutsitsisunik atugaqartariaqarnermik. Tamanna
saqqummiussakkut oqaatigineqarpoq. Taamaattoqassappat isumaqatigiinniarnerit
aqqutigineqarsinnaasut, taanna eqqaamaneqallaqquvara suliffinnik ataavartunik
ujarlerniarnitsinni.
Uumasuni aalisakkanillumi pinngortitarsuup tunniussinnaasaanik
inuuniuteqartilluta silaannaap allangorneragut piniakkatsinnik ikilisunik
tammarartunilluunniit eqqugaaratarsinnaanerput
eqqarsaatitsinniittuartariaqarpoq. Tamannalu pinaveersaartinniarlugu Kyotumi
isumaqatigiissummut ilaasariaqarnerput pingaarluinnartutut isigisariaqarlugu.
Naalakkersuisut siunnersuutaat immikkut piumasaqaatitaqanngitsumik Kyotomi
isumaqatigiissummut tapiliussamik Danmarkip atsiorluni
atortuulersitsisinnaanissaa Inatsisartunut akuerillaqquvaa imaluunniit
akuerillaqquavara. Tassami killiliussatut isumaqatigiissut
atsiorneqareersimammat. Inatsisartunut nalunaarutigissavara siunnersuut
akuersaarlugu matumuuna nalunaarutigigiga.
Alfred
Jakobsen, Peqqinnissamut
Avatangiisinullu Naalakkersuisoq, Inuit Ataqatigiit.
Aap, tassa aalajangiiffigisassatut siunnersuut manna Naalakkersuisut
sinnerlugit saqqummiussara maannamut siullermeerneqarnerani
amerlanerussuteqarluartunit tapersersorneqarnerat soorunalimi
tulluussutigeqaara aamma tapersersuisunut qujassutigissavara taamatut
tapersiinerannut.
Tassami taamaaliornitsigut naqissuserparput aamma uagut kalaallit
ikittunnguugaluarluta nunarsuarmioqataasutut misigisimasugut. Aammalu
akisussaaqataarusuttugut nunarsuatta mingutserneqarnerata
annikillisaaviginissaannut.
Tassa eqqarsarit nunarsuarmioqataasutut, iliuuseqarit nunaqqataasutut.
Tamakkuupput oqariaatsit, oqariartaatsit uagutsinnut alutornartut maannakkut
aamma peqataaffigiligassagut ukiunilu tulliuttuni aamma tulluusimaarluta
timitalersuiffigisassagut.
Nuannaarutigaara qujassutigalugulu tassa taamatut partiit oqaaseqartuisa
aammalu attaviitsup qallunaat nunaata Kyotomi isumaqatigiissummut
tapiliussamut atortuulersitsinissaanut. Nunatsinni immikkut
piumasaqaatitaqanngitsumik atortuulersitsinissaa maani ilalerneqarmat.
Taamatullu aamma qujassutigaara Naalakkersuisut sinnerlugit inassutigigakku
aappassaaneerneqartinnagu ataatsimiititaliami tassa Inatsisartut
eqqiisisimatitsinermut avatangiisinullu ataatsimiititaliaani sukumiisumik
sammineqassasoq. Taassumallu aamma taperserneqarnera tassa partiit
oqaaseqartuiniit aammalu attaviitsumiit erseqqissumik taamatut
taperserneqarnera qujassutigissavara.
Tassa oqaaseqartut ataasiakkaat imatut immikkut samminngikkarluarlugit
taamaattoq arlallit erseqqissumik oqaatigivaat inuit nammineerluta uagut
iliuuseqarnitsigut qanoq peqataasinnaanerusugut silaannarmut gassinik
assigiinngitsunik aniatitsinermut killilersimaariniarnitsinnut ingammik ukiuni
tulliuttuni.
Tassa atortorissaarutit assigiinngitsut innaallaagiartortut
angerlarsimaffitsinni ullumikkut pinngitsoorsinnaanngisagut
assigiinngitsoorpassuupput. Tamakkua nutartertuartussaapput,
nutarterneqartuartussaapput aammalu tamakkunuunatigut nutarterinerit
inerisaanerit siuariartuinnarput. Taamaattumik aamma innaallagissamik
atuinikinnerusut soorlu qerititsiviit nillataartitsiviit qarasaasiat
fjernsynit assigisaallu innaallagissamik atuiffiusut imaluunniit atuisuusut
atortorissaarutit tamakkua ineriartortinneqartuarput.
Tassa tamakkuupput aamma nammineerluta maani nunatsinni ukiuni tulliuttuni
eqqarsaatigilluarlugit pisiarisarnissaanut ilaatigut
paasiniaaffigisarsinnaasavut qanorpiaq inaallagissamut atuinerat innersoq.
Taavalu oqaaseqartut arlalissuit kaammattuutaat apeqquteqaataat pillugit
maannakkorpiaq siullermeerneqarnerani immikkut oqaaseqarfiginngikkaluarlugit
kaammattuutigerusuppara taakkua siunnersuutip aappassaaneerneqartinnagu
Inatsisartut eqqissisimatitsinermut avatangiisinullu ataatsimiititaliaanut
aamma qulaajaaffigineqarluassasut. Tassa Naalakkersuisuni piareersimavugut
uani oqaaseqartut apeqquteqaataat assigiinngitsut aammalu qularluni ilaatigut
Kattusseqatigiit oqaaseqartuata nalornisutut isummerneranut peqqutaasut
taakkua Inatsisartut eqqissisimatitsinermut avatangiisinullu
ataatsimiitialiaanut aamma itisileriffigisinnaallugu, taamatut
kaammattuutigerusuppara.
Taavalu erseqqissaatigerusuppara tassa una taamatut nunarput Danmark-ilu
sinaakkusiussamik isumaqatigiissuteqarneranut tunngavippiaammat 2008-p
2012-illu akornanni 8%-imik aniatitsinitta apparsimanissaanik
siunnerfeqarnermut. Tassani arlaatigut ajornartuussagaluarutta taava
Naalagaaffik isumaqatigiissuteqarfigeerparput immikkut isumaqatigiinniarnikkut
taassumap aamma aaqqeriarnissaa qaangeriarnissaalu qanoq iliorluta
suliarineqassanersoq. Taamalilluni isumaqatigiissuteqarnikkut
qulakkeereersimagatsigu Naalakkersuisuninngaanniit.
Tassami Danmarki tassaavoq nunarput ilaatigullu savalimmiut sinnerlugit
Kyotomi isumaqatigiissummut atortuulersitsinissamut atsiortussaasoq. Aammalu
imminut pisussaaffilertussaasoq, kisiannilu tulluusimaarutigaara Inatsisartuni
maannakkut amerlarnerussuteqarluartut siullermeerneqarnerani, aamma
neriuppunga aappassaaneerneqarnerata kingorna Inatsisartut
tamarmiullutik taamatut tapersiiumaartut. Tassami Danmarkip taamatut pisussaaffimminik naammassinninniarnermini aamma uagut nunarsuarsuarmioqataasutut isigaluta suleqatiseraatigut. Aamma sinaakkusissamut isumaqatigiissuteqarnitsigut tamanna isumaqarpunga qularnaaripput.
Oqaatigissavaralu aamma Kyotomi isumaqatigiissummut tapiliussap atortuulersinnissaanut aallaaviusoq tassaammat maannamut isumaqatigiinniarnerit assigiinngitsut ingerlareernerata kingorna Naalagaaffiit ikinnerpaamik 55-it taassumunnga akuersaarerpata aamma isumaqatigiissummut tapiliussap taassumap pineqartup tamakkiisumik aalajangersagartai atuuttussanngortinneqassammata.
Aammalu oqaaseqartut arlallit ilaatigut tikkuarpaat uani nunarsuarmi Naalagaaffippassuit siuarsimasut ilaatigut taakkuummata nunarsuarmi Naalagaaffinnut aamma siuarsagassaasunut immikkut aningasaliisarnissaannut tunngasut. Periutsit assigiinngitsut aalajangersakkami uani isumaqatigiissummut tapiliussamik ilanngunneqarsimasut najoqqutaralugit qanoq aningaasalersueriaatsit iluseqartut aamma atuuttussanngortinneqartussammata.
Tassa maannamut ilisimaneqarput naalagaaffiit 40-t tungaanoortut. Maannakkullu aamma tassa Danmark-ip taamatut inissinnera qularnarunnaartussaavoq aamma ilaatigut uagut tapersersuinitsigut. Naalagaaffiit 40-t tungaanoortut Kyotomi isumaqatigiissummut tapiliussaq atuuttussanngortinnissaanut atsiornissamut piareersimammata, kisiannili qaqugorpiaq isumaqatigiissutip taassumap tamakkiisumik atuutilernissaanut piareernissaa taanna maannakkut oqaatigiuminaappoq. Kisianni neriuutigineqarpoq aappaagu nunarsuarmioqatigiit avatangiisit ineriartornerlu pillugu nunarsuaq tamakkerlugu ataatsimeersuaqqinnissaanut tassa 1992-imi Riomi ataatsimeersuareernerup kingorna ukiut qulit qaangiunneratigut ataatsimeersuaqqinnissamut taassumap tungaanut Naalagaaffiit amerlanerusut Kyotomi isumaqatigiissummut tapiliussamut isumaqataalerlutik atsioqataanissaminnut piareernissaat neriuutigineqartoq.
Kisianni
soorunalimi nalorninarpoq. Imaassinnaavoq immaqa 2003-mi 2004-imiluunniit
aatsaat tamakkua taamatut tamakkiisumik piareernissaat ilimanarsinnaasoq.
Tassa
qujavunga amerlarnerussuteqarluartut taamatut tapersiinerannut
aalajangiiffigisassatut siunnersuutitsinnut. Taamatullu naqissuseqqikkusuppara
uani apeqqutigineqartut kaammattuutigineqartut aammalu nalornissutaasut
itisileriffigalugit Inatsisartut eqqissisimatitsinermut avatangiisinnullu
ataatsimiititaliaanut sukumiisumik qulaajagassanngorlugu suliarinissaat
kaammattuutigivara.
Mogens
Kleist, Kattusseqatigiit
oqaaseqartuat.
Saqqummiigama naluara Naalakkersuisup oqaatsikka kingulliit atuarsimanerai
tusaasimaneraaluunniit - allaqqavoq ersarissumik Kalaallit Nunaata aammalu
qallunaat nunaata isumaqatigiissuteqarnissaat tamakkiisumik
Kattusseqatigiinniit taperserlugu oqaatigissavarput. Naluara
tusaasimannginneraa, kisianni ersarissumik taamatut oqaaseqarpugut. Aammalu
Naalakkersuisoq nammineerluni aatsaannguaq oqaaseqarpoq isumaqatigiissutip
kingusinnerusukkut aaqqiivigineqarnissaanut tunngatillugu taamatut qanoq
pisoqarnissaa pissanngatigalugu. Taamaattumik uagut tungitsinninngaanniit
oqarpugut nunatsinnut assigiinngitsut tamakku piumasaqaatit aamma
eqqumaffigisariaqarpugut.
Taamaattumik uagut tungitsinninngaaniit ersarissumik oqarpugut
atuaqqissavara. "Taamaattumik tamakkiisumik Kattusseqatigiinniit
taperserlugu oqaatigissavarput." Imaanngilaq akerliusugut.
Taamaangilluinarpoq atuaqqikkukku paasissavat.
Qujanaq.
Jørgen
Wæver-Johansen, Ineqarnermut,
Attaveqarnermut Pilersuinermullu Naalakkersuisoq, Siumut.
Qujanaq. Siullermik oqaatigerusuppara nuannaarutigigakku malunnarmat
Inatsisartut tamarmiulluta isumaqatigigipput siunissami erngup nukinganik
iluaquteqarluni nukissiuuteqarnerup pitsaasumik ineriartortinneqarnissaa
nunatta pisariaqartikkaa. Aamma oqaatigineqartut tunngavigalugit
maligisinnaavara suliassat tamatumani ittut Naalakkersuisunut
nukingisaa-runneqartut.
Imaappoq pilersaarutit pigineqareersut tunngavigalugit aamma
aalajangiiffigineqarsinnaasumik siunnersuummik Naalakkersuisuniit
saqqummiussaqarnissarput siunissami qanittumi kissatigineqarpoq. Tassanilu
qularutissaanngitsumik taamatut pilersitsiniarnerit naleqaqimmata aamma
naliliinissami ilanngullugit Naalakkersuisunit suliarissavagut
aningaasalersueriaatsit allaanerusut soorlu Utoqqarmiut Kangerluarsunnguanni
nukissiorfiup pilersinnniarneqarnerani atorneqarsimasunut assingusunik
iluaquteqarluta pilersitsisinnaanerit piviusunngortissinnaanerigut.
Taamatuttaaq aamma oqaatigineqartariaqarpoq tamanik isumaqatigineqartumik
seqerngup nukinganik iluaquteqarluniu siunissami nunatsinni inerisaanissarput
pisariaqartoq. Minnerunngitsumillu Sisimiuni Issittumi Teknologi pillugu
Centeri peqatigalugu tamatumani suliniutissat ingerlanneqarnissaat
kissaatigineqartoq. Taakkua Naalakkersuisuniit tusaatissatut tigorusuppagut.
Aammalu suleriaqqinnissatsinni tunngavigissallutigit.
Qujanaq.
Alfred
Jakobsen, Avatangiisinut
Peqqinnissamullu Naalakkersuisoq, Inuit Ataqatigiit.
Sivitsorsaanianngikkaluarlunga kisianni tulluusimaarnera suli annerulerpoq
Naalakkersuisut sinnerlugit tassa erseqqissaatigineqarmat Kattusseqatigiit
oqaaseqartuaninngaaniit tassa uani taamatut aalajangiiffigisassatut
siunnersuummut Kattusseqatigiit aamma tapersiisimammata. Uaniuna
isumaqatigiissuteqarnissaat tamakkiisumik Kattusseqatigiinni taperserlugu
oqaatiginninnermi imatut uanga paasigakku tassa nunarput Danmarkillu
akunnerminni sinaakkusiussamut isumaqatigiissut taanna pineqartoq.
Kisianni utoqqatserpunga ajuusaarutigalugu taamatut paatsoorsimagakku,
kisianni qujavunga aamma taamatut erseqqissaaninnut. Tassa qujanarujussuaq
Inatsisartut oqaaseqartuinut taanna taperserneqarmat.
Anders
Andreassen,
Inatsisartut Siulittaasuata Tullia, Siumut.
Qujanaq tassa taamaalilluni ullumikkut oqaluuserisassaq immikkoortoq 36
siullermeerneqarnera naamassigallarpoq. Kisianni aappassaaneerneqartinnani
eqqissisimatitsinermut avatangiisinullu ataatsimiitialiamit
sularineqaqqaarallassaaq. Matumalu kingorna aappassaaneerneqarumaarluni.