Ullut ataatsimiiffiusut sisamaat, pingasunngorneq 26. september 2001, nal. 14.38.

Oqaluuserisassani immikkoortoq 41

Ittoqqortoormiinut imeqarfiusumut tatsimit allamit attaviliinisssaq pillugu aalajangiiffigisassatut siunnersuut.

(Anders Andreassen)

(Siullermeernera)

 

Ataatsimiinnermik aqutsisoq: Lars-Karl Jensen, Siulittaasoqarfimmi ilaasortaq, Siumut:

 

Lars-Karl Jensen, Siulittaasoqarfimmi ilaasortaq, Siumut:

Taava oqaluuserisassamut tullermut nuuppugut. Tassalu immikkoortoq 41, tassaavoq Ittoqqortoormiini maannakkut imeqarfiusumut tatsimit allermiit attaviliinissaq pillugu aalajangiiffigisassatut siunnersuut. Siunnersuuteqartoq siulliulluni oqaaseqassaaq. Takanna.

 

Anders Andreassen, Siumut, siunnersuuteqartoq:

Qujanaq. Naluneqanngitsutut Ittoqqortoormiini imeqarniarneq ilungersunartuuvoq ilaatigut ukiuunerani imermik assartuiniarneq ilungersunaannarani atuisunut akisoqisumik ingerlanneqartarluni. Peqqinnissamut aammalu nappaatinut assigiinngitsunut pinaveersaartitsiniarnermi allarpassuarnullu imeq pinngitsoorneqarsinnaanngilaq.

Aammalu annertuumik ajutoornermik pisoqartillugu assersuutigalugu annertuumik ikuallat- toornikkut kiisalu tunitsiveqarniarnikkut imeq aamma pinngitsoorneqarsinnaanani.

 

Ullumikkullu imeq aallarfigineqartartoq illoqarfimmut qanippallaarneratigut illoqarfiup allineqarsinnaanera killilerpaa. Aammalu ukiuunerani angallannermi aqqutaannarmiilluni tamannalu peqqinnissamut aamma akornutaasinnaalluarpoq.

 

Tunngavilersuutit aallaavigalugit kissaatiginarluinnarpoq Inatsisartut paasinnillutik illoqarfik avinngarusimalluinnartoq imermik ajornartorsiuteqaqisoq illoqarfiullu ineriartortinneqarnissaa eqqarsaatigalugu periarfissamik tunisinnaassagaat.

 

Jørgen Wæver-Johansen, Ineqarnermut Angallannermut Pilersuinermullu Naalakkersuisoq,Siumut:

Qujanaq. Naalakkersuisut siunnersuutigineqartumut akissuteqaataat imaappoq:

 

Illoqarfiup imermik pilersorneqarnera kuummiit illoqarfiup kangianiittumit pisarpoq. Ukiuunerani kuup serminnguuttarnera pissutigalugu imeq naammattoq kuummiit pissarsiarineqarsinnaasanngilaq.

 

Kuuk tasersuarmit ukioq naallugu illoqarfimmut pilersuinissamut naammattumik imilimmit imermik pilersorneqarpoq. Ullumikkut aasaanerani illoqarfiup pilersorneqarnera erngup aqqutai aasaanerani atorneqartartut annerusumik atorlugit pisarpoq. Imeq atugassaq aasaanerani qallorneqartoq sipporuttoq imermik immersakkamut immiunneqartarpoq. Imermik immersakkap imarisinnaasaa aattulernerup tungaanut naammattanngilaq.

 

Ukiuni kingullerni pingasuni aattulernerup tungaanut imissaq amigaataalersartoq tatsimit sullulikkut siaakkakkut ingerlatissiortoq generatori iluaqutigalugu milluuaanikkut pissarsiarineqartarpoq.

 

Imermik pilersorneqarnerup atuisunut pisariuneranut akisuneranullu pissutaavoq imermik pilersuineq imertaassuit qamutilluunniit unngersaasarsuarnit ingerlatillit atorlugit ingerlanneqartariaqartarmat. Imermik pajuttortarneq pinngitsoorneqassappat ukioq kaajallallugu atorsinnaasumik aqqusiortoqartariaqarpoq. Taamaaliornissarlu amerlasuunik aningaasalersuinissamik pisariaqartitsiviuvoq.

 

Ukioq kaajallallugu assersuutigiinnarlugu illoqarfiup iluani imermut aqqutip qatserisartut atorsinnaasaannik ikkussuiffigineqartup pilersinneqarnera meterimut 3.000-6.000 kronennik akeqassaaq. Pilersaarutigineqarpoq ukiuunerani imermik immertagaq ukioq 2004-mi kronet 1,5 millionit atorlugit, imeqarfillu ukioq 2005-imi kronet 5 millionit atorlugit iluarsaanneqassasut, tassa katillugit kronet 6,5 millionit.

 

Taakku saniatigut eqqarsaatigineqarpoq erngup isaavia inissisimaffimmut suli pitsaanerusumut nuunneqassasoq pisariaqarpat erngup isaaviinik amerlanerusunik tapertalerlugu. Taamaaliornikkut ukiunnerani imermik pilersuisinnaassuseq annertusissaaq. Kiisalu tatsimiit imermik milluaasarneq pisarioqisoq pinngitsoortinneqarsinnaalluni annikillisarneqarsinnaalluniluunniit.

 

Isumannaatsumik pilersorneqarsinnaanerup peqqinnissallu tassunga aamma ilanngullugit assersuutigalugu ikuallattoqartillugu annerusumik isumannaallisaanissamut periarfissaqarnissaata eqqarsaatiginissaat Naalakkersuisunut pingaaruteqarput. Taamaattumik innuttaasunut sullissinerup pilersuinerullu pitsaanerulersinneqarnissaat anguniarlugu pilersaarutit nukissiorfiit ingerlatiinnassavaat.

 

Taamaattumik inatsisartunut ilaasortap Anders Andreassenip siunnersuutaa Naalakkersuisut tapersersorsinnaanngilaat.

 

Ole Lynge, Inatsisartut Siulittaasuat, Inuit Ataqatigiit:

Taava partiit oqaaseqartuinut ingerlaqqippugut.

 

Tommy Marø, Siumup oqaaseqartua:

Qujanaq. Inatsisartuni ilaasortap Anders Andreassenip Ittoqqortoormiuni imeqarniarneq pillugu aalajangiiffigisassatut siunnersuutaanut Siumumiit oqaluuserilluareerlugu imaattumik oqaaseqarfigissavarput:

Siullermik Siumumiit paasilluarparput siunnersuuteqartup siunnersuuteqarnermini Ittoqqortoormiuni erngup ukiuunerani qanoq pisariaqartilluinnarneqarnera aammalu eqqiluisaarnikkut, sillimaniarnikkut sullivinnilu pisariaqartinneqarnera ersersinniarsimammagu.

 

Siumumiit oqaatigissavarput Siumup pingaartilluinnarmagu nunatsinni nunaqarfinni isorliunerusunilu atukkatigut illoqarfimmiutuulli periarfissaqartinneqarnissaat. Taamaattumik siunnersuuteqartup Anders Andreassenip Siumumeersup siunnersuutaa tunngaviatigut taperserniarparput. Taamaattorli Siumumiit erseqqissaassutigissavarput nunatsinni sarfamik imermillu pilersorneqarneq tamakkiisumik Nukissiorfinniit akisussaaffigineqarmat. Taamaattumillu Naalakkersuisut siunnersuuteqartumut akuersaarsinnaannginnerat ilalerlugu.

Siumumiit Naalakkersuisut akissuteqarnerminni Nukissiorfiit Ittoqqortoormiini ukiuunerani imermik pilersorneqarnerata pitsanngorsaaviginiarneqaranut atasumik ukiuni 2004-mi aammalu 2005-mut 6,5 millionit atorlugit pilersaaruteqarnerat iluarisimmaaraluarlugu taamaattoq Naalakkersuisut kaammattussavagut pilersaarusiap siuartinneqarsinnaanera pillugu Nukissiorfinnut suleqatigiissutiginiaqqullugu.

 

Taamatut oqaaseqarnitsinnut pissutsit annerpaartaraat ukiorpassuanngortuni Ittoqqortoormiut imeqarniarnikkut ukiuunerani ajornartorsiuteqartuarsimanerat qaangerniarneqarnissaat pisariaqalermat.

 

Naggataatigut Naalakkersuisut kaammattussavagut nunatsinni illoqarfiit nunaqarfiillu imermik pilersorneqarnerisa tamakkiisumik nalunaarusiamik inatsisartunut saqqummiussinissaat sulissutigeqqullugu. Ilisimagatsigumi nunatsinni illoqarfiit nunaqarfiillu imermik pilersorneqarnerat suli tamakkiisunngorsimanngitsoq. Aammalu erngup suliffeqarsinni imigassatullu pitsaassusaa annertussusaalu inoqarfiit ilaannit naammaginanngilluinnarmat. Qujanaq.

 

Saaleeraq Johansen, Atassutip oqaaseqartua:

Siunnersuut saqqummiunneqartoq Illoqqortoormiuni imeqarnikkut eqqiluisaarnikkut pingaaruteqarmat Atassummiit imatut oqaaseqarfigissavarput:

 

Pilersinniakkat taamaattut pilersaarusiorluarlugit suliassaammata ukioq 2004-mi 2005-mimilu sanaartugassanut aningaasaliinissanut Naalakkersuisut pilersaarutaat taperserpagut. Taamatut oqarnitsinnut tunngaviuvoq kommunit peqatigalugit pilersaarusiorluarneq eqqortumik aningaasaliinissamut toqqammaviusartoq Atassummiit ilisimaarigatsigu, ilisimaarilluaratsigu.

 

Atassummiit kissaatigaarput Nukissiorfiit, kommune pineqartoq peqatigalugu pilersaarusiorneq qulaaniit aqunneqanngitsoq ingerlanneqassasoq. Tassami aamma allat taamatut ajornartorsiutillit Nukissiorfiit ilisimaarimmatigit. Taamaattumik Naalakkersuinikkut tulleriiaarineq aallaaviusariaqarpoq.

 

Taamatut oqaaseqarluta Atassummiit Naalakkersuisut siunnersuummut itigartitsinerat taperserlugu taasissaagut. Qujanaq.

Paninnguaq Olsen, Inuit Ataqatigiit oqaaseqartuat:

Qujanaq. Siunnersuuteqartup tunngavilersuutigisai Inuit Ataqatigiit paasilluarpagut. Tassaasut Ittoqqortoormiiuni ukiuunerani imermik pilersuiniarneq assartuinikkut ingerlanneqartartoq atuisunullu akisooq aammalu qanippallaamiinnini pissutigalugu illoqarfimmik ineriartortitsisinnaanermut killiliisoq.

 

Erngup inuiaqatigiinni inuuniarnikkut, peqqinnissakkut suliffeqarnikkullu pingaaruteqassusia tamatta nalunngilarput. Taamaattumillu aamma inuiaqatigiiusugut illoqarfinniikkutta nunaqarfinniikkuttaluunniit imermik pilersorneqarnitta pitsaasuunissaa soorunami tamatta soqutigisaralugulu pingaartilluinnagaraarput.

 

Inuit Ataqatigiit ilisimavarput nunatsinni imissaaleqineq annertunerusumik ajornartorsiutaasussaanngikkaluartoq taamaattoq aqqusersuinerit akisuut ilaatigut pitinnagit erngup aqqutaanik attaviliinerit naammassineqarsinnaanngitsut inoqarfinni arlalinni naammattuugassaasarmata.

 

Aammalu inoqarfiit ilaanni inuussutissarsiornikkut ineriartortitsiniarnermi akimmiffittut ajornartorsiutaaneri ilisimagatsigu manna iluatsillugu Ineqarnermut Attaveqarnermut Pilersuinermullu Naalakkersuisoq piumaffigissavarput inoqarfinni inuussutissarsiutinik siuarsaaniarnermut tunngatillugu imermut attaviliinissamik pilersaarutit tulleriiaarneqarneri pillugit paasissutisseeqqullugu.

 

Inuit Ataqatigiit Ittoqqortoormiuni imermut attaviliinissamik ajornartorsiuteqartoqarnera paasilluarsinnaagarluarlutigu taamaattoq Ineqarnermut Attaveqarnermut Pilersuinermullu Naalakkersuisup akissuteqaataa ilalerparput. Naatsorsuutigalutigulu ukiumi 2004-mi Itoqqortoormiuni imermik immersakkamik 1,5 mio. kronet atorlugit pilersaaruteqartoqarnera. Kiisalu ukiumi 2005-imi 5 mio. kronet atorlugit imeqarfimmik iluarsaanissap piffissaa eqqorlugu suliarineqarumaartut.

 

Inuit Ataqatigiit taamak oqaaseqarluta aalajangiiffigisassatut Anders Andreassenip siunnersuutaanut Naalakkersuisup akissuteqaataa taperserlugu aappassaaneerneqannginnermini ataatsimiititaliami susassaqartumi naliliiffigineqarnissaa inassutigaarput.

 

 

Mogens Kleist, Kattusseqatigiit oqaaseqartuat:

Anders Andreassenip saqqummiussaa aalajangiiffigisassatut maannakkorpiaq akuersaassallugu oqaatigisinnaanngilarput. Tassami pisariaqartitsinerup annertussusia tunngavigalugu imeqarnermut tunngasut aaqqiivigineqartartussaammata. Tassa Ittoqqortoormiunut tunngatillugu.

 

Minnerunngitsumillu oqaatigissavarput Nukissiuuteqarfiup ullumikkut misissuititsisimanera utaqqeqqaarniaratsigu pisariaqartitsisoqassappat Inatsisartutigoorlugu naliliiffiginnginnerani. Ilanngullugu erseqqissaatigissallugu oqaatigissavarput imeqarnermut tunngasut Nukissiorfiit oqartussaaffiisa ataaniimmata Nukissiuuteqarfiillu Ineqarnermut Attaveqarnermut Pilersuinermullu Naalakkersuisup aqutaralugit. Taamaattumik pissusissamisoortutut isigaarput Nukissiuuteqarnermut Naalakkersuisup akissuteqaatai aammalu Nukissiuuteqarfinniit misissuisimanerit qanoq imminnut eqquutsiginersut.

 

Taamaattumik aalajangiiffigisassatut siunnersuut Kattusseqatigiinniit tunuarsimaarfigaarput sukumiisumik misissuisimanerit takutinnagit. Taamatut oqaaseqarluta Naalakkersuisup akissuteqaataa tusaatissatut tiguarput. Oqallinnissamut aammalu naliliinissamut ilaanissarput ilanngullugu oqaatigissavarput. Qujanaq.

Otto Steenholdt, attaviitsoq:

Erngup peqqinnissamut qanoq pingaaruteqarluinnassusia eqqarsaatigalugu siunnersuutigineqartoq misissuataarlugu isumaqarpunga ajunngivissumik Naalakkersuisut tungaanninngaanniit akissut inatsisartunut tunniunneqarsimasoq.

 

Tassa oqareernittuut peqqinnisamut qanoq pingaaruteqartigaluni aallaaviummat taavalu pilersaarut ungasilaaraluarpoq, tassa 2004-miit 2005-imut  iluarsaanissaq, taanna siunniunneqartoq. Tunngaviusullu paasillugit immaqa siuartikkusunnassagaluartoq. Taamaattoq aningaasaqarniarneq eqqarsaatigalugu siunnersuut, siunnersuummut akissuteqaat Naalakkersuisuninngaaneersoq isumaqatigaara.

 

Anders Andreassen, siunnersuuteqartoq, Siumut:

Aap, qujanaq. Tassa akissuteqaammi paasivara imatut Naalakkersuisut tungaanninngaanniit siunnersuut akerlerineqanngilaq, kisiannili ukioq 2000-imut aningaasaliiffigineqarnissaa tassani taperserneqasinnaanani. Taamaattumillu uani ukiut taaneqartut 2004 2005-imilu saqqummiunneqartut misissuataarsimagaluarpakka ilaatigut takuneqarsinnaassasoralugit sanaartugassanut tunngatillugu missingersuutinut ilanngunneqarsimanersut, kisianni taamaattoqanngimmat, taava oqaatigissavara maani oqaaseqartut imatut paasigakkit, tunngavilersuut akuersaarpaat paasisinnaallugillu, kisiannili qaqugumut sanaartugassap taassumap pinissaa taanna apeqquserlugu.

 

Paasinninneq qujassutigaara aammalu oqaatigissallugu Siumup oqaaseqartuaninngaaniit eqqaaneqartoq tassalu ukioq, ukiumi 2004-mi 2005-mimilu sanaartugassap siuartinneqarsinnaanissaa misissorneqarnissaanik siunnersuutigineqartoq. Taanna isumaqarpunga naapitseriarnertut isigisariaqartoq. Aammalu Siumut oqaaseqartuata kaammattuutigaa Naalakkersuisut Nukissiorfiillu suleqatigiillutik suliap taassumap siuartinneqarsinnaanissaa misissussagaat. Taamaalilluni siusinnerusukkut pisinnaanissaa aamma anguneqarsinnaappat tamanut soorunami nuannissagaluarpoq, kisianni aamma Inuit Ataqatigiinninngaaniit kaammattuutigineqartoq ilaatigut suliap misissoqqissaarnissaa eqqarsaatigalugu ataatsimiititaliami susassaqartumi suliareqqaarnissaa, isumaqarpunga aamma pissusissamisoortoq. Tassa paasivara siunnersuut tunngaviatigut akerlerineqanngitsoq, kisiannili aallartiffissaa taanna kisimi apeqqutaatinneqartoq.

Jørgen-Wæver Johansen, Ineqarnermut Attaveqarnermut Pilersuinermullu Naalakkersuisoq, Siumut:

Qujanaq. Paasivara partiit tamarmik Kattusseqatigiillu kiissalu attaviitsup oqaaseqarneratigut Naalakkersuisut akissuteqaataat taperserneqartoq.

 

Siunnersuuteqartulli aamma naliliinera ilumoorpoq, aamma oqaatigissavara Siumuminngaaniit siunnersuutigineqartoq tassalu Naalakkersuisoqarfiup Nukissiorfiit peqatigalugit nalilersortariaqaraa, soorlu Otto Steenholdtip aamma siunnersuuteqarneratut arlaatigut siuartinneqarsinnaanersoq. Taanna nalilersorneqarumaarpoq.

 

Taava Siumuminngaaniit, Inuit Ataqatigiininngaanniit Kattusseqatigiinnullu nunarput tamaat ataatsimut isigalugu imermik pilersuineq eqqarsaatigalugu siunissami pilersaarutit qanoq innerinik ujartuineq taanna maluginiarsimassavarsi Naalakkersuisut Siulittaasuata ammaalluni oqalugiaataani ilanngullugu oqaatigineqartoq taanna massakkut suliarineqarluni aallartinneqareersimasoq. Aammalu ilaatigut taakkua Mifrestaminngaaniit Danseamiillu aningaasalersuinerit aamma iluaqutigalugit taanna suliarineqartoq.

Qaqugorpiaq naammassinissaa oqaatigereersinnaanngilara, kisianni qularutigineqassanngilaq suliaq ineqarnermut attaveqarnermut pilersuinermullu ataatsimiititaliamut ingerlatinneqarpat sukumiinerusumik taanna pillugu ilisimatitsissuteqarsinnaassagama.

 

Ole Lynge, Inatsisartut Siulittaasuat, Inuit Ataqatigiit:

Tassa oqaaseqarumallutik nalunaartut tamaanga killeqarput. Aqutsisutut uani suleriaatsimi § 32, immikkoortoq 7 innersuussutigalugu oqaatigissavara aalajangiiffigisassatut siunnersuutit pinngitsooratik marloriarneqartussaammata. Tassa siullermeerneqarnerani aalajangiisoqarneq ajorpoq.