Oqaluuserisassani immikkoortoq 43 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusut aqqaneq sisamaat, pingasunngorneq oktoberip 17-iat 2001,
nal.
13:10
Ataatsimiinnermik aqutsisoq: Ole Lynge, Inatsisartut Siulittaasuat, Inuit Ataqatigiit.
Mads-Peter Grønvold, Kattusseqatigiit.
Nunatsinni nunaqarfiit pillugit naalakkersuinikkut siunnerfeqalernissamik siunnersuut. Isumaqarpunga nunatsinni pillugit ersarinnerusumik naalakkersuinikkut siunnerfiliisariaqartugut. Taamatut piumasaqarninnut tunngavigaara ilaatigut nunaqarfiit nunatta sineriaaniittut ineriartortinneqarnissaat pillugit annerusumik naalakkesuinikkut siunnerfeqannginneq. Taamattumik issumaqarpunga naalakkersuinikkut pineqartut pillugit siunnerfilissoqartariaqartoq.
Inatsisartunit Naalakkersuisut piumaffigineqartariaqarput pineqartut pillugit ukiuni aggersuni pilersaarusiortoqarnissaa. Taamatut piumasaqarninnut tunngavigaara illatigut pineqartut pillugit Inatsisartunut qineqqusaarnerit tamaasa pineqartut nutaamik siunnerfilerneqartarnerat. Taamatut naalakkersuinikkut suleriaaseqarneq pineqartut ineriartortinneqarnissaannut kinguarsaataasartoq isumaqarama. Assersuutigalugu eqqaassavara, tassa assersuutigiinnarlugu assersuutigalugu: nunaqarfiit ilaat avannaaniittoq Upernavik Kujalleq pineqartuni maannakkut tunisassiornermik ingerlatsisoqanngilaq. Nunaqarfimmi najugaqartut aningaasarsiornikkut periarfissinneqarnissaat suli suliniutigineqanngilaq. Assersuutigalugu taava pineqartut pillugit naalakkersuinikkut qanoq iliortoqarniarpa? Pineqartumi Upernaviup kommunia kisimi aningaasartuuteqarniarnerluni? Pineqartumi inuussutissarsiorneq naalakkersuinikkut pitsanngorsarniarneqarnerluni? Suli allanik taakkartuisoqarsinnaagaluarpoq.
Nunaqarfiit 100-t inorlugit inullit qanoq siunissami pineqarniarpat? Nunaqarfiit 100-t sinnerlugit inullit qanoq siunissami pineqarniarpat? Nunaqarfiit inuussutissarsiornikkut periarfisaqartut qanoq siunissami pineqarniapat? Nunaqarfiit inuussutissarsiornikkut ilaatigut perariffissaqanngitsut qanoq siunissami pineqarniarpat?
Pineqartuni aningaasarsiornikkut periarfissiisoqanngippat nipaatsumik pineqartuni ilaatigut inuissa ikiliartorsinnaanerat pinngitsoorneqarsinnaanngitsoq naalakkesuinikkut suliaqartuulluni takuneqarsinnaammat. Taamaattumik isumaqarpunga Inatsisartuni Nalakkersuisut piumaffigineqartaraiqartoq pineqartut pillugit pilersaarusiortoqarnissaaannik, pineqartuni kommunit aningaasarsiornikkut pitsaanerusumik periarfissinneqartariaqartut isumaqarama.
Pineqartuni aningaasarsiornikkut periarsissat atorluarnerisigut siunertaqarnerusumik pineqartut periarfissinneqarsinnaasut isumaqarpunga. Isumaqarpunga pineqartuni peqqinnartuusoq pineqartut pillugit naalakkersuinikkut siunnerfiliisoqasinnaappat.
Taamaattumik isumaqarpunga siunnersuut pineqartut pillugit Inatsisartunit aammalu Naalakkersuisunit soqutigineqarumaartoq suliarineqarumaartoq aammalu pineqartuni aaqqiissutaasinnaasut eqqartorluarneqarumaartut.
Hans Enoksen, Aalisarnermut, Piniarnermut Nunaqarfinnullu Naalakkersuisoq, Siumut.
Inatsisartunut ilaasortap Mads-Peter Grønvoldip nunatsinni nunaqarfiit ineriartortinneqarnerat pillugu nunaqarfiillu pilersaarusiorfigineqarnissaannik naalakkersuinikkut aalajangersaaasoqarnissaanik siunnersuutaa Naalakkersuisut soqutigalugu tiguaat.
Sinnersuuteqartup tunngavilersuummini saqqummiuppaa nunatsinni sineriak kaajallallugu ersarissumik nunaqarfiit ineriartortinneqarnissaat pillugu naalakkersuinikkut aalajangersagaqannginnera, taamatuttaarlu apeqqutit assigiinngitsut apeqqutigalugit, ilaatigut apeqqutit tamanut tunngassuteqartut ilaatigullu avannaani nunaqarfinni piffinni ataasiakkaani aalisakkeriviit matoqqanerannut tunngasut - aammalu tamatumunnga Naalakkersuisut qanoq isummersimanersut.
Naalakkersuisut tunngaviusumik naalakkersuinikkut nunaqarfinnut siunnerfiat tassaajuarpoq aningaasaqarniarnerup iluani atugassaatitaasut piviusut aallaavigalugit anguniarneqartuassasoq nunaqarfinni atuarfeqarnerup iluani, peqqinnissaqarnerup iluani, inuussutissarsiornerup suliffissaqarniarnerullu iluani pitsanngorsaajuarnissaq.
Naalakkersuisut isumaat naapertorlugu nunatta aggornerini assigiinngitsuni nunaqarfiit illoqarfiillu inuussutissarsiuuteqarnikkut piginnaassuseqarnerat aallaavigalugu piorsaasoqassasoq aammalu piorsaanermi anguniarneqassanngitsoq piffiit ataasiakkaat salliutillugit immikkuullarissumik sullissiniarneq. Taamaaliornissami pisariaqarpoq nunap immikkoortuini aammalu kommunini namminerni nakooqutit imminnut kattullugit atorluarniarneqarnissaat taamaaliornikkut suliniarnermi suliassanik nukinnillu agguataaraluni atuilluarnerunissaq anguneqarluarnerusinnaammat.
Tamanna imatut paasineqassaaq nunaqarfiit illoqarfiillu ilai allaniit inuussutissarsiuteqarnikkut assigiinngitsunik immikkuullarissuteqarmata, taamaannerallu tunngaviliisuusariaqarluni piffinni assigiinngitsuni piffissami ataatsimi assigiissunik siunnerfeqartariaqannginnitsinnut. Taamaaliorneq pissusissamisuussanngilaq kinguneriinnassallugulu inuussutissarsiuteqarnikkut pilersinniakkatta affaannarmik inerneqarnissaat.
Nunaqarfiit assigiinngitsut arlallit allaniik allaanerusunik tunngavissarissaarnerupput. Assersuutigisinnaavagut avatangiisitta pissarititaannik pisuussuteqarnerunermikkut tunngavissarissaarnerusinnaasut aalisarnerup, piniarnerup nunalerinerullu iluani assigiinngitsunik tunisassiorsinnaanermikkut. Aamma taamaaqataanik sanalunnikkut kusanartuliornermut piginnaassuseqarluartoqarpoq inooriaatsimikkut pigiliussimasamittut ingerlassaqartunik taamaattumillu eqqumiitsuliornissamut tunngavissaqartunik. Tamakkua saniatigut aamma nunaqarfeqarpoq inissisimanermikkut avatangiisimikkullu takornariartitsinermik suliaqarfiunissaminnut piukkunnareersunik.
Soorunami arlaannaataluunniit arlartik mattutissaangilaa aammalu pisortaniitt inuussutissarsiutit tamakkua ineriartortinneqarnissaannut tapiissutigineqartartut sapinngisamik aalajangersimalluinnartumik siunnerfeqartumik, piffinnilu assigiinngitsuni immikkut pigissaqarneq aallaavigalugu, qinnutigineqartariaqarput.
Taamaattumillu aamma kissaatiginanngilaq periarfissaqaranilu pisortat tungaaniit nunaqarfiit ataasiakkaat immikkut pilersaarusiorfigineqarnissaat. Pilersaarutinut tamakkununnga suliniutit nunaqarfimmit namminermiit nunaqarfiullu taassuma kommunianiit saqqummiunneqarunik pissusissamisuuinnassaaq. Aamma taamaaqataanik nunap immikkoortortaani suliniutit imminnut ataqatigiissaarneqarnissaat pissusissamisuussaaq, tamatuma kingunerissammagu nunamut tamarmut pilersaarusiorsinnaanngornissaq
Ingerlatsiviit ilai kommunemut akisussaaffigitinneqartarput ilaallu Nunaqarfimmi aqutsisunut inissinneqartarlutik. Ingerlatsiviit ilaasa ineriartortinneqarneri Inatsisartunit aalajangiiffigineqartarput ilaatigut inatsisiliornikkut ilaatigullu Aningaasanut inatsisikkut atugassiissuteqarnikkut. Atugassiissutit tamakkua ilai allaffissornikkut isumagineqartarput ilaalu aamma suliffeqarfinniik sullissinissamik isumaqatigiissuteqarfigisimasanik isumagineqartarlutik. Kingulleq taaneqartoq atorneqarnerusarpoq nunap iluani sullissinermut atatillugu isumaqatigiissuteqarfigimasanut kiisalu pilersuinerup iluani.
Taamaattumik naalakkersuinikkut nunaqarfinnik ingerlatsinissamut tunngaviusumik suliniutit anguniakkat assigiinngitsut pillugit aalajangivissumik qulakkeerisumik ingerlaaseqarnissamut pilersaarusiornissaq ilimagisatut ajornaatsiginngilaq pingaartumik nunaqarfiit tamarmik pisariaqartitaat aningaasaqarniarnitsinni sinnaakkutiliunneqartunut sanilliukkaanni piviusorsiortuusinnaanngimmat
Qanittukkut Naalakkersuisut nikinneranni nunaqarfinnut tunngasut inissisimanerat saqquminerulerpoq. Tamatumani isiginiarneqartariaqarpoq nassuerutigineqarmat tunngaviusumik anguniakkat piviusunngortinniarneqarnerata pisariaqartikkaa ersarissumik inissisimanissaq.
Nunaqarfinnut Naalakkersuisutut akisussaasutut isummersimavunga, piffissami qaninnerpaami KANUKOKA nunaqarfiillu peqatigiiffiata siulersuisuisa isumasioqatigiinnissaannik. Tamatuma siunertaraa Namminersornerullutik Oqartussat kommuunillu taamaattumillu aamma nunaqarfinni aqutsisut suleqatigiinnerata nukittorsarneqarnissaata aqqutissiuunneqarnissaa.
Tamanna ilutigalugu maannakkut Naalakkersuisut suleqatigiimmik ataavartumik ataqatigiissaarisussanik pilersitsilerput Namminersornerullutik Oqartussani assigiinngitsuni toqqaannartumik nunaqarfinnut tunngasunik sullissiviusunit sinniisunik inuttaqartussamik. Nassuerutigisariaqarparput manna tikillugu assigiinngitsuni suliat pillugit ataqatigiissaariniartarsimanernit pitsaanerusumik ataqatigiissaarilernissaq pisariaqartoq pisinnaasorlu.
Kommunenik suleqateqarnissat eqqaaneqartut Namminersornerullutillu Oqartussat iluanni suliassanik pitsaanerusunik ataqatigiissaarinissat siunertaasa pingaarnersarissavaat, politikkikkut salliutillugit anguniakkat annertunerusumik piviusunngortittalernissaat suliniutit ingammik nunaqarfinneersut aamma kommuneneersut tunaartaralugit. Tamakku suliniutit tamakkunani atugassarititaasunik aallaaveqassapput, ilaatigut sunik peqarneranik, qanoq ittunik atortorissaaruteqarnernik, ilinniartitaaneq aamma peqqinnissaq eqqarsaatigalugit neqeroorutinik kiisalu inatsisit aningaasaqarnerullu killissarititaannik aallaaveqartunik.
Siunnersuuteqartoq aamma allanik aalajangersimasunut tunngasunik apeqquteqarpoq,
tamakkulu Naalakkersuisut sinnerlugit aamma akissuteqarfiginiassavakka.
Siullermik nunatta avannaani tunisassiorfimmut ataatsimut tunngasumik apeqquteqartoqarpoq. Qularutissaanngilaq apeqqut pisariaqartuusoq, kisiannili Naalakkersuisut paasinnittarnerat malillugu tamakkununnga ataasiakkaanut tunngatillugu apeqqutit allamut atatillugu oqallisigisariaqarput, uani eqqartorneqartumut, tassalu Inatsisartuni nunaqarfinnut politikkimi salliutitassat suussanersut oqallisiginerinut tapitartuunnagit, tassami aalajangiiffigisassatut siunnersuummi tamanna aallaavigineqarmat.
Tunitsivissaqarniarnermi aamma tunisassiorniarnermi ajornartorsiutit eqqaassagutsigit ullumikkut tamakkununnga tunngatillugu atugassarititaasut iluarsineqartarput Namminersornerullutik Oqartussat aamma NuKa A/S-ip isumaqatigiissutaasigut.
NuKa A/S nunaqarfinni arlaqartuni tunitsivinnut/tunisassiorfinnut tunngasunik ineriartortitsi-simavoq ullumikkut nunaqarfimmiut suliffissaqarneranut aningaasarsiornerannullu iluaqutaasunik. Kisiannili nunaqarfiit ilaanni tunitsiviit/tunisassiorfiit oqartussat piumasaat assigiinngitsut naammassisinnaanngilaat. Tamakku ilaatigut illutaasa aserfallassimanerinik peqquteqartarput, tassa tamakku tunitsivittut atorsinnaajunnaarsimasarput landskarsimiit annertuumik aningaasalerneqan-ngikkunik atoqqilersinnaanngitsut. Tunitsiviit ilaasa ingerlaqqissinnaanissaannut aporfiusartut ilagaattaaq tunisassiassanut tunngatillugu apeqqutit ingerlaqqittoqarsinnaanissaanut aalajangiisuulluinnartartut. Tamakku apeqqutit assigiinngitsut piviusunik tunngavillit saneqqutiinnarneqarsinnaanngillat.
Siunnersuuteqartup ujartorpaa Naalakkersuisut nunaqarfinnut 100-t sinnerlugit aamma ataallugit inullinnut tunngatillugu ineriartortitsinissanut atatillugu qanoq isumaqarnersut.
Naalakkersuisut isumaqarput apeqqut taanna toqqaannartumik akineqarsinnaanngitsoq. Nuna-qarfinnut tunngatillugu qanoq inoqartigineq kisiat aallaavigalugu politikkeqartoqarsinnaanngilaq. Taamaaliorsinnaanissaq nangaanartoqaqaaq aammalu taamaaliortoqassagaluarpat nunaqarfiit annertuumik akisussaaffiiarneqassapput minnerunngitsumillu kommunet nammineersinnaatitaanerat annertuumik innarlerneqassalluni.
Kommunet tunngaviusumik nunaqarfimminnut akisussaasuupput, akisussaaffinnik nunaqarfinnut tunisisinnaaneq kommunalbestyrelsit tamakkiisumik apeqqusigassaanngitsumik kisimiillutik akisussaaffigaat.
Taamaattumik pingaartorujussuuvoq nunaqarfinni aqutsisut kommunalbestyrelsiminnut siunissaq eqqarsaatigalugu qanoq anguniagaqarnerlutik pilersaaruteqarnerlutillu namminneq apuussisarnissaat, soorlu aalisarnermut, piniarnermut, takornariaqarnermut, sanaluttarnernut kiisalu aamma atuarfiup iluarsartuuteqqinneranut il.il. siunissami anguniakkanut tunngasunik.
Tamakkununnga tunngatillugu Naalakkersuisut kommunellu ataatsimoorlutik pisussaaffeqarput nunaqarfinnut tunngatillugu politikkimik ataatsimoortumik sanassallutik, taassumalu nunaqarfiit peqatigalugit pivisunngortinnissaanut. Ukiuni qaangiuttuni tamatuma angunissaanut arlalinnik qanoq iliuuseqartoqareersimavoq. Ukiuni makkunani atuarfimmut tunngatillugu qanoq iliuutsinik nutaanik pilersitsisisoqalerpoq, attaveqaatit annertuumik pitsanngorsarneqarsimapput, illunik sullivinnik pilersitsiortortoqarsimavoq, il.il..
Aalajangiivissatut siunnersuut nunaqarfinnut tunngatillugu aalajangersimasumik politikkeqa-lernissamik imaqarpoq, tamanna uagut Naalakkersuisut tapersersornartipparput, soorlu oqaa-tigineqareersutut suliassap pimoorullugu ingerlanneqalernissaanut maannakkut qanoq iliuuseqarnialerpugut,
Taamatut oqaaseqarluta siunnersuut isumaqatigalugu oqaatigissavarput. Naalakkersuisullu siunertaraat tamanna pillugu suliat inernerannik Inatsisartunut 2002-mi saqqummiussaqarnissartik.
Simon Olsen, Siumup oqaaseqartua.
Siumumit oqaatigissavarput Naalakkersuisut nikinneranni nunaqarfinnut tunngasut inissisi-manerata saqquminerulernissaa iluarisimaaratsigu, ilaatigut pissutigalugu nunaqarfiit ineriartortinneqarnissaannut ataatsimiititaliap 1999-imit atuutilersup, ukiormanna oktoberip aallartisimalerneranut atatillugit suliassat ilisimaneqareersut ilaatigut suli anguneqarsimanngimmata, tamanna uggorilaanngitsuunnginnatsigu. Suleqatigiinnik ataavartussanik ataqatigiissaarisussanittaaq pilersitsinialerneq akuersaarparput.
Siumumit oqaatigissavarput 1990-ip tikinngitsiarneranit, aallartisimalerneranut nunaqarfip-paalussuit nioqqutissiorfinnik sanaartorfigineqarnerat angusatut pitsaasutut isigiuaratsigit. Naalakkersuisullu akissuteqaataanni pissutsit assigiinngitsut pissutaallutik ingerlatsiniarneq ajornartorsiutissartaqartarsimasoq miserratigineqarsinnaanngitsoq ilisimaarigatsigu.
Erseqqissaatigissavarput Siumup tungaanit qularutiginngilluinnaratsigu aalisakkat pingaartumik saarulliit takkusimaarnerulerpata iluaqutiginiarnissaat qanittunnguujuaannartussaasoq, tamaam-mat aserfallatsaalineqarnissaat isumagiugassaasoq ilisimasariaqarpoq.
Siumumit eqqaasitsissutigissavarput Inatsisartut qinersiviup maannakkut atuuttup siuliani naleqqussaanermut aningaasarpaalussuarnik atuimmata. Aammattaaq Nuka A/S-ip pilersinneqarneranut atatillugu qaleraleqarfinni marlunni, tassalu Avanersuarmi Tunumilu qaleralissiortornissaanik periarfissinneqarmat.
Imminut akilersinnaasumik ingerlatsinissamik piumasaqaateqarnermut atatillugu fabrikkit qaleraleqarfinniittut nunaqarfiit ilanngullugit Royal Greenlandimit ingerlanneqartussanngortitaapput imminut akilersinnaasumik ingerlasinnaasutut, qanoq ililluni pinerpoq, naliliiffigineqarsimammata.
Ilisimaneqartutut pissutsit sukkakuluttumik allanngoriataarput, nunaqarfinni niooqutissiorfiusut imminut akilersinnaannginnerarneqariataarlutik. Tamatuma kinguneraa soorunami nunaqarfim-miunit namminernit paasiuminaatsitsineqaqimmat taama sukkatigisumik matoorarneqalernerat, tamanna nunaqarfimmiunut pineqartunut eqquinerliungaatsiaqaaq.
Piffissami sivisukuluttumik taaneqarsinnaasumi nalornineq qaangeruminaatsoq piffinni eqqorneqartuni atuuppoq oqaluttualiatullusooq upperiuminaatsutut allaat oqaatigineqarsinnaalluni pisut ilungersunaruttormata.
Piffissamik ingerlareersimalersumi siunnerfiit nioqqutissiorfeqarnermut tunngatillugu allannguuteqarput, nunaqarfiit ilaanni nunaqarfimmiut namminneq peqataaffigisaannik ilaatigut avataanit peqataaffigineqartunik namminersuutigalugit ingerlanneqalersut aallartereersullu ilaqalerput.
Siumumit isumaqarpugut tamatumuuna malittareqqissaartariaqartut, sunnertiassusermi aamma paasineqareersimalersoq mianersuutassartaqarmat. Arajutsinaveersaarinissaq pinngitsoorneqarsinnaassanngilaq. Namminersorlutik aallartissimalersut aallartinissartullu iluatsilluarnissaannik kisssaappavut neriuutigaarpullu ikioqatigiinneruneq suli erseqqissiartornerulissasoq.
Naalakkersuisut isumaqatigaagut oqaatigimmassuk ukiuni qaangiuttuni piviusunngortinniagassanik arlaqaqisunik nunaqarfinni iliuuseqartoqartareernera oqaatigimmassuk. Soorlu Naalakkersuisut oqaatigigaat maanna kommuunit nammineerlutik aqutsineranni nunaqarfinni aqutsisut peqatigalugit nunaqarfiit ineriartornissaat akisussaaffigaat, tamanna pingaaqaaq ilumoortuullunilu.
Kommuunit ataatsimut qinersivinngorsimapput kommuuninilu qinigaasut taamaalillutik kommuuninut tamakkiisumik akisussaallutik. Qitiusumik Naalakkersuisut nunaqarfiit sullippai; atuarfeqarnermi, ilagiinni, peqqinnissaqarnermi, illussaqarniarnermi, inuussutissarsiornermi pilersugaanermilu.
Siumumit oqareernitsitut kommuunit nunaqarfinni pilersaarusiorneri aallaavigalugit naalak-kersuisut tamakkunani sulinerat ingerlateqqeqquarput.
Siumup nunaqarfinni isorliunerusunilu anguniagai pillugit aaqissuussaanikkuttaaq ingerla-sinermi annertuunik pilersaarusiorluagaasumillu ineriartortitsinissaq sulissutigineqartoq suli ingerlaavarpoq, soorlu allaffissornikkut ingerlatsinerup ataatsimoorfiusumik ingerlanneqalernissaa, selsskaabit pisortallu ingerlatsiviisa suleqatigiinnerulernissaat, qitiusumik ineriartortitsinerup qimanneqarnissaa, piffinni kommuunit suleqatiginerullugit aaqissuussinissaq, takornariaqarnikkut sanaluttarnerullu siuarsarneqarnissaa.
Aaamattaaq taaneqarsinnaapput nunaqarfiit peqatigiiffiat, angallanneq, tunisassiorneq, innaallagissiorfiit, imeqarfiit, utoqqaat illui, illut sulliviit, pisiniarfiit allallu taaneqarsinnaasut ilanngullugit.
Siumumit taamatut oqaaseqarluta siunnersuut oqaaseqarfigaarput isumaqarpugut nunaqarfinni ineriartortitsineq oqaatiginiarneqartarnermisut tassalu nunaqarfinni naammaginartumik ineriar-tortitsisoqanngitsoq taamatut oqaatiginnittarneq pissusissamisoortuunngitsoq.
Godmand Jensen, Atassutip oqaaseqartua.
Inatsisartunut ilaasortap Mads-Peter Grønvoldip siunnersuutigaa nunatsinni nunaqarfiit ineriartortinneqarnerat pillugu, nunaqarfiillu pilersaarusiorfigineqarnissaannik naalakkersuinikkut aalajangiisoqarnissaa anguneqartariaqartoq.
Atassummiit isumaqarpugut siunnersuuteqartup siunnersuuteqarnermini siunertarisaa, tassalu nunaqarfinnut siunnerfeqartumik pilersaarusiortarnissaq isumaqatigigatsigu pingaartumik pilersaarusiorneq inuutissarsiornermut tunngassuteqarsimappat.
Taamaakkaluartoq Atassummiit isumaqarpugut tamakkiinerusumik pilersaarusiorneq ullumikkut Nunaqarfinni Aqutsisut, aammalu kommunalbestyrelsit akisussaaffigigaat tamannalu pissusissamisoortuusoq.
Atassummiit oqaatigissavarput nunaqarfiit inuutissarsiornikkut nakkaakkiartuinnarnerat ullumikkullu isigisarput akuerisinnaanngilluinnaratsigu. Nunaqarfiillu periarfissaqarnertik aallaavigalugu avataaniit suleqateqarlutik piginneqatigiinnikkut pilersaarusiornermi, aammalu eqqarsaatigineqartunut ilaatinneqartariaqartutut isumaqarfigigatsigit.
Atassummiit ilanngullugu oqaatigiuarparput, Nunaqarfiit pillugit ataatsimiititaliaq nunaqarfiit pillugit ataatsimiititaliaq nunaqarfiit pillugit suliniuteqarnermi qitiutinneqartussatut takorloortagarput, ullumikkut sumiinnersoq takusinnaanginnatsigu, qinigaaffimmimi matumani ataatsimiitinneqarsimanngimmat.
Atassummiit siunnersuuteqartoq isumaqatigaarput siunnersuuteqarnermini siunertarimmagu nunaqarfiit pillugit pilersaarusiornermi ataatsimoorfissaqarnerusumik siunissarlu ungasinnerusoq eqqarsaatigalugu pilersitsiniarnermi naalakkersuinermi qulliunerusunit peqataaffigineqartumik, pilersinniakkat pilersaarusiorneqartariaqartut, aammalu ilaatigut aningaasartai eqqarsaatigineqarlutik.
Siunnersuuteqartup siunnersuuteqarnermini ilaatigut sammivai nunaqarfiit inummikkut agguataarneri aallaavigalugit nalilersuiffigineqarniarnersut. Apeqqutit tamakkua immikkut Naalakkersuisunut sammitinneqarmata, annertunerusumik oqaaseqarfiginagit, Atassummiit Naalakkersuisut akissuteqaataat tusaatissatut tigussavarput.
Atassummiit ilanngullugu maluginiarparput Naalakkersuisut pingaartikkaat nunaqarfiit pillugit aalajangersimasumik politikkeqalernissaq saqqummiunneqartoq, tamannalu tunngavigalugu paasissutissanik katersinissaq, suliallu qanoq inerneqarsimaneranik Inatsisartunut 2002-mi saqqummiussaqarnissaq neriorsuutigineqarluni.
Tamannalu Atassummiit pissanganartutut nalilerparput, naggataatigullu siunnersuuteqartup siunnersuutaa tunngaviatigut taperserparput, oqaluuserisassallu aappassaaneerneqannginnermini, ataatsimiititaliamit susassaqartumit, sammineqarnissaa innersuussutigaarput.
Paninnguaq Olsen, Inuit Ataqatigiit oqaaseqartuat:
Kalaallit Nunaanni Nunaqarfiit pillugit naalakkersuinikkut suliniutissanik aalajangersimasunik Inatsisartut aalajangiinissaannik Mads-Peter Grønvoldip siunnersuutaa Inuit Ataqatigiit ima oqaaseqarfigissavarput:
Inuit Ataqatigiit pingaaruteqarluinnartutut isigisarput tassaavoq: nunarput namminiilivissappat kommunit taakkualu nunaqarfii nammineernerullutik ingerlassasut.
Inuit Ataqatigiit nunatta isorartuup nunaqarfippassualliillu naalakkersuinikkut suliniutissanik aalajangersaanissami peqataalluarumanerput oqaatigissavarput, ilutigitilluguli ilisimaqqussavarput nunaqarfiit nammineerlutik kommunitik aqqutigalugit nunaqarfimminnut pilersaaruteqarnerat ataqqisariaqarmat, taakkummatami sumiiffimminni inuussutissarsiutit suut aallavigalugit ineriartortitsinissamut periarfissanik ilisimaarinninnerpaat.
Pingaaruteqarluinnartuuvoq nunaqarfiit inuussutissarsiutit ineriartortitatik aammalu ineriartortissinnaasatik aallaavigalugit kommuni peqatigalugit nammineq iliuuseqarnikkut ingerlaqqinnissaat. Tamannalu anguneqarsinnaavoq assigiinngitsutigut suliniuteqarnermi, aammalu nunaqarfiit nammineerusussusaannik nukittorsaanermi.
Ilisimasatsitut kommunit inuussutissarsiutini aningaasaleeqataasinnaanissaat pillugu Inatsisartut inatsisaatigut nr. 22, 3. november 1994-imeersukkut pilersaarutinut, suliffinnut imaluunniit suliffeqarfinnut inuussutissarsiornermik siunertaqartunut aningaasaliisinnaaneq pisinnaavoq.
Inuit Ataqatigiit paaserusussavarput inatsisip tamatuma ilaatigut nunaqarfinni ullumikkumut qanoq atorluarneqarsimatiginera.
Illuatungaatigut apeqqutigerusussavarput inatsimmi pineqartumi tassanissaaq § 3 killiliimmat kommunit pilersaarutinut, suliffinnut imaluunniit suliffeqarfinnut aningaasaliisinnaatitaannginnerat sumut killeqassanersoq, tassanimi pineqarmat taamatut aningaasaliineq suliffinnut pioreersunut unammilleqatigiinnikkut equngalersitsisinnaammat.
Tamannali ullumikkumut Naalakkersuisut anguniagaannut, tassalu suliffeqarfiit unammilleqatigiinnikkut ineriartornissaminnut periarfissaasa nukittorsarneqarnissaannut, aqqutissatut pitsaasutut taaguinermi naleqquttuunerpa, inatsillu nalilersortariaqalersimannginnerluni, nunaqarfinni inuussutissarsiutinik siuarsaaniarnermi akimmiffiuinnalersimasoq?
Inuit Ataqatigiit isumaqarpugut maanna aalajangiisimaneq tamanna pillugu allannguisoqartariaqartoq, innuttaasut pingaartumillu nunaqarfimmiut suliffinnik pioreersunik ilaatigullu uningaannartunik tigusiartuaartinneqarnissaanni kommunit qularnaveeqqusiisinnaanerat periarfissaasariaqarmat. Tamatumanimi pingaaruteqarluinnarpoq nunaqarfimmiut eqeersimaartut nammineerusuttullu, aammalu nunaqarfimminni inuussutissarsiornikkut ingerlatsiviusinnaasunik ilisimaarinnittut namminneerlutik ingerlatsinissaminnut periarfissinneqarnissaat.
Inuit Ataqatigiit isumaqarpugut nunaqarfiit imaluunniit nunaqqatigiit tunisassiorfinnik tigusisinnaasut tigusinissaminnut periarfissinneqartariaqartut, tassungali malitsigitillugu tuniniaasinnaanermut sulisut pikkorissut pisariaqartinneqartussaassammata, tunisassiorfinnik tigusinissamut soqutiginnittut pikkorissartinneqartarnissaat pisortat sulissutigisariaqarpaat, tamannalu ataqatigiissaarinikkut pitsaasumik ingerlanneqarsinnaasoq Inuit Ataqatigiit takorloorparput.
Inuiaqatigiit ineriartornitsinni akisussaaqataalluta inooqataassagutta periarfissatta suunerinik qaammarsaavigineqartariaqarpugut, aammalu soqutigisatta sammiviinut tunngasutigut ilinniartitaaneq annertunerusariaqarpoq, taamaaliornikkummi ingerlatseqataajumaneq annertusarneqartussaammat.
Ilisimasatsitut nunaqarfinni 60-it sinneqartuni nunaqarfiit 10-it missaaanniittut Nunaqarfimminni Aqutsinermut akisussaaffeqartinneqarput.
Inuit Ataqatigiit isumaqarpugut Nunaqarfinni Aqutsisut kommuniminnit ullumikkornit annerusumik akisussaaffimmik tunineqartariaqartut, taamaaliornikkut Nunaqarfinni Aqutsisut inuussutissarsiutinik siuarsaaniarnerminni ilisimasaminnik ilungersuutiginninnerat atorluarneqassammat aammalu allanik suleqatissarsiornissaminnut periarfissaat annerulissammata, tassami nunaqarfinni aqutsisut nunaqarfimminni inuussutissarsiutinik ineriartortitsiniarnerminni aqqutissaminnik atorluaasinnaanerat kommuninit akimmisimatinneqartariaqanngilaq, kommunillu akisussaaffimmik tunniussinissaminnut tatiginninnerullutillu piumassuseqarnerusariaqarput.
Inuit Ataqatigiit isumaqarpugut nunaqarfinni inuussutissarsiutitigut ineriartortitsinerit assigiinngitsut, tunisassioriaatsit, takornariaqarneq, pisuussutinik atorluaaneq allarpassuillu nunaqarfimmiut namminneq peqataarusussusaat aallaavigalugu ineriartortinneqarsinnaasut, - ilaatigut Sulisa A/S-ip, Greenland Tourism A/S-ip aammalu NuKa A/S-ip suleqatiginerisigut periarfissat suunerinik naalakkersuisut takujuminarsakkanik naqitaliortitsinermikkut aammalu aqqutissanik tikkuussisunik qaammarsaaniutinik suliaqartitsinerminermikkut.
Eqqaamaqqussavarpulli Namminersornerullutik Oqartussat nalilersuisariaqarmata kommunini assigiinngitsuni tunisassianik assigisaannilu soqarnersoq, tamarmik assigiiaanik tunisassiulinnginnissaat pinaveersimatinniarlugu.
Inuit Ataqatigiit iluarisimaakkatsinnik ullumikkut nunaqarfinni allaffimmiut nunaqarfinni aqutsisut peqataaffigisinnaasaannik nunaqarfinni niuertut ilinniartinneqarnerannut ilaasumik aningaasanik aqutsinermut ingerlatsinerup annerusumik nunaqarfimmiunik tigujartuaartinneqarsinnaanerat siunertaralugu pikkorissaanerit nutaat aallartissimalerput. Tamanna nunaqarfinni aqutsisut akisussaaaffinnik annerusumik tigusiartuaarnissaannut aqqutissatut pitsaasutut neriulluarnartutullu Inuit Ataqatigiit isumaqafigaarput, aammalu ingerlasimalernerup kingorna nalilersueqatigiittarnissaq pisariaqartutut isigalutigu.
Naggataatigut Inuit Ataqatigiinniit inassutigissavarput nunaqarfinni tamani inuussutissarsiornikkut periarfissat suunerinik misissuisitsisoqartariaqartoq, taamaaliornikkut nunaqarfinni ataasiakkaani inuussutissarsiornikkut siuarsaataasinnaasunik naliliisinnaaneq ersarinnerulerlunilu ajornannginnerulissammat, taamalu anguniagassaliornermi alloriaqqinnissamut sakkussanik tunngaviliiniarnermi periarfissat suunerinik ersarinnerulersitsisoqassalluni.
Inuit Ataqatigiit taamatut oqaaseqarluta Mads-Peter Grønvoldip Kalaallit Nunaanni nunaqarfiit pillugit naalakkersuinnikkut suliniutissanik aalajangersimasunik Inatsisartut aalajangiinissaannik siunnersuutaanut atatillugu Naalakkersuisut suliassamik pimoorussillutik iliuuseqarnialernerat taperserparput.
Anthon Frederiksen, Kattusseqatigiit oqaaseqartuat.
Inatsisartuni ilaasortap Mads-Peter Grønvoldip siunnersuutaa nunaqarfiit pillugit ersarissumik naalakkersuinikkut siunnerfeqartariaqarneq pillugu aalajangiiffigisasstut siunnersuutaa Kattusseqatigiinniit imaattumik oqaaseqarfigissavarput:
Inatsisartuni ilaasortaq Mads-Peter Grønvold piumasaqarpoq nunaqarfiit ineriartortinneqarnissaat pillugit annerusumik naalakkersuinikkut siunnerfeqartoqartariaqartoq. Tamanna Kattusseqaatigiinniit taperserparput. Tassami ukiuni kingullerni nunaqarfippassuit ilai aamma ilaatigut inuutissarsiornikkut annerusumik minnerusumilluunniit unittoorsimasutut oqaatigineqartariaqarmata.
Tamanna ajoraluartumik ilaatigut inuutissarsiornikkut periarfissalunneq imaluunniit eqqornerusumik oqaatigalugu nunaqarfinni aalisakkanut aammalu piniakkanut assigiinngitsunut tunitsivissaqartitaannginneq pissutaaqataallutik nunaqarfiit ilarpassuini inuutissarsiornerup pitsaasumik ingerlanneqarsinnaagaluarnera uninngatinneqarmat.
Siunnersuuteqartup aamma piumasaraa Naalakkersuisut piumaffigineqartariaqartut nunaqarfiit pillugit ukiunut aggersunut pilersaarusiortoqartariaqartoq.
Kattusseqatigiinni ilisimavarput nuna tamakkerlugu pilersaarusiorneq Naalakkersuisut akisusaafigalugulu ingerlakkaat kisianni aamma nalunngilarput ilaatigut Komminini Iluarsaaqqinneq pillugu Ataasimiititaliap inassutaanut ilaasoq kommunit nammineersinnaatitaanerisa annertusarneqarnissaat. Tamakkorpiaallu aamma pissutaallutik ullumikkut kommunalbestyrelsit nunaqarfinnilu aqutsisut pillugit inatsisit naleqqussarneqarsimasut. Taamaammat Kattusseqatigiinniit nuannaarutigalugu maluginiarparput Naalakkersuisut akissuteqarnerminni ilaatigut KANUKOKA Nunaqarfiillu Peqatigiiffiata siulersuisuisa isumasioqatigiinnissaat siunniussimagaat.
Kattusseqatigiinniit isumaqarpugut kaammattuutigissallugu nunaqarfiit tamarmik peqataatinneqarnissaat pisariaqartoq pissusissamisuussasoq.
Siunnersuuteqartup aamma nunaqarfiit 100-t inorlugit 100-llu sinnerlugit inullit qanoq siunissami pineqarnissaat apeqqutigvaa. Kattusseqatigiinni isumaqarpugut nunaqarfik tassaasoq inoqarfik aalisarnikkut, piniarnikkut niuernikkullu qangaaniilli ingerlatsiviusoq, qanoq inuttutigineq inukitsiginerluunniit apeqqutaatinnagu nunaqarfittut isigineqartuartariaqartoq. Aammalu isumaqarpugut siunnersuuteqartup tamanna nalunngilluinnaraa, kisianni inuutissarsiornikkut periarfissat qanoq ittuuneri matumani annerusumik ersarinnerusumillu paaserusullugit taamatut apeqquteqartoq, kisianni tamakkua pillugit annerusumik akissuteqarfigineqarani.
Kattusseqatigiinni ajorinngilarput Naalakkersuisut Inatsisartut upernaamut ataatsimiinnissaannut saqqummiussaqarniarlutik neriorsuuteqarnerat, taamanikkumut qularnanngilaq paasissutissat amerlanerusut pissarsiarineqarsinnaassasut.
Taamatut oqaaseqarluta siunnesuut Naalakkersuisullu akissuteqaataat akuersaarlugit tusaatissatut tiguavut.
Otto Steenholdt, attaviitsoq:
Isumaqarpunga siunnersuut soqutiginartuusoq, taamami nunatta sineriassuani nunaqarfiit amerlalluinartigisut pillugit aalajangersimakannersumik periuseqarluni ingerlatsisariaqarneq pisariaqalermat.
Ilumoorpoq nunaqarfinni najugaqartunut kipiluttunarsilluinnarsinnaammat ersarissumik oqarfigineqarsinnaanngikkaani nunaqarfik najugaq qanorpiaq atugassaqartinneqarnersoq.
Taamatut nalornilernerit pissutaarpiarlutik nunaqarfik arriitsumik sukkasuumilluunniit inuerukkiartulersarpoq, pingaartumik inuutissarsiorneq atuartitaanerluunniit naammaginanngitsumik ingerlaleraanngata. Nunaqarfiit taama amerlatigisut tamarmik assigiimmik ineriartortinneqarsinnaanngillat, ilaqartuassapput inikilligaluttuinnartunik, tamannalu tamatigut ersiutaasarpoq, allaat tassani nunaqarsimagalugit pitsaanerusorisaminnut nutsilersarnerannik, tamanna lu inuit namminneq nunaminni sumiluunniit inississinnaannerannut naapertuuppoq, nutsernipilorujussuit, tassa ilaatigut illoqarfimmut aalajangersimasumik aqunneqarsinnaatikkarlarlugit.
Tassunga ilannguttariaqassavara aqunneqarsinnaajunnaartutut isikkulinnut nuukkaluarlutik ilaquttaminni amerlasoorsuanngorlutik najugaqartariaqalersarnerat taakkununnga allatut ajornartumik nuutariaqalersimasunut nunannersuinnaannavianngimmat.
Nunaqarfimmiut periarfissaat erseqqissiartortut iluarisimaartariaqarput. Nunaqarfinni aqutsisut kommuni suleqatigalugu nalilersuilluartariaqarput qitornat alliartortut ilinniartitaanermikkut, peqqinnissakkut suliffissuaqarnikkullu nunaqarfimmi qulakkeerunneqarsimanersut.
Iluarisimaarpara nunaqarfimmiut pisortanit utaqqiinnaratik aamma namminneq siunnesuuteqarsinnaammata, kommuni uparuussorlugu, nunaqarfimmi susoqarsinnaanersoq. Isumaqarpunga utaqqiinnarani qanoq nunaqarfimmi iliuuseqarniartarnerit pisortanit isiginiarneqarnerusariaqartut.
Isumasioqatigiissitsinissaq Naalakkersuisup pilersaarutaa isumalluaammernartuuvoq, tassa kommunit kattuffianniit taavalu nunaqarfiullu peqatigiiffiata siulersuisuinik.
Tunitsiveqarniarnerup iluarssiivigineqartarnera akissuteqaammi taaneqarpoq, tunitsiviilli ilaatigut pisoqalisimaneri aamma taakkarsorneqarneqarlutik. Tunisassiaasinnaasut naammattut nunaqarfiup eqqaaniippata, tunisassiorfiup pisoqalisimanera aningaasarpassuilluunniit aatsaat atorlugit aaqqissuuneqartariaqarnera uniffiginagu allaat nutaamik tunisassiorfiliorsinnaaneq eqqarsaatini salliutittariaqarpoq, soorunami NuKa A/S-imik taaneqartartoq aamma suleqatigalugu.
Nunaqarfinnik ineriartortitsiniarnermi kommunip akisussaaffeqarnerqa tikkuartortuartariaqarpoq, kommunip nammineq nunaqarfittaminik nalilersuinera tusaaniarluartariaqarpoq, pingaartumik nunaqarfimmiut namminneerlutik suliniuteqarluarnermikkut suna nunaqarfimminni allartinneqarsinnaanersoq ilungersuullugu suliniutigisimappassuk.
Nunaqarfik 100-t sinnerlugit inorlugilluunniit inoqarpat, tamanna kisimi aallaavigalugu politikeqartoqarsinnaanngitsoq Naalakkersuisut naliliipput. Apeqquterujussuuvoq nunaqarfimmiut suliffik suna allartikkumasinnaaneraat, immaqa inunnik sulisinnaasuk naammattunik suliffik piumasalik aallartikkumariallarpassuk, taamaattoqartillugu aamma aalajangiiniarnermi nunaqarfiup sulisinnaasunik amerlasuunik inoqarnera aallaaviulluarsinnaammat.
Tamakkuli tamaasa isigimallugit nunaqarfinnut politikeqarnissamik oqallinermi eqqaamaneqartuartariaqartut arlaliupput, tamakku ataasiakkaarlugit taagornagit oqaatigisariaqarmat, angajoqqaat alliartortunik qitornallit allatut ajornartumik aalajangiisariaqartalissammata qitornat alliartortut ilisimasatigut illoqarfimmiunut angummallutik ineriartussappata piffiit allat pisariaqarluinnartunut tamakkununnga inerisaavillit orninniaanartariaqalertarmata.
Nunatsinni aningaasaqarniarnerup pitsanngoriartunngitsup nunaqarfiit inerikkiartornissaat pakkersimaartuassavaa, aningaasallu nalilersuilluaqqaarluni aatsaat atugassat pineqaleraangata ilimanarluinnarpoq nunaqarfiit tamatigut salliutinneqarnavianngitsut, tamanna nunaqarfimmiunulluunniit aalajangersimasumik politikeqaraluaraanniluunnit ilimagisariaqarpoq.
Siunnersuummi Naalakkersuisunit ilassilluarneqarmat neriuutigiinnassavarput nunaqarfiit siunissaminnik nalornivallaarunnaarlutik ingerlaasseqalissasut.
Mads-Peter Grønvold, Kattusseqatigiit.
Iluarisimaarpara
taamatut partiinit akissuteqarfigineqarnera. Naalakkersuisup akissutaanut
soorunami aamma qujavunga. Taamatut siunnersuuteqarnikkut stunngavigaara
nunaqarfiit ineriartortinneqarnerata ukiuni kingullerni
pitsanngorsarneqarsinnanera ujartorneqartariaqartoq isumaqarama, tassami
qinigaaffimmi nutaamiit uani 1999-imi qinigaaffimmiit ukiut tamaasa
nammineerlunga Inatsisartuni ilaasortatut nunaqarfiit amerlanerpaat
tikissinnaaneri soqutigisarisimavakka, ukiullu tamaasa maannamut nammineq
angallatiga atorlugu nunaqarfiit ornittarsimallugit, nunaqarfiit asuli
aqqusaaginnarnagit, nunaqarfinni aqutsisut ataatsimeeqatigalugit
kingusinnerusukkut nunaqarfinni innuttaasut ataatsimeeqatigalugit.
Taamatut
ataatsimeeqatigittarnima kingunerai oqaluuserisassanik Inatsisartuni
saqqummiussisarnera. Taakkua oqaloqatigisarsimasuunngikkukkit, taama ittunik
oqaluuserisassanngortitsisarunnanngikkaluarpunga Inatsisartuni. Taakkua
piumassuseqartilersimavaanga Inatsisartuni siunnersuuteqartariaqarlunga
nunaqarfiit pillugit ingerlatsineq ineriartortitsinerlu pillugu
aqqutissiuinissamik saqqummiinissannut siunnersuuteqarnissannullu.
Taamaattumik
qutsavigissavakka nunaqarfinni innuttaasut tikissimasakka
ilassilluartarsimammannga, taamatut sulinissaq pisariaqartarpoq
immersorluarneqaraanni, tassami Inatsisartuni qinigaavugut innuttaasunik
sullississalluta sapinngisamillu Inatsisartuni qinigaasimagutta innuttaasut
tikillugit ataatsimeeqatigisarnissaat isumasiortarnissaat pisariaqarluinnarpoq.
Taanna neriuutigaara atorluarneqartalerumaartoq Inatsisartuni ilaasortanit
aamma allanit, tassami pineqartut tikittakkama pisariaqartillugu
oqaatigisarpaat Inatsisartuni ilaasortat allat kajumissaartariaqarikka aamma
namminneq ornigullutik ataatsimiititsisarnissaat piumasarimmassuk, tassami
ukiuni kingullerni Inatsisartuni Nunaqarfinnut Ataatsimiititaliat
ingerlanneqarsimapput aammalu taakkua nunaqarfinni Inatsisartuni
ataatsimiititaliat ataani Nunaqarfinnut Ataatsimiititaliaq pisussaavoq,
pisussaaffeqarput nunaqarfiit pillugit annerusumik suliniutinik
assigiingitsunik suliaqarnissamik.
Aamma
nalunngilara Inatsisartuni maannakkut ilaasortaq qanittukkullu
Naalakkersuisuni ilaasortanngornikoq, Nunaqarfinnut Naalakkersuisunngortoq
neriorsuilluarnikuusoq pineqartut pillugit taassuma sullissinissaminut aammalu
taanna oqaaseq tusarakku taamanikkut qilanaarisimavara Inatsisartuni
siunnersuummik arlaatigut pitsanngorsaataasinnaasumik tamakkununnga
saqqummiussaqarnissaa.
Kisiannili
pakatsissutigisimavara, taamatut saqqumisimanngimmat aatsaallu
Naalakkersuisunngornikkut tamakkua suliutigineqalermata pakatsissutigalugit,
tassami imaanngilaq Inatsisartuni ilaasortaaganni aatsaat
Naalakkersuisunngoraanni suliniutit taamaatut aallartinneqartassasut. Taanna
pakatsissutigisimavara.
Taamaattumik
annerusumik una kommuunit aningaasarsiornerat qiviaraanni, ingammik kommuunit
annertuumik aningaasarsiorfeqanngitsut periarfissaqarneq ajorput nunaqarfiit
periorsarnissaannut aningaasarpassuaateqannginnamik, taamaammat una
nunaqarfiit amerlasoorpassuit ineriartornissaraluat unittoortinneqartartoq
kommuunit aningaasaqarnerat apeqqutaalluinnartarmat.
Taamaattumik
piffiit ilaanni pisariaqarluinnartarpoq immaqaluunniit piffinni tamani
nunaqarfinnik ineriartortsissagaanni pisortat peqataasariaqarnerat. Pisortat
peqataanngippata aningaasartuutit taamak annertutigisut periosaassagaanni
tunisassiorfinnik allanillu kommuunit akissaqanngillat. Pisortat pisussaaffii
nalunngilagut qanoq ittuusut. Innaallagissiorfiit imeqarfiit allallu
nalunngilagut kommuunit tamakku pisussaaffiginngikkaat. Pisortat
isumagisassarivaat tassa tamakkua. Tassa periorsaaniarluni
ajornartorsiutaasartut tamakkua pinngitsoortinniarlugit qaninnerusumik
suleqateqarsinnaaneq taanna ujartornerullugu suliniutillu
aallartinneqarnissaat anguniarlugit taamatut siunnersuuteqarpunga.
Kisiannili
qujassutigaara, aappassaanik qujassutigaara taamatut suliniutinik
aallartitsiniartoqalermat. Inatsisartuni ilaasortaasimasup
Naalakkersuisunngornerata kingorna. Taanna qujanaqaaq. Assorujussuaq
qujanarpoq, qujanarpoq Naalakkersuisunngorsimagavit. Imaallaat suliassat
aallartinnialersimapput. Taanna amigaatigisimavara. Nalunngitsuugukku taamatut
aallartitsiniartoqartoq immaqa siunnersuuteqarsimanissara
pinngitsoorsimassagaluarpoq, kisianni tikittakkama pisariaqartimmassuk
oqaramik, taamatut suliniartoqartariaqarpoq, suliassamik taamaattumik
saqqummiussisariaqarputit, allatut ajornartumik saqqummiussisimavunga
sullittariaqaratsigit taamaattut nunaqarfinni najugaqartut tamakkua.
Oqariartuutaat aamma soorunami ingerlanneqartariaqarmata.
Aammalu
ataasiarnanga Naalakkersuisunut allagaqartarsimavunga, soorlu kingullermik
angalagama, Uummannap, Upernaviullu kommuuneqarfii, nunaqarfii
tamakkingajavillugit ataatsimiititsiffigigakkit quppernerit qulit sinnerlugit,
quliugunarput, Naalakkersuisunut apeqquteqaatitut ingerlatissimavakka
ataatsimiititsereernerma kinguneranik. Ajoraluartumilli ataasiinnarmik
akineqarsimavunga Naalakkersuisumik, taanna ajuusaarnarpoq Inatsisartunut
ilaasortaalluni.
Atuartitaanermut,
Ilinniartitaanermut Ilageeqarnermullu Naalakkersuisup
akissuteqarfigisimavaanga, taanna qujassutigaara assut. Isumaqarpunga
Inatsisartuni ilaasortat taamatut sullinneqartariaqartut Naalakkersuisunit.
Apeqquteqaraanni imaluunniit ingerlatitseqqikkaanni akineqarnissaq taanna
pingaaruteqarluinnarpoq. Asuliinnaq angalaneq ajorpugut. Angalaneq piffissami
annertuumik tigusisarpoq.
Ole
Lynge, Inatsisartut
Siulittaasuat, Inuit Ataqatigiit.
Mads-Peter
Grønvold, utoqqatserpunga killilernianngikkaluarlugu, kisianni oqaluuserisaq
qimattuuleratsigu uumap qulequtaa qimannaveersaalaassavarput.
Mads-Peter Grønvold, Kattusseqatigiit.
Ajunngilaq qujassutigaara taamatut partiit akissuteqarnerat aammalu suliniutissanik qaammatinik aggertuni saqqummiussisoqartussaammat, taanna qujassutigaara. Neriussaanga nunaqarfimmi atuakkat pitsannguumitinneqarumaartut aammalu iluarsiniarneqarumaartut.
Ole
Lynge, Inatsisartut
Siulittaasuat, Inuit Ataqatigiit.
Qujanaq.
Taava Aalisarnermut, Piniarnermut Nunaqarfinnullu Naalakkersuisoq.
Hans
Enoksen, Aalisarnermut,
Piniarnermut Nunaqarfinnullu Naalakkersuisoq, Siumut.
Qujanaq.
Tassa nunaqarfinnut tunngatillugu naalakkersuisnikkut
siunnerfeqalersinnaanissaq pillugu aalajangiiffigisassatut siunnersuuteqartup,
Mads-Peter Grønvold saqqummiussaa tunngavigalugu partiit oqaaseqaataat uani
oqaaseqarfigillatsiassavakka.
Siullermik
Siumuminngaanniit oqaatigineqartut. Nuannaarutigaara Siumup ersarissarmagu
nunaqarfinni politikki ukiorpassuarni aamma illersortarsimasani ilaatigut
aamma oqitsuinnaanngitsunik misigisaqartarfini, allaat ilaanni
apeqqusersorneqartartoq ilumut pisariaqarnersoq aningaasanik taamak
amerlatigisunik atuilluni nunaqarfiit ineriartortinneqassanersut.
Nalorninngilluinnarluni siunissami aamma taanna naqissuseqqimmagu massakkut.
Soorunami
imminut akilersinnaasumik ingerlatsinissaq tamatta soqutigisarivarput,
kisiannili aamma nassuerutigisariaqarparput tamarmik imminut akilersinnaasumik
massakkut nunaqarfiit amerlanerpaat ingersinnaanngimmata, kisiannili aamma
innuttaasutullu allatut periarfissinneqartariaqarput nunami maani
innuttaaqataasutut ajunngitsorsiassanik allanik atueqataanissaminnut.
Tassami
Siumup uani oqaatigaa sanaartornerit ingerlanneqartarsimasut aamma taanna
nunaqarfimmiut annertuumik iluarisimaartarparput, naak partiit
ilaaninngaanniit apeqqusersorneqataraluartoq aningaasanik atuinerit allallu
eqqarsaatigalugit. Atugarissaarnerulersimaqaagut
namminersornerulernerup kingornatigut. Tunisassiorneq naak massakkut ilaatigut
annertuumik tusialluni ingerlagaluartoq. Tunisassiorfitsigut
pitsanngorsaanerit aamma annertuumik ingerlanneqarsimapput, kisianni aamma
miserratigissanngilarput amerlasuut matoorarneqarsimapput, taannalu aamma
massakkut allanngortinniarlugu suliniarnerit aallartinneqareerput.
Utoqqaat illui, illut sulliviit, nakorsiartarfiit, timersortarfeeqqat,
atuarfiit pitsanngorsarneri, nutaanik atuarfiliornerit, oqaluffiit
allarpassuillu ingerlanneqarsimasut Siumumiit oqaatigineqartut assut
iluarisimaarpakka. Aammalu uani tikkuagai siunissami anguniarneqartariaqartut,
tassalu kommuunit nunaqarfinni pilersaarusiornerit aallaavigalugit
ingerlatsinissaq assut taanna iluarisimaarpara. Tassami malunnarmat
Inatsisartuni oqallittarnerni qitiusuminngaanniik aqutsineq annertuumik
ilaatigut siunnerfigalugu ingerlasartoq qimakkusunneqartoq Siumup oqaatigisaa
taanna isumaqatigilluinnaqqissaarpara isumaqarama piffinni aqutsineq
nuunneqarpat ullumikkut nunaqarfippassuit pitsaanerungaatumik ingerlasinnaasut
aamma uppernarsaatissaqarpugut arlalinnik massakkumut.
Taavalu aamma taassuma saniatigut Siumup tikkuartugai aaqqissuussaanikkut
ingerlatsinerit annertuumik pilersaarusiorluagaasumillu
ineriartortinneqartariaqartut, soorlu maassakkut nunaqarfiit qiviariarutsigit,
allaffissorneq qiviarutsigu ajoraluartumik tamarmik immikkut ingerlatsiviit,
selskab-it qiviarutsigit tamarmik immikkut allaffissornikkut sullinneqarput
nunaqarfimmi qanorluunniit inukitsigigaluartumi. Taanna
akuersaarneqarsinnaanngilaq. Taamaammat Siumumiit tikkuarneqartoq taanna assut
tapersersorpara, tassalu allaffissornikkut ingerlatsinerup ataatsimoorfiusumik
ingerlanneqalernissaa periarfissarsiunneqartariaqartoq. Taanna aamma
Naalakkersuisuninngaanniik annertuumik tapersersorlugu alloriarnissamik
periarfissanik aqqutissiuussissaagut, tassami ilumoorsinnaanngilaq nunaqarfiit
ilaatigut 100 missaannaanik inullit selskabit tamarmik ingerlatsillutik
allaffissornerat, taanna inuiaqatigiinniit isumaqarpunga
akuerineqarsinnaanngitsoq allanngortinneqartariaqartorlu. Siumullu
ersarissumik tikkuagaa taanna ingerlaqqissasoq neriorsuutigissavara.
Taavalu aamma qitiusumik ineriartortitsinera qimanneqarnissaannik
tikkuussinera nuannaarutigaara, taamaallilluni nunaqarfimmiut namminneq
pitsaasumik pilersaarusiorlutillu ineriartornissaminnut
peqataatinneqalernissaaaqqutissiuunneqartussanngormat.
Nunaqarfinni massakkut annertuumik ajornartorsiutigineqarpoq
tunisassiorfiilluunniit qiviarutsigit ingerlatserusukkaluartut annertuumik
killilersorneqarput selskab-it naalaganngorsimanerat pissutigalugu.
Isumaqarpunga taakku qimanneqartariaqartut.
Selskabinut tapiissutigut amerlasuut, NuKa A/S qiviarutsigu,
amerlasoorpassuit ajoraluartumik qitiusumik allaffissornermut atorneqarput
nunaqarfinni tunisassiornermut nukittorsaanermut atorneqartussaagaluit. Taanna
allanngortinneqartariaqarpoq. Qitiusumik ingerlatsivallaarnerup kingorngi
tamakku nunaqarfinnut siuarsaanissamut atugassaagaluartut allaffissornermut
nuunneqartarnerat aamma malersorneqarlunilu allanngortinneqartariaqarpoq.
Tassami sullissagut inuit allaffissornerinnakkut sullikkaluarutsigit sumut
iluaqutaassava inuutissarsiornikkut periarfissaat killilersorlugit.
Taavalu aamma Siumuminngaanniit oqaatigineqartoq kommuunit
suleqatiginerullugit aaqqissuussinissaq ilumoorpoq, taanna
saneqqunneqarsinnaangilaq avaqqunneqarsinnaananilu. Taamaammat Kommuunit
Kattuffiat nunaqarfimmiullu peqatigiiffiat tassani isumasioqatigiissinnissaat
sap. akunnerata naanerani ingerlassusaq qilanaarlunga peqataaffigissavara,
neriullunga siunissami pitsaanerusumik alloriaqqinnissatsinnut aqqutissamik
tikkuussisinnaassalluta. Tassami massakkut ilaatigut nunaqarfimmiut
peqatigiiffiat annertuumik suleqatigineqaraluartoq aamma
suleqatigiinniarnerput ilaatigut killeqartoq nassuerutigissavarput.
Aammalu nunaqarfimmiut kaammattorusussavakka nunaqarfimmiut
peqatigiiffiannut ilaasortanngoqqullugit, massakkumut suli ilaasortaanngitsut
amerlasuut isumaqarama ataatsimut kattussuunnikkut pitsaanerusumik
sullinneqarnissartik aatsaat angusinnaagaat, tassami ataasiukkaaginnarluni
naammagittaalliortarnerit ajoraluartumik annerusumik kinguneqarneq ajortut
taakku qimanneqartariaqarmata
Taavalu aamma takornariaqarnikkut sanaluttarnerullu siuarsarneqarnissaa
Siumuminngaanniik oqaatigineqartoq ilumoorluinnarpoq. Massakkut nunaqarfinni
suliffissaqarniarneq, tunitsivitsigut ajornartorsiorneq
killilersimaarneqassappat periarfissat tassuuna pitsanngorsarneqartariaqarput.
Pingaartumik eqqumiitsuliorneq isigalugu, tassami nunaqarfippassuarni aamma
eqqumiitsuliornikkut piginnaanillit inuit atorluanngisagut tassuuna
periarfissinneqassapput siunissami ingerlariaqqinnissaminnut. Aammalu
aningaasarsiornikkut nunatsinnut annertuumik tapertaalluarsinnaanerat tassuuna
aqqutissiuunneqartussaq. Tikkuarneqartoq tamakkiisumik
periarfissiuunneqarnissaannik aamma Naalakkersuisuninngaanniit
suliarissavarput. Aalisarneq piniarnerlu ajoraluartumik kisimik nunaqarfinni
massakkut isumalluutigineqarsinnaajunnaarput. Aamma inuit eqqumiitsuliornikkut
piginnaasallit atorluarneqarnissaat tassani anguneqarsinnaammat.
Taavalu Atassumminngaanniit oqaatigineqartut isumaqatigaara una oqaatigisaa,
tassalu pilersaarusiornissami nunaqarfimmiut kommunalbestyrelsillu
ataatsimoorlutik taanna akisussaaffigigaat. Aap,
ilumoorpoq taanna. Sanioqqunneqarsinnaanngilaq. Tassami pilersaarusiornerit
kommuunit namminneq ingerlaassaat qulaatiinnarlugit ingerlaleraluarutta aamma
suli ingerlannerliorneq annerusoq nunaqarfimmiunut tutsinneqartussaavoq.
Taanna pinngitsoorneqartariaqarpoq.
Aamma
Atassutip oqaatigisaa inuutissarsiornikkut nunaqarfinni nakkaakkiartuinnarneq
ilumoorpoq. Ullumikkut taanna akuerisinnanngilarput. Pitsaasumillu
periarfissarsiuunneqarnissaannut ataatsimoorluta sulissutigisariaqarpagut
ataasiukkaarluta nukigut tassunga atussagaluarutsigit isumaqarama
naammassisassagut annikitsuararsuussasut.
Taavalu
aamma Atassumminngaanniit uparuarneqartoq nunaqarfiit pillugit
ataatsimiititaliaq nunaqarfiit pillugit suliniuteqarnermi annertunerusumik
ukiuni kingullerni ataatsimiissimanngitsoq ilumoorpoq, tassa taanna
Naalakkersuisut, Inatsisatut ataanni ataatsimiititaliaq aamma uanga tassani
siulittaasuullungalu ilaasortaasimavunga. Ilumoorpoq ukiuni kingullerni
ajoraluatumik ingerlanera taassuma ataatsimiititaliap pitsaasuusimanngitsoq
nassuerutigisariaqarparput, naak nunaqarfinni ajornartorsiutit
annertugaluaqisut. Aamma tassani uanga misilittakkakka aallavigalugit
pisooqataavoq allaffeqarfimmiit allaffeqarfimmut, allatsimiit allatsimut
nuunneqaqattaarnera sulineq annertuumik nukillaarsarneqarsimavoq aammalu
taassuma saniatigut ataatsimiititaliat aallat suliassarpassuisa ilaatigut
nunaqarfinni ulikkaarussisarnerat taanna aamma nassuerutigisariaqarparput,
kisiannili neriuppunga taanna siunissami allanngortinneqartariaqartoq
nunaqarfiit aamma allatulli ataatsimiititaliami sullinneqarsinnaanngorlugit.
Taanna miserratiginagu nassuerutigissavarput ingerlanerliorsimanera, kisianni
allanngortitsiniarnissanut aamma Naalakkersuisut piumassuseqarput
ikiuutissallutik.
Taavalu
Inuit Ataqatigiinninngaanniik oqaatigineqartut arlallit aamma uani partiit
allat saqqummiussugaanni isumaqataaffigineqartut. Ullumikkut Naalakkersuisut
anguniagaannut, tassalu suliffeqarfup unammilleqatigiinnikkut
ineriartornissaminnut periarfissaannut nukittorsarneqarnissaannut aqqutissat
taakkartorneqartut suleqatigiissitanik aamma nalilersorneqassapput. Taavalu
aamma Inuit Ataqatigiit selskabit allallu ataqatigiinnerullutik
suleqataalernissaattikkuartugaat Sulisakkut, takornariartitsinermut tunngasut,
tunisassiornermut tunngasut, taakku ataqatigiissaarneqarnissaat aamma uani
siuliini oqaaseqarninni tikitakka isumaqatigilluinnaqqissaarpakka.
Ataqatigiissaarinissaq annertuumik pisariaqartineqarpoq. Nunaqarfinni
inuutissarsiornerup pitsaanerusumik ullumikkorninngaanniit ingerlalernissaa
anguneqassappat ataqatigiissaarinerit ullumikkorninngaanniit
nukittunerungaartumik aaqqissuuneqartariaqarput.
Taavalu
aamma Inuit Ataqatigiit tikkuagaat tunisassiassanik assigisaanillu
assigiiaartunik tunisassiulinnginnissaat ilumoorpoq
taannasillimaffigisariaqarparput, tassami nunaqarfinni pisuussutit ataatsimut
qiviarutsigit uumassusillit annertuumik tassani aallaavigineqartussaammata,
assigiiaarpassuit tassani ingerlatilissagaluarutsigit aamma siunissami
uagutsinnut artukkernissarput qanittuararsuussammat, taakkua pitsaasumik
aaqqissuunneqarnissaat siunnerfigineqartariaqartoq Inuit Ataqatigiit
oqaatigisaat isumaqatigilluinnaqqisaarpara. Imminut naalleraalluta siunissami
pitsanngorsaaniarnerit ingerlassinnaannginnatsigit.
Taavalu
aamma nunaqarfimmiut eqeersimaarlutik nammineerusuttut tapersersorneqarnissaa
Inuit Ataqatigiinnminngaaniit oqaatigineqartoq aamma taanna tapersersorparaput
isumaqarluta taakku periarfissinneqarpata siunissami alloriaqqinnissaq
pitsaasoq anguneqarsinnaasoq.
Taavalu
aamma Inuit Ataqatigiinninngaanniit tikkuarneqartqo, tassalu nunaqarfinni
aqutsisut oqartussaaffiisa annikippallaarnerat ilumoorpoq, taanna
nassuerutigineqartariaqarpoq. Nunaqarfippassuit oqartussaatitaanerat
annikitsuararsuuvoq ilaatigut ilai asuli paasiniaaffissaannartut atorneqarput,
ilaali anertunerungaartumik ilaagullu tanakkiisumik sullissinerit
ingerlallugit, kisiannili aamma tassani nassuerutigisariaqarparput taamatut
piginnaatitaaffiliinissami aamma nunaqarfinni nammineq innuttaasut
apeqqutaalluinnarmata, tassa allaffissorneq qiviaraanni piumasaqaatit
sakkortupput, naatsorsuutit sippuinnginnissaq allallu, taavalu inatsisit
malitassat aamma tassani killilersuisuunerat pissutigalugut ajoraluartumik
sumiiffiit ilaanni ilinniarsimanngitsunik ingerlanneqarsinnaannerat tamakku
killeqartorujussuunerat pissutigalugu annertuumik killilersimaarinninnerit
pissutaapput. Kisiannili massakkut allaffissornikkut pikkorissaanerit
Pilersuisoq suleqatigalugu ingerlanneqartut ingerlanneqalertussallu
annertuumik pitsanngoriartitsinermik kinguneqarnissaat
naatsorsuutigilluinnarpara, taamaallilluni nunaqarfimmiut piginnaatitaaffii
annertusarneqarsinnaanissaat qulakkeerneqartussaammat.
Taavalu
Kattusseqatigiinninngaanneersut aamma eqqartorneqarput tunitsivinnik,
tunitsiviit ilai inuutissarsiornerup pitsaasumik ingerlassigaluarnerannik
uninngatinneqartut matoqqasut allallu, taakkua soorlu oqaaseqarfigereerikka
periarfissarsiunneqassapput nunaqarfimmiut aamma namminneq, nammineerusutut
tassani periarfissinneqarnissaat selskab-it peqatigalugit imaluunniit
selskabinut tapiissutaasut aallartitseriutissatut atorneqarsinnaasut.
Uanilu
aamma isumasioqatigiinnissamut tunngasut Kattusseqatigiinninngaanniit
oqaatigineqartut iluarisimaarlugit, kisiannili erseqqissaasutigissavara
tassani ataatsimeeqatigiinnissami KANUKOKA, taavalu Nunaqarfimmiut
Peqatigiiffiata siulersuisui kisimik massakkut ataatsimiissammata. Uani soorlu
piumasarsi kaammattuutiginiarlugu nunaqarfiit tamarmik peqataatinneqarnissaat
pisariaqartoq, taanna ajoraluartumik massakkut ingerlanneqarsinnaanngilaq
aningaasat atugassaritinneqartut killeqarpallaarnerat pissutigalugu,
kisiannili ataatsimeersuaqqinnissami tulliuttumi qaqugu pisinnaanersoq
neriorsuutigisinnaanngilara, taakku eqqarsaatigineqassapput aamma
nunaqarfimmiut namminneq piumasaqaatigimmassuk kingullermik
ataatsimeersuarnermi tamakkiisumik nunaqarfimmiut peqataatinneqarnissaat.
Taanna uterfigiumaarparput ataatsimeersuarnissaq pilerpat.
Taavalu
aamma nunaqarfiit 100-t inorlugit 100-llu sinnerlugit inullit qanoq
pineqarnissaat tassani apeqqutigivaa Kattusseqatigiinninngaanniit.
Isumaqarpunga, taanna maanngaanniit toqqaannartumik
aalajangiiffigisinnaanngikkipput, tassami nunaqarfimmiut namminneq
piumassuseqarnerat tassani, minnerunngitsumillu kommuunit peqatigalugit
aaqqissuussinissaq, taanna inuaqatigiinnut pitsaanerpaajummat, tassami aamma
qulaatiinnarlugit pilersaarusiornerit ingerlanneqalerpata qularinngilara aamma
ilaasa akuersaarnavianngikkaat. Nunaqarfimmiuinnaanngitsut aamma
innuttaaqataasut allat politikkerillu oqarlutik piffinni aqutsineq
isumagineqartariaqartoq. Taanna qimannaveersaatariaqarparput.
Aamma
uppernarsaatissaqarpoq nunaqarfiit inukitsunnguugaluartut qanoq
piumassuseqartiginerannik. Assersuutigiinnarlugu nunaqarfik 100 inorlugit
inullitsiorngatigut pisinniarfeqaratik, atuarfeqaratik ingerlasut
tunisassiorfeqaratik massakkut ingerlalluarnerpaanut ilaammata. Taamaammat 100
ataallugit inullit apeqquserneqarnissaat, politikkikkut qanoq pineqarnissaat
isumaqarpunga mianersorfigineqartariaqarto. Assersuutitut taasinnaavagut
Upernaviup Kommuuneqarfiani, Innaasuit, nunaqarfitsik namminneq
makitissimavaat. Pisiniarfiit, elværk-it, tunisassiorfiit, tassuuna
takuneqarsinnaavoq 100 inoraluarlugilluunniit piffinni qanoq
piumassuseqatigineq apeqqutaasoq.
Aamma
taassuma saniatigut Ikerasaarsuk, Kangaatsiap Kommuuniani aamma
taamatorluinnaq nunaqarfik namminneq pilersissimavaat namminneq
piumassuseqarnermikkut naak ikittunnguugaluartik. Tassa taamaattut
nersualaagassat. Utaqqiinnaratik namminneq qanoq pisinnaanerminnik
takutitsisut.
Aamma
Oqaatsut, tunisassiorfik atoqqinneqarsinnanngitsutut nalilersugaq
utaqqiinaratik massakkut qullukkiornerit allallu ingerlatilerpaat. Taamaammat
maani aalajangiinaveersaassagut 100-t ataallugit inorlugit inullit qanoq
pineqassanersut, kisiannili nammineq piffimminneq kommuunit suleqatigalugit
aalajangiinissat qimannaveersaatariaqarparput.
Taavalu
aamma Otto Steenholdtip oqaasii. Ilaatigut atuartitaaneq qiviarlugu
eqqarsaatigalugit oqaasii assortoruminaapput, tassami msassakkut
ilinniartitaaneq annertuumik pingaartinneqartoq angajoqqaanit, aamma
nunaqarfiit ilaanni ajoraluartumik massakkut ilinniartitsisoqarniarnikkut
annertuumik ajornartorsiutigineqartoq qiviassagaanni OttoSteenholdtip oqaasii
assut akerlileruminaatsut maanngaanniit oqaatigissavara, kisiannili massakkut
Atuarfitsialaap aaqqissuunnerani aamma pitsanngorsaaniarnerit annertuumik
ingerlanneqartut Atuartitaanermut Naalakkersuisoqarfik qanimut
suleqatigilluinnarlugu Nunaqarfimmiut Peqatigiiffianinngaanniit
aaqqissuussiinerit ilusilersorneqartut neriuppunga siunissami nunaqarfimmiut
atuartitaanerannik pitsaasumik aamma aallariarfiujumaartut.
Kisiannili
ilumoorpoq Otto Steenholdti assortoruminaappoq illoqarfimiunut
angummanniassagaanni aamma atuartitaanerit pitsaasut tikillugit
ingerlanneqartariaqarmat.
Taavalu
aamma Otto Steenholdtip oqaatigisaa nunaqarfimmiut qanoq piumassuseqatiginerat
tassani aallaavigineqartariaqartoq. Ilumoorpoq, taanna aamma soorlu
uppernarsaatissat uani taallatsiariikkakka eqqarsaatigigaanni
killiliinaveersaarnissarput mianersorfigissavarput.
Aamma
nunaqarfiit taamak amerlatigisut tamarmik assigiimmik
ineriartortinneqarsinnaanngitsut Otto Steenholdtip oqaatigisaa tunngaviatigut
isumaqatigaara. Ajoraluartumik assigiimmik tamaasa
ineriartortissinnaanngilagut, kisianni pitsanngorsaatigisinnaasagut
nunaqarfimmi, nunaqarfiup sumiiffia aallaavigalugu ilusilersorneqarnissaa
taanna isumaqarpunga saneqqunneqarsinnaanngitsoq.
Taavalu
siunnersuuteqartup oqaasii. Ilaatigut uanga Naalakkersunngornera tassani
taakkartorneqarpoq. Isumaqarluni aatsaat Naalakkersuisunngorama nunaqarfiit
sullinniarneqarnerat aallartinniarsarigiga. Isumaqarpunga
taamaattoqanngilluinnartoq. Aamma uanga kisima taamatut pissuseqanngilanga,
Naalakkersuisoq alla ingerlagallarmat aamma tassani sullissinerit
ingerlanneqartut , taanna oqaatigerusussavara. Imaanngilaq sullissineq
uninngasimasoq aamma soorunami tassani sullissinerit ingerlanneqarput aammalu
Naalakkersuisoqarfiup taassuma ataaniissimanera suliassarpassuarnut allanut
ikkunneqarsimalluni ajoraluartumik suleriarnerit aamma tassani
killeqarsimapput, naak sulisut aamma piumassuseqarlutik tassani
ingerlatserusukkaluartut.
Aamma
ilaatigut tikkuarneqarpoq uanga annerusumik suliniuteqarsimanngitsutut
isigineqarlunga. Taanna immaqa isumaqarpunga eqqortuunngitsoq.Tassami
imaanngilaq Inatsisartut oqaluttarfiat manna aqqutigalugu suliassat aatsaat
aallartinneqarsinnaasut. Toqqaannartumik aamma suliassarpassuit piffinnut
apuussorneqartarput. Uangalu Nunaqarfiit Peqatigiiffiannut siulittaasuugama
aamma taamaaliortarsimavunga Inatsisartut oqaluttarfiat
aqqutiginngikkaluarlugu toqqaannartumik apuussivissatsinnut apuunneqartarput.
Isumaqarpunga manna oqaluttarfik utaqqinngikkaluarlugu aamma suliassat
annertuumik ingerlanneqarsinnaasut, taanna Inatsisartunik ilaasortanik aamma
eqqumaffigineqartariaqartoq. Manna aqqusaaqqaanngikkaluarlugu aaqqitassat
arlalippassuit toqqaannartumik aamma apuullugillu aaqqiifigineqartarmata.
Kisianni
neriuppunga siunissami nunaqarfiit pitsaasumik atugaqarlutik
ingerlariaqqinnissaannut ataatsimoorluta suleqatigiinnissarput
aallartissagipput. Ilaatigut pisariaqanngitsumik assortuuttarnerit,
ajugaaniuttarnerit unitseriarlugit ataatsimoorluta siunerfeqarluta massakkut
siunissaq ornittariqarparput. Nunaqarfimmiut namminneq ingerlatsilerusuttut
annertuumik tapersersornerisigut suliassat maani ingerlanneqartartut
annertoorujussuarmik appartinneqarsinnaammata, taavalu pisariaqanngitsumik
akissaajarnerit piffissamillu atuiuarnerit aamma annertuumik
killilersorneqarsinnaanngussapput.
Taavalu
nunaqarfimmiut aamma ataatsimeersuartarnerat ilaatigut ukiut allortarlugit
ingerlanneqartartoq aaqqissuunneqanera aamma allanngortinneqartariaqarpoq.
Ilumut taamak akulikitsigisumik ingerlatsisoqassanersoq, tassami
ataatsimeersuarnerit aallartikkaangata kingullermik ataatsimeersuarnermi
eqqartukkat uteqqinneqartarput annerusumik malersuisoqannginnera pissutigalugu.
Taanna allanngortinneqartariaqarpoq.
Malersuinerit
ingerlareeraangata suliassat artorsarfigisinnaasagut, taakkua isumaqarpunga
annertunerpaamik ataatsimeersuarmi aallaavigineqartalissasut. Assersuutigalugu
ataatsimeersuarnermi kingullermi ukiup ataatsip matuma siornga
ataatsimeersuarnermi kingullermi uteqqiinnarneqarput. Taamatut
sulisoqasinnaanngilaq aamma aningaasat atugassagut killeqarmata. Taanna aamma
uagut nunaqarfimmiut tamatta mamiasuutigisarparput ilaatigut
pisariqanngitsunik aningaasanik atuinertut nalilertarlugu ataatsimeersuarnerit
annertunerusumik malitseqartinneqaratik tullia aallartikkaangat.Taanna
isumaqarpunga Inatsisartuni aamma siunissami isummerfigisariaqaripput taamak
akulikitsigisumik ingerlatissaneripput imaluunniit aningaasat
pitsanngorsaaniarnermut atussanerigut.
Taavalu
naggataatigut qujassutigissavara partiit oqaaseqartuinut siunnerfissat
arlallit maani tikkuarneqartut. Taakku aallaavigalugit sulineq
aallartissavarput minnerunngitsumillu aamma Nunaqarfimmiut Peqatigiiffiat
KANUKOKA-lu suleqatiginissaat qilanaraara. Soorunami aamma ilissi
Inatsisartunut ilaasortat periarfissaqarpusi sukkulluunniit
atassuteqarnissasinnut aamma malinnaatinneqarnissarsi isumaqarpunga
pingaarlunilu pissusissamisoortoq. Imaqarniliat allallu ataatsimiinnermi
ingerlatinneqartut neriorsuutigissavakka Inatsisartunut ilaasortanut
apuunneqartassammata.
Naggataatigullu
qujassutigissavara Atuarfitsialaap ilusilersornerani aamma
Naalakkersuisoqarfillu pitsaasumik Nunaqarfimmiut Peqatigiiffiat
suleqatigiissimanerat. Naalakkersuisoqarfinnut allanut tuniluunnissaa
kaammattuutigalugu suleqatigiissimaneq taanna ilinniarfissatut
Naalakkersuisoqarfinnut allanut tikkuarusuppara, aamma uagut atorluassavarput
Nunaqarfimmiut Peqatigiiffiat suleqatigalugu.
Qujanaq.
Ole
Lynge, Inatsisartut
Siulittaasuat, Inuit Ataqatigiit.
Qujanaq.
Taava aqutsisutut tullinnguuttut arlallit oqaaseqartinnagit oqaatigilaassavara,
tassa malugisinnaasagut malillugit saqqummiussamut akerliusoqanngimmat imatut.
Taavalu aamma Naalakkersuisut akissuteqaamminni neriorsuutigimmassuk 2002
ingerlanerani suliamut tunngasumut saqqummiussaqassamaarlutik.
Aamma
qinnuigissavakka oqaaseqartussat tullii sapinngisamik soorunami eqikkaasumik
uteqqiisaqattaanngikkaluamik saqqummiusseqqullugit. Nalunaaqutaq
taamalivoq-aasiit ullumikkut oqaluuserisassat suli tallimanik ilaqarput.
Arfinernut angumeriniagassagut, taanna eqqaasissutigilaaginnarpara.
Kisianni
aamma erseqqissaatigissavara Nunaqarfinni ataatsimititaliap
atorunnaarsinneqarnera uani uparuarneqarmat. Ataatsimiititaliap Inatisartut
ukiuata aallartinneqarani matoqqasumik oqaluuserinerini
allanngortiterisoqarmat. Nunaqarfinnut ataatsimiititaliaasimasup
suliassaqarfii Inatsisartut Inuussutissarsiornermut ataatsimiititaliaannut
nuunneqarmat. Tassalu suliasat taamaattut tassunga aamma
ingerlatinneqartartusaapput. Paaserusussavara oqaaseqartussat arlalissuummata
partiit, Kattusseqatigiit, attaviitsullu matuma aappassaaneerneqarnissaannut
ataatsimiititalianut ingerlateqqinneqarnissaat pisariaqartinneraat.
Otto Steenholdt, attaviitsoq:
Siullermik Naalakkersuisup oqaaserisannut akissuteqaatai qujassuteqarfigissavakka, tassami Naalakkersuisup taanna oqaatigisariaqarmat nunaqarfinni pissutsinut paasisimasaqartuusoq. Aammalu Nunaqarfinni Peqatigiiffiit kattuffianuunnguatsiarpoq siulittaasuusimalluni.
Kisiannili oqaatsit marluk
iluarinngisakka utertilaarlakka. Iluarineqakasakkama oqaatsit marluk uku
atormagit. Oqaatsit akerlileruminaatsut. Oqaatsit assortoruminaappoq, soorlulu
oqaatsikka akerlilertassallugit, oqaatikka assortarniartassallugit. Tassa
oqariartaaseq tassaniiginnarpoq immaqa. Tassa ilumoorpoq, ilumoornerarpaangalu
assigiimmik ineriartortinneqarsinnanngimmata. Tassa
taanna ilumoorluinnarpoq.
Taavalu
pisarnini malillugu oqaasii assortoruminaatsut, tassa assortuunnata
isornartorsiuinata suleqatigiilluta pimoorullugu ingerlassaagut. Tassa
Naalakkersuisunngortup oqaatigisartagai uanga nuannaralugit aamma
eqqarsaatigisartakkakka.
Kisianni
ataatsimeersuarnerit allanngortiternissaanut oqalunnera
inissaminiissorinngilara. Naalakkersuisoq tassani qullersaajunnaarsimavoq
nutaallu ikkussimapput. Kingullermillu ataatsimeersuarneq eqqartorpaa
uteqqiinipilorujussuit ajoralugit. Tassa taanna isoraara taamatut
siulittaasunngortup Hans Enoksenimik kingoraarsisup tamakkua suliassarimmagit.
Taavalu
anersaruuluuteqarpunga, naak Siulittaasoq uparuatsiarneqareeraluartoq. Ila
radiop ammanera maani atornerlunneqarpallaalerujussuaqaaq. Siunnersuuteqartup
aappassaani oqalunnermini radiokkut inuulluaqqusinera
allaasorinngilluinnarpara radiop taanna suliassarigaa. Amigaatigiinnaavippara
naggasinngimmagu "Inuulluaritsi., ajunngilanga" Taavalu atini
nammineq taaginnarlugu. Tassa ilaasortat ilaannit radio ammanersoq
oqaluttarfimmiit apeqqutigineqartarpoq. Ilaallu oqartarput siunnersuutit
kinguartiinnarniarallarlugit radiop ammajunnaarnera pissutigalugu.
Ole
Lynge, Inatsisartut
Siulittaasuat, Inuit Ataqatigiit.
Otto
Steenholdt, qinnuigissavakkit oqaluuserisaq qimannaveersaaqqulugu,
oqaatigereeratsigu taanna erseqqissaatigeqqissaatigiinnassavara allat
suliassat matuma ataani pisartut uani akuleruteqqunagit.
Otto Steenholdt, attaviitsoq:
Aap. Taavalu aqutsisoq ataqqisara uani oqaaseqartut taakkua atormatigit taamatut oqaaseqarsimavunga. Erseqqissarlugulu iluarinnginnakkit tusaqqusaarnertut manna oqaluttarfik atorneqartussaanngimmat, kisianni oqaluttarfik oqarnertulli atortussaammat oqaluutsigut inuulluaqqusinermut atornagu.
Ole
Lynge, Inatsisartut
Siulittaasuat, Inuit Ataqatigiit:
Qujanaq.
Taava Godman Jensen, Atassutip oqaaseqartua aappassaanik.
Godmann
Jensen, Atassut:
Atassutip
tungaaninngaaniik maluginiarparput nunaqarfiit sullinneqarnissaat pillugu
partiit tamarmik oqaaseqartuisa isumaqatigiillutik, isumaqatigiilluinnarlutik
suleriaqqinnissaq kissaatigigaat. Taamaattumillu Atassutip tungaaninngaanik
tamanna oqaaseqartutut nuannaarutigisariaqarpara. Tassa uani inimi
nunaqarfimmiut arlaqanngillat taamaattumillu ilaatigut immaqa oqaaseqartut
ilaasa allaninngaaniik nunaqarfinni inooriaaseq ilisimanerullugu
oqaatigisinnaavaat. Taamaakkaluartoq tassa oqareernittuut, oqareernitsituut
nuannaarutigaarput nunaqarfinni sullisseqqinnissaq tapersersorneqarmat.
Saqqummiussorneqartut
assigiinngitsut ilaatigut ussernartorsiornarsinnaagaluartut suliat
ingerlareersut nunaqarfinni aammalu kommunekaartuni ingerlareersut
pulaqqavigisagut ussernartorsiornarsinnaagaluarpoq immikkut
oqaaseqarfigisaqattaarnissaat, kisiannili taamaakkaluartoq nunaqarfiit
ingerlaqqissappata, ingerlariaqqissappata pingaaruteqarluinnartoq tassaasarpoq
nunaqarfik napassappat inuutissarsiornikkut tunngavia
aaqqinneqaqqaartariaqarmat taamaattumillu tamanna aaqqinneqanngippat
nunaqarfik ingerlariaqqinnissaminut nukissaqartanngilaq.
Taamaattumik
nunaqarfiit siunissami ingerlariaqqissappata nunaqarfinni inuutissarsiornikkut
pitsanngorsaaneq pinngitsoorani aaqqeqqaartariaqassaaq. Tamakkua tamarmik
saniatigut oqartariaqarpugut kommuneqarmat aamma inuutissarsiornikkut
periarfissanik aningaasarsiornikkut periarfissanik tamakkiisumik
ujartuiuartunik, ilaatigut aamma taakkartorneqarsinnaapput kommuneqarfiit
ilaanni Namminersornerullutik Oqartussat eqqumiitsuliornikkut
siunnersorteqarnerat assorsuaq atorluarneqartarmat ilaatigullu aamma
aningaasarsiorfissaasinnaasuni eqqarsarnermi nunaqarfinni ilaatigut tamakkua
aamma ikorfartueqataasinnaanerat taanngitsoorneqarsinnaanngilaq.
Taamaakkaluartoq
pingaartillugu aamma oqaatigerusupparput nunaqarfinni nammineerlutik
inuutissarsiornikkut periarfissaqarusuttuni ingerlasimaneq ilaatigut
nuannersumik Naalakkersuisup oqaatigisaa aamma ullumikkut nunaqarfippassuarni
anersaaq taanna anersaarineqarmat. Taamaattumillu piginneqatigiinnikkut
nunaqarfiit ilaanni nammineq suliniuteqarnermikkut ingerlarusuttunut
Naalakkersuinikkut annerusumik tapersersuerusussuseqarnissaq kommune-qarfiit
ilaanni assorsuaq pisariaqartinneqartarpoq. Aporfigisartakka ullumikkut
unaalluni Kommuuneqarfiit aningasalersueqataanermikkut suleqataasinnaanerat
Naalakkersuinermik suliallit, qullinerusut tungaanninngaanniit annertuumik
aporfissaqartinneqartarmat. Tamannalu isumaqarpunga siunissami
qaangerneqartariaqartoq inuit namminneq nunaqarfimmiillu sulerusussuseqarnerat
ipitinneqassanngippat.
Tassa
oqaaseqarfigisinnaasarpassijinngimmat Atassutip tungaaninngaanniit
nuannaarutigaarput nunaqarfinni suleriaqqinnissaq partiinit tamanit
tapersersorneqarmat. Taamattumillu isumaqarluinnarluta nunaqarfinnut
ataatsimiitsitaliaq nunaqarfinnut sullissinermi siunissami
pingaaruteqartuartussaasoq, taannaasussaasorlu nunaqarfiit
nalilersuiffigineqarneranni qitiusumik siuttuullunilu sullissisussaq.
Ole
Lynge, Inatsisartut
Siulittaasuat, Inuit Ataqatigiit:
Qujanaq.
Taava Anton Frederiksen, Kattuseqatigiit oqaaseqartuat, aappassaa.
Anton Frederiksen, Kattuseqatigiit:
Qujanaq. Nunaqarfiit soorunami tikittarsimallugit aamma takuneq ajornarneq ajorpoq nunaqarfinni suut inuutissarsiutit ingerlanneqartut aammalu suut amigaatigineqartut.
Nunarput angisoorujussuummat tamatta nalunngilarput aammalu nunaqarfiit assigiinngittut kujataani avannaani tunumilu aamma sumiiffinniik sumiiffinnut assigiinngittorujussuarnik ajornartorsiuteqarsinnaasarnerat aamma qularnanngilaq amerlanerit ilisimavaat.
Nalunngilarput kalaallit amerlanerpaajusugut kalaalimininngersuulluta, ukiuni makkunani aamma eqqartorneqartartoq ataasiarani tassaavoq kalaallit uagut pigisatsinnik atorluaannginnerput atorluaanerusariaqarnerpullu aamma oqaatigineqartuartartoq, oqassaguma immaqa uniorpallaassanngilaq nunaqarfimmiut tassaapput nunatta pissarititaanik atorluaanerpaajusut. Taamaattumik nunatsinni pissarititaasunik atorluaassagutta aamma illoqarfinni kujataani avannaani kalaalimerngit piffissap ilaani ukiup qanoq ilinera apeqqutaatillugu amigaatigineqartaqaat illoqarfiit ilaanni, illoqarfiilli ilaanni nunaqarfiillu ilaanni aamma ajorsaatigineqanngilluaasartarlutik.
Ilaatigut uanga aggerfinni kommunemi marsi qaammat assersuutigiinnassagukku tassani neqit puisi neqai assorujorujussuaq amigaatigineqartarput uffa massa kommuneqarfiit ilaanni piffissami tassani amigaatigineqaratik eqqaannarneqartut. Sooq tamakku qanoq ilillugit aamma pitsaanerusumik aaqqiivigineqarnissaat isumaqarpunga eqqarsaatigisariaqaripput, tassami neqigukkaluarluta ilaanni kukkuuaqqat pikuinik pisiinnariaqartarpugut uffa missa neqi pitsaanerungaartoq immaqa nunatta ilaanninngaannik pissarsiarisinnaagutsigit taanna ajunnginnerungaassagaluartoq.
Unaliuna aamma nunaqarfiit pillugit Naalakkersuisumut akissuteqarnermini Kattusseqatigiit nunaqarfiit 100-t inorlugit inullit apeqquserniartutut nipilermagu. Allaannginnami tusaallugu tassa Kattusseqatigiit apeqqusilerpaat 100-nik inullit qanoq ingerlaqqinnissaat.
Eqqaasitsissutigilara Inatsisartuni ilaasortap siunnersuuteqartup siunnersuutini nammineerluinnarluni saqqummiummagu Kattusseqatigiit tunuliaqutaginagit aammalu oqallinneq tassunga ingerlammat. Tassami Kattusseqatigiinni oqaaseqarnitsinni oqaaseqarpugut Kattusseqatigiinni nunaqarfik tassaavoq inoqarfik aalisarnikkut piniarnikkut niivernikkullu qangaaniilli ingerlatsiviusoq. Qanoq inuttutigineq inuttutiginerluunniit apeqqutaatinnagu nunaqarfittut isigineqartuartariaqartoq. Taamaattumik pissusissamisuunngilaq Naalakkersuisup Kattusseqatigiit nunaqarfinnik 100-t inorlugit inulinnik apeqqusiiniartutut nipilissappagit, tamanna ilumuunngilaq.
Aammalu soounami ajuusaarnerit assigiinngitsullu pisarput. Tassani nunaqarfiit pillugit ataatsimeersuarnerit eqqartorneqarput, neriuppugulli maannakkut Naalakkersuisup Nunaqarfinni Naalakkersuisunngornermini ukioq ataaseq sinnerlugu susoqarsimannginnera ataatsimiititaliami taanna uteqqinnagu aallullugit nunaqarfiit pillugit sullikkumaarai.
Qujanaq.
Ole Lynge, Inatsisartut Siulittaasuat, Inuit Ataqatigiit.
Tullinnguuppoq Paninnguaq Olsen, Inuit Ataqatigiit oqaaseqatuat, aamma aappassaanik. Tulleriumaarpaa Simon Olsen, Siumut.
Paninnguaq Olsen, Inuit Ataqatigiit oqaaseqatuat.
Siullermik Naalakkersuisup oqaaseqaatitsinnut ilassinnilluarnera qujassutigissavarput, aammalu neriuutigissallutigu uani immikkut taasarput, Inatsisartut inatsisaat normu 22 novemberip pingajuani 94-imeersoq. Taanna suleqatigiissitami nalilersuisoqalerpat immikkut isiginiarneqarluni aamma maluginiarneqallaqquarput, nunaqarfiit ilaanni inuussutissarsiutitigut ineriartortitsiniarnermi kommuunit immaqa aningaasaliisinnaagaluarlutik akimmiffittut atuisarnerat pillugu. Taanna aamma allanngortittariaqalinnginnersoq Inuit Ataqatigiinni nalersoqqugatsigu uani erseqqissaatigiinnassavara..
Aamma maqaasilaarpara Naalakkersuisup taanngimmagu ujartugarput inassutigisarpullu nunaqarfinni tamani nunatsinni sumiikkaluartuniluunniit aamma inuussutissarsiornikkut periarfissat suuneranik misissuisoqartariaqarnera. Tassuunakkut ersarinnerusumik siunnerfiliorsinnaaneq anguneqarsinnaammat ilaatigut immaqa aamma inuussutissarsiutinik ineriartortitsinerit nutaat immaqa naggueqatigut akilinermiittulluunniit isumassarsiorfigalugit pisinnaasut aqqutissiuunneqarsinnaammata. Periarfissat assigiinngitsorpassuupput nunatsinni pisuussutinik atorluaanissatsinnut aqqutissaasinnaasut, taakkulu soorunami nunaqarfimmiut allallu suleqatigalugit ineriartortinneqarsinnaasut Inuit Ataqatigiinninngaannit uagut upperaarput.
Isumaqarpunga aamma ullumikkut ilaatigut illoqarfimmiuugutta nunaqarfimmiuuguttaluunniit ulluinnarni aningaasat atukkatta qanoq naleqarneranik paasinninnerullutalu ilisimasaqarnerusariaqartugut. Ataatsimut aningaasaliissutaasartut eqqarsaatigalugit, taakkuninnga pissarsiaqartarnitta qanoq naleqatigineranik ilisimasaqarnerulissarput pingaaruteqartorujussuuvoq inuussutissarsiutini ineriartortitsineq tigusineriinnaarmiissannginnami aammali illuatungaatigut aamma aningaasanik kaaviijaartitsisinnaanermik kinguneqartussatut takorloorneqartariaqarmat. Naak imaattariaqanngikkaluartoq inuttut naleqassuserput anersaakkullu inuuneqarnermut aningaasamik naleqartinneqassasoq, kisianni isumaqarpunga ullumikkut inuussutissarsiutini siuarsaanissamut oqaluttarnitsinni aamma aningaasap naleqassusaa annertunerusumik ilisimasariaqaripput pingaaruteqarluinnarmat imannak aningaasaq suminngaaniiginnaq pinngorneq ajormat, kisianni inuup sulineqaratigut aammalu ineriartortitsinikkut aatsaat aningaasaq pilersinneqarsinnaammat.
Mads-Peter
Grøvoldip oqallisissiaa soqutiginartuuvoq. Aamma nalunngilara nunaqarfimmiut
immaqa naalernillutik tusarnaaraat aammalu nammineq inuussutissarsiutigut
ineriartortitsisinnaanermik takorluugarisartakkaminnik aqqutissarsinissaminnut
nalornissutiminnik qulaajaavissatut aqqutigissagaat qularutiginagu.
Nalunngilarput nunaqarfimmiorpassuit takorluugaqartaraluartut
inuussutissarsiutinik immaqa ingerlatsisinnaanissaminnut pilerigisaqarlutik.
Assersuutigiinnarlugu puisit neqaat, immaqasinerissami soorlu
ippassaaninnguakkunni eqqartorneqartoq, qimminut
nerukkaatigineqarsinnaanerat.Nunaqarfimmiut ilaasa allatut ajornartumik
asiutiinnartarpaat uffa Ilulissakkunni assersuutigalugu aalisartoqarfiusuni
immaqa nerukkaatissiaralugit pisiariumaneqarsinnaaruttortut nunaqarfimmiut
atorluarnagit amiinnaat tunisinnaagamikkit asiutitsinerit pisarput. Tamakku
atorluaanerunngillat. Puisip neqaannaanngillat sorpassuupput
nalilersortariaqakkat. Illoqarfinniiginnanngillat kisiannili aamma
nunaqarfinniipput, taamaammat suleqatigiissitaliassap siunnerfiliorluakkamik
ingerlatsinissaa pisariaqartussaasasoq uani qularutigisasaanngilaq.
Aamma
neriulluarnartoqartissavarput oqartaleratta naggataatigut taamatut aasit
oqalukkaluarluta oqalukkaluarluta susoqarnianngitsoq, kisianni ugguuna
neriussaanga massakkut nunaqarfimmiut isumalluarnerullutik
alloriarfissinneqarnissartik periarfissaqarfigilissagaat.
Una
eqqaasitsissutigiinnassavara Anton Frederiksenip oqarnera nunaqarfimmiut
kalaaliminermik immaqa atorluaanerpaasut. Uanga isumaqarpunga kalaallit
sumiikkaluaruttaluunniit taakku inuusstissat pissuussutigut sapinngisamik
atorluarniartarigut nunaqarfinniikkutta illoqarfinniikkuttaluunniit.
Ole
Lynge, Inatsisartut
Siulittaasuat, Inuit Ataqatigiit.
Qujanaq.
Taava Simon Olsen, Siumup oqaaseqartua. Aappassaanik. Tulleriumaarpaa
siunnersuuteqartoq.
Simon
Olsen, Siumup
oqaaseqartua.
Siumumiit
iluarisimaarparput Naalakkersuisup Siumup oqaaseqarnermini siunnersuuteqartup
siunnersuutaa pillugu oqaaserisai pitsaasumik tigummagit.
Ukiuni
20-ni maannakkumut ingerlareersunut qulaallugimmi piorsaanerup
allaffissungaarnermik ingerlatsiffiusut nunaqarfinni aamma nanertuutaanera
malunniuttoq ukiuni massakkut ilaqalersuni misigisimavarput. Tassami
naamminersornerulernerup eqqunneqarnerata kingorna piffimmiit pissimmut
kommuunit allaffeqarfii, atuarfeqarfiit, KNI-ikkut sumiugaluartoq tamarmik
immikkut allaffilerlutik pipput. Tassagooq inuiaqatigiit taamaalillutik
akikinnerusumik ingerlanneqarsinnaammata. Taakku ukiuni sivisukuluttuni ukiuni
ilalinni akiorneqartut suli massakkut tamakkiisumik anguneqanngillat. Taamatut
ingerlatsineq soorunami inuiaqatigiinnut akisoqalunilu siuarsaataanngilaq.
Siuarsaanerunissamik
maannakut suli nunaqarfiit inoqasuttoqarnera Siumumiit
iluarisimaarluinnarparput aammattaaq kingumut qiviangaatsiarluni, tassa
namminersornerulernerup eqqunneqarnerata siorna Naalagaaffiup ingerlatsinerani
iluatinnartut amerlaqisut annaasimavagut. Politikkikkut aammattaarlu
assigiinngitsutigut pitsaanerusumik ingerlajumalluta nammineerumalernitsigut
ajoraluartumik ukiorpanni atorneqarsimasut ilaasa ineriartortitaalluarsimasut
iluatigisariaqavissut iluatigineqanngitsoorsimanerat nunatta
ingerlatsi...nerata ullumikkumut malugingaarpaa aningaasarsiornerup
tungaatigut.
Taamaattumik
isumaqarpunga tupigusuutigisariaqartumik iluarsisariaqartunut
periarsinnaassutsitta eqarluinnassusia sanngeequtigigipput.
Avannaani
Upernavimmi kina oqarpa massakkut fabrikkimik ingerlatsisut pitsaanerpaajusut,
tamanna qularutigilluinnarpara. Nunaqarfimmiut illoqarfimmiullu isiginagit
sattaaserlunisooq ingerlasoqarnera qajassuunnagu nanertuutigaarput.
Taamammalluuna nunaqarfimmiut aamma ilungersungaaraluaqalutik
tusaajumaneqannginnerat imaannaanngeqisoq.
Kisianni
isumaqatrpunga ilanngullugu oqaatiginngitsoortariaqanngilluinnartoq nunatta
karsiata imaqusunnera, nunatta karsiata aningaasasaaleqinera, taassuma
nanertuinera Naalakkersuinerunnaanngitsukkut inuiaqatigiilli iluanni aamma
assut nanertuutigaarput. Taamaammat isumaqarnarpoq aningaasat isiginerullugit
aammalu peqqissaarnerulluta ikioqatigiinnerullutalu
ingerlatsilersinnaanitsigut pingaaumik inuussutissarsiornitsigut tungaatigut,
taakkumi ingerlalluarpata aatsaat allanut ingerlatanut
akissaqarnerulersinnaanerput politikkikkut sulisut tamarmik taanna tamatta
iserfigisariaqaripput eqqarsartaaseq. Tassami aningaangamik
atuiniinnarsinnaanngilagut isertitassagut annertunerusumik eqqarsaatiginagit.
Taamatut oqarlunga siunnersuuteqartup siunnersuutaa Siumumiit aamma
taperseratsigu oqaatigissavara.
Ole
Lynge, Inatsisartut
Siulittaasuat, Inuit Ataqatigiit:
Qujanaq.
Taava siunnersuuteqartoq Mads-Peter Grønvold pingajussaaniilerami
naatsunnguamik.
Mads-Peter Grønvold, Kattuseqatigiit..
Taamatut isumaqatigiilluarneq siunnersuuteqarluni iluarisimaarnarpoq aamma suleriaqqinnisami atorneqartussaammat taamatut oqaluuserisassanngortitsineq aamma Naalakkersuisut taanna oqaatigereerpaa, taanna iluarisimaarnarpoq.
Uani soorunami siunnersuuteqaraanngatta inatsisilerituunniit piumaffigineqartarpugut oqaaseqaatit annertuallaanginnissaat, taamaalilluni immaqa nassuiaanerusinnaanerugaluaq pinngitsoorneqartarpoq, uani nunaqarfiit 100-t inorlugit inullit qanoq siunisaami pineqassappaat, nunaqarfiit 100-t sinnerlugit qanoq aamma siunissami pineqassappat? Taamatut ilanngussininni ilaatigut tunngavigaara illoqarfiit ilaani, assersuutigalugu tunisassiornikkut ineriartortitsinermi sulisinnaassuseq sinnerlugu piorsaasoqartarpoq ineriartortitsisoqarlunilu.
Nunaqarfinni taamatut pisoqassaguni ajornartorsiutaasinnaasut sulisussaaleqinermut assigiinngitsunut tunngasut aamma aporfiusinnaammata taanna tamakku eqqarsaatigalugit taamatut allassimavunga, kisianni ajuusaarutigaara ersarinnerusumik taanna nassuiarsimannginnakku, soorunami oqaatsit ersarinngikkaangata pitsaasumut ajornerusumulluunniit saatikkuminartartuummata aamma tamanna politikerinut Naalakkersuisunillu atorluarneqartartoq nalunngilara., kisianni isumaqarpunga qaqeqqinninni taanna paasineqartoq. Uani soorunami ingerlatsiviit tunisassiorfiit allallu, soorlu nunaqarfinni pingaaruteqarluinnartut, ilaatigut ingerlatsinerliorsimanerisa kinguneranik kisermaassilluni tunisassiulernissaanerup periarfissinneqartarnera tamakku aamma imaannaanngitsumik kinguneqartarput pineqartuni tunisassiornikkut aalisarnikkullu atugassarititaasinnaasut eqqusoortitsisinnaasarput, tamakkua pinngitsuusagutsigit ingerlatsiviit ingerlanerluttut takugaangatsigit piffissaq siulleq aaqqiinniartartuugutta immaqa sunniipilunnissaat pinngortsoorneqarsinnaasassagaluarpoq, taanna Naalakkesuisnut eqqaamaqqulaaginnavara.
Jakob
Sivertsen, Atassut.
Qujanaq. Tassaana oqaluttut ilaasa taakkartugaat aamma
oqaaseqarfigilaarniarlugit maannga qaqisunga. assut alianaappoq nunaqarfiit
pillugit oqallinneq peqataaffigalugu, aamma tupinnanngilaq ukiuni kingullerni
nunaqarfinnut politikki soorlu tammariartulersimagaluartoq maannakkut
qaqinneqarmat Atassummi assut nuannaarutigaarput. Tassaana naalagaaffiup
ingerlatsisimanera ukiuni siullerni maannakkut eqqaallataarneqartoq ingerlatat
pisoqalisut nutarterneqarnissaannik piffissanngortoq.
Ilaatigut aamma uanga naalagaaffimmi ukiorpaaluit suleqataasimallunga
uggorisarpara naalagaaffiup ingerlassimasaasa ilaat nalilersoqqaarnagit
namminersornerulernermi ingerlatat tunniunneqarmata ingerlanneqarsimammata.
Assersuutigisinnaavara siornatigut nunaqarfiit tamarmik, tamakkiivillutik,
tunisassiorfinnguaqarput tamakkerlutillu aamma sulinerup saniatigut
aningaasarsiorfissanik tunisaqarsinnaasarput.
Taava aappaatut sanalukkanik tunisassiorneq periarfissalunnerusuni
nunaqarfinni naalagaaffimmit ingerlanneqarsimapput assut iluatsilluartumik.
Assersuutigisinnaavara 1976-imi nunaqarfik Kulusuk, 300-t sinnilaarlugit
taamanikkut inoqarpoq, ukiumut 4,2 mio.-nit sanalukkanik kaaviiaartissimavaa,
nunaqarfiinnarmi naalagaaffiup suleqataalluarnerata kinguneranik.
Maannakkut assersuutigigutsigu illoqarfimmiluunniit sanalukkat
killeqartorujussuarmik tunineqartarput. Nunaqarfinni tunisisoqarneq ajorppoq,
naak uffa inuppassuugaluartut aningaasarsiorfissaqaratik allanik sanalukkanik
aningaasarsiorluarsinnaagaluartut. Taamattumik Siumup oqaluttuata oqaassia
taperserumavara maannakkumiit nalilersuineq annertunerulertariaqarpoq suut
naalagaaffimmit tigusimasagut nalilersoqqissaarlugit suut
ingerlateqqissanerigut.
Taavalu aamma sanalukkanut tunngatillugu arnat tamatigut eqqaaneqarneq
ajormata uanga ajuusaarutigisarpara. Arnanuku assassornermik pikkorissorsuit
aamma tamakkua suliffissaaleqinerup nalaani assarsornermikkut
aningaasarsiuteqarsinnaagaluarput, assersuutigalugu soorlu Tunumi
kalaallisuunik kusanartorsuarnik piumasunut naammattunik
tunioraassinnaagaluraput, periarfissat ullumikkornit pitsaaneruppata. Aamma
annoraanik, soorlu makkua, annoraanik ullut tamaasa atortarpunga, piumagutta
naammattunik tunisassiorsinnaagaluarpugut qalipaatit assigiinngitsorpassuarnik,
periarfissaqanngiinnarpugut.
Taakku saniatigut nunaqarfinni suliffissanik pilersitsitsinarnermi ilaatigut
Paninnguup Sulisap eqqaammagu, assut aamma upernaamut Naalakkersuisut
saqqummiussaqarnissaannut Sulisap aamma nunaqarfinni periarfissat
misissortariaqarpai, oqartoqaaannarsinnaanngilaq periarfissaqanngilaq.
Sukumiisumik nunaqarfimmiut mannakkut paaserusulerpaat ilaatigut tunitsiviit
tunisassiorfiit matoorarnerisa kingorna qanoq ililluta aningaasarsiornikkut
nunatta pissarititai iluaqutigisinnaavagut, taamaaatumik
nalilesueqqittariaqalerpugut siunissami inuttaasut qanoq
ingerlaqqeriarnissaminnut paasiumasaat ingerlateqqinneqassappata.
Taavalu naggataatigut Naalakkersuisup oqaasii ilurivallaanngilakka ilaatigut
oqarmat pisariaqanngitsumik ajugaaniuttarnerit maanngaanniit
oqaluttarfimminngaanniit atormagit. Oqaluttarfik manna uagut ajugaaniunnertut
atunngisaannarparput, kisianniliuna ilurinngisatsinnik aaqqikkusutatsinnik
oqaluttarfik manna atortaripput. Tamaattumik ajugaaniumnnermut
sangutinneqassanngilaq innutaasunuku pillugit oqallittartugut, taakkununnga
pitsaanerpaaq anguniarlugu - ajugaaniunnata. Qujanarujussuaq
periarfissikkasinga.
Hans
Enoksen, Aalisarnermut,
Piniarnermut Nunaqarfinnullu Naalakkersuisoq, Siumut.
Oqaaseqartoq kingulleq ila aamma nassuilaartassagutta ilaanni ajorneq
ajorpoq. Ajoraluartumik maangaanniit miserratigineqarsinaanngilaq
ajugaaniunnerit annertuumik ingerlanneqartarput, taanna
nassuerutigisinnaasariaqarparput tamatta.
Otto Steenholdtip oqaasii inuttaata paasisimammagit tapersersoraluarlugit
immaqa niaqquma tunuani akerlilersorniarikka,
taamaattoqanngilluinnaqqissaarpoq. Saneqqukkumingaatsunik tassani, soorlu
akissuteqarninni oqaatigereerpara ilumoortoq Ortup ilaatigut oqaasii
assortoruminaatsut, taamaammat misigisimassanngilaq isumai
akerlilersorniarsarigikka.
Taavalu aamma oqaatigisaa una ataatsimeersuarnerit nalilesorneqarnissaat,
oqarpunga Inatsisartuni uagut nalilersortariaqarparput, soorunami aamma
nalungeqqissaarpara uanga peqatigiffimmi siulittaasuunikuugama ilakka,
siulersuisoqatigikka aamma taamatorpiaq isumaqartut, ilumut
ataatsimeersuarnerit taamatut ingerlatiinnarneqassanersut, ilaatigut namminneq
apequserpaat, tassalu aningaasanik aatuilluarnissaq aamma siunnerfigaat,
pitsaanerussanngikkaluarnersorooq nammineq suliniutiminnut taakku aningaasat
atoraanni, ataatsimeersuarnerit nangeqqittaqattaarnerannut
tutseqattaaginnarnagit.
Taavalu aamma siunnersuuteqartup taanna Kattusseqatigiit pillugit
oqaatigisara aamma oqaluttuata mamagisaa siunnersuuteqartup naqqiiffigimmagu
taanna tusaatissatut tiguara, tassa imatut paasineqassanngitsoq nunaqarfiit
100-inik inullit imaluunniit sinnerlugit inulli qanoq nalilerneqassanersut
maangaanniit, taanna paasilluarparput.
Tullianik oqaasiliulerussi taanna eqqaamallualaarumaarparsi
paatsoorneqarsinaasut ersarissarneqarnissaat.
Taavalu aamma siunnersuuteqartup siunnersuummini oqaatigisaasa ilaani
siullermeerama akissuteqarfiginiarlugu puigorakku, tassalu Upernavik Kujalleq
assersuutigaa, tassani susoqarsimanngitsoq, kisianni nalunngilara
Naalakkersuisoq, Siimuut Naalakkersuisuunermi nalaani taakkununnga
angalanikuusoq, Upernavik Kujalleq Kangersuatsiaamullu, tassanilu
suliniutissat aamma aallartinneqareersut nagillugit uagut suliniutigissavagut,
neriuppunga pitsaasumik aaqqiissutissamik nassaarsinnaasasugut taakku
nunaqarfiit marluk eqqrsaatigalugit.
Taavalu Inuit Ataqatigiinninngaanniit apeqqutigineqartoq, tassalu
inuutissarsiornermut tunngasunik kommunit aningaasaliisinnaaneranut tunngasut
qanoq atorluarneqartiginersut massakkut taanna toqqaanavissumik
akisinnaangilara, kisianni misissussavarput qanoq annertugisumik
atorneqarnersoq.
Taavalu ukua aamma apeqqutigisatit inuutissarsiornermut tunngasut,
nunaqarfinni suut periarifissaanersut, taakkua soorunami aamma
ilanngutissavagut, pisariaqarmat taakku aamma nalilersoqqissaarneqarnissaat,
siunissami sulineq iluatsissappat.
Taavalu naggataatigut Jakob Sivertsenip misilittagaqarluarluni nalunngilara
ukiorpassuarni niuertorusiunermini sanaalukkanut tunngasut oqaasii
iluatinnartut annertuumik atorneqarnissaat siunnerfigisariaqaripput, tassami
taamanikkut kaaviaartitat taama annertutigisimappata nunaqarfimmi ataatsimi,
massakkut kaaviaartitat annertunerujussuanngorsinnaapput pitsaasumik
aaqqissuussilluarnikkut. Soorlu tamakku inuit misilittagaqarluartut aamma
siunnersuuteqarsinnaanerat Naalakkersuisunit annertuumik ammaffigineqarpoq,
neriuppunga aamma periarfissaqaruit oqaloqatigiilluarsinnaasugut,
saqqummiussatit taakku iluartinnartut aamma nunaqarfinni ingerlariaqinnissami
annertuumik tunngaviliinermi peqataalluarsinnaammata.
Taama oqaaseqarlunga naggataatigut qujavunga neriullunga
suleqatigiilluarnerit aallaavigalugit nunaqarfinni massakkut ingerlatsiniarneq
pimoorunnerullugu aallartissagipput.
Anthon
Frederiksen, Kattusseqatigiit
oqaaseqartuat.
Aap, tassa soorunami oqaaserineqartut pillugit aamma
erseqissaalaaqqittariaqarama pingajussaaneerpunga, tassa Inuit Ataqatigiit
oqaaseqartuata Paninnguup kalaaliminertorneq pillugu oqaasii
naqqiiffigilaarniarakkit, kalaaliminertornerput pillugu misissuinerit
ingerlanneqarnikuupput, tassanilu ersarissumik takutinneqarnikuuvoq
nunaqarfinn isorliunerusunilu kalaaliminertorneq annerpaajusoq, taamaattumik
taanna assortuussutigisinnaagunanngilarput.
Taava tullianik oqaaseqaasiulerutta paatsungananngitsunik nunaqarfiit
pillugit Naalakkersuisup oqaaqqissaaruppaatigut, ilumut paatsoortuusaarneq
taanna qaangerneqartariaqarpoq, ersarissunik paatsorneqarsinnaangitsunik
oqaaseqaatigut atuaqqikkukkit takusinnaavat qanoq oqariartortugut.
Anders
Andreassen, Siumut.
Qujanaq, aatsaaginnannguaq oqaluttut ilaaniit eqqaaneqarmata sanalukkat,
taavalu nalagaafiup tigummigallarmagit nunaqarfiit, oqaatigilaasavara
erseqqissaatigalugu aamma paatsoorneqassanngimmat, sanalukkat siusinnerusukkut
kaaviiaartinneqartutut taaneqartut ilaatigut KGH-p nalaani
katersuinnarneqarsimapput, taavali mio.-erpassuit imaluunniit immaqa oqarutta
3 mio.-it missaanni tunineqarsinnaajunnaartut uninngatinneqarsimallutik,
taakkuuppullu aamma assut nanertuutaasimasut, taamaattumillu
oqartoqasinnaanngilaq ajunngitsumik tamarmik ingerlasimasut, kisiannili aamma
tassani imaanngilaq sanaluttartut taanna pisuussutigigaat kisiannili aamma
tuniniaanerup ingerlanerani aammalu nunanut allanut assigiinngitsunullu
tunisisinnaajunnaarnerup nassatarisaanik mio.-it taama amerlatigisut allaat
allatut ajornartumik mattuttariaqarsimapput imaluunniit
tuneqqinneqarsinnaajunnaarsimapput.
Nunaqarfimmiunut iluaqutaagaluaqisut kisiannili tamatuma kingornatigut
annertoorujussuarmik aamma pakatsissutaasimavoq taamatut unitsinneqarmata.
Taanna isumaqarpunga ersarissumik paasineqartariaqartoq, imaanngitsoq
kaaviaartinneqartuaannarsimasut, kisianni katersorneqarsimapput
tunineqaqqissinnaajunnaaramik.
Hans
Enoksen, Aalisarnermut,
Piniarnermut Nunaqarfinnullu Naalakkersuisoq, Siumut.
Tassa Kattusseqatigiinninngaannit oqaaseqartup oqaasii annertunerusumik
aporaaffiginianngilakka, kisianni siunnersuuteqartup nammineq ersarissumik
nassuerutigereermagu taanna ersernerlutuumik allassimanini, taanna pigiga,
taanna erseqqissaassutigilaarniarpara, aporaassutiginianngilara ilissinnut.
Qujanaq.
Ole
Lynge, Inatsisartut
Siulittaasuat, Inuit Ataqatigiit.
Taamaalilluni oqaaseqarumasut tassunga naammassipput, tassalu
apeqqutigigaluallarakku pisariaqartinneqarnersoq ataatsimiititaliamut matuma
kingorna ingerlaqqinnissaa, taamaappasinngilaq.
Atassut kisimi piumasaqarnikuuvoq ataatsimiititaliami
aappassaaneerneqartinnagu ingerlatinneqassasoq, kisianni amerlanerit
naammagisimammassuk tassunga siullermeernera killipparput,
ataatsimiititaliamukaqqaangikkaluarluni aappassaaneerneqarumaarpoq.