Oqaluuserisassani immikkoortoq 42 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut qulingiluaat, ataasinngorneq oktoberip 8-at 2001,
Ataatsimiinnermik
aqutsisoq: Augusta Salling, Siulittaasoqarfimmi sinniisussatut ilaasortaq,
Atassut.
Augusta
Salling, Siulittaasoqarfimmi sinniisussatut ilaasortaq, Atassut:
Taavalu
immikkoortoq 42-mut ingerlaqqissaagut; Nunatsinni inuussutissarsiornermi
ineriartortitsineq pillugu apeqquteqaat aallaavigalugu oqallisigisassatut
siunnersuut. Siunnersuuteqartoq Per Rosing-Petersen saqqummiussissaaq.
Per
Rosing-Petersen, Siumut:
Una
qulequtaq, inuussutissarsiornermik ineriartortitsineq Nunatsinnut
pingaaruteqarnerata ukiunut tulliuttunut annertuumik malunnaateqalertussaanera
politikikkut aalajangiuteqareerneqaraluartoq, minnerunngitsumillu
Naalakkersuisut akornanni eqqumaffigilluinnartariaqarsorinarmat imannak
oqallisissiorpunga:
Ilannguniagara
tikivitsinnagu imaattumik aallarniuteqalaariarlanga: Atlantikoq ikaarlugu
Europamut qiviarutta, minnerunngitsumillu Danmarkimut, ukiut qulikkaartut
sisamat tallimat akornanni, tassa 1950-ikkunniit ullumikkumut
oqaluttuarisaanermi erseqqissumik takuneqarsinnaavoq nunap nammineq ilumini
nukittorsarluarnisami unammillerluarsinnaalerluarnissanilu siunertaralugu
inuussutissarsiutitigut ineriartorneq nunap killeqarfiisa iluani matoqqasumik
pisimasoq.
Soorlu
Danmarkimi allamiunik akornusersorneqaratik, kisiannili allamiunut
malinnaallutik ineriartortitsisimapput, aatsaallu periarfissat tamaasa
ammaaffigineqarsinnaasut isikkoqalermata, misilittakkat aqqusaakkallu
tunngavigalugit nukittulluarlutik unammillerluarsinnaallutillu ilaatigut
EU-mut ilaasortaaneq aqqutigalugu iluaqutigalugulu
ammariartorusaalersimallutik.
Asersuutigissagaanni
silaannakkut angallannermi takusinnaavarput 3. luftfartspakkimik
taaneqartartoq atuutilersimanersoq. Atuutilernissaa aalajangiunneqarmat nunat
tamarmik periarfinneqarnikuupput iluminni inuiattut immikkuullarissusertik
tunngavigalugu suli nukittorsarluarnissaminnut, tassa ukiuni qulikkaartuni
arlalinni akornusersorneqaratik ineriartortitsereerlutik, ilaatigullu
periarfissiissutigineqarluni aamma kattuttaqattaarnikkut
unammillerluarnerulersinnaanissaq,
matut ammaaviginnginnerani unammillerluarsinnaannissamik piareersarnermi
ukiut qulaani taasama qulikkaartut arlallit qaavatigut minnerpaamik ukiut
arfineq-marluk periarfissarisimavaat, aatsaallu maannakkut matut
ammariinngikkunik ammariartulerlugit.
Malunnarpoq
Nunatsinni aamma ineriartorneq taanna orniginartinneqartoq, tassanilu
pingaaruteqarluinnarpoq
nalilissallugu kalaallip europamiusut danskisullu periarfissinneqarsimanersut
nalilersussallugu.
Tamanna
apeqqut inunnik assigiinngitsunik arlalinnik isumasiuereernikkut uanga
nammineq aqqusaartareersimasakka tunngavigalugit akisariaqarsoraanga: Naamik.
Nunatsinni
immitsinnut aperisariaqarpugut siunissaq ungasinnerusoq eqqarsaatigalugu suna
anguniassavarput. Pissutsit Europamiittut Danmarkimiittullu
ornigunartikkutsigit taakku aqqusaarsimasaat periarfissarisimasaallu aamma
uagut aqqusaaqqaartariaqarpagut, inuussutissarsiutitigut ineriartorneq
inuiaat kalaallit iluaqutigissappassuk, tassanilu pingaaruteqarluinnarpoq
tulleriiaarineq.
Taama
oqarninnut aamma ilaatigut eqqarsaatigaara Ssulisa A/S-ip
pilersinneqarsimanera, pilersinneqarnerani kalaallinik pilersitsinissamut
piumassusilinnut iluaqutaanerujussuusimassagaluarpoq politikikkut
anguniakkat ersersinneqarsimasuugaluarpata, kalaallinullu
pilersitserusussuseqartunut
illersuisumik politikeqarsimasuugaluarpat. Tamanna iliuuseq
kukkunerunavianngilaq,
tassami aqqut taannarpiaq danskit nunat allarpassuit nunarsuarmi sumiluunniit
aqqusaaqqaarsimavaat, manna aqqut atoreernikuullugu imminut
taasinnaalernikuugamik nunat siuarsimasut - tassa qallunaatut taasarpaat
industrialiserede lande.
Uagut
qanoq kalaallit inuussutissarsiutinik ineriartortitsivugut?
Tassani
ajoraluartumik suli takuneqarsinnaavoq equnganerujussuaq suli
ersarilluinnartoq, tamannalu annertuumik ernumanaateqarpoq, uagummi kalaallit
inuussutissarsiornermi ineriartornermut peqaanissatsinnut
periarfissinneqanngitta inuiattut eqqarsartaaserput immikkuullarissuserpullu
tunngavigalugit kaassarfigut kaaginnarlugit nunarput teknikikkut ineriartortoq
isiginnaarujuuginnassavarput, ilaatigullu amerlanernik
paasineqarsinnaanngitsunik akisussaaffimmik tunineqarumannginnatta
imigassatsigut ajornartorsiuteqarlutalu imminortarsinnaanerput suli
qanissaqaaq.
Europamiut
aqqusaagaat matut matuumilaariarlugit aqqusaaqqaarniartigit, piareerutta
nukittoreeruttalu ammassaqqaarpagut, oqaluttuarisaanerup tamanna takutereerpaa aqqut taanna
kisimi aqqutissaasoq.
Europamiutulli
ukiut qulikkaartut arlalippassuit pisariaqartinnavianngilagut, uagummi
kalaallit sapinngitsorsuuvugut, suliuna naalakkersuinikkut
aqqutissiuunneqanngiinnartugut aamma periarfissinneqanngiinnartugut. Pissutsit
ullumikkut isikkoqarallartillugit nutaanik eqqarsarniartuulluni,
ilaartuiinnarnersuaq qimallugu, iliuutsit nutaat eqqunniarneri
ajornakusoortorujussuussuaannassapput kalaallit immikkuullarissusaat
eqqarsartaassaallu tunaartarilerneqarnissaat.
Naggataatigut
malugeqqussavara ukua taakkartukkakka nammineq misilittakkakka tunngavigalugit
silaannarmiilli tigusaanatik allataammata, oqallilluarnissassinnillu
kissaappassi. Qujanaq.
Josef
Motzfeldt, Aningaasaqarnermut Naalakkersuisoq, Inuit Ataqatigiit:
Inatsisartunut
ilaasortaq Per Rosing-Petersen nunatsinni inuussutissarsiornermik
ineriartortitsineq pillugu oqallinnissaq siunertaralugu apeqquteqaateqarpoq.
Apeqquteqartup
inuussutissarsiornikkut aammalu aningaasarsiornikkut ingerlatsinermi
pingaarutillit qassiit apeqqutigai.
Naalakkersuisuni
apeqqut ima paasivarput silarsuarmioqatitsinnut qaqugukkut ammanerussanersugut
aammalu qaqugukkut ammannginnerussanersugut apeqquteqartup paaserusukkaa
imaluunniit Inatsisartunut isummersorfigitikkusukkaa.
Namminersornerulernissatta
tungaanut naalagaaffiup assiinngitsunik iliuuseqarluni illersorniartarsimavaa.
KGH kisermaassilluni inuussutissarsiutinut aammalu angallannikkut
pilersuinikkullu
attaveqaatinut aningaasaliisinnaatitaasarpoq, tamannali pingaartumik
nunarsuarmi sorsunnerit aappaata kingorna, sorsunnersuisit aappaata kingorna
atorunnaarsikkiartuaarneqalerpoq, ilaatigut suliffeqarfinnut
inuussutissarsiornermik ingerlataqartunut aningaasaliisartut
aningaasaliinissaannik kajumissuseqalernissaat siunertaralugu.
Naalagaaffimmit
ingerlatitsivinnik amerlanernik tigusinerput ilaarlugu uatsinnut inuiannut
pingaaruteqarnerulersimavoq silarsuaq avatitsiniittoq tunngavigalugu
ineriartornissarput. Taamaaliussagutta ammasuunissaq pisariaqarpoq
pingaartumillu aalisarnermut tunngasunik tigusisimanerput pissutigalugu nunat
aalisartoqarfiusut allat ineriartornerat eqqumaffiginerulersimavarput
aammalu nunat avammut tunisartakkatsinnik pisiortortuusut aningaasaqarnerat
eqqumaffigunerulersimallutigu.
Nunatta
aningaasaqarnera silarsuarmi aningaasarsiornermi aningaasaqarnertut ammasumi
ilaasutut oqaatigineqarsinnaavoq. Ammasumik aningaasaqarnitta kingunerisaanik
silarsuaq avatitsiniittoq tunngavigalugu qanoq iliuuseqarsinnaavugut,
tassungalu naleqqussarsinnaalluta. Ammasumik aningaasaqarnerput pissutigalugu
nunanit allanit aningaasanik taarsigassarsiniarsinnaasarpugut, taama
iliornissarput pisariaqartikkaangatsigu. Nunatta karsia maannakkut taama
iliorneq ajorpoq, akerlianilli ingerlatseqatigiiffiit angisuut qassiit
taamaasiorsinnaasarput, aningaasalersuinissartik siunertaralugu nunanit
allanit aningaasanik taarsigassarsiniarnissartik pisariaqartikkaangamikku.
Aamma
nunatta aningaasaqarnera aalisarnikkut avammut tunisassianut
pituttorsimalluinnarpoq, soorlu assersuutigalugu silarsuarmi raajat akii
qaffasikkaangata avammut niuertortagut isaatitsilluarnissaminnut
periarfissaqalersarput taamalu nunarput isaatitsisinnaalersarpoq aningaasat
amerlanerusut takkussornerat akileraarutitigut akitsuutitigullu
amerliartornerat ilutigalugu.
Akerlianik
silarsuarmi akiusut nalinginnaasumit appasinnerugaangata avammut nioqqutigisat
amerlinissaat pisariaqalersarpoq, kiisalu avammut nioqqutigisat naammattumik
isertitaqaataanissaat siunertaralugu tunisassiornermut aningaasartuutit
apparsarneqartariaqartarlutik.
Nunatsinnit
kissaatigaarput avammut niuerfitsinnit akitsuutit appasissuussasut imaluunniit
akitsuuteqanngilluinnassasoq, taamatorpiarlu aamma nunat allat
naatsorsuutigisarpaat nunarput ammasuussasoq aammalu namminq tunisassiaminik
eqqussuinermut akitsuusiisarnermik niuernermillu killilersuinikkut
illersuissanngitsoq.
Aalisarnikkut,
takornariartitsinikkut, aatsitassarsiornikkut kiisalu nilammik imermillu
atuinikkut isertitaqarsinnaanerput ineriartortissagutsigu
aningaasarsiornitta ammasumik pissuseqarnissaa pisariaqarpoq.
Kingullermik
Inatsisartut nilak imerlu pillugit inatsit upernaakkut ataatsimiinnermi
akuersissutigaat, inatsit inatsisitut sinaakkutaasutut taaneqarsinnaavoq,
tassuunalu qinnuteqartut nunat tamalaaneersut nunatsinneersullu
periarfissaqalerput nilammik imermillu avammut nioqqutissiornermut
akuersissummik pissarsiniarnissaminnut taamalu inuiaqatigiit
isertitaqalersillugit.
Taamaammat
Naalakkersuisut isumaqarluinnarput Nunatsinnin imminermi
aningaasaliisoqartillugu
inuiaqatigiit isertitaat amerliartortissagutsigut taava nunatut
periarfissatuarput tassaassasoq nunarsuarmi aningaasarsiornermut ammasumut
peqataanissarput.
Avammut
niuernikkut unammillertitsinnut nallersuussinnaanissarput immaqaluunnit suli
pikkorinnerunissarput Nunatsinni anguniartuagassaraarput tamatumunngalu
atatillugu nassuierutigisariaqarparput nioqqutissat atugarissaarnermik
pilersitsisussat pisariaqartutut eqqussukkavut amerliartortissinnaagatsigit
aatsaat avammut nioqqutigisavut amerlanerulersikkutsigit.
Taamaakkaluartoq
suliassat ilaanni Naalakkersuisuni soqutigisaraarput niuernermut kikkut
peqataanerisa suliffeqarfiillu qanoq iliortarnerisa killilimmik
nakkutigineqarnissaat. Tassa pingaartumik aalisarnerput illersorniarutsigu
taama iliortariaqarpugut.
Aalisarneq
pillugu inatsimmi paragrafit immikkoortuisa arferngatigut
aalajangersarneqarpoq imartani nunatta aalisarnikkut oqartussaaffiini
inuutissarsiutigalugu aalisarsinnaasut tassatuaassasut angallatit
pigineqarnermikkut nunatsinni angerlasimaffeqartuusut. Kisiannili
Naalakkersuisut
malittarisassat taanna nalinginnaasumik atuuttuusartoq immikkut
akuersissuteqarnermikkut atuutsinngitsoorsinnaasarpaat nunat allamiut
angalattaat attartorneqarlutik imartatsinni aalisarsinnaanngorlugit.
Nunap
immikkoortuini sumiiffinillu ataasiakkaani inutissarsiutinik
ineriartortitsinerup pitsaasunik atugaqarluni pinissaa
qularnaartariaqarparput suliffeqarfiit pioreersut nutaallu ineriartornerat
oqilisaassiviginiarlugu. Taamaammalliuna ukiuni kingullerni suliffeqarfinnik
aallarnisaasut aammalu taakku isumassarsiaminnik pitsaasunik malersuinissaat
piviusunngortitsiniarnissaallu assut isiginiarneqalersimasoq. Aallarnikkat
qaqutigut aallarteqqaarnerminni aningaasatigut imminnut napatissinnaasarput,
misilittakkammi takutippaat suliffeqarfiit ukiut pingasut sisamat
ingerlareeraangamik naatsorsuutitigut ilorraap tungaanut aallartartut.
Nutaamik
isumassarsisimallutik nutaanik aallarnisaaniartunut atugassarititaasut
ingerlaavartumik ineriartortinneqartariaqarput pisariaqartitsinermullu
naleqqussarneqartariaqarlutik. Aammalu nunani unammillertigisatsinni
atugassarititaasut naapertuunnissaat anguniartariaqarparput
atugassarititaasulli sunniutigisinnaasaat Nunatsinni pissutsinut
naleqqussarsimassusiannut attuumassuteqarluinnarppoq, pingaartumik kalaallit
suliffeqarfiutaasa pisariaqartitaat isiginiarneqartariaqarlutik.
Namminersornerullutik
oqartussat suliniutaat siunnersorteqarnikkut, aningaasanik pissarsiniarnikkut,
misilittakkanik paarlaasseqatigiinnikkut aammalu ilinniartitaanikkut
pisariaqartitat tunniunneqarnissaannut sammisuupput.
Aammattaaq
nunatsinni aningaasaleerusussuseq suli pitsanngorsaneqartariaqarpoq.
Taamaaliortoqassappat
nunat allamiut aningaasaataat atorlugit suliffeqarfiit pioreersut
ineriartortinneqarnerat nutaalluunniit pilersinneqarnerat
periarfissaqartariaqarpoq. Nunatsinni ullumikkut aningaasat
inuutissarsiornerup perrassarneqarnissaanut naammattut pigineqanngillat.
Kalaallit piginnittuusussaanerat inuiaqatigiit aningaasaqarnerata
ineriartorneranut kisimiilluni pingaaruteqanngilaq, pingaarnerpaavoq
pilersissallugit suliffissaqartitisneq, aningaasanik isaatitsineq
tamatumuunakkullu inuutissarsiornerup perrasuumik ingerlalernera. Tamatumalu
saniatigut aamma nunat allamiut sulisinnaasut nunatsinni piginnaanerit
qaffassarneqarnerannut peqataassapput, kiisalu suliaqarfinni
suliassaqarfinni aalajangersimasunik ilisimasanik tunniussassaqarsinnaallutik.
Naalakkersuisut
naggasiutigigalugu erseqqissarusuppaat naleraliussatta inuiaqatigiit
aaqqissugaaneranni
iliuusissatut pilersaarutikkut naleraliunneqarsimasup sapinngisamik
siunniusimaannaarnissaa pingaaruteqarmat, taamaalioruttami
inuutissarsiortortatsinnut aammalu nunatsinni suliffeqarfinnik
aallarniiniartunut atugassarititaasut pitsaanerpaat pilersissinnaavagut.
Taama
oqaaseqarlunga siunnersuuteqartoq qutsavigerusuppara apeqqutit taama ittut
maani inimi saqqummiummagit, ilaannikkooriarlutami unittariaqartarpugut
isumaliorluarnissatsinnullu immitsinnut piffissqartilaartarluta nalileraq
atugarput misissuataarlugu aaqqittarlugulu anguniagarput angujumallugu.
Mikael Petersen, Siumup oqaaseqartua:
Inatsisartuni ilaasortap Siumumeersup Per Rosing-Petersenip nunatsinni
inuussutissarsiutinik ineriartortitsineq pillugu oqallisissiaa Siumumiit
ilassilluarparput.
Oqallisissiamik siunnersuuteqartoq isumaqatigilluinnarparput nunatsinni
inuussutissarsiutitigut ineriartortitsinissamut nutaamik
pilersaarusiortoqarnissaanik ujartuilluni ilaatigut oqariartuuteqarmat,
ilumoormammi ulluni nutaani atukkatsinni inuussutissarsiornikkut
ingerlatsinermi sukkasoorujussuarmik nunarsuarmi ineriartortoqarmat, nunat
killeqarfii apeqqutaatinnagit suleqatigiinnerit, niueqatigiinnerit
ilinniartitaanerillu aaqqissugaaneranni, soorlu tamanna EU-mi ilaasortaasut
nunat akornanni ineriartupiloortinneqartoq.
Aammalu Amerikami naalagaaffippassuit akornanni killeqarfitsik
apeqqutaatinngilluinnarlugit nalagaaffeqatigiittut aaqqisugaanermi
inuussutissarsiutitigut ingerlatsinermi sumi nunamiit aallaaveqarneq
apeqqutaatinngilluinnarlugu piumassuseqarneq, ilinniagaqarsimassuseq,
sulisussaqassuseq aningaasaliisinnaassuseqarnerlu qitiutilluinnarlugit
ukiorpassuanngortuni ineriartornerup takutikkaa tamaatut periuseqarneq
unammillersinnaassuseqarnermut aqqutissaasoq assigiinngitsorpassuartigut
pitsaasortaqartoq, allaat nunarsuarmi sakkortoqisumik unammileqatigiiffiusumi
nakuunerpaasumik inissisimalersinnaanermik kinguneqartumik.
Uagut nunatsinni najugaqartut inuit ikittuinnaalluta ukiuni kingullerni
50-ini inuttut atugartuussutsikkut ineriartupiloorsimavugut, allaat
maannakkut silarsuarmi inuussutissarsiornikkut ineriartupiloornermut
malinnaaqqataalluta saniliussinnaalersimalluta, minnerunngitsumik
aalisariuteqarnikkut, avataasiortut eqqarsaatigalugit silarsuarmi
siuarsimanerpaajusutut taaneqartalersimalluta.
Tamanna puigortassanngilarput ajornartorsiuteqarfigut
eqqartortaraanngatsigit.
Aamma eqqaamassavarput kalaallit inuiaat uagut inuiassuarnut allanut
naleqqiulluta piginnaaneqaratta siulitsinnit kingornussimasatsinnik aammalu
attattuartariaqakkatsinnillu pingaarutilerujussuarmik, tassalu inuffigisamut
avatangiisimut pissutsinullu nutaanut naleqqussapallassinnaassuseqarneq,
eqqarsartaatsikkut timikkullu akeqqortuneq.
Taakku piginnaassuseqarnerit kingornutagut paarilluartariaqarpagut
ineriartortillugillu, uagut nunarsuarmioqataasutut kinaassuseqarnitsinnut
tunnaviulluinnartuummata.
Nunatsinni inuiaqatigiittut inuiannit allanit akuugaalluta inooqateqarluta
ingerlaqqinnitsinni piginnaanigut siuliani taasagut nukigalugit
naleqqussaqqittariaqarpugut, nunarpullu tamaat atorlugu aaqqissugaanikkut
nutarterlugu, inuussutissarsiutit periarfissagut tamakkiisumik atorluarlugit,
aporfiusartullu nammineerluta piiartarlugit suliaralugit, allanummi
apereqqaartariaqanngilagut taamaaliorsinnaajumalluta. Nammineruna suliassarput.
Taamaattumik Siumumiit matumunnga oqallinnermut ilanngullugit
innersuussutigeqqissavagut ammaalluni oqallinnermi inuussutissarsiornermut
aaqqissugaanermullu tunngatillugit oqaaserisagut, taakkuummatami
ingerlaqqinnissami anguniakkagut siunissami nunarput tamaat ataatsimut
isigalugu ineriartortitsinissami aallaaviusussat qitiulluinnartussat ilagisaat.
Siumumiillu makku erseqqissaatigalugit oqaaseqarfigissavagut:
Matumani Inatsisartut ataatsimiinneranni inuussutissarsiornermut
tunngassuteqartut inatsisitigut nutarterinerit arlalissuit Naalakkersuisut
ullumi saqqummiuppaat, aammalu ulluni aggersuni suli immikkoortut
arlalissuit inuussutissarsiornikkut ineriartornissamut tunngassuteqartut
sammisartussaavagut, qularnanngitsumik innuttaasunut periarfissiissutinik
nutaanik aaqqiissutaasarumaartunik ilaqartussat.
Aammalu tamatta nalunngilarput massakkut Naalakkersuisut
inuussutissarsiornermut niuernermullu tunngasutigut misissueqqissaarnerit
annertuut ingerlakkaat Inatsisartunit suliakkiissutaasut, matuma qinersiviup
naannginnerani Inatsisartunut saqqummiuneqartarumaartussat. Taamaattumik
Siumumiit tamakku suliassat suliat naalaarlugit atorlugillu
inuussutissarsiuteqarnikkut
aaqqissugaanerup nutarterneqarnissaani suleqataassaagut.
Siumumiit pingaartilluinnarparput inuussutissarsiutitigut nunatsinni
nutaamik ingerlaaseqalernissap piffissaq ungasinnerusoq tunaartaralugu
pilersaarusiorneqarnissaa, tamannalu suliareqqissaarlugu
aallartinneqarsinnaavoq misissueqqissaarnerit massakkut ingerlanneqartut
Inatsisartunit oqallisigineqareerpata, soorlu nunatta iluani avammullu
niuernikkut pissutsit atugaasut misissuiffigineqarnerat, aningaasarsiornikkut
inuussutissarsiornikkullu ullumikkut atugarisaasut misissuiffigineqarnerat,
inunnik isumalluutit pillugit sulisussaqarniarnikkut ilinniartitaanikkullu
pissutsit qulaajaaffigineqarnerat allallu Namminersorneq pillugu
Suleqatigiissitarsuarmit ingerlanneqartut ilanngullugit.
Mannalu oqallinneq iluatsillugu maannangaaq Naalakkersuisugut
kaammattorusuppagut nunatta immikkoortuini inuussutissarsiornikkut
ineriartoqatigiinnissamut tunngasut kommunit, inuussutissarsiuteqartut
kattuffii assigiinngitsut, suliffeqarfiillu assigiinngitsut suleqatigalugit
suliassat isumaginiagassallu aallartisalereeqqillugit Namminersornerullutik
Oqartussat kommunillu, kommunillu suleqatigiilersussat akornanni
utaqqisaqattaannerit pisariaqanngitsut pinngitsoortikkumallugit.
Taamatullu nunat immikkoortuminni inuussutissarsiutitigut
ineriartortitsinissami aningaasalersuinissanut periarfissaasut
qulaajaaffigalugit aallartisarneqalereeqqullugit Sulisa A/S-ip suliarisimasai
ilanngullugit aallaavigalugit, taamatullu kommunit pilersaarutaat
assigiinngitsut atorluarlugit.
Mannalu iluatsillugu Naalakkersuisunut kaammattuutigissavarput Sulisa A/S-ip
siulersuisuisa katitigaanerat nutarteqqullugu, nunap immikkortui kujataa,
qeqqa, avannaa isorliunerusullu Sulisap siulersuisuisuni sinniiseqartilerlugit.
Taamaaliornikkut nunatsinni inuussutissarsiutitigut aningaasalersuinikkut
periarfissaviusut naapertorlugit kommuninillu pingaartinneqartut
aallaavigalugit ineriartortitsisinnaaneq pisinnaaqqullugu. Taakkulu pereerpata
nunap immikkoortuini tamani inuussutissarsiornikkut ineriartortitsinissamik
pilersaarusiornerit ataqatigiissaakkamik ingerlanneqartut
aallartisarneqarnissaat Naalakkersuisunut ilanngullugu kaammattuutigissavarput.
Taamannak Siumumiit oqallississiaq oqaaseqarfigaarput, kaammattuutittalu
ilanngullugit Nalakkersuisunit nalilersorneqarnissaat piumasaralutigu.
Jakob Sivertsen, Atassutip oqaaseqartua:
Qujanaq. Nunatsinni inuussutissarsiornermi ineriartortitsineq pillugu
apeqquteqaat aallaavigalugu oqallisissatut siunnersuut Per
Rosing-Petersenimit saqqummiunneqartoq Atassummit imatut
oqaaseqarfiginiarparput:
Nunatta namminersornerulerneraniit nunatsinni namminersortut
inuussutissarsiutitigut ineriartortitseqataasimanermikkut angusimasaat
ataatsimut isigissagaanni nuannaajallaatissanik arlalinnik
angusaqarfigineqarsimavoq, soorlu takornariaqarnikkut ineriartortitsineq
annertuseriarsimavoq namminersortut peqataalluarnerisigut, nunatta
nunarsuarmioqatitsinnit isiginiarneqarneranut annertuumik iluaqutaasumik.
Nunatsinni namminersortut inuussutissarsiutit ineriartortinneqarneranni
peqataajuarnerat suli ineriartorpoq. Tamatumani namminersortut pisortat qanoq
iliuuseqarnissaat utaqqiinnarnagit takornarissanut unnuiffiusinnaasunik
eqeersimaarlutik suleqataanerisigut neriniartarfiit takornarissanut
ajukkunnanngitsut arlallit pitsanngorsarneqarlutik nutaanillu
pilersiortortitsisimapput Atassummit assut nuannaarutigisatsinnik, tamakku
nunatsinni suliffissaqartitsiniarnikkut aningaasarsiornikkullu nunatsinnut
assut iluaqutaasimallutik.
Aamma eqqaanngitsoorneqarsinnaanngilaq silaannakkut angallassinermi
namminersortut, soorlu Tasiilami Ittoqqortoormiunilu ilaasunik,
minnerunngitsumillu takornariarpassuarnik angallassisalersimanerat
nersortariaqarmat, pingaartumik Tasiilami takornariaqarnikkut tamanna assut
innuttaasut suliffissaqartinniarnerannut annertuumik iluaqutaasimasoq
maannakkut takusinnaagatsigu.
Aamma eqqaamaneqartariaqarpoq nunatsinni suliffissaqartitsiniarneq
eqqarsaatigalugu namminersorluni pisiniarfeqarnikkut ingerlatsisut maannakkut
ingerlatsinerat pitsaalluinnartumik ineriartortinneqartoq takugaanni
nunatsinni inuutissarsiornikkut maani nunaqavissunik peqataaffigineqartut
ingerlatsinerat nersualaartariaqarmat, naak pisortanit
unammillerneqaraluaqalutik
nammineq aamma sapinngissusertik takutitaat kusanartoq matumani
eqqarsaatigalugu.
Tamannalu politikikkut tapersersortuarneqarnissaanik Atassummit
pisarnitsitut peqataaffigiuassavarput malinnaafigilluarumallugulu, inuit
nammineersinnaasut nunatsinni amerlanerulernerisigut suliffissat
amerlanerusut pilersinneqarnerannik tamanna kinguneqassammat.
Apeequteqaateqartoq tunngavilersuummini ima allappoq, issuarpara: Ilaatigut
EU-mut ilaasortaaneq aqqutigalugu iluaqutigalugu
ammariartorusaalersimallutik, issuaaneq naavoq. Tamatumani Danmark
eqqarsaatigalugu taamatut allappoq. Atassummit erseqqissartariaqarparput
Danmark EU-mut ilaasortaanermigut inuussutissarsiutinik ineriartortitsinermini
annertuumik tapiiffigineqartarnini, namminerlu periarfissani atorlugit
ingerlatsimmat, tamannalu suliffissaqartitsiniarnikkut namminersorlutillu
inuutissarsiuteqartunut annertuumik siuarsaataaqisoq nalunnginnatsigu.
Uaguli maani nunatsinni periarfissagut allarluinnaapput, uagut kisitta
aningaasatigut isertissinnaasagut toqqammavigalugit taamaallaat
inuutissarsiutitsinnik ineriartortitsinissatsinnut periarfissaqarpugut,
taamaattumik nunat allamiut inuutissarsiutinik ineriartortitsinerat nunatsinni
pissutsinut sanilliunneqarsinnaanngillat.
Apeqquteqaammik saqqummiussaqartoq ilaatigut ima allappoq: "Pingaaruteqarluinnarpoq
nalilissallugu kalaallit europamiusut danskisullu periarfissaqarsinnaanersut
nalilersussallugu, tamanna apeqqut inunnik assigiinngitsunik arlalinnik
isumasiuereernikkut uangalu nammineq aqqusaareersimasakka tunngavigalugit
akisariaqarsoraanga " naamik?.
Atassummit ileqqorinngilarput inunnut ataasiakkaanut tunngassuteqartut
oqaluttarfiit pingaarnersaanni, tassa maanngaanniit oqallisigisarlugit,
taamaattumik apeqquteqartup oqallisissiaa
toqqartumik oqaaseqarfiginissaa ajornakusoortissimavarput.
Erseqqissasavarpulli taamaakkaluartoq inuussutissarsiutinik nutaanik
aallartitsiniartunut tapersersuiuarnissarput peqataalluarnissarpullu matumuuna
Atassummit oqaatigeqqipparput, suliffissammi suugaluartulluunniit nunatsinni
suliffissaqartitsiniarnermut annertuumik iluaqutaasartut nalunnginnatsigik.
Taamatut oqaaseqarluta Atassummit apeqquteqaat aallaavigalugu oqallinneq
oqallisissiaq oqaaseqarfigaarput. Qujanaq.
Lars Sørensen, Inuit Ataqatigiit:
Inatsisartuni ilaasortap Per Rosing-Petersenip apeqquteqaat aallaavigalugu
oqallisisisassatut siunnersuutaanut qujalluta siunnersuuteqartutullu
oqarneratuut qulequttap pingaaruteqassusia tunngavigalugu maani
oqallilluarnissamik Inuit Ataqatigiinniit kissaateqarpugut.
Inuit Ataqatigiit isumaqarpugut inuussutissarsiornikkut
ineriartortitsinissamik sutigut periarfissaqarluarnersugut sutigullu
killilimmik pisinnaasaqarnersugut nalilersortuassallugu pingaaruteqartoq.
Aallaqqaammut erseqqissumik oqaatigerusupparput inuuniarnikkut
tunngavigisavut aammalu inuussutissarsiornermi aningaasarsiornikkut
ingerlatavut immikkoortinneqarsimajuarnissaat pisariaqartutut isigigatsigu.
Maanilu oqallissaarummut ilanngullugit makkua Inuit Ataqatiginniit
saqqummiukkusuppavut.
Ullumikkut nunatsinni inuussutissarsiornikkut tunngavisigisavut inimi maani
siusinnerusukkulli tamatta isumaqatigiilluta naqissusereersimasavut
aallaavigalugit oqallinnissarput pingaaruteqarpoq. Ullumikkut
killiffigisimasarput aammalu misilittakkavut tunngavigalugit oqartariaqarpugut
pingaartillugu isumalluutinik uumassusilinnik tunngaveqartuarnerput suli
patajaallisaqqissallugu pingaaruteqartutut isigigatsigu.
Taassuma saniatigut isumalluutinik uumaatsunik iluaquteqarniarnerput
isigaarput siunissaq ungasinnerusoq qiviarlugu periarfissatsialaasoq.
Tassanilu ilaatigut sermeq imerlu pillugit periarfissavut upernaaq manna
Inatsisartuni inatsisiliullugit suliareriikkavut eqqaasitsissutigiinnassavagut.
Kiisalu pingajuattut tunngavigisarput tassaasoq takornariartitsinikkut
periarfissat.
Inuit Ataqatigiinni pingaarluinnartutut sanioqqukuminaatsutullu isigaarput
aalisakkanik allanillu qalerualinnik aammalu killeqartumik imaani
miluumasuneersunik nunatsinnit avammut niuernitsinni
tunngavigisaqartuarnerput patajaallisaavigisariaqarmat.
Isumaqarpugut Inatsisartuni partiit allallu maani sinniisuutitaqartut
tamattaalluta tunngaviusumik isumaqatigiissutigisariaqaripput
isumalluutitsinnik uumassusilinnik atuinerput piujuaannartitsinermik
tunngaveqartutut ineriartortittariaqaripput. Taassumalu saniatigut
atorluaanerunissamik ingerlatsinissarput suli sukateriffigisariaqaripput.
Isumalluutivut uumassusillit piuaannartinneqarnissaatigut taava siunissaq
ungasinnerusoq qiviarlugu nunatta ineriartornera qajannaatsumik
qulakkeerneqartissinnaavarput. Tamatumanilu pingaaruteqarpoq nunat sanilivut
peqatigalugit inuussutissarsiortortavut aammalu uumassusilinnik
ilisimatoortavut pitsaasumik suleqatigiuarnissaat.
Atuinistinnilu atorluaanerunissarput aamma eqqaavarput. Ullumikkummi
assersuutigalugu aalisakkanik allarpassuarnik suli atorluaanngippallaarpugut.
Puisip neqaanik orsuarnillu atorluaanngippallaarpugut. Qaleralinniarnermi,
raajarniarnermi assagiarsunniarnermilu tunisassiornermi avammut niuernitsinnut
atorsinaanngitsutut igiinnartakkavut periarfissarsiuuttariaqalerpavut.
Inuit Ataqatigiit isumaqarpugut inuiaat kalaaliusugut
nunarsuarmioqatitsinnut nerisassatigut pilersueqataanitsinni aamma
pingaartitavut nammineerluta niueqatitsinnut saqqumilaartittuartariaqarigut.
Eqqumiigineqarsinnaanngilaq ullumikkut periarfissavut imaaliallaannaq allanik
taarsersinnaanngikkallartillugit immikkut pingaartitatsinnik aamma
saqqummiussaqartariaqartassagatta. Tassani ilaatigut niueqatit
paaseqatigiiffiginiarnerannit tamatumani aamma eqqarsaatigaarput.
Tassami isumatusaarnerunngilaq uungaralaannaq isigaluta
aningaasarsiupallanniarnertut pissuseqarluta isumalluutitsinnik atuissagutta.
Isumatusaarnerussaagullu periarfissareriikkavut atorluarlugit
piuaannartitsillutalu atuinerput ingerlakkutsigu.
Siunissarlu ungasinnerusoq qiviarlugu isumallutit uumaatsut, tassalu
aatsitassarsiorneq periarfissat, sermeq imerlu periarfissatsialaasutut
isigaavut. Taakkunanilu nunarsuarmi avatitsinni ineriartornerit qanittumik
nalinnaavigineqarnissaat pingaarteqarluinnarpoq. Soorunalimi taakkuninnga
iluaquteqarnissatsinni inatsisitigut allatigullu aningaasarsiornikkut
inuiaqatigiinnut iluaqutaanerusussaq qulakkeerniartuartariaqarparput.
Naggataatigut nakornariaqarnikkut allatigullu periarfissatta suli
ullumikkornit atorluarneqarnerunissaat pisariaqarluinnartutut isigaarput.
Tamatumanilu pisortat namminersortullu nunatsinniittut qanittumik
pitsaasumillu suleqatigiittuarnissaat sanioqqukkuminaappoq.
Eqqumiigineqassanngilarmi
nalillit nunatsinni pilersinneqartut siunissaq ungasissoq qiviarlugu aamma
inuiatigiinnut iluaqutaanerusussanngorlugit uterartitsisinnaajuarnermik
tunngaveqarluta ineriartortitsinissarput pisariaqartutut isigigatsigu.
Namminersornerullutik Oqartussat, kommunit namminersortut allallu
ingerlatseqatigiiffissuit kiisalu siunnersuinermik ingerlataqartuusut
suleqatiginerisigut nunatsinnut iluaqutaanerusussamik qanoq
siunnerfeqarsinnaanerput ujartuiffigisariaqarparput.
Taamatut oqarnitsinnut ilaatigut peqqutigaarput 1990-ikkut ingerlaneranni
tamatsinnut nalunaarutigineqarmat naalagaaffiup ukiukkaartumik nunatta
ingerlanneqarneranut akiliutigisartagaasa amerlanerpaartaat Danmarkimut
toqqaannartumik toqqaannanngikkaluartumilluunniit uteqqittarnerat.
Taamaannerallu allanngortittariaqarpoq. Tassanilu aamma isumaqarpugut
iliuuserisinnaasavut ilanngullugit maani oqallisigineqarnissaat.
Taamatut oqaaseqarluta oqallissaarisumut isummersuuteqarpugut,
Naalakkersuisullu oqallissaarisummut akissuteqaataat tusaatissatut tiguarput.
Mads-Peter Grønvold, Kattusseqatigiit oqaaseqartuat:
Kattusseqatigiinniit pineqartoq soqutigalugu misissoreerlugu imatut oqaaseqarfissavarput.
Taamatut siunnersuuteqartoq oqallisissiamut saqqummiussimmat Kattusseqatigiinniit iluarisimaarparput. Tassami nunatsinni inuussutissarsiuteqarnikkut ineriartortitsineq eqqarsaatigalugu Naalakkersuinikkut soqutigineqarnerulersinnaanera maannakkut pisariaqartoq ilaatigut oqaatigineqarsinnaammat.
Nunat allat inuussutissarsiornikkut ineriartortitsinerat qiviaraanni soqutiginaateqartoq takuneqarsinnaavoq, siullermik tunisassiornermi unammillersinnaaneq annertuumik nukittorsarneqarsinnaavoq, nunat allat ilaatigut suleqatigineqarnerisigut.
Tassami Kattusseqatigiinniit tikkuarsinnaavarput nunani allani suleqateqarnikkut niuernermi akit unammillersinnaasunngorlugit anguneqarsinnaapput, soorlu aamma maannakkut europa qiviaraanni EU-mi suleqatigiit iluanni tunisassiat imminnut illersorniarlugit akit apparsarneqartarput, ilaatigut annertuumik tunisassianut tapiissuteqarnikkut.
Taamaaliornikkut nunap tunisassiai nunanut allanut unammillersinnaanngorlugit inissinneqartarput. Taamatut nunani allani suleqateqarsinnaaneq tunngavigalugu ilaatigut nunap nammineq tunisassiarisinnaasai nukittorsarneqarsinnaapput nunat allat unammillersinnaasunngorlugit.
Maannakkut nunarput ilaatigut qiviaraanni pinngitsoorneqarsinnaanngilaq nunanit allanit suleqateqarsinnaanerup nukittorsarneqarnissaa. Tassa ilaatigut taamaaliornikkut nunap aningaasaqarnera nukittorsarneqarsinnaavoq, aammalu niuernermut nunatsinni inuussutissarsiuteqarneq pitsanngorsarneqarsinnaalluni.
Naak annerusumik Kattusseqatigiiniit nunanut allanut suleqateqarsinnaaneq eqqartorsinnaagaluarlugu maannakkut oqallisissiami saqqummiisoq eqqaasai oqaaseqarfigissavagut.
Nunatsinni inuussutissarsiuteqarnikkut ineriartortitsisinnaaneq annertusarneqartariaqartoq ukiuni kingullerni oqaatigineqartariaqarpoq, nunami suliffissat ukiuni kingullerni annertusarneqanngippat nunami suliffissaaleqisut annertuumik qaffakkiartulertussaapput. Taamaattumik maannakkut ilaatigut pinngitsoorneqarsinnaanngilaq nunatsinni inuussutissarsiuteqarnikkut ineriartortitsisinnaaneq.
Kattusseqatigiinniit pingaaruteqartutut isigaarput nunatsinni pisuussutitta pilersitatta nunatta iluani aningaasarsiornikkut nunap nukittorsarneqartariaqarnera, qanoq iliornikkut nunatta iluani pisuussutitta atorluarnerisigut aningaasarsiornikkut nunarput nukittorsarneqarsinnaava? Qanoq iliornikkut nunatta iluani aningaasat aningaasarsiornikkut isertinneqarsinnaappat, nunatta iluani inuussutissarsiuteqarnerup ineriartortinneqarneranut atorneqarsinnaappat?
Kattusseqatigiinniit
isumaqarpugut nunatsinni sanaartorneq qiviaraanni nunani allani maannakkut
suli isumalluuteqarpallaartugut. Atortussat
tungaasigut aamma sulisoqarnerup tungaasigut. Qanoq ililluta nunatsinni
najugaqartut annerusumik sulisorineqarsinnaappat? Qanoq aamma iliornikkut
nunatsinneersut atortussat atorluarneqarsinnaappat? Nunatsinni sanaartorneq
qiviaraanni ilaatigut pinngitsorneqarsinnaanngilaq nunatta pisuussutai
atorlugit sanaartornerup ingerlanneqarnerulernissaa ujartorneqartariaqarmat.
Sulisa A/S pilersinneqarmat Kattusseqatigiinniit neriuutigisimavarput,
nunatta inuussutissarsiuteqarnerup ineriartortinneqarneranut aamma
pineqartoq peqataalluarumaartoq. Maannali ilaatigut aningaasaliissutit
killeqarnerat pissutaalluni pineqartup ineriartortitsisinnaanera
killeqarsinnaasoq oqaatigineqartariaqarpoq.
Maannakkut pisariaqarluinnarpoq nunatsinni inuussutissarsiuteqarnikkut
ineriartortitsisinnaanerup pitsanngorsartariaqarnera, taamaaliornikkut
nunatsinni aningaasarsiorneq ilaatigut pitsanngorsarneqarsinnaammat.
Taamatut naatsumik oqaaseqarluta oqallisissiami saqqummiisoq
Kattusseqatigiinniit iluarisimaarparput.
Per
Rosing-Petersen, Siumut:
Siullermik
soorunami qujaqqaarusuppunga oqaaseqartunut tamanut, partiinut,
Kattusseqatigiinnut aammalu Naalakkersuisut sinnerlugit Josef Motzfeldtimut,
Aningaasaqarnermut Naalakkersuisumut.
Tassunga
ilanngullugu ukua akissutikka nalinginnaasumik toqqammavileriarlugit
ataasiakkaanik partiit oqaaseqartuanut, Kattusseqatigiillu oqaaseqartuinut
uteqqilaarumaarpunga.
Naalakkersuisut
akissuteqaataanut paatsoortoqannginnissa pingaartikkakku
erseqqissaatiginiarpara una, nunat akornanni niueqatigiinneq pineqanngimmat, aammalu tamanna
innarlerneqarnavianngimmat oqallisissiama siunertaanut naapertuuttumik
iliuuseqaraluarutta. Tamanna assersuutigalugu Island ajornanngitsoq
takutereerpaa.
Quppernerup
aappaani nunat allanut nallersuussinissamut tunngatillugu oqartariaqarpunga
isumaga malillugu nallersuussinnaasutut nalileruminaatsikkakku, oqarnittuut
nunat allat aqqusaagaat uagut nunatsinni aqqusaarsimatinnagit pisinnaasagut
periarfissaqarpugullu taamaasiornissatsinnut, soorlu aalisarneq pillugu
inatsimmik § 6-nni illersuinertalimmik politikkeqartugut. Taassumalu avammut
niuertanitsinnut ajoqutaarnera ersinngitsoq takusinnaagatsigu timitalerlugulu.
Naalakkersuisut
isumaqatigaakka oqarmata qupperneq pingajuanni, imatut oqarmata. "Nutaamik
isumassarsisimallutik suliffeqarfinnik nutaanik aallarnisaaniartunut
atugassaritititaasut ingerlaavartumik ineriartortinneqartariaqarput,
pisariaqartitsinermullu naleqqussarneqartariaqarlutik". Illuatungaatigulli
akueriuminaatsillugu pingaarnepaatinneqassappat suliffissaqartitsineq
aningaasanillu isaatitsineq tunaartaralugu ingerlasotoqqat, kalaallit
sulisartutut inissisimaannarnissaa Naalakkersuisut kissaatigiinnassappassuk.
Suliffinik piginnittutut pilersitsisutullu ikkusimanissaa Naalakkersuisut
qulaani pingaaruteqanngitsutut inissittariaqanngitsutut isigissappassuk.
Tassami
aamma tassani qaammaasat, misilittakkat nunatsinniiginnarnissaat tamatta
pingaartittariaqarparput. Piginneqatigiiffimmi aallartilluariarlutik
aningaasarsiorneq naammagiunnaaraangamikku aneqqittarnerisa aningaasat kisiisa
aniatinneq ajoramikkit, kisiannili aamma qulaani taasakka
qaammaasaqarnerulerneq, misilittagaqarnerulernerlu ilanngullugit tamaasa
annittaramikkit.
Siunissarlu
ungasinnerusoq eqqarsaatigalugu taakkua pingaarnerusutulluunniit
inissisimapput, ineriartornermi qitiulluinnartuummata nukittorsaataallutillu.
Assersuutigalugu
sangusaarluni World Cupimi sangusaarlutik ilaasinnaannginnitsinni, paarngorneq,
pisunneq, sungiusarnerlu aqqusaaqqaartariaqarpagut oqaannarluta akuunissarput
ajornaqaaq. Taamaattumik nunat Danmarkimisut ittut aqqusaarsimasaat aamma
uagut aqqusaaqqaartariaqarpagut, tamakkununnga naleqqussarnissatsinnut
akuuniarutta.
Pilersaarusiornermi
tulleriiaarineq pisariaqarpoq, aammaarlugulu taaqqittariaqarpara Danmarkitut
50-ikkunni ineriartorsimanerat qimerloorutsigut, 50-ikkunni, 60-ikkunni,
70-ikkunni, 80-ikkullu ilanngullugit, tassa ukiut 40-it nunap iluani
illersugaallutik ineriartorsimapput. 90-ikkunnilu aatsaat ammariartorlutik
aallartissimallutik. Massakkullu suli ammavinnatik, tassa nunat siuarsimasutut
taasartakkatta aqqusaarsimasaat.
Taakku
tunngavigalugit ilaatigut maluginiakkama ilagaat partiini assigiinngitsunik
assersuussisaqattaarlutik ilanngussisaqattaarmata. Assigiinngitsut
iserfiginngikkaluarlugit soorlu Mikael Petersenip Siumumiit taakkartorpai,
tassuuna aalisarnikkut avataasiutitigut qanoq massakkut
inissisimalersimanersugut, allaat nunarsuarmi siuttunut ilanngussimavugut,
kisianni tassani eqqaamassavarput taamaasiornitsinni aamma
toqqammaviulluinnarpoq aalisarnermi inatsimmi taanna § 6, tassanilu
illersuisoqarluni politikikkut illersugaallutik ineriartorsimapput
avataaninngaanniit akornusersorneqaratik. Qanormita issimassagaluarpa aamma nunatsinni nuna
qaavani taamannak inuussutissarsiornermi ineriartortitsisoqarsimassagaluarpat,
immaqa massakkut nukittoorujorujussuulluta. Qallunaaluanngitsumik oqassuunga,
tassa massakkut pissutsit nunatsinni imaakkamik ilaa, inuussutissarsiorlutik
namminersortut qiviarutsigit, tassani namminersortuni 90%-i
nunatta avataaninngaanneersuupput, taavalu nunaqavissut
10%-iinnaallutik, tassani ukiut 22-issaa namminersorneruleraluarluta suli
pissutsit taamaanneri, equnganeri tassani takussutissaasoq ersersippaa, nunani
aamma inuussutissarsiornermi § 6-itut ittutut aalisarnermi
inuussutissarsiornermi periarfissatut ittunik pilersitsisoqarnissaa amma
periarfissiisoqartariaqartoq.
Atassumminngaannit
Jakob Sivertsenip issuaasaqattaarnermini ilaatigut tikillatsiapaa, tassani
EU-mi Danmarki EU-mi ilaasortaalluni ineriartortitsisimanera. Kisianni una
eqqaamassavarput aamma Danmarkip naalagaaffittut inuussutissarsiornermi
ineriartorsimanera 50-ikkunnili taanna eqqartugaavoq, 60-ikkut, 70-ikkut,
aatsaat 70-ikkut aallartilaartut EF-imi ilaasortanngornikuuvoq,
taamanikkullu inuussutissarsiornermi ineriartornerup sorlaa Danmarkimi
namminerluinnaqqinnaaq tamakku tamaasa pilersereersimallugit.
Inuit
Ataqatigiinniit Lars Sørensenip assigiinngitsut periarfissat
taakkartoqattaarpai, taakkuninnga periarfissanik taakkartuineq ajunngilaq,
aamma tassani oqallinnermi aamma tamakkua pisariaqarput, kisianni kikkut
tamanna timitalissavaat? Kikkunukua periarfissinneqassasut? Taamannak aamma
suna tamaat matu qiverlugit taamannak ingerlatsissuugut? Imaluunniit tassani
nunatta inoqqaavi ? uagut kalaaliusugut immikkut periarfissinneqassuugut?
Imaluunniit taamannak aamma aningaasatigut periarfissalunnerunerput atorlugut
imaluunniit ajoqutigalugu taamannak aamma kalitaaginnassuugut? Tamakkua
tamaasa eqqarsaatigalugit una aamma oqallisissiaq saqqummiuppara.
Kattusseqatigiinninngaanniit
aamma Mads-Peter Grønvoldip sanaartorneq taavaa
assersuutigissaqqittorujuussuuvoq
aamma uani ilanngussanni Sermitsiap tallimanngormat saqqummiuppaa qupperneq
pingajuannijunnguatsiarpoq Skanska, sanaartornermi piginneqatigiiffissuaq
angisoorujussuaq, massakkut nunatsinninngaanniit tunuarnialersoq. Tassani
aamma malugisariaqartutut uanga pingaaruteqartutullu ajuusaarnartutut
isigaara, tassani aamma ilaa oqarnittuut aningaasat taakkua kisimik
anianngillat, misilittakkat qaammaasaqarneq taakkua
nunatsinniiginnartussaagaluartut
aamma annillugit ingerlanneqartarput. Taanaanna ajuusaarnarnerpaaq nunatsinni,
taakkua nunatsinniitiinnarniarutsigit qulakkeertariaqarparput maani
saaninngortussanik toqusussanik ingerlatsisoqarpat tamakkua qulakkiissavagut
nunatsinni pigiinnarneqarnissaat.
Josef
Motzfeldt, Aningaasaqarnermut Naalakkersuisoq, Inuit Ataqatigiit:
Naalakkersuisuninngaannit
isumaqanngilagut Skanska ukiut marlussuit maani nunatsinniilluni paasisimasai
uagut nalugigut, kalaallit maani. Isumaqarpunga, maani suliaqartut,
sulisitsisut kalaaliugunik qallunaajugunilluunniit maani nunaqartut
ilisimalersimasaat, taavalu aamma nammineq uagut maani Namminersornerullutik
Oqartussani sanaartornermi immikkoortortaqarfitsinni ilisimalersimasat
sumiginnarnaveersaartariaqartut. Soorunami ilisimasat ilusilernerullugit
nunatsinni pigineqalernissaat oqallittarnerni aamma ilisimatuujussutsikkut,
ilisimatusarnikkullu misissuisarnerni nammineq paasisimarusutagut maani
katersuiveqalernissaat ukiuni kingullerni pilersikkiartuaarneqarpoq.
Taamaakkaluartoq ukiut 1990-ikkut ingerlanerini sanaartornermut aqutsisoqarfik
maani atuuttuusimagaluartoq atorunnaarsinneqarsimavoq, taamaakkaluartoq
Naalakkersuisoqarfik sanaartornermi ingerlataqartoq massakkut aasaq
ingerlanerani, ukiut matuma ingerlanerani aqutsisoqarfimmik sanaartornermik
nakkutilliinermik sanngeequtaasunik, nukittoqutaasunik misilittakkanik
katersuiniarluni taakkulu atorluarniarlugit kukkussutaasarsimasut
qaangerneqarnissaat, nammineq uagut pisortaqarfitsinni pigilerumallugit,
taamatut aqutsisoqarfimmik pilersitsivoq.
Taamaattumik
oqaluuserisassami matuminnga siunnersuuteqartup suli oqannginnerani
allassimasara isumaqarpunga, oqaaseqartut tamarmik oqaassi tamarmik oqaatigineqartariaqartoq,
imatut qulequtserneqarsinnaasoq: Paarnguinnarsinnaanngilagut,
nikuittariaqalerpugut.
Tassani
siunnersuuteqartup nunarput matoqqagallartillugu nammineq pissassaqqaarluta
aatsaat matu ammalaariartulerumaarippummik oqalunnera 50-ikkunnilu taamatut
pisoqarsimasoq, tassa 1950-ikkut pineqarput. Ullumikkut ukioq 2000-imiippugut.
Aamma
malinnaaniarnerput isumaqarpunga ilaatigut Atassutip oqaaseqartuata
assigiingitsutigut erseqqissorujussuarmik taagaa, takornariaqarnikkut,
unnuisarfeqarnertigut, pisiniarfeqarnertigut, nunatsinni maani nunaqartut
ingerlatseqataanerat ukiut 50-it ingerlanerinnaani ineriartortinneqarsimasut
annikigisassaanngeqaaq, aamma aalisarnikkut oqaatigineqartutuut aalisarnikkut
ineriartorsimanerput aamma Siumut oqaluttuata oqaatigisaattut.
Taamaattumik
aningaasat nunatsinni pisariaqartitagut mattulluta piginneqateqarnata
avataaninngaanniit
aningaasat pisariaqartitagut pissarsiarisinnaanngikkivut Naalakkersuisut
isumaqarnerat
paasivara partiinit oqaaseqartunit tamanit isumaqatigineqarluni
taperserneqartoq.
Pisariaqanngilaq
mattusimaarnissamik oqartoqarpoq, pissutsinut
naleqqussapallassinnaassuseqarnerput
kalaallit pigigipput Siumuminngaanniit oqartoqarpoq, taamaattumik mattulluta
matu parnaariarlugu, matuersaat igeriarlugu misissuerujoorsinnaanngilagut
avatitsinni nunarsuarmioqatigut ingerlasupatarnarlutik sukaruttortut.
Kiisalu
Sulisa arlalitsigut aamma siunnersuuteqarpoq nammineq uparuaanera
aallaavigalugu qularnanngitsumik oqaaseqartut arlallit aamma Sulisa tikippaat,
ilaatigut Siumut oqaaseqartuata oqaatigaa, Sulisap siulersuisuisa
katiterneqarnerat nuna immikkoortuininngaanniit sinniisoqartillugu
ilusilerniassagipput. Ilisimaneqassooq Namminersornerullutik Oqartussat Sulisa
A/S-imi siulersuisunik toqqartagai marluinnaapput. Sulisami
piginneqataassutsit affai inorlugit Namminersornerullutik Oqartussat pigivaat,
piginneqataasut allat tassaapput Royal Greenland-ilu, KNI-lu, SIK-lu,
Sulisitsisullu, Nuna Fondilu. Taakkua agguataarsimavaat, taamaammat
siulersuisunut toqqarneqartartut aktionærimik
ikinnerusunik piginneqataassuseqartut nunatta
suatungaannaaneersuunissaanni toqqartuinissaq Naalakkersuisut tamakkiisumik
oqartussaaffigeqqajanngilarput.
Kisianni
isuma taanna soorunami generalforsamlingimi oqaatigineqarsinnaavoq, taannali
piginneqataasut nammineq aalajangigassarimmassuk Naalakkersuisut
naalakkiutigisinnaanngilaat. Kisianni una nuna immikkoortuini
ineriartortitsinissaq, tassa kommunininngaanniit puttutsikkusupparput
Namminersornerullutik Oqartussat inatsisiliornertigut, imaluunniit
aningaasanik kommuninut bloktilskud-itigut tapiissuteqartarnitsigut kommunit
kajumissaarsinnaavagut, nammineq aamma isumaqarpunga kommunerpassuit
massakkut periarfissaq taanna takukatareeraat ilusilersuillutillu qanitariit,
allaat qanitariinngikkaluartut suleqatigiillutik ikinngutigiinnermikkullu
paarlaateqatigiittarnermikkut ineriartortillugu aallartereeraat, taanna
Naalakkersuisut peqataaffigilluinnarusupparput soorunami, kisianni kiap
siuttuiffigissaneraa, suleqatigiinnikkut taanna ineriartortinneqartariaqarpoq.
Aamma
aatsitassarsiorneq ilaatigut tassa oqaluuserisassanngortinneqartoq
annertukkullakkami, taavalu kisianni erseqqivissumik sunarpiaq pineqarnersoq
immaqa takuneqarsinnaasimannginnermat Inatsisartunut partiit
tupinnanngitsumik nunatsinni inuussutissarsiutitigut ineriartortitsinissamik
ingerlariaqqinnissaq pineqarmat, apeqquteqaatigineqarluni. Isummersorput
ilaatigut aatsitassarsiorneq periarfissatut aamma eqqartorlugu.
Takornariaqarneq, aatsitassarsiorneq minnerunngitsumik aatsitassasiorneq
eqqaassagutsigu mattulluta aatsitassarsiorneq ingerlanniarsarisinnaanngilarput
nunarsuarmi aatsitassat allat nioqqutigeruttoraat. Aasaq Norskit umiarsuarsuat
samani avatitsinni qillerimmat, aningaasarpapiluunersuit 200 mio.kr.
arlalikkaarsuit atorpaat, ilisimalerparput tasamani qilleriffippiaata nalaa
taanna uuliaqanngitsoq. Uagut aningaasat taakkua qaquguunerpoq
angujumaarsimassagaluarpagut. Misissuinerit taamaattut nunat allat
peqatigalugit ammasumik aningaasarsiornermik peqataanitsigut
angumerisinnaavagut.
Aamma
Kattusseqatigiinninngaanniit oqaaseq atorneqarluinnaqqissaartoq erseqqissumik
oqaatigineqartoq tassaavoq, nunanik allanik suleqateqarsinnaaneq
nukittorsarlugu. Tassa imaappor siunnersuuteqartup matoqqanerusumik
ingerlagallarnissamik siunnerfeqarniarnera taanna Naalakkersuisut
pissusissamik periarfissatuaanngitsutut tikkuagarput paasivarput aamma
partiinit allaninngaanniit taamatut isigineqartoq, kisianni oqaluuserisap
siuliani oqaluuserineqartup suliaqqinnerani upernaamut Naalakkersuisut
Inuussutissarsiornermut tunngasunik saqqummiinissamini makkua soorunami
qissimigaarlugit ilanngullugit aamma saqqummiinissatsinni
isumassarsiorfiginngitsuussanngilagut.
Qujavungalu
partiininngaanniit oqaaserineqartunut aammalu siullermik oqareernittut
Naalakkersuisut
sinnerlugit siunnersuuteqartoq qutsavigaara.
Mikael Petersen, Siumut:
Pinngitsoorsunngilanga erseqqissaqqilaassallugu saqqummiussatsinni ilaatigut
kinaassuseqarnermut, kinaassuseqarnitsinnut tunngatillugu oqaaserisarput.
Ilumoorpoq inuiaqatigiit akornatsinni aammalu avataaninngaanniit
nalilersuisartut, nalilersuigaangamik nunatsinni kinaassuseqarnerput
ajornartorsiutigigipput oqaatigisaraangassuk.
Isumaqarpunga tamanna ersarinnerpaasoq inuussutissarsiornikkut ingerlatsineq
eqqartorneqartillugu aamma isiginiartillugu. Soorunami
inuussutissarsiornermik ingerlatagut assigiinngitsorpassuit
nalilersorsinnaavagut taamatut kinaassuseqarneq aallaavigalugu, kisianni
piniarneq aalisarnerlu tassaapput uagut namminerpiarpiaq piginnaanerput
aallaavigalugu ineriartortitagut. Soorunami avataaninngaanniit aamma
sunniuteqartoqarsimavoq annertoorujussuarmik aalisarnerup
ineriartortinneqarnerani, soorlu Savalimmiormiut taasinnaavagut immaqa
taakkuupput nutaamut aalisarnermut ikaarsaariarnermi sunniuteqarnerpaasut
nunatsinni.
Kisianni tassani inuiaqatigiissuserput, kinaassuserput, kalaaliussuserput
annaaqqajaqqajarneqanngilaq, nakussariaannarpoq, kisiannili nunami suliffiit
eqqarsaatigigaanni tassani ajornartorsiuteqarpugut annertoorujorujussuarmik.
Nunami suliffiit eqqarsaatigalugit namminersortut, sualummik sanaartornermik
ingerlataqartut tassani qanga GTO-qarallarmat uagut meeraanitta nalaani
eqqaamasagut aallaavigigaanni nunatsinni namminermi angerlarsimaffinni
suliffeqarfiit aamma kalaallinit pigineqartut amerliartuinnaleraluarsimapput.
Kisiannili ukiuni kingulliunerusuni nunatsinni najugaqavissut ajoraluartumik
nungutaasavissimapput ikittuaraannannguanngorlutik, tassa kalaallit
namminneq ingerlataat.
Tassani ilumoorluinnarpoq kinaassuseqarnerput ersarluppallaarujussuaqaaq,
aamma nakussassaqqinneqartariaqarpoq.
Inuussutissarsiornermi ingerlataqarnermi kinaassuseqarneq
eqqartorneqartillugu aningaasaannaat aallaaviusinnaanngilluinnarput, tassami
imaanngilaq aningaasaatilissuugaanni aatsaat kinaassuseqartoqarsinnaasoq,
naamerluinnaq. Aamma piginnaasatigut akisussaaffimmik tigooqqaanissamut
piginnaasatigut, pisussaaffinnik, nammineersinnaassutsimik pigisaqarneq
kinaassuseqarnermik annertoorujussuarmik tunngaviliisunik qitiuvoq.
Tassaniippoq aamma nakussassagassarput inuussutissarsiuteqarnikkut
nakussassassagutta imaannaanngitsumik pissusissamisoortumillu.
Isumaqarpunga oqaatsit assigiinngitsut aninneqartut partiininngaanniit aamma
imartuut, tamavimmik katerisinneqassappata taava avaqqunneqarsinnaanngitsoq
uaguttaaq Siumumiit oqariartuuterput, taamak nunap immikkoortuini
aningaasartortitsineq pimoorullugu ingerlattariaqaripput.
Qitiusuminngaanniit taakkua ingerlanniarsaralugit
ineriartortikkuminaatsorujussuussammata.
Nunap immikkoortuini piginnaasat aallaaviulluinnaqqissaartussaapput
aningaasarsiornikkut
imminut nappassinnaasumik ineriartorneq anguneqassappat, aamma
kinaassuseqartumik.
Nunap immikkoortui tamarmik immikkuullarissumik kinaassuseqarput, ukiup
qanoq ilineri naapertorlugit tamarmik naleqqussartuupput, sikusartuugunik,
sikusartuunngikkuni, tassa imaappoq avannaa, qeqqa, kujataa, tunu. Tamarmik
immikkut naleqqussarfissaqarput, inuillu naleqqussartuartuupput ukiut
ingerlanerani. Aamma inuussutissarsiorneq taamaappoq.
Nunarput inui piginnaasallu aallaavigalugit ineriartortariaqarpugut
pissutsinullu naleqqussartuarluta.
Josef Motzfeldt, Aningaasaqarnermut Naalakkersuisoq, Inuit Ataqatigiit:
Tassa nunap immikkoortuinut ineriartortitsinissaq eqqarsaatigalugu
kommuniinnaat pinnagit, kisianni aamma suliffeqarfiit nunap immikkoortuini
ingerlaqartut, soorunami taakkua nunap immikkoortuini ilisimasanik
amigaateqarpata, naak immikkoortortaqarfititeraluarlutik Namminersornerullutik
Oqartussat oqartussaaffigisaanni suliffissuit taakkua pineqarpata, taakkua
nunap immikkoortuinik oqartussaaqataanermut annerusumik takutitaqarnissaat
ataatsimeersuarnissani siulersuisut aqqutigalugit ingerlatissavarput.
Kisianni aamma nunap immikkoortuini ilisimasat annertuut maani inimi
pigineqarput, inatsisiliornikkullu periarfissiisarnertigut taakkua
arajutsisimaneqartariaqanngillat maani inimi aamma ilisimasaq taanna
pigigatsigu.
Una tikikkusulluguuna Inuit Ataqatigiit oqaaseqartuata oqaaserisaanut,
atorluaaneq nungusaanerunngitsoq, inuussutissarsiutini ineriartortitsinermi
uumassusillit eqqarsaatigitillugit taanna pingaartittariaqartoq. Taavalu aamma
nunatsinni allaninngaanniit pikkoriffiginerusinnaasarput suli tassaasinnaavoq
uumassusillit atorluarnerugutsigit, pitsaasumik pigiuaannartitsineq
toqqammavigalugu, pitsaassuseq nioqqutigisatsinnit, pitsaassuseq
nioqqutissiornermi, pikkorissuseq tassaasinnaapput uagut kalaallit
nakooqutigisinnaasagut nunarsuarmi peqqarniikullattorsuarmik unammiffiusumi.
Taavalu aamma Naalagaaffiup nunatsinni aningaasaliuttagaasa 2,8 milliard
kr.-iusut ullumikkut, taakkua ilarparujussui pisissutigalugit, Danmarkimut
uterteqqitarigut naatsorsornikannernikuuvoq qanga 80%-it ilaatigut
oqaatigineqartarluni. Taamaattumik nammineq aamma siuliani Maliinannguaq
Markussen-Mølgaardip oqaluuserisassanngortitaa aallaavigalugu nioqqutissiat
avataaninngaanniit sunarparpassuit eqqussukkagut Naalakkersuisut
Siulittaasuata tikkuartagaa maani inimiittut, nammineq maani naleqarnerusumik
pilersitsinitsigut aningaasat amerlanerusut nunatsinni kaaviaarsinnaanerat
qularnaarsinnaagatsigu aamma inuussutissarsiutini ingerlatsiniarnermi taanna
toqqammaviusariaqartoq.
Aningaasat pinngitsoornani 1,8 milliard kr. missaanni nunani
EU-minngaanneersuinnarnut pisissutigisarpagut ukiumut, taakkulu
aningaasarpassuatsiarsuit nunatsinniiginnartissinnaagaanni, soorunami
tamaviisa avataaninngaanniit pisiarisakkagut ullormiit ullormut
pisiarisarunnaarsinnaanngilagut,
kisianni Kattusseqatigiit oqaaseqartuata sanaartornermiluunnit nuna matuma
nammineq tunniussinnaasaanik atortoqarneruneq aamma tassaasinnaavoq
avataaninngaanniit
eqqussuinermut killilerujussuarsinnaasoq.
Asii
Chemnitz Narup, Inuit Ataqatigiit:
Tassa
Inuit Ataqatigiinni inuussutissarsiutitigut ineriartorneq eqqartoraangatsigu,
taava pingaartittorujussuusarparput qallikkut, ilorlikkut inuuneq assigiimmik
ineriartortitsiffiunissaa qulakkeerniassallugu. Tassa massakkut
inuussutissarsiutit pingaartut eqqartorneqartut tassaannerupput qallikkut
inuunermut tunngassuteqartut. Soorunami inuussutissarsiutit aningaasanik
naleqarnerulersitsiffiusut taakkua pingaartillugit ineriartortissavarput nuna
manna. Tassani aamma assersuutigineqarput isumalluutit uumasussillit
tunisassiarineqarnerat ? aap, aamma taassuma saniatigut tikkuartarparput
sanaartornerup iluani suliaqarnermi, aningaasanik naleqarnerulersitsisaratta.
Qallikkut
pissutsit kisiisa eqqartorsinnaanngilagut aamma Kalaallit Nunaata inuunera
ilorleq sanngisuujusariaqarpoq, taanna pingaartilluinnartariaqarparput.
Taamaammat aamma oqimaaqatigiissumik ingerlatitsissagutta
eqqumiitsuliortortavut taakkua pingaartilluinnaqqissaarlugit aamma
periarfissilluarnariusariaqarpagut maannakkuminngaanniit. Tassa taamaattumik
siorna ukiakkut siunnersuuteqarpugut kulturikkut suliniuteqartut, taakkua
pitsaasumik aningaasatigut inissittariaqarivut allaat finanslov-ikkut
akissarsiaqartillugit. Eqqumiitsuliorneq tassa inuussutissarsiutitigut
sukarsuup tallimaattut inissittariaqarpoq. Kalaallit Nunaata inuunera ilorleq
aamma ineriartortuartariaqarmat, Siumut oqaaseqartuata eqqaavaa kinaassuserput
inuiattut, aamma eqqumiitsuliornermiippoq aamma taakkua aningaasanik
kaaviiaartitseqataasinnaapput. Taakkua inuiaqatigiit kinaassutsitta
ersersinniartarpaat isiginnaartitsinikkut, nipilersornikkut, atuakkiornikkut,
qiperuinikkut il.il.
Aamma
nunanut allanut angalaartittarpavut aamma nunanit allaninngaanniit
tikeraartoqartarpugut, eqqumiitsuliornermik suliaqartunik. Aningaasanik
kaaviaartitseqataasarput taakkua. Massakkut eqqumiitsuliortortatta
inissisimaffiat inuussutissarsiorneq eqqarsaatigissagutsigu sukarsuartut
tallimaattut suli inisseqqajaqqajanngillat, immaqa salliligaarannguatut
taamaallaat annertussuseqarput. Taamaattummik oqimaaqatigiinnerusumik
ineriartortitsissagutta piffissanngorpoq taakkua aamma allatuulli
aalisartortatsitut allatulli savaatilittut allatullu pitsaatigisumik
periarfissinneqarnissaat.
Taanna
eqqasitsissutigerusuppara, isumaqarpunga inuussutissarsiutigut ineriartorneq
eqqartussagutsigu puigoqqinngisaannassavarput inimi maani, kulturikkut
suliniartut taakkualu sukarsuaq tallimaattut inissinnissaannut
aqqutissiuusseqataasariaqarpugut.
Daniel
Skifte, Atassutip:
Siullermik
oqaatigissavara Aningaasaqarnermut Naalakkersuisup, Naalakkersuisut
sinnerlugit oqallisissiamut akissuteqaataata ilaa assorujorujussuaq
isumaqatigigakku. Naalakkersuisut oqarput avataaninngaannit
aningaasalersuisalerniartut Kalaallit Nunatsinninngaanniit
tikilluaqqulluarnerusariaqartut.
Tassaasussaammat ilaatigut uanga isumaga malillugu assakaasorsuarmik
kaavisitsisut ilassaat, ineriartornerussagutta. Taamaattumik taamatut
akissuteqarneq oqallisissiamut assut isumaqatigaara nuannaarutigalugu aammalu
tunngaviusumik neriunnerma ilaatut nalilerlugu.
Assersuutigissavara
tassunga oqallinnermi uani eqqaaneqarpoq suliffeqarfissuaq Skanska
aallalersoq, taanna Sermitsiakkut taaneqarsimavoq. Taavaana inuit ilaasa
qularnanngitsumik uggorissavaat, ilai nuannaassapput. Tassunga uani isumaga
ersersinnianngilara, kisianni ugguuna oqaaseqarfiginiarpara.
Uagununa
aamma qularnanngitsumik pisooqataasugut, arlaat pilersorlu inuluarinninneq
nunatsinni atugaavallaaqimmat, taanna ukiuni kingullerni suliffeqarfissuup
taassuma aamma sulisartut qullersaqarfianinngaanniit erseqqilluinnartumik
inuluarineqartarpoq ataasiarani.
Aamma
taamaalissaagut qularnanngilaq ukiorpassuarni nunatsinni suliffissanik
pilersitsisimasut ilaat maannakkut utoqqanngortoq qaquguunerpoq
taamaateriarpat qanorlu pisoqariarpat, qularnanngilaq aamma
inuluarinnittoqassaaq. Sooruna taamaattartugut. Immaqa uagut ineriartornitsinni
sinngatuallaarpugut, taanna ersertarpoq ilaanni kalaaleqatitta ilaat
ingerlallualeriartut, aningaasarsiorlualeriartullu sinngagilertoortaratsigit,
taamaalillutalu ineriartorneq ilorraap tungaanut pisinnagu allaalluinnartumut
pisittarlugu. Isumaqarpunga taanna sinngatuallaarneq atugaavallaartoq taamatut
oqarnerma tunngavissaatut ilaliukkusuppara, uanga upperigakku nunatsinni
inuutissarsiornikkut ineriartortitsinissaq oqallisissiortup siunertaa,
ineriartorluarsinnaasoq aatsaannguaq taasakka ilaatigut tunngavigalugit.
Upperaara inuutissarsiornikkut ineriartorsinnaanissarput kisiannili
taamaaliussagutta immitsinnut piumasaqarfigisariaqarpugut, immitsinnut
piumasaqarfiginninneq taanna annikippallaartutut ullumikkut nalilerpara.
Ilaatigut aatsaannguaq oqaatsit atukkakka sinngatuallaarneq, allamiunik
inuluuginninneq allallu peqqutigalugit.
Taamaattumik
qanoq ililluni anigorneqassanersut ilissi immaqa uannit ilisimaneruarsi,
kisianni ataaseq uanga ilisimavara; periarfissarlu
manna atorlugu taaqqikkusullugu, issuaanerunngitsoq aatsaat
atuartitaalluarnikkut ajornartorsiutit taakkua qaangiaarsinnaavagut.
Atuartitaanerput ? meeqqat atuarfianinngaanniit qummut ingerlaneq suleq
naammanngilaq, atuartitaalluarnikkut aatsaat tamakkua anigorsinnaavagut.
Taamaattumik
naggataatigut oqaannassaanga akissuteqaat Naalakkersuisut akissutaat tassuuna
assut iluarisimaarlugu oqassagama.
Augusta
Salling, Siulittaasoqarfimmi sinniisussatut ilaasortaq, Atassut:
Daniel Skiftemut qujavugut.