Oqaluuserisassani immikkoortoq 45 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusup arfineq-pingajuat, tallimanngorneq oktoberip 5-aat 2001, nal. 15:11
Ataatsimiinnermik aqutsisoq: Ole Lynge, Inatsisartut Siulittaasuat, Inuit Ataqatigiit.
Per Berthelsen, attaviitsoq:
"Ilinniagaqaritsi", inuiaqatigiit taamatut inuusuttunut tamanut kaammattuipput. Ajoraluartumillu amerlavallaatigut takusarparput inuusuttut ilinniarnerminnik naammassinnereeraluit suliffissaqartinneqannginnerat.
Assersuutitut erseqqissutut taaneqarsinnaapput timmisartut mekanikeriisut ilinniakkaminnik naammassinnerlaat nunatsinni timmisartuutileqatigiissuarni ilinniarsimasut ilinniarnertik naammassillugu svend-itut allagartartaaramik sulinerminnik nangitsisinnaanngitsut. immikkut ilinniagarisaat nunatsinni suliffimmi tassaniinnaq atuussinnaasuummat inuusuttut taakku inuutissarsiutissamittut toqqakkaminni ingerlaqqissagunik allatut ajornartumik nunanut allamukartariaqarput.
Uggornartuuvoq sulisussat ilinniagallit suliassaqartinneqannginneri pissutigalugit tigummiinnarsinnaannginnatsigit. Minnerunngitsumik sulisitsisunit tassanngaannartumik atorfissaqartinneqaqqilersillugit paasinarsisimatilluguli suliffimmi nunami allamiittumi atorfinitsinneqareersimasut.
Illuatungaatigut suliffiit namminersortunit pigineqartut piumaffigisinnaanngilagut sulisorisatik piffissamik suliassaqartinngiffiini tigummiinnassagaat. Assersuutit qulaani taaneqartutut ittut takornartaanngillat, sanaartornermi suliaqarfinni arlalippassuarnik taamatut assersuutissaqartoqarpoq. Taamaammat ajornartorsiut taanna nuna tamakkerlugu atuuttoq iliuuseqarfigineqartariaqarpoq.
Taamaammallu Inatsisartut kaammattorumavakka oqaluusereqqullugu qanoq iliorluni eqaatsumik aaqqiissutissamik nassaartoqarsinnaanersoq. Illuatungaatigut inuusuttut suliffeqaannarnissaat qulakkeerlugu illutungaatigullu suliffiit namminersortunit pigineqartut aningaasatigut piginnaasaat innimigalugit.
Uanga nammineerlunga takorloorpara suliami taamaattumi Namminersornerusut siunissami eqiinganerullutik iliuuseqartariaqartut. Soorlu assersuutigalugu suliffiit ilinniagallillu suliffissaaleqisut akornanni periarfissiissutissatut ataqatigiissaarisutut.
Periarfissaasinnaasoq alla tassa Namminersornerusut suliffimmut sulisorisaminnik sapaatip akunneranut nalunaaquttap akunnerini ima imalu amerlatigusuni tigumminniinnartunut tapiissuteqarsinnaanerat. Taamaaliornikkut inuiaqatigiinni piffissani sanaartornikkut allatigullu pisoqarfiuallaanngitsuni inuusuttut suliffimminniiginnartinniarneqarsinnaassapput.
Namminersornerusuniit iliuuseqartoqannginnera Siumullu isigisoqannginnera pissutigalugit nunatta sulisorisanik ilinniarluarsimasunik annaasaqarnissaanut akissaqanngilagut. Oqallilluarisi.
Ole Dorph, Isumaginninnermut Suliffeqarnermullu Naalakkersuisoq, Siumut:
Qujanaq. Inatsisartuni ilaasortap Per Berthelsenip apeqqutigaa inuusuttut ilinniagallit ilinniakkaminnik naammassinnittut suliffeqalernissaat qanoq iliorluni pitsaanerusumik qularnaaneqarsinnaanersoq. Aammalu suliffissat naammanngikkaangata sulisut ilinniarsimasut sulisoriinnarnissaat anguniarlugu qanoq iliortoqarsinnaanersoq.
Inatsisartuni ilaasortap siunnersuummini soorlu flymekaneritut ilinniakkaminnik naammassinneqqammersut suliffissaqannginnerat, tassa nunatsinni suliffissatuaasut ileqqaaruteqarnerata kingunerisaatigut kiisalu aamma sanaartornermik ilinniagallit assersuutitut innersuussutigai.
Inatsisartunut ilaasortap nassuerutigaa suliffeqarfiit namminersortut piumasaqaateqarfigineqarsinnaanngimmata sulisut atorfissaqartinneqanngisanik sulisoqarnissaannut. Apeqquteqaat aallaavigalugu oqallinnissamik siunnersuutikkut ajornartorsiut imminut assortuuttutut ittoq saqqummiunneqarpoq. Tassa inuusuttut ilinniaqaqqullugit kajumissaarneqartarput siunissami imminnut napatilluarsinnaalerniassammata. Illuatunngaatigullu qularnaarneqarsinnaasarani ilinniagaqareerunik ilinniarsimasaminnik sufiffeqalersinnaanissaat imaluunniit suliffitsik pigiinnarsinnaassaneraat.
Naalakkersuisut ajornartorsiut taanna imminut assortuuttutut ittoq ilisimaarilluarpaat. Tamannalu nunatsinni kisimi ajornartorsiutaanngilaq. Nunanili tamani ilisimaneqarpoq. Aamma aalajangersimasumik ilinniagallit sumiiffiit ilaanni suliffissaaleqisarput ilaannili taamatut ilinniagaqarsimasut taakkorpiaat amigaatigineqartarlutik.
Naalakkersuisut isumaqarput nunatsinni atorfinni amerlanerpaani sulisut ilinniarsimasut suli pisariaqartinneqartut ajornartorsiulli imminut assortuuttutut ittoq inuusuttut ilinniagaqareerunik suliffissqarsinnaannginneritik piinnarlugu ilinnianngitsoornissaat angorusunnanngeqaaq. Suliffissaaleqisut naatsorsorneqartarut 80%-tiisa missaat suliamik ilinniagaqarsimanngillat. Taamaammallu ilinniagaqarnissaq ataatsimut isigalugu iluaqutaassaaaq.
Ajornartorsiut taanna imminut assortuuttutut ittoq annikillisarniarlugu iliuuserineqarsinnaasut makku Naalakkersuisut tikkuarusuppaat. Ilinniartitaaneq nunatsinni suliat pisariaqartinneqarnerpaat aallaagigalugu aaqqissuunneqarpoq. Tunngaviatigut ilinniagaqarumagaanni sunaluunniit toqqarneqarsinnaavoq. Tassami ilinniakkat nunatsinni neqeroorutigineqarsinnaaneq ajortut Danmarkimi ilinniarneqarsinnasarput ilinniagaqarnersiutinik pisartagaqaatigaluni.
Ilinniagartuutut naammassisimasut suliffissaqarniarnerat siornatigut misissuiffigineqarnikuuvoq. Maumanilu innersuussutigineqarpoq kalaallit ilinniagartuut naammasserlaat pillugit nalunaarusiaq. Tamanna ilinniartitaanikkut ingerlatsineq pillugu nassuiaammut 1995-imeersumut ilanngunneqarnikuuvoq.
Nalunaarusiakkut tassuuna eqikkaalluni inerniliunneqarpoq suleqatigiissitat isumaat naapertorlugu ilinniagartuutut atorfiit assigiinngitsut tallimat pisariaqartinneqarnerat nunatsinni suliffeqarnerni ilinniakkaminnik naammassinnillutik sulilertartunit suli annertunerusoq. Suli- sussaqarniarneq pillugu misissuinermi ataatsimut tikkuartorneqarpoq teknikkikkut pinngortitalerinikkullu ingerlaqqiffiusumik ilinniagaqarsimasut taamaallaat sulilersinneqarnissaat pillugu annikitsumik iliuuseqarnissaq pisariaqartartoq.
Naalakkersuisut tikkuarusuppaat suliffeqarfiit ullumikkorniit annertunerusumik inuiaqatigiinni inooqatigiinnermi akisussaaffeqarnermik ilisimaarinnittariaqarnerat. Soorlu soraarsitsiniarnermi sulisunillu ikilisaaniarnermi. Tamanna peqatigalugu aamma nuttarsinnaanermut aningaasaateqarfimmik pilersitsinissaq Naalakkersuisut tikkuarusuppaat taanna atorlugu sulisut suliffissalimmut suliffissarsiorsinnaalissapput. Suliniummi suliamik ilinniagaqarsimanngitsut ilaatigullu aamma ilinniagaqarsimasut salliutillugit isiginiarneqassapput.
Nuunnermut sulisitsisumiit nalinginnaasumik akiliunneqarneq ajortut. Aaqqissuussineq taamaattoq qanoq akeqassanersoq, aamma qaqugu piviusunngortinneqassanersoq siunissami qaninnermi eqqartorneqassaaq.
Inatsisartunut ilaasortap apeqquteqaammini erseqqissumik siunnersuutigaa aningaasarsiornerup allanngorartuartup appasinnerata nalaani suliffeqarfiit suliassaaleqinermi sulisunik sapaatip akunneranut akunnerni arlaqanngitsuni sulisitsineranut Namminersornerullutik Oqartussat tapiisassassasut.
Ingerlaaseq atorneqartoq malillugu massakkut inuit namminneq pissuusutiginngisaminnik suliffissaarunnermikkut isertitaaruttut ikiorneqarsinnaapput. Tapiissutit taakku taarsiullugit suliffeqarfinnut tunniunneqartalissappata. Taava pisortat suliffeqarfimmut akilersinnaanngitsumik ingerlasumut tapiisalersinnaalissapput inuit tapertariaqartut tapiiffigissaarlugit.
Suliffeqarfiit inuusuttut ilinniakkaminnik naammassisinnaasumik sulisoqartariaqarnerannik inatsisartunut ilaasortap kissaataa Naalakkersuisut tamakkiisumik tapersersorsinnaavaat. Taakkumi sulinermikkut inuiaqatigiit ineriartornerannut iluaqutaalersinnaassammata. Sulisinnaasut piginnaanermik pisariaqartinneqartumik sapinngisamik pissarsinissaat Naalakkersuisut sulissutigiuarpaat. Tamannalu ilinniatitaanikkut suliffeqarnermilu suliniutitigut pitsaanerpaamik anguneqarsinnaavoq.
Naalakkersuisut taamak oqaaseqarluta oqallinnerup inatsisartuni ingerlanneqarnissaa suliassanngortipparput. Naalakkersuisulli inassutigaat suliniutit aalajangersimasut pillugit inatsisartuni ilaasortap siunnersuutaa siuarsarneqassanngitsut. Qujanaq.
Lars-Karl Jensen, Siulittaasoqarfimmi ilaasortaq, Siumut:
Isumaginninnermut Suliffeqarnermullu Naalakkersuisumut qujavugut. Taava tullinnguuppoq Siumup oqaaseqartua, Mikael Petersen.
Mikael Petersen, Siumup oqaaseqartua:
Sulisorisat annertunerusumik sulisorineqaannarnissaat anguniarlugu
Inatsisartut qanoq ilillutik peqataanerusinnaanerat inatsisartuni ilaasortap
Per Berthelsenip oqallisissiaa Siumumiit imaattumik oqaaseqarfigissavarput.
Oqallisissiaq imaannaanngitsuuvoq sukumiisumillu
misissoqqinneqartariaqarluni. Tassami ilinniartitaanermi suliffeqarnermi
sulisitsinermilu pissutsini aaqqissugaanermut tunngassuteqarami
peqqissaartumik nalilersorneqartariaqarpoq.
Tamannak oqareerluta Siumumiit erseqqissaassutigissavarput soorunami
akuerineqarsinnaannngimmat suliffissaarunnissamut ilinniagaqartitsisarneq.
Aammalu suliffeqarfiit assigiinngitsut sulisoqarnermi politikkeqarnerat
minnerunngitsumik ilinniartuuteqartarnermut tunngasutigut ullutsinnut
pissusiusunut ingerlaavartumik naleqqussarneqartariaqarluni.
Siunnersuuteqartup ilanngullugu saqqummiuppaa taamatut suliamik
ilinniagaqartut ilinniakkaminnik naammassinnikkaangata
suliassaqartinneqartannginnerat pissutigalugu soraarsiinnarnagit pisortanit
akilerneqarlutik sulisiinnartarneqarnissaat
periarfissarsiuussutigineqartariaqartoq.
Siumumi isumaqarpugut taamatut aaqqissuussisinnaaneq aningaasalersuinermik
annertuumik kinguneqalersinnaasoq. Aammalu aqukkuminaassinnaasoq.
Isumaqarpugulli sulisitsisut sulisartut pisortallu akornanni
suleqatigiinnikkut qanoq iliuusaasinnaasut allat
misissoqqissaarneqartariaqartut.
Pissusissamisuunngimmammi ilinniagaqarfiit ilaanni ajoraluartumik
suliffissaarunnissamik
kinguneqarsinnaasumik ilinniagaqartitsisoqarsimasarnera.
Naalakkersuisut akissuteqaataat ersarissoq annertuumillu pissutsinik
nassuiaatitaqartoq tussatissatut tiguarput. Matumuunalu saqqummiussat
ilanngullugit nalilersorneqarnissat piumasaralutigu.
Aqqaluk Petersen, Atassutip oqaaseqartua:
Qujanaq. Inatsisartunut ilaasortaq Per Berthelsen qanoq ililluta sulisorisat
annertunerusumik sulisorineqaannarnissaat oqallisissiamik saqqummiussaanut
tunngatillugu Atassummiit imaattumik oqaaseqassaagut.
Inatsisartunut ilaasortap Per Berthelsenip saqqummiuppaa nunatsinni inuit
ilinniagaqareerlutik suliffissaaruttartut pillugit oqallisissiaq,
assersuuteqarluni immikkuullaarittumik ilinniagaqarlutik ilinniarnerminnik
naammassinninnermi kingorna suliffeeruttunik. Ilanngullugulu annilaanngatigaa
taamatut ingerlaannarnermi ilinniarsimasortatta nunanut allanut
suliffissarsiortariaqalernissaat.
Atassummiit ajornartorsiut saqqummiunneqartoq paasilluarparput. Aammalu
ingelatiinnarlugu oqaatigissallugu ajornartorsiut tassunngaannaq
killeqanngimmat. Tassami nunatsinni ukiuunerani annertuumik
suliffissaaleqinermik eqqugaasartuni ajornartorsiut nalunngisarilluarparput.
Ilaatigut sanaartornerup iluani ajornartorsiut ersarilluartarpoq kommunit
assigiinngitsut malugilluartagaat. Assersuutigalugu sanaartornermik
ilinniarsimasunik pisariaqartitsisussaavugut aaqqissuusseqqinnissarsuarmi.
Saniatigullu sanaartugassat pilersaarutaareersut kommunini aammalu
Namminersornerullutik Oqartussat ataanni naammassisassat eqqarsaatigalugit.
Taamaattumik inuusuttunik sanaartornerup iluani ilinniagaqartussanik
siunissami aggersumi nunarput mikinngitsumik pisariqartitsissaaq. Tamatta
maaniittugut pingaartipparput suliassat nunaqavissunik naammassineqarsinnaasut
soorunami taakkunannga suliarineqarnissaat.
Nunarput silaannaap pissusaanik kinguneqartumik annertuumik sulisoqarnikkut
eqqorneqartartoq tamatta misigisarparput kommuninut sikusartuniittunut
annertuumik eqquisartoq. Ukiukkut suliassaaruttarneq pissutaalluni
ataavarnerusumik suliffeqarunnaarlutik ilinniarsimasamik avataatigut allamik
suliffeqalersartut amerlapput. Aamma tassaniipput sanaartornermi
ilinniarsimasat
assigiinngitsunik sammivillit.
Taamaattumik nunatsinni suliffissarsiuussisarfinni aammalu atuarfiit
ilinniarfiillu siunnersuinikkut ataqatigiissarnissat pisariaqarpoq. Tassami
sumut iluaqutaava ilinniagaqaraanni naammassinermi qulakkeerneqarsinnaanaani
ilinniarsimasaq aallaavigalugu suliffeqarnissaq.
Ilanngullugu ilisimavarput ilinniakkat ilaanni sippulimmik ilinniarsimasunik
peqarluta, kisiannili akissaatit aammalu suliffimmi atugarisat pissutaallutik
suliffiit ornigineqarneq ajortut. Atassummiit ilisimavagut kommunit ilaat
annertuumik suliniuteqartartut piffissami suliassaaruffimmi
sulisitsiinnarniarlutik. Ilaatigut assersuutigilara Asiaat kommuniata
siunnersuutaa
tassalu SIK suliffeqarfiit aammalu sulisut, kommunillu suleqatigiinnerisigut
ukiuunerani sulisitsiinnarniarluni iliuuseriumallugit siunnerfia. Ilaatigut
Namminersornerullutik Oqartussanit peqataaffigineqarsinnaasoq. Tassalu SIK,
sulisut, suliffeqarfiit kommunillu peqatigalugit qaangiuttoornernik katersineq
tapertaliullugu pikkorissartitsinerit. Aammalu suliasat pisariaqartut
takkuttartut ilanngullugit aaqqissuussineq. Taamaalilluni ukiuunerani
sulisunik sulilluartunik aningaasarsiaqartitsiinnarneq aammalu tapiliullugu
pikkorissartitsisinnaaneq ukiuunerani suliunnaartitsinngikkaluarluni
anguneqarsinnaammat.
Taamatut iliornikkut inuit ataasiakkaat ikiorneqarsinnaaput suliffimminnik
tigummineqaannarsinnaanerminnik minnerunngitsumik eqqarsaatigalugu
kommuninut aningaasartuutaasussagaluit sipaarutaasut, soorlu
annertussusileriikkamik ikiorsiinikkut aammalu pisortani ikiorsiissutaasartut
allat eqqarsaatigalugit aamma akileraarutitigut iluaqutaasinnaanera pillugu.
Atassutip pingaartitaraa ataavartumik sulisut pissutsinut
naleqqussartuarlutik pikkorissartittuarneqarnissaat. Atassummiit
pingaartipparput inuup imminut naleqartilluni atorfissaqartutut
misigisimanissaa. Tassami tamatta pingaartipparput inuiaqatitsinni
nammaqataasutut misigisimanissarput.
Taamaattumik Atassummiit pingaartipparput kommunit
nammineerneruleriartornerminni aamma qilersorsimavallaaratik inissisimanissaat.
Taamaalilluni aaqqissuunneqarsinnaasut taariikkagut iluatinnaatillit
anguneqarsinnaasarmata. Suliffissaarukkallartarnermik akiuiniarnitsinni
iluaqutigisinnaasagut.
Taamatut Atassummiit apeqquteqaat aallaavigalugu oqallisissiaq taperserlugu
oqaaseqarfigaarput.
Asii Chemnitz Narup, Inuit Ataqatigiit oqaaseqartuat:
Inatsisartuni ilaasortap sulisorisat annertunerusumik
sulisorineqaannarnissaat anguniarlugu Inatsisartut qanoq
peqataanerusinnaanersut inatsisartuni oqaluuserisassanngortippaa.
Oqaluuserisassanngortinneqartoq
atituumi qulequtserneqarsimavoq. imminilu soqutiginarluinnarluni.
Ilisimaneqarpoq sulisorisat sulisorineqannarnissaat nunatsinni susassaqarfinni
tamani ajornartorsiutaasoq annertooq. Sulisullu
sulisorineqannarnarniissaannut akimmiffiit amerlaqalutillu tamalaajusut.
Oqaluuserisassanngortitsisut qulequtaq erseqqissaateqarfigalugulu
tunngavilersoramiuk oqallinneq aalangersimasumik sammiveqartikkusukkaa
paasinarpoq. Assersuutigivai inuusuttut inuutissarsiutissaminnik
ilinniartooreerlutik allagartartaareeraangamik ilaat sullivimmi
ilinniartuuffigisimasaminnit
atorfinivissinnaaneq ajortut.
Taamaammat Inuit Ataqatigiinni paasivarput oqaluusereqquneqartoq tassaasoq
inuusuuttut ilinniakkaminnik naammasserlaat qanoq ilinniakkaminnut
naleqquttumik suliffittaarnissaat qulakkeerniarneqarsinnaanersoq.
Ajoarnartorsiut qanoq nalinginnaatiginersoq qanorlu annertutiginersoq
imaaliallaannaq nalileruminaappoq. Tamanna Inuit Ataqatigiinni paasiniarlugu
suliffissarsiuussisarfinnut arlalinnut sulisitsisunut sulisartullu
peqatigiiffiinut oqarasuaatikkut saaffiginnissutigisimavaat. Taamatuttaaq
Isumaginninnermut Suliffeqarnermullu Pisortaqarfiup suliffissaaleqisut il.il.
pillugit misissuisimanerannik nalunaarusiaa august 2000-imeersoq
paasissarsiorfigimallutigu.
Tassa pisortatigoortumik paasissutissat taakku arlaannaataluunniit
uppernarsisinnaanngilaat imaluunniit uppernarsisinngilaat inuusuttut
ilinniarsimasut suliffissaaruttarnerat nalinginnaasuusoq. Paarlattuanik
oqaatigineqarpoq sulisussanik ilinniarsimasunik amigaateqartoqartoq, annermik
sanaartornerup iluani, minnerunngitsumillu illoqarfinni angisuuni.
Ilanngullugu oqaatigineqarpoq suliffssaaleqisutut nalunaarsorneqarsimasut
akornanni ilinniagallit naammattuugassaasartut ataasiakkaajunerusulli.
Ukiuni kingulliunerusuni aatsaat tamanna takussalersimasoq
erseqqissaatigineqarpoq. Peqqiilliorneq inuttullu annertuumik
ajornartorsiuteqarneq suliffissaaleqinermut peqqutaasartutut
nassuiaatigineqarlutik. Taakkuli matumani sammineqanngimmata immikkut
oqaaseqarfigissanngilagut.
Per Berthelsenip ajornartorsiutitut tikkuartugaa siunissami
ajornartorsiutaalinnginnissaa sapinngisamik ilungersuuttariaqartoq Inuit
Ataqatigiinni isumaqarpugut. Taamaammat ilinniartitaanikkut
ineriartortitsineq suliffeqarnermullu tunngasut imminnut
ataqatigiissunngortillugit ingerlanneqartariaqarput. Tamatumunngalu
Naatsorsueqqissaartarfiup inuussutissarsiummik ingerlataqartunik
nalunaarsuiffiliaa, taanna 2002-mi naammassineqartussaq, sakkussaajumaarpoq
pitsaasoq. Taamatuttaaq isumalluarfigivagut inuusuttut sumut
ilinniartunngorsinnaanerannik inuusuttunik siunnersuisarnerup ukiuni
makkunanerpiaq nukittorsarneqarnera. Inuusuttut inuussutissarsiutissaminnut
ilinniarfissaminnik toqqaaniarneranni pitsaasumik siunnersorneqarunik
qulakkeerniarneqarsinnaassaaq suliffinni suliffissaaleqilerfiusinnaasunut
sapinngisamik ilinniarfeqalinnginnissaat.
Tassa taamatut naatsumik oqaaseqarfigivarput Per Berthelsenip oqallisissiaa.
Anthon Frederiksen, Kattusseqatigiit oqaaseqartuat:
Qujanaq. Inatsisartunut ilaasortap Per Berthelsenip kissaatigaa Inatsisartut
apeqquteqaat aallaavigalugu oqaluuserissagaat sulisorisat annertunerusumik
sulisorineqaannarnissaat anguniarlugu Inatsisartut qanoq ilillutik
peqataanerusinnaanersut. Inatsisartunut ilaasortap Per Berthelsenip
siunnersuutaa Kattusseqatigiinniit paasilluarlugu taperserparput,
siunnersuuteqartup saqqummiinermini pissutsit piviusut toqqammavigilluarai
paasisinnaallugulu takusinnaagatsigit. Taamattumik paasiuminaatsipparput
Naalakkersuisut akissuteqarnerminni ilaatigut inassutigimmassuk suliniutit
aalajangersimasut pillugit Inatsisartunut ilaasortap siunnersuutai
siuarsarneqassanngitsut, naak naluneqanngikkaluartoq ilumut ajornartorsiutit
pisartut atuuttuartullu iluarsineqarnissaat
qaangiinnarneqarsinnaanngilluinnartut.
Ajornartorsiutit ersarissut ilaatigut Inatsisartuni ilaasortap Per
Berthelsenip paatsoorneqarsinnaanngitsumik saqqummiutereermagit
Kattusseqatigiinniit ilassuteqarfigalugit oqaatigissavarput ilinniagaqartut
arlalippassuit ajornartorsiutigisartagaat pimoorullugit
aaqqiiniarfigisariaqarmata,
matumani aamma STI-mi ilinniartut arlallit Per Berthelsenip siunnersuummini
oqaatigisaatut pineqartarmata. Taamaammat Kattusseqatigiinniit
Naalakkersuisunut kaammattuutigissavarput ajornartorsiutit uani oqallinnermi
pineqartut pimoorullugit iluarsiniarneqarnissaat sulissutigineqassasut
partiilersorneq apeqqutaatinnagu. Qanormi ililluta nunaqavissut siunissami
annertunerusumik isumalluutigisinnaassagaluaratsigit? Qanormi ililluta
namminiilivissagaluarutta ilinniartortatta ilaat sumiginnassagatsigit? Qanoq
ililluta sulisussanik tikisitsisarnerujussuaq aningaasarpassuarnillu
naleqartoq pakkersimaarniassagaluaratsigu? Qanoq ililluta kalaallit
nunaqavissut sulilsorisat tatigineqarnerullutik sulisorineqarnerulernissaat
angusinnaassagaluaratsigu?
Apeqqutissarpassuillu allat eqqartorneqarsinnaagaluartut maanna annerusumik
eqqaanngikkaluarlugit Kattusseqatigiinniit ilungersortumik paaseqqoqaarput
siunnersuuteqartup siunnersuutaa imaaliallaannarlugu
qaangiinnagassaanngimmat, taamaammat Kattusseqatigiinniit
soqutigilluinnarparput
apeqqutip matumani pineqartup malersoqqinnissaanut peqataasinnaanerput.
Otto Steenholdt, attaviitsoq:
Maani suliffimmi nutserisugut pikkorissut suminermilluunniit isornartorsiornagit ilaanneeriarlunga qamuuna kissaatigiummertaraluarpara Naalakkersuisunut ilaasortaq pinnagu oqaluuserisassamulli akissuteqaammut ilusilersuisoq, sagsbehandlerimik taasannguatsiagaat, qallunaatut sagsbehandlerimik taaneqartartoq, nammineq oqaasii atorlugit saqqummiussaa pillugu oqalliseqatigerusullugu. Immaqa oqaatsikka paasineqamisaareerput, Naalakkersuisunut ilaasortat qanii immerneqartartut taakkuninngaanniit.
Oqaaseruna politikkeriniit qaqutiguinnaq atorneqartillugu naapittagara paradoksproblem uteqattaagaa uanga imatut paasigiga, tassaasoq ajornartorsiut sianissutsimut ilisimasanullu akerliusutut pissuseqartoq. Taama isikkulerlugu uanga paasivara. Saqqummiussaq taamatut nalilermagu uanga isumaqatiginngilara. Tassa taanna paradoksproblemitut uanga paasinngilara, tassalu ajornartorsiutitut sianissutsimut ilisimasanullu akerliusutut pissuseqartutuut aamma paasinagu. Taamaattumik ajornartorsiummik oqaluuserinneqqusisoq, tassalu hr. Per Berthelsen oqarfigisariaqarpara ajornartorsiutit ilaat eqqorluinnarlugu saqqummiukkaluaraa. Pisarnerli malillugu annerusumik soqutigalugu oqallisigineqarnissaa maani Inatsisartuni ilimaginngilara. Utoqqatserpunga taama oqarama, massa kingullersaallunga oqalukkaluarlunga. Atagumi, atagumi.
Oqallisissiaq kalaallit nunaminni sulisorineqarnerunissaat pillugu Inatsisartunik oqallitsitseriaraluartarnerit ilagaat. Tassa itinerusumik oqallisigineqaratik qallunaaluarnertut isikkuliinnariarlugu partiit maani ilaannit qinnguluutigineqaliinnartarluni. Qasseeriarlunga nunaqqatigut ilinniarluarsimallutik nunatsinnut uteraluartut nunaminni atorfissaqartinneqanngitsutuut misigalutik aallaqqiinnartarnerat maani Inatsisartut ataatsimiittarfianni inimi tikerialaartarsimagaluarpara. Ilaatigut uparuartortarlugu namminersornerulerneq eqqutilermat nunatsinni inuusuttunut kajumissaarinerujussuarput ilinniaqqullugit, nunarput namminersornerulerpat nunasiaasimanerup nalaanili sulisunik qutsavigineqartariaqartunillu taarsiisussaammata.
Ukiunut taasanut allatut ajornartumik, tassa uagut nammineq nunaqqatitsinnik inuttaliisinnaanngikkutta atorfinitsitsigallartarnissaq taamanili siunniussimasarput, ukioq manna tikillug qatangiinnartutut oqaatigisariaqarpoq. Pissutaasartut maani Landstingimi ilisimaqaagut. Nammineq nunaqqatitta atorfik ilinniarlugu nunatsinni atorfigilersinnaasaat taakkununnga atorfinitsitsiumannginnerni utoqqatsissutipalaatut oqaatigineqaannartartoq tassaavoq, atorfik inuttaqareersoq nalunngisatsinnik qangaaniilli atorfinnik qerrusimasunik. Nunaqqatigut, siunissamigooq nunatsinni isumalluutigut, nunatsinni suliumallutik tikikkaluit allat avataaniit tikisinneqartartut assigalugit atorfik aallaavigalugu ininik illunilluunniit pissaqartinneqanngillat. Aapparisaat, naak aamma ilinniarsimasuugaluit atorfissarsiuunneqanngillat.
Allarparujussuit taagorneqarsinnaagaluarput, kisiannili maani ataatsimiinnermik aqutsisoraa, utoqqatserpunga oqartariaqarama, partiit politikkerilluunniit iternik aluttuisut annerusumik qinngulutsikkumanagit itisiliiniarnera tamaanga unitsittariaqaleriga.
Oqaluusissamik saqqummiussisup Per Berthelsenip ersarissumik taavai ilinniarnerminnik naammassinnereeraluit suliffissaqanngitsut, timmisartut mekanikeriisut ilinniakkaminnik naammassinnerlaat, tassa sanaassanik suliassanut ilinniarnermi inersimanermik allagartaq svendeprøvemik qallunaatut taaneqartartoq pissarsiaralugulu suliffimminni sulinerminnik nangitsisinnaajunnaartartut. Tamanna sullivinni sumiluunniit takornartaanngilaq.
Ilinniartutut sulisoq iluaqutaalluarsimasoq imannarsuarlu akilersorneqarsimanani taama angusaqartoq sulisitsisumut allagartartaannermigut akitsoraangat, allatut ajornartumik suliffimmi sulisut naammannerat pissutigalugu suliffissaarutsinneqarajummat. Tassalu ajoraluartumik nunatsinni amerlaqisutigut pileraangat pineqartoq nunamut allamut ilinniaqqikkiartunngikkuni suliartorluni aallaannartariaqalersarpoq, nalunagu nunami allami ilinniaqqilluni angusiguni nunatsinnullu uteriaraluaruni oqaaserisama aallaqqaataani oqaasereriikkakka malillugit imminut nuanninngivissumik namminerlu aali nunamini pineqartussanngussalluni.
Tamanna nalunngilluagarput aaqqiivigissagutsigu, qanormi iliorniassaagut? Siunnersuut aaqqiissutaasinnaasoq, tassalu Namminersornerullutik Oqartussat suliffimmut tigumminniinnartumut, tassa ilinniartuminik tigumminniinnartumut tapiissuteqarsinnaanerat siunnersuuteqartumiit tikkuarneqarpoq. Uangalu isumaqarpunga taamatut iliuuseqarsinnaaneq allaat ilinniartuunersiutinut assersuunneqarsinnaasoq.
Nunatsinni suliffiit namminersortut inuusuttunut sanaassanik suliassanut ilinniarnermi inersimanermik allagartartaartunik, svendeprøvertaartunik, tigumminniinnarnisaminnut akissaqanngitsut pisortanit tapiiffigineqartalerunik ilinniartorisimasaminnik tigumminniinnarsinnaalissapput, tamatumuunakkullu kalaallit ilinniarluarsimasut ukiuni makkunani inuiaqatigiit politikkerillumi nilliaatigiuagaat nunaminniit aallaratik uteqqunngisatullu isikkoqaleratik nunatsinni atorfinnut qulliunerusunut piareerlutik utaqqisalissallutik.
Naalakkersuisoq, akissutissannik ilusilersuisoq oqarfigilaariuk sulisitsisup taama iliorsinnaanera ima nalileriissanngimmagu, pisortat suliffeqarfimmut akilersinnaanngitsumik ingerlasumut tapiisalissasut. Naamerluinnaq. Taamatullu oqarneq suliffiutilinnut pinngitsoorsinnaanngisatsinnut naqissusiineruvoq, qularnanngitsumik aamma suliffiutillit kattuffianniit akuersaarneqarsinnaanngitsoq. Siunnersuuteqartoq suliffinnik akilersinnaanngitsumik ingerlasunut tapiissuteqartalernissamik siunnersuuteqanngilluaasarpoq. Saqqummiussami ajornartorsiutitut sianissutsimut ilisimasanullu akerliusutut pissuseqarnerarlugu oqaatigineqartoq tassaavoq, inuusuttut ilinniagaqareerunik suliffeqalersinnaannginnertik piinnarlugu ilinniagaqanngitsoornissaat angorusunnanngitsoq. Tamanna inuusuttut akornanni utoqqatsissutitut atorneqartualerpoq, tusassallugu nalinginnaaleraluttuinnartoq. Allaammi nunatsinni suliffissaaleqisut aamma saqqummiussinermi 80%-ii ilinniagaqarsimanngitsutut ersarissumik oqaatigineqarpoq. Ajornartorsiut taanna sianissutsimut ilisimasanullu akerliusutut pissusilersornerunani kalaallit inuusuttut aamma siunnersuummi isumaginiarneqaraluartut tusartuakkatik takujuakkatillu pillugit ilinniaraluarnikkut saneqqutiinnarneqartuarnikkulli imminnut siunissaaruttutut nalilersulerput, tamannalu inuiaqatigiit qinikkat siuttoralugit piaarnerpaamik allanngorluinnartariaqartutuut nalilertariaqalerpaat, inuiaqatigiit inuusuttaat neriuutaaruttutut pissusillit amerliartuinnassanngippata.
Siunnersuut alloriaataasinnaasoq paasilluarneqarluni Inatsisartunit ilassilluarneqartariaqarpoq.
Per Berthelsen, attaviitsoq:
Uani kingulliulluni oqaaseqartup Otto Steenholdtip saqqummiussai ersaringaarmata siulliuttariaqaraluarpulluunniit, kisianni kingulliutissavakka, uani tulleriiaarluni oqaaseqarneq aallaavigalugu annikitsunnguanik ilanngussaqarusukkama.
Siullermik oqaatigissavara, naak tamanna Siumup oqaaseqartuanik allarluinnartut isummerfigineqaraluartoq, tassanimi oqaaseq tupigisara atorneqarmat Naalakkersuisut akissuteqaataat ersarissoq annertuumillu pissutsinik nassuiaatitaqartoq, oqartariaqarpunga uanga misigisimavunga una assorujussuaq qarsupittumik tiguneqarsimasoq. Akissutaasorlu allatut nalilersinnaanngilara susaartinnaveersaaginnarlunga saqqummiussaq. Sumilluunniit ajornartorsiutip piviusuusup, naak IA-p ilaatigut eqqumiigikujukkaluaraa ajornartorsiut una annertuallaarunnarsimanngimmat allatullu pillugu. Kisianni ajornartorsiutaasup uani saqqummiunniarneqarnera sumilluunniit itisilerlugu pisoqanngimmat, naak ujartugara tassaagaluartoq, arlaatigut suleqatigiilluta ajornartorsiummik aaqqiisinnaanissamik siunnerfilimmik suleqatigiissutigisinnaasarput. Taamaattumik akissut Naalakkersuisut tungaaninngaanniit oqartariaqarpunga, ingerlariaqqinnissamut uanga taanna sumilluunniit atorsinnaanngilara.
Siumup Inuit Ataqatigiillu oqaaseqarneranni tunngaviit assigiinngeqaat. Siumuminngaanniit oqaatigineqarpoq, una ajornartorsiut angisoorujussuusinnaammat, taamaakkami akisoorujussuusinnaasoq, suliassamik annertoorujussuarmik malitseqarsinnaasoq. Inuit Ataqatigiit oqartut ajornartorsiut mikingaarmat ajornartorsiutitulluunniit taasariaqanngitsoq. Tamanna tupigilaarpara, ingammik Inuit Ataqatigiit tungaaninngaanniit taamatut saqqummiunneqarmat. Inuit Ataqatigiit qangali politikkimik soqutigisaqalerama ataqqisarakkit ilinniagaqarniartunut inuusuttunullu sammisunik tapersersuisumik nipeqarlutik oqaluttarmata.
Isumaqarpunga, pingaartuusoq tassani taassallugu tupigineqassanngimmat ajornartorsiut assersuusiorlugu saqqummiukkakku, tassani taallugit immikkut illuinnartumik ilinniarsimasut, tassalu flymekanikerisut timmisartunik iluarsaassisartutut ilinniarsimasut, patsisigalugu ilinniarnertik taanna suliffimmi oqarfigimmatik: Akissaqanngilagut, atorfissaqartinngilassi massakkut. Sumut allamut atorsinnaanngimmassuk atussagunikku, taamaalillutillu ilinniarsimasartik annaanagu, taava nunarput qimattariaqarmassuk? Ajornartorsiut taanna kisitsiserpassuanngorlugit ajornartorsiutitut taaneqarsinnaanngikkaluarpalluunniit isumaqarpunga ajornartorsiutaasoq inuiaqatigiinnut pingaaruteqarluinnartoq. Tassami suaartaatigisartakkatsinnut: Ilinniarniaritsi - tassunga naapertuutinngimmat. Taamaattumik ajuusaarutigaara taamatut qarsupitsigisumik, ingammik Siumup tungaaninngaanniit, Naalakkersuisut tungaaninngaanniit Inuit Ataqatigiillu tungaaninngaanniit saqqummiunneqarmat. Ajuusaarutigeqaara, oqartariaqarpungami InuitAtaqatigiit saqqummiussaa uani atorsinnaallugu, ajornartorsiut aningaasarpassuarnik naleqartariaqanngimmat iliuuseqartariaqartugut. Ajornartorsiut taama mikitigisoq nunatsinni ajornartorsiutaasariaqanngimmat. Taamatut sangutikkusuppara, taamaalillungalu inussianersumik Inuit Ataqatigiinnut taanna qaqillugu, immaqa taanna aallaavigalugu arlaatigut siunnersoqatigiilluni isummersoqatigiillunilu aqqutissamik atorfissaqartumik nassaaqatigiissinnaagatta suli.
Atassutip taasaani nuannarutigilluinnarpara paasinnippaluttumik saqqummiussisoqarmat, tassanilu aamma nammineq naleqassutsimik misigisitsinissaq taanna taaneqartoq, assorsuaq pingaartippara. Tassami ajornartorsiutip uani pulaterfiginiarsarisama ajuusaarnaraluartumik manna inuerutingajalluinnarluni pimmat soqutigineqarpallaarunanngitsoq. Tassani pingaartillugu saqqummiukkakku.
Kattusseqatigiit ersarivissumik taperserpaat, tassalu ujartugara, una taperserneqarsinnaava. Taava qanoq isilluta suleqatigiilluta ajornartorsiut, immaqa angivallaanngitsoq, kisianni ajornartorsiut inuiaqatigiinni akissaqartinngisarput aaqqinniarsinnaassavarput. Kattusseqatigiit tassani suleqataanissamik ersarissumik taasereerput, tamannalu tuppalliutigaara, suli neriukkama una ajornartorsiut sukumiisumik nalilerlugu suleqatigiissutissatut aaqqinniagassatullu suli uterfigineqarsinnaasasoq, naak saqqummiussat ilaatigut oqareernittut uanga tunginnit isigalugit naammaginanngikkaluartut.
Attaviitsoqatima Otto Steenholdtip saqqummiussaa nuannaarutigeqaara, tassanimi ersarilluinnartumik ajornartorsiut uani qulaajarneqarmat, uangaluunniit nammineerlunga qanorluunniit misigissutsikkut ikuttagaanikuullunga misigisimagaluaruma, oqaatsit atorsinnaanngisakka atorlugit ersarissuliutigimmagit nuannaarutigaara, qujanarsuarlu. Uanga nammineq takorloorsinnaasara tassaavoq, soorlu aningaasaateqarfiliorneq. Inuit Ataqatigiit oqarnerattut ajornartorsiut annertunngilaq, kisianni inuiaqatigiinni pingaaruteqaqaaq. Inuiaqatigiinnguani uani takussaasariaqanngilaq. Aningaasaateqarfiliornikkut immaqa periarfissinneqarsinnaagaluarpoq ajornartorsiutip taama ittup ajornartorsiutaajunnaartinnissaa. Ujartugarami unaavoq, inuusuttunnguaq ilinniarsimasoq siunissami isumalluarluni ukiut pingasut, sisamat, tallimat atoreerlugit naammassilluni atorfissaaruttutut misigisimatinneqannginnissaa. Tassanilu eqqarsaatigineruvakka, soorunami imatut ilinniarsimasut allanut inissikkuminaallutik.
Tassani taava ujartorpara aningaasaateqarfinnguaq immaqa tunngavissiisinnaasoq namminersornerulluni, imaluunniit namminersorluni ingerlatsiviuppat, uagut toqqaannartumik akuliuffigisinnaannginnatsigu ersarissarneqareermat taanna, kisianni aningasaateqarfimmut qinnuteqarnikkut angusinnaasarput unaassammat, inuusuttup pineqartup, tassungalu ajornartorsiut angissaqaaq. Inuiaqatigiit qimannginniassammagit aningaasaateqarfik aqqutigalugu suliaminit katataannginnissaa anguniarlugu, immaqa piffissaq tamaat atunngikkaluarlugu, kisiannili ilinniarsimasaminut qimatsinnaveersaarluni ingerlasinnaanissaata qulakkeerniarnissaa atorfeqalersinnaanissaata tungaanut. Ajornartorsiummi una imaanngilaq ataavartuussasoq, qularnanngitsumik ukioq affaq, ukioq ataaseq, immaqa ukiut marluk qaangiuppata nammineq aaqqittussaavoq. Taamaattumik ujartuinnarpara qanoq isilluta piffissaq taamaattoq inuusuttunnguup sequmissutigisinnaasaa pinngitsoortinniarlugu iliorsinnaavugut.
Siunnersuutigiumavara arlaatigut eqqarsaatigineqarsinnaasoq aningaasaateqarfiliorsinnaaneq, taamatut ajornartorsiornermi ikiuiniarnermi atorsinnaasumik, suliffeqarfiup arlaatigut saaffiginnissutigisinnaasaa. Uani tassa pivakka ilinniarsimasut allamik saariarfissaqarsimanngitsut immikkut ilinniagaata ittuunera patsisigalugu.
Taamatut tassa uanga tunginninngaanniit neriuppunga ersarissumik ajornartorsiut una illersorlugu taallugu aammalu tusakkat aallaavigalugit uani ersarissaanikkut paasinarsisoq ajornartorsiut angisoorujussuunngikkaluarni pingaaruteqartoq, angisoorujussuunnginneralu patsisigalugu aaqqikkuminartuusariaqaraluartoq. Siunnersuutigaaralu ilaatigut, immaqa kingusinnerusukkut qaqinneqarsinnaajumaartoq aningaasaateqarfiliorsinnaaneq taamatut ajornartorsiornermi pinngitsoortitsiniutaasinnaasumik. Qujanaq.
Ole Dorph, Isumaginninnermut Suliffeqarnermullu Naalakkersuisoq, Siumut:
Siullermik, maanngaanniit oqaaserineqartunut assut qujanaq. Una oqaluuserineqartoq tamatsinnut pingaaruteqartorujussuuvoq inuusuttut kisiisa eqqarsaatiginagit, kisianni inuiaqatigiinnut tamanut. Aammalu uani oqaluuserineqartumi pingaaruteqartorujussuuvoq meeqqaninngaanniit ajornartorsiutip taassuma sapinngisamik pinngitsoortissinnaanissaata sulissutigalugu aallartinneqarnissaa.
Tassami pisariaqartorujussuaq unaavoq, allaat atuarfimminngaanniit siunnersorneqarluni sapinngisamik kukkunaveersaartumik suliffimmik siunissami toqqaariarsinnaaneq, taavalu taamatut suliffimmik aallartitsigaanni suliffeqarfimminngaanniit ajunngitsumik kiinnerfigineqartarsinnaaneq aasaappat ukiuppalluunniit. Tassani aamma pineqarpoq suliffeqarfinni assigiinngitsuni suliffeqarfiup sulisoqarnermigut politikkia qanoq isikkoqartoq.
Ullumikkut tanna suliffeqarfippassuarni nunatsinni ajornartorsiutaavoq, allaat suliffeqarfissuit annerpaartaat maani pigineqartoq immaqa sulisuminulluunniit politikkeqanngilaq. Taamaattumillu inuit inuusuttuuppata, inersimasuuppata utoqqaappataluunniit atorfissaarunneqaraangamik, tassa anisinneqartarput oqarfigineqarlutik: "Kommunep karsiliarniarit". Tamakkua suleqatigiinnikkut, ikioqatigiinnikkut pinngitsoornatik aaqqinniagassaapput inuup kommunelluunniit ataatsip kisimi nammattariaqanngisai, kisianni ikioqatigiilluni aaqqiivigineqartariaqartut.
Una oqallinneq oqaatigereerpara assut pissanganartoq aamma nuannersoq aamma ingerlaqqittariaqartoq, soorlu arlalinninngaanniit oqaatigineqareersoq. Taamaattumik pisariaqarpoq siunissami eqqartortuarneqarnissaa, qanoq ilillutaana inuit ilinniarsimasut, immikkukajaaq ilinniarsimasut suliffiannut atatiinnarsinnaanerigut, suliffilluunniit aningaasarsiornikkut ajornartorsiortutut inissikkaluarpat. Taamaattumik, soorlu Mia Siumuminngaanniit oqartoq, taanna sukumiisumik ajornartorsiut misissuiffigineqartariaqarpoq. Taanna uanga isumaqatigilluinnarpara. Oqallinneq maani ingerlanneqartoq asuli maangaannaq oqallinnerussanngilaq. Siunissatta takorloornissaa maanngaanniit ilusilersortariaqarparput, taamaattumillu uumap ingerlaqqinnissaa annertuumik uanga pisariaqartippara. Tassami akissaqanngilagut inuusuttut allallu ilinniartissinnarlugit arlaannut suliffissaarunnermut pilissagutsigit. Taanna inuiaqatigiit ilumoorpoq oqaatigineqareertutut tamaninngaanniit akissaqartinneqanngilaq.
Oqaatigeriikkattut una suliaq ingerlaqqittariaqarpoq aammalu ilinniartitaanermut annertoorujorujussuarmik attuumassuteqarpoq aammalu suliffeqarnermut nalinginnaasumik attuumassutearluni. Taamaattumik uanga massakkut allaat kissaatigisinnaavara, ilinniartitaanikkut ataatsimiititalianut aamma suliffissaqartitsinermi ataatsimiititalianut, inuutissarsiornermi ataatsimiititalianut susassaqartunut tamanut sammineqarsinnaasuuguni ajornartorsiutip taassumap, immaqa tamakkiisuunngikkaluartumik pitsaasup tungaanut aallariartoqarsinnaaneranik tikkuussisumik pisoqarsinnaappat, taava tamatsinnut ajunngitsumik kinguneqartussaassaaq.
Uagut Naalakkersuisuninngaanniit una taamannak suliffeqarfiit ataasiakkaat, ikilisaanerit eqqarsaatigalugit, aningaasanik tapiiffigineqarsinnaanissaannik innersuuteqannginnitsinnut aallaavigaarput, taamannak aallartitsilissagaluarutta suliffeqarfippassuit taamannak aallarteriarsinnaanerat aarlerissutigineqarsinnaammat, aamma atornerluinermut allaat aqqutissiuinermut aallartittoqarsinnaammat. Taamaattumik uagut kissaatiginngilarput, taamaattumillu soorlu siunnersuuteqartoq oqartoq, arlaatigut taanna suliassaq, aningaasaateqarfik taavaa, periarfissiuuttariaqarparput taassuma ajornartorsiutip tamatta eqqartortuakkatta ukiuni kingullerni arlalissuarni qaangeriarsinnaanissaasut periarfissat suusulluunniit suugaluartulluunniit anguniartariaqarpavut.
Taamaattumik annertuumik takisuulioqqinnanga oqaatigineqartut aamma ersarereermata, asuli kinguarsaaniarnanga ingerlateqqikkusuppara aamma uanga. aamma ilinniartitaanermut attuumassuteqartut susassaqartut tamaasa suleqasiullugit arlaatigut pilersaarummik suusinnaagaluartumilluunniit nassaarniaqatigiittariaqarpugut. Aamma soorlu siunnersuuteqartoq oqartoq, uani inuit pineqartut amerlasoorsuugunanngillat, taamaattumik arlaatigut ikioqatigiinnikkut, suleqatigiinnikkut aaqqissuusseqatigiissinnaanissarput isumaqarpunga siunissami ingerlanniarsarisariaqaripput, taamaattumik oqallinnermut uunga nuannersumut imaqartumullu oqaatigineqartut tamaasa qutsatigalugit neriorsuutigissavara taassuma suliassap sapinngisamik tunginninngaanniit ingerlateqqinneqarnissaa anguniarsarissagakku.
Lars-Karl Jensen, Siulittaasoqarfimmi ilaasortaq, Siumut:
Oqaaseqartussaq pitinnagu eqqaasitsissutigissavara suleriaatsitsinni aalajangiiffissat aalajangiisoqarsinnaanngimmat, tassa apeqquteqaatit aallaavigalugit oqallinnerit §35-mi imm. 4 malillugu aalajangiiffigineqarsinnaanngillat, kisiannili naalakkersuinikkut sulinermi oqaatsit maani tusarneqartut "tamuaqqinneqarsinnaapput".
Asii
Chemnitz Narup, Inuit Ataqatigiit:
Qujanaq.
Isumaqarpunga siullerpaarpaarpaajutillugu qarsupinneragaasimaneqaratta, taanna
ataatsimilluunniit akuerisinnaanngilara. Paarlattuanik
oqaluuserisassanngortitsisup oqaluuserisassanngortitaa atuareerlugu
nalilersoqqissaarparput ajornartorsiutit uani eqqartorneqartut qanormi-taava
annertutigiva? Tassa taanna apeqqut siulleq qulaajarusussimasarput. Taanna
peqqutigalugu pingaartittuaratsigu paasissutissanik tunngavilersorluakkanik
toqqammaveqarluta oqalliseqataarusuttaratta. Qarsupinnertut taanna
taaneqassappat, kiisamilimi taava uanga naluara qanoq
suleriaaseqartariaqassanerluta maani, kisianni taamatut suleriaaseqarsimavugut.
Annertoorujussuartutut
isikkoqarsimappat, taava soorunami pinartutut nalilerlugu nukiit amerlasuut
taassuma qaangerniarnissaanut ujartueqataaffigisimasagaluaratsigu. Taakkua
pisortatigoortumik paasissutissat pereeratsigit katersoratsigit, taava
oqarpugut, aap piuvoq, kisianni annertoorujorujorujussuunngilaq. Taava aamma
paasinarpoq ilinniareersimallutik inuit ilinniarfimminngaanniit
oqarfigineqaraangamik: "Maani suliinnarsinnaanngilatit". Taava ima
piumassuseqartigisarput amerlanerit, taava nuuttarput sumi
suliffeqarsinnaanertik ujartorlugu. Imaappoq inuit amerlasuut imminnut
napatikkusussutertik taanna pigivaat, taannalu atorluarlugu inuunertik
ingerlallugu.
Aamma
suliffissarsiuussisarfinni massakkut sulisoqarpoq, taanna maani Inatsisartuni
aamma oqaluuserivarput, upernaaq aamma. Isummannaallisaatit taakkua
isumaginninnikkut tunniunneqartartussat nutaamik aaqqissuunniarnerani
tunngavissat nutaat uagut maani tikkuusseqataareerpagut qanoq ittuunissaat.
Tassani suliffissaarukkallartut taavalu sulisinnaajunnaarallartut,
piumassuseqanngitsut, ataavartumik sulisinnaassuseqanngitsut. Inuit taamannak
nalilesorlugillu naleqquttumik sullinneqartussanngorput aamma suliniutit
taakkua aallartereerput suliffissarsiuussisarfiit aqqutigalugit. Imaappoq
taakua eqqartorneqartut massakkut akorsisussaannik piareersimasoqareerpoq,
aamma taakkua sulipput.
Erseqqissarusuppara
tamanna ilaannikkut oqallinneq sumorujorujussuaq ingerlalertarami
misigissutsit sorpassuit kalluarlugit, allaat isumaqalersilluta tamatta una,
una pineqartoq ima annertutigisoq. Taava "tamuaqqilaariarlugit"
anersaartoqqilaariarluta sunaanersoq eqqartoqqittariaqarpoq. Uagut
pingaarteqaarput maani nunami kalaallit uagut piginnaasagut tunngavigalugit
nunarput ineriartortinneqassasoq. Taamaattumik aamma suaartaqataasarpugut
ilumoorpoq: Suu, ilinniagaqaritsi. Aamma ilinniarsimasortagut
iluatigisariaqarpagut. Assigiinngitsunik taassuma tungaanut
suliniartoqareerpoq. Isumaqartoqassanngilaq uagut aamma peqataarusunngitsugut,
tassunga sangutinniarneqassanngilaq.
Nunatsinni
pisinnaasagut tunngavigalugit ineriartortitsissaagut. Aap, tamanna qanoq
isumaqarpa? Taanna anguniarutsigu, taava nalilersortariaqalerpagut pissutsit
allat aamma, atorfinitsitsiniarnermi, taava inuttaliissagaangatta
inornartorujorujussuarnik allagartaliisoqartarpoq. Uatsinnut inorsittarpugut.
Tamakku ilanngullugit aamma aaqqittariaqarput.
Aamma
suliassaqarfiit assigiinngitsut sukumiisumik paasiniaareerput, sooruna
sulisunik attassiinnarniarnerput taama ajornakusoortigisoq? Inuit ujartugaat
tamalaarpassuupput suliffimmiiginnassagunik. Akissarsiat pitsaasut, taakku
kisiisa isiginiarneqarneq ajorput, kisianni inuit piumasarpaat aamma
suliffeqarfik demokratiskimik ingerlatsisoq, sulisuminik ataqqinnilluni
tusarniaasartoq aamma sulisut aalajangeeqataarusuttarput.
Personalepolitikkimik pingaartitsineq aamma Naalakkersuisup
Isumaginninnermut Suliffeqarnermullu taavaa. Ilumoorpoq. Tamakkuukua aamma
aqqutissiuussisussat, massakkut ajornartorsiut eqqartorneqartoq
pinaveersaartissagutsigu.
Massakkorpiaq ima annertutiginngimmat pinartorujussuartut
isumaqarfiginnginnatsigu
uagut akissuteqarnitsinni siunissami pinaveersaartitsinermik ajornartorsiutip
taassuminnga allisitsinaveersaarsinnaasunik ujartuivugut. Taava oqarpugut
erhvervsregisterimik taaguuteqaarluni taanna Naatsorsueqqissaartarfiup
suliaa, taanna sakkussaassaaq siunissami. Suliffiit sumi, qanoq ittut
piuppat? Sulisut kikkut atorfissaqartippagut? Taamaattumik tassanngaanniit
ingerlaqqittoqarsinnaasassaaq, taamaappat uku, ukua ilinniartutut
atorfissaqartippagut.
Taava
toqqaannartumik taanna siunnersuutaa Per Berthelsenip, sulisitsisut immaqa
taperneqarsinnaasut ilinniarsimasut sulisoriinnarnissaanik,
naammassigaangata sulisoriinnarnissaannut. Soorunami sulisitsisut ataasiakkaat
piumaffigineqarsinnaanngillat suliassaqatitsinngikkunik inuk
tigummiinnassagaat. Kina aamma sulerusussava, inuk oqarfigineqaruni
atorfissaqarteqqissaanngikkaluarpatsigit, taamaattorli maaniissinnaavutit
immikkut tapiiffigineqartussaagavit. Inuttut namminermut naleqassutsimut aamma
innarliisarpoq tamanna. Taamaattumik allatut aaqqiisariaqarpugut, aamma
allatut aaqqiisoqartarpoq massakkut, ilinniagaat taakku inuit piginnaasai
qaffassarniarlugit, annaanaveersaarlugit omskoling-imik taallugu. Allamut
aamma ilinniaqqinnissamut periarfissiinermik ilaqartarput sullissinerit
taamaattut.
Imaassinnaavoq
ilama ilassutissaqartikkaat, kisianni akissuterput tassunga killeqarallarpoq.
Mikael Petersen, Siumut:
Qujanaq. Tassa pinngitsoorumanngilanga uangattaaq siunnersuuteqartumut
akissuteqassallunga. Oqaaseqaqqinnermini oqaaserisai isumaqarpunga Siumumut
tunngatillugu tulluutinngilluinnartut saqqummiussatsinnut tunngatillugu.
Aallaqqaammut oqaatigissavara, tupigigakku siunnersuuteqartup uagut
saqqummiussarput pillugu naliliinera taama piulluanngitsigimmat.
Saqqummiussarput takisoorsuunngikkaluarpoq, aap, kisianni uagut isumarput
naapertorlugu ima ersaritsigaaq, siunnersuuteqartup siunnersuutaa
pingaartorujussuartut isigigipput, imatullu pingaaruteqartigisutut isigigipput
allaat pisariaqartillugu pisortat, sulisitsisut sulisartullu kattuffii
suleqatigiillutik misissueqqissaarnermik aallartitsisariaqartut ajornartorsiut
tamanna qulaajarniarlugu. Tamanna piumasaqaat siunnersuuteqartumit
paasineqarsimanngikkuni tupinnassaaq.
Aammalu ingerlaqqippugut erseqqissaatigalugu siunnersuuteqartup
suliffeqarfinnut pisortat akiligaannik aningaasalersorneqartumit
ilinniagaqarlutik naammassisartut suliassaqartinneqanngippata
sulisinneqaannartarnissaannik siunnersuutaanut tunngatillugu oqarpugut,
ilimagalugu, tassami tassunga tunngatillugu suli annertunerusumik
misissuisoqanngimmat, ilamagalugu tamanna aningaasarpassuarnik
kinguneqarsinnaasoq aammalu aqukkuminaassinnaasoq. Tassungalu tunngatillugu
aamma oqaatigaarput pisariaqartillugu periarfissat allat ilanngullugit
misissuisoqartariaqartoq, aamma Sulisitsisut Sulisartullu Kattuffiat aamma
tamatumani peqatigalugit. Tamakku oqaatsit taama ersaritsigisut
paasinngitsuusaarneqassanngillat allamullu sangutinniarsaralugit, tassami
siunnersuuteqartoq akissuteqaammini oqarmat, allaanngilarooq
susaarnaveersimatinniaannarlugu oqaaseqartugut. Ila, tupinnaq.
Partiit assigiinngitsut oqaaseqaataat isumaqatigigatsigit
oqaaseqarfigissanngilagut aamma ersarissorujorujussuummata. Aamma
eqqaamassavarput ataatsimiinnermi matumani aqutsisup, massakkut uani inimi
siulittaasuusup erseqqissaatigimmagu una oqallisissiaammat, apeqquteqaat
aallaavigalugu oqallisisiiaammat inatsisissatut suliakkiissutaanngitsoq.
Imaassinnaavoq una oqallinneq aallaavigalugu partiiniik saqqummiussuunneqartut
aallaavigalugit, ila, imatut Naalakkersuisut saqqummiisut kingusinnerusukkut
misissuinerit pereerpata, allaat inatsisit atuuttut immaqa
allannguuteqartinnissaannik saqqummiisinnaallutik. Taava tamanna pilerpat
aalajangersimaqqissaartumik partiiniit oqaaseqarsinnaalissaagut.
Tamakku tamarmik ilanngullugit oqaatigineqartariaqarmata oqaatigaakka. Aamma
Kattusseqatigiit oqaaseqartuata oqaaserisai ippigilaarpakka, tassa
partiilersuunnagugooq una oqallisigineqartariaqarpoq. Tupinnaasapput,
tassami partiininngaanniit oqaaseqartarpugut. Inatsisartut suleriaasaanni
allassimapput tamarmik qanoq suliassat ingerlanneqassasut. Partiit
oqaaseqartui aallaaviupput maani, aamma Kattusseqatigiit suleqatigiikkamik
ataasiinnarmik oqaaseqartoqarput. Partiilersuunnagu Kattusseqatigiilluunniit
aallaaviginagit oqallittoqassappat Inatsisartunut ilaasortat tamarmik taava
uani oqalliseqataassapput. Aamma tamanna periarfissaajuarpoq. Aamma
partiilersuunnermik taamatut pinngitsoortitsiniarsarineq isumaqarpunga
tupinnartoq, tassami partiit tamarmik anguniagaqarmata, aamma suliffeqarnermut
tunngatillugu, sulisunut tunngatillugu, ilinniartitaanermut tunngatillugu,
taakkualu partiit namminneq anguniagassamittut isumaqatigiissutigisarpaat.
Aamma tamanna siunnersuut taakkununnga attuumassuteqarluinnarpoq.
Pinngitsoorusunngilanga aamma Attaviitsup aappaa oqaaseqarfigilaassallugu. Tassami ileqqorissaarnissaq torersumillu oqallinnissaq tamatta pingaartittarparput. Ilaatigut oqalugiaammini oqarmat, partiinngooq immaqalu aamma Inatsisartunut ilaasortat ilaat politikkerit taammaagit iternik aluttuisut ajuallatsikkumanagit nassuiaanini tamaanga killittariaqalerlugu. Ila, tupinnassusia. Kikkut itiinik aluttuigamik partiit? Ila, tamakku oqaatsit paatsiveerussaataasut, isumaqanngitsut, qinngarsuinermik nipillit atussallugit maani pisariaqanngilluinnarpoq, kisianni unneqqarissumik oqaatigissavara Otto Steenholdti ukiorpassuarni politikkeriusimammat, aamma Folketingimi ilaasortaasoq. Uanga taamanikkut Danmarkimi ilinniartuuvunga Aalborg Teknisk Skolemi. 1976-imi ukiakkut hr. Otto Steenholdt Folketingimi ilaasortaq ilinniartunik ataatsimiisitsivoq uanga peqataaffigisannik. Ajornartorsiut unarpiaq taamanikkut saqqummiupparput, uanga taamanikkut apeqqutigaatigaara. Angerlarutta suliffissaqassanerluta? Qulakkeerneqareersimanerpa uagut maskiinalerisut angerlarutta suliffissaqarnissarput? Taamanikkut 1976-imi inuussutissarsiornermut ilinniartitaaneq nunatsinninngaanniit Danmarkimi ingerlanneqartoq annertoorujorujussuuvoq. Ilinniartorpassuuvugut. Isumaqarpunga Otto Steenholdtip manna saqqummiussaa aallaavigalugu erseqqissaatigisariaqarlugu utertiffigilaarlugulu. Taamanikkut apeqquteqaatinnut akissuteqaatit eqqaamangaarakku ima nipilik: Soorunami sulissutiginiarpat ilanngullutit taamanikkut politikkeritut suliffissaqarnissarput, kisianni aana ataatigut titarlugu oqaatsit uanga puigunngisaannagara, eqqaamassagipput qallunaat sullerinnerujorujussuummata kalaallinillu pikkorinnerullutik. Taava assersuutigivat, eqqaamangaarakku puigunngisaannarakku, assersuutigaat nunatsinni errorsivik aserorpat qallunaap suliarippagu, sivisoorsuarmik taanna atassaaq. Kalaallip suliarippagu ingerlaannaq aseroqqissaaq. Tassa taama ersaritsigisut uanga puigunngisaannarpakka. Immaqa tamakku aamma tunngavileeqataapput uanga naalakkersuinermik soqutinnilerninnik annertoorujussuarmik, tamakku apeqqutit akiorniarlugit.
Erseqqissaateqalaarpunga sumi sumiluunniit iternik aluttuisoqarsimappat aamma oqaaseqartoq aluttuisimassaaq.
Per Berthelsen, attaviitsoq:
Tassa mianersortorujussuusungaana, kingullermik sisamassaaleraluarama nuannerpallaanngitsumik kinguneqarmat. Annikitsunnguamik tassa oqaatigissavara, nuannaarutigaara taama oqallinneq massakkut siunertaqartutut isikkoqarmat. Siullermik naalakkersuisortaatsinnut taaseqataaffigisannut Ole Dorphimut qujajumavunga aappassaanik oqaaseqarninni ilisarilerakkit. Assorsuaq nuannaarutigaara. Tikilluarit, taannalu anersaaq pigissagukku tapersersuttaassaqigakkit naatsorsuutigissavat. Ersarissumik oqaaseqarnerit nuannaarutigaara, unami ingerlariaqqissinnaalerpoq, kisianni aamma siulittaasup oqaatigereerpaa una aalajangiiffigissallugu siunnersuutaanngilaq. Asii Chemnitz Narupimut oqaatigissavara mamianartumik oqaaseqarsimaguma ajuusaarutigara. Taanna siunertarinngilara, aamma naggataatigut oqaatigisatit taakkua suliareqqinnissamut tikilluaqqullugit nuannaarutigaakka, tassalu oqaravit "tamuaqqilaariarlugu" takoriartigut qanoq ingerlariaqqittoqarsinnaasoq. Tassa ujartugara, taamaattumik tunginninngaanniit naammagisimaarpara aallarniutaasumik, immaqa sakkortuumik oqaaseqarneq taamatut eqeersaataammat maanna siunertaqartumik suleriaqqinnissamut sangusutut isikkoqarluni. Taanna nuannaarutigaara. Aamma Mikael Petersen Siumuminngaanniit ersarissaataanut aamma qujajumavunga. Ersaripput, kisianni ukua uppernarsarneqarsinnaanngitsumik kingumut qiviarnerit taakkua uanga akuliuffiginianngilakka.
Tassa uanga tunginninngaanniit pingajussaarlunga oqaaseqarpunga. Annertunerusumik oqaaseqaqqissanngilanga, kisianni nuannaarutigalugu Inatsisartut allaqqaataani immaqa naapeqatiivinngikkaluarlutik annertuumik sammivik pingaartoq, tassalu arlaatigut iliuuseqaqatigiissinnaanerup anersaava taanna sangujartuaarfigalugu ingerlammassuk aammalu tassani naalakkersuisup maanngaanniit suleqataajumalluni neriorsuuteqarnera nuannaarutigalugu assullu inuttaanut tulluutsillugu tikilluaqquvara. Qujanaq.
Anthon Frederiksen, Kattusseqatigiit:
Qujanaq. Tassa oqallinnerup aallartinnerani aammalu Naalakkersuisut akissuteqarnerminni uumap oqallinnerup maannamut allanngornera assorujussuaq malunnarpoq, soorlu siunnersuuteqartup aamma tamanna ersersikkaa. Soorunami demokrati eqqartorneqartillugu nalunngilarput Naalakkersuisut qanorluunniit akissuteqaraluaraangata Inatsisartut amerlanerit isumaat taanna malinneqartarmat. Tamannalu soorunami ataqqineqartariaqarpoq, naak manna oqallinneq aalajangiiffigisassaanngikkaluartoq.
Assorujussuaq oqallinnerup taamatut sangunera aamma Inatsisartunut ilaasortat paasinnilluarnerat nuannerpoq, tassami ajornartorsiutit eqqartorneqartut uani imaannaanngillat. Qanorluunniit oqaatsit assiginngitsut atorneqaraluarpata isumaqarpunga partiilersorneq soorunami ataqqivarput aamma kiffaanngissuseqarnerup iluani tamanna ingerlanneqartarmat. Kisianniuna oqalllinnerit ilaanni aamma partiilersorneq ingasaanneqaleraangami aamma ilaatigut isornartoqalersartoq. Taannaana pinaveersimatinniarlugu ilaatigut saqqummiussinitsinni oqaaseqartugut qanortoq-una oqallinneq una ingerlanneqarli partiilersorneq apeqqutaatinnagu. Tassa ajornartorsiutit imatut annertutigimmata, allaat ilinniartut, soorlu oqaatigineqareersoq aamma arlalinnit, ilinniartut ilinniareernermi kingorna, naak sulerusukkaluarlutik suliffimminniik tunuartitaasarmata. Aamma tamanna qularutiginngilara ilissi politikkeritut eqqumaffigilluinnarissi, naak ilaatigut Inuit Ataqatigiit oqaluttuata oqarnermini Sulisitsisut Peqatigiiffiat allallu tassunga attuumassuteqarsinnaasut tusarniarfigalugit telefonikkut apersorsimagaluaraat. Taamaattoq oqaatigineqarpoq ilinniartut ilinniareernerminni soraarsitaasartut ilisimaneqanngingajattut. Taanna tupannanngilaq tupinnaranilu, tassa taamatut Inuit Ataqatigiit paasiniaasimanerata ersersiinnarpaa massakkut pisortatigoortumik nalunaarsuineq taakkununnga tunngasumik amigaateqartoq. Uanga ilimaginngilluinnarpara Sulisitsisut Peeqatigiiffiata inuit qassit angerlartiinnartarlugit nalunaarsorsimassanerai. Ilimananngilaq tamanna. Aamma uanga politikkeritut nalunngilara saaffigineqartarnikka tunngavigalugit STI-mi ilinniartorpassuit, aamma ataasiinnaanngitsut ukua mekanerikeriinnaanngikkaluartut, allallu aamma taamanna pineqartartut. Taamaattumik ajornartorsiut imaannaanngitsoq uani oqallisigineqarnerata naggataa-tungaani aamma naalakkersuisup oqaaseqarnera uanga nuannaajallaatigaara, tassa soqutiginnimmat ajornartorsiummik aaqqiiniaqataanissamut peqataanissaminut. Taamaattumik isumaqarpunga aluttuinerit allallu oqaatsit maani naleqquppallaanngitsut atunngikkaluaraanni paaseqatigiilluta ajornartorsiummik qaangiiniarnissatsinnut tamatta peqataassasugut.
Otto Steenholdt, attaviitsoq:
Siullermik
eqqaasitsissutigissavara atuartitaaneq aammalu atorfiit nunatsinni maani qanga
oqallisigigatsigit ersarissumik ujartorsimagiga atuarfinni praktiklærer-inik
taaneqartartut atorluarnissaat qanoq pingaartitsigigiga. Tassa taakkua
meeqqanullu oqaluttuaalertarmata, sunngorusuppit? Taannalu aallaavigalugu
oqaloqatigilersarlugit, ilaanni pilerigisaraluatik
tunuartitaarfigisariaqalersarpaat oqaloqatiginninnerup taamatut
atorfinissagaanni suna piumasarineraa paasigaangamikku. Taanna
amigaataanera uparuartorsimavara.
Naalakkersuisoq
assorsuaq nuannaraara saqqummiussanni itigartitserpalaartumik atuareerlugu
oqaloqatigiinnermi oqaasaqqinninni paasinnittumik nipeqarnerit. Tassa
taamaattussaavoq. Oqallinnerup anguniagarisarpaa akerleriikkaluit oqallinnerup
ingerlanerani paaseqatigiillutik ingerlasinnaanerat. Suliffeqarfippassuit
atornerluileqinapput, taanna oqaaseq nuanninngikkaluarpoq, tassami
oqareerpunga suliffeqarfiit tapiiffigineqarnissarsui tamaasa maani
eqqartorneqanngimmat.
Aammagooq napasinnaanngitsukassaat tapersersuleqinagatsigit. Tamakkuukua uanga
uparuarikka taanna pineqanngimmat. Siunnersuummik iluatissarnerit assorsuaq
nuannaraara aammalu aningaasaateqarfiliornissamik siunnersuuteqartup oqaasia
aamma akerlilernagu kusanartumik oqaatigalugu.
Inuit
Ataqatigiit oqaaseqartuat annerusumik oqaaseqarfigisariaqassanngilara. Una
pivarput, ilinniartitaq, tassalu sulisinnaasutut allagartartaartoq unitsitaq,
taanna uniinnaqqunagu siunnersuutigineqarmat uniinnaqqunagu, tassalu
soraarsitaalluni taakku pillugit. Qanoq-una iliorluta taanna maani
ingerlateqqinniaripput? Tassa qitia oqallinnerup. Takingaatsiartorsuarnik Asii
Chemnitz Narupip oqaasii tusarnaaraluarpakka, kisianni aana tamaasa
tusarnaareerlugit oqaasererusutara: Nuannarisarpakka naalakkersuinermik
ingerlatsisut namminneq eqqarsarsinnaaneri. Paasiniaanipilorujussuit
ilaannikkut pisariaaruttarput nammineq qulequtaq tusaannarluguluunniit
pissutsinut ikkugukkaanni. Uanga telefoneqattaassaguma uani
saqqummiunneqartumi
taagukkat tamaasa oqaaseqassaguma, piffissaqarfiginngilluinnarpara. Allaallu
ima sapiitsuliortigaanga akineqanngitsoq utaqqigaluarakku akineqassasoq, tassa
atorfilitttagut uanga saassutarissanngikkikka maanngaanniit. Taanna
oqaatigineqanngilaq, kisianni qamuuna nalunngilara taamaaliortussaananga,
kisiannili taamaaliornera tusareerparsi. Politikkeritut aamma
oqaaseqarsinnaaneq tassaniippoq.
Siumup
oqaaseqartua Mikael Petersen oqallorissaaraluarpoq-aasiit. Kisianni
isumaqatigisinnaavara oqaatsit suarsuttut nalilerneqassappata aamma
ajuallamisaarsinnaammat. Assorsuaq pissanngatigigaluarakku taanna oqaaseq
paradoksproblemer uanga paasinagu nassuiarniarsarisimasara Naalakkersuisut
partiiata oqaluttuata uani nassuiarsinnaassagaluarneraa. Uanga oqarama taanna
siumortanngilara, qanoq-una atorneqartoq, kalaallisullu aamma
oqaatigisaraluara oqaaseqarfiginngilaa. Uanga nuannarinngisara, kisianni partiilersuunnagugooq
una ingerlanneqarli, tassa Kattusseqatigiinniit uparuartuinermi taama
oqarmat.
Uanga
tupiginngilakka Kattusseqatigiit oqartuartarmata partiiunnginnamik,
taamaattumillu partiilersuunnagit tamakkua nalilersortarlugit, kisianni Mikael
Petersenip uannut uparuarsissutaa, tassa taanna kusanarpallaanngitsoq, tassa
uanga ileqqorissaarnerminngooq peqartariaqartunga. Uanga
ileqqorissaangaarama aajuna imannak oqarpunga, aamma taamaaliortussaammata
oqaaseqartut, ataatsimiinnermik aqutsisoq-aa, utoqqatserpunga.
Taamaaleriarlugu oqaaseq aatsaat oqaatigaara. Aamma taamaattussaavoq.
Uanga
ataatsimiittarfippaalussuarni ataatsimeeqataasarsimavunga, politikkerillu
imaannaanngitsut aamma oqalukkumatuut ilaaffigisarlugit. Oqariartaatsit
uanga ilikkarsimasakka massakkut atussagaluarukkit paasineqaannartariaqarpoq
tassaasarmata uagut atortakkagut politikkerit qulliunerusut
oqallissileraangamik. Tamanna Mikael Petersenip immaqa pulaffigisimanngilaa,
ilikkartariaqarlugulu politikkerit imminnut oqallisileraangamik oqaatsit
ilaanni immaqa tusarnarpallaanngikkaluartut atoriataartarmatigit, kisiannili
isumai suunersut paasisariaqarlugit. Oqaatsip-una taassuma tunuaniittoq suna?
Kimulluunniit iluareqqusaarluni taamatut iliuuseqarneq politikkikkut
imannarsuaq uparuartornagu erseqqissumik naatsumik oqaatigiinnarneqartartut:
Imatut politikkimik qaatuussaqarsimasut tamakkuninnga ilikkagaqartarput. Aamma
oqaluttuuttariaqassanngilarma 1976-imi pisimasunik. Uangalu akissagukkit
tamakkuninnga uanga eqqaamasaqanngilanga, aamma oqarfigisariaqassaanngilarma
puigutunerarlunga. Maani soorlu oqallinnermi taamatut eqqartuineq kialluunniit
uppernarsarsinnaanngilaa taamaattoqarsimasoq, kisianni soorunami illit
taamatut oqartissimasuugumma, taanna oqaatigisinnaavara ilinniarnermik
soqutiginneruttulernitta nalaani taanna isumaammat, oqartarlutik: Ilami,
qallunaarsuit isumatupput. Suulluunniit qallunaat attorsimanngilluinnagaat
kalaallit taama oqaatigisarallarmatigit.
Massakkut
oqariartaaserput allanngoriartoqaaq kalaaleqativut
angusarissaarsernerulersillugit, allaat oqartariaqalerluta: Kalaalerlu
ilikkaruni imannaannaq pissanani. Ineriartornerup tamakku ingerlaneri uanga
uani oqaaseqarninni assorsuaq qitiutippakka, qallunaaluarnertullu aamma
taakkua nalilerneqaqqunagit taama oqarpunga. Uteraangamik sulerusukkaluarlutik
suliffik inuttaqareersoq pigaluarlugu, pigaluarlugu utiinnartarnerat
mamiagisara maanilu aamma saqqummiulluarsimasara eqqaamaneqartoq, taakkuukua
eqqaamallugit immaqa sakkortujaarsuarnik oqartunga, oqariartaaserli atugara
utertissanngilara politikkerit imminnut taamatut oqartarmata, illuatungimik
nalunngereertarmagu taamatut oqaaseqartup suna pigaa.
Lars-Karl
Jensen, Siulittaasoqarfimmi ilaasortaq, Siumut:
Taava
oqaaseqartussaq tulleq tikitsinnagu uanga aqutsisutut erseqqissaatigissavara,
uani oqaaseq Otto Steenholdtip ujartugaa saqqummiussissutimi kalaallisut
allassimatillugu takunnginnakku, nassuiarneqarnissaa kissaatigigaluaraa
maani sivitsorsaataasariaqanngitsutut isumaqarfigaara.
Maliinannguaq
Markussen-Mølgaard, Inuit Ataqatigiit:
Qujanaq.
Tassa maani Inuit Ataqatigiinninngaanniit saqqummiussatsinni erseqqissumik
oqaatigivarput aamma pingaartuaratsigu suliatta misissorluarnissaa,
taamaattumik aallaavissanik misissuisimavugut aamma
suliffissarsiuussisarfiit paasiniaaffigalugit ilumut ilisimasaqarnersut,
qanoq annertutiginersoq taanna ajornartorsiut, ilinniarsimasorpassuarnik
suliffissaaleqisoqarnersoq, tassanilu paasisat aallaavigalugit
oqariartuuterput saqqummiupparput, eqqoriaanerunngitsoq. Taamaattumik
isumaqarpunga aamma taanna eqqarsaatigisariaqartoq uani piffissaqarneq
piffissaqannginnerlu soorunami apeqquserneqarsinnaasut, kisianni aamma
pingaartitsilluni paasiniaaneq aamma tassani pingaarutilerujussuuvoq.
Una
kommunit qaammatit tamaasa suliffissarsiuussisarfiit pisussaapput, aamma
taamaaliortarput nalunaarsuisarlutik suliffissaaleqisut qanoq
amerlatigippat, ilinniarsimasut qanoq amerlatigippat, qassiniit qassinut
ukiullit. Tamakku tamaavimmik allattorneqartarput aamma qarasaasianut
ikkussorneqartarput aammalu ingerlateqqinneqarlutik. Taamaattumik
ajornanngilaq tamakkua aqqutigalugit aamma paasiniaassalluni, kisianni
amigarsimappata aamma soorunami eqqarsaqqittoqartariaqassaaq. Taakku
misissorneqartariaqassapput ilumut ajornartorsiut ilimagisamit
annertuneroqinersoq, aamma tamanna maluginiarpara sulisoqarnermut
naalakkersuisup
suliassatut misissugassatut tigugaa.
Una
ajornartorsiut eqqartugarput isumaqarpunga aamma illua-tungaanut saatillugu
eqqarsartariaqartugut. Tassa pinaveersaartinniarlugu qanoq iliorsinnaavugut?
Ilinniartitaaneq qiterivaa ilinniartitaanerit aaqqissuulluakkamik
ingerlanneqarnissaat. Erseqqissumik paasineqarnissaa suut-uku ilinniakkat
pisariaqartikkigut? Qanoq amerlatigisut pisariaqartippagut? Taakkulu
aallaavigalugit ilinniartitaanerit ingerlasariaqarput siunertaralugu
ilinniarnertik naammassippassuk naammassisut suliffissaqartinniarnissaat.
Suliffissaaruttussanngorlugit ilinniartitsijuaannarsinnaanngilagut,
aaqqissuulluakkamik tamakku tamarmik ingerlanneqartariaqarput
naatsorsorlugillu,
aamma suut ilinniakkat suut amigaatiginerigut taakku aallaavigalugit
pilerisaarinerit annertunerusut inuusuttunut, suut-ukua ima annertutigisumik
pisariaqartikkigut, taava inuusuttunut annertunerusumik
kajumissaarutigalugit ingerlattariaqarpgut.
Qujanartumik
aamma ilinniaqqittartut amerlapput massakkut. Immaqa ilinniakkaminnik
suliffissaarussimagunik ilinniarsimallutik, taava uninngaannarneq ajorput,
ilinniaqqinnissaminnut ingerlaqqittartut amerlasoorparujussuupput
qujanartumik ullumikkut. Taamaattumik taanna eqqarsaatigillaqqunaqaaq
utaqqiinnarnagu ilinniartut naammasinissaanut suliffissaaruppat aatsaat
ikiorsernissaa ujartussallugu. Soorunami pisariaqarpat taanna
taamaasiorneqarsinnaavoq aamma ujartorneqarsinnaavoq, kisianni
pinaveersaartinnissaa ilinniartitaanerit aaqqissuulluarnerisigut taanna
isumaqarpunga pingaaruteqartuusoq aammalu aningaasarpassuit
ilinniartitaanernut
suliffissaaruttussanngorlugit ingerlasussanut taakku
pinaveersaartissinnaagatsigit taamaalillugit.
Mikael Petersen, Siumut:
Attaviitsup hr. Otto Steenholdtip kingullermik oqaaseqarnermini
apeqquteqarfigaanga, sooq oqaaseqarfiginnginneriga taamatut imminut
asssortuuttumik, assortuuttutut ittumik naalakkersuisup, Siumup
naalakkersuisuutitaata oqariartuuteqarnera, tassa paradoks aallaavigalugu
qallunaat oqaasiat, taanna soorlu oqaaseqarfiginnginneriga. Isumaqarpunga
erseqqissaatigisariaqarlugu oqareeratta Siumuminngaanniit Naalakkersuisut
akissutaat tusaatissatut tigullugu. Naggataatigut taama ersaritsigisumik
oqaatigaarput, taamaattumik paatsuugassaanngilaq. Aamma ilumoorluinnarpoq
Naalakkersuisut akissuteqaataanni oqarmata, ajornartorsiut matumani pineqartoq
taanna imminut assortuuttutut ittoq annikillisarniarlugu
iliuuserineqarsinnaasut
makku Naalakkersuisut tikkuarusuppaat, taava tikkuartuipput assigiinngitsunik.
Tassani isumaqatigiilluinnarpugut. Taanna erseqqissaatigiinnassavara.
Per Berthelsen, attaviitsoq:
Tassa taaniaannarluguuna uani oqallinneq atituallaalissanngimmat, uani
eqqartugara tassaammat ilinniartoq immikkuullarissumik ilinniartoq allami
atorsinnaanngisaminik. Allagartamik piitigaluni oqarfigineqarsinnaannginnissaa,
kisianni soraarsippatsigit atorfissaqanngitsigit. Immaqa qaammatit arfinillit
qaangiuppata. Taamatut-una pisoqartinnaveersaarlugu siunnersuutiga
aallaavileriga oqarlunga, taava taanna putu pinngortoq taassuma iluani
arlaatigut iliorsinnaanngilagut, taamaalillutalu inuusuttup taassuma nunarput
qimallugu aallartariaqarnera suliani taanna immikkut ilinniarsimasani allatut
atorsinnaannginnamiuk. Taamaattoq annaanissaat uggoralugu saqqummiussaqarpunga.
Mads-Peter Grønvold, Kattusseqatigiit:
Sivitsorsaanianngikkaluarpunga, kisianni oqallinnitta maannakkut takutippaa avataanit tusarnaareerluni sulisoqarneq pillugu politikkeqartariaqarneq. Taanna pinngitsoorneqarsinnaanngilaq, akisussaaffiit annerusut tigujartorneqassappata, ingammik nunaqavissunik, taamaattumik malittarisassatigut arlaatigut siunnerfiliisoqartariaqarpoq. Taamaaliornitsigut aatsaat kalaalinngorsaaneq ingerlanneqarsinnaavoq, aamma ajornaqaaq ilinniartitaaneq taamannak ukiuni ingerlavoq, kisiannilu annerusumik kalaalinngorsaasoqarani, ingammik qulliunerusuni atorfillit eqqarsaatigalugit.. Qulliunernilu aqutsisut eqqarsaatigigaanni taakkua sulisussanik aqutsisarput, kikkut sulisorilissanerlugit.
Ukiuni kingullerni saffiuut amerlasuut naammassisarnikuupput, kisianni suliffissaqarneq ajorput annerusumik. Tamakkua iliarsimasaat atorluassagutsigit nunatsinni pigeriikkagut atorluartariaqarpagut ilinniarsimasut. Tamakku aaqqinneqassappata sulisoqarneq pillugu politikki ersarinnerusoq nunatsinni pigisariaqarparput, taannarpiaq-una amigaatigigipput. Tamakku iluarsineqarpata sulisussat pigeriikkagut atorluarnerulersinnaavagut.
Lars-Karl Jensen, Siulittaasoqarfimm ilaasortaq, Siumut:
Uani apeqquteqaat aallaavigalugu oqallinnermi, soorlu oqareersunga siusinnerusukkut aalajangiisoqarsinnaanngilaq, kisiannili maani aniatinneqartut oqaatsit kikkulluunniit suleriaqqinnissaminnut politikkit aallaavigisinnaasaannik nalilersorneqarsinnaapput.
Taamaalilluta immikkoortoq 45 naammassivarput, taavalu aamma ammasumik ataatsimiinnerit naammassineqarput taamaalillugit.