Oqaluuserisassani immikkoortoq 47-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut
ataatsimiiffiusup arfineq-pingajuat, tallimanngorneq oktoberip 5-aat 2001,
Ataatsimiinnermik aqutsisoq: Ole Lynge, Inatsisartut Siulittaasuat, Inuit
Ataqatigiit.
Anthon Frederiksen, Kattsusseqatigiit:
Qujanaq. Inatsisartut suleriaasiat § 32 immikkoortoq siulleq naapertorlugu
imaattumik aalajangiiffigisassatut siunnersuuteqarpunga (Mogens Kleist).
Sanaartornermut maleruagassat 1982-imeersut, sanaartornermut maleruagassat
teknologikkut teknikkikkullu ineriartornermut malinnaasinnaaqqullugit
allannguutissaannik piaartumik siunnersuuteqaqqullugit Naalakkersuisut
peqquneqarnissaannik inatsisarut aalajangiiffigisaassaattut siunnersuut.
Siunnersuuteqarninnut tunngaviuvoq sanaartornermut maleruagassat
1982-imeersut 1987-imi allannguuteqartinneqartut teknologikkut teknikkikkullu
ineriartornermut naapertuuttunngorlugit nutarterneqarnissaat kissaatigigakku.
Qallunaat nunaanni sanaartornermut maleruagassat kingullermik 1995-imi
nutarterneqarput. Nunatsinnili sanaartornermut maleruagassat ullutsinni
teknikkikkut pisinnaasanut sapinngisanullu naleqqussarneqarsimanatik.
Sanaartornermi ilinniagaqartut suliaqartut, ilaatigut oqaatigaat
killilersuinerit amerlavallaartut siunissamilu nutarterisoqarneratigut
assersuutigalugu teknikkikkut aaqqiissutissat il.il. atorneqartariaqarnerinut
iluaqutaasumik piumasaqaasiortoqarsinnaasoq. Sanaartornermut maleruagassat
allanngortinneqarnerisigut ilaatigut siunissamut ungasinnerusumut
aningaasarpassuarnik sipaagaqartoqarsinnaassaaq. Teknologikkummi teknikkikkullu
ineriartornerup kingunerisaanik ilaatigut pisortat sanaartortitsineranni
sipaaruteqartoqarsinnaassammat.
Soorlu ilaatigut oqorsaatissat nalinginnaasumik atugassiat
pitsaanerulersinneqassammata. Aamma pingaartippara sanaartornermut
maleruagassatigut allanngortitsinermi sanaartornerup iluani nunatsinni
naleqqussaasoqarnissaa. Neriuutigaara aalajangiiffigisassatut siunnersuut
Inatsisartut tapersissagaat. Taamaalillunilu Naalakkersuisut piaarnerpaamik
inatsisartunut siunnersuummik saqqummiussissasut. Qujatippara.
Jørgen Wæver-Johansen, Ineqarnermut, Attaveqarnermut
Pilersuinermullu Naalakkersuisoq,
Siumut:
Qujanaq. Inatsisartuni ilaasortap Mogens Kleistip aalajangiiffigisassatut
siunnersuutigaa sanaartornermi maleruagassat 1982-imeersup
allanngortinneqarnissaa pillugu piaartumik Naalakkersuisut
siunnersuusioqquneqassasut. Sanaartornermut maleruagassat ullutsinnut
naleqqussarneqartariaqarnerat Naalakkersuisut isumaqatigaat suliarlumi
aallartinneqareerpoq.
Kapitalit siulliit suliarineqareerput, taakkunani pineqarput: Siullermik
aallaffissornikkut aalajangersakkat. Aappaattut illut aaqqissugaanerat, tassa
sannaat. Pingajuattut ikumasoqarfiit pujoorfiillu. Sisamaat illup iluani
pissutsit ilaatigut silaannaq isugutassuseq silaannarissaerneq il.il. Aammalu
tallimaattut illut uumasuuteqarfiit aamma ingerlatsiviit.
Tassa taakkua pillugit kapitalit suliarineqareersimapput maannamut. Aalajangersakkat sinneruttut ukiap ingerlanerani suliarineqarumaarput. Naatsorsuutigineqarporlu sanaartornermut maleruagassanut iluarssaatanut siunnersuut piffissami januarip aallaqqaataaniit 2002-mi aprilip aallaqqaataanut isummerfigeqqullugit tusarniaassutigineqarnissaat.
Naatsorsuutigineqarpoq sanaartornermut maleruagassat nutaat 2002-mi junip aallaqqaataani atortuulerinnaassasut. Taamaattumik sanaartornermi maleruagassat nutaat suliarineqarnissaasa aallartinneqarnissaat Naalakkersuisut pisariaqanngitsuusoraat suliarineqarnerammi aallatinneqareermat.
Lars-Karl Jensen, Siulittaasoqarfimmi ilaasortaq, Siumut:
Taavalu partiit Kattusseqatigiit attaviitsullu oqaaseqartuinut ingerlaqqissuugut.
Per
Rosing-Petersen, Siumup oqaaseqartua:
Qujanaq. Siumumiit imatut inatsisartuni ilaasortap Mogens Kleistip Kattusseqatigiinneersup aalajangiiffigisassatut siunnersuutaa oqaaseqarfigissavarput. Siunnersuuteqartoq isumaqatigalugu qujassutigissavarput tamanna sioqqullugu Naalakkersuisut suliassaq suliaralugu aallartereersimammassuk. Aappaagulu junimi atuutilersussanngorlugu.
Taamaattumik suliaq ingerlareermat aalajangiiffigisassatut siunnersuut akuersaasinnaanngilarput. Iluatsilluguli Naalakkersuisunut kaammattuutigissavarput sanaartornermut maleruagassat 1982-imeersut qangali GTO-qarallarmalli atuuttut, ullutinnullu naleeussakkanik amigaarteqartut amerlasoorpassuartigut takussutissaqarmat sukumiisumik suliartik suliareqqullugu. Tassanilu sanaartornermi ilinniarfik Sisimiuniittoq tusarniaanermi ilanngullugu peqataateqqullugu.
Daniel Skifte, Atassutip oqaaseqartua:
Inatsisartuni ilaasortap Mogens Kleistip Kattusseqatigiinnniit siunnersuutigaa sanaartornermi maleruagassat teknologikkut teknikkikkullu ineriartornermut malinnaasinnaaqqullugit Naalakkersuisut peqquneqassasut tamanna pillugu suliaqaqqullugit. Aallaqqaammut Atassummiit oqaatigissavarput siunnersuut tamakkiisumik taperseratsigu. Sanaartornermut maleruagassat ukiuni kingullerni arlalitsigut ullutsinni naleqqussarniarneqartarput tamannalu Atassummiit ilisimaarivarput kisiannili aamma nalunngilarput GTO-qarallarmalli malittarisassat tamakkiisumik naleqqussarnerat suli naammaginartumik naammassineqarsimanngitsoq. Soorlulumi aamma Naalakkersuisup akissuteqaataani tamanna ersersinneqartoq.
Suliassaq suli naammassineqanngilaq, naak oqaatigineqartutuut kapitalit arlallit maannamut naammassineqareersimagaluartut. Suliamut susassaqartunut tusarniaassutiginissaanut siunnerfik kiisalu maleruagassat atuutilerfissaat junip aallaqqaataa ukioq 2002 tagginneqaraluartoq taamaattoq naammaginngilarput Naalakkersuisut oqarmata imaluunniit oqaannarmata maleruagassat nutaat suliarineqarnissaasa allanngortinneqarnissaat pisariaqanngitsuusoralugu.
Atassut isumaqarpoq suliassaq
pimoorullugu suliarineqartariaqarlunilu naammassivinniartariaqartoq
tamannalu pisariaqartoq. Tassami kinguaatoortoqartarpoq. Pilersaarutinik
naammasinninngitsoortoqartarpoq. Ilaatigut sulisut taarseraattuarnerat
allallu peqqutigalugit. Taamaattumik Naalakkersuisunut kissaatigissavarput
suliassaq naak aallartisarneqareeraluartoq pimoorullugu aasamut
qulakkeerlugu naammassiniaqqullugu. Taamatut
oqaaseqarluta siunnersuut taperserparput.
Johan
Lund-Olsen, Inuit Ataqatigiit oqaaseqartuat:
Qujanaq.
Qularutissaanngilaq sanaartornermut maleruagassat allanngortinneqarnerisigut
inuiaqatigiinnut iluaqutaasussamik sipaagaqartoqarsinnaanissaa. Sisimiuni
sanaartornermut ilinniarfiup immikkoortortaani Center for Artisk teknologimi
ingeniøritut ilinniartut maanna takutereersimavaat illut kiassarneqarnerinut
aningaasartuutit appartinneqangaatsiarsinnaassut kiassarnikkullu uuliamut
annikillerutissaq illunut affarleriinnut ukiumut 3.000 literip
angeqqatigisinnaagaa.
Sanaartornermut
maleriagassalli 1982-imeersut tamanna maanna ajornakusoortippaat
assersuutigalugumi
naqqit kissartut atorlugit init kiassarnerit maanna inatsisinik
unioqqutitsinerup-
put naak kiammik atuinerup millisinneqarnissaanut pisariitsumik tamakku
periarfissalluaraluartut. Seqerngup qinngorneranik iluaquteqarluni nunatsinni
atorluaanerunissaq sanartornermut maleruagassat 1982-imeersuunerannit aamma
akimmisaartinneqarput. Tamanna uggornarluinnarpoq, Sisimiunimi
misileraanerit maannamut aamma takutissimavaat seqerngup qinngorneranit
Danmarkimut nunanullu allanut sanilliulluta iluaquteqarnerusinnaasugut
ikummatissamik uuliamik pisariaqartitsinitta annikillilerneqarneranik aamma
kinguneqarumaartussamik.
Sanaartornermut
maleruagassat 1982-imeersut nunatsinni ullutsinni pissusiviusunut
naleqqussarneqartariaqarmata
taamaammat Inuit Ataqatigiit isumaqarluinnarpugut.
Taamaattumik
nuannaarutigivarput Naalakkersuisut siunnersuuteqartumut akissuteqarnerminni
suliaq tamanna aallartinneqareersimasoq aamma ilisimatitsissutigimmassuk.
Naatsorsuutigineqartorlu sanaartornermut maleruagassat nutaat aappaagu tassa
2002-mi junip aallaqqaataaniit atortuulersinneqassasut.
Taamatullu
oqaseqarluta Inuit Ataqatigiit iluaralugu Naalakkersuisut siunnersuuteqartumut
akissutigisaat tusaatissatut tiguarput.
Mads-Peter Grønvold, Kattusseqatigiit oqaaseqartuat:
Kattusseqatigiinniit imatut naatsumik oqaaseqassuugut. Siullermik Kattusseqatigiinniit siunnersuuteqartoq ilumoornerassavarput sanaartornermut maleruagassap maannakkut nutarterneqartariaqarnera eqqaammagu. Tassami ukiuni kingullerni europami sanaartornermut piumasaqaatit annerusumik minnerusumilluunniit nunatsinnut nuuginnarlugit ilaatigut nunatsinnulluunniit naleqqussarnagit GTO-qarallarnerata nalaanitut ingerlanneqartarmata.
Naak nunatsinni pissutsit europamut pissutsinut assersuunneqarsinnaanngilluinnaraluartut. Taamaattoq sanaartornermut piumasaqaatit maannamut allanngortinneqaratik atortinneqarput. Taamaattumik pisariaqarluinnarpoq nunatsinnut naleqquttunngorlugit sanaartornermi maannakkut maleruagassaqalernissaa.
Kattusseqatigiinniit iluarisimaarparput maannakkut suliat Naalakkersuisunit aallatinneqarsimammata. Taamaaliornikkut neriuutigaarput nunatta silaannaanut nunatsinni sanaartorneq naleqqussarneqarumaartoq. Naggataatigut neriuutigaarput nunatsinni sanaartornermut suliaqartut sapinngisamik tusarniarneqarumaartut. Taamatut naatsumik oqaaseqarluta Naalakkeruisut akissutaannut isumaqataavugut.
Otto Steenholdt, attaviitsoq:
Sanaartornermut maleruagassat 1982-imeersut allanngortinneqarnissaat siunnersuuteqartup piumasarisaa akilluarneqarpoq oqaatigineqarluni suliassaq aallartinneqareersoq. Tassa taakkua taagukkat kapitalini taasa suliarineqareersut. Taavalu taakkua sinneri ukiap ingerlanerani suliarineqarumaartut, isumaqarpunga akissuteqaammi oqaatigineqartut naammagisimaarlugit oqaatigisariaqarlugu.
Anthon Frederiksen, Kattsusseqatigiit:
Siunnersuuteqartoq sinnerlugu qujaniarpunga Naalakkersuisut akissuteqaataannut tassa paasinarmat suliaq maannakkut ingerlanneqartoq aammalu snaartornermi maleruagassat allanngortinneqarnissaat pillugit kingusinnerusukkut saqqummiisoqarumaartoq. Taamaammallu nuannaarutigivara aamma ilaatigut suli Atassumminngaaniit sakkortusaasoqarluni oqaatigineqarmat allaat suliassaq pimoorullugu qulakkeerneqarnissaa aasamut naammassiniarneqassasoq.
Tassami Inuit Ataqatigiit aamma oqaaseqarnerattuut sanaartornermi maleruagassat pisariaqalivissimapput allanngortinneqarnissaat. Sanaartornerup aammalu sanaartornermi najugaqartunut pitsaanerusumik atuutsinneqarsinnaanissaat periarfissallu assigiinngitsut taagorneqartut aamma atorluarneqarnerulernissaat eqqarsaatigalugu kissaatiginarpoq taassumap suliap piaartumik, aamma soorlu Kattusseqatigiit oqaaseqartuata oqarneratuut sanaartornermi suliaqartut aamma tusarniarnissaat qularnanngilaq tassani avaqqunneqarsinnaassanngilaq. Qujanaq.
Jørgen Wæver-Johansen, Ineqarnermut, Attaveqarnermut Pilersuinermullu Naalakkersuisoq, Siumut:
Qujanaq. Assut, assortuuttoqarunanngilaq. Tamatta isumaqatigaarput, sanaartornermi maleruagassat 1982-imeersut taakkua nutarterneqartariaqarmata sutigut tamatigut. Ullutsinnut naleqqussarneqartariaqarput suliarlu tamanna aallartinneqareersimavoq. Atassummut oqaatigerusuppara qularutigineqassanngimmat suliassaq pimoorullugu suliarineqarlunilu naammassiniarneqarumaarmmat. Allaallumi akissuteqaatitsinni ilanngutereerparput qaqugu naammassivinnissaa ullulereerlugu oqaatigalugu.
Taassumalu tungaanut tassa uagut tungitsinniit pisortaqarfimmi naatsorsuutigaarput januarip aallaqqaataata tungaanut uagut suliassagut naammassisinnaallugit taava sanaartornermi peqataasut kattuffiit assigisaallu, sanaartornermut ilinniarfik, tamakku tamarmik tusarniaanermi qaammatini sisamani periarfissaqarnissaat tassuunatigut aaqqiissutaasinnaasunik siunnersuutinik assigisaannullu saqqummiussaqarnissaminnut.
Taamaattumik oqaatigineqartunut qujavunga qularutigineqassanngilarlu suliassaq manna naammassineqartariaqarmat.
Lars-Karl Jensen, Siulittaasoqarfimmi ilaasortaq, Siumut:
Aap, taamaalilluta una aalajangiiffigisassatut siunnersuut oqaaseqarigineqareermat pissusissamisuussaaq suleriaaserput malillugu ataatsimiititalianut susassaqartunut, tassa ineqarnermut attaveqarnermut pilersuinermullu ataatsimiititaliamut ingerlatinneqassaaq, aappassaaneerneqarnissaa taakkua suliarisussaammassuk.