Oqaluuserisassani immikkoortoq 66-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut aqqaneq-pingajuat, ataasinngorneq oktoberip 15-iat 2001, nal. 16:35
Ataatsimiinnermik aqutsisoq: Anders Andreassen, Siulittaasoqarfimmi ilaasortaq, Siumut.
Anders Andreassen, Siulittaasoqarfimmi ilaasortaq, Siumut:
Taava tullianut ingerlaqqissaagut, tassalu immikkoortoq 66, tassalu piniartut tuttutaminnik 31. december 2001 tikillugu tuniniaasinnaatitaanissaat pillugu aalajangiiffigisassatut siunnersuut, tassani siunnersuuteqartoq Godmand Rasmussen saqqummiusseqqussavara.
Godmand
Rasmussen, Atassut:
Kalaallit Nunaanni Inatsisartut suleriaasiat § 32, immikkoortoq 1
naapertorlugu aalajangiiffigisassatut imaattumik siunnersuuteqarpunga:
Naalakkersuinikkut politikikkullu anguniagaavoq nioqqutissanik kiisalu
inuussutissanik nunarput sapinngisamik tamaat pilersornerulissasoq, tassani
isumaalluni avataanit eqqussinerup annikillineqarnissaa, tamannattaarlu
aammattaaq inuussutissanut atuuppoq.
Ukiulli makku nalerorpagut nunarput tuttorpassuarnik uumasoqalerluni,
tassani ilisimaneqartutuut ukiumi 2000-imi tuttutassiissutaasut 13.000-it
nugunneqanngilat, 2001-imilu 24.000-it sinneqalaartut tuttutassiissutitut
pisassiissutaapput, taakkulu ngunneqarnavianngillat naak biologinit
tmakkeqquneqaraluartut, naluneqanngittutuummi pisarineqarsinnaasut
killilerujussuussapput peqqutigalugu inuutissarsiutigalugu piniartut
tunitsivissaat killeqareeqqimmata.
Tamatumanilu pissutaasut ilanginngitsuungilaat tuttunniarnermi naanerata
kingorna tuttut pisarineqarsimasut tuniniagaasarnerisa piffissarititaasullu
sivikkippallaartumik killilerneqarsimanerat, tassami piniartut aasaq manna
oqaatigaat Nassutuumi Sisimiullu isortuani tuttut toqararsimaqisut,
pingaartumillugooq norraat, aammalugooq nuna tipeqaluni aammalugooq
tupinnanngitsumik niviugappassuaqarluni.
Taamaattumillu uanga ersissutigaara tuttut nunami neriniarfimmini
nujunnermikkut tuttoqassutsikkut navianaatilimmik pisoqalerumaarnera,
taamaattumillu siunnersuutigissavara piniartut tuttutamnnik 31. december 2001
tikillugu tuniniaasinnaatitaajuassasut, qeritisivimmi piniartunut
immerneqartuartarmata, naluneqanngitsutuummi juullip qaammataani neqinik
annertuunik pisariaqartitsisoqalertarmat, tamatumanilu iliuuseqarnitsigut
piniartut aningaasarsiornerisigut annertuumik
ikiorsiiffigisinnaasagaluaratsigit tuttut pinngortitami nammineq
toqorartiinnarnagit.
Neriuutigaaralu siunnersuutiga ilassilluarneqarumaartoq.
Alfred
Jakobsen, Peqqinnissamut
Avatangiisinullu Naalakkersuisoq, Inuit Ataqatigiit.
Qujanaq, Inatsisartunut ilaasortaq Godmand Rasmussen
inuussutissarsiutigalugu piniartut tuttutaminnik 31. december 2001 tikillugu
tuniniaasinnaatitaanissaanik siunnersuuteqarpoq.
Aalajangiiffigisassatut siunnersuummini Inatsisartunut ilaasortap Godmand
Rasmussenip tikkuarpaa naalakkersuinikkut anguniagaasoq nunarput
inuussutissanik sapinngisamik annertunerpaamik imminut pilersorniartariaqartoq.
Taamatuttaaq naalakkersuinikkut anguniagaavoq inuussutissat
peqqinnartuussasut nutaajussasullu. Taamaattoqarnissaa Naalakkersuisut
isumannaarpaat inuussutissat suliarineqartarnerat, assartorneqartarnerat
tuniniarneqartarnerallu pillugit malittarisassatigut ullumikkut atuuttuni.
Kalaalilimineerniarfinni piniartup aalisakkat piniakkallu suliarineqanngitsut
uumasut nakorsaannit nakkutigisaanngitsumik atuisunut toqqaannartumik
tuniniarsinnaavai, tassami atuisut nammineerlutik misissuinermikkut
nioqqutissat pitsaassusiat naliliivigisarsinnaammassuk.
Tuttut neqaanni kalaalimineerniarfinni tuniniarneqartunik bakteriaqassusimik
misissuinerit inernerisa tamarmik takutippaat pisaqarnerup kingornatigut ullup
ataatsip marlulluunniit qaangiunneranni bakteriaqassutsimut tunngatillugu
tuttup neqaa pitsaasuusartoq. Ullut marluk qaangiunneranni bakteriaqassusia
annertuseriarujussuartarpoq, taamaaligaanngat bakteriat
inuummarlutsitsilersinnassut ajornerpaappallut napparsimalersitsisinnaasut
ajornartorsiutaalersinnaasarput.
Qerititsineq bakteriaqassutsimut annikkilliliissitsissutaasinnaanngilaq,
taakkuli amerliartornissaat kigaallatsinneqarsinnaalluni. Neqi aappat,
bakteriat amerliartoqqilissapput.
Piniartut tuttup neqaa toqqortarerusukkunikku allatulluunniit
tunisassiarerusukkunikku suliffeqarfittulli allatut inuussutissanik
tunisassiortutuut akuereqqaarneqartussaapput, suliffeqarfiit
inuussutissaleriffiusut pillugit Namminersornerullutik Oqartussat
nalunaarutaat normu 21, 27. juli 1998-imeersumi maleruagassat malillugit,
tassanimi qulakkeerneqarmat tunisassiortut nioqqutissat peqqinnartut
tuniniaavinnut neqeroorutigisassagaat.
Naalakkersuisuni nassuerutigissavarput inuussutissanut tunngassuteqartut
soqutigisanut aporaaffiummata, piniartutut inuussutissarsiortortagut
tapersersorusullugillu tunisassiagut naleqarnerulersikkusuppagut,
suliffisuarni suliffissanik pilersitsiortorusuppugut kiisalu nunanut allanut
inuussutissanik tuniniaanitsigut nunatsinnut eqqussukkat avammullu tuniniakkat
oqimaaqqatigiissaarnerisigut nunatta aningaasarsiornera
pitsaanerulersikkusupparput.
Taamaammat assigiinngitsunik soqutigisallit akornanni
oqimaaqqatigiittoqarnissaa nassaarisariaqarparput, aalajangiusimallutigulu
tassunga peqatigitillugu tunisassiassat maannakkornit annertunerusumik
aqutaralugit inuiaqatigiit aningaasaqarnerannut annertunerpaamik
iluanaarutaasinnaaniassammata.
Piniartut uumasut nakorsaannik nakkutigisaanngitsumik aalisakkat neqillu
kalaalimineerniarfinni atuisartunut tuniniarsinnaavaat, suliffeqarfiit
inuussutissanik nunatsinni tuniniagassanik tunisassiornissamik akuerisaasut
uummasut nakorsaannik nakkutigisaallutik tunisassiassat suliarisarpaat,
suliffeqarfiit ataasiakkaat EU-mi tuniniaavinni tuniniagassanik nunanut
allanut annissuinissaminnut akuerisaapput.
Naalakkersuisut isumaqarpugut suliffeqarfiit nunanut allanut
tuniniaasinnaanissaat anguniarusunnartuusoq, tuttummi neqaanni uagut nammineq
nerinngisatsinnik tuniniaanissamik tamanna periarfissatuaammat. Neqip
pinngortitamit pissarsiarisartakkatta tamakkerlugu nerinissaanut maani
nunatsinni najugaqartuusugut ullumikkut ikippallaarpugut. Suliffeqarfiit
inuussutissaleriffiusut pillugit Namminersornerullutik Oqartussat
nalunaarutaani normu 21, 27. juli 1998-imeersumi anguniarneqarpoq aalisakkanik
piniakkanillu kalaalimineerniarfinni tuniniaanerup aammalu suliffissuarmi
tunisassiortarnerup immikkoortisimanissaat, tassami kalaalimineerniarfimmi
pisisut nammineerlutik pisiassatik naliliivigisinnaavaat, suliffissuarmili
tunisassianik pisisut tunisassiap pitsaasusianik ernummateqaqqunagit
tunisassiortunut piumasaqaatit arlaqartut atuupput.
Naalakkersuisut kissaatigaat atuisut inuussutissanik peqqinnartunik
eqqiluisaarnerullu tunngatillugu ernumananngitsunik pissaqartinniarlugit
qulakkeerisoqarnissaa, taamatullu inuup peqqissusiata
pingaartinneqarluinnarnissaa. Taamaammat Naalakkersuisut siunnersuut
saqqummiunneqartoq tapersersorsinnaangilarput, taamaaliortoqassappammi
peqqinnisamut tunngatillugu kinguariartoqassammat,tamannami tuttut neqaasa
bakteriaqassusiinik misissuinerit siuliini taasama takutereermassuk.
Siunnersuut aappassaaneerneqartinnagu Peqqinnissamut Ataatsimiititaliami
suliarineqassasoq Naalakkersuisut kaammattuutigivarput.
Vittus Mikaelsen, Siumup oqaaseqartua:
Piniartut tuttutaminnik 31. december 2001 tikillugu tuniniaasinnaatitaanissaat pillugu aalajangiiffigisassatut siunnersuummut Siumuminngaanniit ima oqaaseqarfigissavarput:
Inatsisartunut ilaasortaq Godmand Rasmussenip siunnersuutigaa tuttunniarfiup iluani augutsip aallaqqaataaninngaanniit 30. september 2001 iluani piniartut pisaminnik tuniniaasinnaanissaaq 31. december 2001 tikillugu Siumumiit paasilluarlugu ima oqaaseqarfigissavarput.
Siunnersuuteqartoq paasisinnaavarput piniartut tuttutaminnik tuniniaasinnaanerat saqqummiussiffigimmagu, kisiannili tamanna nalunngilarput piniagassanut killilersukkanut sunulluunniit taamaaliortoqarsinnaanngimmat, ingammik peqqinnissaq eqqarsaatigalugu, aammali Siumuminngaanniit piniartut pisaminnik nutaanik kalaalimineerniarfinni suliffeqarfinnilu tuniniaasarnerat illersortuaratsigu.
Naalakkersuisut saqqummiussaminni nassuiaanerat tunngavigalugu Siumumiit taamatut naatsumik oqaaseqarlunga siunnersuut akuersaangilarput, Naalakkersuisut saqqummiussaat isumaqatigaarput aappassaaneerneqannginnermini Peqqinnissamut Ataatsimiititaliami suliarineqassasoq.
Finn Karlsen, Atassutip oqaaseqartua.
Inatsisartuni ilaasortaq Godmand Rasmussen piniartut tuttunik 31. december 2001 tikillugu tuniniaasinnaanissaanik, tamatumunngalu tunngatillugu Atassumiit imaattumik oqaaseqassaagut:
Siunnersuuteqartup siunnersuuteqarnermi tunngavigai aasaq manna tuttutassiissutigineqartut amerlaqisut pisarineqarsimasut, naak aamma amerlaqisut pisarineqarsimanngikkaluartut, nalunngilarput piniartut amerlaqisut amerlasuunik pisassinneqarsimanertik tunngavigalugu amerlasuunik pisaqarsimasut, tuniniaasinnaanerullu sivikippallaarnera tunngavigalugu tuninngitsuukkamik ilaat qerititsivinnut toqqortiinnarsimasaasa tuniniarneqarnissaat anguniarlugu 31. december 2001 tikillugu tuniniaasoqarsinnaanera siunnersuutigineqarpoq.
Piniartut aningaasarsiorsinnaanerat eqqarsaatigalugu siunnersuut soqutiginarluinnarpoq, piniartummi aningaasarsiorsinnaannerminnut periarfissaat ulluni makkunani annikitsuararsuupput, pingaartumillu nalliutut nalaani piniartut sinnerussaminnik tuniniaasinnaanissaminnut periarfissinneqarsinnaaneri periarfissatsialaavoq pitsaasoq, kisannili aamma Atassummiit pingaartilluinnarparput pisisartut pitsaasumik pisiassaqarnissaat, tassami piniartut illersussagutsigit tuniniagaat pitsaasuunissaat pingaartitarilluinnartariaqarparput, tamatumani pingaarmat kikkunnut tamanut innarliisoqannginnissaa.
Taamaattumik siunnersuut oqallisigilluareerlugu Naalakkersuisullu akissuteqarnerminni pingaartutut oqaatigisaat pitsaassutsimut tunngasut, tassa bakterianut tunngasut eqqarsaatigalugit Peqqinnissamut Ataatsimiititaliami nalilersorluarneqarnissaat inassutigissavarput, tamatumani tuniniaasinnaaneq akuerineqassagaluarpat akuerineqassangikkaluarpalluunniit pitsaaqqutaasinnaasut akornutaasinnaasunulluunniit tunngasut paasissutissat ersarissut nalilersorneqassammata.
Naggataatigut oqaatigissavarput siunnersuut tunngaviatigut tapersersornarmat, oqareernitsigullu mianersornarsinnaasut ataatsimiititaliami nalilersoqqissaarnissaat pingaartipparput, ataatsimiititaliallu nalilersuereerluni Inatsisartunut saqqummiinissaa qilaarluta utaqqissavarput.
Paninnguaq Olsen, Inuit Ataqatigiit oqaaseqartuat.
Inatsisartunut ilaasortaq Godmand Rasmussen inussutissarsiutigalugu piniartut tuttutaminnik 31. december 2001 tikillugu tuniniaasinnaatitaanissaanik Inatsisartunit aalajangiiffigisassatut siunnersuuteqarpoq.
Siunnersuuteqartoq eqqortumik oqarpoq naalakkersuinikkut anguniaagassoq nioqqutissanik kiisalu inuussutissanik nunatsinni innuttaasut sapinngisaq tamaat pilersornerulernissaannut aqqutissanik ajortuinerit ingerlanneqartut, tassani isumaalluni avataanniit neqinik eqqussuinerup annikillineqarnissaa.
Tamanna qanittukkut savaaqqat neqaat nunatsinneersuut akiisa appartinneqarnissaat siunertaralugu Inatsisartunit akuerineqartumik iliuuseqarnitsigut naqissuserneqaqqippoq.
Naluneqanngitsutuullu ukioq manna tuttuttassiissutaasut 24.000-it pisassiissutaapput, taakkualu nungunneqarsimanissaat ilamananngilaq. Tamanna assigiinngitsunik pissuteqarpoq, ilaatigut tuttut pisarineqarsimasut tuniniagaasarnerat ajornartorsiutaasoq nalunngilarput, aammalu piffissarititaasup sivikippalaartumik killilerneqarsimanera pissutaaqqataavoq.
Inuit Ataqatigiit naalakkersuinikkut tassalu inuussutissat peqqinnartut aammalu allatigut peqqinnissakkut illersorneqarsinnaasut annertusarneqartuarnissaat anguniagaasoq tapersersorparput. Tamannalu Naalakkersuisut inuussutissat suliarineqartarnerat assartorneqartarnerat tuniniarneqartarnerat pillugit ullumikkut malittarisassatigut isumannaarsimagaat isumaqarfigaarput. Tassanimi qulakkeerneqarmat tunisassiortut nioqqutissat peqqinnartut tuniniaavinnut neqeroorutigisassagaat.
Inuit Ataqatigiit nuannaarutigisarparput umiatsiaararsorlutik piniartut aalisartorlu tassaammata; "tamatsinnut neqinik aalisakkanillu nutaartugassaqartitsisut." Kalaalimineerniarfimmi piniakkat suliarineqanngitsut uumasut nakorsaannik nakkutigisaanngitsumik atuisunut toqqaannartumik tuniniarneqartarnerisigut nunatsinnut avataaniik eqqussuinermut annertuumik killilersuisupput. Taamaalillutillu nunatsinni aningaasat kaaviiaartinneqarnerannut pingaarutilimmik inissisimasuullutik. Tassani atuisut nammineerlutik misissuinermikkut nioqqutissat pitsaassusiat naliliivigisarpaat.
Nuka A/S-ip pilersinneratigut aalisakkat piniakkallu nunatsinni pisarisartakkatta nunatta imminut pilersorsinnaasusianut atorluarnerulernissarput siunnerfigaarput. Aammalu Nuka A/S-mi tunisassiat peqqinnissakkut allatigullu illersorneqarsinnaasumik ingerlanneqartarnissaat qulakkeerniarlugu inuussutissalerinermi piumasaqaatit atuutsinneqartut tunngavigalugit ingerlanneqarlutik.
Taamatullu inuup peqqissusiata pingaartinneqarluinnarnissaa qulakkeerniarneqartarluni, taamaaliortoqartarpoq savanik tuttunillu nujuitsunik toqoraanermi, nutaatullu Kangerlussuarmi umimmannik tunisassiornermi.
Tamakku tunngavigalugit Inuit Ataqatigiit piniartut tuttutaminnik 31. december 2001 tikillugu tuniniaasinnaatitaanissaannut Naalakkersuisut tapersersuinnginnerat isumaqatigaarput, taamaaliortoqassappat nunatsinni peqqinnissamut tunngatillugu kinguariartoqarnissaa ernumanarmat. tamanna tuttut neqaasa bakteriaqassusiini misissuinerit takutereermassuk.
Naggataatigu Inuit Ataqatigiit kaammattuutigissavarput kalaalimineerniarfinnik atuisuusut pisisartullu piumasaqaataannut naleqqussaanissamut kommune-t piumassuseqarneroqqullugit.
Taamatut siunnersuut oqaaseqarfigalugu aappassaaneerneqartinnagut peqqinnissamut ataatsimiitsitaniami suliarineqassasoq Inuit Ataqatigiit inassutigaarput.
Anders Andreassen, Siulittaasoqarfimmi ilaasortaq, Siumut.
Qujanaq. Tulliulluni oqaaseqassaaq Loritha Henriksen, Kattusseqatigiit.
Loritha Henriksen, Kattusseqatigiit.
Qujanaq. Piniartut tuttunik 31. december 2001 tikillugu tuniniaasinnaanissaat pillugu aalianngiifittut siunnersuut. Inatsisartunut ilaasortat Godmand Rasmussenip aaliangiiffigisatut siunnersuutaa Kattusseqatigiinniik imatut oqaaseqarfigissavarput: "Kattusseqatigiinniik aalajangiiffigisatut siunnersuut soqutigalugu pingaartutullu nalilerlugu eqqartorsimavarput, minnerunngitsumillu pissutsit ullumikkut piviusut aallaavigalugit pingaartikkatsigut."
Soorluttaaq aamma uanga nammineerlunga 26. marts 2001-imi taamatorluinnaq imalimmik oqaluuserisassanngortitsisimagaluartunga, ullormilli ataatsimik tunniussinissaq kinguartoortillugu pissutigalugu saqqummiunneqanngitsumik aammalu neriuutigisimagaluarlugu ukiamut ataatsimiinnermut, tassa ullumikkumut ilanngunneqarumaartoq. Taamaatumik oqaluuserisassamik saqqummiisoq isumaqatigilluinnarpara inatsimmi naapertorlugu tuttut piniagaaffisa unitsinneraniik ullut 14-it qaangernerisa kingorna tuttut neqaa kalaaliaqqami tuniniaqqusaaunnaarsimammata.
Taamatullu aaliangersimaneq isumaqarfigivarput piniartunik inuutissarsiuteqartunut pisinnaatitaaffimmik killiliivallaartoq aammalu piniartunut tatiginnippaluppallaanngitsutut nalileqqajaanarluni. Soorumi tassa piniartoq aasaanerani piniarfiup uninneraniik ullut 14-it qaangiunnerisa kingorna pisassamik tuniniaaimmut tunisissaguni unioqqutitsilluni pisaqarsinnaassutsiminik nalilerneqarsimasoq, unioqqutitsilluni pisaqarsimasutut nalilerneqartoq.
Kialuunniimmi naatsersuutigisinnaavaa inuutissarsiutigalugu piniartoq ulloq piniarfik kingulleq kingusinaalaarluguluunniit aatsaat illoqarfimminut tikissimaguni taava annertunerusumik pisaminik iluanaaruteqarsinnaanini naatsorsuutigisinnaanngikkaa, takorloorsinnaavarput. Piniartummi aamma allat pisaminnik tuniniaavik immereersimasarmassuk. Taamaattumik piniartut aamma tuniniaasinnaanerup killersorneqarpallaarneranik anersaaruluuteqarnerat paasilluarlugu inatsimmik allanngortitsinissaq Kattusseqatigiinniit kissaatigaarput.
Aammattaaq ilanngullugu oqaaseqarfigerusupparput ukioq kingulleq piniartut ukiakkut tuniniaanissamik qinnuteqarsimagaluarnerat itigartitsissutaasimasoq makkuninnga tunngaveqarsorigatsigu, tassami aasaanerani tuttunniarnerup unitsinneraniik ullut 14-it qaangiunnerisa kingorna pisanik kalaaliaqqami tunisisinnaaneq periarfissaqartitaanngimmat inatsisitigut. Tassuunalu takuneqarsinnaavoq piniartunut annertuumik mattussisoqartoq, inatsit pingaartumik tuttut neqaat eqqarsaatigalugit.
Ajornartorsiutilli minnerulernavianngillat inatsimmik massakkut atuuttumik allanngortitsisoqanngippat. Taamaattumik tamakku akornuteerarpassuit piaartumik aaqqiivigineqartariaqartutut Kattusseqatigiinniit isumaqarpugut.
Ukiormannamimi aamma inuutissarsiuteqarlutik piniartut tuttunniarnissaminnut qinnuteqarsinnaanerat piareersimaffigineqarnissaa eqqarsaatigalugu. Tamatumanilumi naatsorsuutigilluinnarparput ullumikkut tuttorpassuaqarnera, tamatta nalunngilluinnarparput tuttummi nerisassaqarfissaat illersussagutsigu ikilisaanissaq pisariaqartutut isigaarput, siunissaq ungasinnerusoq eqqarsaatigalugu. Minnerunngitsumillu ullumikkut piniartut oqaatigisartagaat tassa; "maannamut tuttunik toquinnartunik naapitsisarneq qanganiik annertunerusoq" oqaatigineqartarmat. Tamannalumi toqqissisimanngitsutut aamma nalilerparput.
Kattusseqatigiinniit tuniniaasinnaanermut inatsimmut allanngortitsinissaq tapersiinitsinnut aamma makku tunngavigaalugut taarusuppagut. Ullumikkummi pissutsit qiviaraanni tunitsiviusinnaasumik annerusumik periarfissaqanngilaq, tuniniaanissamullu killilersuinerit massakkut atuuttut akueriuminaatsikkaluarlugit taamaattoq piniartut pisaminnik ataatsikkut tunitsivigisinnaasaannik atauartumik ullumikkut peqannginnera uparuarusupparput.
Ullumikkummi pissutsit qiviaraani inuutissarsiutigalugu piniartut tunitsivissaqannginnerat tulluanngilluinnarpoq, tunitsivissamik kalaaliaqqami ullumikkut killiliisimaneq pingaartumik piniartut kalaaliaraq kisiat tunitsivissatut isumalluutigitillugu.
Inuussutissarsiutigalugulu piniartut aalisartullu aningaasasiornerannut annertuumik inatsit killiliimmat pisariaqanngikkaluartumik. Nalunngilluinnarparami inuutissarsiutigalugu piniartut aalisartullu ilaat angisuunik isumannaatsunillu namminneq qerititsiveqartartut ukiup ingerlanerani sukkulluunni qilersorsimanatik tuniniaanissamik periarfissaqarumallutik, minnerunngitsumik nalliuttut qanillilerneranni.
Taamatut oqaaseqarluta inatsit tuniniaanermut killilersuisimaneq atorunnaarsinneqarnissaa Kattusseqatigiinniik inassutigaarput. Suliarlu aappassaaneerneqannginnera ataatsimiitsitaliamut ingerlateqqinneqarnissaa inassutigalugu.
Anders Andreassen, Siulittaasoqarfimmi i laasortaq, Siumut.
Qujanaq. Tulliulluni oqaaseqassaaq Otto Steenholdt, attaviitsoq.
Otto Steenholdt, attaviitsoq.
Siunnersuutigineqartoq eqqarsaatigalugu iluatinnartumik siunnersuuteqaraluarpoq, kisianni peqqinnissamik ilisimasallip oqaasii sanioqqukkuminaapput.
Uagut atuisuusugut pisiniartuusugut aamma piumasarisaratsigut pisiarput tassaassasoq sumik ajoquteqarani peqqinnissakkullu aamma unioqqutsisinani uagutsinnut tunniunneqartoq pisiarineqarsinnaanngorluni.
Pisarineqartut nutaajutillugit piaarnerpaamillu qerititsisinnaaneq aamma peqqinnissaqarfimmiunit nalilerneqarsinnaavoq, soorlu umimmanniarneq eqqaassagaanni sivisulaartumik qimussinik taakkua ingerattarpaat. Qeritinneralu suliarineralu taakkua misilittagaqarfigereerpaat. Tassa ataatsimiititaliaq maannakkut siunnersorneqarmat ataatsimiinnissaannik una oqallisigisarput aallaavigalugu. Assorsuaq uaninngaanniik pingartinneqassaaq peqqinnissaqarfimmik suleqateqarluarluni taanna ataatsimiititaliaq sulissasoq. Tassa inatsisartunut siunnersuuteqarsinnaanngilaq Peqqinnissaqarfimmit paasisimasaarluartunit suleqateqarsimanngikkuni. Tassa taamaassappat uanga pisariaqartilluinnassavara ataatsimiititaliap saqqummiussassaa maanga inatsisartunut, tassaassasoq Peqqinnissaqarfimmik suleqateqarluni suliaasimasoq.
Naalakkersuisut isumaginiarlissuk tamanna, tassa Peqqinnissaqarfiup ataatsimiititaliamik ataatsimeeqateqarnissaa.
Anders Andreassen, Siulittaasoqarfimmi ilaasortaq, Siumut.
Qujanaq. Taavalu tulliulluni oqaaaseqaqqissaaq siunnersuuteqartoq Godmann Rasmussen, Atassut.
Godmann
Rasmussen, Atassut.
Tassa ukua partiit Attaviitsullu oqaaseqaataat paasivakka
Peqqinnissaqarfimmit tamarmik ingerlatsitsiniarnerat taanna aamma
ajorinngilluinnarpara aamma taamaattariaqarpoq, kisiannili
naqqiuteqalaarusuppunga. Uanilu ilaatigut oqaaseqartunit
paasinerlunneqarsimagunarpoq periarnera. Minnerpaarpaamilluunniit oqanngilanga
piniakka ulorianarsisimasut tuniniarneqartarnissaat. Taanna
anguniarneqanngilaq. Naalakkersuisumut akissuteqaatit, taanna isumaqarpunga
nammineq illit misigissutsikkut suliaq suliarisimanngikkit, kisianni
pasitsaappara atorfilittap kiannguunerpoq taamatut suliaq taamatut
suliarimmagu pallorfigiinnarsimagissi.
Uanga tuttoqarfimmiuuvunga, tuttoqarfissuarmi aamma tuttorpassuit
pisarinikuuvakka. Tuttu ingerlaannarluni ameerneqaraangami, tassa
aattorneqartunit uagut taasarparput. Qaava tamarmi saluaraartarpoq, taavalu
aggorneqarnermini silaannarissoq tamaat ajortussaagaluaq tamaat
peertareertarpaa. Tuttu agg.... Una pivara. Paaseqquara una uangana una pigiga
piniartut qerititsivimmiittuutiminnik tuniniaasinnaatitaanissaat inatsisitigut
akuerineqassasoq, tassa tuniniaavinni. Tuttut ukua pivakka. Makkua allat
pinngilakka soorunami ulorianarsisimasoq uagut aamma ima sianiitsiginngilagut
pisisartut tipittoq qiviarutsigu imaluunniitajortoq erniinnaq
malugereertarparput.
Naalakkersuisumut una oqaaseq akissuteqaatiga atualaarusupara:
Siullermik oqaatigissavara akissuteqaatinni pakatsinera isertussanngilara.
Nunattami inuussutissaanik imminut pilersornissaa tamatta
isumaqatigiissutigaarput. Akissut assortoruminaappoq ilumoorpoq, ugguuna
anguniagaavoq inuussutissat peqqinnartuussasut. Tamanna
isumaqatigiissutigaarput.
Oqaaseq atorneqarpoq aammagooq asiunikuussanngillat. Siunnersuuteqarninni
asiunikut soorunami pinngilakka. Kinaluunniit pisisartoq aamma tuniniaasoq,
taamak naliliinikkut assut nikassaarpaluttumik nipaqarpoq Naalakkersuisup
akissuteqaataa.
Akissuteqaamma ullunngooq marluk qaangiukkaangata tuttut bakterie-qarnerat
annersuserujussuartarpoq, taamaaligaanganngooq bakterie-it
inuummarlutitsilersarput. Ajoraluartumik akissutera eqqortuunersoq
apeqquserpara. Ukiorpanni tuttoqarfimmi najugaqarpunga tuttup neqaa silami
ukiumi allaat nivingatinneqartarpoq napparsimasimalersutaaneranik maannamut
tusarsimanngisaannarpara.
Aamma siunnersuuteqarninni pisara unaavoq: Piniartut tuttut neqaatitik
qerititsivimmiittut, sooq tuniniaavimmi tuniniarsinnaassanngilaat.
Ajuusaarnaqaarmi nalliuttut nallilerneranni nalunagu sinnilimmik
peqaraluarluni nammineq pigisamik inatsit malillugit ima peqqussutit tuttup
neqaa. nammineq pigisaq tuniniarsinnaanngikkaanni allaat aningasanik
akunnattoornermik kingunilimmik.
Akissuteqaammi EU-mi pissutsit taputartuunneqarput. EU pinngilara, piniartut
uku pigikka, taamattumik akissuteqaat naammaginngilara. Peqqinnissamili
ataatsimiititaliami naliiffigineqarnissaa akuerissallugu. Naliliinissaq
isumaliuutigilluakkamik naliliinissaq pingaartillugu. Ilami ajussaqimmat
tuttup neqaa ulluni marlunni qaangiisimanera piinnarlugu
pisiariumaneqartarunnaassappat ajuilluni ajussaqaaq. Inuit maannakkut
tusatsiakkaminnut sunnertiasaqimmata, tassalu taanna ersinartua. Tassa taanna
tusaatissatut tigugakku akissuteqaat..., kisianni una iluatsillugu
Nalaakkersuisumut misissulaaqquniarpara unarpiaavoq, tassa tuttut
illersuganerat pillugu Namminersornerullutik Oqartussat nalunaarutaanni normu
8, 8 . februar 2000-imeersoq. Taanna isumaqarpunga natsunnguamik
atualaarniarpara. Misissorlualaaqullugu piniartuninngaanniik Sisimiuni
upernaarli taanna uparuarneqareernikuummat. Atuassavara §4 immikkoortoq 2.
Piniartut tuttunik pissatamik ujarlernini pisariaqartitsineq naapertorlugu
pissaanerup kingorna ullut unnuallu ingerlanerata sinnerani ingerlattariaqarpa
aamma tuttu pissataq nanineqartinnagu toqunneqartinnagulu allanik
tuttunniartoqassanngilaq.
Tassa imatut paasisariaqarpoq uanga qulit imaluunniit arfineq pingasut
qilanngoorukkit, taavalu kingulleq pissallugu, seqinerlu kiattoq
aattorsinnaanngilakka pisakka, taava mikiassapput pullallutillu. Una
inatsit taanna misissorlualaarniarili. Isumaqarpunga kukkusaasoq.
Taama
naggataatigut oqaaseqarlunga partiit tamarmik siunnersuutaat ajunngitsumik
tiguara, tassalu Peqqinnissaqarfimmut ingerlanneqarsinnaanera
ataatsimiititaliamut, taanna siunnersuutigineqarsimammat taanna aamma
akuersaarlugu.
Anders
Andreassen, Siulittaasoqarfimmi
ilaasortaq, Siumut.
Qujanaq.
Tulliullunilu akissuteqassaaq Peqqinnissamut Avatangiisinullu Naalakkersuisoq.
Alfred
Jakobsen, Peqqinnissamut
Avatangiisinullu Naalakkersuisoq, Inuit Ataqatigiit.
Tassa
nuannaarutigaara uani Inatsisartuni ilaasortap siunnersuutaanut
Naalakkersisunut akissuterput amerlanerujusut imaluunniit tamarmik
isumaqatigimmassuk.
Tassami
inassutigaarput aappassaaneerneqatinnagu una suliassaq Peqqinnissamut
ataatsimiititaliamut suliakkiissutigineqaqqaassasoq. Tamannalu paasivara
Siumup, Atassutip, Inuit Ataqatigiit Kattusseqatigiilu aammalu Attaviitsup,
Otto Steenholdtip isumaqatigigaa.
Tamaallalli
immikkoorutaa uaniippoq Kattusseqatigiit uani Naalakkersuit akissuterput
tamakkiisumik tapersinngimmagu, kisianni Naalakkersuisutuut taamatut
akissuteqarnitsinnit tunngaverpiaapput ullumikkut aalajangersakkat ullumikkut
tassa atuuttut maani Inatsisatut kissaatigtisaat tunngavigalugit
inatsimminngaanniit inuussutissalerinerminngaanniit pillugu
inatsimimminngaanniit pequssumminngaanniit taakkuummata ullumikkut
maligassaasut.
Tassa
tuniniaariaatsit assigiinngitsut pingasut erseqqissumik uani akissummi
oqaatigisimavakka, tassalu piniartut uumasut nakorsaanit
nakkutigisaanngitsumik aalisakkat neqillu kalaalimineerniarfinni atuisartunut
tuniniarsinnaavaat, tassa periarfissaq siulleq. Taava periarfissap aappaa,
suliffeqarfiit inuussutissanik nunatsinni tuniniagassanik tunisassiornissamut
akuerisaasut uumasut nakorsaannit nakkutigisaallutik tunisassiassat
suliarisarpaat, taakkunanilu ilaapput NUKA A/S ilaatigut
tunisassiorfiusinnaasut.
Taava
pingajuattut suliffeqarfiit ataasiakkaat, uanilu ilaatigut oqaaseqartut ilaata
aamma taavaa, tassalu Paninnguaq Olsenip Inuit Ataqatigiit oqaaseqartuata,
tassalu Kangerlussuarmi taanna tunisassiorfik immikkut aamma periarfissaammat
avammut nioqquteqarsinnaalluni. Tassa ullumikkut aalajangersakkat taakku
atuuttut tunngavigalugit sulineq taamatut ingerlavoq.
Taava
siunnersuuteqartutuut siunnersuutaa malinneqassappat kalaamineerniarfimmi
neqit qeritereerneqarsimasut uumasut nakorsamiit nakkutigineqanngitsumik
suliarineqarsimasut tuniniarneqartalissappata uani akissutigisanni taava aamma
periarfissat tassaasut taava aamma malittariaqarpaat, tassaasut taamatut
pissuseqartumik piniartut kalaalimineerniarfitsigoortumik tuniniaasalissappata,
taava suliffeqarfinni allanisuulli piumasaqaatit malillugit taava aamma
taamaaliortalernissaat allatut ajornatumik periarfissatuaavoq.
Taavalu
uani una Naalakkersuisunut ilaasortanut nammineerlunga misigissutsikka
atorlugit suliarisimanngikkigagooq taamatut oqarnera soorunalimi nammineq
naliliinertut illit nammineerlutit naliliinertut isigissavara, kisianni
oqaatigissavara Naalakkersuisuni pingaaruteqarluinnarpoq inatsisit atuuttut
aalajangersakkat atuuttut taakkua malillugit aamma tunisassiornerup
nerisassanillu aamma inuussutissalerinerup taassuma ingerlanissaa
pisariaqarluinnarmat aammalu tamanna tunaartaralugu tassa siunnersuutit uani
sapinngisara tamaat paasinarsarlugu suliarisimavarput.
Ajuusaarutigaaralugu
aamma uani akissutissap imaluunniit siullermeerneqarnerani akissutip
kalaallisut oqaasertalersornerani oqaaseq "asiunikuussanatillu"
taamatut oqaaseq taanna atorneqarmat tusarnaarluartullu maluginiassavaat
taanna uanga atunnginnakku atugarali tassaavoq "nutaajussasullu".
Taavalu
siunnersuuteqartut aamma upissuppaa uani akissutinni ilaatigut uani
allassimavoq aammalu taamatut atuarpara, kisianni siunnersuuteqartup imatut
allanngortikkamiuk: Tassagooq "ullut marluk qaangiunneranni tuttut
bakter-eqassusiat annertuserujussuartartoq, taamaaligaanganngooq taava
bakterriat inuummarlutsilersarput", kisianni oqaaseq taanna uanga
atunngilara, oqaaseq una atorpara: "Bakteeriat
inuummarlutsitsilersinnaasut". Taamaattumik taakku immikkoorutai
siunnersuuteqartumut maluginiaqqussavakka.
Tassalu
aamma uani pingaaruteqarluinnarpoq tassa piniartut namminneq pisaminnik
kalaalimineerniarfinni tuniniaasinnaanerat tunngaveqarmat. Piniartut aammalu
atuisup imaluunniit pisisartut akornanni tatigeqatigiinnerup taassumap
tassanerpiaq tatigeqatigiinneq qitiummat. Tassa qaqugukkulluunniit
kalaalimineerniarfimmi tuniagaasut nutaajunissaat naatsorsuutigalugu una inatsit
imaluunniit peqqussut aammalu aalajangersakkat taassuma malitsigisaannik
ineriartortinneqarsimasut taakkua pinngorsimapput, tassalu
naatsorsuutigineqarmat kalaalimineerniarfinni tuniniarneqartartussat
tassaassasut tunisassiat nutaalluinnaasut, nutaarluinnaasut, taavalu
suliffeqarfiit allat immikkut piumasaqaatitalinnik tunisassiorsinnaanerat
tassani aamma periarfissaqartinneqarluni.
Siunnersuuteqartullu
aamma uani kingullermi akissuteqarnermini oqaas inatsit issuaavigisaa taanna
uani siunnersuummut immikkut siunnersuutaanik taaneqarsimanngimmat taanna
immikkut oqaaseqarfiginianngilara.
Qujassutigivara
Peqqinnissamut Ataatsimiititaliap uuma siunnersuut aappaassaaneerneqannginnerani
suliarinissaanut inassutigisarput tamanit akuersaarneqarmat.
Anders
Andreassen, Inatsisartut
oqaaseqartuat, Siumut.