Oqaluuserisassani immikkoortoq 64 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut qulingiluaat, ataasinngorneq oktoberip 8-at 2001,
Ataatsimiinnermik aqutsisoq: Augusta Salling, Siulittaasoqarfimmut
sinniisussatut ilaasortaq, Atassut.
Jakob Sivertsen, Atassut:
Kalallit Nunaanni Inatsisartut suleriaasiat § 36 naapertorlugu
Naalakkersuisunut apeqqut imaattoq saqqummiutissavara: Q-17-nit Q-19-llu kiisalu
angallateeqqat nalinginnaasut, aammalu pujortuleeqqat takornarissaanik
angallatitut akuersissutigneqarnissaat pillugit Naalakkersuisunut apeqqut.
Ukiuni kingullerni takornarissat Nunatsinnut tikittartut amerliartorput.
Amerlanersaat pinngortitarsuarmut alianaatsumut takornariarusuttarput,
takorusutaminnullu pigasuartumik apuukkusuttarlutik. Takornarissat taamatut
angalarusuttut takornarissanik angallassisartut angalammik akuerisaannginnerat
assut ajornartorsiutigisarpaat, naak sillimanissaq eqqarsaatigalugu soorlu
VHF-inik radioqartaraluartut. Assersuutigalugu ukioq manna takornarissat
Kulusuup eqqaani qimusserusuttut amerliartorsimapput ajornartorsiuteqartarporlu
tassa Tasiilami nunaqarfittaanilu takornarissnik angallassisartut
angallateqaraluarlutik angallataat inunnik angallassinermut piumasaqaataasunik
naammassinnissimanngimmata, soorlu makku: Ajunaalerninermi atallaarsuit
annanniutitut sanaat, annanniutit pullattakkat annanniutillu nalinginnaasut
redningsvestinik taaneqartartut.
Matumuuna apeqqutigerusuppara aasarisseruttornerani juunimiit augusti
ilanngullugu takornarissanik angallassisartut ikiortaasalu angallateeqqat
VHF-imik radiollit piffissami aalajangersimasumi immikkut akuerineqarlutik
takornarissanut angallassissutaasinnaanersut.
Taamatut aaqqiisoqaraluarpat piniartup ullumikkoorniit suli annertunerusumik
takornarissanik angallassisarnermikkut saniatigooqarsinnaagaluarmata. Qujanaq.
Jørgen Wæver-Johansen, Ineqarnermut, Attaveqarnermut Pilersuinermullu
Naalakkersuisoq, Siumut:
Qujanaq. Angallatinut Q-17-nut Q-19-llu kiisalu angallateeqqanut
pujortuleeqqanullu tamakku takornarianik angallassisinnaaqqullugit immikkut
akuersissuteqartoqarsinnaanersoq apeqqutigalugu augustip arfernanni
allakkatit tiguakka.
Imaani isumannaatsuunissaq pillugu piumasaqaatit naalagaaffiup
oqartussaaffigai taamaattumillu angallatinut takornarianik
angallassissutaasunik piumasaqaatit malitassiani Søfartstyrelsemit
atulersinneqartuni takuneqarsinnaallutik.
Tamatuni malitassiaq atuuttut tassaassaaq Søfartstyrelsip teknikimut
tunngasuni malitassiaa normu 1, 6. februar 1992-meersoq. Malitassiami tassani
atortunut, ikuallattoorsinnaanermut sillimanissamut tunngasunut il.il.
umiarsuarnut assartuutinut aalisariutinullu qanorluunniit angissuseqartunut
amerlanerpaamik aqqaneq marlunnik ilaasoqarsinnaasunut piumasaqaatit
allattorneqarsimapput. Umiarsuaq piumasaqaatinik tamakkuninnga
naammassinnissimanngippat angallat inunnik angallassinissaminut
akuerineqarsinnaanersoq erseqqissumik akiuminaappoq, tassami akuersissutit
ataasiakaat tamarmik immikkut nalilersuinermik tunngaveqartarput
taamaattumillu akuersissut piumasaqaatit ataasiakkaat aallaavigalugit
angallammut tassunga tunniunneqartarluni.
Taamaattumik soqutiginnittut siullertut pingaarnertullu kajumissaarneqarput
Søfartstyrelsip Nuummi allaffianut saaffiginneqqullugit. Tamatuma kingorna
taanna angallatip eqqarsaatigineqartutut angallavigisassaanut atatillugu
angallammik namminermik pineqartumik nalilersuiumaarmat.
Ilanngullugu ilisimatitsissutigisinnaavara inuk sunngiffimmi angallammik,
tassa nuannaariummik inuttaqanngitsumik attartoruni nammineq angallammik
ingerlatsissaaq taamalu angalatip naalagaata akisussaaffianik tigusissalluni.
Taamaattoq angallammik piginnittoq angallataatillip akisussaaffianik
tigumminnittuujuassaaq.
Angallat sunngiffimmi atorneqartartoq inuttalerngau atukkiunneqartoq Søfartstyrelsip
teknikkimut tunngatillugu malitassiaanik normu 5-mik, 19. november
1998-imeersumik naammassinnissimassaaq. Malitassiami tassani ilaatigut
angallatit atukkiunneqartartut il.il.atortuinut piumasaqaatit
allattorneqarsimapput.
Jakob Sivertsen, Atassut:
Qujanaq. Tassa apeqquteqarninnut ukua Naalakkersuisup eqqartugai
nalinginnaasut pinngilakka, taamaattumik toqqartumik Q-17-it aamma Q-19-it
pivakka. Taamaattumik akissuteqaataasoq ajuusaarutigivara taakkununnga
tunngatillugu atorneqarsinnaanersut imaluunniit atorneqarsinnaannginnersut
maani erseqqissumik akineqanngimmat. Pingaartumik angallatit taakkua
piniutissatut misilerarlugit aalisariutissatullu immikkut akuerineqarsimapput.
Taakku immikkut akuerineqarsimanerat aamma aasakkut takornarissanik
pingaartumik angallasissussat killeqartillugit immikkut
akuerineqarsinnaanerat ujartorlugu maani apeqquteqaatigaara. Makkua paragrafit
assigiinngitsut nalunngilagut kisiannili ullumikkut akuerisat taakkua
angallatit allajangersimasut piniartunit atugassatut akuerineqarsimasut
pivakka.
Jørgen Wæver-Johansen, Ineqarnermut, Attaveqarnermut Pilersuinermullu
Naalakkersuisoq, Siumut:
Isumaqarpunga, akissutigineqartut erseqqissut. Siullermik imaani
isumannaaatsuunissaq pillugu piumasaqaatiti naalagaaffiup oqartussaaffigai.
Inunnik soorlu takornarissanik angallat atorneqassappat assartuutitut
imaluunniit takornariartitsinermi ilaasunik angallassissutitut, taava
piumasaqaatigineqartut taakkua naammassineqarsimasariaqarput, taakkualu
naammassineqarsimanersut nalilersuisartut tassaapput Søfartstyrelse,
taakkulu Nuummi allaffeqarput taamaattumik soqutiginnittut tamarmik tassunga
naliliiffigeqqullutik saaffiginnittussaapput.
Taava angallatit ataasiakkaat aamma assigiinneq ajormata ilaatigut ilai
aserfallassimanerusarput allanut naleqqiullugu aammalu tamanna tunngavigalugu
tamarmik imikkut naliliiffigineqartussaapput.
Taamaattumik periarfissaqarpoq, kisianni periarfissamik naliliisussat
tassaapput Søfarstyrerlse.
Augusta Salling, Siulittaasoqarfimmi sinniisussatut ilaasortaq, Atassut: