Oqaluuserisassani immikkoortoq 77-1 |
|||
Siullermeerneqarnera | Aappassaanneerneqarnera | Pingajussaaneerneqarnera |
Ullut ataatsimiiffiusut arfersaneq arfernat, ataasinngorneq 22. oktober 2001,nal. 13:25
Ataatsimiinnermik aqutsisoq: Ole Lynge, Inatsisartut Siulittaasuat, Inuit Ataqatigiit.
Hans Enoksen, Aalisarnermut,Piniarnermut Nunaqarfinnullu Naalakkersuisoq, Siumut.
Qujanaq. Aalisarneq pillugu Inatsisartut inatsisissaanut aallannguutissatut Inatsisartut inatsisissaattut siunnersuut Naalakkersuisut sinnerlugit matumuuna saqqummiutissavara.
Aalisarneq pillugu nassuiaat Inatsisartut maannakkut ataatsimiinnerminni eqqartornikuuvaat. Aalisarnerup siunissami ineriartortinneqarnissaani ajornartorsiutit tunngaviusut pillugit politikkikkut sukumiisumik oqallisigineqarnissaat nassuiaammik oqallinnerup takutippaa. Aalisarneq pillugu nassuiaammik oqallinnerup kinguneranik maannakkut ajornartorsiutit arlallit aaqqinniarneqarnissat sulissutigineqarpoq. Suliniutillu inerneri aappagu upernaakkut ataatsimiinnissami saqqummiunneqarumaarput.
Aalisarneq pillugu inatsimmut allannguutissatut siunnersuutit siusinnerusukkut suliarineqarnikuupput, kisiannili aalisarneq pillugu inatsimmut allannguutissat isummerfigineqartinnagit aalisarneq pillugu nassuiaat Inatsisartuni isummerfigineqarnissaa Naalakkersuisut pisariaqartissumavaat. Aammalu sinerissap qanittuani aalisarnermi aningaasarsiornikkut ajornartorsiutit pillugit suleqatigiissitaliap suligasuartussap inassuteqaatissai Naalakkersuisut utaqqiumasimavaat. Inassuteqaatit taakka septemberip qiteqqunnerani Naalakkersusut tigusaat aalisarneq pillugu nassuiaammut ilanngullugit agguaanneqarnikuupput.
Oqallittoqarnera aammalu aalisarneq pillugu siunnersuisooqatigiit inassuteqaataat tunngavigalugit Naalakkersuisut naliliipput siunnersuut una ataatsimiinnermi uani akuerisassanngorlugu saqqummiunneqassasoq. Siunnersuutit pitsanngoriaatissanik imaqarput. Naalakkersuisullu naliliipput taakku aalisarnermi aningaasaqarniarnermut aalisarnerullu ineriartortinneqarnissaanut iluaqutaasasut.
Erseqqissarneqassaaq sinerissap qanittuani raajarniutinut tunisassiorsinnaanermik akuersissuteqartoqassanersoq siunnersuummi isummerfigisassangortinneqanngimmat. Tunisassiorsinnaanermut Naalakkersuisut akuersissuteqarsinnaanerat pillugu inatsit maannakkut atuuttoq aalajangersakkanik imaqarpoq. Tunisassiorsinnaanermut akuersissuteqarsinnaanermi nutaamik periuseqartoqalersinnaneq isummerfigitinnagu tamassuminnga suliaqarneq Naalakkersuisut utaqqimaaqqaarniarpaat.
Aammalu inatsit malillugu nalunaarusiornikkut sinerissap qanittuani raajarniarnermi angallatit angissusissaanik Naalakkersuisut killiliisinnaapput,. tonagep annerpaaffissaata 500 BT-mut qaffanneqarnissaa suleqatigiissitaliap suligasuartussap innersuussutigaa. Pingaartumik KNAPK-p erseqqissarpaa taanna oqallisissiatut saqqummiunneqartoq aammalu suli annertunerusumik killiliisinnaaneq eqqarsaatigineqarsinnaasoq.
Aalisarneq pillugu Inatsisartut oqallinnerat Naalakkersuisut imatut paasivaat sinerissap qanittuani angallatit annerusut atorlugit raajarniarsinnaanermik periarfissiinissaq pillugu suleqatigiissitaliap suligasuartussap innersuussutaa tunngaviusumik akerlerineqanngitsoq. Taamaammat nalunaarutit atuuttut allanngortinneqarnissaanik suliniutit Naalakkersuisut aalisarnermik ingerlataqartut kattuffii suleqatigalugit aallartinniarpaat.
Sinerissap qanittuani aalisariutit atorneqartut angissusaanik sumut killiliinissaq suliat taakku takutikkumaarpaat aalisartullu taamaalillutik taakku tunngavigalugit pilersaarusiorsinnaalissallutik.
Aammattaaq oqaatigineqassaq aaqqissuussinermik nalimmassaanermi periusissanik suleqatigiissitaliap suligasuartussap siunnersuutai sinerissap qanittuani raajarniutinik taarsersuinissap aallartinnissaanut pingaaruteqarluinnarmata. Angallatinut tamakkiisumik nunami suliffissuarnut tulaassuisussanut taanna pingaartumik attuumassuteqarpoq. Tassa angallatit taamaattut taarsersornissaani landskarsimiit aningaasaliiffigineqarnissaat siunnersuutigineqarmat.
Aalisarneq pillugu nalunaarusiamik Naalakkersuisut saqqummiinerminni oqaatigaat oqallittoqarnera tunngavigalugu aningaasanullu inatsisip imassai nalunarunnaariarpata sinerissap qanittuani raajarniarnermi aaqqissuussinerup nalimmassarnissaani periusissanik siunnersuusiortussamik Naalakkersuisut ataatsimiitaliorniartut.
Naalakkersuisut suli tamanna siunertaraat. Tassungalu atatillugu ataatsimiititaliap taassuma suliamik piaartumik aallartitsinissaa Naalakkersuisut pingaartippaat. Aaqqissuussinerup nalimmassarnissaani periusissaq 2002-mi aningaasanut inatsimmut allannguutissatut siunnersuut Inatsisartut aalajangiiffigisassaat tunngavigalugu aalisartut aningaasanik qinnuteqartarnissaanni malittarisassanik ataatsimiititaliaq ilaatigut suliaqartussaavoq.
Suliap taassumap qaammatini qaninnerni naammassinissaa pisariaqarpoq. Taamaalilluni aalisartut landskarsimut aningaasaliisartunullu allanut qinnuteqartarnissaat aallartinneqarsinnaaniassammat 2002-mi upernaakkut ataatsimiinnissamut tamanna kinguartinneqassappat tamassuma kingunerisussaavaa aalisartut kattunnissamut pilersaarusiornissaanni angallatinillu taarsersuinissaanni periarfissat ajornerulernerat.
Taamaalillunilu suliniutit 2002-mi piviusunngortinneqarsinnaanatik aammalu ukiup naannginnerani aningaasanut inatsimmi akuersissutigineqartut atorluarneqarsinnaasanatik.
Massumap
kingorna allannguutissatut siunnersuut eqqartussavara. Malittarisassat
nalimmassarnissaat siunnersuutaavoq, tassa inuutissarsiutigalugu
aalisartuussagaanni isertitat ilaasa aalisarnermi assigisaanilu
isertitaanissaat. Piniarneq aallaaniartarnerlu pillugit Inatsisartut
inatsisaannut malittarisassatut siunnersuut qanillattuineruvoq.
Aammattaaq
sinerissap qanittuani aalisariutaatileqatigiiffiit inuillu ataasiakkaat
pisassiissutinik pigisaat pillugit malittarisassanik maannakkut atuuttumik
allannguinissaq siunnersuutigineqarpoq. Killigitinneqartoq 6%-imiik 10%-imut
qaffanneqarnissaa siunnersuutigineqarpoq. Tamassumani aalisartut
aalisariutaatileqatigiiffinni anginerusuni kattunnissaat siunertaavoq.
Aalisariutaatileqatigiiffik
taamaattoq taamaalilluni aalisariutit maannakkut atorneqartut pisassaat
atorlugit aalisarsinnaassaaq. Taamaalilluni aalisariutip aalisarsinnaaneranik
aalisariutaatileqatigiiffiullu pissassaanik atorluaasoqarnerulertussaassaaq.
Aammattaaq aalisariutaatileqatigiiffik taamaattoq angallatinik pigineqartunit
ataatsimik amerlarnerusunilluunniit taarsiinissani aallartissinnaalissavaa.
Aammalu pilersaarusiornermini aalisariutit maannakkut pigineqartut
aalisarnermi atorsinnaassallugit.
Pisassat
aalisariutaatileqatigiiffiup ataatsip pigisinnaasaanik 6%-imiit 10%-imut
qaffaaneq aamma aalisariutini sinerissap qanittuani raajarniarnermi
atorneqarsinnaasuni killiliineq pillugu nalunaarummi ajornartorsiutinut
qulaani taaneqartunut aamma attuumassuteqarpoq. Nunami suliffissuarnut
pilersuinermi angallatinik naleqqunnerusunik pisaarnissamut pisassanit pigisat
angallatillu aalisarnermi atorneqarsinnaasut angissusaasa allanngortinneri
periarfissarissaartitsinerulertussaapput.
Aammattaaq
raajarniarnemi ukiup aalisarfiusinnaasup eqaannerusumik
aalajangerneqarsinnaanera nutaamik aalajangersaanikkut periafissinniarneqarpoq.
Pisassat ukiumut tullermut nunneqarsinnaanerat malittarisassap taamaattup
periarfissaqartilissavaa. Aalisariutaatileqatigiiffiit pisassaminnik
tamakkiisinnaanerinut tamanna pingaaruteqarpoq.
Aalisarsinnaanermut
akuersissutit assigisaallu pillugit naatsorsuusiornermi paasissutissanik
avammut saqqummiussisinnaanermut malittarisassiortoqarnissaa naggataatigut
siunnersuutigineqarpoq aalisarsinnaanermut akuersissutinik pigisaqartut
aammalu aalisarnermik ingerlataqartut kattuffiisa aalisarnermik
pilersaarusiornerinut tapersiinissaq aammalu pisassiissutinik pigisat
ukiumullu pisassat niuerutigineqarnerunissaat avammut saqqummiussisarnerup
ilaatigut periarfissarissaartinnerulissavaa. Aammalu pisassat tamarmiusut
pisarineqartalernissaat taamaaliornikkut periarfissaqarnerulissaaq.
Aalisartut
kissaatigisaannut nalimmassakkamik aalisariutaatileqatigiiffiliornissat
periarfissaqartinnerulersinniarlugit inatsissamik siunnersuuteqarnikkut
sinerissap qanittuani raajarniarnermi atugassaritinneqartunik
nutarterinissamut Naalakkersuisut siullermeertumik periuseqarput.
Naalakkersuisut
ilimagaat aalisarnermik ajornartorsiutinik qaangiiniarnermi suliaqaqqinnissat
aalisarneq pillugu inatsimmut aappaagu upernaakkut ataatsimiinnissami
saqqummiunneqarsinnaasumi allannguutissanik amerlanerusunik
siunnersuuteqarnissamik kinguneqarumaartut.
Taamatut
oqaaseqarlunga siunnersuut Inatsisartunut suliassanngortippara.
Qujanaq.
Ole
Lynge, Inatsisartut
Siulittaasuat, Inuit Ataqatigiit:
Qujanaq
taava partiit oqaaseqartuinut ingerlaqqippugut.
Lars-Karl
Jensen, Siumup
oqaaseqartua.
Aalisarneq
pillugu Inatsisartut inatsisissaanut aallannguutissatut Inatsisartut
inatsisissaatut siunnersuut manna Naalakkersuisunit saqqummiunneqartoq
Siumumiit iluarisimaarparput. Tassami ungasinngitsukkut aalisarneq pillugu
nassuiaat inimi maani oqallisigigatsigu Siumumiit pingaartillugu oqaatigaarput
aalisarnermut inatsit nutartertariaqartoq siunissaq ungasinnerusoq isigalugu.
Kiisalu aalisaqassuseq nutaanik aalisarneqarsinnaasunik ineriartortitsineq
tassunga ilanngullugu piujuaannartitsinissaq. Suliffissaqartitsiniarneq
imminullu akilersinnaasumik ingerlatsinermut sammiveqartunut inatsit
nutartertariaqartutut isumaqarfigigatsigu.
Aamma
ilanngullugu oqaatigaarput angallatit raajarniarnermut atorneqartut
anginerusunik taarsersorneqarnissaat anguneqassappat mianerisassat arlaqartut
isigineqartariaqartut. Naalakkersuisut saqqummiussaatigut malugisinnaavarput
aalisarnerup piniarnerullu iluini inatsisit atuuttut malittarisassallu
imminnut qanillattorsinnaaqqullugit allannguutissanik Naalakkersuisut
suliaqarsimasut.
Siumumiit
takusinnaavarput aalisarnemut inatsisip maannakkut atuuttup kiisalu
maleruagassat tamakkununnga tunngasut piaartumik allanngortinneqanngippata
issaq oqallinnitsinni sinerissap qanittuani aalisarnerup
ineriartortinnissaanut aallaaviusussatut tikkuartorneqartut aallarnisarnissaat
pisariaqanngitsumik kinguarsarneqassasut.
Taamaattumik
oqaatigeriissavarput allannguutissatut siunnersuut tunngaviisigut
tamakkiisumik isumaqatigigatsigit. Imatullu oqaaseqarfigissallugit, angallatit
raajarniutit pisassiissutit ataatsimut kattullugit anginerusunik
angallatitaarniartut periarfissaqartitaanissaat inatsisissap
allannguutissaatigut eqqugaanerlunnginnissaat Siumumiit Naalakkersuisunut
isiginiaqqussavarput.
Siunissamilu
aalisariutitaarniartunut imarsiortutut allagartamik minnerpaamik ukiuni
marlunni inuutissarsiutigalugu aalisartuusimanissaq
uppernarsaateqartinneqassasoq. Isertitallu tamarmiusut ikinnerpaamik 50%-ii
inuutissarsiutigalugu aalisarnermit isertinneqarsimanissaannit
piumasaqaatissaq pissusissamisoortutut Siumumiit isumaqarfigaarput.
Maannakkut
sinerissap qanittuani aalisartut oqariartuutigaat aalisarnermik
ingerlatseqatigiiffiit imaluunniit inuit ataasiakkaat pisassiissutinut
atuinerannut killiliussaq maannakkut 6%-imik annertussuseqartoq
qaffanneqartariaqartoq 10%-imut annerpaaffilerlugu. Siumumiit isumaqarpugut
periarfissaq tamanna sinerissamut qanittumi raajarniutit angallatinik
anginerusunik taarsersornissaannut aqqutissatut saneqqunneqarsinnanngitsoq.
Sinerissap
qanittuani pisassiissutit qiviassagaanni maannakkut 38.000 tonsit
missaaniipput. Taakkunannga nunami suliffissuit suliarisinnaasarpaat 30 tonsit
missaat. Nunami suliffissuit naammassisinnaasaat aalaakkaasumik taamatut
ingerlaannassappata sinerissami qanittumi pisassiissutinit tamarmiusunit
sinnerussimassapput 8.000 tonsit missaat. Taakkulu isumaqarpugut anginerusunik
angallatitaarniarnermut iluaqutaasinnaasut.
Sinerissami
qanittumi raajarniutit anginerusunik taarsersornissaat aalajangiunneqareermat
amerlarnerusut periarfissaqarnissaat siunertaralugu Siumumiit ilanngullugu
Naalakkersuisunut kaammattuutigissavarput raajanut TAC-p tassa pisassat
tamarmiusut sinerissamut qanittumut avataasiortunullu agguaassisarnermut
periutsip tulleriinneri malillugit 45 aamma 55%-imut aaqqiiviginissaat
periarfissarsiuuteqqullugu.
Siumumiit
tamakkua oqaloqatigiissutissatut aallaaviunissaat pingaartippagut aalisarnerup
iluani suliffissaqartitsiniarneq imminullu akilersinnaasumik ingerlatsinermut
sammiveqartumik anguniagaqarnermut suleriaqqinnissami suleqatigiissitaliassap
tamakkua isiginiarlugit tigusariaqagaattut Siumumiit isumaqarfigaagut.
Ukiumiit
ukiumut pisassanik agguaassisarneq TAC aallaavigalugu ingerlanneqartoq
ilaatigut nassataqartarpoq naatsorsuutiginngilluinnakkanik silamik
allamilluunniit peqquteqartumik pisassat tamakkinngitsoortarnerannik. Tamatuma
aningaasatigut kipuluttunartumik sunniuteqartarnera aaqqiiffiginiarlugu
Naalakkersuisut nikerartitsisinnaanerat killilimmik aqqutissiuunniarneqarmat
Siumumit iluarisimaarparput.
Tassami
pisassiissutini pisassat tamarmiusut nungunneqartarnissat
illersorneqarsinnaasumik aqqutissiuunneqarpat tamanna aalisartunut nunattalu
aningaasaqarneranut nalimmassaataasussatut Siumumiit isumaqarfigigatsigu.
Allannguutissatut
siunnersuutit sisamaanni aalisarsinnaanermut akuersissutinik pigisaqartut
nakkutigineqarnerannut tunngasoq allaffissornikkut eqaallisaanertut isigalugu
Siumumiit annertunerusumik oqaaseqarfiginagu taperserparput. Siumumiillu
taamatut oqaaseqarluta aalisarneq pillugu Inatsisartut inatsisissanut
allannguutissatut siunnersuut ilassilluarparput taamatullu isikkoqarluni
aappassaaneerneqartinnagu aalisarnermut ataatsimiitialiamut
ingerlatinneqassasoq kaammattuutigalugu.
Augusta
Salling, Atassut:ip
oqaaseqartua.
Qujanaq.
Aallaqqaammut Ataasummiit oqaatigissavarput nuannaarutigigatsigu siunnersuut
manna ataatsimiinnermi uani akuerisassanngorlugu Naalakkersuisuniit
saqqummiunneqarmat. Tassami 9. oktober 2001-imi aalisarnermi pissutsit
pillugit nassuiaat oqaluuserineqarmat Atassummiit Naalakkersuisunut
taannarpiaq piumasaqaatigaarput itigarlugilli. Massak-kullu sapaatip
akunnerisa marluunngitsulluunniit qaangiunneranni piumasaqaatigisimasarput
piviusunngortimmassuk Atassummiit assut iluarusuppugut.
Allannguutissatut
saqqummiunneqartut aalisartut inuutissarsiumminnik
ineriartortitseqqinnissaanut pingaaruteqarput pisariaqartinneqarlutillu.
Taamaattumik Ataasummiit pingaartipparput aapaagumut utaqqinnagit ukiaq manna
akuersissutigalugit atuutsinneqalernissaat. Ukiuni kingullerni marlunni
isertitat tamarmiusut 2/3-dele inuutissarsiutigalugu aalisarnermiit
isertinneqarsimanissaannik piumasaqarnermut taarsiullugu
siunnersuutigineqarmat ikinnerpaamik isertitat tamarmiusut 50%-iinut
appartitsisoqassasoq Atassummiit akuersaarparput.
Peqqussutip
allanngortinnissaanut pissutigineqarpoq aalisarnerup piniarnerullu iluini
malittarisassat imminut qanillattortinnissaat. Atassummiit isumaqarpugut
tamanna aamma aningaasaleeqataasinnaasut amerlanerusulernerannik
kinguneqarsinnasoq. Tamannalu pitsaasutut isumaqarfigaarput.
Ingerlatseqatigiiffiit
imaluunniit inuit ataasiakkaat pisassiissutinik pigisanik aalisariutit
ilaannut immikkoortunut sinerissamut qanittumik aalisartunut
pisassiissutigineqartunit pisiortornermikkut pisassiissutinit tamarmiusunit
pigisaqalersinnaanerat 6%-imiit 10%-imut qaffanniarneqarmat Atassummiit
iluaraarput. Siusinnerusukkummi 10%-imiit 6%-imut appaasimaneq
kattussuunnissamut killiivallaartoq paasinarsisimammat.
Aammalu
taamaaliornikkut akilersinnaanerusumik ingerlatsilersinnaanissaq
periarfissarsiuunneqassammat.
Raajartassat
pisassiissutigineqartut ukiumiit ukiumut nuunneqartarsinnaalernissat
Atassummiit alloriarnertut pitsaasutut isigaarput taamatut
periafissaqalernikkut pisassiissutigineqartut amerlarnerpaartaasa
pisarineqartalernissaat qularnaarneqassammat.
Inatsit
malillugu nalunaarusiornikkut sinerissap qanittuani raajarniarnermi angallatit
angissusissaannik Naalakkersuisut killiliisinnaapput. Atassummiit
pissusissamisoortipparput Naalakkersuisut angallatit angissusissaanik
killiliiniarnerminni aalisarnermi ingerlataqartut kattuffii suleqatigalugit
piniarmata.
Atassummiit assut pingaartipparput aalisartut ilisimasatik tunngavigalugit killiliinissami sunniuteqaqataanerunissaat. Eqqaamassavarput 79-it politikerit kukkunerimmatigit. Tamakku kukkusarnerit ilinniarfigalugit suliaq ingerlanneqartariaqarpoq. Aalisartut nammineerlutik aalajangertariaqarpaat angallatit atugassamik angissusissaat. Naatsorsuutigissavarpullu Naalakkersuisut aalisartut kissaatigisaanut tusaaniarluarumaartut.
Aalisarneq pillugu Inatsisartut inatsisissaanut allannguutissatut inatsisissatut siunnersuut Atassummiit tamakkiisumik taperserparput. Atassummiillu innersuussutigissavarput taamatut isikkoqarluni aappassaaneerneqarnissaminut ingerlaqqissasoq.
Qujanaq.
Johan Lund-Olsen, Inuit Ataqatigiit oqaaseqartuat.
Qujanaq. Aalisartut kattussuullutik anginerusunik aalisariutaartorsinnaanissaat aqqutigalugu nunami tunisassiorfiit aalaakkaanerusumik ilaatigut pilersorneqalersinnaanissaat imaluunniit pilersorneqalersinnaanerat aqqutissiuunneqarsinnaaqqullugu ungasinngitsukkut aalisarnermi pissutsit pillugit nassuiaat oktoberip qulingiluaanni oqallisigineqarmat Inuit Ataqatigiit pingaartillugu oqaatigivarput aalisariutitigut nutarterisoqartariaqartoq.
Aalisarnermi inatsimmi allannguutissatut matumani siunnersuutigineqartumi tamanna anguniarlugu sinerissamut qanittumi aalisarnermut pisassiisutigineqartunut killigitinneqartut 6%-iniit 10%-inut maanna qaffanniarneqarpoq soorluttaaq raajarniarnermi ukiumut pisassiissutigineqartartut eqaannerusumik nikisinneqartarsinnaanissaat siunertaralugu aamma allanngortitsiniartoqartoq.
Aalisarsinnaanermut akuersissutit assigisaallu pillugit naatsorsuusiornermi paasissutissanik avammut saqqummiussisinnaalernissamut malittarisassiortoqassasoq aamma siunnersuutaavoq. Aallannguutissatut siunnersuutigineqartut taakku Inuit Ataqatigiit ajoriffissaqartinngilagut. Siullermeerinninnermilu matumani tunngaviatigut akuersissutigissallutigit.
Allannguutissatulli siunnersuutigineqartoq alla tassalu inuussutissarsiutigalugu aalisartuussagaanni isertitatigut piumasaqaatinik naammassiniaqqaagassanik imaqartoq aappassaaneerisoqartinnagu aalisarnermut piniarnermut nunalernermullu ataatsimiitialiamit nalilersorneqaqqaarallasasoq kissaatigissavarput.
Sinerissap qanittuani aalisarnikkut pissutsit pillugit siusinnerusukkut oqaasereriikkagut innersuussutigalutigit naggataatigut taamaammat aamma oqaatigiinnarusupparput aalisarnermut inatsimmut atatillugu allannguutissatut ullumikkut siunnersuutigineqartut ukiaq manna naammassineqarnissaat takorlooratsigu, kisiannili inatsisip taassuma tamakkiinerusumik allanngortiterneqarnissaa 2002-mi upernaakkut piumaarnissaa aamma ilimasaarutigineqa-reersutut naatsorsuutigigatsigu.
Mads-Peter Grønvold, Kattusseqatigiit oqaaseqartuat.
Kattusseqatigiinniit peqqissaartumik mississoreerlugu imatut oqaaseqarfigissavarput. Siullermik Kattusseqatigiinniit taamatut Inatsisartut inatsisissaattut siunnersuut saqqummiunneqarnera eqqarsarnartoqartipparput. Tassami pingaaruteqarluinnarmat Inatsisartut inatsisissaattut siunnersuutit sapinngisamik Inatsisartut suleriaasiat naapertorlugu oqaluuserisassanngortineqartarnissaat pisariaqarmat.
Taamaattumik Kattusseqatigiinniit Naalakkersuisut piumaffigaagut Inatsisartut inatsisissaattut siunnersuutit sapinngisamik piffissaq eqqorlugu oqaluuserissassanngortinneqartarnissaat siunissami anguniarneqartariaqartoq. Tassami Naalakkersuisuni naluneqartanngimmat Inatsisartut ataatsimiinnissaanut suut oqaluuserineqarumaartut aammalu Naalakkersuisunit eqqaamaneqartariaqarmat namminneq suut oqaluuserisassanngortinniarnerlugit suullu oqaluuserisassamut peqatigalugit saqqummiunneqartariaqartut Naalakkersuisunit ilisimaneqartariaqaraluarmata.
Taamaattumik Kattusseqatigiinniit Naalakkersuisunut kaammattuutigissavarput Inatsisartunut oqaluuserisassanngortitat pillugit annerusumik misissuisaqqullugit.
Kattusseqatigiinniit pingaaruteqarluinnartutut isigaarput sinerissap qanittuani aalisartut isumaat suli annerusoq tamakkiinerusumillu tusarniaasutigineqartariaqartut tassami pingaaruteqarluinnarmat aalisartut ataatsimoortumik iluarsiivigineqartariaqarnerat.
Kattusseqatigiinniit pingaaruteqarluinnartutut isigaarput nunatsinni aalisarnerup sapinngisamik iluamik ukiuni aggersuni ingerlanneqarsinnaanerata qulakkeerneqartariaqarnera suliassat nukingipiluttumik suliarinagit. Kattusseqatigiinniit suliassat peqqissaartumik suliarineqartarnissaat anguniarlugu pingaaruteqarluinnartutut isigaarput suliassat siusinaartumik tunniunneqartarnissaat.
Tassami naluneqanngilaq inatsisissatut siunnersuutit peqqissaartumik suliarineqartariaqartariaqartut soorlu aamma pisariaqartoq aalisarnermut tunngasut aalisartunit aalisartut kattuffiinit peqatigiiffiinit ataatsimiititalianut attuumassuteqartunut tusarniaassutigineqartarnissaat pinngitsoorneqarsinnanngitsoq.
Soorlu maannakkut sinerissap qanittuani aalisarnerup pitsanngorsarneqarnissaanut aningaasalersuisinnaasut ilaatigut suli annerusumik qulakkeerneqarsimanngillat. Naak illuatigut ukiuni kingullerni aningaasaliissutit ESU-mut annikilliartuinnartinneqarsimasut, naak sinerissap qanittuani aalisariutit pitsanngorsarneqartariaqaraluartut. Qujanaqaaq maannakkut siusinnerusukkut kattusseqatigiinniit oqariartuutigisartakkagut paasineqalermata.
Ukiuni kingullerni sinerissap qanittuani aalisarnerup pitsanngorsarneqarnissat pinngitsoorneqarsinnaanngilaq. Angallatit atorneqartut ukiup ingerlanerani ilaatigut nutaanngoriartortanngimmata eqqaamaneqartariaqarpoq soorlu maannakkut pissutsit takutikkaat allaat aningaasaliissutit annertuut atoqqaarlugit angallatit taarsersorneqartariaqalersimasut.
Kattusseqatigiinniit pingaaruteqarluinnartutut isigaarput sinerissap qanittuani aalisarnerup pitsanngorsarneqarnerani sinerissap qanittuani aalisartut tungaasa pitsanngorsarneqartariaqarnerat. Taamatut pitsanngorsaasoqassappat aalisartut tamarmik sapinngisamik assigiimmik pineqartariaqartut Kattusseqatigiinniit isumaqaratta. Ilaatigut Kattusseqatigiinniit eqqarsarnartutut isigaarput KNAPK-mit oqaatigineqarmat aalisariutinit sisamanit ilaatigut sinerissap qanittuanit pisassiissutit 12.000-it aalisarneqartariaqartut oqaatigineqarmat.
Taamatut ilaatigut KNAPK-p siunnerfeqarnera tunngavigalugu Kattusseqatigiinniit Naalakkersuisumut piumasaraarput sinerissap qanittuani raajarniat qanoq KNAPK-p isumaanut isumaarnersut tusarniaaffigineqartariaqartut. Ilaatigut sinerissap qanittuani aalisartut ilaannit isuma taamaattoq isumaqatigineqarsinnaanngitsoq oqaatigineqarmat.
Kattusseqatigiinniit isumaqarpugut sinerissap qanittuani aalisarnerup allanngortinneqarnissaanut tunngatillugu aalisartut aalisariutaatillillu tikillugit aalisarnermut pisortaqarfimmit tusarniaaffigineqartariaqartut. Soorlu aalisartut suli maannakkornit annerusumik nunatsinni aalisarnerup ineriartortinneqarnissaanut peqataasariaqarnerik ilaatigut oqaatigisaraat.
Suliaq peqqissaartumik suliarineqassappat aammalu aalisartut amerlanerpaat ikiorserneqarnissaat atorneqassappat Kattusseqatigiinniit isumaqarpugut aalisarnermut siunnerfik suli maannakkornit ersarinnerusoq saqqummiunneqartariaqartoq. Kattusseqatigiinniit maannakkut isumaqaratta suliaq pitsaasumik naammassineqassappat siunnerfiit suli ersarinnerusut saqqummiunneqartariaqartut aalisartut qaninnerusumik peqatigalugit.
Taamatut iliornikkut siunissami sinerissap qanittuani aalisarnerup ineriartortinneqarnissaa ersarinnerusoq qulakkeerneqarsinnaasoq Kattusseqatigiinniit isumaqarpugut.
Kattusseqatigiinniit maannakkutut sinerissap qanittuani aalisarneq itsillugu eqqarsarnartoqartipparput pisassiissutinik niueruteqarnissaq.
Maannakkut sinerissap qanittuani raajartassat eqqarsaatigalugit agguaasarneq allanngorinneqassappat aalisartut suli tamakkiinerusumik tusarniaaffigineqartariaqartut Kattusseqatigiinniit isumaqaratta. Kattusseqatigiinniit isumaqarpugut allannguutissatut siunnersuut suli nalilersorluarneqartariaqartoq taamatut isumaqarnitsinnut tunngavigaarput suli annerusumik allannguutissatut siunnersuut sinerissap qanittuani aalisartunut tusarniutigineqarsimanngimmat.
Soorlu aamma suli annerusumik sinerissap qanittuani aalisarnermut qanoq kinguneqarsinnaasoq massakkut nassuiaatigineqanngitsoq. Taamatut allannguutissatut siunnersuut isikkoqartillugu Kattusseqatigiinniit piumasaraarput allannguutissatut siunnersuut aapassaaneerneqannginnermini tusarniaassutigineqaqqaartariaqartoq.
Otto Steenholdt, attaviitsoq.
Aallaqqaammut oqaatigisassara tusarnaarluarneqartariaqartutullu eqqarsaatgisara aajuna.
Suliffissuit matunngissaasimasut suliassaqannginnaminngooq, aviisi kingulleq saqqummertoq ersarissumik oqarpoq, 10.000 tonsit raajat ukioq manna aalisanngitsoorneqarsimasut. Paatsiveqanngivippugut ila, aamma taamaliussalluta akissaqaratalu periarfissaanngilaq taamaaliorneq, 10.000 tons aalisanngitsoorneqarsimapput.
Aalisarneq pillugu nassuiaat Inatsisartuni oqaluuserereerneqartorlu paasinarsiartuinnalersimavoq aalisarneq pillugu inatsit allannguuteqartittariaqalersoq. Aalisarnermut, Piniarnermut Nunaqarfinnullu Naalakkersuisoq nersortariaqarpara inatsisissaq piaartumik pilersikkumallugu aalajangersimammat. Tassa aalisartunut tusarnaarluarneq tassani nassaassaasoraara pisariaqartitsineqartoq qanoq iliuuseqartariaqarnermik, qanoq iliuusissaq kinguartiternagu aappaagumut allaat kinguartiternagu, periuseq pitsaasoq aallaqqaatigalugu taamatut nersorinnissutiga oqaatigilaarpara.
Tassungattaaq ilannguttariaqarpoq sinerissamut qanittumi aalisarneq pillugu sukkasuumik sulisussatut ataatsimiititaliaq piloorluni piloorluni maqaasineqaqisumik suliaminik saqqummiisimammat. Toqqissiallaatigilluinnarpara saqqummiussinermi erseqqissarneqarmat sinerissap qanittuani raajarniutinut tunisassiorsinnaanermik akuersissuteqartoqassanersoq siunnersuummi matumani isummerfigisassanngortinneqanngimmat, tamanna aalajangiusimasariaqarpoq. Taamatut oqarpunga aalisarneq pillugu nassuiaat oqallisigineqarmat, naak nunami suliffissuit suliassaannik tulaassuinissaq tassani qitiutinneqarluinnaraluartoq umiarsuit ilaasa angisuut sinerissamut qanittumi aalisarlutik tunisassiorsinnaanissaat eqqartorneqaleraluarmat.
Naalakkersuisunut sakkortuumik piumasaqaatigissavara, inatsisiliornermi matumani nunami suliffissuit suliassaqartuarnissaat qiteritissagaat, tamanna aatsaat qulakkeerneqarluinnareerpat tunisassioriaatsit allat avalaffigineqarsinnaassasut.
Maannakkut inatsimmi Naalakkersuisut pisariaqartillugu akuersissuteqarsinnaanerat periarfissaqarpoq. Pisinnaatitaaneq taanna assut tunuarsimaarfigeqqullugu kissaatigissavara. Umiarsuit angissusissaat inatsisiliornermi uninngavigeqinagu aalisartut namminneq angallatissamik angissusissaat aalajangerlissuk, aalisarfiillu sinerissamut qanittuunersut avasinnerusulluunniit ersarippallaamik avissaarteqinagit, aalisartoq qilersugaanani sumiluunniit aalisarsinnaalerniarli. Tamanna aamma nunami suliffissuit suliassaqartuaannarnissamik tungaatigut malugusuallaatigissammassuk.
Angallatit pisaminnik tamanik nunamut tulaassisinnaasut pissarsiariniarnerini aningaasaliussassat landskarsimeertussaammata aningaasartassaat kussangiummerneqarput amerlaaluttorsuummata. Taamaattumik tamanna ataatsikkut pissarsiarinissaat tunuarsimaarfigalugu uanga isumaqarpunga landskarsip qanoq aningaasatigut ikiuussinnaanera aallaavigineqarsinnaassasoq, pisariaqarpat ataatsikkorsuaq pinnagit arriitsumilli amerlisikkiartuaarlugit.
Ataatsimiititaliunnguaasaarnissaq pisariaqartinneqartutut isikkulik ajunngilaq pilersinneqarniarli suliaminillu saqqummiussippat suliaa aamma ataatsimiititaliuukkaluaraanni ajussanngilaq, tamanna maani ileqquliutiinnarnikuugatsigu. Ataatsimiititaliap aalisartut aningaasanik qinnuteqartarnissaannik malittarisassaannik suliaqarnissaa qitiutinneqarmat akuersaartariaqassaaq.
Kvotanik qaffaanissaq ajorinngilara, naak aalisartut ataatsimuulernissaannik siunertaqaraluartoq, ataatsimoorluni suleqatigiittaraluarnerup ajalusoortarneri pillugit taama oqartuarpugut aamma matuma siullermeerneqarnerani. Aalisartoq allanik naalagaqarnani imminnulli naalagaasoq uanga qitiutittuarakku.
Inatsisissatut siunnersuut peqataaffigisinnaalluarpara pingaartumik nunami suliffissuit siullerpaallugit suliassersorneqarnissaat aamma matumuuna inatsisikkut qitiutinneqartuassappat.
Hans Enoksen, Aalisarnermut, Piniarnermut Nunaqarfinnullu Naalakkersuisoq, Siumut.
Siullermik Naalakkersuisut sinnerlugit qujassutigaara inatsisissatut matumuuna saqqummiunneqartoq amerlanerussuteqarluartunit taperserneqarmat, tassuuna aamma takutinneqarpoq massakkut ajornartorsiutit killiffigineqartut ilungersunartut qaangerniarneqarnissaat Inatsisartuni pingaartinneqartoq, taannalu aallaavigalugu Naalakkersuisuni misigisimalluta tapersersorneqarluarluta Inatsisartuninngaanniit sulineq ingerlateqqissavarput.
Siumuminngaanniit oqaatigineqartut angallatit raajarniutit pisassiissutit eqqarsaatigalugit aammalu kattussuullutik anginerusumik angallatitaarniartut periarfissaqartitaanissaat inatsisissap matumuuna allanngortinneqarnissaatigut eqqornerlunnginnissaat oqaatigimmassuk aamma taanna tiguarput Naalakkersuisuninngaanniit, neriullunga uani aaqqiiniarnermi eqquinerlunnissaq taanna pinngitsoortinneqassasoq. Aamma oqaatigisarsi taanna ilanngullugu sillimaffigissavarput.
Taavalu aamma nunami suliffissuit nammassinnaasaat aalaakkaasumik taamatut ingerlaannassappata nioqqutissiornissaq. Taavalu sinerissami qanittumi pisassiissutinik tamarmiusunik ilaatigut oqaatigineqarpoq Siumuminngaanniit oqaatigineqarput sinnerussimassasut 8.000 tonsit missaat, kisianni taanna toqqaannartumik uanga massakkut oqaaseqarfiginianngilara, ataatsimiititaliami ataatsimoorlutik nalilersuinermi tamakku eqqartorneqassammata, Naalakkersuisuninngaanniit qulaaniik pitoreernianngilarput ataatsimiititaliat pitsaasumik periarfissinneqarnissaat aamma suleqatigiilluarnissaq tassani pingaartillugu ataatsimiititaliami nalilersuilluarnissaq Naalakkersuisuni pingaartikkatsigu.
Taavalu aamma Siumuminngaanniit oqaatigineqartoq pisassanik agguaassisarnermi massakkut periutsit, uani inatsimmi aaqqinniarneqartut tassa soorlu aalisariutit ingerlaannarnissaat qularnaarniarlugu pisassanik nunguutsigaanni ukiup tullianut ingerlaqqeriarnissaannik periarfissamik ammaaniarneq tapersersorneqarmat nuannaarutigaara. Tassami massakkut ilaatigut takusinnaasarpagut aalisariutit, naak massakkut ukiuni kingullerni pitsaasumik taanna aaqqissuussineq tikinneqareeraluartoq, tassa ukiuni siuliini malugisarparput raajarniartunik ilaatigut pinninneq pitsaavallaanngitsoq pisassanik utaqqisarnerit allallu pissutigalugit. Tassuuna aamma allanngortitsiniarneq qularnaarniarneqartoq Siumuminngaanniit oqaatigineqartoq aamma Naalakkersuisuni tapersersussavarput.
Taavalu allat saqqummiussuunneqartut isumaqatigineqarmata annerusumik oqaaseqarfigissanngilakka, Siumuminngaanniit saqqummiunneqartut.
Taavalu Atassumminngaanniit, malugaara Atassut assut iluarisimaarinnittoq massakkut uuma aaqqiissutissap saqqummiunneqarnerani, aamma taanna Naalakkersuisuninngaanniit qujassutigaarput. Aamma tassuuna Naalakkersuisuninngaanniit takutikkusupparput suleqatigiinnikkumassuseq inuiaqatigiinni aaqqitassat sukkanerusumik aaqqinneqarsinnaaneranut tunngasut manngertitaarfigiinnarnagit, minnerunngitsumillu aamma tassani fiskerirådip piumasaqaatai aallaavigalugit saqqummiussineq annertuumik kinguneqarmat, taanna aamma nuannaarutigaara.
Taavalu Atassut annertoorujussuarmik isumaqataasaqattaarpoq uani inatsisissap saqqummiunneqarnissaanut. Taavalu aamma kissaatigalugu ilusilersuinissami aalisarnermik misilittagallit aalisartut ilisimasaat aallaavigalugit ilusilersuisoqassasoq, taanna isumaqarpunga saneqqunneqarsinnaanngitsoq piumasaq. Taamaammat kattuffiit peqatigilluinnaqqissaarlugit aammalu Aalisarnermut Piniarnermullu Ataatsimiititaliaq peqatigalugu aaqqissuussinissat ingerlanneqassapput. Kukkusarnerit allallu naammattoortakkagut pinngitsoorneqarnissaat massakkut kissaatiginarluinnarmat, siunissami pitsaasumik aalisartut ingerlariaqqinnissaanni.
Taavalu aamma Naalakkersuisunut kissaatigisaannut aalisartut tusaaniarluarniaqqullugit, aap taanna naqissuserpara, aalisartut tassani tusarnaarneqassapput, aammalu allanngortitsiniarnermi annertuumik peqataatinneqarnissaat neriorsuutigissavarput.
Soorunami makku angallatinut angissutsinut tunngasut massakkut maani aalajangerneqarsinnaanngillat, taakku aamma aalisartut peqatigalugit Aalisarnermut Piniarnermullu Ataatsimiititaliaq peqatigalugu tamakku kingusinnerusukkut naammassiniarneqarnissaat naatsorsuutigilluinnaqqissaarpara, aamma Aalisarnermut Piniarnermullu Ataatsimiititaliaq piumassuseqarluarluni aaqqiiniarnermi peqataanissaa.
Taavalu aamma Atassumminngaanniit Siumuminngaanniillu oqaatigineqartut, pisassanik qaffaanissamut tunngasoq, tassa 6%-imiit 10%-imut aamma iluarisimaarmassuk qujassutigaara. Taavalu aamma soorunami Inuit Ataqatigiit aamma taamatorluinnaq kissaateqarput. Inuit Ataqatigiillu oqaaseqaataani malunnarpoq, inatsisissaq taanna tunngaviatigut aamma ukioq manna aaqqinneqarnissaa isumaqatigigaat, ataatsimiititaliamullu ingerlaqqinnissaa, aamma tassani qularinngilara Inuit Ataqatigiit suleqataalluarumaartut.
Aamma naammattoortareerpagut Inuit Ataqatigiit uani siunnersuummi ilaatigut piumasaat, soorlu nunamut tulaassuiuaannarnissaq kingullermik oktoberip 9-aani oqallittoqarmat aamma eqqaagaat, taavalu aamma aalisariutitigut nutarterisoqartariaqartoq. Tassani aamma qularinngilara isummatik ataatsimiititaliami saqqummiukkumaaraat, soorunami aamma Naalakkersuisuni uagut tamakku isummat aamma eqqarsaatigilluarumaarpagut.
Taavalu Kattusseqatigiinninngaanniit ilaatigut imatut paasipajaarpara, illersorlugulu assortorlugulu saqqummiussisut, ilaatigut apeqqusersormassuk sooq taama tuaviortigisumik massakkut saqqummiussinersugut. Kingullermi oqallinnermi sakkortuumik piumasarineqarpoq pissutsit piaartumik aaqqinniarneqassasut, fiskerirådillu piumasaa aammalu partiit allat oqaasii tunngavigalugit matumuuna isumaqarpunga saqqummiussinerput annertuumik tunuliaqutaqarmat tunuarsimaarnissamut ersissutissaqanngitsugut.
Taavalu Kattusseqatigiinninngaanniit aamma oqaatigineqarluni aalisartut ataatsimoortumik aaqqiiffigineqartariaqartut, aamma taanna isumaqarpunga apeqquserneqartariaqanngitsoq, massakkut ajornartorsiutit taama annertutigisut aalisartut ataatsimut aaqqiiffiginiarneqarnissaat siunnerfigineqarmat, kisiannili uani kattussuunnissamut periarfissaq isumaqarpunga sukkasuumik ammaanneqartariaqartoq, aalisartut ilaatigut ingerlariaqqinnissaminnut massakkut utaqqeqqinnissaminnut akissaqanngillat, taanna isumaqarpunga Kattusseqatigiit aamma malugisariaqaraat.
Taavalu aamma sinerissap qanittuani aalisartut isumaat suli annerusumik tamakkiinerusumillu tusaaniarneqartariaqartut piumasaat, isumaqarpunga tusarniaasaqattaarnissatsinnut massakkut periarfissaaruttugut, aamma Fiskerirådimi ilaasortat assigiinngitsut arlallit inissisimapput, KNAPK, APK, Royalikkut taavalu Aalisarnermut Pisortaqarfik, tassanilu aamma tunuliaqutaqarluarput avatangiisiminnik, taakkulu tunngavigalugit kissaatigaat inatsisissaq taanna maannakkut naammassineqartariaqartoq.
Aalisartut utaqqeqqissinnaanngillat aamma taamatut nipitutigisumik avammut suaartareernikuupput, taanna isumaqarpunga massakkut tusartariaqaripput. Aamma Kattusseqatigiit qularinngilara tassani aaqqiiniarnermi annertuumik peqataalluarsinnaasut.
Taavalu Aalisartut Kattuffiinut Peqatigiiffinnut ataatsimitiitalianut attuumassuteqartunut tusarniaassutigineqartarnissaat, taanna oqatigeerpara KNAPK tassani aamma annertuumik piumasaqarpoq sukkasuumik taakku aaqqiiffigineqarnissaat massakkut tikinneqartariaqartoq. Taannalu aamma nipip massuma aninneqarneranut annertuumik tunngavilersueqataasoq oqaatigissavara, naak ilaatigut kingullermi saqqummiussinermi oqallinnermi tapersersuinngitsutut nipilerneqaraluarluta Naalakkersuisuninngaanniit massakkut isumaqarpunga nuannaarutigisariaqaripput ataatsimoorluta siunnerfik aallarfigisussanngoratsigu.
Taavalu aamma Kattusseqatigiinninngaanniit oqarpoq aalisarnermut siunnerfik massakkornit ersarinnerusoq saqqummiunneqartariaqartoq. Ippassaaninnguaq aalisarneq pillugu nassuiaat killiffigalugu annertuumik oqallippugut, isumaqarpunga massakkut tusarniaaqqittoqarsinnaanngitsoq, siunnerfiit ersarissut suleqatigiissitaliami taavalu nassuiaammi tassani saqqummiunneqartut tunngavigalugit taanna aaqqiiniutissaq massakkut saqqummiupparput. Ajornaqaaq suna tamaat alloriarfiginiarutsigu aallaqqaataaniit aallartittuaannarsinnaanngilagut suna tamaat tusarniaassutigalugu. Tusarniaareernikuuvugut isumaqarpunga taanna tusarniaanerit sivisuumik ingerlanneqareersimammata aallaavigalugu sulineq aallartinneqartariaqartoq, tusarniaaqqinnissamut soorlu oqatigereeriga aalisartut akissaarusupput tusarniaasoqaqqissappat arlalippassuit unitsinneqassapput, kattussuukkusuttut periarfissaarutsinneqassapput, isumaqarpunga tusarniaanissaannaq pillugu massakkut taamatut pilliuteqaqqinnissarput pinngitsoortinneqarluinnartariaqartoq.
Aammalu minnerunngitsumik, soorlu oqaatigereerpara KNAPK tassani annertuumik ilusilersueqataammata, kattuffiummat ataqqineqartariaqartoq, soorunami aalisartut ataasiakkaat aamma isumaat allaanerusinnaapput, kisianni sulineq sukkasuumik aallartinneqassappat kattuffiit ataqqineqarnissaat aamma maanngaanniit isumaqarpunga saneqqunneqarsinnaanngitsoq, annertuumillu tusarniaanermi aamma taakku peqataasareermata isumaqarpunga tusarniaaqqittoqartariaqanngitsoq, kisianni soorunami ataatsimiititaliap nammineq sulinissaa Naalakkersuisuninngaanniit killilersinnaanngilarput, tusarniaanissat allallu paaserusutani paasiniassappagit aamma Naalakkersuisuninngaanniit ikiuunnissarput neriorsuutigissavarput, soorunami namminneq aalajangissavaat tusarniaanerit avammut ingerlateqqinneqassanersut. Kisianni isumaqarpunga tusarniaaqqinnissamut annerusumik massakkut piffissaqanngitsugut, inuit perusuttut aallartinnissaminnut utaqqiinnartut taakkua utaqqiseqqissinnaanngilagut, minnerunngitsumik aamma aningaasarsiornerat isumannaatsumik aallassappat, massakkut killiffik qaangertariaqaleratsigu.
Taavalu Otto Steenholdti oqaaseqarnermini saqqummiussai toqqissiallaatigalugu oqarnera, sinerissap qanittuani raajarniutinut, ilaatigut tunisassiortoqarsinnaanerat aarlerinera tassani Naalakkersuisut aamma namminneq pisinnaatitaaffeqareerput, soorlu aamma oqaluttup nammineerluni oqaatigereeraa, kisianni ukua kattussuunnissamut periarfissat ammarniarneqartut, isumaqarpunga taakku piaartumik aaqqinneqarnissaat, aamma Otto Steenholdtip akerlerinngimmagu suleqataalluarnissaanik neriulluarfigaara.
Taavalu ataatsimiititaliunnguaasaarnissaq tassa taanna oqallinnermi kingullermi ataatsimiititaliassaq pilersinneqartoq massakkut inuttassai aaqqissuunniarneqarput, sulineq aallartinneqareerpoq. Ataatsimiititaliornissaq taanna pisariaqartinneqarpoq, pitsaasumik siunissami ingerlariaqqinnissaq aalisarneq eqqarsaatigalugu tikinneqassappat inuit misilittagaqarluartut qanimut peqataatillugit, allatut ajornartumik massakkut ataatsimitiitaliornissaq taanna qanorluunniit akerleritigigaluaratsigu illersortariaqarparput, siunissami pitsaasumik aaqqiiniarnissaq massakkut tikinneqartariaqalermat.
Taavalu una Aalisarnermut, Piniarnermut Nunaqarfinnullu Naalakkersuisumut nersualaarinninnera isumaqarpunga Naalakkersuisut tamarmik taanna nersualaarinninneq tigusariaqaraat, uanga nammineerlunga taanna tigusinnaanngilara, nalunnginnakku aamma allat tassani suliarinninnermi annertuumik tunuliaqutaasut. Kisianni qujavunga taamatut nipilimmik oqalukkavit, kisianni nalunngilara allat annertuumik tassani suliarinninnermi peqataasut aamma taakku nersorneqartariaqartut.
Taamatut oqaaseqarlunga amerlanerussuteqarluartut kissaateqarnerat malillugu inatsisissaq ataatsimiititaliamut suliarineqarnissaa innersuussutigaara, Naalakkersuisullu sinnerlugit qujavunga paasisinnaagakku isumaqatigiinneq assut annertuumik maani siunnerfigineqartoq, taamaalilluni siunissami aalisartut piumassuseqarluarlutik ingerlariaqqinnissaat matumuuna qularnaarneqarsinnaanngortoq takusinnaagakku, qujanaq.
Mads-Peter Grønvold, Kattusseqatigiit.
Siunnersuut Kattusseqatigiinniit akerlerinngilarput, soorunami aamma aalisartut atugaasa piaartumik iluarsiivigineqarnissaat soqutigisaraarput, aammalu taanna siusinnerusukkut oqaatigisareerparput, kisianni una perusupparput Kattusseqatigiinniit ajornanngippat aalisartut ataatsimoornerusumik aaqqiivigineqarnissaat, tassami ukioq kingullerli eqqartorneqarpoq sinerissami qanittumi aalisartut qiviarutsigit, aalisartut aningaasarsiornerat imaannaanngitsuusoq oqaatigineqarpoq ilaatigut imminut akilersinnaanngitsoq.
Taamaattumik uani aalisartut ilaannaat taamatut periarfississinnarlugit ukua aningaasarsiornerat ajoreersoq qanoq ilillugu iluarsiivigineqarniarpat tamakku, tamakkuuku ersarinnerusumik allaqqanissai perusukkaluaripput aamma, soorunami tamarmik ikaarsaariarnissaminnut periarfissaqartussaanngillat. Angallatit arlallit pineqarput ataatsikkorsuaq aamma tamarmik iluarsiivigineqarsinnaanngitsut nalunngilarput.
Taamaattumik Kattusseqatigiinniit ujartoripput angallatit tamakku allat periarfissaqanngitsut ukiuni qaninnerusumi, sinerissap qanittuani tunisiuartussaammata taakkua. Aningaasaqarnerat qiviaraanni, sinerissap qanittuani akigititaasut qiviaraanni akilersinnaanngiusartumik ingerlasut taakkua pineqarniarpat, taakkuuku eqqarsaatigalugit taamatut oqariartuuteqartugut, imaanngilaq kinguarsaaniarsarigatta suliassamik, kisianni aalisartut ajornartorsiutaat, sinerissap qanittumi aalisartut ajornartorsiutaat uani eqqartorpagut, taakkua qanoq pineqassappat, ilaatigut akit taamaaginnarpata imminut akilersinnaanngitsumik ingerlaannarsinnaanatik ingerlasoqaannassappat ajutoortussaammata, taakkuuku eqqarsaatigalugit annersumik taakku qanoq taakkua aaqqiivigineqarsinnaanersut aamma ilanngullugu ujartoripput.
Soorunami ukua aalisartut allat periarfissaqareersut tapersersorneqartariaqarput aamma uagut tapersersorpagut, kisiannili aalisartut allat taamatut periarfissaqanngitsut qanoq iliornikkut tapersersorneqarsinnaappat, aamma qanoq iliornikkut tapersersorneqarniarpat, taannaana annerusumik paaserusukkipput.
Allanik kinguarsaanissanik perusunngilagut, kisianni paasisinnaavarput Kattuffiit Kattuffiugaluarlutilluunniit soqutigisat assigiinngitsuusarput, soorlu Inatsisartuni ilaasortat aamma soqutigisaat aamma assigiinngitsuusartut. Taamaattumik aalisartut tamakkiinerusumik ataatsimoornerusumilli isumaat tusarniarneqarnissaat tusaaneqarnissaallu pisariaqarluinnarput.
Aamma uani angallatit aalisarneq pillugu nassuiaammi allanilu oqallittoqarnerani angallatit eqqartorneqarput assigiinngitsut. Angallatit sinerissap qanittuani qiviarutsigit siunissami tamakkua angallatit nutarterneqarnissaat eqqarsaatigalugu aalisarneq qanoq ingerlanneqarniarpa? Sinerissap qanittuani aalisariutit tamaasa qiviaraanni imatut anguniagaqartoqarnerluni pisassiissutit taakkua iluani ima procenti angitigisoq nammineq tunisassiarisinnaavaat. Nunamut tunisassiarineqassaaq ima procenti angitigisoq, avammut tunisassiarineqassaaq procenti ima angitigisoq, tamakkuuku maqaasinarmata soorunami oqariartuutitsinni ersertinniarsarigigut.
Kinguarsaanianngilluinnarpugut Kattusseqatigiinniit, aalisartut ajornartorsiutaat qanoq ajortigisut nalunngilagut, taamaattumik piaartumik iluarsineqarnissaat soorunami aamma uagut peqataaffigissavarput, kisianni allat aamma aalisartut taamatut ajornartorsiuteqartut periarfissaqanngitsut ilanngullugit eqqarsaatigineqarnissaat perusullugu taamatut oqariartuuteqarpugut. Neriussaagut Naalakkersuisumik paatsoorneqarani oqariartuuterput paasineqarumaartoq, tassami assersuutigalugu sinerissami qanittuani aalisarnermi raajarniarnermi ajornartorsiutit kisimik ajornartorsiutaanngimmata, aamma sinerissap qanittuani qaleralinniarluni aalisarnermi pisariaqartitsisoqarpoq umiatsiaaqqat ajornanngippat tunisassiornermi atorsinnaasunik taarsersorneqarnissaat. Aningaasaliissutilli qiviaraanni killilerujussuuvoq tamakkua piaartumik taarsersorneqarnissaat, tamakkuukku eqqarsaatigalugit annerusumik Kattusseqatigiinniit nalornikannersugut, aningaasalersueriaatsit ilaatigut suliluunniit annertunerusumik qulakkeerneqarsimanngimmata, aammalu aningaasalersuiniarlutik allat neqerooruteqaraluartut ilaatigut tunuarsimaarmata piumasaqaataat imaannaanngitsuugamik aamma taamatut aningaasalersuissagunik.
Ole
Lynge, Inatsisartut Siulittaasuat, Inuit Ataqatigiit:
Oqaaseqarumallutik
nalunaartut suli arlaqarput , kisianni oqaatigilaassavara maluginiakkakka
naapertorlugit amerlanerpaatigut isumaqatigiittoqarmat, taavalu aamma tamatuma
kingorna ataatsimiititaliami suliarineqartussaavoq,
kaammattuutigerusupparpullu apeqqutit tassunga tunngassuteqarsinnaasut allat
ataatsimiititaliami sammineqarumaartut.
Johan
Lund-Olsen, Inuit
Ataqatigiit.
Nuannaarutigaarput
Inatsisartut Siulittaasuata taanna aamma eqqaasitsissutigimmagu, tassa una
suliaq ingerlaqqittussaassaaq ataatsimiititaliamut, taamatut periuseqarpugut
inatsisissat peqqussutissallu siunnersuutit Inatsisartuni suliarineqaraangamik.
Ataatsimiititaliamut
ingerlateqqinneqarnerani aamma periusiuvoq tusarniaanermi allagaqaataasimasut
aamma ataatsimiititaliamut Naalakkersuisoqarfinninngaanniit
tunniunneqartarlutik, taanna soorunami aamma uani suliami taamatut
aaqqissuussiffigineqarumaartoq taanna naatsorsuutigivarput, taamaammat tassa
aappassaanneerinninnissap tungaanut naatsorsuutigisariaqarparput
inatsisissatut siunnersuutip uumap Naalakkersuisut suliarimmassuk, tassunga
tunngatillugu tusarniaanermi allakkatigut apuukkumaneqarsimasut
Naalakkersuisoqarfimmut taakkua aamma ataatsimiititaliamut
saqqummiunneqarnissaat, taanna nalinginnaavoq aamma allanngortinneqarsimasutut
naatsorsuutiginngilarput.
Kisianni
taassuma saniatigut ataatsimiititaliaq aamma periarfissaqartuaannarpoq
siullermeerinninnerup aappassaaneerinninnerup akornani aammalu
pisariaqassappat aappassaaneerinnerup pingajussaaneerinninnerullu akornani
aamma pisariaqartikkunikku susassaqartunik aamma tusarniaaqqissinnaasarlutik,
taakkua periarfissat ammapput. Isumaqarpungalu ataatsimiititaliaq aamma
suleqqilerpat uani pisariaqartippagu taava aamma aggersaasinnaanini taanna
atorluartariaqaraa.
Kisianni
Naalakkersuisup aamma oqareerneratuut uunga suliamut tunngatillugu, tassa
imaappoq Aalisarnermut Siunnersuisoqatigiit, tassa fiskerirådip ukua
allannguutissatut siunnersuutigineqartut massakkut Fiskerirådip, tassa
Aalisarnermut Siunnersuisoqatigiit sammisareersimavaat piffissami qanittumi,
ungaserujussuanngitsukkut oqaaseqarfigereersimavaat Naalakkersuisunut taakkua
apuunneqarsimapput, tassalu Naalakkersuisup taanna malillugu maannakkut
inatsisissatut siunnersuut una saqqummiuppaat, kisianni aamma una
oqaatiginngitsoorusunngilara saqqummiussisut ilaasa, tassa kingulliulluni
saqqummiussisoq attaviitsoq Otto Steenholdtip aallarniigami oqaatigivaa,
aviisimi tassa Sermitsiami kingullermik saqqummersumi atuarsimallugu,
tulaassukkat 10.000 tonsit missaanik kinguaattooqasut, kisianni taanna
apeqquterujussuuvoq ilumuuinnersoq, ungaserujussuanngitsukkut Pisortaqarfimmut
nammineq uanga paasiniaagama paasivara, Aalisarnermut Nakkutilliisut
nalunaarsuisarnerat aamma najoqqutaralugu oktoberip aallaqqaataani sinerissap
qanittuani aalisartut raajarniarnerminni 4.000 tonsinik kinguaattooqqasut
oktoberip aallaqqaataani. Taamaammat 10.000 tungaannut nikingassut taanna
6.000 tonsi suminngaanneersimanersoq taanna paasiniartariaqarpoq aammalu
isumaqarpunga Aalisarnermut Ataatsimiititaliap taanna
misissoqqissaartariaqaraa, kisianni tassa Pisortaqarfimmi kisitsisit
pigineqartut taakkua soorunami upperisariaqaratsigit, tassa oktoberip
aallaqqaataani imaappoq, sinerissap qanittuani raajartassiissutit 4.000 tonsit
oktoberip aallaqqaataani suli pisarineqarsimanngitsut, tassami
kinguaattooqqasugut siornamut piffissap taamaalineranut sanilliullugu, tassa
taanna naqqiutigilaarpara siullermik.
Taavalu
aamma una eqqaasitsissutigilaarusuppara ukioq manna raajartassiissutit
sinerissap qanittuani 36.500 tonsit missarpiaanniimmata, Siumup
saqqummiussinermini tassani kukkullatsiarluni oqaatigivaa 38.000 tonsiusut,
tassa 1.500 tonsinik amerlanerusut, kisianni taamaanngilaq, tassa sinerissap
qanittuani raajartassiissutit TAC 36.500 tonsit missarpiaanniipput.
Una
aamma oqaatigilaarusuppara, Siumut saqqummiussaa una tassa raajanut
pisassiissut tamarmiusoq, tassa avataasiortunut sinerissallu qanittuani
raajartassiissutigineqartut taakkua qanoq agguataarsimaneri taanna aamma
qimerlooqqissallugu uagut Inuit Ataqatigiinninngaanniit aamma
peqataarusukkatta. Taanna neriuutigivarput upernassap tungaanut, upernaamummi
aalisarnermut inatsit tamakkiinerusumik aamma uterfigeqqittussaagatsigu aamma
allanngortiterneqartussaammat, taanna uagut Inuit Ataqatigiinninngaanniit
aamma peqataaffigerusussavarput, tassami tassunga tunngatillugu
eqqaasitsissutigerusuppara, tassa siorna taamaalioriaraluarneq maani
Inatsisartuninngaanniit taanna iluatsinngitsoorpoq, taamani inatsisissatut
siunnersuutaagaluartoq taamatut aamma siunertaqartoq maani Inatsisartut
siullermiiginnaraluarlugu unittoorutiginikuuaat.
Taamaammat
nuannaarutigivarput Inuit Ataqatigiinninngaanniit maannakkut Siumup taanna
qaqeqqimmagu, siornami aamma uagut peqataaniarsimagaluarpugut, kisiannili
tassa unittoorsimavoq taanna suliaq, maannakkullu qaqeqqinneqarnissaanut
isumaqarpunga aamma pissutissaqarluartugut.
Taamaammat
tassa raajartassiissutit tamarmiusut avataasiortunut aammalu sinerissap
qanittuaniittunut agguaanneqarsimaneri taakkua allatut
aaqqissuussiffigineqarsinnaaneri taanna eqqartoqqissallugu uagut
piareersimalluinnarpugut.
Simon
Olsen, Siumut.
Aap,
siullermik Naalakkersuisut oqaatigisaat tusarniaanerit sivisuumik
ingerlanneqarsimasut taanna iluarisimaarnaqaaq, tassami ilumoorluinnarmat
sivisoqisumik tusarniaasaqattaarnerit ingerlasimapput.
Kannguginngilara
oqaaseq atussallugu, innarluutit tungaaniissimaneq pimoorunneqarnerulerluni
massakkut paasineqarnera paasinnittuninngaanniit isumaqarpunga aamma
nuannaarutigineqassaqisoq.
Maannakkut
kiisami Royal Greenlandip nanertuutaasimaneranut tunngatillugu pisortai
piialerput, aningaasarpassuarnik nunatta nanertuutissiugaasimanera kiisami
paasineqalerpoq, taanna kialuunniit miserratigisinnaanngilaa, taannalu
nuannaarutigaara Naalakkersuisut pimoorullugu suliaq sammivillu
inissikkiartuaarmassuk.
Nalorninartut
suli siunitsinniipput 45%-ip aamma 55%-ip tikinneqarnissaanut, qularnanngilaq
immaqa sakkortulaartumik suli pisoqartussaajumaarpoq, tassami ukioq kingulleq
tamatta Siumumiit aamma partiinit tamaniit ilisimaaraarput 45-miit 55-imut
pisitsinissaq 100 mio. kr.-inik akeqarnerangaassalluni unitsitsinermut
inatsisip suliarinngitsoorneranut pissuteqarmat.
Taamaammat
nuannaarutigilluinnarpara sinerissap qanittuani aalisartut
qaminneqaqqajaajuareerlutik kiisami ikummarissaaffigineqaqqilermata,
imaluunniit qanilleqimmat iliuuseqarnissaq.
Taamatut oqaaseqarpunga pissutiginagu Naalakkersuisuujunnaarama, pissutigaluguli naalakkersuinikkut anguniakkat uanga aamma taakkua anguniagaqataaffigigakkit. Qujanaq.
Otto Steenholdt, attaviitsoq.
Tassaakua aalisariutit periarfissillaqqullugit oqaatsikka uteqqilarusukkikka.
Taakkua suliffissuarnut tulaassuisussanut uangalu neriuutigilluinnaqqissaakkakka allaat avasinnerusumi aalisarsinnaasariaqarnerat oqaaseqarfigigiga sapernunnguaratik aalisarsinnaallutik suliffissuarnut suliassaaleqisunut tulaassiortorsinnaajuallallutik. Taamaattumik mikisunik uanga eqqasaateqanngilanga. Sapernujuitsut aamma killilersugaavallaanngitsut uanga nuannarivallaarneq ajorikka pisassat sinerissap killinnguaniittut imaluunniit qaninnerusumiittut. Imaassapput allanit attorneqassanngillat avataasiorlunilu aamma kilisannerit aamma killeqartarlutik avammut.
Nunatta aningaasarsiutai taamak killilersorlugit ilai sapernusut, ilai qaangiisut, ilai pisaqanngitsut, ilai pisarinninngitsoortut. Tamakkua peerlugit ataatsimut oqattariaqapugut aajukua raajartassat, aajukua tulaassugassat, aajuakua igaartugassat. Killilersuuterpassuarnik tunioqqarunnaarlugit aalisartut namminneq, nammineersinnaanerat siunertaralugu qilerussaajarnerullugit tunniuttariaqaleraluarmata.
Soqutigilluinnarlugu 10.000 tonsit raajat aalisarneqanngitsoorsimasut maanngaanniit apeqqutigaakka. Qujassutigissavara Johan Lund-Olsenip Inuit Ataqatigiinninngaanneersup akiniarsarimmagit. Ajunngilaq, kisianni Naalakkersuisuninngaanniit taanna qanoq oqaaseqarfiginiartariaqassava?
Aalisagassaaleqivugunngooq uffalu takoriassagigut taamak aalisarneqanngitsoorsimasut amerlatigisut . Erseqqissumik tusarusussavara pissuterpiaasoq sunaanersoq Naalakkersuisuninngaanniit. Uuma oqallisigisatta ataatsimiititaliamut ingerlateqqinnissaa ajorinngilara. Taamaaliorniangusaritsi.
Taavali isumaqarpunga aamma uteqqiaffigilaartariaqarlugu, Hans Enokseni, tassa illit kisivit pinngilakkit aamma taanna paasinerluttariaqassanngilaq. Qutsavigilaaruk illit kisivit pinngilakkit Naalakkersuisut suleqatigiinnerat nalunngilluarpara. Ilinnuinnaq tutsillariarunagit ilissiuku ataatsimoorlusi suliarisartakkasi, kisianni illit qaninnerugavit qutsavigiinnarpakkit, tassa taannannguaq kisiat pissavat, kisianni isumaqatigeqakkit Kattusseqatigiit oqaaseqartuat aallatimmat ilittorluinnaq aamma uanga paasivakka. Siunnersuut manna illersorlugulu assortormassuk.
Tassani eqqarsaatigigaluarlugu ajuallatsinniarnagit eqqaatsiarpara issaannannguaq Kattusseqatigiit ittorinnguatsiagaata Anthon Frederiksenip oqaasia maani oqallinnitsinni: "Pisinnaaffeqarpunngooq namminneq immikkut isumaqarsinnaassallutik", tassa ajunngilluinnartumik paasinnguatsiagara taanna. Taamaattut ullumikkut oqaaseqartuata illersorlugulu assortorlugulu pimmagu. Ima eqqarsarama, immaqa allat Kattusseqatigiinneersut manna siunnersuut ersarissumik illersoraluarneraat. Tassami oqaatigineqareermat assigiinngitsumik isumaqarsinnaanertik ataqqineqassasoq, tassa taamaattunnguanik oqaannarpunga siunnersuutit ersarikkaangata isumaliortarama tamarmiunnerpaammi? Oqaaseqartuata tamaasa isumaqatiginerpai? Utoqqatserpunga taama oqarama, kisianni taamak oqartoqarsimatillugu allatut ajornaqaqigami oqartariaqassagatta ilaannikkut ilaasa illersoraat, ilaasa akerlilersortarsimassagaat. Tassa immaqa taamak ajornanngitsigisumik oqarpunga uanga kisimiikkama. Taamaaratarsinnaavoq aamma.
Ole Lynge, Inatsisartut Siulittaasuat, Inuit Ataqatigiit.
Qujanaq. Taava Lars-Karl Jensen, Siumup oqaaseqartua aappassaanik. Tulleriumaarpaa Aalisarnermut Naalakkersuisoq.
Lars-Karl Jensen, Siumup oqaaseqartua.
Aap, uani una eqqaamaannassavarput allannguutissatut taakkartorneqartut immikkoortut sisamat, aalisarnermi inatsimminngaannit oqallisigigatsigit, kisianni naqqiissuteqarfigineqaramaana eqqaaginnarniarlugu Siumuminngaanniit oqariartortoqarpugut sinerissap qanittuanit pisassiissutit qiviassagaanni maannakkut 38 tonsit missaat, ila tassani aamma tapissuteqartoqarluni ingerlaasiusimasoq eqqarsaatigalugu, taavalu suliffissuarni suliarineqarsinnaasut qanoq annertutigisumik missaannut taasinerput aallaaveqarpoq angallatinik namminneq uutiterisunik sinerissap qanittuani aalisartitsilissagutta ilaatigullu ilai suliffissuarnut procentit aalajangersimasut tulaassortillugu, taava missingersuuteqartariaqarpugut angallatit qassiussappat, taamatut kattunnaarlutik kilisaateqqanik immaqa taamatut taasinnaavakka isaasalerlugu, qassinik taarserniarneqartut taakkulu imminut akilersinnaasumik ingerlassappata aamma qivianngitsuugassanngitsoq tassaavoq suliffissuarnut suliarineqarsinnaasut annertussusiat, taakkuninnga sinneruttoq nammineq uutiterlugu angallammi nioqqutassiarineqarsinnaasoq.
Taakkua imminnut nalilersorneqarnissaat ataatsimiititaliassamilu sussasaqartunilu eqqartorneqarnissaat Siumuminngaanniit kissaatigivarput maannangaaq oqareernata angallat imannak angitigisariaqarpoq imminut akilersinnaasumik ingerlatissaguni.
Issaq oqariartuutigereerparput uagut angallatinik amigaateqarpugut sinerissatta ilaani ukiuunerani sinerissamut qanittumi imarluttaqisunili aalisarsinnaasunik. Taakkuuku amigaatigigut taakkulu aaqqiffigineqarnissaat aamma ukioq ataatsimiititaliaasup suliamini issannguaq saqqummiussaatigut uagut tunngaviatigut tapersersukkagut.
Aap, Johan Lund Olsen, uaguttaaq siorna inatsisissaq qilanaarisimagaluarparput allanngortiternissaanut oqalliseqataanissarput, kisianni taakkua imaluunniit taassuma kinguartinneqarnera tassuuna patsigigaat nalunngilarput. Uagut aamma taamanili takorlooreersimavarput maannakkumut raajartassiissutinut tunngatillugu, pisassat ataatsimut isigalgit avitseriaatsit kisitsisitaasa allanngulaarnissaat. Nalunngilarput ukiorpassuarni ineriartornitsinni avataasiortut oqariartuutigisaraat maannakkumut 60%-it namminneq pisariaqarlugu sinerissami qanittumi 40%-i.
Taamatut nikisitsissagaluarutta sinerissamut qanittumi aalisarnerup tungaatigut akilersinnaasumik ineriartortitsinissaq anguneqarsinnaanngitsutut uagut Siumuminngaanniit qangali isigisimavarput, taamaattumillu periarfissaq manna iluatsillugu suleqatigiittussanut Naalakkersuisunullu nalilillaqqoqaarput avitseriaatsip 45%-ii, sinerissami qanittumut, avataasiortunullu 55%-ip qanoq naleqqutsiginara nalilersorneqassasoq. Taakkuusussaammata aamma sinerissap qanittuani maannakkut raajartassat taamatut amerlatigilertillugit ukiumut akilersinnaasumik aalisarniarnermi tunngavileeqataasussat. Annertunerusumik oqaaseqassanngilanga oqareernittut uani allannguutissat immikkoortut sisamat inatsisip atuutereersup allannguutissartai aallaavigalugit oqallikkatta.
Qujanaq.
Ole Lynge, Inatsisartut Siulittaasuat, Inuit Ataqatigiit.
Aap, taava tullinnguuppoq Aalisarnermut, Piniarnermut Nunaqarfinnullu Naalakkersuisoq. Tulleriumaarpaa Augusta Salling.
Hans Enoksen, Aalisarnermut, Piniarnermut Nunaqarfinnullu Naalakkersuisoq, Siumut.
Qujanaq. Kattusseqatigiit uku oqaluttuata oqaasii akissuteqarfigilaarniarlugit.
Siulittaakmut qinnutigissavara issualaarsinnaanerlugit Kattuseqatigiit oqaaseqataanninngaanniit. Imatullu aallartipput: "Kattusseqatigiinniit, Kattusseqatigiit peqqissaartumik misissoreerlugu imatut oqaaseqarfigissavarput", tassalu aalisarnermut inatsississaq. "Siullermik Kattusseqatigiinniit taamatut Inatsisartut inatsisissaatut siunnersuutip saqqummiunneqarnera eqqarsarnartoqartipparput". Tassa qanoq isumaqarnersoq tassuuna takusinnaavarput. Issuaaneq naavoq.
Eqqarsarnartoqartippaat tunngaviusumik tamaat tapersersunngilaat. Taanna uanga taamatut paasivara aamma Otto Steenholdti aamma oqaaseqarpoq aamma nammineq taamatut paasisimallugu. Uani aalisartut periarfissaqanngitsut periarfissarsiuunneqarnissaannik oqalunnerat, periarfissaqanngitsut taakku katataanissaannik aarlerinerat isumaqarpunga tunngavissaqanngitsoq massakkut taakkua isumannaatsumik aallariarnissaat tunngavigalugu suleqatigiissititaliap suliai aallaavigalugit ataatsimiititaliassaq sulsinneqalertussaavoq siunissami qanoq taakkununnga isumannaannerusumik aammalu akilersinnaasumik aalisarnissaq aqqutissiuunniarneqarpoq. Taamaammat oqartoqarsinnaanngilaq ilai imminiiginnarlugit, ilai kisiisa ingerlatiniarlugit sulisoqartoq. Taakkua annertuumik aamma isummerfiginiarneqarput siunissami ingerlariaqqinnissaat isumannaatsumik
anguniarneqarpoq angallatit nutarterneqarnissaat eqqarsaatigalugu. Taavalu aamma ataatsimiititaliaq aallartittussaq tassa tamakkuninnga sulissaaq nutarterinissaq qanoq ilusilik aalisartunut saqqummiunneqassava? Suliffissuit qanoq ittut pilersinneqassappat? Avataani, sinerissami tunisassiorneq ingerlanneqassava? Tamakkua tamarmik akiortorneqartussaapput ataatsimiititaliami sulisussaminngaanniit.
Taavalu aamma procentit qanoq annertutigisut tunisassiornermi nammineerluni atorneqassava imaluunniit qanoq annertutigisut nunamut tulaanneqassappat? Tamakkua tamarmik nalilersoqqissaarneqassapput.
Isumaqarpunga, Kattusseqatigiit ersissutaat tunngavissaqanngitsut aaqqiiniarnissami aalisartut namminneq aamma annertuumik siunnersuuteqarmata. Taakku peqataatinneqarnissaat isumaqarpunga akuersaartariaqaripput tamatta aamma ersisutigisariaqanngikkipput ilaannai annaanniarneqanngillat periarfissinniarneqarput tamarmik aalisartut imminut akilersinnaanerusumik ingerlanissaat anguniarneqarmat aammalu soorunami suliffissuarni sulineq aamma tassani qularnaarniarneqartussat ilagaat. Isumaqarpunga assortuussutissaqarpallaanngikkaluarluta assortuunniarsarisugut nalunatigulu suna siunnerfik massakkut siunnerfigineqartoq aalisartunik annertuumik nipiliuutigineqartoq qiviassagaanni.
Taavalu Johan Lund-Olsenip tusarniaanermi allagaqaatit kissaatigimmagit neriorsuutigissavara ataatsimiititaliami taakku apuunneqassasut aamma pissusissamisoorpoq taamaaliornissarput.
Taavalu Otto Steenholdtip aamma oqaaseqaqqinnermi aalisariutit allanillu killiliiniarnissaq mianersoqqutigaa, kisianni aamma soorunami aamma ilaasa aamma qularnarmat tamarmik kattunnissaat, ilai aamma qangatut ingerlarusuttut periarfissaqartitaanissaat taanna aamma sillimaffigisariaqarparput. Tassami ilaat nunguunneqassapput namminneq aalajangiisinnaanngortikkutsigit qanoq ingerlariaqqinnissaminnut. Isumaqarpunga taanna mianersorfigisariaqaripput aamma qangatut ingerlarusuttut aalisartut tassani illersoneqartariaqarmata.
Qujanaq.
Ole Lynge, Inatsisartut Siulittaasuat, Inuit Ataqatigiit.
Qujanaq. Taava Augusta Salling, Atassutip oqaaseqartua, aappasaat. Taava tulleriumaarpaa Naalakkersuisut Siulittaasuat.
Augusta Salling, Atassutip oqaaseqartua.
Tassa uagut Atassumminngaanniit nuannaarutigaarput oqaaseqaatigut tigulluarneqarmata aamma taamaattoqassasoq ilimagisimavarput, tassami allannguutissatut siunnersuutit sisamat taakku uagut tamakkiisumik isumaqatigigatsigit. Oqaaserpassuilli allat saqqummiussuunneqartut, tassa 9. oktober oqallinnitsinnut tallissutitut oqaatigisariaqarsoraakka. Tassami taamanikkulli isumaqatigeereernikuuvugut ataatsimiititaliamik pilersitsisoqassasoq assigiinngitsullu tamakku isummerfigisassat suliarineqareerpata upernaamut aaliangiiffigineqarnissaat tikinneqarumaartoq.
Taamaattumik uagut Atassumminngaanniit taakkua allannguutissat sisamat tunngavigalugit oqaaseqarpugut aammalu naatsorsuutigilluinnarpagut soorlu assersuutigalugu avataasiortut aammalu sinerissami qanittumi pisassat qanoq agguaanneqarnissaannut tunngasut susassaqartut aalisartut aammalu tamakkuninnga suliaqartuusut imminnut oqaloqatigalugit isumasioqatigilluarlugit suliarineqareerneranni inatsisartuni maani aalajangernissarput tunngavilersorneqarumaartoq. Taamaattumik massakkut pituttorsimasumik oqallisilereernissarput uanga pissusissamisoortutut isiginngilluinnarpara.
Tassa tassunga killiinnarallarpunga ilimanarsinnaavoq oqaaseqaqqittariaqassasunga puigutsiarakku suna akisasarinerlugu.
Ole
Lynge, Inatsisartut
Siulittaasuat, Inuit Ataqatigiit.
Massakkullu
tullinnguuppoq Naalakkersuisut Siulittaasuat Jonathan Motzfeldt,
tulleriumarpaa Mads-Peter Grønvold.
Jonathan
Motzfeldt, Naalakkersuisut
Siulittaasuat, Siumut.
Aalisarnermut
Naalakkersuisup oqaaseqarneranut ilaliullugu Otto Steenholdtimut
oqaatigilaassavara ilumoormat aalisanngitsuulikkat raajat ukioq manna qanoq
piniarneqarnersut apeqqutigineqarmat, taanna Naalakkersuisut ulluni
makkunanerpiaq maani inimi taaneqartarsimasutut Royal Greenland nutaaq
suleqatigalugu qanoq iliuusissat eqqarsaatigineqarput.
Maannakkullu
Royal Greenlandip pisortaata noqqaassutaa najoqqutaralugu aammalu taakkua
iluarsiissutissat anguniarneqarneranni oqaatigissavara
Naalakkersuisuninngaanniit suliffissuit eqqarsaatigalugit
pingaaruteqarluinnarmat nunami tulaassuinissat salliutillugit aamma uani
pissarsiniarnermi isumannaarniarneqarneri. Taamaattumik ulluni makkunanerpiaq
aaqqiiniarnermi sinneruttut nunami suliffissaqartitsiniarnermi tunngatillugit
aaqqiiviginiarneqarnerat isumaqatigiinniutaavoq neriuppungalu ulluni
qaninnerpaani naammassineqarsinnaajumaartut. Taakku Naalakkersuisut
naammassigasuassamittut suliaralugit ulluni makkunani suliarimmatigit.
Tassa
aaqqiiviginiarnerani uani avataasiortut annerusumik imaluunniit
aaqqiivigineqassappata ajornartorsiutaanngilaq avataasiorlutik aalisartut,
kisianni nunamut tulaassuinerit qanoq ilillugit isummannaarneqarnissaat taanna
salliutillugu aaqqinniarneqarpoq.
Kisianni
nuannaarutigaara aamma taaneqarmata ilumoorami Kalaallit Nunaata
raajartassamigut aamma nammineerluni nungutsiniartarnissai
pingaaruteqarluinnartuupput, tassanilu aamma Naalakkersuisut
naammassiniarnerat Royal Greenland nutaaq peqatigalugu aaqqiiniarnerit
isumalluarfigaakka aammalu tassuunakkut akit tungaatigut aamma pitsaanerusumik
periarfissaqartitsiniarnissat ilanngullugit maannakkut eqqartorneqarmata.
Ole
Lynge, Inatsisartut
Siulittaasuat, Inuit Ataqatigiit.
Tullinnguuppoq
Mads-Peter Gønvold, Kattusseqatigiit oqaaseqartuat. Pingajussaaniilerami
naatsukullammik.
Mads-Peter
Grønvold, Kattusseqatigiit
oqaaseqartuat.
Tassa
qaqisaqattaarnianngikkaluarpunga, soorunami allatut
isummertitsiniaalillaraangamik oqaaseqaatinnik paatsiveerussaalillaraangamik
taanna nuannerneq ajorami. Issuagaa naallugu issuasavara akuerisinnagukku.
Siullermik
Kattusseqatigiinniit taamatut Inatsisartut inatsisissaanut siunnersuummi
saqqummiunneqarnera inatsisissatut siunnersuutip saqqummiunneqarnera
eqqarsarnartoqartipparput. Taamatut allaqqasut ilaqarput imatut: "Tassami
pingaaruteqarluinnarmat Inatsisartut inatsisissaattut siunnersuut
sapinngisamik Inatsisartut suleriaasiat naapertorlugu
oqaluuserisassanngortinneqartarnissaat pisariaqarmat. Taanna
paatsoorneqarsinnaanngilaq.
Paatsoorneqarsinnaanngilluinnarpoq
uani aalisarneq pillugu Inatsisartut inatsisissaattut allannguutissatut
siunnersuummi taamatut saqqummiussisoqarneranut tunngavigaarput aamma
raajarniarneq kisimi aalisarneruinnaanngimmat. Qaleralinniarlutik aalisartut
allallu saattuerniarnermi aalisartut eqqarsaatigineqarsinnaapput. Taakkua
qanoq pineqarniarpat? Tamakkuuku eqqarsaatigalugu. Soorunami aamma allanut
pulallattaartugut. Imaanngilaq tamatta assigiinngitsunik isumaqartaratta.
Taamaanngilaq oqariartuutigut isumaqatigisarpagut. Soorlu aamma ilaatigut
partiiniluunniit aamma assigiinngitsunik isumaqartoqartartoq.
Oqariartortoqaraluartoq akerlerineqartarpoq aamma. Taanna
eqqaamaneqartariaqarpoq uagutsinnut taamatut tutsitsiniaasoqassanngilaq.
Ole
Lynge, Inatsisartut
Siulittaasuat, Inuit Ataqatigiit.
Qujanaq,
kisianni una oqaatigilaassavara marlussoriarlungaagunarpoq suleriaatsip
unioqqutinneqarsimasutut nipilerlugu oqaatigineqarmat erseqqissaannassavara
'41 najoqqutaralugu una saqqummiussaq siunertaasoq pissusissaatut
suliarisimammagu. Tamarmillu
Inatsisartut akuersaarsimallugu .
Tullinnguuppoq Aalisarnermut, Piniarnermut Nunaqarfinnullu Naalakkersuisoq.
Sapinngisamik naatsunnguamik. Taava tulleriumaarpaa Augusta Salling.
Hans
Enoksen, Aalisarnermut,
Piniarnermut Nunaqarfinnullu Naalakkersuisoq, Siumut.
Naatsuarannguamik. Siullermeerama utoqqatserpunga Otto Steenholdtimut
akissutissara puigorakku, tassalu pisarineqartut massakkumut siornamut
naleqqiullugit massakkut pisarineqartut 4.000 tonsinik kinguaqqagamik.
Taavalu taanna 10.000 tonsinik oqalunneq sumik tunngaveqarnersoq massakkut
misissorneqarpoq pisortaqarfimmit, taanna Otto Steenholdtimut apuutilaassavara
puigoraluarakku oqaatiginarlugu utoqqatserpunga.
Uani Mads-Peter Grønvold akineqareermat Siulittaasuminngaanniit
ersarissumik, taanna oqaaseqarfiginiaraluarakku isumaqarpunga
assortuussutigineqartariaqanngitsoq, kisianni tassa Inatsisartut inatsisaat
malillugit maani akuerineqarnikuuvoq aamma Kattusseqatigiit tassani
peqataapput.
Qujanaq.
Ole
Lynge, Inatsisartut
Siulittaasuat, Inuit Ataqatigiit.
Augusta Salling, Atassutip oqaaseqartua. Pingajussaanik.
Augusta
Salling, Atassutip
oqaaseqartua.
Tassaana Aalisarnermut Naalakkersuisoq siuliani oqaaseqarami kingulliup
ilaani ilanngullugu oqaatigimmagu mianersuutigisariaqartoq taamatut imaluunniit
kattussuunnermut atatillugu ilaasa nunguunneqartoornissaat taanna
mianersuunneqartariaqartoq. Isumaqarama uanga, uanga paatsoorsimanngikkuma taava
paatsoortoqarsimassaaq. Imaappormi kattussuuttussat pisassaqareerput. Ullumikkut
pisassaqarput, taakkulu pisassatik kattussuunnermikkut aalisartussaavaat allat
pisassaannik pisinngikkunik pinavianngillat. Taamaattumik isumaqarpunga uanga
ernumassutigineqartariaqanngitsoq aamma ernumalernissamik
pilersitsiniartoqartariaqanngitsoq arlaasa pisassaminnik
arsaarneqarsinnaanissaannik nunguunneqarsinnaanissaannillu
siunertaqartoqanngilluinnarmat uani kattussuutitsiniarnermi imaluunniit
kattussuunnissami periarfissaliiniarnermi.
Ole
Lynge, Inatsisartut
Siulittaasuat, Inuit Ataqatigiit.
Taava
Aalisarnermut, Piniarnermut Nunaqarfinullu Naalakkersuisoq.
Hans
Enoksen, Aalisarnermut,
Piniarnermut Nunaqarfinnullu Naalakkersuisoq, Siumut.
Atassutikkullu
akerleriinngilluaasarpugut - isumaqatigeeqqissaarpugut. Uani una kingullermik
oqalukkama Otto Steenhotdtip oqaasii tunngavigalugit ilaatigut periarfissat
namminneq aalajangersuisinnaanissanut tunngasut pillugit oqaatigigiga. Ilai
aamma sorunami sillimmaanneqartariaqarmata.
Qujanaq.
Ole
Lynge, Inatsisartut
Siulittaasuat, Inuit Ataqatigiit.
Tassalu
taamaalilluni oqaaseqarumasut tassunga killeqarput aamma taamaalillugu
Inatsisartut aalisarneq pillugu inatsisissatut allannguutissatut Inatsisartut
inatsissaatut siunnersuut siullermeerneqarnera naammassivoq
aappassaaneerneqartinnani aalisarnermut ataatsimiititaliap suliassaq
misissuataassavaat.