Oqaluuserisassani immikkoortoq 01 |
|
||
| Siullermeerneqarnera | Aappassaanneerneqarnera | Pingajussaaneerneqarnera | |
Ataatsimiinnermik aqutsisoq, Ole Lynge, Inatsisartut
Siulittaasuat:
Ukiumi 2000-imi Inatsisartut
siullermeerlutik ataatsimiinnissaannut tamassi qamannga pisumik tikilluaritsi.
Neriuppunga ataatsimiinnissarput tamatsinnut pissarsiviulluarluni
ingerlajumaartoq.
Ingerlaqqitsinnanga
nalunaarutigissavara Inatsisartuni ilaasortaq Mads Peter Grønvold allagaqarluni
qinnuteqarmat Inatsisartut ataatsimiinnerisa nalaanni ulluni 15. - 23. februari
ilanngullugu sulinngiffeqarumalluni piffissami tassani meeqqami
paarsisussaqannginnera pissutigalugu. - Siulittaasoqarfiup inassutigissavaa
qinnuteqarneq Inatsisartunit akuerineqassasoq. Apeqqutigissavara tamanna
akuerineqarsinnaanersoq?
- Akuerineqarpoq.
- Kattusseqatigiinni
siunniisussap siulliup Tom Ostermannip qinigaasiinnaanermut piumasat
eqqortikkai paasiniaanikkut paasineqarmat tulliullugu Inatsisartunut
inassutigissavara Tom Osterrmann Mads Peter Grønvoldip
peqataasinnaanngikkallarnerani Inatsisartuni ilaasortaagallassasoq. - Tamanna
akuerineqarsinnaanerluni?
- Akuerineqarpoq.
Tom Ostermann, Inatsisartunut
tikilluarit, qinnuigissavakkit inissannut ingikkiartoqqullutit.
Ilanngullugu
ilisimatitsissutigissavara Inatsisartuni ilaasortaq Finn Karlsen napparsimanini
angallannikkullu pissutsit pissutigalugit ullumikkut anngussinnaanngimmat,
aatsaallu pingasun-ngorpat maanga anngusssinnaanissaa naatsorsuutigineqarmat.
Taamatuttaaq aatsaat
qanittukkut, Inatsisartuni ilaasortaq Siverth K. Heilmann aamma
napparsimalersimanini pissutigalugu ullumikkut najuussinnaanngikkallartoq
nalunaarutigissavara.
Ukiut hundredit, tusindtillumi
inikilermata pisariaqartippara Inatsisartuni sulinerput pillugu pisarninnit
annertunerulaartumik oqaaseqassallunga.
Namminerunitsinni ukiut 21-t
inulaarlugit atoreerpavut; aammalu ukiut taakku ingerlaneranni Inatsisartut
Naalakkersuisullu akornanni pissutsit allanngoriartuaariarlutik aatsaat
1990-kkut qiteqqunneranni Inatsisartut Naalakkersuisullu oqartussaaffiisa
akisussaaffiisalu ersarinnerusumik allanngortinnerat pivoq. Taamaaliornikkut
anguniarneqarpoq illuatungaatigut Inatsisartut inatsisiliortutut, inuiaqatigiit
ingerlaneranni pingaarnernik tunngavilersuisutut aammalu Naalakkersuisunik
nakkutilliissutut illuatungaatigullu Naalakkersuisut ulluinnarni inuiaqatigiit
aqunneqarneranni ingerlannerannilu sallersaasutut oqartussaaffiisa
akisussaaffiisalu ersarissaaffiginissaat. Taamaaliorneq aamma siunertaqarpoq
inuit tamat naalakkersuinikkut oqaasissaqaqataanerisa patajaallisarnissaannik.
Suliffinni suniluunniit suliat
suleriaatsillu atuuttut allanngortikkiartortariaqartarput inuiaqatigiinni
pissutsit piviusut allanngoriartornerat ilutigalugu. Aamma taamaappoq
Inatsisartut sullivittut eqqarsaatigalugit.
Pissutsit ataatsimoortut
tikkuarusutakka tassaapput Inatsisartut ataatsimiititaliaannut tunngasut.
Inatsisartunit tikkuarneqartareersutut ataatsimiititaliat amerlassusii,
taakkualu akunnerminni suliaasa oqimaaqatigiinnerat annertuumik
misissoqqissaartariaqarput allanngortitertariaqarlutillu. Suliassaq taanna
annertooq Inatsisartuni ilaasortaasugut tamatta peqataaffigisariaqarparput.
Siulittaasoqarfiup
pilersaarutigaa aprilimi ataatsimiinnnissamut atatillugu apeqqutit
taakkunun-nga tunngasut oqallisiginerat aallartissasoq, tamatumalu
kingornatigut ukiaru ataatsimiinnissami tamarmiulluta pissutsit nuutaamik
aalajanersaaffigisinnaanissaanut neriuuteqarluta.
Taamatuttaaq
pisariaqartinneqarpoq ataatsimiititaliat saniatigut ilaasortat ataasiakkaat
angalasinnaatitaanerinut aningaasarsiaqartitaanerinullu tunngasut ullutsinnut
naleqqunnerusumik malittarisassaqartinnissaat. Suliassaq taanna
Siulittaasoqarfiup Naalakkersuisullu suleqartigiillutik naammassiniagassaraat.
Naatsorsuutigigaluarparput aprilimi ataatsimiinnissami allannguutissanik
saqqummiussaqarsinnaassalluta; tassanili suliassaq pisariuvoq
allnngortitigassat annertoqimmata. Naatsorsuutigilluinnarparput ukiaru
ataatsimiinnissamut aamma saqqummiussisoqarsinnaassasoq.
Apeqqutit tulliullugit
tikikkusutakka tassaapput Inatsisartut Naalakkersuisullu akunnitsinni
suleriaatsitsinnut tunngasut.
Namminersornerusuni sulinitsinni
qitiullutik inissisimasut - tassalu Inatsisartut Naalakkersuisullu -
pinngitsoornatik suleqatigittussaapput, naak oqartussaaffimmikkut
assigiinngitsunik inissisimanertik pissutigalugu aporaaffeqartarsinnaanerat
piffissap ilaani pinngitsoorneqarsinnaanngikkaluartoq.
Suliassavut naammaginartumik
pisariitsumillu isumagisinnaassagutsigit pisariaqarpoq arlatsinnit
pisariaqartitatta pissarsiarisarnissaat; tamannali ima paasisariaqanngilaq
sunnguit allaat minnerpaartaanut ilanngullugit immitsinnut pisarissersortassasugut.
Immitsinnut ima annertutigisumik ilumoorfigisiinnaasariaqarpugut
naatsorsuutigisinnaallutigu Naalakkersuisut akunnerminni akisussaaffitik
suliatillu namminneerlutik isumagisinnaagaat Inatsisartunit
akuleruffigineqan-ngikkaluarlutik; aammami nalunngilara Inatsisartuni
ilaasortat qanoq kissaatiginngitsigigaat Naalakkersuisunit sulinerminni
akuleruffiginiarneqarnissartik.
Inatsisartut Naalakkersuisullu
naammaginartumik sapinngisamillu pisariitsumik akunnerminni pissuseqarnissaat
siunertaralugu oqaloqatigiinnerit aallartipput ingerlateqqittariaqarlutillu.
Isumaqarpunga ukiuni kingullermi
ingerlatsinerni suniluunniit pisariillisaanissamik piumasaqartarneq aamma
uatsinnit Inatsisartut tungaannit isumaqataaffigisarput oqaasiinnaassanngippat
piumassuseqartariaqartugut immitsinnuttaaq qiviarluta
timitaliiniaqataanissatsinnut.
Pisarninnit taamak
annertunerumaamik oqaaseqarlunga aammaarlunga tamassi ataatsimiinnissatsinnut
tikilluaqqoqqippassi sulilluaqqullusilu.
Tikilluaqqusineq naammassivoq.